رواية ارهنت عمري الفصل السادس عشر 16 بقلم نورا ناصر

غمضت عيونها وتسللت الدموع المحبوسة بدون ارادة منها ، بلعت ريك بس ماكدرت ابلع الغصة الجاثمة على صدري ، جاوبت حازم ؛- هسه يلله جايه راح اطلع بس دقيقة وحدة .

طلعت من يم وردة وبس اسمع صوت شهكاتها 

هزيت راسي بأسف 

بطلعتي شفت خالي ، جان لاف ايده ولازمها ويمشي .. 

بس شافني اجه صوبي حضني وظل يبجي 

تفاجئت منين نزلت عليه الحنية

كال اخخخ يابنت الغالية 

وجتافه تهتز وينحب 

والله مقهور لان ماتت وانه مزعلها وشكد رادت وردة لحازم وانه اخخخ يا انه شون ركبت راسي ومانطيتها والله لو مكبعتها وماخذتها ولا عذاب الضمير هذا

بس شيفيد الندم والله مايفيد ....

غمضت عيوني وهزيت راسي وجريت انفاسي

والتزمت الصمت ، باوعلي كال : 

_ شنو رايحة ؟ 

_اي خالو حازم يتانيني 

_ابقي يمنه ع العشه وين رايحة 

_لا خالو انه جيت اشوف وردة ورايحة 

_وردة تعبها فراك عمتها متعلقة بيها خطية محتار شسوي وياها وشون ارجعها مثل كبل لا ظل طبيب لا ظل سيد ماوديتها وبعدها على هالحال .. 

_ الله يشفيها ان شاءالله يارب ، من رخصتك خالو انه رايحة .. 

سلمت عليهم وطلعت برا صعدت بالسيارة 

باوعت لحازم يحركها 

كتله شفت خالي ؟ 

_ اي طلع سلم عليه مدري شعجب شكد اكرها 

_ يكول متندم لان ماانطاك وردة على حياة امي مدري شيقصد ..

تحسر حازم كال شونها وردة ؟

_ موزينة والله تعبانة حييل خطية عبالك مدري شبيها ؟ عبالك مكتولة 

_ خاف اخر مرة من اجت للبيت كشفوها جايه واذوها الله يكسر ايديهم *** 

_ اي احتمال هيج وضعفانه هواي ذبلانة بس خالي شنو يقصد ؟؟ 

_ مايقصد شي هو هذا وحده يخربط بالحجي عوفي لاتخلين بالج يمه هالمحتال 

_ اي خوش بس كلي شخبار عياش ؟ 

_ عياش بالسجن وابوي مايقبل يتكفله ولا يخلي احد من العشيرة يتكفله يكول بالسجن ائمن اله خاف يطلع ويكتلونه 

_ حازم شتكول تتوقع عياش هو الي كتل امي ؟ 

رفع ايده من الستيرن ورجع ضربها بقوة وظل يلوف بالستيرن بقوة وغضب 

كال مادري والله اذا هو صدك اشرب من دمه ولج ميسم جاي افور افووور كل دقيقه تمر وانه اتعذب ويوميه وانه بالليل اروح لبيت امي اوكف يمه واباوع عليه من بعيد 

_ شسوي تروح هناك حازم ؟ 

_ مو يكولون المجرم يحوم حول مكان الجريمة انه اريد اشوف منو يروح مناك منو يجي 

_ جا وعياش وليش جان هناك بذيج الليلة ومايقبل يحجي ويكول ليش جان هناك 

_ ابوي يكول مايسويها وانه محتار 

_ جا هو هدد امي كدام ابوي وابوي هلسمعه ليش مايسويها بلله 

ظل يتأفأف وعينه ع الطريق سكتت انه وااالافكار تودي وتجيب .. 

ارتاحيت منه انه يربي احس عندي عيد لان ابوي ماراح ينطيني اله بعد رغم الحزن وفراك امي بس من اتذكر انه ماراح اصير اله احمد الله واشكره.. 

◇◇☆◇◇

سيف .. مرت ايام واسابيع وشهد تعاملها جاف ويايه 

خليتها على راحتها ، تلح عليه اعترف بزواجنا بس اني ممستعد ابد الهالشي .. اشوف امي وابويه تعبانين واخوتي يباوعولي بشك وريبة من يشوفوني اقترب من شهد او اسولف وياهه خاصة وهيه استقرت عدنا بسبب مشاكل ويا اهلها وامها تصف ويا مرة اخوها ضدها 

بالعادة اسهر وحدي ، غرفتي مابيها تلفزيون 

رافت وسارة بغرفتهم بعد العشه يفوتون بعد ميطلعون 

امي وابويه ينامون على وقت .. 

شهد اخذت حسين وراحت لغرفتهم

غرفة اسعد القديمة .. 

واني كاعد بالصالة اتابع فلم .. 

سمعت صوت باب وحدة من الغرف انفتحت وانسدت 

مهتميت وركزت باحداث الفلم 

طخت بخشمي ريحة عطر نسائي كدرت اميزه هاي ريحة شهد ، باوعت عليها وابتسمت ، الصالة ظلمه 

وبس ضوه الشاشة يعكس عليها 

ملامحها باردة تباوعلي ، اجت كعدت يمي بس بطرف القنفة واني كاعد بالنص ، مديت ايدي لظهرها ، طوقت خصرها وجريتها كلها لحضني والتصقت بجسمي.

ظلت تحاول تفلت مني بس اني قيدتها زين 

بيد وحدة ولزمت خدودها بالايد الثانية 

والتهمت شفايفها 

حسيت بلذة غريبة احساس بالرغبة تملكني 

سيطر عليه واخذني لغير عالم مليان احاسيس 

واول احساس رغم هواي علاقات بس شهد غير 

هيه حبي الاول والوحيد من بعدها ما حبيت ابد.

ماتركتها اله لمن حسيت نفسي محتاج اتنفس 

فكيتها من قيودي ابتعدت عني تشهك وتاخذ هوا 

وتتنفس بسرعة 

باوعت عليها ابتسم ابتسامة الانتصار وخليت ايديه ورى راسي وانتجيت وكعدت باريحيه

خلت ايدها على حلكها شبييك سيف هو هيجي شنو انت وحش ؟؟ 

قربت منها دا اريد احاجيها كامت وكفت ورا القنفة 

كتلها وحش ويحبج وين اكو احلى من هيج!!

لزمت طرف القنفة وكالت اني جيت اسألك 

كلت اوو ودرت وجهي ع التلفزيون اسئلة اسئلة انت شنو شكد تلحين رجعت باوعت عليها مزعوج

اعرف شراح تسألين..

، حجيت هيج وضربت على فخذي 

كملت ؛ شوكت نعلن زواجنا 

واني جوابي الج مووو هسه لتلحين يرحم والديج 

رجعت كعدت بمكانها وظلت تحجي لعد شكو ربطتني بيك متكوولي ؟؟ هسه اني مخنوكة سيف مخنوكة 

احس نفسي عايشة بالظلمة 

انت اذا تحبيني تحملي هالفترة بس 

ومنو كالك اني احبك!!!! 

باوعتلها مصدوم ، جنت مرتكي عدلت كعدتي 

وماتت الكلمات على لساني زفرت وبدات الخيبة يتسلل الى نفسي 

خلت ايدها على حلكها وحسيتها متندمة 

شمرت الكوشاية الي بصفي ع الكاع وكمت صعدت لغرفتي وصاير بركان من الغضب .. 

نزعت ملابسي وشمرتهن ع الكاع بانزعاج وغضب 

وانفاسي الحارة الغاضبة الصوت الوحيد المسموع بهالغرفة الباردة وخالية من اي مشاعر... 

بقيت بس بالشورت وهيج اني متعود انام 

تمددت ع السرير اتحسر واندب حظي وامط بالغطى 

واغط بروحي ، خليت راسي ع المخدة وعيني ع االسكف اباوع بالفراغ وجملتها تتردد بمسامعي كل ثانية .. 

دقايق واني عيني متقبل تغفى ، حسيت الباب انفتحت

رفعت راسي اباوع منو ، شفتها شهد تطل عليه بخجل وحيرة وتلتفتت لوراها بخوف ، دخلت وسدت الباب 

ووكفت وراها .

خليت راسي ع المخدة اتظاهر بعدم الاهتمام والامبالاة 

بوجودها ، بس داخلي يصرخ يريدها 

اجت كعدت يمي لمست وجهي بيدها غمضت عيوني وريحتها تخترق انفاسي وتلهب احساسي 

ونبرة صوتها تداعب مسامعي ؛- لتضوج سيف والله كلتها بدون قصد وبعصبية 

درت ونمت صفح واباوع عليها وايدها تمررها على وجهي بين تظاهري بالكبرياء وبين رغبتي بيها اني حاير حركت راسي وبوست اصابعها 

وانتصرت الرغبة ع الكبرياء 

تدنيت وسويتلها مكان يمي رفعت الغطى ليفوك واشرلها بعيوني تجي يمي 

لمت شعرها وخلته صفح

وتمددت بصفي وانطتني ظهرها 

سحبتها من خصرها اليه ووجهي دفتنه برقبتها 

استنشق عطرها الي صنع خصيصا لذوباني بيها .. 

رفعت نفسي و كلبتها وصارت امددة على ظهرها 

وظليت اباوعلها ثواني بهيام ورغبة وحب

صرت فوكاها فتحت عيونها على اوسعهه 

كالت سيف لا تأخرني خاف يكعد حسوني وميلكاني ويظل يبجي 

هبطت عليها وكتمت انفاسها ببوسة ..

من بعد هاي الليلة تغيرت شهد اكثر 

صارت تلح هوواي 

وبنفس الوقت امي جانت مريضة 

وماكدر انفذ رغبة شهد باعلان زواجنا 

ابد 

لذلك صارت مشاكل بيناتنا وعافت البيت وعناد بيه 

راحت سكنت ابيت خالتها 

عيوني صارن بالطول من العصبية

اخابرها ماتجاوبني 

احتاريت شنو اسوي وياها 

واني اشوف امي حالتها صعبة كدامي .. 

ورا فترة يلله جاوبت على اتصالاتي 

وين انتي ؟؟ 

اني باربيل رحت ويا خالتي 

وانتي شلون ترحين بدون متكوليلي ؟ 

سيف تعبتني شنو اني داحس مسويني مكب لرغباتك وشهواتك ولا عبالك اني انسانة وتعترف بيه 

يابه ماريد منج شي بس ارجعي ولج امي طك كلبها على حسين وحالتها بالزايد تعبانة 

ماارجع اله بعد ماتنفذ شروطي 

اي وشنو عيني شروطج خاتونة ؟؟ 

يا اما تطلكني وتتركني لحال سبيلي او تعترف بزواجنا كدام الناس ومتقصر وياي اعتقد هذا من حقي 

يابه اعترف اول وتالي اعترف بس ارجعي وين الكاج بأربيل شون ادورج متكوليلي ؟؟ 

شوكت تعترف 

بالوقت المناسب غير هسه امي مريضة 

يابه مريضة على عيني وراسي اني شنو ذنبي ؟؟ 

انت شنو ماعندج احساس اذا كتلها وصار بيها شي بسببي اني شنو موقفي ساعتها ؟ 

والله انت جبان وماعندك ذرة شجاعة تخاف من امك وابوك واخوتك مووو ؟؟ دروووح وانسانيييي .. 

سدت التليفون بوجهي اعرف من حقها بس الوقت مو مناسب خلتني احقد عليها 

سألت امها كالت رايحة ويا خالتها وابن خالتها 

ساورتني الشكوك صرت اشيل روحي وافشها بالكاع من الغضب والعصبية والتفكير .

رجعت للبيت لكيت عمي الشيخ وبنته ميسم عدنا ... 

◇◇●◇◇

ميسم : مرت الايام وبلش الدوام وانه هالسنة سادس بس ماجان الي واهس اداوم الدمعه مافاركت عيني 

مريت بأيام عصيبة ، روحي انترست بألم ما اكدر

اتحمله ، امي تركت فراغ كلش جبير وانه مامتعودة على فراكها بالقليل اسبوع واروح اشوفها 

هسه مرت الاشهر وهيه ماكو بحياتي انتزعوها من روحي مثل خنجر مغروس بجرح وينتزعونه بقوة 

وتمر الدقايق وانه افكر بالسنوات الي تنزلق من عمري بلا رجعة وامي مو وياي .. خايفة من عياش اكبر هواجسي خايفة يطلع وياخذني كللش خايفة 

اكلي قل وزني نزل صرت انعزل هواي واحدي 

ابوي حاول يطلعني من الي انه بي 

اجه كعد يمي 

حجيتله عن كل شي وحجيتله عن مخاوفي بخصوص عياش خاصة وانه سمعت حاتم يحاجي ابوي ويكلي اتكفله سويله جارة خل يطلع هو مو كاتل وخلي ياخذ ميسم ونسد حلوك الي تحجي عليه 

كال ابوي لا بويه لا تخافين عياش حتى لو بريء بس كسر كلمتي وانه كايله من كبل اذا كسرت حجايتي ميسم ماتصير الك مرة 

خليت ايدي على خدي صافنة 

كال حضري روحج باجر نروح للنجف نزور كبر المرحومة ومناك اخذج لكربلاء تزورين وهم نروح 

لبغداد لبيت عمج شكلتي ؟؟ 

ارتجفت شفافي من الجانبين احاول ارسم ابتسامة بس ماجاي اكدر كلبي متحمل الم اكثر من طاقته 

يوم ثاني كعدت من الصبح حضرت روحي  

رايحة اشوف امي او بالاحرى قبر امي 

بعد هيهات اشوفها 

... مرات اكول هذا حلم واصحى منه بأي لحظة 

بس هالحلم طول وانه ماشفت امي حتى بأحلامي 

طلعنا انه وابوي واثنين من اولاد عمه دوم ويا مايفاركونه . واحد يسوق وواحد كعد بصفي ورا 

هو جبير بالخمسين عمره كلامه يشرح القلب

شاف هيج حالتي.. 

كعد يحجي وياي شلون لازم نأمن بالقضاء والقدر 

وانو احنا كلنا نموت 

كتله عمو نموت بس مو هيج موتة ، مرة امنه وكاعدة ابيتها يدخل عليها مدري منو ويقتلها الله يعلم بالرعب الي عاشته وهيه تصارع وحدها 

حجيت هيج ومديت الكلينكس لعيوني الي تسربت منها العبرات ومسحتها 

كال الله يجازيهه ويرحمها ويغفر ذنوبها اذا ماتت مظلومة وامج تدرين بيها مرة مؤمنة صايمة مصلية تدخل الجنة بدون حساب ان شاءالله 

ها وترا عياش مالة ذنب وبري من دمها وانه حاجيته ابوج وكتله انت وعدته تنطي ميسم ومالازم تخلف بوعدك اله 

عمو هو دومه يهدد امي وكدام الكل هددها 

وداعتج بس لسان عياش زلمة حوك مايمد ايده على مرة ويكتلها خلاص

ابوي كال انه وعدته بشرط مايكسر چلمتي وهو كسرها مالة مره يمي ياابو فهد وميسم ماتصير اله بعد وعدتها انه 

ابو فهد اي بس يابو حاتم انت غير تسمع منه 

يمكن شغلة ضرورية وعبر من يمهم 

رحت له للسجن وحاجيته سألته شوداك بذيج الليلة ماحجه ولا برر غير يحجي يكول حتى اعذره واتكفله هو مانطاني سبب مقنع وانه كايله من كبل اذا تكسر حجايتي ما انطيها الك وهسه انه وفيت بوعدي خلي يتعلم من اخطاءه .. 

استمر النقاش بينهم والي عرفته انو عياش مجرد مشتبه به بس يخلص التحقيق احتمال يطلقون سراحه لزمت قلبي بيدي يربي كون مايطلع احس الخوف منه تضاعف اكثر مدام انسجن بسبب خوالي راح يزيد كره وحقده وانتقامه 

وصلنا للمقبرة كعدت يم الكبر اريد اقنع روحي امي هنا ماجاي اكدر اقتنع ابد بجيت هواي بجيت 

اتمنيت ابلغ امي بفرحتي الصغيرة وهيه خلاصي من عياش ياريت تعرف واتمنيتها عايشة حتى تفرح وياي 

بس شسوي القدر حرمني منها ... 

كملنا زيارة النجف ورحنه لكربلاء بقينه يوم واحد 

ومنها انطلقنا لبغداد لبيت عمي ابو اسعد .. 

دخلنه سلمنا عليهم اخذتني جنتهم سارة يمها 

صرت العب ببنتها وهيه تسولف وياي وتسألني 

تغدينه سوا وكمت اغسل 

وانه طالعة اريد اروح يم ابوي 

صار كبالي سيف 

حسيت نفسي تجمدت بمكاني ورجليه تثبتت بالكاع 

صرت اباوع اله 

لابس قميص ابيض فوكاته سترة سودة وبنطرون اسو

وبيده جنطة شكله يوحي انه محامي 

وكف يمي وسلم عليه 

كوة تمتمت ورديت عليه 

كال ها ميسم ماتزوجتي شلونه خطيبج ؟ 

بلعت ريك ودنكت وجاوبته لا ماتزوجت مامخطوبة انه منو كال مخطوبة 

لعد هذا مو كال انت مرته مدري خطيبته وينه هسه 

هسه بالسجن وانه مو خطيبته ولا راح يتزوجني 

كال بصدمة هاا ؟ ليش بالسجن شسوا من مكسورة هالاغبر ؟؟ 

هذا شكله كل شي مايدري شون ابن عم هذا حجيت بقلبي وكتله ها اسئل ابوي انه رايحة

عفته ومشيت .. 

بس احس كلبي يريد يطلع من بين ضلوعي .. 

◇◇●◇◇

سيف .. حجيت وياها كم كلمة احسها انهزمت 

رحت بدلت ورجعت كعدت يمهم مرغم لان ابوي 

كالي بدل و تعال يم عمامك ..

ظل عمي الشيخ يحجي عن عياش 

امي كلتله ابو حاتم لعد اشو من خطبنا ميسم لسيف كلتلنا لعياش ولهسه ماتزوجوا شسالفة ؟ 

والله يا ام اسعد مامقسومين لبعض عياش كسر حجايتي وانه حاجيها كبل وكايله اذا تكسر كلامي ماانطيك ميسم وسواها 

يعني هسه ميسم ماراح تتزوج عياش .؟؟ 

اي والله هذا الصار مايستاهلها ... 

لعد خوش احنا بعدنا نريدها لسيف شتكول ابو اسعد ؟ 

سيف اني ظليت اكح واتحرك بمكاني بحيرة هسه هاي امي شيسكتها شون سالفة هاي يا الله .. 

كال عمي والله اخذ رأيها واذا قبلت احنه مانلكى مثلكم .. 

بقيت ابلعم شون مصيبة هاي وكعت على راسي .. 

ظليت منتبه على امي تحجي وتسولف وياهم منطلقة اريدها تباوع عليه اريد اشرلها حتى تجي ويايه برا الاستقبال احجي وياهه ماكو ممنتبهة 

طلعت اغلي افور اروح واجي طلعت سارة من غرفتها هيه وميسم باوعت عليها خزرتها بدون وعي مني 

هيه استغربت دنكت بسرعة وتبعت سارة للمطبخ 

صعدت فوك وجريتها نومة لليل 

كعدت المغرب نزلت جوا تعاركت وي امي شون تحطني بهذا الموقف ، ظلت تبجي عفتها ورحت غسلت وبدلت وطلعت من البيت..... 

بتت يم صاحبي ومارجعت للبيت بعد وتجاهلت اتصالات امي وابويه واخوتي 

حاولت كومة اتصل بشهد جهازها مغلق ... 

بعد مرور ايام رجعت للبيت وجان عمي وبنته واولاد عم ابويه راجعين لمحافظتهم ..

بس فتت وابل الرزايل والصياح وكع على راسي 

اخواني من جهة امي وابويه من جهة ثانية 

طيف انت وين وليت اسبوع ندور عليك متخاف على امك ابوك يصير بيهم شي من وراك شون بشر بلا احساس انت متكولي وين جنت ؟ 

سكتت عنه استلمني رأفت وامي كاعدة وتبجي وابوي يحجي من جهة 

صيحت هسه متكولولي شبيكم اني جبير واعرف مصلحتي ردت ابتعد عنكم كم يوم اخلص من الحاحكم

بدل متسألون عن حفيدكم تشوفوا وين راح لاحكين عليه اني 

امي ظلت تغلط على شهد واخواني يكولون شكو عليهم سألنا عنهم واهلها كالت راحت ويا خالتها سياحة لاربيل 

كتلهم ايييه وهسه شتردون مني المطلوب شنووو ؟؟ 

ابوي كال حتى تروح وياي نخطبلك بنت عمك 

كمت على حيلي وبخيبة جاوبته صار الي تشوفوه

بين مشاعر الغضب الي حابسها بنفسي والي سببها شهد وتصرفها وبين الحاح اهلي عليه 

جنت مسلوب الارادة ضايع وتايه 

وافقت اخطب بنت عمي 

◇◇●◇◇

ميسم رجعنه لبيتنه واجه ابوي وحاجاني وطلب رأيّ اذا جنت موافقة على سيف او لا 

دنكت وجاوبته بخجل 

كيفك بويه الي تشوفه 

كال انت جنتي مامقتنعة بعياش وانه اعترف جبرتج نوعا ما وهسه الج القرار انت بكيفج 

كتله هذا هو بويه موافقة .. 

طلع ابوي من يمي ورا شويه واسمع صوت حاتم 

عالي 

رافض اتزوج سيف 

بس ابوي ماقبل على كلامه وصارت مشادة كلامية بينه وبين حازم وتدخلت الحجية 

بس ابوي كان صارم وياهم ومنعهم من التدخل بحياتي 

جنت كاعدة بغرفتي وفرحانة راح اصير من نصيب سيف ومشاعر حلوة بداخلي تولدت تجاهه 

دخلت الحجية ووياهه ام فخري 

عدلت من كعدتي ونزلت رجليه من ع السرير 

اجو كعدوا يمي 

كالت الحجية ها يمه جنج فرحانة 

اي ليش مافرحانة خلصت من عياش المجرم 

ولج يمه شمدريج انت مجرم وكتل امج الله يرحمها 

جا ليش بالسجن هو 

مشتبهين بي يخلص التحقيق ويطلع هيج كال حاتم 

اي واذا ثبتت التهمة عليه ينعدم كون 

اسم الله شطالبته ماتثبت عليه التهمة عياش انه اعرفه زين ربى ابيناتنه واذا تزوجتي سيف تخسرينه ترا 

لا ما اخسرا بالعكس سيف احسن منه بهواي هواي ومثقف مو مثله همجي 

يمه المثل يكول الشين النعرفه احسن من الزين المانعرفه هذا سيف شتعرفين عنه انتي ؟؟ 

طول عمرهم بعيدين عنه ومانشوفهم اله من داير سنة لسنة 

وعياش كلشي نعرف عنه نسيتي يمه من جان يلزم سميحة بت خالي يجنزها تجنز لو من جان يتجاوز على امي ويهددهه 

ولج يمه ميسم انه بمكان امج هسه سمعي مني الچلمة 

يمه انت الخير والبركة بس انه اعرف مصلحتي 

ام فخري كالت والله مبين هذا الي تراهنين عليه راح يشوي على ذانج بصل ..

ليش بيبي ابيش طالبتني وانت هم طول عمرج نكرة وي عياش وتكرهينه 

انه مو علمود عياش علمودج انت مقهورة عليج لان صرتي يتيمة وخطية تنظلمين 

الله موجود وبعدين انتوا شتعرفون عن سيف وهيج رافضينه 

الحجية يمه مو عن نعرف شي بس عياش نفسه بيج ورايدج ومدام نفسه بيج ماتتوفقين 

شون منطق هذا يمه بس كليلي ؟؟ عياش ماله نفس بيه بس يريد ينتقم من خوالي وامي وبس وهسه وبعد الي صار اله راح يزيد جبروته ويطغى اكثر اريد انفذ بجلدي منه كبل لا صدك يطلع من السجن ... 

****

وراها بأيام اجو بيت عمي من بغداد 

وكالو حضري روحج راح نعقد الكم 

بس بدون لا حفلة ولاصفكة ولا اي مظاهر فرح 

لان انه حزنانة وانه طلبت منهم هالشي 

اجت امه وياه جايبتلي وياهه فستان اسود حيل حلو ونازك كصته على طول جسمي 

بس انه حيل ضعفت

وهيه كالت بس اخذج يمي انسج كل همومج ادللج 

ابتسمت الها حضنتني .

اجت ام فخري شاورتني كالت ولج هاي بس هسه

تتملكلج بعدين تسريج تسري تشوي على ذانج بصل 

كتلها بيبي عوفي ذاناتي الله يخليج ..

لبست عبايه واخذتني عمتي ام سيف ورحنه بالديوانيه

جان ابوي وعمي واخواني كاعدين 

حسيت بسيف يتحسر كاعد على اعصابه ضجت 

بس فكرت خو مامجبور هو جبير ومثقف وفاهم 

مستحيل اهله يجبروه بس شبي ؟؟ لو هذا هم حظي .. 

عقدنه وطلعت كعدنه بالهول نزعت العبايه 

واجه سيف يمي لبسني بس الحلقة 

وايدي ترجف 

وانفاسه ترست اذني 

هواي يتحسر 

زعجني حييل 

وبسرعة كام 

امه كالت غير مرة ان شاءالله اشتريلج ذهب ونيشان بسرعة بسرعة صارت جيتنه ومامستعدين 

كتلها خالة انه حزنانة على امي وهذا كله مايهمني 

كالت بس تدور سنوية امج اسويلج حفلة 

كتلها والله خالة الفرح انتهى من قاموي حياتي 

كالت لا يمه احنه هم حزنانين وعدنه غالي راح من عدنه بس هذا حال الدنيا شنو نسوي بعد وانتوا من حقكم تفرحون 

جاوبتها االله كريم خالة 

بالليل سيف راح ويا عمي يزور عمامي وكرابتنه 

واجو بالليل وجانوا متعشين ورأسا ناموا من التعب

ويوم ثاني من كعدت لكيت بس امه كالت 

سيف راح عنده شغل ومرافعات مايكدر يبقى هنا 

وقبل لاتروح هيه وعمي انطتني رقمه كالت تواصلي ويا وسولفي حتى تتعودين عليه 

خذيته منها ورحت ضميته وانه افكر مو المفروض هو يخابرني لو انه ؟ 

مرت الايام لا خابرته ولا هو بادر بس امه تخابرني وتسولف وياي وتسألني عن طلباتي وعن الذهب الي تريد تجيبه الي وشون اريده 

كتلها عمه بكيفج .. 

بيوم تفاجئت من حجي ام فخري اجت 

كالت هذا خالج جاي لابوج يكوله تعالوا اخذوا وردة لحازم ماريد ادخل بخطيتها منتهيه كلش بلكي من يتزوجها تصير زينة 

صفنت متفاجئة معقولة تطلع منه خالي 

على صفنتي دك تليفوني 

باوعته رقم خالتي ام وردة 

جاوبت الوو 

اجاني صوت وردة تعبان وبائس 

ميسم عفية اريدج توصلين كلام لحازم كليله وردة تكول ماريدك ابوي جابرني عليك خوش امانه وصليله هذا الحجي .. 

لحظة لحظة وردة شبيج خل افتهم ؟؟ شنو هذا الكلام جديد اول مرة اسمعه انت شبيج وليش هيج جاي تتصرفين ويانه شمسويلج احنه ؟ وشبيج ويا حازم انوب شمسويلج مو هو الي طتلتي نفسج عليه هسه شنوو الي تغير بلله خل اسمع

ماتغير شي وصليله هذا الكلام بدون نقاش 

ضحكت باستهزاء وتتوقعين حازم راح يقتنع ؟ 

ماعليج من يجي خابريني خل احجي ويا انه افهمه افتهمتي ؟ 

وسدت التليفون بوجهي .. 

لجميع الفصول من هنا