رواية نورة الفصل السادس عشر بقلم ام مصطفى
لو اني لو المعهد
معهد مداومين
يعني شنو ماادوام
-اني مااريد مرتي تداوم
وبعدين شغلت جدج راح احلها اني
وراح اخذ ناس واروحله
مااريد اداومين وامج وابوج يطلعولي حجة بعد عدها دراسه
سمعتي لولا
معهد ماكو
-يعني اني خابرتك حتى تفرحلي تباركلي
لو تصيح علي مو حتى واهسي كسرته وطيرت الفرحة مني
-يابه الف مبروك بس دوام ماكو
لا اشلعين كلبي اكثر من ماهو مشلوع عليج
اريد نزوج باقرب وقت مااريد هم يكولون عدها دوام
هذا سادس واخذتيه بعد شتردين
- اريد اكمل يعني اتعب هاي السنين كلها
ومااكمل
-اكلج واذا كملتي شنو راح تسويين
شهادة تعلكيها ع الحايط
نص العراق عنده خريجين وكاعدين
عليمن متعبه نفسج
-اتفقت وي ابوي عمامي ناخذهم ونروح للناصريه
نصالح جدج ومانرجع اله بالموافقة
لا تكسرين واهسي
دوام ماكو
-الله كريم خلي نشوف شيصير
ولكل حادث حديث
سده مني بس انقهرت منه
احسه اخر همه اني
اهم شي عنده نزوج وبس
لا مبروك ولا فرحلي
ولا حجايه حلوه
بله ع شنو اني ربطت نفسي بيه ع مود الزواج
الف واحد تقدملي وقبل اكمل
ليش ربطت نفسي بيه
حيل انغثيت من نفسي ومنه
احس استعجلت بعلاقتي بيه كلش
اسلام عصبي كلش
وتفكيره غير تفكيري
ورطت نفسي ومااعرف شلون اطلع منها
وره كم يوم راحو لبيت جدي اخذو ناس
وراحوا للناصريه
هو يخابر يكلي راح نوصل عود من يصير شي اكلج
الصدك اني جنت خايفه ومتردده
كلش،
جنت اتمنى احجي لا احد واخذ رأيه
بس طبعي كلش خجوله
المن اسولف
وينصحني محد يمي امي مراح تفهمني اعرفها واستحي احجي وياها
وخالتي بعد اكثر استحي
عاد ضليت ساكته
لحد مارجعوا بالليل
خابرني كال هاي حليناها الشغله
وجدج صالحناه
وكال فكيت النهوه
المره الكم بمناسبة الصلحه
-واخيييرا نور راح نزوج
وتصيرين زوجتي وارتاح مو تعبت تره كلش
الانتظار صعب
متعرفين شلون اتعذب محتاجج كلش
اني ساكته مااحجي
-من باجر امي تجيكم وتحدد موعد للخطبه
ومااريد تكليلها معهد وام منهسه اكلج
اي شروط مااريد
-مو بكيفي اهلي اذا خلوا اني ماامنعهم
-انتي بس كولي مااريد دوام واهلج مراح يخلون
لا اصعبينها علي رحمه لهلج
تره روحي طافره
كوه خذت ابوي لجدج بالف ياعلي يله تصالحوا
لا طلعيلي سالفة الدوام
زين
يله اروح انام انسطر راسي من الطريق
تصبحين على خير
-اجمعين
ضليت بالليل بس اتكلب ولا مقتنعه بكلامه
وحسيت ما يوالمني شلون اخربها
بس اني حبيته
وهو يحبني خطيه حقه يجوز صدك مايريد الدوام علمود لا تتعرقل الخطبه
بس اني تعبت ودرست
لازم اكمل
اذا يحبني صدك يكلي كملي
مو يمنعني
ضليت اجيبها منا ورجعها منا
اخر شي كلت اخليها ع اهلي احسن
الصبح كعدنا تريكنا وابوي راح لشغله
كمت انظف بالبيت
شويه وطبت مرت عمي
سلمت وكعدت
حجت لامي
-البارحه راح ابو نائل والولد
ع جد نور
ووگعوا عليه وصالحوه
وفك النهوه
وكال المره الكم
بعد كل حجه ماالكم خلينا نحدد يوم للخطبه
-اشو محد كال
-لا شلون مخابر جدها ع احلام وكايل الها
-لعد اخابر اختي واسئلها
خابرت ع خالتي احلام
كالت الها جايه اني وافهمج
سويت جاي وخليته يمهن
وكعدت
-عاشت ايدج حبيبتي
يمه هيج وتصيرين جنتي يوم عيد
والله انت ورده جمال واخلاق
ابتسمت شكرا عمه
اندك الباب
-هاي اكيد احلام كومي نور افتحي الباب لخالتج
ايي
كمت فتحت الباب
خالتي سلمت علي
-هايمة شلونج
بتوستني
ام نائل بعدها هنا
-ايي موجوده
طبي
طبت وهم سلمتت وكعدت
-شوفي ام نائل من هسه خلي نخلي النقاط ع الحروف
بنتي اريدها تكمل معهد اني
هذا شرطي تقبلون ماتقبلون بكيفكم
-ياا احنه ماكنه جدها يرضى
انوب طلعتونا بسالفة الدوام
خيه الولد مستعجل ويريد يزوج
حتى غرفه اليوم راح يشتري
-والله هذا العدنه
-بس اسلام مراح يقبل
-انتي اسئليه ويلي خبر
اني كاعده هنا منتظرتج
كامت مرت عمي راحت ضايجه
وخالتي احلام كالت يمه نور لا اضوجين مني اني اريد مصلحتج
وهاي كدام امج خديجه
اذا مقبل تكملين مهعد مراح اوافق
حجت امي
-ولا اني اوافق وحتى ابوج هم
احنه تعبنا عليج لحد متوصلين
انوب ماتكملين والله حرامات
-اني بكيفكم شدكولون بكيفكم انتم اهلي واعرف بمصلحتي
شويه ورجعت مرت عمي
كالت عيني هسه دوام مايرضى ومايريد
وهاي يبس حلگي وياه
اخر شي يكول
اني اخليها تكمل بس مو هسه
من تهدأ الاوضاع
-يعني اكيد يخليها تكمل
-انتي تعرفين اسلام اذا كال كلمه يسويها
خلص لعد شايفين خير
من هيج سمعت مدري ليش بدال ماافرح
انخمش كلبي
راحوا
ولكيت اسلام كومه داك علي
خابرته
جاوب بسرعه
وين جنتي
-جنت كاعده يم امك
-اني مو كتلج سالفة المعهد من يمج الغيها ليش تخليني بهيج موقف
-مااكدر امي احلام متقبل
-اني اخلص من خديجه تطلعلي احلام
ع العموم هسه دوام ماكو
عود يهد الوضع والله كريم
ان شاءالله الجمعه نخطب
اذا ردتي شي خابريني
-اي ان شاءالله
سد الخط
واني كلش انقهرت خرب فرحت التخرج والخطبه
جنت متوقعه هسه فرحان
وراح يسمعني كلام حلو
بس العكس صار
سكتت وقبلت بكلشي مااعرف ليش،
ثاني يوم اشتريت كوستم للخطبه تنوره وستره
وحفيت
وراها اجت عمتي
ونائل كالوا ناخذج نشتريلج ذهب لان هي خطبه هي تلبيس ذهب
امي كالت تره هي عدها كولشي
كلايد ومحابس وتراجي
اذا تردون اخذولها اساور وحلقه
عاد نائل كال اليعجبها تاخذ
ولا تهتمون للفلوس
اسلام يكول خير من الله عندي
شنو يعجبها تاخذ
اخذت اساور وحلقه ورجعنا
بس جنت اتمنى هو يجي
مو يدز اخوه وي امه
حسيت ولا مهتملي
كل همه الزواج وبس
اما مشاعري اخر همه
وصارت الكعده اجو اهلي كلهم
واهله
طبعا مكيجني بالبيت وشعري كلش طويل وسرح واسود
خليته ع طوله مفتوح
وره الغده اجو
وصارت الخطبه
وهلاهل وهوسات كلها فرحانه
اله اني مااعرف ليش احس استعجلت
صاحو علي نعقد
طبيت للغرفه
وطب الشيخ وخوالي واسلام وابوي
عقد الشيخ النه وطلعوا
ضل هو كاعد يمي واني مدنكه
-هاي شطالعه كيمر
شنو هذا الشعر
رفع راسي بايده
الف مبروك نوره
واخيرا صرتي الي حاربت وصبرت واخذتج
اني الشي اليعجبني اخذه لو شيصير ماانطيه لغيري
وانتي الي
باعيلي ليش مستحيه انتي زوجتي هسه
كومي يله نطلع
لزم ايدي وكومني واني ارجف
وطلعنا للصاله
كعدنا ع التخم
وبدوا يلبسونه بالذهب
ويصورون
وكصينا الكيكه
بعدها كام طلع
وطلعوا وراه
ثاني يوم اجاني كال تره كلش مستعجل اني
مااتحمل بعد اريدج بحضني باقرب وقت
-بكيفك
اني لساني احسه معكود
ولا احجي
بقينا شهر مخطوبين
بهذا الشهر يمكن مرتين خابرني
اني الي اخابر
ويكلي عدي شغل ومشغول
حيل انغثيت اشوف البنات بفترة الخطبه
ليل نهار يخابرن ويطلعن
بس اني لا العكس
كطع فد مره
لا ويكولن احله فتره هي فترة الخوبه
سوالف وحب وغراميات
بس اني كلش مشفت
مع ذالك مااحجي استحي
والمن اكول
وره شهر ونص حددنا موعد الزواج
والتهيت بالبدلات والصالون وهوستهم
اول شي كال حجاب تلبسين بالعرس
صلوخ مااريد البدله
عبايه وره العرس
صبغ مااريد تصبغين شعرج
مكياج مااريد هواي
وووو بقى يشرط
واني اكوله حاضر
والوم بروحي
يطبني طووب اني الي هيج سويت بنفسي
غير احبه واريد ازوجه
هذا الحب
كلشي نفذتله
وصار العرس
واجه اخذني للبيتهم بس شبعت بجي بيومها ع اهلي
عود همه بصفي قريبين علي
بس متت بجي
من شافني ابجي
كال ع شنو تبجين شو اهلج حايط ع حايط
قابل وين رايحه محافظان شنو
سكتي عيني هذول يمج شوكت ميعجبج
انداري عليهم...
زفونه للغرفه وسدوا الباب
من يومها عرفت اسلام عصبي وماينطاق ابد
بيوم سبعتي عزمت صديقاتي وبنات خالي وخالاتي
وكتله اسلام استحي اكول لعمتي
تجيب شربت وكيك
كوللها انت
جان يعيط بيه وانتي شكو مسويه سبعه
شنو تشيمين وتدورين مظاهر عود
ماكو سبعه
-بس عيب اني عزمت شنو اطردهم لو اجوا
-وانتي تعلميني العيب
اول شي ضربني وضل يغلط ويصيح
لحد ماصعدت امه فكتني
كتلها ماردت شي بس كتله ع كيك وشربت
وهو استلمني
عافني ونزل جوه
وعمتي كالت ليش دكليله لو كايلتلي
هو عصبي ومايحب هاي السوالف
وللحكايه بقيه ام مصطفى
