رواية فصلية بديلة ( شموخ ) الجزء الثاني الفصل العاشر بقلم ام ملكوت
:- سمعتهم كاموا يردون يطلعون وانه فلتت من يم الباب ودخلت للصاله بسرعه شافتني امي وكالت وهي مخليه ايدهه على كلبهه ..
_بسم الله الرحمن يمه شبيج اجيتي تركضين شصاير
_يمه هذا من كل عقله جاي يطلب ايدي من ابوي شنو مفكر نفسه بله شيباته براسه وبناته بعمري وجاي ياخذ رخصه من ابوي حتى يحاجيني بهل موضوع تهي بهي غير افرغ المسدس براسه شكله علمني استعمل المسدس حتى اقتله بي خلاص
_صلي على محمد يمه منو هو الطلب ايدج
_الاستاذ حسن منو غيره بالدوانيه يعني
_اهدي يمه جا الرجال مدام اجه لابوج معناهه نيته شريفه ومايريد يحجي وياج بخصوص شي الا اذا اهلج موافقين لا تتهورين وتسويهه صدك وتضوجين الرجال منج يكفي متحملج وداير باله عليج بالتدريب صار اشهر هذا الشي مايشفعله
_يمه يغثون يحركون الدم يابه انه مطلقه وعندي بنيه شكو تجون لوحده هيج لو سمعوا بيهه محققه راح تصير زنكينه بلكي يحصلون سياره شقه مني ههه مايدرون اجحف من الجحف انه
_لا يمه مو كلهه الناس تدور مصالح وهو الرجال ماعايزه لا فلوس ولا راتب ويريدله بس مره خطيه
_شبيج انتي يمه بعدله سنتين ويتقاعد ويضل عايش عل ٦٥٠ الف هاي اذا مو اقل وين يكلك راتب وتقاعد ووين بس تقاعد عندي اعيش عليهن وثانيا انه ماريد اتزوج ماريد اختلط بجنس ادم غير اهلي و تره بكد عمي شعلان هوه عمره بالخمسين شجابرني اخذ واحد اكبر مني ب٣٠ سنه اكيد تخبلت
_والله يمه هم صدك جبير شو هذا هسه الله كريم بعد هيه حياتج والكلب دليلج اذا مارتاحيتي لهذا الشخص يولي يجي الف واحد احسن منه واصغر لا تضايقين نفسج علموده
_هو مال يولي اي يولي بس خاف يحاجيني باجر وافقد السيطره على لساني واجفص بمعدته خرب شكد جنت محترمته وشكد كرهته هسه بحيث لو يكابلني جان جبته بوكس رجعت ملامحه عشر سنين ليوره اسوي شاروخان
_ههههه فلشج ولج شلون هاي نوب
_هههه والله زلم جيس حب يعع شكد صرت اقرفهم والحسين ولا هسه انه حاركه دمي عليمن اروح اسبح وارتاح وانوم بنيتي بحضني وعود الصباح رباح نشوف تاليتهه ويه الاستاذ حسن اعرف شلون ارد عقله لراسه
_على كولتج يمه خيولي وحتى من يفتح وياج الموضوع هيه كلمتين كليله ماريد اتزوج واريد ابقى على بنيتي وهاي هيه لا تناقشينه وتبرريله لان الناس اذا واحد بررلهه يعتبرون عدهم امل ويكدرون ويه الملحه يقنعونج
_اي اعرف عندي شخص نفس هل نوعيه الله يهدي كون عل كلبي عل بملحته والمشكله ماكدر ارفسه واخرب صداقتي بي عزيز مو بيدي وجه القوري
_ياهوه هذا ولج
_هيج يمه واحد ماتعرفينه
_شسوه بس لا هم يلح عليج يريد يتزوجج
_لا يريدني احبه بس مالج شغل بي انسي انه منطيته على كد عقله ويدري بيه حتى لو لح الف سنه ماقبل بي
_والله يمه ماتنعرف الناس هل وكت ماتعرفين الزين من الشين وكلمن يكول انه احسن وانه احبج اكثر وهمه كلشي ماكو
_اي يا يمه احسج كلما كبرتي بالعمر صرتي تفهمين بنيتج اكثر وتشجعينهه على عدم الزواج شنو صاير بس لا متعاركه ويه الحب
_وين يايمه هو بي حيل يشيل روحه هسه حتى يتعارك وياي خطيه
_الله يمديه الحيل والقوه والصحه وطوله العمر ياارب
_امين بنيتي امين
_يله امي روحي يم بابا انتي وانه راح ادخل اسبح انه وبنيتي وننام
_ماشي يمه اخذي راحتج حبيبتي
بست راسهه واخذت ريانه من عدهه ورحت لغرفتي ماشتهي اتغده انسدت نفسي دخلت ذبيت ملابسنه طلعت الحوض مالتهه ترسته ماي وكعدتهه بي يمي بالحمام وصارت تطفر
وتضحك تموت عل ماي نهاركله مجرفعه بالحوض وتسبح تريد تصير سباحه بعد امها وحيلهه ههه .. كملنه سبح واجيت نشفت جسمهه لفيتهه بالخاوليه
وشلتهه طلعتهه بره طلعتلنه ملابس بدلت وبدلتلهه وكعدت امشط بشعرهه كملت وكامت على حيلهه باستني بخدي وحضنتهه احس حضنهه دوله ووطن
بحاله .. شويه وصاحتني امي اخذت ريان وطلعنه بره لكيتهم بالصاله هي وبابا ووجوهتهم ماتتفسر.. اجيت كعدت يمهم وكتلهم..
_نعم امي صحتيني
_اي يمه ابوج يريد يحجي وياج
_اي بابا احجي
_بويه استاذ حسن حاجي وياج من قبل او مبينلج شي
_لا بس السموحه منك بابا انه سمعت استاذي شنو طلب منك واذا تريد تحاجيني بموضوعه اتمنى تعفيني من النقاش
_براحتج بويه بس ردت اسمعهه منج انه يبنيتي هم ماريد اظلمج واكطع بنصيبج ردت ارفضه وكتله بحالتج بس هو اصر يحجي وياج وانه ماصحتلج حتى اقنعج او اناقشج فقط اريد اطلب منج ان
ماتتهورين وتغلطين بالحجي ويه هل رجال لان يابويه تدرين بي شلون وكفلي وكفه ومو اول مره يساعدني ماريد اطلع بالخجله وياه رفضي بس بادب حتى لو لح عليج لا تتجاوزين عليه بالكلام نفس بقيه التقدموا الج
_تمام بابا حاضر ماراح احجي وياه كلمه جارحه او أتجاوز عليه راح ارفضه مباشرتا واشرد من كدامه لان لو رجع لح بعد رفضي اله ماضمنلك اضل ساكته
_لا بويه هو رجال ثكيل ماعنده سوالف المزعطه واللح واذا شافج ماتردينه ورفضتي بشكل مباشر راح يبتعد عنج ولا كأن شي صار
_علواه لو هيج لان حتى انه مالي خلك ادخل بدوامه وياه وخاصه هو المدرب مالتنه
_لا بويه انشاءلله ماكو شي
_انشاءالله بابا الا اكول مرتضى ومحمد رح يرجعون هذا الشهر مو
_اي انشاءلله اذا ماصارت عراقيل
_انشاءلله يرجع بسلامه لازم ننظف غرفهم امي ونرتبلهم الوضعيه
_اي يمه بعد قبل لا يجون نسوي عمل شعبي عليهن ونرتبهن الهم
_تمام شو ضوجه سلام وين مارجع من جامعته
_لا يمه رجع قبلج اخذ كتبه وراح لصديقه جوارينه يدرس يمه
_هاا تمام
باثناء مانحجي بي دخل سلام وكال..
_السلاااام عليكممم اجمعون
الكل : وعليكم السلام
_وين جنت ولك سلوم دراستيش هاي عند صاحبك
_اي شموخه دراسه ماتعرفين انتي بسوالف المهندسين
_اييه جان حلمي هذا وانت هسه حققته
_جا شلون قير انه محقق الاحلام
_هههه لا صدك بيناتنه وين جنت
_احم اكلج بس مو تكولين لاحد
_لا ماكول
_جنت ادرس نننن
_هههه لا صدك احجي تره اروح اسال صديقك
_شحدج تطلعين احش ريولج
_اوي شهالرجوله يمطركع
_جااا شلووون غير انه زلمه البيت لو مو بعينج
_والنعمل
_هاي شنو هل كلاو نوب
_هههه
_اشو انطيني ريانه خالهه خلي اشمشمهه مشتاكلهه بت الشرشوحه
_ايا مبهذل
_دنطيني ماشبعتي منهه هيه ريانه سوده ياريتهه هم حمره
_اشو انطيني ريانه خالهه خلي اشمشمهه مشتاكلهه بت الشرشوحه
_جا شمالك مجلب بيهه وتشمشم اذا سوده وماعاجبتك
_بوياااي شهل كرز هذا
_ههههه
ضل شايلهه بحضنه ساعه يبوس بيهه ويشمشم ساعه يدغدغ بيهه لو يحك لحيته بخدودهه وهي تنزعج منه عفته يتماطل وياهه يلعب وياهه وكمت صبيتله غده وجبتله الصينيه ماقبل اخذ ريان منه
خلاهه بحضنه وبقى يوكل بيهه لكمه اله ولكمه الهه لحدما كملوا شلت الصينيه ورجعت لميت الهوسه السووهه بالكاع من الاكل مسحت الارضيه ورحت غسلت الماعين .. اجه سلام انطانياهه وكال..
_هاج يله تعبت من البوس خل اروح اسبح وانام
_ههه الله يساعدك ذبلن خدود بنيتي من وراك
_يذبلني ومايذبلن هل خدود السمره ولكم بوياااي دنطيني عضه فدوا
_لا ولك لا تعضهه تتاذه
_دنطيني تره وعلي اعضهه وانتي نايمه
سحبهه مني وعضاهه بخدودهه وانه لزمت خدودي عبالك العضه بيه مو بيهه دمعت عيونهه ورادت تبجي واللوتيه بس بوسهه سكتت وكامت تضحك وعيونهه تلمع بيهه الدمعه انكسر خاطري عليهه..
اخذتهه منه وراح لغرفته وانه رحت غسلت وجهه وحلكهه ورجعت للصاله كعدت يم اهلي ونومتهه بحضني .. صفنت افكر شلون راح ارفض الاستاذ حسن بدون ماجرحه بالكلام تراود لبالي
ذكرى قبل سنه ونص وانه بالمعهد لمن جنت كاعده بالقاعه ومنتظره الدكتور يجي ويه الطلاب شويه ودخل اخذلنه محاضره للشريعه وامتحنه بالاوراق يومي ووره ساعتين خلصت المحاضره وطلع
الاستاذ بقيت كاعده اكلب بالنقال وحسيت بشخص كعد عل رحله مقابيلي والتفت علي رفعت عيوني من دون راسي باوعتله باستغراب وكال وهو مبتسم بغباء..
_هلو شموخ
_هلو بيك منو انت
_شدعوه ماتعرفيني وانه صديقج بالمعهد
_انه اسمي حمزه وياج مرحله اولى معهد وبصراحه الي فتره مراقبج وشفتج خوش بنيه وحاب اتعرف عليج واخذ عنوان بيتكم حتى اجي اتقدملج اذا ماعندج مانع
_هوب هوب حط رجليك بالكاع وين طرت باحلامك
_لا احجي صدك تره مو بس احلام
_هاا هيج كولتك
_اي
_زين من خلال مراقبتك الي ماعرفت اني مطلقه وعندي بنيه
_هاا لا صدك انتي مطلقه وعندج بنيه لو تجذبين علي
_مالي مصلحه اجذب وكل زميلاتي بالقاعه يعرفن هل شي بس انت جنت ملتهي تراقب وماسمعت الخبر هذا
_ميخالف ماعدي مشكله مدام اعرفج خوش بنيه ومؤدبه وماطلع منج شي مو زين مستعد اتقبل بنتج واعتبرهه مثل بنتي
_شوف يا حمزه اولا انه فكره الزواج خلعتهه من بالي وحياتي ويه خلعه طليقي ثانيا بنتي مو عاله ولا تحتاج شخص يحاول يتقبلهه ولا انه مستعده اعيش بنتي ويه شخص غريب ماعرف شنو البداخله وحياته
_اي عادي نتعرف على بعضنه لحدما تمر السنه هاذي
_هففف الضاهر انت ماتفهم بالكلام حاولت اسيطر على اعصابي وافهمك بس ماكو فايده..
وكفت اخذت كتبي وطلعت من القاعه بعدني انزل من الدرج واجه وراي يحجي بصوت عالي يقنع بيه والطلاب كلهه تباوعلنه ومعهد اسلامي هوه يعني هيج مناضر مامالوفه عليهم ومامسموحه بالمكان وكفت وباوعتله رفعت اصبعي بوجهه وحجيت بصيغه تهديد..
رفع اديه باستسلام وهز راسه ب اي وهو مبوز وجهه نزلت ايدي وطلعت من المكان كله خابرت لبابا واجه اخذني من المعهد وقتهه سالني
وحجيتله الصار ونصحني اذا مامفكره بالزواج ان ابتعد عنه واخصمهه وياه ولا اجيب الفضايح لنفسي وان ما اجه بالحسنى يروح هوه وخواني يتفاهمون وياه..
ثاني يوم رجع حمزه حجه وياي نفس الموضوع وماحجيت ورديت عليه ولا بكلمه فقط اخذت كتبي وجنطتي وطلعت توجهت للاداره وهوه وراي وكف كبالي وكال..
_تحجين صدك شموخ من كل عقلج رايحه للاداره تشتكين علي..
كلبت عيوني وهزيت راسي ب اي ودفعته من طريقي وصلت ودكيت الباب كال المدير تفضل والتفتت باوعت لحمزه وهوه واكف صافن علي بتوتر ووجهه صار اصفر سديت الباب بوجهه ودخلت سلمت اوراق المشروع اللميتهم من الطلاب وكتله..
_استاذ بقه بس الطالب حمزه تجاهل المشروع وماسوه شي بقت يمكم اذا تردون تحاسبونه او لا
_وشنو اسبابه ليش ماشتغل عل مشروع مثل باقي الطلبه
_ماعرف سيدي الضاهر يريد يتزوج كاعد يفكر بالزواج وعايف دراسته ومشاريعه الواجبه عليه
_اذا يريد يتزوج خلي يطلع من المعهد ويتزوج لا يضل يشوش الطلاب ويكون وجوده عاقه علينه
_اهده استاذ لان عرفت منه ان اهله كاعد يضغطون عليه حتى يتزوج انت دز عليه وحاول تحجي وياه وتتفاهم واذا كلك انه بارادتي اريد اتزوج فيكون جذاب استاذ وتكدر تصرف وياه
_تمام روحي انتي وخلي يجيلي حالا
_حاضر استاذ ..
خليت الاوراق عل مكتبه وطلعت لكيته بعده منتظرني بالباب رحت يمه وكتله وانه امشي بدون ماباوع بوجهه..
_المدير طالبك حالا
_ليش شيريد مني شموخ لحضه اوكفي كليلي شيريد مني اشتكيتي علي شنو..
عفته يسال ويمشي وراي تجاهلته تماما وهو من شافني ماجاوبته وكف وراح لغرفه المدير .. رجعت للقاعه خليت كتبي وكعدت اكلب بيهن فتره ورفعت
راسي شفته واكف بالباب ويباوعلي بحيره تجاهلته ودرت عيني عل طلاب اباوعلهم وهمه يخترعون اشياء يتلهون بيهه اجه من كبالي وكعد
بمكانه عل كرسي ومستمر يباوعلي بتردد باوعتله بملامح بارده ودار وجهه عني وهو يهز براسه ومن بعدها صار يتكفى شري ومايختلط وياي بمكان غير
القاعات الدراسيه ورغم نضرات العتاب بعيونه الا اني ابد ماحسيت بضوجه او بتانيب ضمير اتجاهه لاني كارهته وكارهه كل شخص يحاول يحبني او يتقرب مني..
"كأن قربي عقاب لكل الرجال وكأن نار قلبي طغت على ملامحي وجسدي وكل من يقربني يحترق بها ف يا ترى هل هنالك نار كهذه النار تخلف شرارات وبركان "
فزيت من صفنتي لمن حسيت برجلي خدرت من ريانه شلتهه خليتهه عل مخده بصف الحايط ونمت يمهه بقيت امسد على شعرهه وافكر بالاستاذ حسن ماريد اكسر خاطره وكلام بابا صحيح هو ساعدنه هواي ومايصير اقلل ادب ويا او اعاقبه لان حاول يتقدملي نفضته من افكاري على اثر لمسه امي بقت تمسد على شعري وانه امسد على شعر بنيتي احساس الامومه ماكو مثله بالدنيا وهنياله العنده بنيه وام تحن عليه وتحبه وتسنده لكبرته..
.
.
__في مكان اخر __
"اتدرين ان غيابكِ عني بارد كالشتاء على اضلعي ،
وقربكِ كحرارة شمس الصيف تحرق فؤادي ، فأخاف الاقتراب؛ واخاف البعد ومابين الفصلين هنالك فتور الخريف يسكن جوفي..
ياا
ايتها البعيده عني الساكنه في القلب ،لا اعرف
لماذا كل هذا الحنين مني لكِ وانتِ لاتريني كما اراكِ ،
لاتشعرين بغيابي لايهمكِ بعدي عنكِ ؛
أأنتِ جليد ام انكِ تتصنعين هذا كي ابقى بعيدا ،
تبا لقلبي الذي يأن باسمكِ ياقاتلتي "
//في احدى دوائر النيابه العامه في كربلاء ،
هنالك شخص قلبه عاشق اسير للذكريات ،
صبور ضد الصعوبات ، قوي لا يهاب الموت في
المهمات،
ولا يوجد في قاموسه المستحيلات ،
جالس في قوقعته وعالمه الخاص وفي يده تتسابق ارواح وحقوق الضعفاء من الاشخاص،
شخص وقور للحق ناصر وللباطل زاهق ؛ لم تضعفه التعرقلات ولم تغيره الملذات ،
كل همه رفع رايه النصر للابرياء ، ورد ثأر اصحاب الدماء وكل مايملكه من شغف يبذله للاحباء//
:- مكتب مشع بالانوار عكس ضلمه وحدتي لازم ملف المتهمين بقضيه سرقه البنك ومقابيلي ملف تعريفات متهمين ثاني واقارن بين صورهم وصور
المجرمين المعروفين والمطلوبين عند القانون توضحلي انهم جدد نازلين بالساحه مو من المجرمين المعروفين فراح ينضاف كم نفر جديد
للقائمه شخطت عليهم وضفت صورهم بالقائمه عالحاسبه ضغطت على زر الطباعه وكمت سحبت الورقه من الطابعه وكبستهه بملف المطلوبين رن التلفون الارضي ورفعت السماعه..
_قضيه رقم 1_
اجالي تبليغ عن قضيه خطف طفله صغيره بمنطقه بعد كم متر عن النيابه استلمتهه واتصلت على سالم فتح الباب ودخل دك تحيه وكتله وانه البس الدرع على صدري..
_اجمع الفريق بسرعه وحضروا نفسكم خلال ٥ دقايق نطلع استلمنه قضيه خطف بمنطقه ^^^
_حاضر سيدي..
طلع واخذت الاسلحه خليتهن بالصدريه عبيت العتاد ولبست القبعه براسي رفعت النقاب على خشمي وطلعت لكيتهم جاهزين اخذنه سياراتنه احنه وويانه سياره شرطه
وانطلقنه للمنطقه وصلنه خلال دقايق وشفت الناس ملتمين اشرت لفريقي فريق البحث الجنائي وراحوا فرغوا المكان من الناس دخلت لبيت الطفله المخطوفه واجتلي امهه تركض تدك وتلطم على بتهه وتكول..
_سيدي اروحلك فدوا ضناي رجعه الي بنتي اخذوهه راح يموتونهه راح يحركونهه فدوا رجعلياهه لحك على بنيتي قبلما يسوون بيهه شي سيدي دخيلك
_تمام اهدي هسه واحجيلي يمته حسيتي باختفاءهه واذا عدكم كاميرات بالبيت او لا
_اي سيدي عندي كاميرات و بنفس اللحضه النخطفت بيهه طلعت ردت اجيبهه من الشارع ماحس الا طبكت سياره اخذتهه وراحت مالحكت حتى الزمهه سيدي بنتي انخطفت كدام عيني وماكدرت اسوي شي ما طلع بيدي غير الم العالم واستنجد بيهم
_لا سيدي بس شفتهه بالكاميره مبين الرقم مالتهه تفضل اشوفك التصوير
_تمام..
دخلت وياهه انه وكم واحد من فريقي شغلت الشاشه مالت التصوير وطلعلنه مقطع الخطف سجلت رقم السياره بالدفتر وكتلهه..
_اكو شخص تشتبهين بي
_اي سيدي ابوهه اي هوه صار اسبوع نتعارك انه وياه علمود الوصيه مالتهه وهددني يحرمني منهه رغم انطتني المحكمه وصيتهه بس هو ضل يحوم عليهه ومو حبا بيهه ولا ميت عليهه بس يريد يحرك كلبي بيهه شلون طالبت بيهه وبنفقتهه بالمحكمه
_تمام راح اخذ تسجيل الكامره وانتظري ويكون احسن لو تطلعين من البيت تحسبا لكلشي يصير
_اي اطلع بس فدوا بنيتي رجعهه لحضني دخيلك سيدي
_انشاءلله
اخذت رقم السياره دزيته للدائره طلعولي موقعه وطلعنه بسياراتنه نتبع موقعهم وهم بعدهم يمشون متوجهين لمنطقه نائيه مابيهه بشر للحضه تراود
لذاكرتي لمن انخطفت شموخ وبقيت اجوب الشوارع ادور عليهه ويه جماعتي اخذتلي صفنه بالشوارع واحس كلبي ينعصر شوك الهه .. رجعت للواقع
_انشاءلله
فتره مو طويله و وصلنه للموقع توقفنه بعيد شوي عنهم وشفنه مجموعه جبيره من الزلم طلعوا
من السياره اخذو البنيه ودخلوهه وهمه يتلفتون منا
ومنا جمعت فريقي سويت الخطه وتوزعنه كل ٣ نفرات بجهه اشرت لسالم حضر سلاحه ودخل من وره المخزن يشوفهم شكم واحد ووين متوزعين بالضبط ..
شويه وطلع خله اللاسلكي على حلكهه وكال..
_سيدي مجموعهم ١٥ شخص متوزعين ٥ على الدرج و٥ بالطابق الثاني و٥ يم الطفله كاعدين
_تمام احم الو وصل وصل تسمعوني
_نعم سيدي
_مجموعه أ توجهوا وحاصروا المكان من الخلف ومجموعه ب تتوزع كل ٣ بجهه عن اليمين واليسار وانتو مجموعه ج ابقوا وياي نحاصرهم من الامام
الكل : حاضر سيدي
بقينه ننتظر فتره نجيك الوضع اخاف يجون اشخاص ثانين بس ماكو رفعت اللاسلكي الموصل بكل الفريق وكلتلهم هجوم ..
سحبنه قسام وداهمناهم الجوه رفعوا اديهم مستسلمين ورفعوا الجانو فوك ويلي عل درج سلاحاتهم وجههوهم علينه وحجيت بصوت عالي..
راح واحد منهم بسرعه وجه سلاحه على الطفله وكال..
_ابتعدوا واخلوا المكان قبلما امحيهه الكم بسرعه
_اول تالي تنلزم ان قتلتهه او لا وعقوبتك رح تتضاعف
_ ههه وانت راح يدمر مستقبلك كشرطي وياي
_ومنو كلك احنه شرطه
_ليش شنو انتو لو مو شرطه
_احنه مداهمين وفهمك كفايه
_ مايهمني شنو انتو ومنين اجيتوا بس الفهمته انكم جايين علمود هل طفله وان ما فرغتوا هل مكان اقتلهه
_احنه مداهمين وفهمك كفايه
_ اي عادي نفرغ المكان هوه ليش اجينه اصلا خلاص نطلع وتسلمنه الطفله بامان
_اي اسلمهه الكم بس طلعوا
_عناصر تراجععع
رفعنه ادينه ورجعنه بخطواتنه وهو يتقدم وبيده الطفله وجلابه وراه لحدما طلعنه من المكان وهو راح يمشي عل سياره مالتهم وقبلما يوصل طلع
القسم الوره من فريقي وخلوا السلاحات براسهم بقه واكف مثل الجماد ويتلفت طلع سجينه واخذ الطفله بحضنه وهي صرخت رفعت سلاحي وكتله..
_اترك الطفله احسن الك
_اامر جماعتك يبتعدون وانه اتركهه
_الضاهر بعدك ماتعرف منو كبالك
اشرت للشرطي المخلي المسدس براس الخاطف ابتعدوا عنهم والتفت هوه راد يفتح باب السياره ورفعت سلاحي وجهته على راسه واطلقت طشرت مخه الخنزير
وفريقي اطلق على كل واحد من عدهم برجله حتى لا يشردون ..
هو طاح واجت البنيه تركض رحتلهه بسرعه شلتهه من الكاع وضميت وجهه
بصدري رفعت سلاحي وجهته عليهم وفريقي القوا القبض عل
كل وخلوهم بسياره المجرمين الجايبينهه.. باوعت للبنيه واشوفهه طايحه مغمى عليهه بحضني ومابيهه نفس خليتهه بسرعه بالكاع
بجهه مابيهه شمس ونومتهه صحت على سالم يجيبلهه ماي
راح يركض يجيب ماي وانه صرت اضغط على كلبهه كلهه طفله بعمر ال٦سنوات
وهيج شافت طبعا تنصدم بقيت فتره اسويلهه الاسعافات الاوليه غسلت وجهه وحاولت اشربهه ماي لحدما فتحت عيونهه متنفسه وتكح شلتهه
وصعدت لسيارتي وسالم طار بينه للمستشفى وبقيه الفريق اخذوا المجرمين للسجن بالدائره.. مسافه الطريق وصلت للمستشفى ونزلت دخلتهه للطوارئ اجه الدكتور فحصهه وطلع صاير بيهه
صرع تنفسي شكللهه قنبنه اوكسجين وضربهه ابره مهدئ بقيت واكف يمهه وراح سالم جاب امهه واجه من بيتهه هيه شافتهه لو تخبلت دكت على
صدرهه واجت تركض على بتهه تشبك وتبوس بيهه وتسال الدكتور شبيهه وهو يجاوبهه مطمنهه عن حالهه.. التفتت لسالم وكتله يحضر السياره على ماكعدت الطفله وتطمنه عليهه اخذناهن وطلعنه
وصلناهه لبيت جد الطفله وكتبتلهه شكوى بورقه وانطيتهه الهه ترفعهه بالنيابه العامه وتنطيهم اسمي [#الملازم_راهب] حتى يصير شغلي معدل وياه..
دخلن للبيت بعدما تشكرتنه ورجعنه
احنه للدائره دخلت ونزلولي المتهمين جوه السرداب نزلتلهم لكيتهم مربطينهم مثل الخرفان عل اعمده خليت شغلات التعذيب عل ميز واشرت لسالم .. نزلهم الي واحد واحد استجوبتهم منهم
الاعترف بسرعه ومنهم التعذبوا ياله اعترفوا وطلع شخص ماجرهم حتى يخطفون الطفله انطوني اسمه وعنوانه وطلعت امرت سالم ياخذهم
للمستشفى العسكريه يتلقون العلاج الكامل واخذت باقي فريقي ورحنه لمكان ابوهه الكاعد بي حاوطناه من كل مكان ودخلنه عليه لكيته بمنضر مشمئز سحبته
من رجليه وكح*** كامت تصرخ وتستر بروحهه وهذا الكل* طلع فعلا ابو الطفله لفوا عليه جرجف وشمروه بالسياره ورجعنه للدائره نزلنه واخذوه
شحط للسرداب ونزلت وراه والخاطفين الصاحين مربطين بعدهم كعدوه عل كرسي وكعدت كباله احقق وياه لحدما اعترف اخيرا بعدما كسرت جم اصبع من اديه وكال..
_سيدي احجيلك بس لا تعذبني هل شكل ماتحمل بعد ايدي احتاجهه والله يبطلوني لو تخرب ايدي
_لا ليش انتظرني اكمل على باقي اصابيعك وتالي احجي اول تالي راح تدخل سجن ماكو بعد شغل
_لا سيدي دخيلك والله احجي واعترف بكلشي بس لا تعذبني
_يله اذا مصر تعترف ميخالف غرد
_سيدي احنه انه وطليقتي جنه على خلاف دائم من تزوجنه لهسه سيدي لانهه بت عدو ابوي واخذتهه بس حتى اكسر خشم ابوهه وجنت
اعذبهه سيدي وبالغلط صارت عدنه هل طفله ماجنت رايدهه ولحيت عليهه تطيحهه بس هيه جذبت علي وكالت طاحت واتفاجئ بعد كم شهر
ببطنهه لمن بدت تكبر وطلعت جذابه هنا سيدي انه انتقمت بالزايد حتى اللكمه كطعتهه منهه تمنيت تموت هيه والبطنهه من الجوع بس ماصار بيهه
شي لان عرفت تالي بنت الجيران الجبيره تنطيهه اكل من الشباك وهيه الحرضتهه ضدي سيدي وخلتهه تشرد وتطلب الطلاك مني
_وانت شسويت من طلبت الطلاك
_رجعتهه للبيت وحبستهه وبس وجبه وحده باليوم انطيهه لحدما دخلت بيوم على صريخهه وشفتهه تولد سيدي
_وديتهه للمستشفى من شفتهه تولد لو لا
_لا سيدي تمنيتهه تموت هيه والطفل
_بس طفلك هذا اذا مو الهه عل اقل جان اهتميت بسلامه طفلك
_جنت اضن ان ولد وكرهته لان ماريده يصير بي الصار بيه بحياتي ماردته يوكف كبالي ويذكرني بنفسي من جنت صغير وامي تعذب بيه بس
سيدي من شفتهه ولدت بنيه كيفت بيهه وتعلقت بيهه حتى حاولت انطي فرصه لزواجنه انه وامهه بس ماقبلت و وهمتني بقبولهه الي فتره لحدما
لكتلهه فرصه رجعت شردت مني سيدي وهل مره اخذت بنتي وراحت لاهل امهه واشتكتني لابن خالهه الضابط بحيث ماكدرت اسوي شي غير ان اقرر اخلص منهه واخطف البنيه
_بس لمن وصلنه لموقع الخطف ماشفتك هناك وجانوا مجموعه من المجرمين يمهه ماخفت عليهه واحد يسويلهه شي
_مايكدرون سيدي لان يخافون مني
_ليش
_سيدي لان انه رئيسهم وجرايمهم كلهه يمي اقل كلمه مني كلهم ينحكمون مؤبد
_تمام لعد الك موعد ثاني بهل غرفه حتى تنطقهه لهل كلمه وتحجيلي بكلشي تسوونه انته وهل عصابه حتى فرد مره اشتغل على لم شملكم بالسجن
_ احجيلك سيدي بس دخيلك طلعني منا شتريد انطيك بس خلصني انه جنت بحاله عصبيه ومحترك كلبي على بنتي واخذتهه مالي نيه ابد ان ااذيهه بالعكس انه احب بتي واريدهه تضل دوم وياي وماتروح لامهه وتبتعد عني
_بس المحكمه انطت الوصيه للام شكو تخطفهه من امهه هيج انت مسيطر ولا احترمت حكم القاضي ولا القانون وتروح تخطف تدري شنو حكم جريمه معارضه الحكم فوك جريمه الخطف
_سيدي بنتي هيه عسى ماموتهه محد اله شي عندي ياما ناس تقتل بناتهه شو ماتدخل القانون وماحجه
_ايباااخ جديده هاي ولو هوه كلامك صح لان لو فعلا نعدم كل شخص ياذي بنيه صغيره او مره جبيره جان مانتشرت هل جرائم ولا استهزأتوا بالقانون وهذا ينحسب ضدك بالمحكمه وعقوبتهه مو هينه
_لا دخيلك سيدي ماعيدهه بعد ماحجي هيج واستهزئ بالقانون بعد بس طلعني منا وانه وطليقتي نكعد نتفق على وصيتهه وبقاءهه عدنه
_اي حتى تقتل امهه وتاخذ البنيه وانت لو تريد تكعد وتقنع طليقتك جان سويتهه من زمان بس للاسف عقلك زبا** ومايفيد وياك الطريق المسالم تتكرص منه
_لا لا سيدي والله ماقتلهه والل...
_اسكت لك قشمر لا تحلف بالله جذب لا اطر مكفاك والشهيد حسين
_مو جذب سيدي
_ساااالم
_نعم سيدي
_كتبت اعترافه
_نعم سيدي
_سحلوووه..
بقه يتوسل ويحلف ويتكفر وانه شلون عقلي يكمز يضل من شخص يحلف جذب لزمته من ياخته وجبته بكله على خشمه فقدته الوعي اخذوه سحل
_نعم سيدي
للحجز ورجعت عيني على المعلكين بالاعمده تذكرت التحقيق مالتهم بعده ماكامل ولزمت معدتي جوعان اشرت للشرطي يسد عليهم السرداب
وطلعت عفتهم بالبرد والضلمه لباجر عود اكمل تحقيق وياهم هسه خل اروح اكلي لكمه.. رجعت لمكتبي شلت سماعه التلفون واتصلت عل مطعم
القريب طلبت المعتاد خلال ربع ساعه صار الاكل يمي دخل الشرطي دك تحيه خله الاكل عل طبله انطيته الحساب وطلع كمت ذبيت البيريه وفتحت
اول دكمتين من القميص نزعت ساعتي وكعدت عل قنفه فتحت العلاليك وطلعت الاكل كلهه لحضات ودخل سالم شافني وهز راسه متصنع الصدمه ويكول..
_لاااه هيج تغدر برفيقك سيدي وماتعزمني
_وانه اكول شعجب ماشم ريحه الاكل لهسه واجه
_هههه افا انه اشم ريحه اكل طيب وبلاش وماجي
_تعال لعد خلي ناكل حتى نرجع لشغلنه
_حاضر سيدي
دك تحيه بحماس واجه نسف رداناته كعد ياكل بخاشوكه مندي دجاج ومركه يابسه صفنت عليه بتعجب وهو انتبهلي اخذت الخاشوكه منه بنتر وكتله..
_سويلم تره هذا مندي مو بيتزا وتاكلهه بخاشوكه
_هاا مو خاف تلعب روحك مني
1 تعليق
_دكل اكل لا العب الاخمس على راسك هسه
_حاااضر سيديي
_ وجع صوتك
_نعم الله عليك سيدي الا اكول على طاري الوجع شلونه كليبك الموجوع ماشاف وحده ثانيه
_سويلممم اكل وانت ساكت لا اطردك
_مادام صار بيهه طرده معناهه الجواب لا كالعاده ..
باوعتله بخزره ورفع اديه باستسلام مستهزء رجعت اكل واحنه ساكتين كملنه وشبعنه كلت الحمدلله ولمينه الصحون الفارغه بالعلاليك اخذهن يشمرهن
بالحاويه وانه كمت غسلت سويتلي كهوه ورجعت كعدت على الكرسي واستلمت الملفات التركتهن عل نص منا لمر تقريب ال٣ ساعات خلص الدوام وكمت
بدلت ملابسي حضرت جنطتي قفلت المكتب وطلعت وعفت فريقي كلمن يلم بشغلاته حتى يروح لبيتهم ركبت سيارتي واجه سالم يركض فتح الباب و صعد يمي باوعتله بتساؤل وكال ...
_يله حرك سيدي
_وين رايح جنابك
_وياك
_وين لجهنم
_لا لبيتكم اريد اشوف مرت اخوي مايصير
_لا مايصير انزل يله
_وين رايح جنابك
_ ماكدر اعذرني سيدي اخوي موصيني امر عليهه اليوم واشوفهه خاف محتاجه شي هيه وابنهه
_الحمدلله احنه موجودين مامقصرين وياهه مو بحاجه سؤالك انزل يله عندي شغل
_بداعه الرفقه خليني اروح وياك بس اشوفهه من الباب وارجع
_ ماكدر اعذرني سيدي اخوي موصيني امر عليهه اليوم واشوفهه خاف محتاجه شي هيه وابنهه
_سويلممم
_تمام سيدي نازل
_ماريد اسمعلك حس الطريق كله مفهوم
_مفهوم سيدي ..
هزيت راسي وتنهدت حركت السياره ورحنه للبيت مسافه الطريق وصلنه ونزل سالم فتح الباب دخلت السياره للكراج ونزلت وراح سالم يغسل بالمغسله البره دخلت لكيت امي بالصاله وصحت بصوت عالي مسمع البنات..
_تسترن سالم حمى اسراء اجه وياي
_ها يمه الله يساعدك سالم اجه وياك
_ويساعدج حبيبه اي كاعد يسد الباب ويغسل هسه يدخل
_روح يمه غسل انت هم وبدل مايجوز تدخل عل طفل وانت تعبان وعركان
_انشاءلله يوم هذا سويلم خلي يمج يكعد لا يدخل لغرفه اسراء هيه خلي تكوم تطلعله
_اي يمه جا شلون غير خواتك كلهن هنا منين يكدر يدخل
_اي هاذهو رايح اسبح انه وابدل
_روح يمه حبيبي..
بست راسهه ورحت لغرفتي سبحت وبدلت وطلعت كعدت يمهم بالصاله شويه واجت اسراء وهي شايله ابنهه وتمشي كوه توه والده عمليه كام على حيله اخذ الطفل من اسراء وكال موجه الكلام الهه..
_انطينيا حبيب عمه شلونه امير بيتنه
_زين الحمدلله يبوس ايدك
_اي الحمدلله سبع بعد على خاله وانتي شلونج خويه شلون صرتي
_الحمدلله شوي احسن تفضل اكعد ليش واكف
_ اي وانتي هم كعدي مايصير توكفين هواي
_اي والله ماجنت ادري هيج القيصريه راح تسوي بيه
_يله هانت ماضل شي انشاءلله كلهه اسبوع وتردين على حيلج وتنورين بيتنه
_تسلم خويه شعجب اجيت وحدك
_جنت بالدوام واتصل علي رجلج كلي روح شوفلي مريتي شمحتاجه مامحتاجه واجيتلج ركض
_هههه تدري امس هوه يمي
_اه جا شو يحجي عبالك صارله اسبوع ماجايلج وشايفج بس الضاهر باله يمج وحاب يطمن عليج كل شوي
_اي خطيه المهم شلونكم انتو عمتي والولد شلونهم
_زينين يسلمون عليج
_الله يسلمهم
_والله امي بالهه يمكم كل شوي تكول اريد اشوف وليدنه وجنتنه اخذوني الهم ونكلهه عدنه شغل بعدين لحدما امس تعاركت ويه رجلج وكلهه الجمعه اروح واخذج الهه
_ههه اي خطيه ليش ماتجيبونهه شكد خبيثين انت وخوانك
_والله ياخويه شغل انتي عايشه ويانه وتعرفين بالوضعيه شنو وهاي شكم مره نجي من الدوام الج كبل لان مانلحك والطريق طويل
_اي صدك الله يساعدكم
_ويساعدج ام امير يله مدام شفتج وبوست اميرنه وتطمنت عليكم خليني ارفع الزحمه لا انسحل من اخوج تالي
_هههه لا انت تنور البيت بيتك هلا بيك يمته ماتريد تجي
_تسلمين مرت اخوي الكفو ديري بالج على نفسج وعلى اميرنه تراه امانه هذا واعرفج تصونين الامانه
_لا تحجي هيج توصل بالسلامه انشاءالله ديربالك بالطريق
_انشاءلله يله حجيه مع السلامه
_الله وياك وليدي..
كمت وياه طلعنه بره والتفت علي مد ايده وسلم علي وهو مبرطم مايحب الوداع بعد اخوه رفسته عني وطلع يضحك ودعته وراح يمشي عل شارع
العام .. سديت الباب وانه اضحك بكلبي عليه دخلت للصاله واجت بوجهي بان بهتت ملامحي تجاهلتهه ودرت وجهي عنهه ودخلت لغرفتي ..
لحد الان ماناسي سوايتهه وياي هيه وهل حقير اوس توقعت كلشي الا يجي يوم وتلعب وحده من خواتي وره ضهري وويه صديق عمري .. تمددت عل
جربايه شويه واندك الباب كلت تفضل ودخلت هيه باوعتلهه بعصبيه وكعدت على حيلي اجت بتردد كعدت عل جربايه وكالت..
_راهب عندي موضوع وياك
_اريد انام هسه مالي خلك مواضيعج
_راهب تذكر لمن بابا قبلما يتوفى وصاك بينه وكلك لا تجرح بيوم امك او اخت من خواتك ليش ماتوفي وصيته ليش كاعد تشلع كلبي وتجرحني وانت المعتبرتك سند الي من بعد ربي وابوي
_ #راهب عندي موضوع وياك
_ابوج لو موجود هسه يقبل بالسويتي كوني على يقين لو ابوج عايش وشاف الشفته جان ثاني يوم زوجج هاي اذا ماذبحج بليله ضلمه
_بيمن احلفلك ان مابينه شي حتى مراسله بالبيت ماراسله هوه مجرد بس كلي اريد اتعرف عليج فتره واجي اتقدملج وكتله بس بوقت الغدا نكعد نسولف كدام الناس لان مستحيل اكعد وياه وحدنه وبمكان مابي بشر
_لا تحلفين ولا تبررين وخلي ترجيه باذنج بينج وبين اوس مستحيل يصير نصيب ويكون احسن لو نسيتي هل سالفه ومدامج اجيتي برجليج اريد اكلج ان صديقي راد مره وكتله عندي اختي الصغيره اذا تريد تعالوا شوفوهه
_تحجي صدك راهب
_اي ليش مجذب عليج من قبل
_لا فدوا ماريد مستحيل اتزوج غير شخص اموت روحي ولا اصير لغير اوس
_نجبييي لججج كاعددده كبالييي وتحجيين هل حجييي على شخصص غريببب
_خلاص راهب حقك علي بس صدكني ماريد اتزوج غيره وانت عندك عبير بعدهه مامتزوجه وهم اكبر مني مو انت كلت خواتي ازوجهن بالسره ليش اجيت علي بس لاني حبيت شخص ورد يصير نصيبي ليش هوه الحب حرام لو عيب
_العيب والحرام مو بالحب وانما بالسويتي باسم الحب
_نجبييي لججج كاعددده كبالييي وتحجيين هل حجييي على شخصص غريببب
_شسويت كلي شنو السويته اليسمعك يكول غلطت وياه وتجاوزت الحدود ماجني بس حجيت وياه حجي زملاء
_بان طلعي بره
_راهب ليش ماتخليني احجي صدكني ماكدر اخذ شخص غيره لو تكلب الدنيا على راسي
_تمام عود حضري نفسج الاسبوع الجاي خطبتج
_من منو
_من صديقي يلي تقدملج
_مستحيلللل كتلللك ماريييد اتزوووج ماااريد غيررر اوووس انتتت ماكاعددد تفهممم ماكاعدد تسمعع شحجييي ليشش تعذبونييي ليشش شنو سويتتت انه شردت وياااه زنيت ويااا تزوجته من وراك....
نطت عيوني بصدمه من كلامه وصياحه واخر جملتين ماتحملتهن انعمت عيوني وفار دمي قبلما تكمل ضربتهه على حلكهه بضهر ايدي وطلعت دمهه لزمت شعرهه لفيته على ايدي وحجيت من بين سنوني..
_شوفي ولج لسانج اذا حجه هل كلام مره ثانيه اكصه الج والله واوس شيلي من راسج خلاص اعتبري مات وفطس والا صدكيني اروحله هسه واكتله بطن بيته واشوف النذل اليطلع وراه فاهمممه
_عوفنيي شعري كطعته عوفنييييي الله لا ينطيكممم شسويتلكمم انننه شسويت عذبتوني ومرمرتوني ساعه السوده النولدت بيهه عدكم عساني ميته ولا جايه لهاي الدنيااا
_اششش ماسمعلج حس والا والخلقج هسه هنا ادفنج تراني متحلف بيج من زمان فتكفي شري ولا توريني وجهج بعد احسلج ..
نترتهه من ايدي وطلعت لكيت امي والبنات واكفات بالباب والقلق على وجوهن عفتهن وتوجهت لكراج بيتنه اخذت سيارتي وطلعت من البيت بقيت اجوب الشوارع وكل شوي تتراود لذهني شكلهه لمن
ضربتهه وبقت تصرخ من جهه اعصب عليهه ومن جهه احس بخذلان قصص ماي هوبس منهه ومن جهه اشفق عليهه بس ماكدر اطلع كل هذا البكلبي لاني مامنعتهه من اوس
الا لمصلحتهه ادري بروحي زودتهه لمن
ضربتهه بس لسانهه عم عليهه .. جنت رافض اوس كله بس حتى ما يجي يوم ويعيرهه ويكلهه اخذتج غصب عني واخوج لزكج بيه او يتكبر عليهه ويكلهه غصب عن اخوج اخذتج وكسرت خشمه ولا
يكلهه انتي حجيتي وياي وباجر تحجين ويه الف غيري ردت تكون الهه قيمه وقدر عنده وعند اهله ومحد يتجرأ عليهه بكلمه .. واوس صديقي واعرفه لو منطي بان بالساهل جان ماقدر هل نعمه بس
اصر وزاد حبه الهه بكل مره يجي واطرده من البيت لان حس انهه عزيزه والهه اهل وقيمه واخت الراهب هاي مو حي الله حتى ياخذهه وتكون ذليله ...
.
.
"نعم قد أكون أنا مزاجيه قد لا أكون مثاليه او قد أكون حاده الطباع او قد اتعجل في امرآ ما...
او صعبآ على احد لفت انتباهي او قد أكون عصبية كما يتحدث البعض عني او متقلبه المزاج...
او قد تكون شخصيتي دمقراطيه او انني أرفض مقارنتي مع احد...
فالمساوه لا تليق بي قد يتخذ البعض عني فكره الإمرأة المغروره او الإمرأه المتسلطه او المتحكمه...
لكنني تا الله اني اقدم اشياء صادقة تخرج من داخلي واحب بصدق دون تملق او جهد ....
وراء تلك الشخصيه المتقلبه نجمة ساطعه بجوار القمر ب لليله الرابع عشر وراء تلك الشخصيه قلبآ طيبآ يملئه حبآ وطيبه ....
وراء تلك الشخصيه قلبآ رقيقآ محبآ لكل من حوله وراء تلك الشخصيه روحآ مرحه فكاهيه....
وراء تلك الشخصيه قلبآ لا يخون ولا يحقد ولا ينسئ ايضآ وراء تلك الشخصيه فتاة حقيقيه غير زائفه "...
:- عافني بمكاني ابجي بحركه كلب وطلع من الغرفه دخلت امي والبنات يسالني شصار وليش عصب علي وطلع ماكدرت احجي شي فقط استرجع كلامه ببالي وازيد بالبجي
طلعتهم اسراء من الغرفه وكعدت كبالي سحبتني خلت راسي على رجلهه وبقت تمسد على شعري فتره وهديت على هل وضعيه وبقت تحجي وياي اسراء..
_شلون صرتي
_كلبي ياذيني اسراء ليش كاعد يعذبني بهل طريقه ليش كاعد يعاقبني على غلط بسيط سويته بجهل ليش يحرمني من حلمي باوس يعني الا اصير مو خوش بنيه واشرد وياه لو اتزوجه واخليكم بالامر الواقع
_لا بان ديربالج تسوين هل اشياء صدكيني يصير ذبحج حلال وتعمين عل ولد وهم يكتله وياج ماتعرفين اخوج شنو صارله سنين ماناسي هل
سالفه وماكدر يتقبل اوس وهوه بس لازم ايدج شافه شحال لو ياخذج ويشرد لو يتزوجج غصب عنه صدكيني يكتلكم ويكتل روحه
_جا شسوي اسراء راح اموت صار سنين مو شهر لو شهرين ماتحمل بعد
_تحملي وصبري لعل هذا التاخير بي خير الكم يجوز فعلا اوس مو الشخص التتمنينه يكون يجوز اكو عراقيل ومشاكل راح تكرهكم ببعضكم وتدمر
حياتكم لو تزوجتو صبري ولا تسوين شي تندمين عليه طول عمرج ادري بيج ماتستاهلين الكاعد يصير وياج بس صدكيني راهب هم مايستاهل اخته تغدر
بي وتسوي العيبه ويه صديقه وتخلي الناس تاكل وجهه واحنه بيت الرهبان الكل يحجي باخلاقنه وتربيتنه لا تغيرين هذا الشي بيوم وتخلين اليسوه والمايسوه يجيب معدلنه بالعاطل
_اسراء احجي وياه فدوا انتي يسمع منج ويحترمج بلكي يقنع حتى لو تعرفين شنو سبب رفضه هم زين حتى لو جان سبب مقنع احاول اتقبله وافكر بي وانسى اوس لان رفضه هذا كل هل
سنين وبدون سبب وجيه كاعد ياكل بروحي وصحتي تدرين حتى حلاوه النومه ماشايفتهه بعيني من التفكير صرت انام واكعد واكل واعيش مثل الالة ماحس بحلاوه الدنيا ولا بالحب غير لمن يحاجيني
_شنووو ولج بان كاعد تتواصلين وياه شنو
_اي اسراء جا شسوي انتي كليلي انطيني حل اذا ماحجي وياه واصبر روحي بصوته وسواليفه شلون راح اكدر اكمل حياتي بدون ماتدمر وانهار
_استغفرالله ربي منين طلعت هل سالفه سنين واحنه معلكين ماشايفين يوم بهني من وره سالفتج
_اسراء انتي بعدج بالنفاس ودعائج مستجاب فدوا ادعيلي ربي يحلهه الي لو ينسيني اوس لو يجعلني نصيبه لان تعبت والله
_الله يختارلج البي خير الج يروحي وانشاءلله لو جان اوس خير الج يجعله من نصيبج وتعيشون بسعاده كل العمر ولو مو خير الج يبعده عنج ويوديلج ابن الحلال اليسر كلبج وخاطرج كولي امين
_ام....
خنكتني العبره وكطعت الكلمه ماكدرت اكمل ماكدرت اكول امين على دعوه بيهه فراكي انه وياه اوس روحي من دنيا يكولون المره تنخلق من ضلع
رجالهه وانه اوس مخلوق من كلبي ماراح اسمح بيوم لكلبي ان ينساه حتى لو ماصار نصيبي وصرت حلاله يكفيني اني حبيته وراح ابقى احبه اكدر اعيش على حبه وامل لقاءه العمر كله مو بس ٧
سنين .. كمت رجعت لغرفتنه اخذت نقالي وتمددت عل جربايه غطيت راسي شغلت النقال وطلعت محادثتنه انه واوس خليت السماعات باذني ودزيتله رساله ورد علي وره دقيقه..
💬اوس وينك
💬عيونه
💬مشتاقتلك
💬مو اكثر مني وابو الفضل عباس كلبي متمرمر عليج
💬اريد اسمع صوتك اكدر اتصل
💬اي بس لحضه خلي اروح لمكتبي
💬تمام بس ماكدر احجي بس انت احجي اوك
💬اوك حياتي يله اتصلي
💬اي
اتصلت عليه صوره وصوت رن شويه ورد علي رغم هل سنين كلهه بس ابد مافتحت كامرا وحجيت وياه صوره وصوت بس هسه ماكدرت اشتاقيت
اشوفه واحس بوجوده كبالي مو بس اسمع صوته.. شافني وجر حسره ضيم كلبهه كل هل سنين دمعت عيونه وكال بصوت مخنوك لمن شاف دموعي تنزل على خدي..
_يجي يوم وهل دمعه تطيح بفرح على صدري
غمضت عيوني بقهر وهمست بصوت ناصي..
_احبك
_متخبل عليج انه احس كلبي خلص حيله وماخلص حبه اتجاهج تدرين يا بان بكل ليله لمن اخلي راسي عل مخده اتخيلج بحضني وكلبي يضل ياذيني عليج هيج احس واحد لازمه ويجرح بي وهو يجالع وحده
_اوووف يا بان لشوكت اضل محروم من هل وجه صار سنين ماشايفه اتمنى هسه اضيع برمش هل عين الهزيله وانلكي بشاماتهه
_اوس
_ااححح شكد يطلع حلو بحلكج هل اسم خيعوني عليه
_اريد اشوفك
_لو بيدي اجيج زحوف بس شبيدي على اخوج لو عرف بيه ملتقي وياج ماريد انحرم للابد منج ..
هزيت راسي ب اي مستسلمه وبعدها ضل يحجيلي عن وضع دوامه وشلون عايش وشلون ينقهر بكل مره يلتقي براهب ويتجاهله لحدما غمضت عيوني وغفيت براحه على حنين صوته للمغرب..
.
.
:- غوربت الدنيا وانه افتر بالمنطقه وكفت السياره باب بيتنه واذن المغرب خليت راسي عل كشن وغمضت عيوني وتخلخل صوت المؤذن وكلماته لداخل صدري ذبيت حسره ضيم كلبي كلهه
وحسيت براحه كلت لا إله إلا الله وحده لا شريك له له الملك وله الحمد وهو على كل شيء قدير اللهم صل وسلم على نبينا محمد وعلى آل بيته الطيبين الطاهرين ..
نزلت فتحت الباب ودخلت السياره للكراج توجهت لداخل البيت سديت البيبان كالعاده ورحت للمطبخ فتحت الثلاجه ادور بيهه على اكل واجتلي اسراء ..
_ها الله يساعدهم وين جنت من العصر لهسه
_ويساعدج جنت افتر بالمنطقه ضايج
_ جوعان
_اي والله بلكي تصيحيلي عبير تسويلي لكمه على ماصلي حتى اكل وانام تعبان موت
_ اسم الله عليك من التعب هسه انه اسويلك
_ لا وين تكدرين انتي يمعوده صيحيلي عبير مدام ماعدهه شي هيه تسويلي
_تمام رايحه اصيحهه انت روح ارتاح وهسه هيه تجيبلك الاكل
_تمام ..
سديت الثلاجه ورحت توضيت وتوجهت لغرفتي فرشت المصلايه صليت المغرب والعشا و تمددت عل جربايه اخذت نقالي اكلب بي وكل شوي اغفي
وافز من معدتي جوعان مرت تقريب النص ساعه وندك الباب كلت تفضل وفتحته اسراء ووراهه بان بيدهه الصينيه بهتت ملامحي وبلعت غصتي على
شكلهه الهزيل عدلت كعدتي واجت خلت الصينيه عل جربايه وانه اباوع لاسراء بعتب غمضت عيونهه واشرت عليهه حتى ماضوج منهه .. هزيت راسي وكلت..
_منو سوه العشه
_بانه سوته اعتذارا على السوته الضهر
_ ليش شنو سوت هيه
رفعت راسهه باوعتلي وكالت ..
_راهب انه اسفه على كلامي الضهر ادري تجاوزت الحدود ومايصير وعيب احجي هيج بس والله لان نفسيتي تعبانه وماكدرت اتحمل محد كاعد يحس بيه محد حب شخص وابتعد عنه كل هل سنين ومايدري شنو مصيره وياه..
:-حجت هل كلام وبلعت غصتي لمن تذكرت شموخ وحبي الهه رجعت كملت كلامهه وهي تكول..
_ ادري اني غلطت لمن حجيت وياه من وراك وغلطت لمن ماكتله انك اخوي بس والله ماجان قصدي اسوي شي غلط ويا وانما ردت اتعرف عليه
بدون محد يضغط علينه وتالي نتندم والله ماقصدي اقلل من قيمتك كدام صديقك واحجي وياه من ورا ضهرك وال....
:-بقت تحجي وتبجي وعينهه بالكاع كسرت كلبي وعلعلتني من شفت اختي بهاي الحاله طلع كل هذا البكلبهه وانه ماحاس عليهه تندمت لان مديت ايدي عليهه الضهر ودمرت نفسيتهه
كل هل سنين كمت على حيلي سحبتهه وحضنتهه لصدري وهي مستمره تبجي بقيت اهدي بيهه وامسد على راسهه لحدما هدأت ابتعدت رفعت راسهه وكالت..
_راهب بس كلي اذا شايف على اوس شي او مسويلك شي او تعرف ان مو زين الي حتى يرتاح كلبي وضميري وانساه صدكني بس تنطيني سبب
كفيل ان تمنع نصيبنه كل هل سنين انه من ذاتي انساه واشوف طريقي بس لا تخليني هيج متعلعله وافكر بي لان تعبت والله ياخويه تعبتت
_ادري بي خوش ولد واختيارج صح بس جانت طريقتج غلط ولو جاي من بدايه وكايلي اريد اتقدم لاختك او ناوي اتعرف عليهه بعلمك جان قبلت
وبيدي سلمتج اله لو ماسوايتكم ولقاءاتكم بالكليه من وره ضهري ولا عبالج اخوج يريد يعذبج ويحرمج حتى الناس ماتحجي عليه لا بالعكس
تدريني كلام الناس اخر همي بس ردت اثمن قيمتج عند اوس واهله ومايجي يوم ويكولون جنتي بعلاقه وياه من وره اهلج وذبوج علينه
_بس والله ماسويت شي يكسر ثقتك وجانت نيتي صافيه ومافكرت ابد ان انزل راسكم وماعاش اليجيب معدلكم بالعاطل ان جان هوه او اهله
_تدريني ماعندي بالدنيا هاي كلهه غير امي وانتن من بعد ربي وماريد بيوم شخص يقلل من قيمتجن او يستصغرجن وراسي يشم الهوى اريدج تكونين
قويه وتصبرين لان كله هذا التاخير من مصلحتج وراح تكولين اخوي راهب وياه حق لمن تتزوجينه وتشوفين شلون محترمينج ومقدرينج ..
رفعت راسهه بتساؤل على اخر جمله وابتسمت بوجهي مسحت الدمعه عن خدهه وكتلهه..
_اوس الج ونصيبج ولو بعد الف سنه بس اريد اادبه شويه حتى يعرف ان اخت الراهب انتي مو شويه ومو بالساهل يحصلج فاريدج تصبرين وتتحملين كم شهر لان اكو شي براسي اريد اسوي ياله ااوافق على خطبتكم
_شنو هوه
_خلينه نسمي اختبار صغير واذا نجح بي اوافق ياخذج تمام
_واذا مانجح بي
_يحصل عقوبته من تنخطبون..
استبشر وجهه ورجعت حضنتني حيل ضحكنه انه واسراء عليهه ومستمره تحضني اكثر وتشكرني وهي تحجي..
_جنت حاسه والله ادري باخوي راهب ماينطي باخته ومستحيل يظلمهه وياه ويعذبهه باحب شي على كلبهه جنت اعرف انك راح تكون النه سند مو بس مجرد حجي وجنت دائما اخليلك اسباب من
خيالي واكول ليش راهب يسوي هيج اكيد اكو شي او سامع شي مني او من اوس وهل رافض فكره زواجنه شكرا راهب شكرا لانك ماخليتهه حسره بكلبي
_ ههه لا تشكريني هذا واجبي الكلفني بي ابوي الغالي الله يرحمه وغصب عني اصيرلجن سند وماخلي شي يحط من قيمتجن انه مسؤؤل عنجن من بعد ابوي والله يقدرني واكون كد هل مسؤؤليه ..
هزت راسهه ب اي واسراء حجت والابتسامه على وجهه..
_كدهه وكفو بعد اختك وحيلهه الله لا يحرمنه منك ابو معاذ
_منو هذا ولج
_هههه انت راهب ابو معاذ حلو ويلوكلك هل لقب لانك معاذ يعني حامينه وسندنه
_ اححح خوش لقب والله مدام اخيتي انطتنياه راح اعتبره شهاده فخر الي ومنا ورايح صار لقبي ابو معاذ
4 تعليق
_هههه يلوك يبعد اختك وحيلهه ..
ابتسمت وحسيت فعلا بشعور حلو لمن شفت الفرح ورد بوجه بان بعد كل هل سنين باوعت لاسراء دموعهه تجري على اختهه اخذتهه هيه الثانيه لحضني وبست راسهه فتره وراحن للصاله
بعدما اتفقت وياهن ان الكلام الصار يبقى بيناتنه ومايطلع من الغرفه .. كعدت عل جربايه سميت باسم الله وبديت اكل لحدما شبعت كلت الحمدلله
وكمت وديت الصينيه للمطبخ غسلت وتوضيت ورحت للصاله اسولف ويه امي شويه وترخصت منهه رحت للغرفه ذبيت روحي هلكان عل جربايه ونمت للمغرب صليت وتعشيت ورجعت نمت لثاني يوم كعدت الصبح جهزت نفسي ورحت للدوام مارست روتيني المعتاد..
واخيرا ومن بعد يوم طويل ومتعب سديت اخر ملف لليوم رخيت جسمي عل كرسي ورفعت راسي للسكف صفنت ونطقت شفايفي باسمهه
بحسره وكلت اااخ ياشموخ محتاج يمر طيفج علي ينسيني تعبي.. سرحت بافكاري بيهه وتذكرتهه لمن جانت تباوع من السياج عل بستان وتجر حسرات وشعرها يتمايل على اكتافهه
ماكدرت افرق بينه وبين ضلمه الليل الا لمن عكس ضوه البستان عليه ولمعن خصلاته مرت هل ذكرى علي وكانها امس مو ٩ سنين مرت على روحتهه ..
بعمري ومن حبيتهه ولحد هذا يومي ورغم مرور كل هل سنين الا ان ذكراها بعقلي وحبهه بكلبي يزيد كل يوم ومرات اصفن واكول هسه شلون صارت ياترى بعدهه عيونهه حاده لو ذبلتهه الدنيا اووف اووف هسه الكاهه تزوجت
وخلفت وتوظفت وعايشه حياتهه وناسيتني وفعلا اعرف هل شي صار بس كلبي مو راضي ينساهه هي جانت حبي الاول الحبيته من طرف واحد
وضلت لجمه بكلبي .. كلتلي انساني وشيل هل مشاعر المؤقته من كلبك لان تعذبك بس مادرت بكلامهه هذا خلت كلبي يحافظ على هل حب ويثبت لنفسك كل يوم ان هل مشاعر مو مؤقته بعد هذيج الليله تعذبت وماكدرت انساهه
واعوف حبهه لان بدون ماحس صار حبي الهه ملازمني دوم ومو مجرد مشاعر مؤقته او حب عابر ..وانه لمن احب شخص مستحيل يكمل ويحلى شخص ثاني بعيني غيره
وشموخ حبي الهه جان فطره وربي الزرع حبهه بكلبي وبس هو يكدر يمحي وهذا وضعي كل هل سنين منتظر امل لقاءهه وماكطعت الامل ممكن
تكولون هذا مخبل ومو صاحي وماكو هيج شخص بالدنيا ضل يحب شخص رفضه وانتظر سنين على امل لقاءه بس انه اكلكم ان الحب اجمل شي
ويحلي الروح من يدخللهه وبنفس الوقت يدمر الروح لمن يبرد داخلهه ومايتدفه بكلمه حلوه لو نضره وابتسامه من الحبيب وانه راضي بدمار
روحي لان بمجرد مافكر بيهه وتكون بكلبي ومجاوره نبضاته احس هل شي يكفيني ..مانكر اني بكل وقت اشتاقلهه واحن لشوفتهه واسال دائما
ياترى شكاعد تسوي هسه اكلت زين شربت زين كملت جامعتهه صارت مهندسه مثلما جانت تتمنى هم حبت شخص وهي تكره الحب هم تزوجت
وهي معارضه الزواج بس دائما مخصص وقت لشغلي وحياتي العمليه يلي مليانه حركه وازدحام ويادوب احصلي فرصه اختلي بافكاري بيهه..
وهيج كضيت سنيني بهل اساله يلي تدور ببالي وابد مامليت بالعكس اخترع ببالي كل يوم تفكير شكل بيهه بس كل افكاري بيهه عفويه وادعي ربي بكل صلاة دعوتين وهي حسن الخاتمه بالدنيا وحسن خاتمتي وياهه ..
فززني من صفنتي كالعاده لمن اندك الباب ودخل سالم دك تحيه وتقدم انطاني ملف شكوى من المحقق استلمته وشفت بي اسماء وصور المشتبه بيهم قريت القضيه وجانت عن عنف اسري ادى الى الموت ...
_القضيه رقم 2_
بنت اسمها رباب بصف الثاني متوسط تعرضت للعنف من قبل ابيها واخوانها عده مرات ولكن الشرطه لم تتدخل لعدم وجود كسور او رضوض في جسد الفتاة ولعدم وجود شكوى رسميه من قبل الفتاة
تم العثور على جثتها وراء البيت مطعونه بسكين بشكل عنيف عندما كانوا افراد العائله نيام والسكين ليس لها وجود في مسرح الجريمه..
يرجى التحقيق من مسرح الجريمه ومع المشتبه بهم حتى تحل العداله ويسود السلام في روح المغدوره رباب وشكرا ...
جان هذا نهايه الشكوى المكتوبه وكاتبين جوه الكلام هذا عنوان البيت وعدد افراد العائله والساعه والوقت الي انقتلت بي.. سديت الملف وكمت بسرعه لبست الدرع والبيريه والنظارات ركبت
الاسلحه بالصدريه والشارات اخذت فريقي وطلعنه بسيارات سوده ٣ وصلنه لمسرح الجريمه وكل الناس ملتمه حوالينه والشرطه لازمتهم .. اجه شرطي علينه وكال..
_مرحبا سيدي افراد العائله متحاصرين داخل البيت والجثه بمكانها
_وين مكانهه
_تفضل سيدي
مشه كبالنه واحنه وراه وصلت وجانوا مغطيهه بغطوه بيضه اجيت كرفصت كبالهه ورفعت الغطه عن مكان الطعنه وفعلا الضاربهه مو صاحي ومو
بشر مطلع احشائها كلهه بس اللفت انتباهي ان الجثه مبلله وكان جانت تمطر عليهه او سابحه عرفت السالفه بيهه ان ..رجعت الغطه واشرتلهم
يجون ياخذونه اجو فريق الادله الجنائيه بردائهم الابيض وصاروا يفحصون المكان عفتهم ودخلت للبيت شفت العائله كلهم واكفين ووجوهتهم صفره
ودمعه ماطايحه من عينهم الا شخص واحد لفت انتباهي ولد بعمر ال٢٠ سنه تقريبا جان مو طبيعي حاضن مره جبيره يرجف خايف من عدنه مدري من غيرنه انكسر خاطري عليه وكتلهم..
_العائله كلهم موجودين
الاب : اي سيدي كلنه موجودين ماكو احد مفقود صدكني سيدي مو احنه القتلناهه مستحيل اصلا نقتلهه احنه هي بتنه ونحبهه
_ولهذا السبب تجي متعنفه للمستشفى اكثر من مره
_سيدي جانت تغلط وواجب الاب يربي بنته بس مستحيل توصل وياي للقتل اقسم بالل...
_اشش لا تحلف لا تكملهه وتحلف جذب لا اسحلك وراهه
_والله سيدي مو احنه
_مو انت يلي تقرر منو قتلهه وين غرفتهه للمغدوره
_هاي هناك سيدي
رحت للغرفه الاشر عليهه دخلت وجانت عباره عن مخزن صغير مو غرفه وبيهه كراتين ودفاتر وكتب متسطره اجيت كعدت عل كرسي البيهه لزمت سجل الافادات والقلم وكتلهم بصوت عالي..
_هسه تدخلولي واحد واحد من الجبير للصغير والمايجي اعرف شغلي وياه
الكل: حاضر سيدي
اجه دخلت الجده ام الاب اول وحده وكعدت عل جربايه باوعت للغرفه ودمعت عيونهه ورادت تبجي اعرف ان هذا الشي مايصير وان التحقيق يصير
بالدائره مو هنا بس هذي طبيعه شغلي ومن خلال هذي الخطوه يتوضحلي الفرق بين اليكره المغدور واليحبه من خلال كعدتهم بغرفته او بمكانه وين
ماجان دائما لان مستحيل القاتل يكدر يكعد بمكان القتله بدون مايتوتر ويعرك واليحبه كذلك راح يتعاطف ويتذكره وينسى التحقيق اصلا مثل هاذي المره العجوز يلي كوه تمشي ..
_هلا وليدي هلا بيك
_شبيج متوتره
_لا يمه بس تذكرت زينه البنات جنت دوم امشط شعرها بهاي الغرفه واجيبلهه الاكل
_احجيلي عنهه بعد شنو جانت تسوي بالعاده ووين تروح
_ماجانت تطلع المكروده بس للمدرسه وهم محارب ياخذهه اخوهه ويرجعهه بيده وجانت تجي من المدرسه يكربون عليهه تنظيف وطبخ
_ليش امهه وين
_يايمه امهه مابيدهه شي مايحبون طبخهه ولا يردون شغلهه رغم صغيره بعدهه بيهه حيل بس ماتسوي شي ولا تشيل عن بنيتهه شغله
_هم جانت تنضرب اذا نست شغله ماسوتهه او بدون سبب حتى
_اووو هواي مرات يايمه يضربونهه واكلهم بسكم عن البنيه يكلولي نريد نربيهه لا تطلع عن الطريق وهي بعد عيني كلشي مامسويه
_احجيلي بالتفصيل شلون جانوا يضربونهه ومنو اكثر واحد يضربهه او يحرض على ضربهه كلشي احجيلي لا تضمين شي..
هزت راسهه ب اي وصارت تحجيلي كلشي يصير وكم مره يتعاركون وياهه ويضربونهه واكثر شي اصرت على اخوها الصغير ان يحرض على ضربهه
ومرات هو يضربهه لو محد موجود وناشب وياهه بدون سبب .. بقت ساعه كامله تحجيلي ياله نهت الكلام بفعل غريب كامت من الجربايه واجت علي خلت وجهه يم اذني وهمست..
_وليدي اكو كامره هنا مخليهه اخوها الصغير جان بحجه ان خاف تخابر واحد او تدخله للغرفه ومحد يعرف بهذا الشي بس انه ..
رفعت حاجبي بتفاجئ وهزيت راسي ب ايي طلعت وبقوا يدخلون واحد وره الثاني وكلهم نكروا التهم الموجهه الهم الضاهر مايجون بالاغاتي .. دخل الاخ
_وليدي اكو كامره هنا مخليهه اخوها الصغير جان بحجه ان خاف تخابر واحد او تدخله للغرفه ومحد يعرف بهذا الشي بس انه ..
الشاخط والعرفته منهم ان عنده مشكله بعقله من الصغر طاكله فيوز مالحيت وياه بالتحقيق لان صرعني بالبجي وانه مستعجل طلعته عل نص..
ودخل الاخ الاصغر منه اجه للغرفه وانتبهت على رجليه يرجفن رغم جان متصنع القوه وعدم الاهتمام بس رجليه فضحته.. اجه كعد عل جربايه
وبديت اساله عن كلام الحجيه اذا صح وهو بكلشي موجه اله يرفض وحتى عن وجود الكامره هم نكر هل شي عرفت اكو شي بالكامره اخذت
ولازم اتصرف اخذت نقالي دزيت اشاره لسالم كلهه ثواني وحاوطوا البيت واجوا كلبشوا الزلم وطلعوهم بقه الاخ الاصغر يطفر ويباوع على جهه
وحده من البيت اشرتلهم يطلعون النسوان بره ودخلت للغرف وحده وحده بقيت ادور عل كامره اجو وياي فريقي فتشوا وابد ماطحنه بيهه صرت
ادور حتى بزروف الحايط كذلك ماكو اختفت .. خليت ايدي على راسي وصفنت وانه افتر بالبيت افكر وين ممكن يخليهه وين .. لهناك وطخت ببالي
رحت وره البيت مكان الجثه جان محاوط باشرطه باوعت للتراب كله مسفوط الا صفحه منه متكومه والمشكله بي بصمات احذيه المجرم ماكدرت اوصل للمكان ضربت رجلي بالحايط بعصبيه ودرت على سالم..
_اريد اذن حتى انبش صفحه دليل رقم ٣
_بس سيدي انت كلتهه هذا دليل
_الكامره اكبر دليل لو جانت موجوده هناك
_بس سيدي
_تروح لو شلون سالم
_حاضر
راح يتصل بالنيابه وانه رحت صعدت بالسياره وشخطتهه لمركز التحقيق الجنائي وفريقي بقوا يسالون ويحققون ويه الجيران ويجيبون تسجيل الكامرات القريبه.. وصلت للدائره ودخلت صحت
لواحد من الشرطه وسالته عل مره العجوز وطلعوا مخلينهه بالحجز وياهم عطت بي وراحوا طلعوهه طلبت منهم يجيبونهه وراي للمكتب تكعد لان مره جبيره حيل ماتتحمل رطوبه السجن وخنكته ...
.
.
