رواية فصلية بديلة ( شموخ ) الجزء الثاني الفصل السادس عشر 16 بقلم ام ملكوت

:-انه كلت #خويه 😀لو هوه انتفض لزمني من ايدي عصرهه حيل وقرب وجهه يم وجهي وكال بصوت شبه مسموع..

_جنان غيري ملابسج واسلوبج وجري عدل وياي تراني ماحب المره العنزه لا تخليني اسوي شي اندمج على زمانج بي

_شتسوي مثلا 

_لا تختبرين صبري

_لا على شنو اختبر صبرك بس عندي فضول اعرف شتسوي مثلا لوين توصل بيك الجرأه وتتجاوز حدودك كابن عمي ..

رفع حاجبه #بتعجب ولزمني من فجي عصره حيل تقرب راد يحجي وفزيت على صوت الهورن شفت احسان جاي من بعيد عل مطبخ لو تخبلت خليت ايدي على صدر مرتضى ودفعته حيل ابتعد خطوتين عني ورحت اركض للصاله قبلما يوصل

احسان ويشوفنه عاد طلعت من باب الصاله اركض متجاهله تساؤلات خالتي وامي وصلت للسياره وصعدت شافني بابا وكال..

_هاي وينج يا بابا صار ساعه ننتظر بيش ساعه كعدتي اليوم

_اسفه بابا بس تاخرت بالنومه وقبل شوي كعدت بدلت بسرعه وطلعت الا وين احسان

_توه نزل للبيت يصيحلج هذا هوه هل اجه..

التفتت وشفته اجه من باب الصاله معصب ركب السياره وسد بابهه حيل وعاط بيه..

_دخيل الله وينج تاخرت عل ضيم

_اسفه تاخرت بالنومه

_هفف لا تتاخرين بعد وبس اكعد بال٥ الصبح اكعدج وياي واشوف شلون تتاخرين هيج مره ثانيه

_تمام علواه تكعدني..

هز راسه باسف وحرك السياره وسد عمو شهم الباب ورانه مسافه الطريق واحس جمد صدري من الماي الطاح علي والجو بده بي برد الشتا وصلوني

للشركه نزلت وراحوا لشغلهم صعدت للطابق الثاني سلمت على الكل قصص ماي هوبس وكلهه تفاجات لان اجيت قبلما تخلص اجازتي المرضيه واكثرهم محمد لمعت

عيونه بفرح واجه باتجاهي مبتسم اول مره هيج اشوفه فرحان ومتلهف على شوفتي وكف كبالي وكال..

_هاي وين هل غيبه كلولي تمرضتي رحنه لبيتكم انه وزميلاتج وكالوا شالوا وضل بالي يمج سلامات بس كون ماصار شي سيء لا سمح الله

_لا لا تخافون بس صار حريق ببيتنه واختنكت واضطرينه نطلع منه بشكل مؤقت لبينما يصلحونه

_بس كون ماتاذيتي

_لا الحمدلله بس اختناق 

_الحمدلله على سلامتج وهسه شلون صرتي 

_بعدني شوي يرادلي وقت حتى يروح التسمم واشفى تماما

_خرب نوب انه حاط عطر خل اروح ابدل قميصي واجي ندردش

_ههه متلهف عل حش

_لا والله متلهف على سوالفج افتقدتهن بهاذ الاسبوع انتظريني ماشي

_هنا انه ماراح اروح لمكان 

_اي هم صحيح 

_هههه..

حك راسه باحراج وراح اخذ قميص احتياطي من جنطته وتوجه للمخزن ابتسمت على سوالفه لان هوه الشخص الوحيد يلي يحبني بطبيعتي الممله

والكئيبه ودوم يسال عن حالي رغم احنه مجرد زملاء بس احسه صديقي من سنين مايحب يشوفني زعلانه لو ضايجه يطلع سوالف من جوه

الكاع بس حتى اضحك واترفه عن نفسي .. خليت جنطتي عل مكتب ورحت للمطبخ سويتلي كهوه ودخل محمد فرك ايده بحماس وكال وهو ياخذ كوبه من الكاونتر..

_والله الج وحشه ياجنان كل مره اسوي كهوتي واشربهه وانه واكف واتذكرج اكول وين جنان كل مره نطلع نتمشه بالحديقه ونشرب كهوه الصبح

_ والله حتى انه حيل تضايقت من كعدت البيت تعودت على حياتي العمليه وياكم

_الا صدك تدرين اجت موظفه جديده ورادت المشرفه تنطيهه مكتبج 

_لا صدك وتالي

_افاا ماخليتهم ياخذونه وانه محمد وكفت وكتلهه البنيه خابرتنه وكالت راح اجي بعد يومين وين تخلينهه واحنه شنعرف من الغريبه وتخلينهه تستخدم مكتب جنان وتلعب باحواله

_كفو منك وشكرا عل سويته بس كون ماصارت مشكله بينك وبين المشرفه

_لا ماصارت لان البنات وكفن وياي وكللهه مايصير عاد خلتهه تغيب يومين لحدما جابتلهه طاوله وكرسي وخلتهه تكعد

_اي ادري جا هو اليستلم موظفين جدد غير يوفرلهم مكاتب 

_شعب شارب نفط

_تدري بيمن ذكرني هسه هذا الموقف

_بيمن

_لمن عصام تزوج فايزه وخلاهه بغرفه لطفيه وهيه زعلانه

_ يعني هسه انتي لطفيه والموظفه فايزه 

_اي والمشرفه عصام

_ههههاي دخيل الله على هل تشبيه

_هههه والله جا وحده تروح لاهلهه متمرضه تجي تلكه مره ثانيه بغرفتهه هاي مو خوش سالفه

_هههه اي والله زين لحضه وانه الدافعت عنج وين بالتشبيه 

_انت فربال

_لا يا الله ههههه

_ههههه اشش يمعود لا يجي عصام على صوت ضحكك ونتحاسب

_هههه اي يله كافي ضحك حتى الكهوه بردت والله الج وحشه شكبرهه بكلبي توه ياله ضحكت من صدك

_ههه شكرا ماما فريال

_العفو لطوف

_ههه نطلع نتمشه لو تعدل المزاج 

_لا كفيتي ووفيتي مزاجي فول انطيني شغل منا لباجر اكضي بساعه

_تمام لعد خلي نرجع لشغلنه وراي ارتب المواد الراكده علي

_تمام وانه موجود انطيني قسم من شغلج اعدل عليه اذا تردين

_تسلم ماتقصر..

ابتسم وصفن بعيوني جر حسره و توترت من نضراته تحمحمت وعبرت من يمه طالعه من المطبخ خليت كوب الكهوه عل مكتب ورتبت وضعه كعدت

عل كرسي وبده الشغل المعدل صرت اجيب البيانات وكله قص ونسخ وطبع وتعديل لحدما كملت انه ومحمد شغل وره ساعتين حسيت بنعاس

وتعب تثاوبت بعفويه واجت عيني على محمد وهو يباوعلي مبتسم كطعت الثوابه وبادلته الابتسامه رخيت ضهري عل كرسي وصفنت اتذكر

نقاشي ويه مرتضى الصبح ونضره الاستهزاء على وجهه كلش ضجت وانقهرت من اسلوبه وياي عبالك خدامه كباله لو جلبه ويامرهه نفضته من افكاري

وعدلت كعدتي رجعت اكمل شغل وكدرنه نخلص من وكت سلمنه الملفات ورجعنه لمينه شغلاتنه طفينه الحاسبات لمن خلص الدوام ورجعنه كلمن

لبيته.. اجه علي بابا واحسان اخذوني وصلنه لبيت عمو شهم ب٤ العصر نزلت ودخلت للبيت اجه بوجهي مرتضى شافني وخزرني بعصبيه تصنعت

البرود ورحت للغرفه متجاهلته .. دخلت للحمام سبحت وبدلت وطلعت تمددت عل جربايه لعبت ويه ريانه وشموخ ملتهيه كالعاده تدرس للاختبار

لفيت راسي ونمت للمغرب .. كعدت على لمسات ريانه لوجهي كمت بوستهه ورحت توضيت وطلعت فرشت مصلايتي وصليت بالغرفه قريت قرآن

بعدها ورجعته لمكانه ..تذكرت شغلي التركته قبل الحادث بجم يوم عاد رحت كعدت عل ميز فتحت لابتوبي كملت فرز البيانات وعدلته للملف جيكت

الجدول مالتي ورجعت سديته اخذت ريانه وطلعت للمطبخ بقيت واكفه بالباب يم الثلاجه اشرب ريانه ماي وخالتي وامي ملتهيات يكلن

بيتنجان وبتبته ويحجن يسولفن عل زواج ومدري ايش مافهمت على منو يسولفن بس لفت انتباهي لمن سمعت خالتي سماء تكول لامي..

_جا تدرين مرت شعلان حاجتني من اجو باستقبال الولد وبحجه الشقه كعدت تصفط تمدح بناتهه وتكول بناتي انطيهن لاولاد عمهن الغريب ماينراد

نوب صاحت لبتهه الوسطانيه وكعدتهه كبالي وكامت تمدح بيهه واخر شي ماتحملت ذبت

الحجايه بوجهي وكالت هاي بنيتي شوفيهه نادره وحلوه ومتعلمه وابنج مرتضى كبر اذا تردون هاي بنتي الكم كبعوهه واخذوهه 

3 تعليق

_عود صدك خيه هيج حجت 

_اي والله خيه نوب انه استحيت شكلهه ماريدهه لو ابني مايريد يتزوج قريبه عاد كتلهه عنده وحده

بالخارج يريد يتزوجهه اذا تردين اخذهه لمحمد وهيه انتفضت شنو محمد الشايب تردين بنتي اله ويلحكهه هوه ومدري شنو 

_يا جبح عينهه وينه شايب اشو جنه ورده اسم الله الرحمن عليه تلحكينه انتي وبناتج العجايز

_اي والله كتلهه انه محمد الف وحده تتمناه ماضال على بتج تقبلين تنطيهه اله لو لا بقت تدردم شويه واخذت بتهه وكامت من يمي

_نوب خوش سالفه هاي وين اكو ام تعرض بناته للزواج مو هل عدنه بنات احنه اشو بعمرنه مافكرنه

نطلب من احد يتزوجهن وهاي بناتي ابوهن بعظمه لسانه كال لو يبقن لعمر ال٤٠ سنه مامتزوجات مامل منهن ولا اجبرهن على شي 

_خيه والله مادري بهاي النسوان شني عقولهن انه هيج انزل من قيمه بتي واروح اكول لمره كبعيهه واخذيهه لابنج لو اموت ويشيلوني جنازه 

_بلوه يا خيه الا اكول صدك مرتضى عنده وحده بالخارج

_اي والله هاي قبل سنتين مدري كلاثه حجالي عنهه وكال اريد اجيبهه وياي للعراق من ارجع

واتزوجهه بس مدام ماجابهه وياه معناتهه عافهه وهمزين هم انه ماجنت هاويه الغريبه وبنت الاجانب

_ اي والله شني هنه بنات الاجانب تجيلج هنا تصلخ وتمشي معناهه حتى رجولتنه نضمهم بالبيت وحتى ساجد ماخلي يعتب بابكم بعد رجلي

سرسري ومن يشوف هيج يستهتر يضل يدور شعر اشكر وعيون زرك وتعاي يا حلى من تالي وكت ميشي وحطي عدسات

_هههه فلشج كون منيله هل سوالف ساجد

1 تعليق

_يوووه ماتعرفينه بعدج هذاك اليوم شاف وحده خلفيتهه جبيره اجه يكلي راح اسجلج بالنادي حتى تصير عندج خلفيه 

_يا ياا فلشكم كون وقبلتي

_يا شمالني كتله لو تموت هم اروح لمكان واخرب روحي اشو خلفيتي تجيب التايه...

_عزه العزاج عود صدك هيج كتيله 

_اي والله جا مجذبه

_ولا تكعدين راحه عمي انه لو تموتيني هم احجي هيج ويه شهم اضم روحي سنه معناهه منه لو هيج حجيت

_شدعوه يعني هسه انتو مابينكم حجي جريئ كل هل سنين العشتو بيهه سوه

_اكو بس مو هيج عمي انتم سرسريه شلون ثنين سويجد وحلى

_هههه حلاة العشره بسرسرتهه يمعوده الوحده شتستفاد من المستحه وخاصه ويه رجلهه 

_خاله انتن خواتي برعات انه موش مثلجن ...

سمعت السوالف صار بيهه خلفيه وحجي جريئ خليت وطلعت من المطبخ مدري شني طركاعتهن هل متزوجات

كلشي عدهن عادي يسولفن بي ولو هيه خالتي سماء تستحي من خيالهه بس امي لا ابد اخذت كل هل جرئه من ابوي طلع ابوي يدور خلفيه جبيره ومادري الك الله يا بويه مرتك فاضحتك بين العربان وماتدري ..

رحت لغرفه شموخ طليت عليهه من الباب و لكيتهه تدرس خطيه يمته ماجيلهه الكاهه محودبه عل كتب وتكتب بالاسئله تحفظ بيهن سديت الباب

وطلعت للحديقه كعدت عل مرجوحه وكعدت ريان يمي خليت سماعه باذني وسماعه باذنهه وبقينه نتمرجح ومشغلين اغنيه [يا شوگ/ هيثم يوسف]

كلش احب هاي الاغنيه وخاصه الكليب مالتهه تفسر طفولتي ويه مرتضى وشلون جنه نلعب سويه

لو الموسيقى يلي بالبدايه تخلي كل جروح كلبي تهيج .. صفنت بالنجوم والهوى البارد اليكفخ وجهي كل شوي جريت حسره وحسيت على ريان انشالت

فزيت مخروعه عبالي طاحت من المرجوحه واشوف مرتضى شايلهه بيده اجه كعد يمي وانه كمت بسرعه وكتله..

_رايحه انه جوه 

_تعاي اريد احجي وياج

_ليش اكو بعد حجي اكثر من الصار الصبح

_هوه اريد احجي بالصار الصبح

_وانه مالي خلك ارجع اتناقش وياك بنفس الموضوع

_جنان

_نعم 

_نعم الله على هل عيون الشمسيه

_هفف مرتضى وين تريد توصل بكلامك هذا وتصرفاتك تره عيب عليك تتغزل وكلما شفتني حشرتني

_اريد اوصل لكلبج واكتشف البي

_كلشي مابي افرغ من حياتي

_وانه

_شنو انته

_ماساكن هل كلب 

_شنو..

كام وكف كبالي وباوعتله باستغراب وعصبيه عكس رجفه كلبي وتوتره من سؤاله ابتسم وعدل ريانه على كتفه و اشر على كلبي وكال..

_معقوله كل هل سنين وكل يلي سويته الج بطفولتنه ماخلاج تفكرين تحبيني

_ليش شنو جنت تسوي 

_حنيتي عليج وخوفي والدلال كله هذا ماغزر

_يعني تريدني احبك بس على شوي حلويات جبتهم وشوي اكسسوارات بايكهم من اختك

_ههه شمدريج جنت ابوكهن منهه

_ اعرف ماحاجه احد يكلي

_زين الكلج جنت ابوكهن ماكلج شنو السبب

_ماسالت ومايهمني بعد شي فات ومات وصار بالماضي ليش رجعت تذكره هسه

_ما فات ولا مات عايش وياي بكل لحضه مرت علي وانه بالغربه وانه ادري حتى لو سكت لسانج عيونج تبوحلي بحبهه كلما تباوعلي 

_شكاعد تحجي انت سكران لو شنو وضعك

_اصحى منج المهم يله جاوبيني

_شجاوبك وبشنو يهمك جوابي

_حتى اعرف منو احب ومنو لا

_ههه لا صدك يعني ماتحب شخص الا اذا حبك هوه 

_اي بعد تعرفين الكلب واحد والخيارات هواي

_لعد روح اختار غيري لان جواب التريده مامتوفر عندي

_وليش عصبتي 

_لانك مستفزز

_ليش ماحاولتي تتواصلين وياي وتسالين علي وانه بالغربه

_ليش انت سالت كلت حتى لمن تتصل باهلك وتدري بيه موجوده يمهم تسد الاتصال 

_جنت ضايج منج لان ماتسالين علي وبعد الكلام السمعته من عندج مثلما تكولين فقدت الامل بيج 

_يا كلام

_هيج انسي الا اكول شنو رايج بروسلين

_بت عمو شعلان

_اي جا شكم روسلين عدنه 

_زينه وتلوكلك

_بس اشوف انتي احلى

_شدخلني انه

_لا مو هسه عندي خيارين والطرفين يحبني انتي ورسيله ومحتار منو التحبني اكثر

_لا انت يا اما سكران يا اما كاعد تستفزني قصدا

_ليش حتى استفزج حاجي شي جذب يعني هاي العيون الشمسيه ماتلمع لمن تشوفني

_ولو افترضنه مثلما تكول وتالي انت شراح تسوي راح تحبني بس لاني احبك لو تزوجني لاني رايدتك

_لا شنو زواج هاي سالفه خليهه بالمستقبل البعيد احب اكضي وكت اطول ويه الشخص الاحبه ويحبني اريد اعيش واعيشهه الرومانسيه على اصولهه قبلما نتورط بالزواج

_ههه الضاهر كمت تخربط بيني وبين بنت عمك الولهانه بيك وتتخطبك من امك روح اسالهه وكلهه تقبلين العب وياج بدون زواج لان بس هيه التسرسح عليك وتكلك عادي ابن عمي شيال همي

_هيج كولتج

_اي اسمع مني وروح حاجيهه وخلي ببالك كلمه وحده انه لا احب احد ولا مستقتله اتعرف على

احد ويا اما اكون الاولويه يا ما اكون شي وكلامك البينلي اني خيار ثاني ويه بت عمك رسيله هيه تقليل قيمه بالنسبه الي وماعاش اليقلل قيمتي مفهوم

_يعني ما تحبيني

_ليش انت تحبني

_انه سالته بالاول

_لا وليش اصلا حتى احبك مجرد ابن عم واخ بالنسبه الي انت حالك حال غيرك من اولاد عمي..

حجيت هيج حتى اكطع الشك منه وانهي النقاش الاستفزازي وحتى مابين اني احبه واعتبر خيار

سهل بالنسبه اله شد قبضه ايده وطفرن شياطين كباله من نسبته كابن عم فقط تقرب علي لزم فجي عصره بيده حيل وكال من بين سنونه..

_شوفي هاي ثاني مره تعيدين هل جمله وتنسبيني حالي حال باقي ولد عمامي والثالثه ثابته اطلع لسانج واكصه لو عدتيهه انه مو مثل سراج وخوانه الفاشلين يلي ماعدهم غيره على عرضهم فاهمه 

_شدخل سراج بالسالفه ليش تحجي عل ولد وهو مو يمك ولا بكرباك وبعدين مو تريد تصير نسيبه وعرضه عرضك ليش تجيب سيرته بالعاطل

_ايباااا هيج هوه عزيز وماتتحملين كلمه زايده عليه وتفضلينه علي انه العشتي كل طفولتج وياي 

_مامفضلته على احد بس حبيت اذكرك منو راح يصير سراج وانت الدخلته وحجيت عليه وهو ماله شغل

_ لا اشو ضجتي وانتفضتي من جبت سيرته هيج هوه ساحرج وعامي عيونج 

_شكاعد تحجي انت 

_عادي تراجعي عن كلمتج اله بهذاك اليوم و روحي حبي ولعبي وياه وخل يختلي بيج ويتونس بعد بس مره ثانيه من تنسبين اولاد عمامج على انهم

اخوان وبس بالنسبه الج تذكري تطلعيني انه وسراج من بيناتهم لان لا سراج يعتبر اخوج ولا انه اتشرف بيج اختي ..

فتحت عيوني بصدمه من كلماته ولمن نتر وجهي من ايده وراح يمشي وهو يهف من عصبيته بقيت صافنه بكلامه ويتراود ببالي كل شوي شنو قصده

يلعب وياي ويتونس شعباله هيج انه رخيصه وبايعه نفسي وماشرفه ليش ماشرفه ليش مو بت عالم وناس انه لو مو خوش بنيه لو ماعندي اخلاق

لو عباله بيني وبين سراج شي عيب وحرام .. هيج صارت يا مرتضى انه الكضيت طفولتي وعمري وياك وكدامك ومايوم طلعت العيبه مني تجي

تقترح علي تلعب وياي وتسويني مجرد خيار بالنسبه الك وتالي تكلي ماتشرف بيج وتعتبرني رخيصه ومسلمه روحي لسراج.. فوك كل هذا الحب

والتفكير وتعب روحي ونفسيتي وكآبتي كل هل سنين الفاتت واشتياقي وحلمي بيك هيج تتغير بسهوله وتصير شخص اناني ومتسلط و تجي تكلي

ماتشرف بيج امداني وامده كلبي يلي يحن عليك ويرفله جفن من يمر اسمك بعد.. هين يا مرتضى الا اندمك على كلامك واسلوبك هذا وانه جنان اعرف

شسوي وشلون اخلي حد الك ولمشاعري التافهه اتجاهك .. مسحت دموعي بقوه وهي مستمره خليت ايدي على حلكي وشهكت بقهر رحت اركض

لغرفه شموخ كعدت وخليت المخده على وجهي صرت ابجي بصوت عالي وحركه كلب طلعت ضيم هل سنين كلهه ندمت بكد شعر راسي على انتظاري

اله واشتياقي وحركه اعصابي ظنيت اني عزيزه عليه ظنيته مثلما كالت شموخ ان يريدني ويحبني ومايعرف مشاعره شنو .. بس غلطانه مرتضى

مايحبني مايريدني هوه معتبرني وحده رخيصه لمن تدافع عن ابن عمهه تعتبر عاشكته ومنطيته نفسهه معتبرني لعبه ويريد يلعب وياي وخلاني

مجرد خيار جانبي لو مافلح ويه بت عمه يجي ياخذني ويضحك علي ..خلاص كلشي انتهى بعد من هل ليله راح ينتهي كلشي تفكيري بي وحبي

اله وحزني بفراكه واشتياقي لطفولتنه وكلشي حلو بنيته اله بمخيلتي راح ينتهي .. دخلت شموخ تصيحني عل عشه وتفاجات من شافتني هيج

سالتني شبيه وانه مستمره ابجي واكلهه تطلع بره بس هيه ماعافتني بقت يمي واخذتني لحضنهه تمسد على ضهري وماكدرت احجي شي لحدما تعبت و غفيت واستسلمت للضلام فتره.. 

فزيت على صوت الاذان وهو يتخلخل لروحي شفت نفسي نايمه بنفس وضعيتي والساعه ب٤ الفجر صليت على محمد وكمت دخلت للحمام

غسلت وتوضيت وطلعت فرشت مصلايتي ووكفت اصلي وانه احس كلبي معصور كملت وبقيت ساجده لربي وادعي ينسيني مرتضى

وينسيني الوجع السببه الي ويعوضني لان فعلا تعبت وقررت من بعد الشفته منه وعرفت مكانتي وقيمتي عنده شنو وخاب ظني واملي بي راح

انساه واعوفه واكطع كلشي يوصل بين كلبي وكلبه وامحي كل الحب البكلبي اتجاهه.. بقيت ابجي

وادعي بهمس وهذا اجمل واعظم شيء في الصلاة وهو : "ان تهمس داعيا في الارض فيسمعك رب السماء ويستجيب "

(اكتب واحس كلبي ينعصر وياهه لاني مريت بنفس الموقف ووكفت متوجهه لالله بنفس هل كسره

وبكلب محترك اكثر من مره ودعيت ربي ينسيني

اكثر من مره لحدما الله فرجهه علي ونساني كلشي سبب اوجاعي وعوضني بالاحسن منه ،

"ولا تستهينوا بالمشاعر فإنها تصيب الفؤاد وتحرق الروح ، ولا تكسر قلب احدا وانت قلبك بيد الذي جل علُاه " )

:- كملت صلاتي ولفيت المصلايه رجعتهه لمكانهه وبقيت كاعده عل كرسي خليت راسي عل ميز

وصفنت بالفراغ اتذكر كلامه وكلبي ينمرد وابجي بقهر وكاتمه صوتي ماعرف يمته غفيت وكعدتني شموخ الصبح وهي تسالني..

_شبيج جنانه ليش نايمه هيج 

_ها خيه مابيه جنت اشتغل عل لابتوب ونمت 

_احجيلي خيه شصار وياج امس وليش باجيه 

_مابيه شي حبي بس متضايقه جنت وبجيت

_متضايقه لو مرتضى رجع سواله سالفه وياج

_لا ماله شغل

_ضحكي على غيري اعرفج شلون تذبلين من يغلط وياج بكلمه لو بفعل والضاهر زودهه ويحتاج من يردعه ويخلي حد كباله وانه الراح اخليله ها حد لعجرفته..

كامت بعصبيه طلعت بره وانه كوه كمت وراهه روحي خاويه شفتهه وكفت كباله رادت تحجي وصحتلهه حسيت الكاع افترت بيه وماسيطرت

فقدت توازني وطحت بالكاع وعيوني مغوشه شفتهم بصوره ضبابيه اجو باتجاهي وغمضت عيوني مستسلمه للظلام.. فتره مو طويله ورجعت

فتحت عيوني واشوف بابا كبالي حاطني بحضنه ويرش ماي على وجهي ويطبطب عليه حتى اكعد شافني فتحت عيوني وحضن وجهي بيده وحجه بقلق..

_شبيج بويه جنان شجاج يضوه عيوني ليش هيج حالتج شصاير وياج 

_بابا

_عيونه وتعب سنينه امري كوليلي شنو تردين يوجعج شي تردين شي تردين اخذج للمستشفى 

_غاليه يبعد روحي غاليه والطلب رخيص تعالي لحضني بنيتي تعالي ..

لماني بحضنه وغمضت عيوني متجاهله الحوالينه واكفين ويباوعولي بخوف وقلق كللهم بابا يطلعون

ويعوفونه وهمه سمعتهم تسحبوا لبره وسدوا الباب فتحت عيوني وشفت بس امي يمي تمسد على كتفي رفعت راسي لابوي وكتله وانه خانكتني العبره..

_بابا 

_كولي يبعد حيلي شنو تردين شنو يوجعج

_كلبي يوجعني

_اسم الله عليه تردين اوديج للمستشفى 

_لاا اريد اروح لبيتنه 

_حاضر اوديج بس مو لبيتنه لان بعده بي عمال يابويه وماجاهز راح اطلعج لغير بيت اذا متضايقه من بيت عمج

_لا اريد بيتنه

_ماكدر وعيونج بس وعد خلال ايام اخليهم يجهزونه وانه اروح اشرف عليهم واساعدهم ماشي بويه

_ماشي

_وهسه احجيلي شنو بيج بشنو تحسين ليش طحتي فجاتا

_لا تخاف علي بابا يجوز لان ما اكلت شي البارحه

_شنوو جا وين احنه عنج وانتي ماماكله شي وانتي يا امهه وين جنتي عن بنتج ليش امس كله مامخليه لكمه بحلكهه وانتي ماتدرين عنهه مريضه ويرادلهه علاج كل وقت

_يا رجال غير يم شموخ هيه تاكل وتشرب وياهه وتنطيهه شموخ العلاج وين ادري بيهه راح تعوف الاكل وتهمل روحهه 

_استغفرالله ليش بويه جنانه ليش تسوين هيج غير تديرين بالج على صحتج ليش تسوين هيج بينه

تدرين من شفتج طايحه بالكاع ووجهج اصفر انهبطت وكلبي صار يوجعني عليج ترضينهه يابويه انهبط وانجلط وينشلع كلبي 

_اسم الله عليك بابا لا مارضه بس مو بيدي جنت ماشتهي ومالي خلك اكل مختنكه من البيت ومتضايقه كلش

_تردين نطلع لغير بيت من باجر اشوفلي بيت ونطلع نكعد بي 

_لا بابا جنت مخنوكه وحجيت هيج لا يضل بالك يمي عادي يمته ماتخلص بيتنه نكدر نرجعله

_اخلصه بس صبريلي يومين اروح هناك وانه اشتغل وياهم من عيوني

_تسلم عيونك بعد روحي ..

لميت روحي بحضنه وغمضت عيوني تعبانه وروحي ذبلانه وبس بحضن ابوي الكه الراحه رغم كبر سني بس لمن اضوج او انقهر اشتاق واحن

لحضنه مثل الطفله من تحن لحضن ابوهه ..شلون بيه بعدك يابابا شلون اعيش اذا صارلك شي اموت وراك والله ماتحمل يصير بيك شي وانه اشم الهوى

يارب اخذ من صحتي وخلي على صحته ومن عمري على عمره واجعله خيمه وحضن يلمنه طول عمره يارب..

كعدتني امي بعد فتره وهي بيدهه صينيه الغده عدلت كعدتي وخلت الصينيه كبالي وصارت توكلني بيدهه وتمسح بدمعاتهه التطيح سكته رفعت ايدي مسحت دموعهه وكتلهه..

_امي ليش تبجين انه مابيه شي وبابا مايقصد يجرحج مساع بالحجي 

_لا يمه انه استاهل ويني عنج التهيت بالسوالف وعفتج ماكدرت ادير بالي عليج وانتي بعدج مريضه 

_لا امي حبيبتي لا تحجين هيج مو صغيره وتركضين وراي انه الاسفه لان هملت نفسي وصحتي وخوفتكم علي 

_ليش هيج صار بيج يمه احجيلي شصاير وياج اكو احد مضايقج مرتضى مضوجج بكلمه لو فعل وتردين ترحين من البيت

_لا يمه ماصاير شي بس جنت مخنوكه ومالي خلك تدريني شكد اكتئب لمن اكعد بالبيت واسكت 

_تردين اخذج للسوك للمول افرج لمدينه الالعاب اذا مشتهيه نروح كليلي شسويلج وتروح الكآبه منج

_سلامتج يروحي كلشي ماريد غير ان تكونون بخير ويمي لان انه وجروحي نطيب بيكم 

_يبعد حيلي يمج احنه انشاءلله 

_انشاءالله يروحي

_يله يمه كملي اكلج اريد تخلصين الصينيه كلهه

_لا ماكدر كلهه وداعتج عندي لان بس اكل هواي اذبه بالمغسله

_ميخالف اكلي منا لتشبعين حتى تاخذين علاجج وانه راح اكول لابوج يودينه للكورنيش العصر نتونس منا لليل ونرجع شرايج

_لا يمه خليهه باجر لان مالي حيل اليوم 

_انشاءلله يمته ماتردين كليلي

_اي بس كولي لبيت عمو هم يطلعون ويانه مايصير نطلع وهمه باقين

_تمام هاذهو باجر اكول لابوج يطلعنه العصريه احنه وبيت عمج منا لليل تتونسين ونرجع 

_تمام ..

ابتسمت ومسدت على راسي وبقت توكلني بيدهه لحدما شبعت اخذت علاجي مال رئه واجه عمو شهم علكلي المغذي وزرقلي بي ابره كلي بالشفا

انشاءلله وتطمن على حالتي وطلع بقيت متمدده ونايمه اليوم كله مارحت للدوام و كل فتره اغيب بدون اجازه اخذت نقالي اتصلت على زميلتي

بالشغل وكتلهه تاخذلي اجازه لليوم وباجر ارجع اداوم لاني مريضه عاد المدير ماعترض لان اصلا ايام اجازتي ما مخلصه بعدهه فعادي اذا غبت او

رحت .. بقيت اكلب بنقالي شويه تالي اجتلي ٣ رسائل من رقم مجهول عل تلغرام دخلت على صورته وشفته محمد عكدت حواجبي باستغراب ودخلت للمحادثه والكاه كاتبلي..

💬هلو جنان سلامات انشاءلله كالوا مريضه شصاير وياج كل يوم مريضه طايحه

💬محتاجه شي تردين اجي اخذج للمستشفى اذا ماعندج احد يمج ياخذج 

💬انه محمد بالمناسبه نسيت اكلج بالبدايه لان جان بالي يمج 

بقيت اصفن برسايله وحسيت بيهن دفو واهتمام حلو ابتسمت لان اكو شخص يهتم ويسال عني غير اهلي كتبتله رسايل ووديتهن اله..

💬هلو بيك محمد اي شوي تخربطت لا يضل بالك مابيه شي وباجر انشاءلله ارجع اداوم 

💬لا مامحتاجه شي سلامتك وشكرا عل سؤال 

💬اي عرفتك من الصوره المخليهه ..

شافهن بسرعه ورد علي ..

💬عندج العافيه انشاءلله اذا تحتاجين شي الله عليج تكليلي انه موجود وبالخدمه اجيلج من اخر الدنيا

💬تسلم محمد وماتقصر بس والله مامحتاجه شي واهلي وبيت عمي يمي ماراح يقصرون انشاءلله 

💬تمام اذا هيج طمنتيني لان بالي يمج عبالي محد يمج يهتم بيج

💬ليش عبالك هيج

💬ماعرف يجوز لان كل فتره تتمرضين حسبت ان محد يهتم بيج وداير باله عليج 

💬لا بالعكس اهلي دايرين بالهم علي ومدلليني بس انه هيج ماعندي مناعه بسرعه اتمرض وبعدين انه مو صغيره جم دوب يركضون وراي اهلي 

💬اي صحيح بعد هوه الطفل من يكبر يصير لازم يشوفله شريك حياة يدير باله عليه وبالمقابل يهتم بي هوه

💬مو شرط اكو اشخاص كفيلين بنفسهم

💬اي بس اكيد انتي مو من هذول الاشخاص

💬ليش بله

💬لانج حساسه وعاطفيه وتحتاجين شخص يهتم بيج ويدللج ومايعوفج بحالج لحضه 

💬هيج رايك بيه يعني انه ضعيفه وماكدر اعتمد على نفسي مو

💬لا مو هيج بس الشخص دورات يتمنه يكون عنده شخص يحبه يعطف عليه يسمعه كلمه حلوه يلمه بحضنه من يضوج يراضي من يزعل هيج

يعني ومو بس انتي هسه انه غير تكولين رجال وشواربي وانه بس مرات احن لهيج اشياء وتدرين شتكلي امي

💬 شتكلك

💬تكلي احضن المخده ونام يعني تفضل بدال ماتكلي يمه تزوج وجيبلك مره تحن عليك وتحن عليهه اجت تكلي احضن المخده كله علمود ماطلع منهه اذا تزوجت

💬جا ليش تطلع منهه خطيه البيت مايكفي لو شنو

💬لا بيتنه جبير بس هيه تخاف تكول بنات هل وكت مايردن العيال وامهات رجولتهن كلمن تريد بيت وحدهه وانه لان وحيد عدهه بعد اخوي الله يرحمه متعلقه بيه هيج

💬 ياا خطيه بس كلهه مو شرط اكو هواي بنات يقبلن العيشه ويه العيال ويحبن العيال مو كل اصابيعهه سوه

💬جنان صعبه بهل وكت وين الكه التحب امي وتحن عليهه مثل ماتحن على امهه

💬اكو هواي بس انت توكل على ربك ودورهه

💬ماضن والله هسه انتي مثلا شنو رايج بله بالعيال اذا تزوجتي هم تتحملينهم

💬ماعندي مشكله واصلا ماحب العيشه وحدي تدريني اكتئب اذا بقيت مكابله روحي 

💬يعني راح تحبين عمتج حتى لو طلعت قاسيه وياج

💬ماكو شخص قاسي هوه احنه غربه ونجي نعيش سوه فجاتا شي طبيعي تفهمني غلط مرات وافهمهه غلط بس لو تصير موده ومحبه وعطف بيناتنه من بدايه 

محد تضوج وتكره الثانيه اكو بنات يستنكفن او يضوجن لمن تعلق عمتهه على شي يخصهه وتامرهه تغير منه

او تسوي غيره بينما اكو بنات ياخذنهه برحابه صدر ويكللهه حاضر امري وانه انفذ فهيج حتى لو جانت العمه خبيثه راح تخجل على نفسهه وتعدل اسلوبهه ويا جنتهه

💬 وانتي اي نوع منهن بله 

💬شتتوقع من يا نوع انه

💬حسب ملاحضتي الج بهل سنتين اكدر اكلج وانه كلي ثقه انج من النوع الثاني يلي تكول حاضر وتامرين وتتعامل بلطف ويه الشخص الجبير بالعمر

💬 هههه الله يرزقني ثقتك

💬 ليش كلامي خطا

💬لا ابد بس تعجبت من ثقتك بيه لهل درجه وانت مامعاشرني

💬عادي اذا عل معاشره ميخالف نتعاشر وبعدين نقرر اذا هل ثقه بمحلهه او لا

💬شقصدك يعني

💬تعرفين قصدي بس طنشتي 

💬 لا والله ماعرف شنو قصدك

💬تدريني يا جنان كلبي وبالي يمج واتمنه لو اخذج غنيمه من دنيتي هاي واستعز بيج

💬يوول محمد شهل كلام

💬هاي الحقيقه يلي تشوفينهه بعيوني كل يوم وتغلسين عنهه بس يله عادي اعتبري ماحجيت شي وانسي خلي كلشي طبيعي بيناتنه ممكن ؟؟ ..

بقيت مصفنه على كلامه وشلون تراجع عنه وهوه متوتر وخايف من ردي صفنت افكر بكلام مرتضى الجارح الي امس وبين كلام محمد يلي عنده ثقه

بيه ويعرفني وهو مامعاشرني نزلت دمعه حاره على خدي اخذت نفس وقررت اخطي هل خطوه وافكر بسعادتي ونفسي بعد سنين من التعب والهم والفقدان رجعت قريت رسايله توكلت على ربي و كتبتله..

💬ليش تراجعت عن كلامك هيج حبك الي ضعيف وخايف تبينه الي

💬لا وروح اخوي العزيز ماترددت الا لاني خفت ترفضيني لو تتغيرين علي وماتصيرين تحجين وياي مثل عادتج لان كوه متحمل ضمه مشاعري عنج شحال لو تتجاهليني وتتغيرين

💬وتاليتهه هل مشاعر شنو افترض قبلت مشاعرك وتالي

💬تالي اذا الله وفقني وتحبين اخلي اسمائنه وروحنه تجتمع بحلقه وعقد شرعي واخذ بيدج لدنيا ورديه..

ههه جان السؤال واحد لشخصين والجواب مختلف تماما وفرق شاسع بين المشتهي اللعب وبين الطالب الحلال تنهدت ودزيتله..

💬بس انه ماحب اللون الوردي احب الابيض

💬اي ابيض ابيض بس شنو افتهم من كلامج هذا

💬هيج مجرد كتلك لوني المفضل حتى اذا تريد تاخذني لمكان يكون ابيض مو وردي

💬 جنان لا تسودنيني شنو يعني تره عقلي كمز

💬ههه شسالفه 

💬كولي شنو قصدج قبلما افهمج غلط وتلكين اهلي باب بيتكم هسه

💬ويلحكون يجون من ابو الخصيب لهنا بساعه وحده

💬 لعيونج اسويهه لحضه وحده وتلكيني بابكم

💬لا خليهه فد يومين لان مريضه هسه 

💬شنو يعني

💬راح تخليني احجي حجايه شكبرهه

💬احجي الله عليج بس المهم افهم

💬لا تصير غبي كتلك تعال بعد يومين يعني شتسوي تجي تبيع خضره بمنطقتنه يعني اكيد قصدي تجيب اهلك تتقدملي ....