رواية درب العشك الفصل الحادي عشر 11 بقلم شمس

تعرف ليش احبك من صدگ يهواي ؟

لأن كلك رزانة وطبعك معدل

من شفتك كبل ولهسة طبعك ذاك

ماشفت الطبع في مرة اتبدل

لذالك آنة احبك واعتذر يفلان 

لو كتلك احب.. ارجوك لاتزعل

مو بيدي الغرام ومن قبل مجنون

من اعشگ اذوب وبالعشگ اذبل

ولو رايد سبب آني عشگتك ليش

عگب هذا الحجيته ارجوك لا تسأل ..!!

…………… 

"شقق دريم إن دبي - سيتي ووك "..

كانت حلم بالنسبه من شفت الشقة الي اجرها صگر ..

مكان جدا رائع .. ويبعث الراحة في النفس ..

اعرف هسا البعض يگول مشايفه ..

اي صحيح .. اني دكتورة ودرست ببغداد ورايحة الاربيل وللموصل . وهواي محافضات ..

بس ماطالعه خارج العراق بحكم دراستي ودوامي ..

بس من شفت هيج مكان كان حلم بالنسبه الي ..

الشقه تطل ع منظر رائع .. 

والجو يفتح النفس ..

بيها غرفتين وصالة جلوس بيها تلفزيون شاشه كبيره 

ومطبخ مجهز .. ومايكروف واهم شي مكينه القهوة 

عشقي… 

والاهم واي فاي مجاني ..

باوعت للثلاجة ..

وگتله حبيبي لازمنا اشياء للمطبخ ..

والثلاجة لازم نمليها ..

[طبعا احنه اجينا للشقه ساعه 12 الظهر . لأن تأخرنا بالگعدة .. 

بسرعة بدلنا وحظرنا اغراضنا وطلعنا من الفندق بعد مادخلنا للبوفيه اكلنا شغلات خفيفة واخذنا جاي ..

وسدد صگر حساب الفندق واجينا للشقة لأن الحجز ليروح..]

صگر .. صار حبيبي .. رتبي الغراض بالغرفة بين مااجيب الشركة السيارات للايجار . 

اجيب سيارة واجي ..

دخلت رتبت ملابسنا بالكنتور .. 

طلعت مناشف خليت بالحمام ..

واصلا الغرفة كانت مجهزة من كلشي ..

اخذت الفرش والمعجون . وديتهم للحمام ..

رتبت العطور ع الميز ..

بعد ماكملت اجه صگر .. گال ها حبيبتي كملتي .

گتله واخيرا خلصت ..

صگر .. يله نروح . اجرت سيارة حتى نفتر براحتنا ..

لبست شالي واخذت نضاراتي وبس .

ماكو داعي اخذ جنطتي مااحتاجها . 

واحنه رايحين للتسوق ..

اول بداية . رحنا السوبر ماركت ..

اخذنا معلبات واجبان وبيض وكلشي نحتاجه ..

وبعدين گتله متخلينا نروح .

الدبي مول .. امنيتي اشوفه ..

گال . خليها للعصر كلش .

حتى نبقى لليل ونتعشا هناك . 

لان اذا دخلتيه هسا ماتطلعين النص الليل .

مو عبالج مول عادي لو مول متسمعين عنه بالتلفزيون . 

فعلا رجعنا للبيت بعد ماجبنا غدا ويانا ..

تغدينا . واتصلت ع ماما ماسنجر وگعدت اسولفلها وفرحانه ..

واخواني هم سلمت عليهم ..

واتصلت ع رحيق هم ..

كملنا غدا ..

ورتبت الغراض بالمطبخ ..

گتله يله خلينا نبدل ونطلع ..

گال يله .. 

بدلنا ورحنا الدبي مول .. اممممم فعلا يسوي واهس للتسوق .. كبير حيل ..

يمكن كبرة يساوي مدينه وحده من مدنا ..

بعد عراقيه ودخلت المول . تگعد ساكته وعاقله .

لو تتخبل ع التسوق ..

عندي قاعده .. ( التسوق هي الراحة النفسيه لكل عراقية ههههههه )

اخذت الي احتاجهن .. 

وشفت كم قطعه ملابس نوم حلوات وغريبات . 

اخذتهن .. 

واخذت اثواب بينصل حلوات . وكيلوتات .. لان ماشتريت هيج شي بالنيشان مالحگت .

بس من كلشي قطعه . لان اني اصلا راح البس جبه .

وصگر هم اخذ تشيرتات .

وعجبته دشداشه خليجيه . اخذ منها ..

نسينا نفسنا بالمول .. اخذهن للسيارة واجه ..

رحنا للمدينه المائيه وعبالك گاعدين بوسط البحر .

والاسماك والحيوانات البحريه شكلها رووعه عن قرب .

بقينا نفتر من مكان المكان ..

الى ان تعبنا وصارت عشره بالليل ..

حتى عشا ماتعشينا من گد ونستنا ..

رحنا تعشينا .. وطلعنا للشقه ..

رحت للمطبخ . سويت گهوه الي والصگر .

وبقينا سهرانين ..

كانت ايام حلوة .. عشت فيها شهر عسل حقيقي ..

صگر عنده شغل بدبي .. يطلع الصبح ويرجع الظهر .

اني ابقى نايمه الصبح .

والظهر نتغدا وابقى احجي وي ماما ..

الى ان يگعد فهد ونطلع نفتر ونتونس ...

فعلا ايام ماتتنسى… 

بقينا اكثر من اسبوعين . وصگر خلص شغله هناك .

لأن اكو شركة بدبي ..

الها فرع بالبصرة . اخو صگر الي كان مترئسها ..

وبعد اسد صگر .. 

وكان رافض لان بيها سفر وتعب .

بس الشيخ اصر عليه ..

وصار وقت الرجعه للعراق ..

رحنا اخذنا هدايه للكل .. 

وكان صگر مايعرف شيجيب الاخواته وامه ..

اني الي اختاريتلهم ..

حتى مرت اسد وبناتها ..

والشيخ اخذله عبايه درجه اولى ..

وحبيبي ماخله احد .

حتى عبدووو وجنو اشترالهم ..

رغم الونسه والراحة النفسيه الي عشتها بدبي ..

وصگر عيشني بيها احلى ايامي ..

الا اني اشتاقيت للبصرة . والاهلي .

رجعنا للعراق .. وكان ابن عم صگر . مسلم منتظرنا بالمطار ..

اخذنا للگرنه .. اني لابسه جبه وشال ..

مااعرف ليش اول مادخلت الگرنه . انقبض گلبي .

وحسيت روحي اختنگت ..

طلعت راسي من شباك السيارة اريد اتنفس شويه ..

من وصلنا البيتهم ..

ذبحوا خروف جوه رجلينا ..

والشيخ مسوي غدا الوجه الله ..

وعازم اهلي هم ..

من دخلت وشفت ماما ورحيق گدامي وهنوده .

انجنيت .

ركضت حضنتهم مشتاقتلهم موت .. 

وشلت عبدوووو وجنو وعصرتهم حيل ..

سلمت على اهل صگر كلهم ..

وخاله ام فهد بست راسها ..گالت طبتج خير ان شاء الله 

هناك عماتهم واقاربهم ..

اجو بنات اسد . حضنوني ويصيحون عروسه عروسه .

منى .. ههههههه من يوم الي شافن الصور من دزاهن صگر النا لسا .

وهن خابصاتنا . عروسه وعروسه ..

صبوا غدا .. وتغدينا كلنا سوه .

صگر ماشفته لأن اول ماوصلنا . حضروا الغدا .

كملنا الغدا .

دخل صگر .. وامه شافته گامت تبجي وحضنته.

وتگله يأسد . ماشفت اخوك عريس ..

نزلت دمعتي ع المنظر ..

گالتله اخذ مريتك ورح ارتاح يمه ..

باوعت الامي ..

گالت هاي شفناج كافي ..

كم يوم ونعزمكم وتجونا ..

سلمت عليهن وراحن .

وصگر صعد لبس دشداشه ونزل .

گال اروح اسلم ع الناس واجي .

اصعدي انتي ..

صعدت للغرفه كانت الاخشاب تركيه ونازكه بشكل ..

لونها فضي وابيض ..

والفرشه فضيه فارشين .

عجبني الترتيب . 

فتحت الكنتور ..

لگيت ماما جايبه غراضي وملابسي الي بقن ببيت اهلي ومرتباتهن بالكنتور ..

طلعت دشداشه قصيرة عندي لبستها .

وفتحت شعري ونمت ع السرير ..

منتضرة صگر ..

وهو اتأخر جوه .. واحنه اصلا گاعدين من الصبح وتعبانه من السفر ..

غفيت بسرعه ..

شويه وحسيت صگر اجه سحبني الحظنه ونام .

واني قرفصت بحظنه . مثل طفل مشتاق الامه .

ماگعدنا للعصر كلش ..

شفت صگر مدخل الجنط للغرفه ..

فتحتها وطلعت الملابس رتبتهن .

وفرغت الجنط كلها . بس جنط الهدايه خليتهن ع جهة .

طلعت سبحت ولبست گلبيه لونها اوڤ وايت وذهبي خليجيه اخذتها من دبي ..

گعدت صگر .. 

صگر حبيبي متگعد اريد انزل واستحي . 

انزل وياي حباب ..

صگر .. صار يروحي اني هم اريد اگعد لاتجي وادم .

گعد سبح وبدل لبسه العربي گالعادة .

ونزلنا ..

لگينا عماتهم لسا موجودات ..

والبنات كلهن گاعدات بالصاله مجموعات ويسولفن ..

شافنا سكتن ..

گلت مساء الخير ..

كلهن ردن. مساء النور .

صگر .. ها العلويات كلهن ملمومات خير ان شاء الله 

امه .. خير يمه خير . ارتاحيتوا انتو ..

صگر .. الحمد لله ..

امه .. ابوك سأل عليك وگتله عوفه نايم تعبان .

صگر .. اي هسا رايح .

باوع المرت اسد وگال ..

بنين والق وين .

مرت اسد .. يلعب بالحوش تلگيهن .. 

صگر .. جبتلهن لعبات وهدايا . والجن هم بس اختيار مرتي لان مااعرف ذوق البنات ..

البنات كلهن تشكرنه . 

الا عمته الصغيره . تصير ام زينب مرت اسد . 

هاي ماشايفتها ابد اول مرة اشوفها ..

صگر راح واني گعدت يمهن ..

گالت عمته ام زينب .

عمه انتي هسا شگد صارلج من تزوجتي ..

گلتلها عشرين يوم النا ..

عمته .. اي يعني صارلج هواي وتونستي بالخارج وطلعتي . وخلص العرس . بعد شكو تلبسين ابيض وهاي الالوان .. 

جاوبتها بتساؤل .. ليش بيها شي ..

عمته .. لا مابيها بس البيت بي حزانه وماطالعة سنته . والمات النا رجال يعد الدوواين . 

واحترام الميت واهله وحزنهم واجب عليج .. كون صرتي مرت ابنهم .. ماگلنالج البسي اسود .

بس لاتلبسين الفواتح .. البسي الوان طوخ ..

تعجبت الكلامها وباوعت الخالة ام اسد .

گالت .. خيه على كيفيج وي مريت ابني . بعدهي ماتعرف طبايعنا . تتعود شويه شويه ..

ماادري ليش حسيت ام اسد مساندتها بالكلام . 

سكتت واستأذنت ..

صعدت الغرفتي .. ودمعتي بطرف عيني .. 

اختنگت .. يعني عرس ماسوينا وگلت ميخالف وحقهم وابنهم صارله اشهر متوفي ..

وكلشي بسرعه صار وقبلت .

لامثل البنات جهزت ولااختاريت غرفه ولاذهب ولااي شي كان اختياري .. حتى لبسي تحكموا بي ..

وتحملت وسكتت لان حبيت صگر وعشگته ..

بس مال يحكمني ويقررن اللون الي البسه . هاي ممتوقعتها ..

اخذت نفس بغرفتي . حسيت بحر فضيع .

كان بدايه الرابع ومشغلين بس مراوح .

فتحت التكييف ووگفت گباله .. اريد اتنفس ..

اندگت الباب . ودخلت منى . شافتني واكفه ع التكييف .

گالت شعرج رطب تتمرضين هيج ..

گلتلها لا احتريت .

گالت .. لا تاخذين من خاطرج على عمتي .. هي هيج طبعها ..

رفيف .. لا عادي حقها ..

منى .. ولاتگلين الصگر . اخاف تصير مشكله .

رفيف .. مو من طبعي انقل حجي . وثانيه شغله تافهة ماتستوجب اگله.. 

منى .. انتي هم اعذريها .. 

بنتها ترملت وهي بعدهي حديثه (صغيرة)..

وماتتحمل تشوف بنتها مترمله واحنه فرحانين .

حتى الصبح رزلتنا لان منتظريكم على نار . وكل ساعه نباوع من الشباك .

تگول .. نسيتن اخوجن الميت وبالعجل فرحتن . 

رفيف .. بس هذا قضاء وقدر . والي صار حكم الله . وماعلينا الا نتقبل وندعي ونصلي الامواتنا .

يعني ندفن ارواحتنا بعد الي راحوا حتى نوفيلهم .

اني بابا اغلى من روحي عندي ..

وصارله . اربع سنوات متوفي .

ولسا اتذكره وابجي . وشوفته بقت غصة بداخلي . تلازمني للموت ..

بس رغم حزني الي بداخلي . درست ونجحت وتعينت وتزوجت هسا .. 

لأن متأكده اذا شافني فرحانه ومرتاحه . راح يرتاح هو بگبرة ..

منى .. هنا مو مثلكم خيه . مايصير نفرح الا بعد سنتين ثلاثه ..

رفيف .. مااعرف شأكلج بعد ..

زين زينب شنو وضعها .. 

منى .. زينب اخذت اسد عن حب . وهي طفله انتضرها لما كبرت وخطبها ..

وهي تعشگه كلش .. بحيث من تزوجوا . وتسمع صوته من بعيد ..

تبقى تگمز بباب الحوش تنتظرة .

جنت اسميهم قيس وليلى . رغم هو اكبر منها بهواي ..

بس يگول احسها بنتي مو مرتي ..

مدللها دلال ..

من تحبل . يشيلها على جتافه . 

وخاصه من حبلت بألق .. وگعت وحملها تهدد .

وگالتلها الدكتوره .

لازم تنامين على ظهرج ..

وهو سوده عليه . ياخذها للحمام شيل ويرجعها ..

ويخلي الطشت جوة راسها ويغسللها بيدة .

لاتتعجبين .. اهلنا كلهم هيج يحترمون المرة .

اني ماخذة ابن عمي مسلم اذا تعرفيه هم هيج ..

وابوي يحترم امي ومايگلها الا علويه وشتگول يگلها آمري ..

وحتى صگر . يحترمنا ويقدرنا . وصح هو عصبي بس من شافج وعشگج وخبلنا الاتخطبوها الي .

شفت عشگ اسد الزينب گبالي ..

من سولفت قصتهم حيل ضجت عليها وكسرت گلبي .

وگمت ادعي بكلبي واگول ..

ربي احفظليا واحميه من كل شر .

زين وصابره زينب . لو اني لاسامح الله اموت وراه .

بقلمي_الكاتبه_شمس 

…………………………………………… 

گلتلها زين هي هنا باقيه عندكم ..

منى .. اي اخذتها امها بفترة العدة .. وبعدين بناتها تعودن الا هنا يردن ..

وهي بقت هناك .. 

تالي گالت اني ارجع وهم مااگدر عن غرفتي وريحة اسد بيها ..

قاطع حديثنا صگر دخل للغرفه.. 

منى .. يله اني اترخص . ارتاح خويه ..

صگر .. وين رايحة دگعدي لو لأن شفتيني اجيت . اطلع شلون .

منى .. لا والله بس تدري البنات وحدهن اساعدهن بالعشا .

نزلت منى . واني گمت فتحت الكنتور .

اباوع .

اجه صگر وحضني من ظهري .

-تردين تبدلين .

-اي

-ليش هاي حلوه عليج ??

-لا .. احس روحي نشاز كلها لابسه اسود واني لابسه هيج ..

-وشعليج بيهم انتي غير عروس .

-خلص العرس ..

-عرسنا مايخلص لو بعد سنين ..

وسحبني گعدني بحظنه .. 

-احسج مامرتاحة .

-لا بس تعبانه . خليني ابدل وننزل عيب منهم 

-شو كله عيب وعيب . ليش تتقيدين حسي نفسج ببيتج ووي اهلج. حاولي تتأقلمين وي الوضع..

-مو ما اعرف اطباعكم. واخاف مايعجبهم تصرفاتي ..

-سوي الي تقتنعين بي حبيبتي ..واعرف عقلج وتفكيرج

وادري بيج متخطئين بحق احد .. 

بوسته وحضنته .. راد يتمادى .

گتله لاحباب مو وقتها خليها بعدين ..

صگر .. هم گولي خاف عيب ..

رفيف .. ههههههه لزمتها عليه ..

رجعت باوعت للكنتور . مابي الوان غامقه . بس دشداشة لونها جويتي ..

لبستها ولفيت الشال ..

گتله يله ننزل ..

اتصلت ماما ..

گال نازل قبلج ..

سلمت وگالت شلونج مرتاحة .

گلتلها زينه الحمد لله ..

بقينا نسولف شويه .

وگالت عگب باجر اذا فارغين نعزمكم .

گلتلها الله كريم نشوف .

كملت المكالمه ونزلت .

لگيت صگر يلعب وي بنات اخوه . والق حاضنته من رگبته وتگله انطيني الهدايه يله ..

غمزلي صگر .

گال . الهدايه موعندي . عند العروسه ..

هنة يباوعن وخجلانات ..

گلتلهم تعالوا وياي ..

صعدنا اني وياهن .

واجه صگر وراي .

ونزلنا الجنط ..

گعد صگر بالگاع ويفتحهن . واخواته داير مدايره .

والق تگمز وبنين گاعده بصف عنها وتفتح وياه .

كان جو حلو وذكرني بأهلي ..

انطاهن الالعاب وملابس جبنالهن .

اخذنهن فرحانات ..

ماما شوفي ماما ..

وهي تبتسم وساكته ..

مااعرف ليش !!

احسها بعالم ثاني مو يمنا ..

اني عيني عليها واراقبها ..

وانتبهت بسرعه ع صوت صگر .

رفيف رفيف ..

گتله .. ها حبيبي . لااراديا طلعت حسيت الكل عينه صارت عليه .

الي ابتسموا والي ماعجبتهم الكلمه ..

گال .. ترى اني مااعرف انتي الي اختاريتي .

گتله .. اني مرتبتهم هناك وكاتبه على كل علاگة اسم صاحبها او العائله ..

گال .. شفتوا مرتي الذكيه . ويگلك ليش تحب البصراويه ويضحك ..

عمته الجبيرة سوتها بالضحك .. يمه والعلويه موش بصراويه وماتعجبك ..

صگر .. لاعمه العلويات كلهن على راسي شعندي غيرهن بس القلب ومايهوى ..

اني بس استمع وابتسم ..

عماته ضايجات لان مااخذ منهن يمكن . ومرت عمه من اجينه هم تباوع بطرف عينها . 

بدأ صگر يصيح بالاسماء .. وعبالك ديوزع نتائج .

يضحك شكله ..

صاح هيلين . هيلين ماتسمع بالمطبخ خطيه .

اجت ترگض وبيدها الخاشوگه .

كانت تسوي عشا .

انطاها . ودور صاح شيرين . هم اجت تركض .

وزع الهدايا للكل وحتى عماته . بس مال ابوه عزلها .

ع جهة ..

جابوا السفرة . هم النسوان وحد والرجال وحد ياكلون ..

جابو العشا .

مسوين تمن ومرگ وتشريب دجاج ..

صگر راح يم الرجال برة .

گعدن النسوان كلهن ياكلن .

اني اشتميت ريحة الاكل لعبت نفسي ..

حسيت راح استفرغ .

خليت ايدي ع حلگي وخشمي واگلب بالاكل مااگدر اكل والدجاج اصلا مااحبه ومااطيق ريحته اذا گلي بس اذا كان مشوي ومتبل ..

شفت عمته انتبهتلي . بسرعه سحبت ايدي .. .