رواية ارهنت عمري الفصل الثامن عشر بقلم نورا ناصر
حاتم ضحك باستهزاء هه امشي امشي هذا اذا بقى زوجج بعد الفضيحة هااااي ..
وباوع لعياش وضحكوا اثنينهم ..
حازم ظل يباوعلهم عاكد حاجبه
وباوعلي يحجي عندج شي تاخذينه من البيت ؟ اذا عندج يله امشي جيبي وخلي نروح الساعة راح تصير بالوحدة وابوي كاعد على نار يتانيج هناك
كال عياش خل تلبس عبايتها خو ما تروح هيج واحنه راح نروح ع الشارع مو ع البستان
باوعت على سيف متمدد ع الكاع
درت وجهي ونطيتهم ظهر وطبيت وانطلقت دموعي
بجيت بحركة وانه اتذكر نظرات عياش الاستفزازية وكلماته الي ماتخلوا من الشماته
اخذت تليفوني ولبست عبايتي واخذت مفتاح البيت وطلعت وياهم ، شفت حازم يتانيني وعياش وحاتم خلوا سيف بالسيارة
وسيف بدوره خلى راسه ع الجامة ومايدري بروحه
اشرلي حازم تبعته كعدنا بالورا انه صرت بصف سيف
وحازم بصفي ظليت اباوعله وابجي ليش سويت بينا هيج هسه شون راح نواجه ابوي وشراح نكله
احاجي بگلبي....
ساق السيارة حاتم وبصفه كاعد عياش وتتعالى صوت ضحكاتهم المستفزة وانه وحازم ساكتين ولا كلمة بس صوت انفاسنا ، وانه مزعوجة كلش منهم احنا بيا حال وهذول هيج يضحكون لو فرحانيين مدري على شنوو!!!!
كال حاتم هذا شون ليلة عرس كشرة عليه مدري بوجهمن مصبح
دار عليه عياش كاله شايف وجهه بالمراية اكيد وجه الفكر وجه البومة شون تريده يطلع عرسه
وباوع بالمراية عود يباوعلي وكال مو هيج ميسم
صكيت على اسناني حييل هميت روحي اريد اجاوبه
لزمني حازم وماخلاني احجي
كال بلله اسكت هسه مو وكتها وباوع ع الطريق لاسوي حادث
كال عياش ها جنك ماراضي على نسيبك مو حازم ؟
كال حاتم فرحان فرحان بنسيبه يسكر وعود زلمة ويرمي وكذا
وطكوها ضحكة ..
وصلنه للبيت طفر عياش فتح الباب
ونزل حازم ودار مناك جاي ينزل سيف ويه حاتم
وعياش ظل ساد عليه الطريق وماد ايده يريد ينزلني من السيارة لان عاليه
وخرت ايده بيدي وطفرت من السيارة
وجلبت عبايتي جريتها جرر بسرعة
وهو بعده واكف وخرت منه وانه جاي اروح طخيت بكتفه بدون مادري ..
ورحت يم اخواني
دخلوا سيف وعياش راح لبيتهم مادخل لبيتنا
بس دخلت شفت الكل بالكراج يتانون جيتنه
ابوي وعمي ابو اسعد والحجية وعمتي ام اسعد
واخوان سيف رأفت وطيف وبيناتهم نقاش حاد
من باوعوا وشافوني اجه ابوي باتجاهي
خلى ايده على راسي ها بويه خو ماصارلج شي
هزيت راسي بنفي
كال شنو الي صار ؟؟
كتله مادري جنت نايمة
خذتني الحجية يمها وعمتي وظلوا يسألون بيه
وسيف خلوا راسه بالمغسلة وظلوا يصبون على راسه ماي بارد وابوي ظل يحجي ويا عمي
هيه هلي تربيتك ابو اسعد ليش ماكتلي الولد يشرب من البداية جان مانطيته بتي
ابو اسعد وداعتك ابوحاتم مادري بي يشرب وهو ولا مرة اجه للبيت شارب
ام اسعد منيله شرب بهالليل منو وداله خو ماجايبه ويا من بغداد هو غراضه بيدي خليتها بالبيت وسفطتها وهو هنا مايندل حتى يروح يشتري
حاتم خاف موصي احد وجايبله
ام اسعد هسه هو غير يصحى حتى نسأله ويكول النا
وخروا من المغسلة وهو نزل جوة كعد ع الصبة والماي ينزل من راسه وشعره نازل على كصته وعيونه
ظلوا يسألون بي صاح بيهم بثمالة خلوووني اااناااام اووولي انااااام وباجر شتردوون اني حاضر وركبتي سدادة حتى لو ركبتي تردوها هم اخذوها بسسسس فكوووني ....
انوب ظل يدور منا ومنا المسدس وووين وينه المسدس ولكم هذا شرفي وعرضي وين وديتوا اريد اصيد بي طيوور شووفوو ااا الطيور جاي تطيييرر واني مالزمهمن
يحرك ايديه بالهوا عود يريد يكمش الطيور ويحجي بثماله ومنتهي كلش
ابوي صاح طلعوا من بيتي هالسكير وودووو للبيت الي ع الشط وميسم تظل هنا وباجر عندي حساب ويا
ام اسعد راحت لابوي تتوسل بي خويه ابو حاتم اعذره والله هو مو هيج بس تعارك ويانا وضوجناه كبل لانجي وهو عريس راد يفرح بين جماعته ابغداد محد خلاه حتى الحنة محد خلاه يسويها هناك الله يسلمه ابوه واخوانه وهو ضاج اعذره هالمرة فدوة اروحلك
كال اخذوووه هسه رجعوا بس ميسم تبقى هنا وباجر الله كريم ......
دخلت للبيت وانا بأقصى حالات اليأس والانهيار
تلكتني وردة حضنتها خليت راسي على كتفها وابجي
خذتني لغرفتي بسرعة
والتموا عليه
اريد ابقى وحدي
اجت يمي ام فخري كالت ها ولج خذاج لا احجي
وكفت وانه امسح دموعي كلتلهم اريد اروح للحمام من رخصتكم ، طلعت من الغرفة وركضت طبيت بالحمام
كعدت ابجي بحركة المفروض هاي ليلة زواجي هيج يصير بيه ليش يربي ....
سيف .. اخيرا حسيت بالندم شلون ورطت ميسم وياي واني ما احبها ، حاولت بس اكرهه بيه مكدرت
الظاهر هيه متريد تنفصل واكيد بسبب الشماتة
او سبب ثاني اجهله
قبل العرس تعاركت ويا اهلي بس ردت العرس يصير ببغداد ماقبلوا
صيحت بوجههم اوكي مثل متريدون بس اتي ماراح اتزوج ولا راح اروح وياكم
جان الكل ضدي امي ، ابويه واخوتي
ظليت اسمع عبارات نتبرى منك اطلع من البيت ماعلينه بيك راح تفشلنه ويا عمامك محد جبرك انت وافقت ع البنية
كل هذا الكلام ترس اذني
وفوك كل هذا شهد ماكو ومابينت ..
صعدت لغرفتي نمت والصبح كعدت مستسلم
والحياة عندي بدون معنى
قررت اخلص اروح اتزوج بس روحي بخشمي جانت
وكاره كل شي
ليلة العرس من زفونا للبيت جان مالي نفس بشي واعصابي ناررر وشراررر
نزعت سترتي ورخيت الربطة
ورحت للهول كعدت ادخن
اندكت الباب رحت فتحتها
شفته واحد من ولد عمي جايب العشى
طببته خلى العشة بالكاع وشافني ضايج
كعد يسولف يمي
كتله شويه مشاكل ويا اهلي
كال انت تشرب
_ مو هواي بس وكت ضوجتي
_ عروستك وينها ؟
_ مالها صوت اعتقد نامت
_هسه اجيك موتنام
_ لا انتظرك ..
راح واني رحت للغرفة شفت ميسم نايمة ع الجرباية
اجه ابن عمي حسن ودخل جوا وسوالي نركيله وجايب وياه بطل واني ماصدكت اريد انسى همومي احس راسي راح يطك
شربت هواي وبعدها ماحسيت بنفسي ..
****
تمارا .. طلعت من السجن امشي ورا عمي واخوي والمحامي ميتة خوف من مصيري
خايفة شراح يسوون بيه خاف طلعوني من السجن يكتلوني ويخلصون مني
بس امشي وراهم وساكتة وهم يسولفون
وكلساع يلتفتلي اخوي يشوفني ويرجع يدور وجهه
سلموا ع المحامي وراح
وانه تبعتهم للسيارة
فتحلي الباب اخوي وصعدت ورا وهو كعد بصف عمي
بالصدر ...
محد يحجي وياي محد معترف بيه يحجون بيناتهم ومتجاهليني ، وجهت نظري للجامة وسرحت بافكاري
وهسه شلون!!! شلون راح اواجه اهلي اخواني
خواتي الي تلوثت سمعتهن بسببي وبدون وجه حق
وانه بنظر الكل عار ولازم اندفن ..
تعدينه ع الفرع الي بي بيتنا
طلعت راسي من الجامة اباوع بحيرة ولهفة
اريد اشوف بيتي الي جنت كاعدة بي انه ونبيل وابني امير ..
وصلنه لحد يمه وشفت بابه انفتحت وطلعت منه بنت حماي طفلة عمرها تسعة
انصدمت شتسوي هاي ابيتي ؟ وشجابهه ؟
جا نبيل وينه هسه ؟؟ ابني وين ؟
محد يكلي وينهم اريدهم
بجيت بحركة والسيارة تبتعد عن البيت وطلعت من الفرع ...
وصلنا للبيت وانه مثل جسد بلا روح ماكو حتى اسم اللهفة لشوفة امي وخواتي واخواني يحضنون بيه وانه ولا يمهم ...
شفت ابوي ممدد جنه مريض
بسببي اكيد
كعدت يمه وابجي بحركة
شبيدي عليك بويه
كعد عمي يمي هيج احسن جبتيلنا الفضيحة ولج سنة كاملة يلحكج هو ويمشي وراج ماعرفتي تكولين تحجين صخام وجهج
ابوي ظل يرجف اخوي كوكني من ايدي
وكال لعمي مو وكته عمي هسه
دخلت بغرفة خواتي اجت امي جابتلي اكل
تغطيت بعباتي ودرت وجهي ع الحايط
تمددت ونمت ...........
مرت الايام وانه ماعرف عن ابني شي ولا عن نبيل
سألت اخواني
كالوا حماج كاعد ابيتج هو وعائلته
وحتى اللوري مالة نبيل هو لازمه
سألته جا ونبيل وينه وامير وليدي
جاوب نبيل ابيت اهله هو وامير وسالت عنه كالو صحته مو تمام ومو بعقله مثل المخبل صاير
متتت من القهر عليه شكد توسلت بيهم يودوني اله اشوفه ماقبلوا كالو بياعين ترحين وهذول اصلا يشوفونج وحدة خاينة وسويتي مكسورة
ولو ما هذا المجرم اعترف وبرأج وشال التهمة وحدة جان هسه شطلعج
سكتت وبلعت الغصة والقهر بداخلي
اجه بفد يوم عمي كال يلله يردون يطلكونج من نبيل
كمت على حيلي ليش يطلكوني من نبيل انه والله احبه وماخنته وهو يعرف خلوني احجي وياه
شتحجين ولج شتحجين شبيج مخبلة انت شوون وياج باجر حضري روحج نروح للمحكمة يله بدون نقاش
عمو انه ماتطلك من نبيل قابله بي ارجعله حتى لو مخبل اعيش وياه حتى لو ابيت اهله اسكت والله وما احجي حتى لو اكل تبن
مايردووج مايردوج شبيج تنعثلين انتي
رفعت وجهي بوجهه وعيوني كلها دمووع هو نبيل كال هيج ؟؟
هو نبيل وين يدري بروحه اهله اهله اخوته شبيج
جا همَ شعليهم احنا متزوجين مو بكيفهم يطلكونه
اكلج اجانه بلاغ وباجر نروح للمحكمة افتهمتي لو لا
وابني ؟؟
انووب ابنج لا بويه لا خلي عدهم ابوج مريض وحالته حاله واخوج رحيم رجع سافر وطايحين براسي انتوا خلي ابنج يم اهله
لا عمو فدوة اريد ابني انه اربي عفية والله اشتغل واصرف عليه
ايبااه الي يسمعج تحجين يكول عنج مخلصة طب وتشتغلين لو الشغل ضال ولج زلم مالاكيتلها شغل انوب انتي متوسطة ماعندج ؟
عمو اشتغل هنا بالبيت اطبخ وابيع اخيط اي شي خو ما اطلع برا
ومنو يمول مشروعج يابه ؟؟ انه فلس احمر ماعندي انطيج يادوب الي نحصله انه وفيض نصرفه عليكم كعدي وسكتي ولو تطلكتي انه ازوجج لفيض هو يصرف ويستر عليج وشكد ماتريدين خلفي منه
انوب فيض عمو انت صدك تحجي انه ماريد فيض مثل اخوي وانه اكبر منه اريد زوجي انه متزوجة
اسكتي انه شكول اتسوين ولج انت محصلة واحد احسن من فيض ماتكليلي ؟؟ وحدة غيرج كاتلينها وطامين عارها واذا فتحتي حلكج من صدك اكتلج واخلص منج كافي متحمل هوسات عيالج حموينج وعمج يوميه جايين عليه للكراج وهيج هيج من بت اخوك وتعالوا طلكوها ماظل واحد ماعرف بساالفتج حتى كمت اتلثم واروح للكراج ماي وجهي طاح من وراج .....
طلع عمي وخلاني ادك والطم ، يوم ثاني رحنه للمحكمة باوعت شفت نبيل اخووه يكوده باوعلي بنظرة عمييقة بس كغريبة لا اكثر تمنيت افلت من قبضة عمي واروح احضنه واكله مشتاقتلك احجي ويا اسولف ع الظلم والالم الشفته والايام السودة الكضيتها بالسجن
ليش ماتتذكرني نبيل ليش والله احبك عشرة عمر وياك لا سنة ولا سنتين وعندي طفل منك هيج ماتتذكرني ؟
مو يكولون الذكريات تجري ويا الدم ليش ماتتذكرني!!!
هم نسيت امك ابنك لو بس انه حظي نسيتني!!
القاضي ماقبل يطلكنا بعد عدة جلسات لان وضع نبيل جان مو طبيعي ورجعت للبيت وكل مرة ادعي كون صدك مايطلكني منه ....
بس بعدها وبعد سنة تقريبا تحسنت حالته وصارت تصرفاته طبيعية وواعي لكن فاقد للذاكرة عرفته من نظراته مايعرفني وطلكني
وابني ماقبل عمي اخذه شكد حاولت محد وكف وياي حتى اخذه يمي ومحد يقبل اجيبه حتى ما شفته بعد
جمرة فراكه تجويني ماعرف شنو اسوي الووب على شوفته بس مو بيدي مرات افكر اشرد واروح اشوفه بس ماكو فرصة عبالك الحرس داير مادايري
واخاف من فضيحة ثانية وامي تكلي اصبري ان الله مع الصابرين واريد اعرف تالية صبري هذا شنوو!!
هالايام وبعد طلاكي بأشهر عمي يلح يريد يزوجني لفيض
فيض كاعد ويانه بنفس البيت بس مشتمل لوحده
الي عرفته فيض مايريدني وانه كيفت بس عمي متسلط ومسيطر عليه وخاف يسويها صدك ويستسلم فيض ويخلي يتزوجني غصب ساعتها راح افقد الامل نهائيا برجعتي لنبيل وابني راح يبقى بعيد عني ..
وبيوم كعدنه الصبح على صياح عمي وابوي
والي فهمناه انو فيض شرد من البيت
بس سمعت هالخبر فرحت كلش فرحت لان ماريده وبكل صلاة ادعي الله يرجع لنبيل ذاكرته ويرجعني ونرجع سوى عائلة وحدة ....
*****
ميسم .. يوم ثاني صباحية العرس كعدت راسي يطنطن من الوجع عبالك انه سكرانه مو سيف
هلكد مابجيت البارحة ومانمت بس ساعتين ....
اجتني وردة ولج الناس جايين يباركولكم يلله بدلي
فريت ايدي هه على شنو يباركولي يحظي ؟؟ على صخام وجهي ؟؟
شمدريني
اصلا ملابسي هناك بذاك البيت كلهن
اكلج سمعت سيف اجه لعمي الشيخ واعتذر منه
جاي نحجي دخلت عمتي اجت بوستني
وتباركت الي
كالت يلله يمه بدلي
عمه ملابسي كلهن هناك والله ....
وردة كالت انطيج مني ؟
وين كدي ملابسج كلهن كطمات عليه
من رخصتكم اطلع اغسل وطلعت اغسل ، غسلت واريد ارجع .. . ..
حازم صاحني كال ابوي يريدج
رحت لغرفة الحجية شفت ابوي كاعد دخلت كلت صباح الخير ..
اجه باسني على راسي وباوع بوجهي
شلونج اليوم ؟
جاوبته زينة الحمدلله
مامبين عليج زينة يابويه
شسوي بعد هذا حظي
الولد اجه واعتذر واهله ضاغطين عليه وهو ضايج بس انه ماامن عليج عنده
جا شنسوي يابه خو مااطلك منه هسه الناس شتكول عليه وانه هم ماريد اتطلك وانوب عياش ياخذني ماريده
لا ماكلت هيج انه بس اكول اخليج هنانه كبال عيني وهو اذا يريد يروح لبغداد الله ويا بس عمج ماقبل وكال امانتي لاتخاف عليها وحلفلي هو مايشرب دووم بس هذا حسيون الله يسوود وجهه جايبهن وحاطهن كدامه انه اعلمه
وهسه شلون ؟؟ انه ابقى عدكم هنا لو شسوي ؟؟
انت بكيفج بويه الي تأمرين عليه انه حاضر واي شي يصير وياج كليلي
يابه انه ماريد اتطلك والحجي الكلته عن عياش يوم الكعدتني اله بعده ابالي واتذكره زين كتلي الرجال مثل الطفل وسيف انه اعرف شون اتعامل وياه
اي بويه انت ماينخاف عليج
وظل يمسح على راسي
كال انت امانة اخوي وانه صح ماعرف عن سيف شي بس اعرف اخوي واعرف تربيته لا تخافين يبووج وانه بظهرج واخوانج موجودين والي تكولين عليه انه حاضر
بس الطلاك مو حل
الله يحفظك الي يابه ويخلي اخواني وانه هم ماريد اتطلك ..
هذا هو رجعي لرجلج بويه واذا صار شي مايعجبج كليلي والي تأمرين عليه يصير
ابتسمت وبست ايده وهو باس راسي
طلعت من يمه
واريد ارجع لبيت البستان
اخذت عبايتي وطلعت
حسيت بخطوات وراي باوعت واشوف عياش يلحكني سرعت خطواتي..
لحكني وصار كدامي كال وين رايحه ؟ لهذا العاوي نسيتي شسوا البارحة
الي صار البارحة سبب انته منو دز حسن اله وخلاه يشرب ؟
تقرب مني وظل يهمس والله حجيج وعيونج جنج ماتردينه كليلي يبت عمي انه هسه اروحله واخليه يطلك غصبن عليه وماعليج مني مااخذج غصب والله اهم شي انت انه عيوني الج وكلبي الج ...
وخرت منه خطوات كتله لالا خلي عيونك عندك وكلبك يمك انوب اخذهن وانه تره مهمله احتمال تلكه عيونك جوه الدرج وكلبك مشمور يم حاوية الزباله خلي عيونك بوجهك وخلي كلبك بصدرك وكفينه الشر ...احنه بدون كلبك وعيونك ما سالمين....
والله يوم عن يوم لسانج جاي يطول اكثر ميسم ياخوفي تصيرين مثل الي ابالي ؟؟
منو منهم الي ابالك الي طلكتها لو الي كتلتها بليلة ظلمة
تقرب مني همس كتتتلج ماكتلتها لاتصيرين ماصخة كللللش احجي عدل ترا زودتيها انتي منو وتتهميني محكمة ومحققين وقاضي برووني انتي منووو هااا ؟؟
بلعت ريك واتظاهر بالشجاعة واجر النفس كووة
وخر من طريقي ابوي كال رجعي لرجلج وانه راجعه اله
اودعناك
اريد ادور واروح تذكرت شي
ورجعت درت عليه كتله ابو مهند تزوج خويه تزوج لحيتك طالع بيها شيب تزوج لايفوتك القطار
خزرني خويه شنوووو ولج وضحك وهو يتلمس لحيته
خوش منتبهة عليه لا انه اتانيج ميسم مااتزوج حالف ماتزوج غيرج
شنو شبيك انه متزوجة
ضحك باستهزاء هيه هاي هم حاسبتها زواجه وهذا المطي هم حاسبته رجال ؟؟
ما اسمحلك لاتحجي عليه
روحي بويه روحي وظل يفر بيده ويضحك عبالك متأكد من شي اجهله
توجهت للبيت دكيت الباب طلعلي عمي ابو اسعد
صبحت عليه
كال دخلي بنيتي دخلي انه هسه اريد اطلع رجلج جوا بالغرفة ..
طلع عمي وانه دخلت بالهول نزعت العباية وشالي وجاي اعدل بشعري
حسيت احد وراي باوعت شفته سيف واكف يباوعلي
تنهدت ودرت وجهي وحجيت ببرود
جيت اخذلي ملابس لان
اجه كعد يمي وقاطعني اسف على كل الي صار البارحة
جريتها حسرة وشبكت اصابعي اعصر بيهن
باوعت اكو صينية ع الطبلة بيها ماعون اكل وكوب جاي فارغين مبين متريك والصالة نظيفة مو مثل ماخليتها البارحة جانت مهووسة
كتله منو جاب الك اكل ؟؟
كال حاتم اخووج
صرت اخاف عياش يسويله شي يخليله بالاكل شي اريد احذره حتى من حاتم بس شفتها ماترهم
تذكرت الي صار البارحة غمضت عيوني حسيت الم براسي درت وجهي عليه باوعتله بنظرات عميقة وذات معنى
سألته منوووو شهووودة ؟؟؟؟
