رواية فصلية لظالم الفصل السادس عشر بقلم زينب نور
بقلم (سقين الشمري)
"""فهد : راح الدكتور وراها بشوي طلعو زمرد من غرفه العمليات بعدها ما صاحيه من البنج
ورأسها ملفوف ووجها شاحب ولونه اصفر وبي زراك اثر الكتله
وهي نايمة متدري شكو عبالك ميته حتى النفس من تجره ميبين ويكولون حاطيلها اوكسجين اثناء العمليه لان ما كادرة تتنفس ومختنكة
ولد عمي تخبلو من شافوها
وام علي كطعت روحها
كلت بكلبي زين هاي اذا شأفتها أمها هيج شحسوي
وصلو للغرفه وشالوها وخلوها عالسديه الثانيه
وعلمو المغذي ورتبو فراشها وراحو احنة بقينه يمها
ولد عمي ضلو واكفين بالباب ما طبو لان عيب وهيه ما لابسه شال
اااخ الله لو مو عمليه وشادين راسها فلا اخلي شعره وحده تطلع من راسها
كعدت ام علي يم راسها تقره آيات على راسها وتبجي ابد ما سكتت
واني ضليت اباوع عليها وشوي وطلعت يم ولد عمي واكفين يم الباب
مال الغرفه جانن اكو كراسي محطوطه كعدنه عليهن
وكالو هاي انته مسوي بيها هيج سكتت
كالو شلون آنطاك كلبك من يمته وانته تمد ايدك على حرمة
وفوكاها موتها
كتلهم ما ادري من اشوفها كدامي واذكر اخوي اريد اطلع بروحها وما يشفى غليلي
كالو وهيه شعليها
فهد: من دامها من اهل الي كتلو اخوي عليها
كالو بس الي تسوي غلط وحرام وحتى الله ما يقبل
واكو حديث او قول يقول :
(((اذا دمعت عين أنثى بسبب رجل
تلعنه الملائكة بكل خطوه يخطيها
للأمام علي (عليه السلام ) )))
زين شلون انته من شيعه علي وتسوي هيج
انته ابن شيوخ وابن أصول وابن أجاويد
وانته تربات المضايف والدواوين شلون ترضاها على نفسك تمد ايدك عله حرمة
كمت احس راسي يريد ينفجر كتلهم
كااافي انعل ابوها لابو شتريدون اسويلها لعد
أبوس أيدها ورأسها وأرحب بيها وهيه من اهل كتال اخوي
تستأهل وبابو زايد عساها بالكبور
همة ضلو صافنين
بعدين كالو محتاج شي
هزيت راسي لا
محجو شي بعد
بس كالو احنه رايحين وانشالله لليل انمر
ضليت ساكت محجيت
همة راحو ورثت جكاره
وشربتها وره شوي
دخلت للغرفه هيه على نفس نومتها
كلت لام علي ما صحت هزت راسها لا
كعدت عالتخم المحطوط بالغرفة
ضليت كاعد يمها وهيه حتى رمش ما رمشت
وره تقريبا ساعه ام علي كالت
يمة روح صيح للدكتور يجي عليها شو
ما كعدت وصارلها شكد من طلعوها
شو خوفتني
هزيت راسي باي وكمت
طلعت رحت للدكتور
كتله انو ما صحت
رأسا اجى وياي
شافها كال فاقده
كتله خومو اكو خطر يعني كال حسب حالتها اذا ضلت فاقده مو زين
واذا كعدت لا
واذا طولت منا لنص الليل فاقده اكيد مو زين
استغفرت الله
عفيه حتى مرضج شلعان كلب
اجى فحص عيونها وكال للمرضة جيبي فلان دوة وكذا
وتعاي جابته واجت سوه إبره وضربها كلها بالمغذي
وكال راقبو وضعها اذا منا لساعه ساعتين مصحت نتخذ غير اجراء
هزيت راسي باي وخله الدكتور وطلع
المهم وره نص ساعه حسبنه الها ٣١ دقيقه و١٥ ثانيه زمرد
كامت تفتح بعيونها
كمت اركض عليها
وصلت ليمها
بعدها تحت تاثير البنج حاجتها ام علي
باوعت شويه وسدت عيونها
وانوب فتحتهن
بعدها ما صحت كامل
زمرد : فتحت عيني مغوشه ما اشوف بس بياض
واسمع أصوات يمي
عرفت من الصوت همة فهد وام علي
شوي شوي افتح بعيوني واسدهن
كمت اشوفهم بس بتشويش ما واضحين
اريد اشيل ايدي وافرك عيني علمود بلكت يروح الغواش
مكدرت احس ثكل بيهن ما بيه ارفعهن
سمعت ام علي تحجي وياي
ما بيه اجاوبها ولا بيه احرك جسمي
ضليت افتح وأغمض عسا ولعل يروح الغواش ماكو
احس نفسي نعسانة حيل
رجعت نمت
ام علي : يمة وليدي اركض كول للدكتور صحت
فهد : طلعت رحت للدكتور وكتله
كال الحمدلله تعدت مرحلة الخطر لعد
اجا شافها نايمة كال يله اهم شي تعدت مرحلة الخطر
بس بعدها تحت تاثير البنج وهذا الشي عادي
اطمن على وضعها وخله وراح
لليل هيه صحت واجو ولد عمي
طبعا اني من صحت مجنت موجود
جنت جوة بالكافتريا واخابر
من وراها عفت حتى شغلي
من رجعت وره ساعتين كالت ام علي صحت وحجت وياي
بس تبجي وتكول راسي يرجعني وتكول اريد امي
كلت للولد اتفضلو هيه اختكم
بس انعل يومها ملابسه حجاب ومو مال البسها
عاد من طبينه جانت نايمه بسبب المسكنات الي اخذتهن
كومة علمود وجع راسها فراسا تنام
سلمو على ام علي
وسالو شلون صارت كتلهم جانت فاقده
وهسه لا زينه وصحت
كالو انته مبين تعبان وما الك خلك
روح ارتاح ساعه ساعتين
وتعال او اذا تريد نبات عادي
كتلهم لا ما اريد
هيه ليله أتحملها
بهالاثناء دك التيلفون
شفته رقم الوالدة
ابد ما دكت من اجيت لحد الان
فتحت خطت عبالي جاي تسألني
وبس حطيته على آذاني اجاني صوت
امي وهيه تعيط عبالي اكو شي
صاير بالبيت او بخواتي
حبوبتي او جدي
بس لا سمعتها تعيط وتكول نايم بالمستشفى علمود كتالين اخوك
وفوكاها قايم بكلشيت الها ومداريها
ولك هاي من كتالين اخوك فهدددددد
كتله اهدي يمة مو زين عليج العياط
كالت خايف عليه اني منو
اهم شي الفصليه اني منو
ولك راح داويها وخايف عليها
ولك هاي وديها للكبور
كتلها يمة والله مو زينه وجبتها حالتها خطره
كالت بالكبر اني اريدها تموت
حركت كلبي يفهد
شكلك نسيت اخوك وموته
كتلها والله ما ناسي يمة
كالت فعد هسه اذا ما جست للبيت وعفتها اقسم الله بحليب الي رضعته
لا ابني ولا اعرفك وغاضبه عليك ليوم الدين
كتلها يمة فدوة لتسوين هيج
هسة صحيح اكرها وهية عدوتي بس
هسه هيه مرتي
شلون اعوفها بالمستشفى واجي
شيكولون بيت الشيخ غزوان عايفين نسوانهم بالمستشفى وهمة ماكو
ترضيها يحجون علينه
الام : فهد اني حجيت الي عدي وكلت اذا ما اجيت هسه للبيت وعفتها
لا ابني ولا اعرفك واعوف البيت واطلع بس انته بقيت الي
وهسه عفتني ورحت عالفصليه
كتلها يمة سدته بوجهي كلت بكلبي انلاصت
جانت عايزه كملتها امي
كلت للولد يبقون بمكاني
بس اروح بشغله واجي
كالو روح احنه موجودين
بس همة درو لان جان صوت امي
عالي واني حجيت كدامهم ما لحكت حتى اطلع بره
باوعت عليها نايمة متدري شكو ماكو
خليت وطلعت وصلت للبيت
نزلت ورحت سلمت على حبوبتي وجدي
سال عليها كال شلون صارت المسعده كتله زينه
اما حبوبتي ما سالت اصلا
سئلت على امي
كالو بغرفتها
رحت عليها دكيت الباب
جانت اختي يمها الصغيرة يمها هناء
خواتي كلهن مزوجات
باقيات بس ٢ وحدة هيه هناء الزغيره
والثانية أميره ابن عمي رايدها
عساس هالفترة خطوبتهم
بس بعد صار الي صار
سلمت على امي
ما ردت
كتلها خيرج يمة
وجان تنفجر بوجهي وتبجي
كتلها يمة وعيونج مضطر
كالت عساها تموت هم متوديها
كتلها يمة مو احنه اتفاقنا سنه او تجيب ولد وتروح
اذا ماتت شلون
كالت اني اريدها تموت
اصلا حتى لو رجعت موتها على ايدي
ضلت تصيح وتعيط
تكول جيبها هسه هنا
اريد ابرد كلبي بيها
اريد اموتها
اريد اطلع بروحها مثل
ما ابن عمها طلع بروح اخوك
كتلها انتي كلتي ابن عمها مو هيه
وجان تكب بوجهي وتعيط وتبجي
تالي جدي صاح راحت هناء عليه
كاللها كوليلهم خلي يجون
رحت كايد امي وكعدتها عالتخم
وحجة جدي
كللها عوفي يروح مهما يكون تبقى مرته وصارت على ذمتة
ميصير تبقى وحدها بالمستشفى
رادت تحجي سكتها
وكال يله كوم وليدي
ومن الصبح انتو هنا
كمت وبست راسها وكتلها وروح أبوي ما تعنيلي شي
انتي الأصل والأهم
بس حالتها اضطرت
وديتها
خلي تجي وشوفي شراح اسوي بيها
ما حجت هزت راسها بس
لان جدي كاعد
متكدر تحجي
خليت اترخصت
وصعدت بلدت ملابس
وطلعت للمستشفى
