رواية زوجي يعشق اخري الفصل السابع عشر بقلم ساره الخفاجي
part17
مااعرف شون اجتي نبراس على بالي هية صديقتي تعرفت عليهة مرة من جنت بالكلية جانت تسولف عن اخوهة شغلتة وية الاستخبارات المدني محد يعرف بي .
خابرت نور صديقتي هم بالكلية بقيت على. تواصل وياهة بس موكلش صداقة قوية مثل فاتن يعني سلام وسؤال بس متواصلين مگطعت البنية ابد دائما تسال عليه خابرتهة وسالتهة عن نبراس بس للاسف ملگيت رقمهة يم نور بس گلتلي اصبرلهة كم يوم وهية ادبرة الي.
خابرت عادل وگتله ماراح اداوم هالكم يوم لحد ميهدء الوضع أو ينكمش الي يهدد مكتلة احمد ولاجبتلة طاري .
ورة اسبوع خابرتني نور وعدهة رقم نبراس .
الحلو بنور موفضولية مظلت تسأل ليش وشتردين منهة بس كلتلي شذكرج بيهة وكتلهة والله ماادري صارلهة يومين على بالي وحبيت اسال عليهة ،،طبعا مبين داجذب صار كم سنة شذكرني بالبنية هسة بس هية ملحت .
اخذت الرقم ودزيت مسج بالاول ...
مرحبا نبراس اني سمر الي جنت وياج بالكلية مااعرف اذا تذكريني اولا بس اريد منج خدمة اذا مصير زحمة والشغلة مسألة حياة أو موت اتمنى تجاوبني ظروري.
ورة دقايق دك التلفون وجانت نبراس حجيتلهة عالوضع كله من خاني احمد وطلكت لحد تهديدة الي .
_لتخافين يمي بس اريد العنوان .
_نبراس مااريدة ينسجن والسالفة تكبر متصغر .
_لايولي ماينسجن بس يكتلو كتلة زينة يربوا بيهة عبالة بنات الناس لعبة .
_لتأذو فدوة مهما يكون جان زوجي .
_لتخافين طلعي منهة وتجيج الاخبار .
ظليت اكل بروحي ياربي شسويت بدل ماكحلهة عميتهة خاف يصير بي شي وتوكع براسي خاف يموت خاف وخاف ظليت الليل كلة الوب مااكدر انام حسبة تجيبني وحسبة توديني ماكدرت انام مصدكت يطلع وجه الصبح حتى اخابر نبراس وافتهم منهة شصار ...
صارت الساعة بالستة بعد وكت شون اخابر ،الميل احسة ميقبل يمشي الساعه بسنة غير اصير 8 وقت زين اخابر بي ،لاخاف عيب والبنية نايمة شون يربي صارت 7 دك التلفون نبراس.
-الوو ،هلو نبراس بشريني. شصار.
-صباح الخير ،يولي شبيج دسلمي اول.
-لج والله منايمة الليل كلة قلق وخوف.
-متكليلي شبيج موكتلج لتخافين بس جرولة بوش خوفوا وبس وكالولة اذا تتعرض السمر ميصير خير .
-وسكت كلشي محجة.
-شيحجي بابا الروح عزيزة وشاف ذولة همة ومسدساتهم الصم.
-وين الله وصدك اخلص منه.
-تخلصين تخلصين .
-ان شاء الله ،مشكورة حبي تعبتج وياية .
-ولو تدللين سمورة اريد اشوفج والله مشتاقتلج وعندي موضوع وياج.
-اي موتدللين شوكت ميعجبج نلتقي .
-خوش باجر اذا ماعندج شي.
-اي باجر اوك ،عود گليلي وين .
-خوش ،مع السلامة روحي نامي ارتاحي .
-ههه اي والله تعبت ،باي .
سديت التلفون وأحس روحي ارتاحيت همزين ماخذة اجازة جان طاح حظي بوجهي كبل للفراش والنومه نومة لليل .
كعدت اكلت وتفرجت شوية تلفزيون گلبت بالفيس وطلعت ماكو شي ملل بملل فتحت السيم كارت القديم خاف اكو شي ،والحمد لله كلشي ماكو اطمئنيت ورة شوية خابر عادل ...
-شونج.
-زينة الحمدلله .
-اشتاقيتلج.
-سكتت.
-شبيج شو سكتي.
-شتريد اكول.
-ها ولاشي سلامتج,ماضجتي من البيت.
-اي والله مليت بس شسوي.
-اني بعدني دابحث عن أمن ،مااريد شون مجان اريد شركة زينة وموثوقة.
-ها عادل نسيت اكلك ميحتاج حليت الموضوع.
-شون حليتي ،ليش عرفتي منو .
-اي عرفت.
-ليش مكتيلي لعد.
-مشفت اكو داعي.
-صدك تحجين سمر ،قبل يومين گلتي موافقة ،وهسة تكليلي ماكو داعي اكلك.
-شتريد عادل احنة بعدنة عالبر ومشكلة جبيرة تريد ادخلك بيهة ،واذا صار شي أظل الوم بنفسي.
-واذا صار بيج شي ،اني شاكول.
-لتكول شي الصوج مني.
-منوبلة هالتافه.
-احمد.
-يااحمد ،طليقج.
-اي.
-ليش شيريد منج هوة موعافج بمزاجة.
-وهسة تندم ويريد يرجعني.
-لا والشغلة على مزاجة الاستاذ.
-الظاهر هيج.
-شون حليتيهة شكتيلة.
-عادل تعبانة ومنايمة ،من اداوم احجيلك .
-اوك براحتج ،المهم ديري بالج على نفسج ومرة ثانية اذكري اكو رجال يسندج حتى لو مجان بينكم شي هالرجال حيظل يسندج ويدافع عنج.
-تسلملي ،الله لايحرمني من صديق مثلك.
-وحبيب ،امين ههههه.
-امين ههههه،تصبح على خير.
-وانتي من اهل الخير.
سديت التلفون وگعدت افكر بحجية ليش هيج اني دااصرف وياه الولد شاريني وحابني ومشفت منه غير كل خير تردين تعيشين وحيدة بهالعالم القاسي من توكعين منو يسندج ويگومج من تتمرضين منو يداريج من تختنكين منو يسمعج لازم تكملين وعادل بي كل صفات الي تحلم بيهة اي مرة وفوك كل هذا يحبني ....
صح وافقت بعدم قناعة بس حتى اخلص من ضغط احمد ،بس متأكدة هالشي حيتغير بالمستقبل ...
صارت الساعة 2بليل گمت للفراش وعيني مقفلة وجفي على وجهي نمت باجر وراية طلعة وية نبراس....
