رواية نورة الفصل الرابع عشر بقلم ام مصطفى
حاولوا وي جدي بس مقبل ابد قفل ع الموضوع
كال بت داوود منهي عليها
وشحده اليتقرب الها
وصعد وراح للناصريه
اجه الخبر النه بساع
خوالي دزو ع ابوي ضياء
كالوا تره ابو رحمن نهى ع نور
-شلون هيج صار
-والله فاتحناه بموضوع بيت ابو نائل
وتخبل كال عدها ولد عم
وبتنه ماننطيها لغيرنه
ومن كام كال البنت منهي عليها وشحده اليوصلها
ابوي تخبل احتار شيسوي
طب النه وگال يابه هيج وهيج صاير
اني سمعت تخبلت
كتلهم اني اروح للناصريه
واخذ من ولد عمي مااريدهم احرگ
روحي ومااريدهم ابد
شنو جدي هسه اذكرني
اعرفه يعرفني سائل عني
اشو حتى مشايفته
-بويه هذا الحجي ميفيد المهم خربت الخطبه
ولازم نوصل خبر للجماعه قبل لا يعزمون
دزوا ع عمي ابو نائل واجه اسلام وياه
ابوي كاللهم
الله بالخير
-الله بالخير والعافية
-المره ماتصير الكم
طفر اسلام ليش عمي صار شي سمعت شي
-لا والله بس عمامهه سمعوا ونهوا عليها
وبعد مابيدي حيله
انه مثل متعرفون زلمه مربيها
والحل والربط كله بيدهم
-شلون حجي هذا عمي شنو بيدهم
احنه غير، متفقين
صاح ابو نائل اكعد اسلام خلي نحجي
شكعد بويه يكلك نهوا عليها
ادري صار سنين ميعرفوها
من حجين اني نهوا
-هاي بعد شسوي
ضل يتصايح اسلام وعصبي
وطلعوا
انتهه الموضوع وخربت الخطبه
متت بجي وقهر
لا فوك هذا يريد ياخذوني
للناصريه
اجت امي احلام
سامعه من خوالي
جانت خايفه كالت فدوه خربوها
تره هو عداوه وي بيت ابو نائل
اخاف يعاند وصدك ينهي ع بناتي
وتالي كسرة ضهري عليهن
يرحن لولد رحمن المجرم
مااريد
انهوا الموضوع
وانتي بنيتي نور من البدايه كتلج
كملي دراسه وانتبهي ع دروسج
ليش اشلعين كلبي
اكثر من ماهو مشلوع
بنيتي اني طلعت بيكم من الدنيا هاي كلها
وشفت الويل ع مودكم
لا شلعين كلبي
من باجر روحي داومي للمدرسه وارجعي
وشدي حيلج
صارلج شكد ممداومه
-تقريبا عشرة ايام
-اي زين روحي يمه ارجعي
اني اروح وياج لو ضياء،
ويكلهم عدنه فاتحه بالناصريه
ويرجعج
فدوه اروحلج ارجعي لدراستج
حتى خاف صدك يحجي جدج
اكله تدرس هي
ماوصيج بنيتي
ضليت اهز براسي اي ان شاءالله
كلت ماكو غيرها ارجع للمدرسه احسن
حضرت جنطتي
رحت ع حنين صديقتي وجبت الجدول والواجبات
وكعدت احضر الواجبات
بس كلش مخنوگه
ابوي وامي كالوا احسن قرار هذا
الصبح كعدت اتريكت ولبست
وشلت جنطتي وطلعت ابوي رايح وياي
دخلت للمدرسه وره ماخلص الاصطفاف
ابوي سلم ع المديره
وضل يحجي وياها
ويسولف الها ضروف عدنه صارت
وجايج لا ترديني
اريد تمسحين غياباتتها
وترجع
-ميصير ابو نور عشره ايام مو شويه
-اي صح بس لخاطر شيباتي،
سويها لله وضل يتوسل بيها
لحد ماوافقت
-اي يسئلج كولي مجازه زين
لادكولين غايبه
-واني راح اسويلج اجازه بتاريخ قديم
عاد انتي وشطارتج
روحي اخدي الدروس الفاتتج من صديقاتج
كتلها ان شاءالله
ابوي تشكر منها
-الف رحمة ع والديج ممنون منج اني
نور دنكي ع مديرتج بوسيها واتشكري منها
-شكرا ست
وبستها ورحت لصفي
وصلني ابوي جان عدنه درس عربي قواعد
ابوي كلها جانت مجازه عدنه فاتحه
وديري بالج عليها بعد ابوج
ام العربي كالت بعيوني حجي روح وتدلل
تستمر القصة أدناه
ورجعت للمدرسه لصف الخامس
وخربت سالفة الخطوبه وانسد الموضوع
ورجعت اداوم للمدرسه
كلت ادرس واشد حيلي
اني شاطره بس اخر فتره صدك تعبت من الدراسه
ردت بس اخلص منها
واسلام طلع بحياتي
عاد هملتها
من يوم ماصرت السالفه اسلام مشفته
بس خلود دكلي خطيه كلش متأثر وانقهر
وابوي فتح موضوع بنات عمي وياه
وهو رفض كال خلص بعد مااريد ازوج
كتلها اني هم رجعت الدراستي ونسيت السالفه كلها
اني وحنين نروح ونرجع سوه يوميه
جنت اتمنى اشوفه كدامي مثل قبل
بس ماكو اختفى
وعاد شفته
حتى صوته ماسمعته
اريد اسئل عنه بس استحي
معقوله نساني
مو يكول احبج واريدج اشو من اولها
عافني وين الحب بالموضوع
جدي دز علينا كال البت اريدها
مو دكولون ماكلت
وشحده الي يتدنه يمها
صارت مشاكل
وامي احلام ماقبلت
ودزت خبر الهم بناتي محد الهم دخل بيهن
ونهوتكم ع نفسكم
وووو صارت منواشات بالحجي
بس جدي اصر كال منهي عليها وشحده اليوصل يمها
بنص المشاكل بدت امتحانات اخر السنه
والحمد الله جاوبت
ونجحت للسادس
بس بالي كله يم اسلام وين اختفى
بعدين عرفت هو رايح دوره مسافر
طالع تعيينه بالدفاع المدني
ورايح دوره اطفاء ست اشهور
بعد ماخلص دورته رجع
سمعت عمتي دكلها لامي اسلام اجه
الحمد لله خلص الدوره
ورايح يداوم يوميا بعد مايبات
مااعرف فرحت اريد اشوفه
كمت ورحت الهم بحجة
خلود
كلت لامي ضايجه اريد اروح يم خلود
كل مره هي تجيني
كالت روحي لا تتاخرين
دكيت الباب فتحته مرت عمي
كعدت يمهم وسلمت
خلود-شعجب ولج اليوم جايه
-اجيت اشوفج صارلج شكد مجايه
-ايي صح
-شبيج جنج ممصدكه
-لا صدكتج 😉
اي شكو ماكو
-ماكو شي ضجت واجيتج
بقينا نسولف
واستحي اسئلها عليه
شويه ونزل
شافني وتفاجأ
سلم نور شلونج
-الحمد الله
طلع غسل ورجع
جان يكول لامه
يمة صايره تخبلين وحليانه بالزايد
-ايي يمه كلش
هههههههه ضحكوا
-شنو يمه جايه تحركين كلبي اكثر من ماهو محروك
انه شارد منج
اني استحيت وكمت كلت لخلود رايحه للبيت
-شبيج ستوج اجيتي يمعوده ابقي
-لا اروح
طلعت
وطلع وراي
-نور اوكفي
شلونج
-زينه
-روحي طاكه ع شوفتج
بس اشرد خاف اضعف ومااتحمل
شلون نور نبقى هيج
اني مو مال علاقات وانتظار
اريد ازوجج واخلص
-واني شنو بيدي اذا جدي معارض
-اخذ ناس واروح لجدج
-لا خاف يعاند بالزايد
-شلون لعد ابقى هيج
خاف صدك يزوجوج لولد عمج خير اتخبل والله
-لا اني مااقبل بيهم حتى لو ابقى عمري كله بله زواج
التفت وراه
ورجع باوعلي
وحجه بصوت ناصي
-اويلي هالكد تحبيني
ردت اطلع خله ايده ع الباب
نور مستخسره عليه حتى الكلام
يمعوده ع الاقل كليلي كلمه حلوه
-شنو اكول يعني
-كولي اي احبك
-بس خلي اروح عفيه اسلام عيب من اهلك
ابتسم ووخر ايده يله روحي
بس خليني اشوفج
لان اليوم احس ردت روحي بشوفتج
-الله كريم
طلعت فرحانه ومرتاحه
بعده يحبني ويريدني ماناسيني يعني ابد
ياربي شسوي شلون بهذا جدي طلعلي صفح...
وره كم يوم
خالتي احلام دزت علينا
دكول خلي تجي نور
جدها جاي هو وعمامهه وولده عمها يردوها يردون يشوفوها
ويحجون وياها
كلت لامي مااروح ابد
امي ضلت تحجي روحي شوفي شيردون
مااروح مبينه يريد يخطبني
مااريدهم كوه خوما كوه
ولج عيب امشي نروح اني وياج
وعود احجي هالحجي كدامهم
غصبتني امي اروح
وطبيت لبيت خالتي
اشوف ولد رياجيل ماشايفتهم ابد
وللحكاية بقيه ام مصطفى
