رواية ارهنت عمري الفصل الخامس عشر بقلم نورا ناصر
تمارا ...
راح يحفر وانه منهارة وهو كلما اريد اكوم يجي يكتلني ويههدني بأبني يكتله ويدفنه وي ابوه
وانه كاعدة الطم على رجليني واتمتم بألم ووجع جسمي احسه كل قوة مابي ....
كلما اريد اكوم يكعدني بالضرب ويلزكني بالكاع
سويت نفسي هادئة وانه الم شتاتي واستعيد قوتي واقوي روحي وجسمي الي ينزف دم والم
وهو اطمن الي وانهمك بالحفر
زحفت شويه وانه كاعدة ابتعدت عنه شويه وطكيتها ركضة اجه هو ورااي هرجت الدنيا بالصريخ عبالك اخرس وحجه
سحبني من دشداشتي طحت ع الكاع شمرت تراب على عيونه غمض وظل يفرك بيهن دفرت ابطنه وانه اصرخ وصلت لباب الحوش فتحته واصرخ
اجو جم نفر من الشارع
وهو صار يريد يتسلق الحايط حتى يشرد
وانه اصرخ لزمووو كتل نبييل كتله
لزمو اثنين والتمت العالم وانه ركضت يم نبيل ادك والطم حسيت بابني خلوه بحضني وناس داير مادايري
كالوا بي روح بعده ماميت بس فاقد الوعي
حسيت عيالي اجو حمويني وعمي وانسحب ابني من حضني والشرطة طلعتني وكادتني وانه مامفتهمة شنو السالفة ليش جاي ياخذوني شمسوية!!!!
شفتهم خلو المجرم بالسيارة وانه بسيارة ثانيه ونبيل شالوه كبلي بسيارة واخذوه
انهاريت وانه ابجي واتوسل مامسويه شي ليش جاي تاخذوني حرام عليكم والله مالي ذنب ماتشوفوني مدممة ومكتولة ..
وكفت كبال الضابط كال انت تهمتج الشروع بقتل زوجج بمساعدة عشيقج
لطمت وجهي مصدومة بجيت وتوسلت سيدي والله هو تهجم عليه بالبيت واجه زوجي وهو كتله انه مالي ذنب والله
اكو شهود عليج هواي ناس حجو بيوم الحادثة
وكالو عندج علاقة بي واكو شكوى مقامة ضدج من اهل زوجج
مااستوعبت الموضوع انهاريت وظليت ابجي والضابط يريد يكمل تحقيق وياي ماكدر صرت مثل المخبلة والله احب زوجي واريده وماخنته وانه مظلومة
صار للشرطي اخذني للتوقيف
وراهه بوكت اجاني ابوي للتوقيف كلت اي اجه سندي هسه يوكفلي ويطلعني انه مظلومة
باوعتله جان معصب وعيونه بكصته مد ايده وضربني راشدي
لزمه الشرطي وبعده عني باوعتله بتوسل
والله مظلومة يابويه مظلووومة
كال والله تبقين هنا اشرفلج بس تطلعين اذبحج واخلص من عارج
وتركني وراح
حسيت بخيبة امل اقرب الناس الي تخلى عني
وصرت انه عار عليهم وكتلي يرفعلهم راسهم
يربي مظلومة والاحساس بالظلم ابشع احساس
رجعوني للتوقيف وانه عندي امل نبيل يصير زين وينصفني ياربي شحال نبيل هسه محد يطمني عليه
شسوي يالله
امير ابني وينه هسه وعدمن كله شرب نام كعد بجه عليه لا منو يداري منو اخذه محد يعرفله بس انه هسه شلون يربي شسويت عندك انه حتى هيج يصير بيه شسويت يا الله شسويت ..
◇◇●◇◇
ميسم ؛- مادري فيض مادري امي ماتت مكتولة والكاتلها حر ولهسه اليوم ثالث محد عرف منو كاتلها بس كلي شسوي انه راح افقد عقلي فيض راح انجن
فيض ؛- جا هيه بس امج ؟ صح عافتني صغير وربيت بعيد عنها بس احبنها واموت على شوفتها والحجي الكلته الها ماجان طالع من كلبي بس جنت محتاج فلوس اطلع واخلص من البلوى الي طاحت على راسي
باوعت عليه دنك خلى راسه بين رجليه وظل ينحب وخامش شعره بيديه
احتاريت وانه صدك راح اتخبل اتهمته بكتل امي بدون دليل بس والله ماعرف شسوي
خليت ايدي على كتفه اطبطب عليه ودموعي تحرك خدي رفع راسه يباوعلي ويجر بنفس قوي
كال حازم وينه توة جنت بالفاتحة مالة الزلم ماشفته طالع ...
جاوبته ماادري بي وهسه انت شراح تسوي راح ترجع لعمامك ؟؟
جر حسرة والله ما ادري شسوي يا ميسم عمامي محتمين عليه حتم اله اتزوج بتهم وانه ماريدها
انت ماتكدر ترفض تكول لا
باوعلي وهز راسه دنك وسكت ..
◇◇●◇◇
عياش ..
شفت حازم طب يهد عليه بالسلاح وانه ماعندي اي جواب وماناوي اجاوب واكول الحقيقة
بس لازم ادافع عن نفسي
تقربت منهم ولزمت البندقية وبعدتها
كتله انه بريء من دم امك وماكاتلها شلك بهذا الحجي ولك حازم ؟
صار بيناتنه عمي حط ايده على ايد حازم وباوعله
وبنبرة امر تكلم وياه تهدى حازم ووخر سلاحك خلي نسمع عذره شنوو؟
شنو عذري عمي ؟ سكتت وانه افكر
اكللهم رحت اشوف صاحبي واذا كالو منهو صاحبك شراح اجاوب وانه ماعندي صاحب هناك
فكرت بغير شي ..
كتله وشنو يعني صار سنتين واكثر من هم مانعيني اعبر مناك كافي ماانست السالفة عبرت مناك لان اسرع الي ..
عمي الشيخ كال ولك ب ١١ بالليل شايفينك تفر بسيارتك هناك شصخم وشتسووي ؟؟ وهذا الوكت الي صارت بي الجريمة ولك عياش لاتخبلني شنهو عذرك انطيني عذر اقوة اصدكك واوكف وياك ترا وصل الخبر لاهل المرحومة وجايين بالطريق والله اليستر
_ ماخايف انه عمي وشيردون يسون خلي يسوون انه بريء من دمها وماكاتلها والزلمة يجي يحاجيني مو گليل شر انه عدهم دليل ضدي يجون يواجهوني
واذا ما عدهم لا يظلون يتهموني باطل والله ماارحمه اليحجي عليه..
_ ولك انت شنو نسيت الكعدة نسيت انه تعهدت عنك ووعدتهم ماتطب لمنطقتهم شعندك هناك حاجيني ؟؟؟
جاي اسألك شعندك
حازم بصياح اي كول اذا زلمة انت كوول واحجي
شكول وشحجي ماعندي اي حجي
كتلكم عبرت عليهم وجيت النا وبكيفكم لاتصدكون انه اتحمل العواقب
حازم وهو يرفع السلام بوجهي وتكلم بنبرة صارمة وتهديد
وتتحمل دم امي مووو ؟
خليت عيني بعيونه وبهالحظة صارت هوسة يم الباب
صوت سيارات التفت عمي وطلب من حازم يضم السلاح
بسرعة راح حازم ورا البيت ودخلوا وراه الشرطة ووياهم اخوة صباح يأشرون عليه ويحاجون الضابط
هذا الكتل اختنا ومن كبل مهددهه اكثر من مرة وكدام عيونه
باوعت لعمي واحك بلحيتي
كال احسلك هسه تنسجن لان انه مااضمن الك شيصير ولا انه اكدر احميك واذا انت بريء من دمها الله ينصفك واذا انت المجرم الكتلتلها هم الله يكشفك
بس بالحالتين سواء انت بريء او لا ميسم ماتصير الك مرة
لان انت مااللتزمت بالعهد وضربت حجايتي بعرض الحايط وميسم بتي بت شيوخ واجاويد وانت ماتستاهلها روح وياهم بويه رووح وياهم
اقتربوا الشرطة من يمي عكدت حواجبي وباوعت لعمي
قربت من اذنه وهمست بيها
_ لا عمي لا غلطان ميسم الي ودير بالك تكول هذا الحجي مرة ثانية والله تصير موزينة وهم تصير كاتل ومكتول احذرك هاااااا
اجه الضابط وسألني انت عياش ابراهيم ؟
جاوبته وانه مخنزر حواجبي وبنبرة استسلام وبيها شيء من القوة اي انه
_ انت مطلوب للقضاء وجايه شكوى عليك تفضل ويانه للمركز عليك امر القاء قبض ....
سلمت ايديني الهم وكلبجوها رحت وياهم وانه اباوع لعمي بنظرات تحذيريه
صعدوني بسيارة الشرطة واخذوني للمركز ..
◇◇●◇◇
سيف
بعد ما عقدنا طلعنا من السيد تمشينا واشتريت لحسوني لعبة وكعدته ورا
فتنه للسيارة ظلت شهد تباوعلي بعدم رضا
كالت هيج تخليني بهذا الموقف سيف ؟؟
اخذت ايدها وخليتها على شفافي غمضت حييل وبستها ..
باوعت عليها شبه ابتسامة على وجهه وعيونها ندية وتلمع بالدمع وملامحها ملاح مليانة حزن ..
احتضنت وجهه بكفي كالت عيب احنا بالشارع
سحبت كفي واشر ع الشارع لج هو منو بالشارع دشوفي شلون فارغ
رجعت اخذت ايدها
شبكت اصابعي باصابعها واباوعلها بهيام ورغبة
يلله هسه صرتي مرتي اريدج
سحبتها بعصبية لا والله لاتكيف ترا احنه هسه باعتبار مخطوبين ماكو منا لمن نتزوج نعقد محكمة ونعلن زواجنا ..
رفعت حاجبي شكد نحسة صايرة هفف وبعدين وين راح بالج لبعيد ترا مقصدي شي بس انت نيتج سووء
لا بلله شتريد لعد ؟ وشتقصدج من كلت اريدج ؟
ظليت ارفع حواجبي وانزلهن بشقاوة واني مبتسم
قصدي بوسه حضنه الي يصير بين اي اثنين مخطوبين على كولتج مو اله الي بالج يعني
دارت وجهه ع الجامة معاجبها ، حركت السيارة
ورحنه مطعم اكلنا ورجعنا للسيارة
كتلها يلله اخذج لاهلي هسه ..
باوعتلي يعني راح تكول الهم تزوجنا
لا اصبري شوي مو اليوم ..
تنهدت بانزعاج كالت بعصبية وديني لاهلي يله ماروح وياك ..
هاي شبيج ؟؟ اشوو عبالك مسويه منيه عليه لان عقدت عليج خو جان كلتي للسيد مااقبل وفضيتيها
عدلت كعدتها وهيه تندار عليه انت شايف امك شلون تعاملني متحجي وياهه ؟؟
احجي وياهه ولا يهمج حياتي انت بس شويه اصبري واتحملي وكلشي مثل متريدي يصير ..
كرصت خدهه هزت راسها بموافقة لكن واضح انو بدون قناعة ، اخذتها للبيت اريد اعود اهلي عليها
وهماتينه اخليهم يتعودون على قربي منها بلكي اكدر اقنعهم واعترف الهم بلي صار اليوم
دخلنه للصالة ب ٢ الظهر جانوا ديتغدون
شافونا تفاجئوا
سلمنا عليهم انكلبت الوجوه امي ورأفت وصاروا
يرسلون الي نظرات عدم رضى
اخذت حسين ورحت يم امي كعدت
كتلها يوم حسين ظال يبجي عليج واني طلعت من الدوام ورحت جبته حتى تشوفيه
اخذته امي لحضنها وظلت تشمشم بي وتحط بحلكه اكل ترست حلكه
باوعت لشهد فاتحة عيونها من الصدمة
زمت شفايفها حيل وظلت تحرك راسها على كيف
كاللها رأفت يلله ام حسوني بسم الله تفضلي اكلي ويانا
كامت سارة كالت راح اصبلكم غدا
شهد باوعت لامي مثل الي تنتظر منها مبادرة
بس امي ماكو ولا مقلدة الها
تباوعلها نظرات معاجبها وترجع توكل بحسوني
راحت شهد تبعت سارة واني كعدت يم امي
كالت متغدي ؟؟
عبالك تعلمين الغيب
كالت شنوو
ها لا لا هسه اتغدى وياج سويلي مكان ..
رغم شبعان كعدت اكل غصب عني حتى لاتشك بيه
وهيه كلساع تباوع عليه تدري بيه كوة دا اكل ..
كالت وين صارت سارة متجي تشيل السفرة
بعد اجتنه شهودة هسه تلهيها ومتخليها تشتغل بس تكرك ....
باوعت صوب المطبخ وباوعتلها يووم عيب خطار عدنه
تريد تضربني بالخاشوكة ، دنكت
كالت بس كافي عاد ويله حتى تروح وياي للعمرة الشهر الجاي ماكدر اخليك هنا لوحدك
لا يمه قابل زعطوط شكدني شكبرني اني ولحيتي وشواربي
لا خاف تسوي شي من ورايه ما امن عليك هنا وحدك
_ هه مثل شنو اسوي هنا يعني ؟؟
_ مارتاحلك كتلك تروح وياي للعمرة
_ والله عيب من الله بعدني كومة عندي ذنوب مو مال اروح اعتمر
_ هو اني اريد اخذك حتى تتوب ومن رجعك ازوجك فد وحدة تضبك ضبه عدلة
_ تضبطني ؟؟ صدك جذب منو كالج براغيي راخية حتى تضبني
_ انت كلك راخي ومعاجبني هالايام
_ بالعكس اني هالايام صاير حباب وعااقل
_ تروح يعني ترووح مثل اكولك تسوي
كاللها حسين بيبي اني اروح وياج
اخذته لحضنها وظلت تحجي ويا
بعد روحي روحك اي والله اخذك ليش مااخذك شعندي غيرك اني ...
خليتها يمه وكمت ....
صعدت فوك دزيت رسالة لشهد
كتبت الها ابقي باتي يمنه الليلة ..
دزتلي اي هو اصلا متعاركة وي مرة اخويه بس انت لاتفرح هواي ...
ضحكت ودزيتلها ليش ؟؟
كتبت ممقتنعة بهالزواج اني
_ ليش مو على سنة الله ورسوله ؟
مجاوبتني ، غيرت ملابسي ونزلت جوا ، شفتها يم المغسلة ، مخليه الشال على راسها وطالع شعرها من ورا
مغطي ظهرها ، باوعت ماكو احد تقربت منها خليت وجهي برقبتها واشتميتها
بسرعة دارت وجهه وخلت ايديها على صدري ودفعتني
كالت سيييف ليشوفنا احد
بقيت ساكت واني مبتسم واباوعلها بهيام
عافت المي مفتوح وراحت للغرفة الي مخصصيها الها هيه وحسوني ...
◇◇●◇◇
ميسم انصدمت من عرفت عياش متهم بقتل امي
خابرت حازم رجعني لبيتنه
دخلت ادور على ابوي
بس شفته طخت يم رجلينه
ولازمة بطرف دشداشته
بويه صدك عياش كاتل امي وانت تريد تنطيني اله
كعد يمي وانه منهارة وابجي ...
كال بنيتي ماكو دليل عليه لحد الان
بويه والله يكولون شايفينه يفتر بسيارته بذيج الليلة السودة ماكالك شيسوي ؟؟ ماعنده عذر معناهه هو كاتلها هو هددها اكثر من مرة والله يمه بعظمة لسانها كالها الي
بنيتي حجي لسان هذا عياش مايسوويها ولا يكتل مرة مو من شيمته انه اعرفه كلش زين هذا رباة ايدي
بويه جا هيج انه حتى لو تزعل مني انه ماريدنه لاتجبرني عليه دخيلك والله هو هدد يأدبها ونفذ تهدده
حط راسي على صدره وايده على راسي
كال بويه وانه كلتها كبلج دام كسر حجايتي مانطي الج مايستاهلج
رفعت راسي اباوعله وعيوني تمطر دموع واحس انزاحت اكبر كوابيسي
صدك بويه والله بعد ماتزوج عياش احس اكو فرحة جواتي وينج يمه تسمعين هالخبر وتفرحين بي
انتابتني نوبة بكاء عارمة صرت ابجي لفترة طويله
ويصير كبالي طيف عياش ويزيد كرهي اله
صرت ادعي مايطلع من السجن وياخذ جزاءه
صرت اخاف منه اكثر من قبل
واحلم بي اشوفه بشكل يخوف
الايام الي مرت هذي جانت من اسوء ايام حياتي
فراك امي كسرني واذاني وماجاي اكدر اتخطاه ابدا
افتقدت وردة هواي وماجتني من يوم الي اجت للبيت
ماشفتها بعد
اجاني حازم للغرفة يشوفني ويتطمن عليه
طلبت منه اروح اشوف وردة
بدلت ورحت وياه
حازم بقى بالباب بس انه دخلت
واتذكرت من جنه نجي انه وامي
غصة بيه ماتنبلع
سلمت عليهم خانكتني العبرة
طلبت اشوف وردة خذتني سجى لغرفتهن
دخلت شفت واحد نايم ع الجرباية
بس ماعبالك وردة
اشرتلي سجى كالت هاي نايمه نهارها كله نايمه وبالليل تموتنه ببجيها بس تبجي روحي كعديها انه رايحة
رحت يمها بس مامصدكة هايه وردة
لان مو عبالك جسمها
ضعفانه هووووواي
معقولة خلال شهر هلكد تضعف شبيها هاي ؟؟
كعدت بصفها ع الجرباية خليت ايدي على راسها ووخرت الغطى من عليها صار وجهي كبال عيني
شفتها شلون وجهه اصفر وذبلانه حييل
فتحت عيونها حمر دم وجواهن اسود او جوزي طووخ
بس شافتني عبست ملامحها وبجت صارت تناشغ بس بدون ماتتحرك
انتبهت على ركبتها اثر جرح!!!
تلمست وجهه ظليت ابجي وياها
شبيج وردة ليش هذا حالج شجاج انه اقوى منج معقولة ؟؟
ظلت بس تنشغ وتبجي تمددت بصفها وحضنتها
وهيه ولا حركة بس صوت انفاسها وبجاهه
مية مرة سألتها شبيج ماتحجي بس تباوعلي وتبجي
خابرني حازم كال يله نروح ؟
باوعت على وردة
كتلها هذا حازم ماتحجين وياه ؟؟
عضت شفتها حيل ودارت وجهه وتمتم
اريد انام عفية تركيني ماريد اشوف احد ...
