رواية سواد الاثمد الفصل الرابع عشر بقلم نورس
سيارات سودة فاتت على طول الگراج وفز الخال طلع وراه شبير والولد وعمامهم الكبار جايين يرحبون بيهم
ضل بـ بالي منو ذولة وهيج فزولهم
البيت اختبص خلوا كراسي بالحديقة وگعدوا برة الجو جان حلو بيومها اباوعلهم من الشباك كلها دشاديش وغتر وأغلبهم زلم كبار مشوربة
عمتي هي ومرة الخال من وكت واگفات عالغدة هن لزمن الطبخ وياهن مرة تشتغل عندهم بالبيت واگفة تساعدهم مخلونا احنا البنات نتقرب للمطبخ
اجت سهاد وبناتها ومرة عمهم وجايبه وياها بنتها غادة
سلمت عليهن وحتى غادة جانت حبابة ولطيفة بس سهاد من رحت أسلم عليها كشت بوجهي ما استقبلتني
انقهرت اني ممسويتلها شي ليش هيج متودني
عمة شيخة حست عليها تغمزلي عود عوفيها لتهتمين بس حزت بنفسي ليش هيج تعاملني شسويتلها
غادة وبنات سهاد اخذن صفحة وكعدن بالغرفة الكبيرة دك سوالف عيونهن عليَّ ويضحكن حتى شكيت بروحي خاف وسخة لو بيَّ فد شي عيب
اشو توني سابحة ضافرة شعري اثنين گصايب لابسة تراك رياضي ريحتي تخبل وجهي يلمع لعد لويش ديضحكن اني حيل حساسة من ناحية شكلي والنظافة أحب 24 ساعة ابين فريش ووجهي حيوي وبيه طاقة من أحد ينتقدني لو أحس شخص نظرلي نظرة انتقاد معجبتني ابدي أشكك بروحي وثقتي بنفسي تبدي تهتز
لطشت روحي يم عمة شيخة أفتر وراها درة من شافتهن عزلت روحها بغرفتها تقرة متحب الهوسة
ردت اروح يمها بس تذكرت بس تشوفني تلزمني تعاي اقري أكثر وحدة تعاني وياي بالدراسة بعد شهربان
جانت اسمها لازمة الكتاب وتفتر وراي ولوما هي ما أوصل هالمرحلة اصلًا كل سنة أعبرها بالشافعات
هي ملتهية تشتغل واني فوك راسها احجي وياها
نورجان :- عمة منو ذولي
اندارتلي :- عتقدصين الخطار
- اي
- ذول نسابتنا مرة وليد العلوية تعود الهم بنت سيد ريحان ودحكي خالج فدار معطيهم اثنين من بنواتو
- منو هذا سيد ريحان
- ازلمة خيّر گول وفعل الو وگفات ويَّ ولدنا علاقتو حلوة بيهم وابن اخوه داخل شراكة شغل ويَّ تيم وعلاقتهم اكثر من الاخوة بيوم اليجوون لبغداد يعزمهم خالج لهين بالغربية لو هناك ابيتو غاد
تسولفلي وتشتغل صاحوا عليها من برة طلعت تركض وقبل لتروح وصتني انتبه لگدر السوب لبين مترجع
صرت احوص أحب آكل على الواگف فتحت الگدر واخذت شوي دا اضوگه بعدني واگفة بيدي الخاشوگة
نزيت من صوتها
سهاد :- اييع يولي غدي تلعطين من الجدر شبلاج شنو ما حسبتي وراج ناس تاكل
ضليت مصطكة بمكاني صافنة واگفة يمها غادة وبناتها اثنين يتمضحكن وكاشات بوجهن لعبانة نفسهن مني
رديت والغصة بصوتي :- عمة شيخة گلتلي اوگف هنا ما قصدي
اجت وخرتني سدت الگدر
- وخري غاد گلبتي معدتي الله يگلب معدتج
استهضمت حيل وعيوني دمعت طلعت من المكان ملگيت روحي الا على باب غرفة در فتت يمها جانت گاعدة دتكتب شافتني وابتسمت
در الزهراء :- عرفتج انتِ محد ينزت عليَّ چفت غيرج
گعدت عالجرباية مدنگة ومبرطمة گوة كاتمة بجيتي انتبهتلي اجت تدفع بكرسيها گدامي لزمت ايدي
- شبيج نورجان عش ضايجة
باوعتلها مگدرت احجي رأسًا بجيت وهي انخبصت بيَّ خطية وتسألني شصاير سكتت شوي انطتني مَي شربت
باوعتلها گالت :- ها هسع راح تحجين لو شلون
حجيتلها الصار واني ضايجة ضلت ساكتة
- اني بيَّ عيب لويش هيج ديعاملني والله مسويتلهن شي وحتى نظيفة شوفي شمي ريحتي
حجيتها ومديتلها ايدي اشممها العطر ضحكت
- يولي اهو منو اليجي بنظافتج ورتابتج انتِ ادحگلج تلمعين 24 ساعة مثل الگمرة اگول بسري هنيالو لعمي عليج
- لعد هن شبيهن
- الله يهديهن اتركيهن لحالهن شيحجن خلي يحجن عش مضايگة روحج ومكدرة خاطرج من جم كلمة زتنها الج خلي عقلج اكبر من هيج لا من كل حجاية والثانية نزلتي دموعج
- ما اگدر مو بيدي أنهضم من واحد يحجي عني كلام محلو وخاصة اني مالي أذية عليهن
- مشكلتج تركزين هواي عالكلام السلبي الي يجيلج
- شلون يعني
- دحگي عمي ما على لسانو غير اسمج وعمتي شيخة تگوم تگعد تسولف بيج جدام گرايبنا وعمامنا وبابا كل ميفوت للبيت يذكرني ويذكرج اول اثنين على لسانو
يعني القصد من هذا انتِ متجاهلة الناس الي تحبج وتركزين على ناس هامش بحياتج مثل عمتي وبناتها كلهن جم ساعة ويردن لبيوتهن عش هيج مركزة بعلاقتج بيهن الما يودني ما أودو نقطة وانتهت
صفنت بكلامها صدك اني ليش مضوجة روحي وهن لا يقدمن ولا يأخرن بحياتي بس الموقف قهرني مو بيدي
گتلها :- اي بس مرات اكو مواقف غصب تحز بالخاطر
- صحيح بس احنا خوما كل كلمة مو حلوة تجينا لازم نحسبلها ونگعد نفكر بيها ونخليها تاخذ حيز من وكتنا وصحتنا بلا فايدة
- لعد شسوي
- عبري اسمعي من اذن وطلعي من الثانية ترى محد يستاهل والله
ايدي على خدي واني أسمعلها ابتسمت :- گمتي تحجين مثل عمو تيم
- اخذت بطبعو وبرد راسي گبلج هم سمعت حجي چثير
- عزة ليش
تنهدت :- علمود رجلي عيروني لأن ما اگدر امشي عليها
ضليت ساكتة اباوعلها تقربت حضنتها
- دُر والنبي أحبج مثل شهربان لتهتمين لحجيهم انتِ حلوة بكل حالاتج حتى لو متمشين
ضحكت :- شنو يولي انگلبت الآية مو هسع انا جنت أواسيج گمتي انتِ تطيبين بخاطري
ضليت ساكتة اباوعلها والابتسامة شاگة حلكي
ابتسمت وتوترت :- شبلاج يولي تكول وحدة مسودنة لتدحكين هيج
- عليج الله صدك تكولين هنيال شبير عليَّ
ضحكت بصوت عالي گمت جبت التليفون ورجعتلها
- شعتعملين يولي
- عليج الله عيدي الكلتي دا اسمع لشُبير
- عش تسمعينو
- كل كلمة والثانية وكال شمسوية بحياتج حتى الله رزقج بزوج صالح مثلي ويعيرني صفرة وصفرة وضحكوا عليَّ وغشوني بيج عبالك جابوني اله مگبعة مشايفني ابد سودة عليَّ
- هههههههه عجل عمي متزعلين منو نازل عليج دوسة ونص بالحجي وعمتي من چلمة كمتي تشاهگين
- لا فدوة شُبير اعرفه ديشاقيني لا اكثر يحجي هيج يرجع ورى شوي يوگعلي غزل حتى ارضى عليه
- عجل بس يمنا مخلصها مرجف الزلم ومرجف المركز
- هسه متسجلين
- تعاي اقري نورجان دحگتج طفرتي من القراية
اول محجت هيج گمت بسرعة ورحت للباب
وقبل لا اطلع مديت راسي الها
- أحبج دُر
- السوالف هاي عبريها على عمو شبير مو عليَّ تعاي اقري
- بعدين والله بس شوي ريست
دزيتلها بوسة بالهوى وطلعت بسرعة قبل لا تحجي
لمحت شبير صاعد فوك وغادة واگفة نهاية الدرج عينها ضلت وراه وتباوع ضايجة مشيت من يمها تعديتها
صاحتلي انداريت :- وياي
غادة :- اي وياج ام يمان تندهلج تگول خلي تجي تعاونين بالمطبخ الشغل هواي
سمعت صوت شبير من فوك وهو يصيحني باوعتلها لگيته ماد راسه من المحجر خازرني أشرلي اصعدي
گتلها :- شُبير يصيحني
ضاجت بالزايد وعافتني ومشت صعدتله دخلت للغرفة وسديت الباب لگيته واگفلي متخصر
شبير :- انا مو گبت هاي ممنوع تگفين يمها لو تحاجيها
- هي صاحتني
- تعوفيها وتندارين معليج بيها ماريد أعيد الحجي مرتين نورجان غادة ماريدج تحتكين بيها
هزيت راسي :- ماشي
گرص خدي وباس ايده مشى يم الكنتور يدور بيه
- شتدور
اندار :- دشداشتي السودة يولي وينها
- ما أدري
غم گصته ورجع يدور
نمت عالجراباية على بطني العب بشعري واحرك برجلي طلع دشداشته لبسها وصار گبال المراية يلف بالغترة
اباوعله من ورى ضابة جسمه ضب اكتافه ضخمة لف الغترة وانتبهلي غمزلي بانعكاس المراية رحت يمه گعدت عالميز واباوعله وهو يعدل بالغترة صافنة بيه
شبير :- اعرف يولي معتكدرين تشيلين عينج حگج انا حلو حيل
- اهوو
- هنيالج يولي البنات كلها متمنية نظرة مني وانتِ ما عاجبج تتگلبين علي عجل وين لاگيتها ضابط وشيخ
- وتغسل مواعين
فتح عيونه :- دحك الصفرة دحك تاتعيرني
- لا ليش أعيرك الشغل مو عيب دُر گالت الإمام علي جان يساعد السيدة الزهراء بالبيت
- يول انا واحد دايح تقارنيني بأبو تراب سلام الله عليه
- صير أحسن منه
ملتهي يباوع بالمراية من حجيت هيج اندارلي بسرعة فاتح عيونه على وسعهن عرفت حجيت حجاية غلط
- يول أصير احسن من منو
خليت ايدي على حلگي وهزيت راسي لا
گال :- يول عوفي هاي السوالف متفيدنا تاسويج دايحة مثلي شو بلة گولي دشداشة
- دداشة
سوالي اوك :- عفية ضلي هيج
ضجت وگمت دا امشي جرني لحضنه وهو يضحك
- شبلاج يولي أضحك وياج
- ما أحب هيج دتضوجني بعدين احمد ربك قبلت بيك باوع جسمك حيطك من عضلاتك ترى محلو هيج اني ردت واحد يكون جسمه متوازن عيونه زرگ وبشرته برونز ضاربتها الشمس مو مثلك فاتح لونك فاهي
- راح اهفج على حلكج لتچفصين زايد
- لعد مكذبة
شفت ملامحه انگلبت بدلت بسرعة :- لا والله اتمازح وياك اني قبلت بيك لأن عندك عضلات
حجيتها وحضنت خصره
- رگعي بيها يولي مزحج يدوس بالبطن
ابتسمت ورفعت راسي اباوعله :- أحبك
- اجيتي لملعبي عجل اسلگينا بـ بوسة غميجة
أشرتله يدنك دنك وجهه عليَّ رفعت نفسي طبعت بوسة سريعة بطرف شفته ووخرت
رفع حاجبه :- خاف متقبلين
- هي هاي غميجة لعد شتريد
- دحكي وتعلمي
حجاها ولزمني من متني رفعني اله باسني من شفايفي حيل خنكني خنك تكول مشايف وخر مني واني مطنگرة
رجع للميز لبس ساعته وخله عطر رجع عليَّ باسني بخدي مسحت بوسته رد باسني هم مسحتها عناد
دنك باسني حيل نتر :- ومحمد اذا مسحتيها
بعده ممكمل رفعت تيشيرتي مسحتها حيل جرني عض خدي عطت حيل سد حلگي بيده خلاني أگمز وخر مني
همست :- كلب حقير
- على أهلج انعل أصلهم عدا حلويات الخاصكي تاج وباج
- اني الك
- تهدد عود دمشي لج لا اهفج بدفرة تاخربط معاني وجهج
خليت وكعدت عالجرباية لامة ايدي لصدري ما اباوعله هو جان متحضر يريد يروح من شافني سويتها زعلة رجعلي كعد گدامي لزم ايدي
بوزت :- وخر شُبير
- لا يا الله الراء من تخف يعني السالفة انداست
حجاها ونزلت دموعي تخبل :- لا تخبليني نورجان شعملتلج عش البجي عيارة هاي
اني اصلًا مخنوكة بعده الموقف مال سهاد يحز بگلبي وهو زادها عليَّ انفجرت عباله ضجت منه صار يبوس بأيدي ويحجي وياي حتى يراضيني
مسحت دموعي وباوعتله
- مضايجة منك
- عجل منين
- من ورى اختك سهاد
عقد حاجبه :- شبلاها العثرة
حجيتله الصار واني مقهورة شفته احتدت ملامحه
- اني مضجت منها عادي بس غادة وبناتها كامن يضحكن فشلتني كدامهن
نتر :- وانتِ شعملتي
- بجيت
كام ضرب ايد بأيد :- استلم بس على شبير تستفحل وهناك سايگين عليها
- شسوي لعد
- انزعي البرجلج وخلي بحلوگهن تاشوف منو التذبلج حجاية بعد
- ياا
- وجعا بطلي هالفهاوة نورجان ومحمد اگضبج اسگطج طلعتيلي گلب حدر گلبي
اجه اخذ ايدي ويعلمني :- دحكي يولي يمي ابقي ثولة ومفينة حظو لشبير بس الوادم استفحلي عليهم التذبلج چلمة تردينها بعشرة وتاشوف الزلمة اليطلع وراها
- واذا كتلني
- افين حظهن ومحمد واگلبها عليهن درايفر شنو هيته اخ لوما حريم جان عرفت شعمل ما عگدر كل موقف والثاني أعارك وراج واگاون ذاك اليوم من طگيت ابتهال خالي وتيم سبوني سباية شلون امد ايدي على حرمة
- ما اكدرلهن يخوفن كلهن اضخم مني
- عجل حدرج عمة شيخة ترحين تكوليلها تروح تفينلج حظهن
- لا وين عمة شيخة فقيرة متسويها
- منو الفقيرة
طكها بضحكة وكمل على كلامه :- يولي ذيبة لتشوفيها تعاملج هيج ومحمد من تخلي وحدة براسها تنعل سلفة سلفاها مينخاف عليها وانا مأمن عليج لأن هي حدرج
بس انتِ لتسكتين كلشي يصير كوليلها
- ماشي
- حرام اذا فهمتي كلمة
- لا والله خلص هذا هو بعد التحجي وياي رأسًا اشمر النعال بوجها
صاح :- فحلة
- واذا كلولي ليش سويتي هيج اكلهم شُبير كلي
فتح عيونه :- انا خافي ربج يولي يمتى حجيت
- عززاا والله توك كتلي التحاجيج حطي البرجلج بحكلها
صفك ايده :- حفظتها يا الله عتزتها هسع بحلك تيم
ابتسمت :- تخاف منه
- منو
- عمو تيم غير
- ياهو هذا
- اهوو شُبير لتضوجني
- ما اعرفو متبري منو
- الا اكُله
- لا يولي اشاقة ومحمد شيخلصني من لسانو
اندك الباب وصوت ابن تيم صاح
علي خيبر :- يولي ابوي والخال يندهولك
- اجيت انگلع
كام اخذ تليفونه گرص خدي وباس ايده :- ما اريد ادحكج تبجين بعد أسگطج والله
نورجان :- ابقى يمي
باوع للباب حاوط خصري :- ومحمد ودي اگابلج اليوم كلو بس مو هسع خطارنا جوة عيب
- وكتهم شعندهم جايين
- لا يولي ذولي السادة النسابة احنا نطلع وهم أهل الدار
دنك باسني بخدي وهمس :- راجعلج بالليل
اندفر الباب حيل وصوت علي يصيح يستعجله صاح بيه شبير وطلعله وهو يفشر عليه شوي ورجعلي
شبير :- يول يالفحلة
- أنثى شُبير أنثى اني
- خرب روحو يندارلج هو وعشيرتو ونسابتو سبع فدوات
- شنو النسابة دخلوا عالخط بالجديد
- واكعيلج ومحمد اسمعي يول ابقي هين ولتنزلين هذن الحياية جوة ماريدج تنغثين بحجاية
- لا حنزل يم در اقرة
حجيتها واخذت كتبي ونزلنا اني وياه الدرج گايدين ايدي بأيده يهمس بأذني يشاقيني واني اضحك جانن كلهن جوة من شافنا الوجوه تگلبت
قبل ليطلع أشرلي جوة رحت ركض لغرفة در وخلصنا اليوم اني وياها بالغرفة ندرس حتى الأكل عمة جابته ولا طلعنا بعد لحد ما فضت الهوسة بالليل
شمرت الكتاب مديت ايدي بتعب متشنجة من الگعدة
قريت قراية مصايرة على واهس در
انداريتلها :- تطلعين
در :- اي اختنگت
كمت سحبت كرسيها وطلعنا سوة البيت جان هدوء
تمشينا للمطبخ عالصوت جان صوتهم يسولفون
عمو تيم واكف على جهة مدنك يبوس بأيد شيخة
تيم :- تعبت اديج اليوم يالغالية اعذريني ما حسبت حساب من وكت يجون تاجيب طباخ وگضيتها
شيخة :- فدواتك يمة البنات يمي عاونني الحمدلله من عدت كلشي خلصنا گبل بوكت وما طلع من عندنا گصور جدام الجماعة زحمة جايينا من طريج طويل
- السيد يوصلج سلامو
- وصل يبعد هلي عجب ما ضلوا بـ بيت خالك
- خالي ما خلاهم يطلعون گلهم ناموا الليلة ومن الغبشة نرد سوة لبغداد ما قبلوا عفتهم بالبستان عيفترون يمهم خالي فدار وعمومتي
در :- اليوم ناسيني
انداروا اثنينهم بسرعة علينا ضحكلها واجه يمشي عليها كعد كبالها :- ول يابا ول درة بيتي تعتب
- تعودت عليك كل ساع عتفتح الباب تسألني شمحتاجة اليوم ماكو
باس باطن ايدها :- وغلاة عيونج بـگلبي هسع يلا دخلت البيت التهيت ويَّ الخطار
- معذور حبيبي اشاقة وياك
باوعلي :- وانتِ بابا شلونج اليوم
هزيت راسي :- زينة عمو
اندار لدر :- قرت
در :- اي قرت لوكت طويل وهسع يلا طلعنا تانشم هوى
- عينج عليها وانتِ نورجان أي شي تحتاجينو لو ما فاهمتو تجيلي تسأليني عليه لا تترددين بابا
- ماشي
اجاني صوت بنت سهاد من وراي
دلال :- خالو هواي عتوصي على نورجان واحنا ما سائل علينا مثل قبل
فتحلها حضنه راحتله :- يا يابا البنوات يعتبن شلون ما سائل انتن صايرات ما عتجن لهين
- شنسوي خالو ملتهين مدارس وبابا ميخلينا نطلع چثير مثل گبل
- ميخالف كل عطلة سولجن جية لهين تونسن وي البنات
- خالو ينرادلنا روحة للمزرعة
در :- اي والله بابا الجو صاير حلو بعد جم يوم تصير الدنيا باردة متنطلع خلي نروح كل احنا هناك
هز راسه :- سهلة سهلة أفرغ من الشغل الجوة ايدي ونشوف يوم مناسب وآخذكم نروح لهناك
رجع اندار علينا يسأل در على علاجها آخر شي كام
تيم :- اخذن راحتجن بابا الولد طلعوا بس ولدنا انجمعوا بالحديقة خاف عتطلعن برة
شيخة :- يمتى تطلعون لبغداد
- هسع دحكي التليفونات كامت ترگع منتظريني خاطر تطلع السيارات بس تاصعد اغير ملابسي
ترخص وصعد فوك اندارت لعمة
در :- وين رايح بابا
- راد لبغداد عندو شغل بشركة صدر الدين
باوعت لدر :- منو هذا
- ابن السادة گرابة سيد ريحان
اندارت عالبنات تسألهن :- عجب باقيات هين
داليا :- نبات الليلة بـ بيت خالي متونسين عاللمة وضلت غادة ويانا تبات
- هلا بيكم
باوعتلي :- نورجان عادي تطلعيني برة نفسي ضاگ
- من عيوني
شيخة :- شالجن عمة مآب ويمان هين
ركضت لغرفة در جبت شالها ورجعتلها انطيته الها تلبسه وهذن متحضرات قبلنا انتبهتلها تباوعلي من فوك ليجوة
غادة :- وانتِ عتطلعين هيج
- ما محجبة
دلال :- وخالي يقبل والله زين سايگة عليه خوش سوگة ومخليج على حل شعرج
شيخة :- انهجبي لج لا تخليني اكلهم يردونج لبيتكم حاطه گورج وگور هالبنية شبلاج عليها
- هسع انا شحجيت
- بالحرام سهاد وحاطتها گبالي جوزي يمة جوزي خالج ما يرضى على حجايتج الزتيتيها بس يگضبج تترزلين
- ما احجي بعد قابل شعندي وياها
- عاد كون تبقين على حجايتج مو چلمتين وينفر راسج وتردين تگلبين عالبنت
حجت حجايتها الأخيرة وعينها على غادة اني هم جنت مستغربة تصرفها لأن بآخر مرة شفتها جانت حبابة سولفنا وضحكنا سوة شو هسه انگلبت
أشرتلي در نطلع اخذتها للحديقة هن ورانا الولد گاعدين بالگعدة الخارجية مسوين گعدة عربية تخبل ملتمين داير مدايرها متوسط الگعدة دلال گهوة وفناجين
شافني علي فز بمكاني اخذ اخته سوالها مجال بينهم سلمنا وكعدنا حشگت روحي يم شبير لحگتنا عمة شيخة كعدت ويانا والتهينا بالسوالف
انتبهت لأخو شبير صافن عليَّ دنكت استحيت شبير لاحظه صاح
شبير :- شبلاك ابن الخوش حرمة عينك تاما أطفيها الك
سلام :- بصلاة محمد هاي حرمتك
- شنو مو بعينك
- يولي جنك ثور يزاگط شكبرك شگدك وهي دحكها مهلسة جنها در شلون توالمتوا
در :- عش عمو وشبيها در
- حلوة عمي حلوة بس عقصد صغيرة ناعمة مثلج احنا بناتنا الله يستر عليهن ضخمات شكلهن مو لعمرهن
دلال :- عجل مملوصات أحسن دحك مرة خالو شبير ما بيها شوفة صفرة شكلها فاهي وفوكها ضعيفة مدري شلون قبل ياخذها
شبير :- شعمل خالي غشوني بيها وبشعرها الأصفر لبالي طبيعي بيوم العقد كشفتو طلع صبغة لوزينة
انداريتله فاتحة عيوني :- لتكذب شُبير شوف حتى حواجبي ورموشي شگر
- صدك والله شو گربي تاشوف
تقربت بوجهه ضيك عيونه كال :- وين يولي تارستهم مسكارة
مآب :- دحكي نورجان انا فاعل خير بس رجلج حافظ سوالف الحريم اكثر منج
- فاعل نعل صم حلكك تاما اكوم اشگو الك
- عجل شعرفك بالمسكارة
نورجان :- انتَ هم تعرف ترى
- انا منين يولي هاي سوالف رجلج
- لويش عمو فدار ما انطاك من المكياج بيوم الجمعكم لو بس لشبير
حجيت هيج ضلوا صافنين وشبير دنك راسه ايده على وجهه سمعته يهمس :- لا يا الله عتبدي تزتهن
- غير انتَ گتلي
باوعلي فاتح عيونه :- انا وين بالحرام اذا حاجي خافي ربج يالفحلة هم صفرة وهم تچذبين شيسوي الله بيج بعد
مآب :- والله شلون ما اشوف زات هبدة من هبداتك عليها وربك ما رضالك بلاك بوحدة ما تضم حجاية بحلكها
- تايعاقبني بسوء أعمالي
لحظات وطلع عمو تيم من البيت مستعجل بأذنه تليفونه يخابر رفع ايده يسلم قبل ليطلع وكفته عمة شيخة ركضت جوة بسرعة ثواني واجت هي ومبخرتها
وكفت تبخره تردد كلماتها :- سور سور والنبايا حضور حالك وحواليك فاطمة نشر عليك من عين تسد عليك ومن عين كلمن تشوفك وما تصلي عالنبي
صاح شبير :- طفت طفت
- طفت عينك كون
- والله مكبرة راسو وهو محد مگلبتو دحگي انا احلى واحد بالعشيرة وشكثر متواضع گاعد بينكم هسع
- عضة أسد ولا نظرة حسد تغار منو
حجتها وهي تدور المبخرة وتصلي عليه
صدك ما ألومها اباوعله لابس بنطرون وقميص أسود بأسود ضاب جسمه ساعته الفضية بأيده لابس محبس خرزته فيروزية شكله يلمع نظيف بشكل
كلهم حلوين ولدهم وبناتهم وأكثر ما يمزيهم رسمة عينهم بس عمو تيم مطلعهم كسر بعيونه الكحيلة حتى مممبين فرق عمر بينه وبين اخوته عبالك بگصتهم
باوعلها مبتسم تليفونه بعده بأذنه الخط مفتوح
تيم :- تأخرت يشيخة
- روح يبعد امك درب السلامة بحفظ الله وابو الحسنين
باس راسها ودنك على درة باسها بخدها مدري شنو شاورها وهي ابتسمت شال ايده سلم وطلع يمشي عالسريع مستعجل
ورى نص ساعة فات عمو فدار من البوابة اجانا
فدار :- شعندهم ملة الخلافة مجموعين
شبير :- غير يگعد الحمزة
- راح أدوس بحلگك احجي عدل لك
43 تعليق
- عجل احنا ملة الخلافة شنو شفتنا من أتباع قريش
- قليلة عليك واحد مسربت لا الك دين لا خلقة ولا أخلاق
- بعد فد مرة كاتل سبعة من أتباع الرسول ومشارك بمعركة أحد شنو السالفة خالي
بعدهم يحجون انفتح باب الشارع وفاتوا اثنين شباب من ولد عمومتهم سلموا واجوا گعدوا صاح بيهم
فدار :- ولد الخايبة دنيا نص الليل عش جايين هين
71 تعليق
طارق :- اجينا تانشوف هالوجوه الطيبة
- شفتونا هسع سرسحوا
- لا خالي ما مرجية منك انتَ ابو الكرم و الملگه
- عجل كرمي بهدعش بالليل حتى عشا ما ضل عندنا
مظفر :- عمي منريد المهم شوفتكم
- من الصبح مگابلني وگبل نص ساعة يلا رديت لبيتكم
- مآب خابرنا كال تعالوا ملمومين خوش لمة
اندار عمو فدار على مآب رافع حاجبه التهوا يسولفون
شبير نزع الغترة خلاها على راسي تضايقت خزرني
تقرب همس :- بس عتمدين ايدج وتوخريها اسحلج من گصايبج الصفر ليفوك
- ما احبها اختنك
- وخنكتهم ابقي گاضبتها تاما افلع راسج
همست :- شُبير
- خرب بنعال دحك الراء شلون يرگص صوتج يولي
- راح انزعها
- طبي جوة
- لا متونسة هنا وياكم
- عجل اكعدي وبلا تنعوص زايد دحكيهن كلهن محجبات بس انتِ مفرعة بشعراتج الصفر يجيبن التايه
عدلتها وشديتها من ورة باوعلي وهز ايده معاجبه واني اتبسم بوجهه وانطيه نظرات بريئة حتى ليحجي
ولدهم حبابين يسولفون ويضحكون بس شقاهم ويانا البنات بحدود مدري يخافون من عمو فدار واكفلهم وكفة بيده تليفونه يخابر بيه وعيونه علينا
كاعدة عمة شيخة تسولف النا على أيام قبل كلهم هدؤوا وكطعوا سالفتهم اندمجوا بسالفتها
6 تعليق
شيخة :- گبل بالثمانينات بالبستان مالنا جان عدنا رجال اسمو ابو مزهر يشتغل بيه ومخلينو قائم على هالبستان والزرع ونعطيه راتب الو ولأهلو جانوا ناس على گد حالهم ومعاشريهم فترة طويلة وبيناتنا زاد وملح اكثر من عشرين سنة من صار عمر وليدي ابراهيم عمت عيني عليه 16 سنة ابوه سجلو بدورات الجامع القرآنية وياخذو وياه ومرات هو هالزلمة ياخذ السيارة ويروح يرجع الولد من الجامع الا ما بمرة من المرات وصارت هالسالفة
مثل كل مرة راح تايجيبو وتأخر الوكت للعشا رد الزلمة كال
ابو مزهر :- إبراهيم ماكو
انفقد الوليد جان يتأخر كل الليل لان يداوم العصر صارت الفجرية وادمنا بدوا يدورون والمنطقة كلها دخلت انذار والكل عيدور 3 ايام لا ليلنا ليل ولا نهارنا نهار باليوم الرابع كاموا يشكون بأبو مزهر اليشتغل عندنا لان ياخذهم اماكن بعيدة حتى يدورون جروه حققوا وياه وطگوه يلا اعترف
أثاري جايب الوليد من الجامع سودة عليَّ بيدو القرآن وخانگو ودافنو بـالبستان
خليت ايدي على صدري وشهگة خفيفة طلعت مني انتبهت للكل ديستمع بهدوء ومركز وشفت عمو فدار كاعد ويانا بالگاع متربع ورافع رجل ساند ايده عليها
فدار :- ابو مزهر البستاني جان
بينا وبين عشيرتو خلاف عشائري مهددينو يكتلون عايلتو لو يكتل إبراهيم غيضًا بزوج شيخة ابو ابراهيم الله يرحمو هادي المهنا
تحسرت عمة شيخة وكملت على كلامه
- جان رجال ونعم الاخلاق ما فد يوم گصر عليَّ بشي لو زعلني بچلمة وجان معروف بين الناس انسان مؤمن طيب والكل تحترمو وتحبو طلبوا من عندو يصير ويا النظام السابق بس اهو رفض لان انسان ما يقبل بالظلم
لحد ما بيوم من الايام وصلنا خبر واحد من جماعة ** بلغ عنو يابا شنو التهمة والله عيصلي بالجامع جرجروه من نص بيتنا يعمة جنا كاعدين وكت غدة وكاعد هو عمت عيني تاياكل اخذوه عذبوه وره اسبوع من التعذيب اجانا خبر اعدامو من رحنا نطالب بجثمانو ما عطونياه هادي مات ماكو حتى فاتحة ممنوع نسوي عزا واخذوا فلوس الطلقات من عندنا
تحجي ودموعها كامت تصب تسولف كمية القهر والحزن الي عاشتها بذيج الفترة مسحت دموعي باوعلي شبير
لف ايده على متني يهمس بأذني حتى اسكت
كعدوا كلهم يشاركون بالحديث وكلمن يسترجع ذكرياته بذاك الوكت وساعة ننقهر وساعة نضحك وشبير يسولف على عركاتهم المدرسية جنت مندمجة حيل ومتونسة
لحد مصاح بيهم الخال
فدار :- تطشروا ولد الخايبة الباجر وراكم دوامات وانتَ بوية مآب ورانا طلعة من الغبشة نرد لبغداد هم يلا تلحك تنام جم ساعة
راحوا الولد كلمن لبيته وعلي أخذ درة وفات للبيت
وعمو فدار وعمة شيخة واكفين يسولفون على صفحة
شبير كام بالحديقة على جهة واكف يدخن كمت وكفت يمه اخذ نفس وباوعلي
شبير :- لتكليلي تردين نفس انهجبي تاما ادفنج هين
ابتسمت أبتسامة عريضة ايدي ورة ظهري واهز بجسمي باوع للمكان يمنى يسرى وهو يسب ويلعن
گال :- گربي بسرعة
تقربت سحبت نفس والجگارة بيده ونفخته
- طيبة والله
حجيتها وكمت أفرك بعيوني جر ايدي
- لتفركيهن يولي تخربين ملاتي الشهل
- نعست
- امشي لغرفتنا تانام
سحب اخر نفس من الجگارة وذبها بالكاع داس عليها برجله شو هذا دنك شالني من الگاع تعلگت برگبته
همست :- عزة شُبير ديشوفونا
حجيتها وأشرت بعيوني عالبنات اللي بعدهن على گعدتهن وعيونهن متشكلة علينا ..
- انا اريدهم يشوفون
خليت راسي على صدره وغمضت عيوني مشى بيَّ دخلنا للبيت اجاني صوت عمة تكله
شيخة :- نامت فرختك
- لا عيارة عود مستحية
اول محجة هيج گرصته من ورة حيل صاح بصوت عالي :- انعل چلاب أهلج عش گرصتيني
رجعت گرصته مرة ثانية رجع صاح يسب ويلعن ضحكت عمة كلتله
- اخذها يولي لا مرة الجاية تلوحك عضة منها
دا يمشي فتحت عيني همست
نورجان :- عود ليش فشلتني كدامها
- عجل زوجج شيخ ينصح بالعالم وانتِ تجذبين وين صايرة هاي
- يا كذاب
- هاي منين متعلمتها ولج بسيطة نوصل للغرفة لو لا
صعدنا للغرفة ثاني يوم كعدت على ايده وهو يهزني يريدني اكوم واني بعدني نعسانة جريت الغطة على جسمي ودفنت راسي جوة المخدة
محسيت الا الغطة ينجر كمزت بسرعة انزل بملابسي واصلات لبطني وهو كبالي بكامل قيافته يباوعلي
عض شفته :- دحك الزرور يضون
اجاني طفرت من الجرباية وكفت عالجهة الثانية صحت
نورجان :- وكلام الله شُبير اذا تقربت اصرخ وافضحك
- لاه نچرة انتِ
- والله اسويها
- الصفرة طالع لسانج لو بس يمي تسفتحلين
- تأخرت شُبير
- وهسع انا شسويت فوك ما كعدتج
- بعد ما الحك شوكت اسبح شوكت ابدل ملابسي ما ادري وينهن وراي كوي غير تكعدني من وكت
- روحي اسبحي انا اطلع ملابسج
شفته راح للكنتور يدور بيه خليت وفتت للحمام اخذت شاور سريع البارحة سهرنا لوكت متأخر واخذتني النومة
فتحت الباب مديت راسي صحت :- ملابسي شُبير
شبير :- نعال عليه اطلعي واخذيهم
- انطيني الملابس حباب
- ما
- عزة الملابس شبيك
- ما تربيع
- تأخرت والنبي بس تعال انتَ دا اشوف وجهك وينك
ولا عبالك احجي وياه لفيت المنشفة على جسمي وطلعت حضني من ورة جرني لصدره عطت
شبير :- وصگعة وجع
- تأخرت والنبي
خله راسه برگبتي يشم بيها احس بگزگزة شواربه وهي تلوح بشرتي همست :- كافي شُبير تأخرنا والله
- يولي اكول لو نرجع ننام يا دوام يا بطيخ رگبتج تضوي تسوي واهس
- اني عادي أغيب بس انتَ خاف يعاقبونك
- باع هاي غير مرجفهم بالمركز بصيحة اخلي الزلم تتراكض
- احلف
- وداعة شعرج الأصفر
- ما اقتنعت
- وحگ هذا السويچ وحگ هاي البنكة بعد
وكف يباوعلي مضيگ عيونه انطاني نظرة من فوك ليجوه تكول ليزر لزمت المنشفة اجر بيها ليجوة افخاذي
سحب ايدي جرني لحضنه محاوط خصري بأيد
والثانية يمررها على خصلات شعري باس خدودي
- ويلي ربي شلون خدود حلوة
- شُبير
- ها يولي ها يبعد شُبير والراء البأسمو ها يبعد خالي والرتبة العلى اچتافو
- تأخرنا والنبي
تقرب طبع بوسة على شفايفي ووخر كال :- حضرتلج ملابسج وكويت قميصج دحكيه عالجرباية لتتعطلين بسرعة كملي نازل گبلج
اخذ سويچه وموبايله ونزل بدلت بسرعة نشفت شعري بالسشوار رفعته ذيل حصان وخليت قراصات شكل فراشة رطبت شفايفي اخذت الجنطة ونزلت
بوجهي للمطبخ لكيته واكف عالطباخ اندار بسرعة
شبير :- دحگي يالفحلة شلون زوج انا اكوي واحضر ريوك ومحمد تگعدين تصلين صبح ومسة عتندعين ما تلگين مثلي
انتجيت عالباب :- بس ليحترك الأكل عندك سوابق انتَ ويَّ الريوگات
- ما اعرف يولي تعاي علميني
وكفت يمه سحبني صرت كدامه حجيت بصوت ناصي
- عززاا شُبير هسه يفوتون
- خيولون شنو بايگ ناهب غير حرمتي
حجاها ويطبع بوساته على خدي گمزنا اثنينا على صوت عمة
شيخة :- يالأغم ذيج غرفة وانفرد بيها ما عندك حيا بكل مجان لازم البنت
- دحكي عمة گضبتني حصرتني بالمطبخ تقبليها صار ساع احجي عيب يولي مو جدام خلگ الله ما تنرد
شهگت :- عزة شكد كذاب والله مسويت هيج
- مو انا اعرفو يعمة تربيتو سگط يعمل الفاينة ويزتها براس غيرو تايطلع منها
شبير:- تا تعلمني اسوي ريوگ شمسوين قابل
باوعلي كال :- يلا يولي أخرتينا شكد فاهية
نورجان :- عززاا النوب اني أخرته
كملت الريوك گعدنا بس اني وياه عالطاولة شوي وفاتت غادة ودلال كعدن ويانا ياكلن هو التهى بموبايله واني عيني بغادة اللي من اول مگعدت مشالت عينها منه
متت بدمي حتى نفسي انسدت خليت وگمت اغسل
اجه وراي :- شبلاج يالفحلة
- شفت شلون دتباوعلك
- انا حلو شعمل يعني
ضربت رجلي بالكاع :- شُبير والنبي احرگك واحرگها وياك لتفور دمي
- يلا ايدج وما تعطي
- والله اسويها
- صار بنفسي ادحكج وانتِ طاگة وحدة اسمج تجيني دمعتج بعينج هسع لو الكلفه جان شگتها بالنص انتِ شبلاج
- اسويها ترى
- دنهجبي البوخة انهجبي عود تهدد لتروح تتفصخلج ايد رجل وين اعطي وجهي امشي كدامي لشوف
دفعني من متني واني مبوزة اخذت جنطتي وطلعت در سابقتنا كاعدة بالحديقة بزيها المدرسي يمها جنطتها شافتنا صبحت علينا اخذها شبير ساعدها حتى تصعد السيارة وشال كرسيها اجاه تليفون راح يرد على جهة
قبل لا اصعد دنكت اشد بقيطاني انتبهت خيال فوك راسي باوعت رجال جبير واكف يباوعلي عاقد حاجبه
ابو مظفر :- منين انتِ
توترت ماعرف شسوي ابتسمت :- هلو عمو
نظراته شككتني بروحي طلعت عمة شيخة شافتنا اجت بسرعة سلمت عليه وهو باس راسها سألها عليَّ
شيخة :- هاي حرمة شبير خوية
- وعش هيج مفرعة ووين رايحة بملابسها هاي
- أبو علي كلها تداومين حالج حال درة والبنت واصلة ما ضل الها بس هالسنتين عش تضيعهن رجعت تداوم
- ومن يمتى حريمنا تطلع وتطب وبهيج لبس شو انا مالي علم
- خوية كل راعي وعينو على حلالو انتَ ما عتقبل بناتك يداومن هي عندها زلمة يحكمها ودامو راضي محد الو حگ يفتح حلكو ويحجي
- انا احجي وياه اخلي يگعدها شنو وين صايرة طالعة مفرعة بشعرها وادمنا كلها تعرفنا شعتكول علينا
- وعش يگعدها حلال حرام مو هاي درة تروح وترد عمامها تايوصلوها محد طلعلو صوت
لو هاي لأن يتيمة مستضعفيها
- درة حالتها خاصة وانا ما أتلاغه ويَّ تيم تعرفينو يگب ويكوم يخرب من واحد يجيب طاري بزرتو
- ونورجان حالها من حال درة تراه فدار وتيم كافلينها وحذروا محد يگربها لو يجيبها بحجاية عاطلة
- اهو شخرب ولد عزام غير خالهم متفرعنين صايرين ما يحشمون لا چبير ولا صغير كلمن يمشي على هواه وما يسألون وراهم
- انتوا سائلين شو بس وكت المصالح تعرفون تيم واخوتو
- هاا
- والله عجل حگ لو باطل يخوي هذا حلالكم والخير العايشين بيه منين جايبينو غير بزود ذرعانهم
- ولدنا يهدون جبال كلمن گاضبلو شغلة ما معتازين لأحد
- عش جوة ايد منو يشتغلون ولدكم العاطل بيهم تزتوه على تيم وتعال حير بيهم وبطلايبهم كل يوم گوامة شكل
- تعيريني يشيخة وانا اخيج
- لا يخوي لا أعيرك ولا تعيرني كلمن عايش بخيرو وبمجانو وكلمن مسؤول على اهل بيتو خلي عويناتك على بنواتك وخلينا احنا ساترين بنواتنا لحد يتدخل
وخاصة حرمة شبير تعرفو لسانو زفر ما يحشم احد يزتلك وحدة من حجواتو تروح تتكدر خليه منو الها
- هالحجي ما يصرفلي انا اعرف شحجي وياه بس تايرد أبو علي وخالو من بغداد واجمعهم بعمومتهم بس هين
رد باوعلي صفح معاجبه وصاح من جوة على بنته طلعت تركض هي وجبتها اخذها وراحوا
گرصت خدي :- لا تتضايگين من كلامو هذا بمقام ابوج اهو يحجي هيج بس گلبو حنين جم يوم وينسى كلامو
ابتسمت :- لا عادي
بلعت الغصة بس هي ابد مجانت عادي
اجه شبير يباوع مستغرب
شبير :- شو عمي راح بسرعة شعندو
شيخة :- ماكو شي اجه تاياخذ بنتو يلا تيسر انتَ ووصل البنات هم يلا تلحك
استعجلني صعدت يمه ومشت السيارة وصلنا للمدرسة وراح هو لدوامه بالحلة تأخر يلا اجانا صعدت ورگعت الباب حيل صاح
شبير :- طرگاعة كون يولي بابي اريدو يالمتخافين ربج
ضليت ساكتة انتبهلي عيوني مورمة انگلبت ملامحه
كال بجدية :- عش باجية
- ماكو شي
- احجي لج
كالها بحدة درت وجهي للجامة ونزلت دموعي تخبل بالزايد اندار لدرة جرت نفس وحجت
درة :- موزعيلها درجات الشهريات وطلعت راسبة بمادتين وهاي الدوام كلو هي تون وانا اسّكت مللتني
باوعلي :- اشتعل الخلفج بگبرو يول انفجعت لبالي احد متعرضلج حميت تاهد بسلاحي
انداريتله :- بالإسلامية شُبير إسلامية شنو يهودية اني وارسب بيها لو مو من الإسلام
- عادي يولي تصير احنا بوكتنا جان الياخذ عندنا خمسين نوكفو عالرحلة ويكعد يخطب بينا تايهدينا للطريق
در :- عمو هاي سوالفك انتَ ماكو غيرك
- دحك الفاهية دحك انعدت من ابوها
نورجان :- متشوفين الفتاوي مالته ضاربة چقلمبة طلع ناجح بالدفرات بالأسلامية
- احاا وصلت يم شبير استفحلت الصفرة
ضحكت ومسحت دموعي خلص الطريق يحجيلنا على مغامراته بالمدرسة ويمدح بروحه ويحلف
- جنت أحسن طالب بوكتها من كد ايماني كاموا من يردون يضربون مثل بشي زين يذكروني انا الطلاب كلها تكرهني لأن اهلهم يقارنوهم بشبير صير مثل شبير البس مثلو احجي مثلو اقتدي بأخلاقو المدير ميطلع اذا ما مريت بالحلة وسلمت عليه وكل نهاية اسبوع لازم ولي أمري حاضرين بالمدرسة تايكرموهم على اخلاقي
نورجان :- ياا هيج واصل
- باع هاي اكلها وصلت مرحلة كاموا يصيحوني شبير باشا كد ما هيبة بس أعطيهم خزرة يتطافرون بمرة اجاني ابو الرياضة يركض كلي فزعتك رحت وياه طلع المخزن مال كتب واجة بيه النار من دون الطلاب زتيت روحي بنصها هم يناوشوني مي وانا اذب عالنار تاطفيها جم كتاب بكتاب طلعتلهم سالمات الله ليجذبني
اندمجت بسوالفه محسيت بالطريق لحد موصلنا للبيت
هو رجع لدوامه جان ماخذ زمنية محد من اخوته هنا يرجعنا بس اني ودر وعمة شيخة بالبيت خلصنا اليوم يمها بالغرفة ندرس
علي يم يمان عمو تيم بـ بغداد وشبير بدوامه للمغرب محسيت على روحي نمت بغرفة عمة فتحت عيوني لكيت روحي بغرفتي نايمة بحضن شبير
عينه بتليفونه ممنتبهلي تحركت شوي باوعلي
شبير :- صح النوم يالفحلة
مطيت جسمي بكسل ورجعت خليت راسي على صدره
همست :- ساعة بيش
- ويلي ربي الصوت مبحوح دنيا نص الليل عبرت الهدعش
- امممم
- شنو اممم عتخلصيها نوم كومي يولي ما شفت منج شي
- ما عندي حيل
- انا اسويلج حيل
- خلي نروح للبستان مثل ذيج المرة
54 تعليق
- الجو بدة يبرد والبستان مكشوف مو مال طلعة
- حباب
- انا مو حباب
- حباب تربيع
- انهجبي نورجانو سوالف الكلفه بطليها
- عليك الله
لحيت عليه كومته غصب لبسنا ونزلنا نتسحب مثل البزازين عمة شيخة نومتها خفيفة وبسرعة تفز طلعنا من البيت وكمنا نتمشى ايدي بأيده
تذكرت اول بوسة ضحكت باوعلي
- عش تضحكين ولج
- هيج تذكرت شي
- ادري يولي تذكرتي يوم السمطت شفايفج بـبوسة خليتج تطوطحين
فتحت عيوني :- عزة شمدريك
- عجل شيخ ترديني ما اعرف
وصلنا هناك كعدنا يم شجرة خليت راسي على صدره وهو لازم ايدي كل شوي رافعها يبوسها الجو حلو نسمة هوى باردة لفحت وجهي السما ضاوية وهم بستانهم مرتب مخلين إنارات كبيرة مضوية المكان
نورجان :- شُبير
- عيونو
- كملي سالفتك
- يا سالفة
- مال مدرسة
- هن هواي اصبري تافكر بوحدة
ضل ساكت فترة كتله :- هاا
- ما عتجي يولي خليني هايم عوفج مني سولفي انتِ
- شسولف
- أي شي المهم سولفي
رفعت راسي :- حجيتلك من شهربان ضحكت على واحد زحف لماما
- اهبدة
- وكلام الله شبيك
- سولفي بلة تانسمع
رجعت راسي على صدره :- هاي مرة واحد لزگ يخابر على خط ماما كامت بان حاجته ونسقت وياه كالتله اني صيدلانية وصدك انطيناه موقع صيدلية الي تكعد بيها بنيه فتواعدت وياه كلها شلون اخليج تعرفين هذا اني كلتله اگرصني ورة شهر دز رسالة
( متستحين انتِ متخجلين اجيت ولمن گرصتج لميتي الناس عليَّ واجت الشرطة اخذتني )
ضحك بصوت عالي ضحكت على ضحكته :- بالقرآن اختج رغم فواينها بس تشفي الگلب
- يوو سوالفها متنحجي بان
اتذكر مرة خالي شدت وياها على غسل المواعين هي موتها ولا تكلها فوتي المطبخ تتخبل منه عاندت ما غسلتهن كلمة منا وكلمة منا گبت العيطة طردتها مرة خالو برة البيت بعز الظهر احنا لبالنا انخطفت ضاعت لليل وبان ماكو تالي لكيناها بـ بيت واحد مخبل جنا نسميه سعد كوخة
عقد حاجبه :- شسمو
- والله شبيك نصيحله سعد كوخة
- شعتعمل عندو هي من غير شي اختج شلونها
- راحت كلتله نسرين تحبك تريد تزوجك وخالي بايگها خلته ينهد علينا بنص الليل يصيح طلعوا مرتي وين ضاميها كامت مرة خالو متعتب باب الشارع لأن بس تطلع تلكه سعد بوجهّا بالباب كلما يشوفها يكلها "اعبج" ويغمزلها
- ههههههه وخالج شنو موقفو
- يخاف منه لأن بان كايلتله هذا عدي ابن صدام حسين صار وين ميشوفه يركض وراه بيده الدرنفيس يريد يخلي الدرنفيس بعينه
- نعلعلة مشتهم مسطرة الكلفة
- والنبي بان صارت صديقته الوحيدة الي ميتقربلها لأن متخاف منه وهو گام يصيحلها ام علي
- ههههههه سلبوح سيان هم بيها بلة
سكت شوي وصفن بوجهي
- ها شبيك
- عجل انتِ مالج فواين كلها لبان
- لا شلون ترى لا عبالك اني فقيرة خلي اسولفلك هذا الموقف
- اويلي يربك سولفي يالفحلة سولفي
- مرة لزمت بنات خالو اثنين تعاركت وياهن
- اي
- هو بس تعاركنا وكتلني
باوعلي :- لا صدك
- والله شبيك ملشت وحدة محسيت الا الثانية صاعدة فوگاي سحلني سحل
- وتالي
- رحت لبان ابجي وأشكيلها غمتني ونزلت رگعتهن راس براس ورجعت
- دواج وعلي والنوب مفتخرة تكول تاسولفلك تالي طلعت مكتولة
- المهم بسطت الجبيرة هاي حيل خبيثة جانت متحبني
- شگد عمرها
- سبع سنين
بحلكه جگارته يدخن شحط من حجيت هيج واني ادك على ظهره لحد ما جر نفس
باوعلي كال :- لا اله الا الله حالتج حرجة ومحمد
سولفنا وضحكنا هواي بليلتها مجنت اعرف شنو المنتظرني بالرجعة تأخر الوقت كام وكف ومدلي ايده كومني عدل الغترة على راسي و الدشداشة ورجعنا
نفسيتي مرتاحة حيل والضحكة شاگة حلكي دخلنا من الباب الخلفي نسولف سمعنا صوت هوسة جاية من برة
نورجان :- هاي شكو
أشرلي اوكف وتقدمني بهمة صوت صياح زلم من بين الأصوات ميزت صوت مرة تبجي گلبي صار يدك سريع ونفسي زاد لزمت ايده اوگفه
عقد حاجبه ولزمني :- شبلاج يولي لونج انخطف
- ماما شبير هذا صوت ماما
حجيتها وركضت لمصدر الصوت ادورها مثل المخبلة رحت من جهة البوابة اجت عيني عليها متوسطة الگراج
كاعدة بالكاع دموعها تنزل يمها عمو فدار مدنك
بمستواها يحجي وياها يريد يهدأها
راحت روحي من شفتها ما ادري شوكت ركضت وشمرت روحي بحضنها واثنينا نبجي بالكاع بصوت عالي جرتني شبكتني حيل تبوس بوجهي وتشهگ
ضليت ساكنة بحضنها احس على لحظة اكعد ويطلع كل هذا حلم ممصدكة اشوفها كدامي احس بأيدها وهي تمررها على شعري وصوتها تبجي بصوت ناصي
اسمع اصواتهم فوك راسنا حتى نفوت جوة وشبير يردهم :- اتركهن خالي على راحتهن
ما اعرف شلون وشصار فتحت عيوني لكيت روحي بغرفتي تخبلت كمت بسرعة مثل المخبلة دموعي تنزل
اصرخ :- لا يا ربي دخيلك مو حلم شفتها بعيني
انفتح الباب وفات شبير بسرعة اجاني خايف لزم وجهي يهدأني واني مستمرة ما اعرف شأهذي
كعدني عالجرباية وجرني لصدره دنك باس راسي
همس :- اششش كافي يروحو لشبير
باوعتله بعيون مدمعة :- شفتها شُبير والله اخذتني لحضنها مدا اصدك يطلع كل هذا حلم
ابتسم :- ومنو كال حلم يولي
31 تعليق
ضليت صافنة ضحك على رد فعلي وگرص خدي
شبير :- ذيج هي جوة بغرفة شيخة من دحكتيها ساحت روحج ما لحكنا عليج شوكت خرطتي ووگعتي
مصدكت حجة هيج نزلت اركض الا شوي اوگع اليطلع كدامي ما اشوفه وصلت لغرفة عمة شيخة لكيتها كاعدة عالجرباية ايدها على خدها وصافنة بالكاع
نورجان :- ماما
اول مشافتني فتحتلي حضنها رحتلها حضنتها حيل واحجي من بين شهگاتي :- عرفت والله انتِ هنا جنت منتظرة ترجعيلي ادري بيج متعوفيني
شمتني حيل :- اااه يا ريحتج يا أمي يعيوني انتِ وين أشرد بيجن من الدنيا وألمجن بحضني طشرونا الچلاب حرموني من شوفتجن
رفعت راسي باوعتلها مديت ايدي امسح دموعها
- كافي حبيبتي هاي اني يمج صرت بعد مراح تعوفينا
مسحت عيوني باوعت للمكان ادورها :- بان وين
سكتت دنگت راسها بين اديها تبجي نزلت للگاع گعدت گبالها گلبي يدك والخوف مسيطر على كل حواسي
نورجان :- شبيج ماما بان وينها ليش مدا اشوفها وياج
انلزمت من كتفي انرفعت انداريت شفته
شبير :- كافي يولي امج تعبانة مو وكتها
- لحظة شُبير دا افتهم بان وين ماما ليش مجاية وياج صايرلها شي احجي لتخوفيني هيج
ساكتة على وضعها بس مدنگة وتبجي تخبلت بالزايد عقل مضل براسي كل وبالي بان بيها شي لحد مسحبني شبير طلعني دخلني غير غرفة واني منهارة بالبجي
لزمت ايده اتوسله :- عليك الله كولي اذا بان صايرلها شي لتضمون عليَّ أذيتوا گلبي حرام عليكم
دنك باس ايدي :- اسم الله على گلبج من الأذية ابوية
- احجيلي لعد
وگف متردد يباوعلي بحيرة وطال سكوته جر نفس بتنهيدة وحجة بسرعة :- اختج مهزومة من زوجها
ضليت ساكتة ممستوعبة الكلام :- شنو
سكت وهو يباوعلي تخبلت بالزايد
- شبيك شنو زوجها شنو مهزومة بان ممتزوجة عايشة ويَّ ماما بالسليمانية دتضحك عليَّ شنو ترى ابد مو وكت شقاك
- يصير ترتاحين وباجر نسولف تعبانة ما جاي تستلمين
صحت :- لتخبلني شُبير اختي مختفية وتكولي
ارتاح احجوا بان وينها ليش مدا تحجون
- يولي انا من گد ما هبدت براسج جذب كمتي ما تاخذين بصدگي عجل اكلج انهزمت من زوجها شعملج بعد وتصدگين
كعدت عالجرباية مصدومة مدا اكدر استوعب
بجيت رافضة كلامه :- لا لتكول هيج ممتزوجة بان والله
هز راسه كال :- متزوجة يولي تزوجت وامج ضمت عليج تاما تنقهرين
انهاريت واني بين اديه كمت من مكاني طلعت من الغرفة بعدني رافضة الفكرة وماريد اصدك الكلام السمعته رحت لغرفة عمة شيخة ملگيتها
سمعت صوتهم جاي من الصالة رحتلهم وگفت بالباب
كاعدة هي ويمها شيخة عالتخم مقابيلهن گاعد عمو فدار ومآب جان واگف على جهة يسمع لكلامها دنكت دموعها تنزل وهي تشكيله
شدن :- بان ماكو فدار بنتي راحت من ايدي محد ديلگالها أثر
فدار :- كافي يولي موتي روحج بعد جبتج الطريق كلو تشاهگين عطي نفسج مجال مو هيج
- دا اموت وكلام الله احس روحي دا أغلي من جوة عليها 4 أيام مختفية ومحد يدري بيها ممعقولة وين راحت يعني هي مالها غيري جان اجتني الي تندل مكاني
- لو صايرلها شي جان بين بس عش انتوا ما مبلغين مركز تا يدورون عليها ويعممون البلاغ بفقدانها
- مرضه الچلب زوجها اجاني نفس اليوم بنص الليل لشقة صديقتي ترس الشقة هو وجماعته دوروا رادوا ملگوا شي عباله جايتني من شافني ابجي ومنهارة مالي علم بيها يلا فك مني ويذب تهديدات اذا طلعت يمي وضامتها عنه يكتلني خلاص
شغل جگارته سحب منها نفس :- منو هذا النچر نسيبج الينهد على شقة حريم بنصاص الليالي من يا عمام منو أهلو
وگعدت تحجيله على عبد الإله وبيت شاكر وشغلهم
فدار :- عمها وينو عجب مالو علم بأختفائها
- يدري خابرني اخوي فؤاد يريد عنواني طالب شوفتي عرفت وراه شي رحتله برجلي لكيت بوجهي عمها سالم وستار زوج عمتها ولزموني تحقيق هم عبالهم بان عندي
واني هم جان عندي أمل يگلي بان يمهم بالبيت بس لا اني ولا هو حصلنا النريده مختفية محد يدري بيها وين
يباوعلها مركز بوجها :- ضاربينج يولي
سكتت ودنكت راسها ، أصلًا جان واضح من الكدمات الي تارسة وجهّا وصايرة على زراگ مدري بنفسجي شفتها مورمة ومتجرحة ملامحها ذابلة
هز راسه وكام وهو يتنهد :- گضت يام النثاية گضت عطيتج چلمة گبل كتلج انتِ وبنواتج بحمايتي وانا لهساع عند حجايتي بنتج ما راح يهدالي بال الا بيوم ما أردها لحضنج
- أعرف زودتها وياك بس مالي غيرك أروحله والله افترت بيَّ الدنيا ملگيت روحي الا على باب بيتك
- بابي مفتوح الج للدوم يمتى ما تعتازين شي تجيني انتِ ام بنيتنا واليجمعنا أكبر من هالرسميات ام بان
حجاها واجت عينه عليَّ واكفة اتسمعلهم بالباب اندارت شافتني جنت فاصلة عن الدنيا عيوني مركزتها عليها
ما اعرف صدمتي الأكبر بشنو يومها بزواج بان لو من دريت بزوجها نفسه عبد الرادوا ينطوني اله لو بساعة العرفت بيها مهزومة منه وضايعة
تعبت نفسيتي حيل ما اتذكر الصار وكعت من طولي مغمي عليَّ محسيت بروحي الا واني عالجرباية مشكلين بيدي مغذي
باوعت يمي ماما لازمة ايدي ومدنكة سحبتها بنفور
حست عليَّ فزت بسرعة ايدها تمررها على وجهي تحجي بخوف نزلت دموعها
شدن :- ليش هيج تخوفيني عليج نورجان اني ناقصة يعني
درت وجهي للجهة الثانية ماريد اشوفها
ردت والغصة بصوتها :- تدورين وجهج مني
انداريتلها صحت :- عوفيني ماريد اشوفج روحي منا جنت متمنية شوفتج اكثر من اي شي بهالدنيا ريتج مأجيتي ولا شفتج
- ترديني أرجع
مسيطرت نزلت دموعي غصب عني
- كُلشي صارلها من وراج انتِ كتلج بيومها ماما خلي ناخذها ويانا مراح تتحمل راح تتأذى كلتي تدبرها سباعية وتالي وينها السباعية بحح ماكو راحت بان محد يندل الها گاع
- ادري والله اني صوجي ضيعتجن اثنينجن من ايدي مكدرت احافظ عليجن كُلشي صار خارج إرادتي
حجتها وبجت
- ليش ضميتي عليَّ موضوع زواجها
- وعرفتي شراح يتغير يعني بس راح تقهرين روحج وانتِ توج جنتي عروسة مردت اكسر فرحتج يومها
شهگت :- جان المفروض اني بمكانها ماما
- لا انتِ ولا هي تستاهلن تصيرن بيد واحد مثل عبد لتلومين روحج انتِ مالج دخل بكُلشي صار
- وين راحت
دنگت لازمة راسها بحيرة :- ما ادري وكلام الله ما ادري افتر راسي 3 أيام واني منتظرتها كل ساعة اكول هسه تجي لأن مالها غيري آخر يوم متحملت جماعة زوجها وسالم وجماعته كل يوم مسويلي مداهمة للشقة حسرة عليَّ طلعة الباب الكي سيارة تلحكني لميت ملابسي وعفت الشقة مال صديقتي أذيت البنية وياي بوجهي لبغداد على بيت فدار وجابني وياه للغربية
- تتوقعين صايرلها شي ومن هيج ممبينة لهسه
اجاني صوته وهو يفوت للغرفة
شبير :- يولي اختج فحلة نچرة مينخاف عليها لو صاير الها شي جان بين لو سمعنا
وكف يم راسي مد ايده لوجهي :- شلون صرتي هسع
هزيت راسي وكمت عدلت كعدتي انتجيت على تاج الجرباية خلى مخدة ورى ظهري اندار لماما شافها صافنة ومقهورة
- شبلاج باجيتي اخذيها مني تلكيها هسع گاعدة رجل على رجل ضاربة الدنيا چلاق وانتِ هين تهمين بيها وقاهرة روحج
شدن :- لا شبير هالمرة غير بنتي گلبي لاچمني عليها ما شردت من عنده الا لو شايفة منه أذية قوية ومتحملت
- عجل زين سوت من شردت منو خليها مختفية احسن لأن كلهم متحلفيلها
واگفة عمة بالباب تتسمعله گلتله
شيخة :- انتَ شبلاك حتى مواساتك مگلوبة لو تحجي حجوة بيها خير لو تسد بوزك
52 تعليق
- بالقرآن عمة بعدج متعرفيها هاي تتذكرين شوارب خالي التزينت هي ماخذتهن الو بموس الا يا فحل ابن فحل عيكدر يگرب لشوارب عقيد فدار تايطرو حدر الكاع
اندار لماما كمل كلامه :- بذمتج باجيتي من دحكتي زوجها وجهو بيه شوارب لو أملس
رغم الضوجة والحالة الاحنا بيها ماما ابتسمت
كلها :- بصلاة النبي عليج تحجين الصدك عندو شوراب بوجهو
هزت راسها لا وهي مبتسمة طگها ضحكة طويلة
شبير :- ول بان مكينة تگضب الزلمة تهينه روحي يابا غمضي عينج ونامي رغد بنتج مينخاف عليها تلكيها سايگة عليه وعلى عشيرتو ومسيبتو وراها
مر يومين نفسيتي تعبت حتى دوام كعدت وبعد مداومت ماما بس تبجي وقلقانة على بان لهسه ماكو خبر عنها وشيخة يمها تصبر عليها عمو فدار والولد كلهم مستنفرين يدورون عليها خلوا صورها نشروا رادوا دگوا اسمها بالسيطرات ومنتظرين بس خبر عليها
شبير صرت حتى ما اشوفه يجي بس وكت النومة يذب روحه من التعب لحد ما اخذهم عمو فدار هو ومآب وطلع بيهم لبغداد ضل بالبيت بس علي من الولد واحنا
العصر اجتنا مرة سلام من اول مشافت ماما وكعت على عمة شيخة تسأل بيها على ماما وعينها مشالتها منها
شيخة :- الدرة سعاد شعندج جاية لهين مو عوايدج تجين طرگ روحج
سعاد :- يا عمة عجل ما كتلج الخال خابر سلام كلو تعوف البيدك وتجيني بساع لبغداد جن صاير شي چبير وما رايدنا نعرف لام الولد هناك غاد لبعيد
صفنت شوي بكلامها ضلينا وحدة تباوع بوجه الثانية والخوف والقلق جانن سيد الموقف عرفنا وراهم شي ضامينه ومرايدين يحجون
- بسج سعاد تزنين لمي ملابسج وجيبي بزرتج وتعاي نامي هين بين ما يرد رجلج لتضلين وحدج بالبيت
- شو حتى هين عندكم ماكو احد لا شبير لا أبو علي
- شبير ويَّ خالو وتيم عندو شغل بـ بغداد صارلو جم يوم غاد يكمل شغلو ويرد
- يا عمة هاي انا اكلج سالفتهم مو خالية دام الخال لمهم كلهم عندو يعني اكو مصيبة
- استغفر الله كافي سدي حلكج خلينا متهدين
سكتت وردت تباوع للغرفة الكاعدة بيها ماما خلت وكامت لزمتها شيخة :- وين مولية
- اشوف خطارنا عيب كاعدة لوحدها ارد عنها الوحشة
- المرة تعبانة سعاد مالها خلگ للقال والقيل
باوعتلي ايدها على حنجها :- يا شبلاها امج نورجان
123 تعليق
نورجان :- مبيها شي شوي إرهاق بس تمدد ترتاح
شيخة :- بدون حجي زايد ناگص فوك راسها ما عايزة لغوة
ضلت گاعدة تسولف ويانا لشوي تململت خلت وگامت
صاحت وراها عمة :- وين رايحة
- لبيت خالي فدار تاشوف حرمة خالي
حجتها بسرعة وراحت
- كونج انخلوج بمنخل هسع دحكيها تروح تزتها بحلك حرمة فدار وهذيج تجي تركض عتشمشم أخبار
كعدت عالكرسي متضايقة :- بس والله حجواتها يبسن گلبي شعندو خالهم لامهم هيج لمة حتى ما عينطون حجاية تبرد الگلب
مجنت أقل منها حيل قلقت من كلام سعاد اخذت تليفون وطلعت للحديقة الخلفية خابرت شبير
شبير :- عجب حنيتي كلتي اكو چلب ضال سايب
تا اسأل عنو اشوفو نام كعد اكل
نورجان :- طمني شبير ملگيتوا خبر عن بان
تنهد :- ماكو يولي اختج طافرة طفرة محد يعلم بيها بس الله
- عليك الله مضام عليَّ شي احجي بان اذا صايرلها شي لتضمضم تخلي گلبي نار
- ماكو خبر والقرآن عجل مجذب عليج
- لعد لويش عمو فدار داز على اخوتك وراكم انتَ ومآب
- سلام هين معارفوا ورفجانو اكثر مني يعرف هواي ناس تا يسأل ويوصيهم احسن
شهگت :- راح اتخبل شبير والله راح اتخبل وين راحت أقلها تليفون تشيله تخابرني لو تخابر ماما
- لتبجين يعيونو لشبير محد كاعد بينا ومحمد خالي واكفلنا وكفة صبح ومسه نفتر ما خلينا لا مستشفى لا طب عدلي آخر مرة انشافت من كاميرات الفندق بأربيل ومن ساعتها اختفت محد دحكها
- بأربيل
- اي جانت هي ورجلها هناك مغافلتو بالنومة وطالعة بعز الفجرية
- اخاف زوجها ديكذب عليكم هو ضامها
- لا يولي منين اهو من ساعة الدرى بينا مبلغين على فقدها بالمراكز وهو يهدد بتليفوناتو أصلخ واذبح وعيصيح انتوا اطلعوا منها وخالي متخبل منو تايريد يلزمو يطلع حيف گلبو بيه على هدتو لشقة امج
وكعت بالكاع مرجعة ظهري للحايط انتهيت بجي واسمع صوته بالتليفون يصيح يريدني اجاوبه
هدأت شوي جريت نفس وشلت التليفون خليته على أذني :- وياك
شبير :- دحكي نورجان ومحمد عگل ما ضل براسي كتلج نلكاها وين تروح قابل
- شوكت يعني شُبير هذا اليوم السادس حيصيرلها اسبوع مختفية
- وعيونج تنلكي شبلاج يول نسيتي هاي الكلفه مو حي الله هسع تشوفين شلون احنا مسيبين وراها وهي تلكيها بـ بيت واحد من رفجانها المخابيل
ضحكت واني امسح دموعي :- قصدك سعد كوخة
- دحك يربك الناس عتسمي الوسخ الزبالة وهي تكول كوخة
- مو اكلك احنا مثقفات انتَ متصدك
- ابوسها لثقافتج فحلتي ول مشتاگلج وحگ علي
- اني هم
- اطر خالي حدر الكاع واخلي راسو براس ابنو واجيج للغربية زحف ومحمد بس كولي
- عزة لا وين اكعد دور وياهم اريد اختي
- خرب روحها ركضتنا وراها عمج يدور زوجها يدور احنا نفتر ما خلينا مكان يعتب علينا وما انلگفت
دا نحجي ومثل اللي تذكر شي كال :- تعاي اكلج صدك عش ما جاي تداومين بمدرستج
- مالي خلك
- لا والله
- والله تعبانة نفسيتي على اختي من تلكوها عود ارجع اداوم
- خوش درب دحكي لج من باجر تردين لدوامج لا اجي أسحل بيج الغربية ومحمد ترى انا اريدها من الله على الله تكعدين بالبيت تابطلج لتخليني اتفرعن عليج واسويها من صدك وأكعدج من مدرستج
- عزة ليش
- عجل متوازي افتر بيج بشعراتج الصفر كدام خلك الله ما منها رادة لو تبطلين لو تضمين شعرج الاصفر
- لا هاي ولا هاي
دا احجي وسمعت صوت من جوة كتله :- بعدين اخابرك
ركضت جوة لكيت ام مآب واكفة تتلاغة ويَّ عمتي وعمة متخبلة منها تردلها الكلمة بعشرة تفاجأت بيها
ندست سعاد :- هاي شكو
- حرمة خالي عتتگاون ويَّ شيخة عش ما عطتها خبر بجية امج وطلابة الخال وولد اختو بـ بغداد
- يا طلابة يمعودة
- عيدورون على بنت ضايعة
فتحت عيني :- هاي شمدريكم
- مؤتمن جان يخابر مآب وعمتي سامعتو عش انتِ تدرين
ضليت ساكتة وأبلعم لزمتني تهمس :- بصلاة النبي تحجين منو هي البنت اليدوروها
- شمعرفني هم اصلًا ميحجون شي شغلهم كله سكتاوي
- والله صحيح مدري شبلاهم ولدنا ما عيزتون چلمة تخص شغلهم جدامنا احنا الحريم هيج متحذرين من عندنا
باوعتلي مرة الخال تخزر بيَّ نترت
فرحة :- من يمتى امج هين
- صار يومين من جابها عمو فدار
- اييه كملت تا تحوم النوب عالزلمة الجبير
شيخة :- وتالي ام مآب ترى هاي مو حالة من ساعة ما دحكتي المرة وانتِ مستلمتها بسج عاد ما مليتي
- عجل وانتِ ما دحكتيها مرة شكبرج شكدج مبنطرة جدام ولدنا يا طابين يا طالعين وين صايرة هاي
سعاد :- فدواتج عمة منيلها جبيرة دحكيها تكول گمر ١٤ غير مبينة اصغر مني
- انتِ انجبي بس الحجوة التغث تجين تزتيها يمي
- ها هاي فوكاها النوب صدك من كال سوي زين وذب بالشط
رجعت دارتلي :- وشعندو فدار تايجيب امج وين عرفها وين دحكها
32 تعليق
توترت كمت أمتمت :- ها ما ادري
- گرة عيني اي والله هو انا شترجة منج خاطر اترجه من امج
شدن :- وشبيها امها معاجبتج
انداريت عليها واكفة بالباب ومتخصرة مايلة جسمها وتباوعلها رافعة الحاجب
فرحة :- استحي يولي انتِ بـ بيت غرب تكومين تكعدين تبقين وحدة غريبة دحكي لبسج وشكلج لا هو من طبعنا ولا عوايدنا ندحك وحدة من حريمنا بهالشكل
باوعتلي ماما عاقدة حاجبها :- فني لو فهمت حجاية
صاحت عمتي من مكانها
شيخة :- نار واجة يشدن نار
ماما افتهمت سكتت منها وهذيج تدردم وتباوعلنا من فوك ليجوة تگول جايين من الشارع أشرتلي عمة شيخة اخذت ماما وفتنا للغرفة ضلت هي تحجي وياها
شدن :- شبيها هاي مدودة مني اشو من ساعة مشافتني وهي تلعلع
- هي هيج بس تحجي وتمشكل ودرت بعمو فدار هو الجابج لهنا تخبلت عاد
- عشتو بهذا وجها وتغار والله حقه يتزوج عليها ويطبق الشرع بالأربعة شلون قابل بيها ما ادري
ضحكت :- اشوفج محترگة اكثر منها
كعدت عالجرباية رجل على رجل تهز برجلها :- يا عشتو عليش دادة تجي بجمالي بس استغربت الفرق بيناتهم توقعتها احلى من هيج حتى ولدها حلوين بس هي استغفر الله خليني ساكتة
- مشكلجية ماما اتجنبيها وخليها تحجي لوحدها ترى متعودين عليها هنا
- واني شعندي يمها يا ماما اشو هي گبت من وكت مشافتني واني مرايدة اجي وكلام الله بس فدار لح وجبرني اجي وياه لأن گتله مراقبيني
ضلينا على هالحال اليوم كله مشاحنات بين فرحة وشيخة لحد ما خلت ورجعت لبيتهم وهي تتحلف
عمة شيخة لازمة گلبها منها مدري شبيها خايفة منها
اليوم الثاني داومت غصب عني شبير مخابر ماما ومبلغها وصلنا واحد من زلمهم للمدرسة وهاي جانت اول مرة لأن محد من الولد بالبيت
بالحلة وكفنا برة منتظرين احد يجينا خليت جنطتي يم درة ووكفت احاجيها
- حروح للمكتبة هسه اجي
درة :- شعندج
- ام الأحياء مسويتلهم تلخيص كومة وناسخته عند ابو المكتبة اروح اشتريه
- لتتأخرين هسع السايق على جية
- طلقة
رحت بسرعة المكتبة عبور الشارع اشتريت بسرعة وطلعت دا اتمشى راجعة للمدرسة شخطت كبالي سيارة
انفتح الباب بهتت بمكاني من شفته ابتسم وأشرلي بالمسدس البيده
ستار :- اصعدي
ضليت واكفة متجمدة اباوع للشارع فارغ محد موجود واتلفت سمعت صوت سحب أقسام بلعت ريگي بصعوبة وهمست من بين رعشة شفايفي
نورجان :- راح اصعد والله بس وخره
سوالي مجال اول ما تقربت من الباب سحبني بسرعة جوة السيارة وشخطوا بسرعة مشت السيارة مبتعدة من المدرسة باوعت وراي من الجامة ودموعي نزلت
ضليت خانسة بس دموعي تصب حسيت بأيده على خدي كال :- كل ما تكبرين تحلين اكثر
نفرت منه ودفعت ايده جابني براشدي صاح
- بنت الخره تتعززين بنفسج عليَّ وانتن بايعاتها يم فدار الأنباري وضباطه سهلة وين ترحن قابل هذيج اختج الساقطة هم الها يوم وتوكع بيدنا ونلمجن لمة وحدة انتِ نشمرج بحضن عبد ياخذج وهذيج مرجوعها لسجودة تشوف شغلها وياها
وخرت شعري من وجهي والشهگة لازمة صدري
- زلم الغربية مراح يسكتون
حجيت هيج جابني بأيده بنص وجهي انرگع راسي بالجامة
رد من بين سنونه :- هاي انتِ بأدينا نشوف الزلم التطلع وراج بلة
خنست حشگت روحي بالباب مال سيارة لا تلوحني ضربة لخ ، لازمة فكي متأذية وشفتي تحرگني لزمتها طلع بيها دم
خلص الطريق بس بجي كاتمة صوتي لا يطلع وانضرب الشهگة احسها شاگة صدري بالي يم ماما والي هناك عرفوا بالصار لو بعدهم
وصلنا هناك جانت دنيا الليل نزلني يجرجر بيَّ طببني للبيت فات للصالة شمرني للكاع رفعت راسي لكيت روحي يم رجلين عمو سالم
دنگ عليَّ لزمني من شعري
سالم :- ها يالبربوك رحتي رحتي وتاليتج رجعتي لأصلج يالعايبة
- شتردون مني
اول محجيت دفرني برجله بنص بطني وكعت بالكاع لازمة بطني اتلوى من الوجع رجع رفعني من شعري
- ااخ الله لوما موصيني بيج جان فصخت راسج عن جسمج بس هينة جاي الدور لأختج وامج اني الجن برابيك
12 تعليق
شالني دفعني على واحد من زلمهم صاح :- اشمرها بالمخزن واقفل الباب
اخذني اللاخ يجر بيَّ لحد موصلنا للمخزن دفعني طلع وسده كمت ادگدگ بالباب :- طلعوني اخاف من الظلمة والله حرام عليكم رجعوني لماما
كعدت بالكاع بعد ما يأست ماكو اي صوت حضنت نفسي المخزن اظلم حيل بس ضوة قليل يدخل من جوة الباب دنكت للكاع اباوع
جانت رجلين واحد واكف رجعت دگيته :- عليك الله طلعني اخاف والله ما اريد الظلمة حباب طلعني
احجي واشهگ سمعت صوت حركة خفيفة يمي تخبلت بالزايد كمت ارگع بيه حيل وابجي لحد ما انفتح صار بوجهي عمو سالم وستار لزموني اثنينهم تولوني دفرات منين متجيني بطني ، ظهري ضميت وجهي
انتهيت بيدهم لحد ما وخروا احس روحي حتطلع النفس كوة اسحبه گحيت بقوة اباوع للكاع انترست
د م
دنگ عليَّ يهمس بتحذير
سالم :- مرة ثانية أسمعلج نفس أنحرج عالنص ما يرفلي جفن اخليج مفرفحة بالكاع لا انتِ الميتة وخلصانة ولا انتِ العايشة
كام وقبل ليطلع بصق عليَّ وطلعوا اثنينهم وانقفل الباب
ظلمة ما اشوف شي وجع جسمي يصل عليَّ احس عظامي متكسرة ما اكدر اتحرك لميت رجلي لصدري ايدي بين رجلي دموعي تنزل ما ادري ابجي من الوجع البجسمي لو مصيري المجهول بديهم
دخت حيل غمضت عيوني جفوني ثگلت لوحدهم وغمضت ما دريت بروحي ما فزيت الا على صوت الباب وهو ينفتح ورجع انسد بسرعة
واحد فات عليَّ بيده فلاش موبايل مخلي بوجهي غمضت عيوني بقوة متضايقة من الضوة لحد محجت
نسمه :- نورجان تسمعيني
كعدت بمستواي تضرب بخدي تحجي بصوت ناصي وتتلفت بخوف ساعدتني تجت ظهري للحايط كعدتني طلعت مي غسلت وجهي وتحجي عليهم
- شمسوين بيج الأنذال
شربتني شوية يلا شوي كدرت افتح عيوني باوعت لوجهه عيونها حمر وتباوعلي بخوف :- شلون صرتي
هزيت راسي لزمت ايدها :- طلعيني منا راح يموتوني والله
- ما اكدر والله شبيدي قابل كوة كدرت اغافلهم واجيتج
- شيردون مني مو كافي السووه بينا مكفاهم طشرونا كل وحدة بصفحة
- كافي لتبجين
طلعت علاكة فتحتها بيها لفة انطتنياها :- هاج اكلي من وكت ما جابوج وانتِ ممخلية شي بحلكج
- ليش صار شكد واني هنا
- ساعة 2 بليل نورجان
دنگت ابجي :- ماما يربي ماما شحالها شُبير وينه عني
كعدت يمي ومدتلي اللفة :- اذا الي معزة عندج اكليها
- ماريد بيا نفس آكل منين اتلگاها من بان الشردت وعافتنا نرگع راس براس لو من ابوج
- زين تسوي بيهم
باوعتلها كملت كلامها :- ريت عندي نص شجاعتها واسوي السوته بأبوي واشرد منه ومن سجودة وظلمهم وجبروتهم اللي محد خلص منه
تحجي والغصة بصوتها :- شصاير
جرت حسرة وبدت تسولفلي على التسليم العلسة عبد على عمتي والصار خلاها بموقف لا تحسد عليه لأن جانت مواعدة جماعة عالبضاعة تبيعها الهم وماخذة منهم فلوس مقدم وبينهم اتفاق كام عبد دگ بيها الناقصة وما سلمها شي وذولاك صاروا يهددوها
باوعتلي عيونها مدمعة :- تدرين حتى تسكتهم شسوت
ضليت صافنة بوجها منتظرتها تكمل
ضحكت ونزلت دموعها :- سلمتني الهم بدال البضاعة باعوني بيع هي وابوية كله لخاطر شغلهم وفلوسهم
ضليت صافنة ممستوعبة الكلام الگالته
- شلون يعني مفهمت
- انطتني الهم بدل الفلوس الأخذتهن نورجان عمتي باعتني
ابوي باعني
انتهت تبجي بحرگة وايدها على حلگها تحاول متطلع صوت متحملت بچيت .
