رواية ارهنت عمري الفصل الثالث عشر 13 بقلم نورا ناصر

حركت رجليه اخط اول خطواتي باتجاهه ...

وكفت مقابيله واباوع ع االي بصفه ما اخلي عيني 

بعينه .. 

مد ايده لجيبه وطلع تليفونه ، فتحه وظل يدوس بي 

خلاه على اذني وانه ضليت اباوعله بنظرات قلقة وادس ايدي بشعري وادخله جوه الشال ، اسحب ايدي وتتناثر خصلات شعري على جبيني مرة ثانية ... 

لحظات واجاني صوت امي الظاهر مسجل المكالمة 

ظلت تلعلع وتغلط عليه وتعد وتصف وتهدد 

حتى انه استحيت وخجلت من الكالته اله .. 

ابتعدت منه خطوات وبعدت ايده الملتصقة بيه من يم اذني .. 

ارتبكت بالحجي وعيوني اكثر ارتباك وانه اباوعله اشوفه مركز بيه يباوعلي وكأني اعظم انجازاته .. 

كتله بتوتر احاول جاهدة اتصنع القوة وما اريد انطي بأمي كدامه 

_  ايي وهسه شنو المطلوب مني انه!!! انت وامي انه شنو دخلي ؟ 

_ هيه هاي سوايه تسويها ؟ هاي اخلاق مرة شكبرها وشكدها وولدها بطولها واطول ...

_ شتريدها تسوي انت السبب بطلاكها وجنت متزوج بنت اخوها وعاملتها معاملة بشعة من حقها تخاف عليه منك بالنهاية هيه ام ، انت ماتخاف على ابنك مهند ؟ 

_ امج كلش زين تعرف بت اخوها سميحة شنو من بشر بعد ليش تلغي زايد بس انه اعلمها سهلة تدلل بسيطة اذا ماكسرت خشمها وادبتها واعلمها شلون ماتندك بيه ..

_ شتقصد ليش كله تهدد ، لعد انت شلون تريدني اطمئن واسلمك عمري اذا انت كاضيهه تهديد ..

_ انت مايمسج شر بعيدة وهم بت عمي واخليج على راسي لان اعرفج كلش زين حبابة وتربات عمي  ماعليج بس امج تدلل .. 

_ عفية الله يخليك شوفلك غيري والله احسن الي والك ليش تدوخ روحك اكو احد يشتري ضيجة الخلك لروحه؟ 

تقرب مني وهمس اذا انت ضيجة الخلك هلا بيها اريدها وما اتخلى عنها ... 

رمشت بتوتر وبلعت ريك وتمتمت  يله انه اروووح ارووح ....

سحبني من ايدي وين تروحين بعدنه ماكملنه حجي 

_ ما اكو بيناتنا اي حجي دخليك يا ابن عمي انه صرت بين نارين نار امي الي رافضتك ومخيرتني بينك وبينها  ونار ابوي الي ناطيته وعد وما اكدر اخلفه ، وانت يا ابو مهند بيدك تطفي النار هايه وترحمني ....

_ وانه هم مثلج واكثر من جهة اريد ارضي عمي وما اريد اتفاشل ويا وارفضج ومن جهة ثانية اريد اكسر خشوم خوالج وامج ....

_ هذا زواج مو لعبة انتقام وثارات وانت فشلت بزواجك الاول لازم تتعض هالمرة وتختار صح ..

هز راسه اي واختاريت صح ماكو غيرج اعوض بيها زواجي الفاشل اشوفج مثالية وكاملة من كل شي ...

_ غلطان ومتوهم هذا الزواج راح يجيب العداوة بين الاهل ويشعل نار الحقد وناره مستحيل تنطفي بعد ... 

ابتسم بخباثة وهو يباوعلي ومنو كلج انه اريدها تنطفي ؟ 

انت مارايدني هلله بلله انت تريد تنتقم من خوالي وامي ...

_ قابل جديدة هالسيرة هاي كل مرة تكولين هيج ؟ 

بنبرة تحذير كتله ؛-  انت رايدها حرب ؟ تدلل تصير حرب ليش لا وانه هم مو قليلة شر وراح تتعب وياي اكثر من سميحة بعد ...

العين بالعين والسن بالسن والبادي اظلم ، من رخصتك ابو مهند انه اروح وانت بكيفك بعد وقد اعذر من انذر ... 

جاي اطلع وكف كبالي قطع عليه طريقي 

يباوعلي مبتسم ابتسامة مستفزة 

وتكلم بنفس النبرة صايرة تهددين منين متعلمة 

_ مااحتاج احد يعلمني انه مو صغيرة اعرف وافتهم 

_ لا اكو من يعلمج وهذا الواحد يراد ينملص راسه من ركبته ..

_ اعوذ بالله منك ... تقصد امي مو؟ 

_ مادري بس انت سألي نفسج منو يعلمج هالحجي يدرسج بي طول الوقت .. 

_ محد يعلمني كتلك وبعد لاتدز عليه ما اطلع الك ترة.. اذا عندك شي احجي ويا ابوي ....حجيت هيج بنبرة عصبية

وطلعت اركض من الديوانية ....... واسمعه يضحك 

عضيت شفتي وانه احس بكل انواع الحقد تجاهه .. 

رحت كعدت بالهول طبت الحجية هيه عمتي ام عياش كمت تلكيتهم صبيت الهم ماي لان جانن تعبانات والجو حر .. 

الحجية كالت صيحي لحازم ....

رحت للغرفة مالته  تعال الحجية تريدك ...

جر حسرة وكام طلعت قبله وهو تبعني 

رحنه كعدنا بالهول ...

ظلت تحجي الحجية يمه حازم رحنه لبيت ابن عم ابوك 

بيت فلاح تعرفهم انت اكيد ، انه شايفة عدهم خوش بنية حلوة وحبابة واخلاق 

خطية فرحوا بينا وكالوا نردلكم الخبر بعد يومين انت شتكول ؟ 

حازم مدنك راسه جاوبها بنبرة خيبة:-  بيكفج يمه الي تشوفينه ..

_ هو انه الي راح اتزوج لو انت ؟ 

باوعلها بنظرات حزن انت اكثر وحدة تدرين وهذا الزواج انتوا ردتوا مو انه كملوا مثل ماتردون ..

_ امشي شوفها ع الاقل ...

_ مايحتاج اشوفها انتوا ردتولي مرة هذا هو 

ماراح يختلف شي اذا شفتها او لا 

_واذا وافقوا وطلبت تشوفك حتى تروح ويانه

_ لا يمه ما اروح اخذيلها صورتي خل تشوفها ... 

ام عياش ؛- اي يمه البنية وردة وردة ماتتفوت ..

حازم رفع عينه على عمتي كاللها وردة ؟ 

الحجية ؛- تقصد خوش بنية درة مال الله ... 

وتبادلن النظرات التحذيرية بيناتهن الحجية وام عياش ...

ام عياش ؛-  حازم انت ليش ضايج هذا الشي من صالحك بي خير الك بنت خالك هاي ماتفيدك  انت شفت بعينك شصار وي عياش من جان متزوج اختها ..

_ عمه لا وردة مثل سميحة ولا انه مثل عياش بينه فرق السمه عن الكاع .... 

_ جا شبي عياش هيه الجانت موخوش الله يسلمها وهو رجال مايقبل مرة تتجاوز عليه وتهينه وكل رجال هيج مايريد يبين بعين زغيرة كدام الناس بسبب مرته ..

_ عمه انه مو قصدي عياش مو زين بس كلمن وطبعه 

وانه هسه تعبان اريد اروح انام من رخصتكم ... 

كام وراح للغرفة ... 

رحت انه خابرت امي ماجاوبتني زعلانة عليه .. 

لليل خلينا العشى الحجية صاحت لحازم ماقبل يجي يتعشى ، تعشيت انه ورحت يمه بالغرفة 

جان كاعد صافن ويدخن ..

كتله ليش ماجيت تعشيت؟ 

_ مالي نفس ..  

باوعلي بعيونه كل خيبة وانكسار وحزن 

وردة عرفت راح اخطب ؟ 

هزيت راسي برفض لا والله ماعندي تواصل وياهه 

ابد ..

طفى الجكارة وضل يفرك بوجهه .. 

سألته عن امي ... 

كال البارحة رحت شفتها بعدها ابيت خالي فائق .....

_ اي احسن الها خل تبقى يم خالي ائمن ذوليك ما يتأمنون 

_ ماعليها شنو يردون يسوون يعني 

_ فيض ماكو اخبار عنه ؟؟ 

_ ماكو وامي تكول جهازه مغلق وعمامه رجعوا يهدون وخالي ردهم ..

_ قابل هو جاهل شيردون منه ...

_ مستفادين منه غير للشغل والكراب ..

_ هسه انت ماجوعان اكوم اسويلك عشى تاكل 

_ لا ماريد بس جيبيلي جاي اذا تكدرين 

_ هسه كايمة ...

كمت رحت للمطبخ صبيت اله جاي وديته وعفته وطلعت من يمه .. 

☆☆☆☆

صادف دوران السنة مالة اخويه المرحوم اسعد 

جانوا اقاربنا كلهم متجمعين ببيتنه مسوين ثواب 

على روحه .

جنت بالحديقة ادخن شفت شهد طلعت من البيت معصبة كلش وكوة شايله حسين وتعرج ووجهه محتقن وضايجة وعبالك روحها بخشمها . 

شمرت الجكارة وتبعتها ظليت امشي وراها واحجي خير شهد شبيج ووين رايحة ؟؟ 

التفتت عليه تتنفس بسرعة وصدرها يعلو ويهبط

_ امك امك ...

حجتها بصياح ..

خزرتها امي !! شبيها ترة اسمها خالتج احجي عدل ..

وكولي شبيها ؟؟ 

طبيت عليها للمطبخ سمعتها تحجي عليه حجي ماصاير ليش هيج اني هم بشر وما ارضى احد يحجي عليه والمصيبة تحجي كلام ماصاير 

_ امي ماتسويها مو لان هيه امي وادافع عنها بس اعرف كلش زين ماتسويها احجي انت بشنو مضوجتها ؟؟ 

عصبت بكيفك لاتصدكني اني رايحة ... 

تركت حسوني يمشي ولزمته من ايده وظلت تمشي بي 

وكفت مقابيلها قطعت الطريق عليها خزرتها شبيج دنحجي غيرر افتهم ...

_ لا تسمع مني اذا متصدكني خووش رايحة ارجع لبيت اهلي .

عرفتها معصبة كلش ومستحيل تتراجع 

اخذت حسوني من الكاع لان ضل يبجي مايريد يروح يريد يبقى 

طلعت امي من البيت واجت يمنه وشهد دتكولي انطيني حسوني اريد اخذ تكسي وارجع لبيت اهلي 

_ اني اوصلكم روحي صعدي بالسيارة 

بعناد كالت ماريد منكم شي ماريد المفروض تصيرولي سند انتوا ليش دتعذبوني ..

وصلت امي يمنه وجهت الكلام الي وعينها على شهد 

_ يمه سيف دخل حسوني للبيت تريد تروح هي خلي تروح ...

شهد بعصبية ؛- خاله ليش تحجين عليه وتكولين كدامهم ماحزنت على اسعد انت بكلبي وعرفتي اني مو حزنانة عليه احجيها حظج وبختج ؟ 

_ خلي الطفل هنا وروحي لاهلج اذا مايعجبج كلامي ....

_ خاله شدتحجين انت هذا ابني اني احق بي منج ...

_ انت عميتي على اسعد واخذتي وجان ماناوي يروح انت السبب بكلشي صار جيبي حسوني خلي يمي رويحة اسعد من الدنيا خلي يمي ماتستاهلينه انت .. 

سيف ؛- يوم شنو هالحجي الله يخليج ابنها تحرمينها منه ؟ صدك جذب 

امي بنبرة كلها بجي ؛- لعد بس هيه حرمتني من ابني 

_ شيالفة يمه انت مرة مؤمنه والي صار قضاء وقدر 

ضلت تضربني بقبضة ايدها على صدري وتصيح عليه ولك وانت ليش تدافع عنها ها ولك ، صرت اسنانها وحجت من بينهن لايكون رايدها ومخلي عينك عليها والله على جثتي وماخليك تتزوجها 

تبادلت النظرات ويه شهد ورجعت باوعت لامي 

_ يوم اهدي فشلة عدنه خطار كافي صياح عيب 

_ انت منو وتعلمني العيب انت ؟؟ 

طلعوا خالاتي وزوجات اخواني على صوت صياح امي يردون يعرفون شنو الموضوع 

شهد اخذت حسوني وطلعت بي بره تمشي وتعرج منظرها يكسر قلبي .. 

تبعتها انتظريني شهد بس اطلع السيارة اوصلج  لتروحين لوحدج... 

صوتي وصل لاسماعها التفتت ظلت تباوعلي بعيون كلها دموع وهزت راسها دلالة ع الموافقة ، فتت جوة مقهور عليها طلعت السيارة صعدوا وانطلقنا ، ظلت تبجي وتشهك بصوت عالي 

واني احاول اهدئها ...

_ سيف امك حيل اذتني بالكلام اليوم كلما افوت اسمعها دتحجي عليه حتى اقاربكم ظلوا يباوعولي ويحجن بيناتهن ..انقهرت والله حسستني بالذنب عبالك اني الي قتلته للمرحوم .. 

_ ميخالف ياعيني مراه كبيرة وفاقدة ابنها متعرف شون تتصرف وشلون تهدأ النار الي جواهه .. 

_ بس اني مو ذنبي واني هم فقدت زوجي وابو ابني وبيتي وسندي وصرت متشتتة اني اكثر منها تدمرت ..

_ اعرف اعرف حاس بيج بس اهدئي وكل شي اله حل ..

_ سيف لاتوديني لبيت اهلي وديني لبيت خالتي ماريد اهلي يشوفوني بهاي الحالة .. 

التفتت عليها معصب بيت خالتج نفسها الي ابنها رادج ؟ 

دنكت وهمست اي ... 

_ وشمعنى هيه تروحين يمها 

_ لانها قريبة عليه احجيلها كل شي وارتاح يمها . والعصر ارجع لاهلي .. 

_ لا ماتروحين يمها اني هسه اوديكم لمكان ترتاحون بي ..

_ ليش بلله ماتوديني لبيت خالتي ؟ 

_ احسن 

_ شنو احسن سيف ؟ 

_ اشش اسكتي خلص النقاش بكيفي اني  .. باوعتلها 

مبتسم وهيه هم ابتسمت .. 

اخذتها للمطعم تغدينا ، حجينه هواي دا احس نفسي رجعت اول ايام تعارفنا بيها بالكلية ، نظراتي مجاي اكدر ابعدها عنها .. 

تحسرت سيف الله يخليك احنه شنو دنسوي 

باستغراب ؛- شنو شبيج شهد ؟ 

دارت وجهه ماكو شي هيج 

لزمت ايدها سحبتها بسرعة فتحت عيونها على وسعها ليشوفنه احد احنا بمكان عام..

_ شهد ارجعج لبيتنا اعتذري من امي اكسبيها 

_ ليش تريدني اسوي هيج ؟ 

رفعت ايدي لراسي لزمته قوي وجريت نفس متوتر ...

_ انت تعرفين واني اعرف ميحتاج بعد تسألين ليش تقربي من امي وكسبيها حتى حتى ...

_ حتى شنو شبيك ؟ 

_ نتزوج .. 

_ امك ماتريدني ...

_ كتلج اكسبيها انت هيه من حالها تظل تحبج واني هم راح احجي وياهه 

_ بعدك تحبني سيف !؟

_ ولا كدرت انساج لحظة عرفت الحقيقة بعد ماتركتي الكلية  دورت عليج هواي دا ارجعج مالكيتج ...

_ شون عرفت الحقيقة ؟ شون عرفت اني ماخنتك

_ من اساور صديقتج نفسها هيه اعترفت وكالت الي صار لعبة مني وانت ظلمت شهد 

_ شعجب تطلع منها اساور 

_ تدري بيه احبج سوت هيج حتى تحسسني بالذنب  

_ صارت بينكم علاقة صح ؟ 

_ هيه هواي رخصت نفسها الي وعلاقتي بيها ماطولت شهرين .. انسي الماضي وخلينا بالحاضر ..

_ وديني لبيت اهلي هسه ويصير خير بعدين 

_ يله كومي .... 

☆☆☆☆

ميسم ... حازم ماتوديني اشوف امي مشتاقة الها كلش هواي وماجاي ترد على اتصالاتي ..

_ يله امشي اوديج انه هم اريد اروح اشوفها ..

_ هيه وينها بعدها ابيت خالي فائق ؟ 

_ لا رجعت لبيتها ... 

دقايق بس ابدل واجي ، رحت بدلت وطلعت ويا حازم لبيت امي .... وصلنا للبيت دخلنا ركضت عليهه 

حضنتها واحجي وياهه يمه ليش ماتردين عليه من اخابر عليج ليش تقهريني ... 

وخرت من حضنها اباوع بعيونها وخانكتني العبرة واحجي  يمه والله انه ما اريده عياش ولا هاويته بس غصبا عليه ابوي واكف بعيني 

تحسرت ودارت وجهه مديت ايدي لوجهه درتها عليه

يمه انه هسه قابل صرت مرته ماتكليلي منا لبعد سنة اخلص السادس ان شاءالله الله كريم ...

جاوبتني معصبة فتحي عين غمضي عين مخلصه السنة وماخذج عياش شنو قابل اكعد اتفرج عليج واضل ساكتة !! 

دخل حازم خله العلاليك بالكاع جايب لامي شغلات بيهن ، هيه هدتني وراحت بوسته ، لزمت وجهه بثنين ايديها وظلت تباوع عليه وتسأل بي ؛- شبيك يمه شو مو على بعضك احجيلي .. 

رحت كعدت وجريت نفس بضيق وهو ضل يحجيلها 

كالت وهاي بدرية بكيفها تروح تخطبلك خاف مصدكة هيه امك والله اله اخابرها واطيح حظها!!!

كتلها :- يمه على كيفج ترة  هيه مو  من كيفها تصرفت 

لا ابوي كاللها وهيه نفذت شبيدها قابل ..

اجت امي كعدت يمي بعصبية ووردة شنو نسيتوها نسيتو شكد انكتلت وتعذبت 

حازم كانت الكآبة بصوته متناغمة ويا ملامح وجهه 

كال  ؛- يمه اذا ترديني ابقى يمج سدي هاي السيرة دخيلج .. 

كالت اووف اووف اكوم اسويلكم شي تشربونا والله يا الله يردون يعدمون وجودي وبكيفهم يقررون مصيركم حسبي الله ونعم الوكيل عليهم ... 

كامت سوت النه عصير واجت كعدت 

كالت خذاني اخوي فائق ورحت اعتذرت من خالكم ابو راضي وطحت عليه وبست راسه ...

_ زين سويتي يمه وشلونه هسه هو ؟ 

_ مو زين نايم بالفراش والدكتور كايله احتمال يبترون ايده سودة عليه ...

حازم ؛- حيييل بي يستاهل كون يموت ونرتاح منه 

ميسم ؛- يا صدك جذب منك جا غير يبلون امي هيه السبب وهيه ضربته ويلوحك انت هم طشار لاتكول هيج ادعيله يطيب ..

ام ميسم ؛- اي يمه لاتكول هيج عفية والله انه مو قصدي اضربه واذي بس خفت من شفت السجينة بيده وردت بس احميكم ... 

سحب جكارة وورثها كال لا ادعيله ولا شي 

ضلينه انه وامي وحدة تباوع للثانية

حبيت اغير الموضوع سألتها عن فيض ؟

كالت ماكو خبر منه وعمامه راح يشيبون كلبي كل يومية داكين الباب يهددون طلعي لا شوف شنسوي بيج .. 

حازم ؛- لا تخافين هذول بس بوخة كل شي مايسوون ..

بقى حازم بالهول واحنا رحنه سوينا العشى 

وامي متحلطمة كلساع تطل عليه تباوعله وتصفك ايديها ميتة قهر على حازم ...

تعشينه وخلصنا كاعدين نسولف دك موبايل حازم 

فتح خط كال ها حاتم ؟ اي يم امي ، خوش هسه جايين اي اي عود اجيبها وياي ... 

كام على حيله حازم يله نروح كومي ميسم ..

امي ؛- وين تروح مو ع الاساس تظلين عندي للجمعة ..

حازم ؛- ابوي دز عليها يريدها مدري شنو عنده وياهه 

تقدم حازم باتجاه امي بوس راسها كاللها تصبحين على خير  وطلع قبلي .. 

انه كلت الله يستر ورحت جبت عبايتي ولبستها بوست امي وحضنتها حسييتها حييل حضنتني وهاي اول مرة 

رجعت بوستها كتلها ديري بالج على نفسج وقفلي الابواب زين ...

_ ان شاءالله يمه وانت هم خابريني وكليلي شراح يحجي وياج ابوج وشيريد منج ..

_ اي اكيد اخابرج بس انت جاوبي ويالله الله وياج .. 

تبعت حازم وصعدت ويا بالسيارة ..

_  حاتم ماكالك شيريد ابوي مني ؟ 

_ لا ما كال 

_ الله يستر 

_ شبيج خايفه قابل مسويه شي ؟

_ شمسويه يعني كل شي مامسويه

_ هذا هو لا تخافين ... 

درت وجهي اباوع ع الشارع وسرحت بافكاري 

مو بعيدة يكون عياش وره هالسالفة  .... 

وصلنا للبيت شفناهم كلهم كاعدين بالديوانية 

سلمنه وكعدنا صار كبالي عياش كاعد بصف ابوي 

تبادلنا النظرات لثواني ودنكت احس نظراته الثاقبة تخترق اعماقي ... 

الشيخ عزام ؛- ميسم اجتني شكوة عليج ...يكولون صاير لسانج طويل 

يحجي ورافع كفه بالهوا يأشرلي .. 

ام فخري بهمس ؛- ابن البط عوام ... 

رجعت باوعت لعياش شفته يباوعلي مبتسم 

وعيونه مقلصهن خزرته رفع حواجبه ونزلهن بسرعة  دنكت راسي والتزمت السكوت .. 

حازم ؛- ميسم عاقلة وحبابة ماتسوي شي يسيء الها او لغيرها..

الشيخ ؛- لا مسويه وهي تعرف بنفسها غلطانة لو ماغلطانه جان مادنكت راسها وماخلت عينها بعيني بنيتي ربات ايدي واعرفها ... 

حاتم ؛- ولج ميسم ويامن مطولة لسانج ؟ 

عياش وهو يطخ حاتم بيده؛- لاتكوللهه ولج 

وهمس بس انه اكللها .. 

ميسم .. عياش تكلم ويا حاتم هيج وغمزلي 

رمقته بنظرة حقد وكره ودنكت راسي مرة ثانية ... 

ابوي كال ؛- هيه تعرف بنفسها شمسوية ومنا ورايح ماتكررها لان وصلت الها الرسالة هسه .. 

ورمقني بنظرة ابويه حنينه ، خلاني احس بالذنب 

وكانه نظراته تحاجيني انت مو هيج يا بنيتي ..

وبنقس الوقت كرهت عياش الفتان شون يشكيني لابوي هاي اولها تاليها شلون .. 

ترخصنا انه وحازم وطلعنا من الديوانية 

وورانه طلع عياش من باب الديوانيه الي يطل ع الكليدور سمعناه كال تصبحون على خير ..

طلع وسد الباب وراه التفتله حازم وقطع عليه طريقه .. 

_ عياش ليش تفتن على ميسم عندك شي ضدها تعال الي احجي وياي .. 

ضحك عياش باستهزاء ومنو اكبر انت لو عمي حتى اجيلك احجي وياك ؟ 

_ عياش لا تضوج ميسم سمعت!! وله اكلك ترة هيه ماتريدك خلي عندك كرامة شويه وانسحب احسن الك ..

_ لك امشي انوب عليه الزعاطيط هو عمي انطاهه الي انت محد اخذ رأيك ..

تعصب حازم وعلى صوته اذا  انه زعطوط ؟ انت واحد بلا احساس وبلا كرامة همجي متخلف .. 

ظليت اجر بحازم من ملابسه اريد اوخره من يم عياش 

طلع حاتم ووجه كلامه لحازم شصاير شبيك تجوعر ؟ 

عياش لزم حاتم من ايده وسحبه؛-  مبين العريس اعصابه تلفانه ويفكر بالعروسة  امشي عندي سالفة وياك ...

واخذ حاتم وطلعوا من البيت .. 

انه وحازم طبينه بالهول اجت ورانه الحجية صاحت على حازم ؛- يمه اوكف تعال اكلك 

وكف والتفت الها ؛- ها يمه 

_ الجماعة ردولنه الخبر موافقين ماتروح تشوفها باجر ؟ 

_ لا يمه مايحتاج 

_ احنه باجر نروح نشوف طلباتهم شنو وابوك يكول الجمعة ناخذ الزلم ونروح حتى تكطعون مهر سيد 

_ الي تشوفونه ..

_ ميسم تروحين ويانه باجر تشوفين العروس لو انت شايفتها جانت وياكم بالمدرسة؟؟ 

باوعت لحازم وهو هم باوعلي نظراته كلها حزن 

رجعت باوعت للحجية وجاوبته لا يمه ماروح ع المشية اشوفها عود ... 

يوم الجمعة الصبح ع الاساس يوم المشية 

حازم دكها نومة لل١٢ لو ما ابوي اجه كعده 

جا ماكعد .. 

جان عدنا خواتي ورجاجيلهن  وعمامي وعماتي

والدنيا مكلوبة ... 

طبخ ونفخ وهوسة ... 

جنت بالمطبخ اعاونهم اجه واحد من الجهال 

صاح عليه اكو بنيه بالباب تريدج 

سألته منو كال مااعرفها مبركعة ..

طلعت للباب عرفتها من جسمها هاي وردة !! 

لطمت خدي ورحت عليها اركض

ولج شجابج ؟ 

رفعت البركع وجهه شاحب وعيونها حمرا دم ...

حجت بنبرة حزن ها ميسم هيه هاي الخوة فرحانة اليوم عقد اخوج ؟  جا وانه وضيمي وعذابي والكتل الي حصلته مافكرتوا بيه ..؟؟؟ 

جريتها وطرت بيها ورا البيت ؛- انت تخبلتي ؟؟ شجابج هنانه ماخفتي من ابوج ماخفتي من اخوانج 

_ ابوي مريض متلفلف ونايم اريد اشوف حازم وينه ضروري اشوفه واحجي ويا .. 

_ شتحجين ويا شصخمين صدك جذب منج اتركي مو نصيبج .. وروحي كبل لا اهلج يحسون على عدم وجودج وتصير مصيبة .. 

علت صوتهااا_ ما اطلع مناا اذا مااشوفه روحي صيحيله يلله ....