رواية ارهنت عمري الفصل التاسع عشر 19 بقلم نورا ناصر

تعاليلي!!

بعلاة الصوت صيحيلي

اجيچ أركض ركض فلاح!! 

شبت نار

يم گاعـه

أصفن بيج

صفنة موت 

وانطرلچ وأعوف النوم

شايل خلگ فزاعهة

عكد حواجبه وتكلم بتوتر شمعنى شهودة يعني ليش مو شهد شهالميانة اكولج انت احمم تقصدين ارملة اخوية موو ؟؟ تعرفيها عندج علاقة بيها ؟ 

اباوعله ورافعه حاجبي ضايجة منه حييل جاوبته لا شفتها مرة وحدة بس انت ليش البارحة تصيحني باسمها البارحة لم جنت ااحم سكران!!! 

التفت عليه متفاجأ : اني صحتج بأسمها ؟ 

خليت رجل على رجل وارتكيت على التخم 

كتله قابل اجذب ؟؟ انت هيج جنت تصيحني وكلتلي شهودة .... 

خله ايده على كصته  وتحسر كال لا جانت عندي حبيبة من جنت مرحلة ثانية كلية واسمها شهد ..

فرقت بين رجليه وخليت ايديه على ركبي اباوعله باهتمام : وبعدك تحبها ؟؟ 

كام يمشي ومبين على هيئته متوتر 

كال لا يا احبها شبيج انت صار كم سنة من تركنا بعض ..

ماجاي ارتاحله يحجي ومايخلي عينه بعيني 

جا ليش كتلي باسمها البارحة!!

التفتلي رفع حاجبه كال العقل الباطن 

كمت على حيلي بدون ماجاوبه ومامقتنعة بكلامه وتصرفاته احس روحي بورطة جبيرة 

بس مشاعري تجاهه هيه هيه ماجاي تتغير 

وصلت لبداية الممر الي يودي للغرفة 

سمعت صوته اجاني كال وين رايحة 

التفتت عليه رايحة ابدل ملابسي وارجع لبيتنا اكو خطار اروح اسلم عليهم .. 

اوكي يلله بدلي حتى نروح سوى ..

هزيت راسي ، توجهت للغرفة ، بدلت ملابسي ولا جاي اعتبر نفسي عروس ابد 

تحسرت دمعت عيوني وانه اتذكر امي 

وي كل شي جاي يصير وياي اتمناهه يمي 

وافكر واكول شنو راح يصير ردة  فعلها على كل هذا 

بدلت وطلعت من الغرفة شفته ينتظرني 

ظل يباوع عليه 

تجاهلت نظراته ورحت اخذت الصينية ووديتها للمطبخ 

وغسلتها 

اجه وراي يراقب تحركاتي بلعت ريك وتجاهلت نظراته 

ماريد ابين اله انه ميتة عليه وعاشكته

والي سواه البارحة كلش مو قليل واهانة الي 

غسلت المواعين وخليتهن بالسلة ع السنك يطيح مايهن 

شافني خلصت راح للهول كعد 

نشفت ايديه 

كال شنسوي هسه رايحين بعده وقت خلي قبل الغدى بشويه نروح 

كتله لا عيب منهم اذا تريد تظل ظل انت انه اروح 

خزرني وعيت على نفسي شنو كلت بلعت ريك وبقيت واكفة ساكتة وهو بعد نظره عني يباوع ع الكاع ولازم لحيته يحرك كف ايده عليها 

طالت فترة الصمت سألته ها تروح هسه لو لا ؟؟ 

كام على حيله جر تليفونه وعدل ملابسه بوكفته 

تحضرنا حتى نطلع ..

طلعنا من البيت يريد يروح صوب الشارع 

وانه اريد ادور من البستان 

تبعني ومشينه شفنه الارض مبللة كلها ماي 

جانوا جاي يسقون الزرع والماي يمشي 

كلساع نغير وجهتنا نمشي بالارض الناشفة 

ونترك الارض المبللة والمطينة 

وريحة الارض المبللة تجنن وهيه تدخل بانفاسي واستنشقها وذاك معصب يمشي ويأفأف .. 

باوعلي كال شنو هاي شلون راح نمشي بهالزلك ؟؟ 

كتله انه اروح صوب البستان لان مالابسه عبايه ماكدر اطلع ع الشارع 

كال واله تلبسين عباية يعني هو منو بالشارع ؟ 

_ كل شي يصير خاف احد يتعدى الستر حلو 

_ الستر حلو ؟ لعد شبيج هسه مامستورة ؟ اله عباه وانت شطالع منج هسه ووين جسمج اصلا ؟ 

_ هسه ليش نختلف روح انت من الشارع وانه رايحة من البستان 

خزرني درت ظهري بسرعة ومشيت كم خطوة 

صاح عليه تعاااي ميسم 

درت عليه نعم 

روحي للبيت جيبي عبايتج يله 

كالها وكوة كاتم عصبيته 

كتله ها مو البارحة بالليل من اخذونا منا وانت سكران لبستها وطلعت بيها واليوم جيت ع البستان مالبستها 

كال وشنو عود جاي تذكريني البارحة جنت سكران ترا مو يمج مو كلساع تجيبين هالسالفة 

يمته جبت سيرة هالسالفة بس هسه 

لا مو مساع هم ذكرتيها شنو نسيتي ؟؟ 

_ لا بس جنت اسألك عن شهد 

كال امشي يلله امشي ... عبالك انرعص من جبت سيرة شهد !! 

مشينه مسافة .. سمعته عاط التفتت اله حذاءه مطين يباوعلي ويخزر 

رحت يمه حجيت ببرود شبيك ؟ 

دشوفي شلون تطينت لج اله نجي منا ؟؟ ماطلع عرس عليه هذا طللع زقووم ماشايف عرس يصير ابيت العروسة مو ابيت العريس... 

هسه شصار هو طين ينغسل بس نرجع نغسله وبعدين هذا بيت عمامك وهذا بيت جدك وابوك ربى بي واله حصة بي مو بيتي وعمامي هم تبرعوا يسوون للعرس لان فرحانيين بينا ويردون يلمون الشمل

رفع راسه مخنزر سكتي سكتي احجي وياج كلمة ترديهه بعشرة سكتي وكرمينا بسكوتج .. 

لا والله مو عشرة اصلا اكثر من عشرة 

انت شنو مصرة تستفزيني دروووحي 

خلاني وراح ظليت اضحك زين يصير وياه خلي يعرف انه مو قليلة شر والله لطلع ليلة البارحة والسواه بيه من عيونه 

امشي واحجي بكلبي بس والله احبه وجاي ادوس على كلبي باوعت وراي شفته ابتعد مسافة واختفى بين الزرع والاشجار ..

سمعت صوت يكلي ها راح النازوكي يمكن راح يبدل هدومه مامتعود عذري مامتعود 

بلعت ريك هذا عياش ؛- شنو انت ؟ اطب الكاك اطلع الكاك ادري انت شنو بشر لو جني ؟ 

اجه باتجاهي ؛- وين طبيتي ولكيتيني ؟؟ اصلا انه بيت ابوج ماادخله 

_ هسه خلينه من بيت ابوي وليلة عرسي بس طلعت لكيتك بوجهي فيييت

_ جا غير خفت عليج من المايع من سمعت صوت الطلقات 

_ والله انت لو تخاف عليه ماتنطي شرب ومسدس 

_ منو كال انه انطيته مسدس ترا المسدس لو مالته لو حسن ناسي يمه 

_ جا هو منو دزاله حسن غيرك انت ؟؟ 

تقرب مني كال ولج طلعتي ذيبة بت عمي شبعتي تكفخ بالحجي من البيت لهنانه تعجبيني

_ انت شنو مراقبني ترة مايصير هيج اووو يمته اروح لبغداد وارتاح ..

_ مراقبج شنو انه جنت هنانه بالبستان وسمعت حجيكم 

_ وشنو تسوي بالبستان بهالوكت بلله ؟؟ 

_ جاي اراقب الماي لا تغرك الارض ولاتنسين ترا انتي عبرتي كاعكم وهسه صرتي بالكاع مالتنه

_ انت تراقب جا وين الفلاح راح 

_ ماطالع اليوم وانه بمكانه

   _ هو غير حظي ، حجيت هاي الجملة بصوت مسموع وكملت بقلبي عياش يراقب الزرع اول تالي !! .............. 

ومشيت عنه واحس خطواته وراي 

تجاهلته ورحت لبيت ابوي ومناك بدلنه كلنا ورحنا لبيت عمي مسوين النا عزيمة 

شفت سيف هناك وجهه متجهم ومعصب

اجه يمي لزمني من معصم ايدي 

كال نخلص غدا ونرجع للبيت زين ؟ 

باوعت بعيونه بعتب  وانه اسحب ايدي منه 

دنكت راسي وهزيته وهمست صار .. 

بعد الغدى رجعنه للبيت وصلنا حازم بالسيارة وراح 

دخلنه للبيت سيف راح كعد ع القنفة بالصالة 

وانه جاي انزع العباية والشال وهو نظراته عليه

وانه اباوعله وابعد نظراتي منه اتظاهر بعدم الاهتمام بي .. 

اجاني صوته بعدج زعلانه من الي صار البارحة؟ 

باوعتله جان مبتسم 

رحت كعدت كباله كتله انه بلله انسى بس ما انسى ضحكات الشماته 

منو متشمت بيج وليش تهتمين ؟ 

غصب عني لازم اهتم 

انت ماشفت شي جنت سكران بليلتها 

اوووو هم كالت سكران بابا انسي شبيج لاظلين كلساع تعيدين هالكلمة 

مدام زاعجتك ليش شربت  ليش سويت بيه هيج وبليلة عرسي 

كافي بلله ميسم ترا تعبان ومالي خلك وياريت نرجع لبغداد بأسرع وقت مليت من الكعدة هنا 

كمت بدون ما اجاوبه كلبي مليان منه رجعني صوته 

تعالي ميسم من احجي وياج جاوبي 

التفتت : اذا اجاوب جوابي مايعجبك 

: يعني ماتكدرين اله تستفزيني ؟ 

: انت لو جنت بليلتها صاحي جان عذرتني انه اموت ولا هذا يتشمت بيه 

: منو تقصدين هذا عياش مو ؟ وانت ليش مهتمة اله هاا مو صار ماضي وانتوا اصلا ماجان بيناتكم شي 

: انه مامهتمة بس اريد اثبت اله انت احسن منه وانه ماغلطانه لمن وافقت عليك هو تحداني وكالي ترا ترجعين ندمانة 

: وهسه شسوي بلله الي صار صار 

كام من مكانه واجه يمي اخذ خصلة من شعري وصار يتحسسها بأيده وكمل كلامه : منا وجاي اوعدج راح ابذل جهدي ما اضوجج تمام هيج ؟ 

ابتسمت بس مامقتنعة ، ومالي ثقة بي ، الي صار بليلة العرس خربط كلشي عليه .. بس اكول عسى ولعل ينصلح ماكو غير امشي حياتي شون ماجان .. 

بالغرفة ع السرير جانت المشاعر متضاربة بداخلي 

خوف وخجل وشي بداخلي يرفض

ماعرف ليش مامتحمله وجوده يمي 

عبالك مو هذا سيف الي تمنيت انجمع ويا واصير عروسته 

وهو هم ماعرف شبي رغم جان متحمس بس ماكدر 

يوصلني!!! نطيته ظهري ولبست وتغطيت بالغطى لحد راسي كله وماطالع مني شي... 

وهو كام واسمع صوت يتأفأف ويتحسر وريحة الجكاير بالغرفة ترست انفاسي غفيت ومادريت عن شي بعد للمغرب.... 

كعدت شفته ضايج كلش ماحاجيته ورحت سبحت 

وطلعت جاي انشف شعري يم المراية 

اجه كال حضري نفسج باجر الصبح نطلع لبغداد ..

باوعتله كتله واهلك كتلهم 

حجه بنبرة عصبية : شعليج انت بيهم حضري نفسج ومثل ما اكلج سوي .. 

خلص كلامه ودار وجهه عني هزيت راسي بأسف على عصبيته وتصرفاته مدري شبي 

وكملت تمشيط شعري 

اتصلوا بينا ورحنا تعشينا معزومين يم عمي ورجعنا للبيت بالليل هم حاول يتقربلي وماكدر وزادت عصبيته 

عفته ونمت وبراسي الف فكرة .. 

معقولة خلوله شي بالاكل او بالجاي !! والله ما استبعدها ابد بس انه مامهتمة هو الكاتل نفسه راح يتخبل ..

الفجر كعدت حسيته يلعب بشعري كمت مخروعة 

لزمني من خصري وايده على وجهي يهديني يباوع بوجهي ويحجي وياي 

شبيج شبيج على كيفج؟ 

خليت ايدي على كصتي وبلعت ريك 

جاوبته منعسة ماكو شي بس اخترعت مامتعودة هيج احد يكعدني 

تركني بهدوء كال اني ماكعدتج دا العب بشعرج بس 

ظليت اعدل بشرعي بتوتر امرر ايدي عليه واخلي خصلات ورا اذني وماخلي عيني بعينه واجر باطراف ملابسي ..

هو ظل يلزم شعري كال هم زين ماصبغتي توقعت اشوفج هسه صابغته بلون العمبى 

باوعت عليه مبتسمة وكلبي يدك حييل 

شفته مبتسم ويباوعلي 

كال بعد ماجر حسرة اني مدري شبيه بس اروح لبغداد اعرض نفسي على دكتور 

همست ان شاءالله 

يلله كومي سخنت الجاي وسويت بيض  خلي نتريك اخوتي خابروا كالوا بعد ساعة نطلع 

يله كايمة .. اريد اكوم لزمني من خصري سحبني اله 

تعلكت بركبته اباوع بعيونه باسني بخدي ونزلني من السرير بسرعة ..

نزلت اعدل بملابسي وامشي منثووولة طاكني الثول مدري شجاني مشاعري مخربطة 

رحت غسلت وصليت وتريكنا 

ورحت اجمع ملابسي اجه يمي ساعدني اجمعهم وارتبهم بالجنطة اباوعله مبتسمة وهو يغمزلي ويضحك ..

خلصنه كال يله نطلع بسيارة طيف اخويه 

كتله اروح اسلم على اهلي اودعهم 

_ ليش ماسلمتي عليهم البارحة 

_ مادري نطلع اليوم انت البارحة يلله كلتلي .. 

_ يله يله بالعجل بس خو مترحين ع البستان؟ 

_ ههه لا هسه شويه ظلمه اروح ع الشارع .. 

خلصت وطلعنا الجنط ورحنا لبيت اهلي مسافة ٥ دقايق دخلت للبيت هم يكعدون من وكت للصلاة

سلمت على ابوي وحضنته باسني براسي وظل يوصي سيف عليه 

كاله بعيوني 

رحت سلمت ع الحجية وام فخري كالت مثل ما كتلج جسي النبض باوعتلها مستغربة شنو بيبي ماافتهمت ؟ 

كالت ابو عمتج شوفي الي 

_ شنو راح تخطبينه 

_ انت شوفي الي اذا يفيد انه اتصرف خابريني عود وكليلي خووش ؟ 

ضحكت هزيت راسي ورحت لغرفة وردة وحازم 

دكيت الباب عليهم مبين نايمين .. 

دكيته مرة ثانية ، طلع حازم كتله الله وياك راح اروح

حجيتها والعبرة خانكتني مو سهلة اترك المكان الي انولدت بي و تربيت بي من انه صغيرة واترك احبابي واهلي كلهم 

هو ماجاوبني بس اخذني لحضنه وباس راسي حيل شهكت من البجي على حسي طلعت وردة 

وخرت من حضنه ورحت الها 

ولج راح اشتاقلج حضنتها حيييل وبوستها 

ديري بالج على نفسج 

هزت راسها وعيونها مدمعه همست سامحيني!!! 

باوعت بوجهها باستغراب ليش تكولين هيج ؟ 

ارتبكت وبلعت ريك بصوت مسموع كالت لان تعبانة والنساوة مأذيتني وماساعدتج هواي بعرسج ماوكفتلج ولارحت وياج للصالون 

رجعت حضنتها لا عمري ماقصرتي والله اصلا انه اخاف عليج وماردت اتعبج لو اريد اخذج غصب عنج 

وضحكت وهيه كوة ابتسمت ورجعت حضنتني وتبوس بيه 

كتلهم يلله رجعوا ناموا كعدتكم من النوم بس شسوي ماكدر اروح بدون ما اشوفكم 

كالوا لا نجي نودعج بالباب ، تبعوني للباب بوست الحجية وكتلها سلميني على خواتي وعلى حاتم 

وان شاءالله الله يهديله مرته وترجعله 

كالت لا وين مصرة ع الطلاك والاسبوت الجاي عدهم محكمة خلي يطلكها شلعت كلبنا صار جم شهر مابقى واحد ماوديناه اله حتى يردها مايفيد ماتقبل ترجع وانه من رحت حتى ماطلعت وشافتني وسمعت مني ماعدها احترام وهو تعب كلش خلي يطلكها وانه اخطب اله احسن منها ذلته ومرضته .

_ الله كريم يمه ..

_ ديري بالج على نفسج ميسم وعلى زوجج الله يسعدج ويهنيج 

_ امين يمه مع السلامة 

..... طلعنا برا صعدنا بسيارة رأفت عمي بالصدر وانه وعمتي وسيف وسارة ورا ورأفت هو وعائلته وحدهم بسيارة ووياهم خالة سيف ام مرة رأفت .. 

وتوجهنا لبغداد .. 

وصلنا تعبانين اخذني سيف صعدنا لغرفتنا وعمتي ورانا تبجي كالت والله تمنيت اهلهل بس ماكدر كلبي مو مال فرح بعد من بعد المرحوم حتى ماكدر افرح .

راح عليها سيف حضنها وباسها براسها كاللها الله يخليج النه وجودج كافي يوم

بوسته واجت بوستني كالت وهيه تمسح دموعها 

يلله اخذوا راحتكم ارتاحوا وانه هم نازلة .. 

طلعت وسدت الباب وانه ظليت اباوع ع الغرفة 

الاخشاب سودة مطعمة بذهبي والبردة والفراش تدرجات اللون البنفسجي الطوخ وذهبي 

احس كلها فخامة بقيت منبهرة احب هيج الوان .

اجاني صوته كال ها عجبتج 

ابتسمت وهمست اي حلوة شمعنى سودة ؟ 

_ كال بلون شعرج 

ابتسمت 

مو يقشمروج وتصبغيه اصفر تطلعين جنج ببغاء .. 

هزيت راسي لا لا ما احب هاي الالوان ...

جوعانه تاكلين شي ؟ 

لا والله تعبانة كلش واحس معدتي توجعني مااتحمل اكل هسه

روحي بدلي وغسلي وتعالي ننام .. 

تمام هسه رايحة بس وين اغسل ؟ 

بس تطلعين من الغرفة على ايدج اليمين اكو حمام اخذي راحتج بي هذا بس النا 

خوش  رايحة .. طلعت غسلت ورجعت ماشفته 

كبل رحت ع السرير  وخرت الفرشة وتمددت 

اريد عيوني تغفى اريد انام بس تعبانة كلش حتى ماجاي اكدر اغفى 

طلعت تليفوني وخابرت ابوي طمنته علينه لان اتصل كذا مرة بالطريق خطية باله يمنه 

ورا مخلصت دخل سيف لابس تراك اسود وعلى اكتافه خاولي وشعره ينقط ماي ابتسم الي وراح يم المراية  ينشف بشعره ويدندن ويا روحه 

وانه لازمه التليفون دزيت لوردة رسالة وخليته ع الدولاب بصف السرير 

اجه سيف دخل وياي بالغطى اخذني لحضنه

عضيت شفتي هو شافني 

كال لتخافين مراح اسويلج شي اصلا مراح اكدر محتاج طبيب يمكن لان الفترة السابقة نفسيتي جانت تعبانة ومشاكل ويا اهلي اثر هالشي عليه 

هزيت راسي وخليته على صدره حسيت انفاسه ثكلت وهو غافي ظليت اباوع عليه وعلى وجهه عيونه وهنه مغمضات وكل تفاصيله وعطره بانفاسي مديت ايدي لشعره بعده مبلل ومررت ايدي على وجهه 

حسيت فجأة نعست وخرت من يمه لان مامتعودة اندحس باحد وانام  ، تغطيت ونمت .. 

للعصر كعدنا جانوا عمتي وسارة طابخين كعدنا تغدينا مسوين دجاج ع التمن انه اكل بس تمن وسيف يخلي كدامي دجاج اوخره 

كال ولج مو بعينج اني عود دا اوكلج بس مو صوجج 

باوعتله ضحكت استحيت اكله نباتية انه 

بالليل هم خلوا كبة اكل بس البرغل واعوف الحشو 

ياربي شون راح يتعودون عليه واستحي احجي اكول هذا مااحبه وذاك مااحبه عيب ومو حلوة بحقي فكرت بعدين من اكوم اشتغل وياهم اسويلي اكل واعزله 

العصر صعدت بدلت واجه سيف كال جدي هنا تعالي سلمي يله تذكرت بيبيتي ام فخري كضتني الضحكة ماكدرت اكتمها 

رفع حاجبه كال شبيج تضحكين عيني ؟ 

دنكت وهزيت راسي وبعدني اضحك جاوبته ها لا ماكو شي . 

رفع راسي لاا هسه تحجين شبيج ليش تضحكين ؟ 

جاوبته ماكو شي 

ميسم اكو شي احجي شبيج اريدج تحجين لا تظلين تضمين عليه كل شي احب الصراحة اني 

وانت ماضام عليه شي 

عكد حواجبه شتقصدين ؟ 

مجرد سؤال انه مااضم شي وضحكت لان عمتي كالت تريد تخطب بيبيتي لجدك 

يله نزلي سلمي انه طالع برا ادخن .. 

لزمته من عكسه شبيك ليش ضجت 

يعني اتوسل بيج يله تجاوبين ضوجتيني ميسم 

سيف لاتروح تدخن انزل وياي استحي انه وحدي انزل اسلم 

راح كعد ع السرير وانه رحت كملت لبسي وخليت مكياج خفيف ونزلنا سوا شفته جده كاعد ع القنفة 

وبيده عوجيته بس وصلنه يمه نبت العوجيه بخاصرة سيف وكاله منين هاي الحلوة ولك ؟ 

سيف وخر العوجيه وكاله شسالفة جدو هاي مرتي لعد انت عليمن جاي غير جاي تتباركلي 

كال هاا ويجر بشواربه 

رحت سلمت عليه وكعدت 

كال حتى ماعزمتوني بالعرس لا اكلت بالعشى ليش هيج عوود 

جاوبته عمتي والله اني كلت الفرح بعد مايدخل بيتي من راح المرحوم 

هو الحجي ساكت ومبين ضايج 

عمتي كالتله شبيك 

كال انتوا ماتستحون تزوجون ولدكم وماتزوجوني صار شكد من امج ماتت

ظل يضرب بالعوجيه مالته على الارض ويكوول اريدُ شيئا يؤنسوني .. 

كالتله عمتي تدلل يابه شون عروسه شفت الك عود من يجون لهنا ادز عليك تشوفهه 

ضرب مرة ثانية ع الكاع بالعوجية ونافخ روحه عود كال خوش خنشووف بلله ... 

تمارا .... من بعد ما سمعنا بأم فيض انقتلت ووراء ايام رجع للمشتمل مالته بس محني الظهر واللحية مطولها والغترة ماتفارك عنقه احسه بلا روح وبلا حياة وشيكوله عمي يسوي احسه يشبهني بالحزن نفس الشي 

وبعد ما دارت سنة امه اجاني عمي كال حتى تعقدون سيد انت وفيض خلي يصير هو زوجج ومسؤؤل عنج وانه ابري ذمتي كافي الحمالة الشايلها منا خواتج واخوانج ومنا عائلتي خاف يصير مايصير انت بذمة رجال

انتفضت من مكاني وكلبت الدنيا بالصياح ماريده ماريد اتزوج والله انوب عليه فيض انت صدك تحجي عمي لا هو يريدني ولا انه اريده وانه اصلا اكبر منه عمي فك ياخة مني وخليني هيج 

ولج انت هم الج عين وتحجين ولج والله اذبحج واخلص منج والله 

اي وانه جاي اكلك اذبحني حطني ع القبلة واذبحني شمتاني ماتكلي 

ولج انت صدك صلفة طايحة الحظ وانه اريد ازوجج لفيض واردلج ابنج وخو فيض خطية ماكال شي كال نرده الها بس انت ماتستاهلين والله اذا مااخلي الشمس حسرة عليج تشوفينها اله احبسج فوك السطح بغرفة حتى شباج مابيها 

يريد يطلع ركضت عليه عمي تحجي صدك انت ترجعلي وليدي امير؟؟ 

ولي عني يلله ظلي عاندي ظلي 

جا وابوه خو رجعني لابوه وانه ويا نربي ابنه عمو انه احب نبيل والله وامير ابنه رجعني اله

اهله مايردونج ولي يله ونبيل رجعتله الحالة ومتخبل وحابسينه واحتمال يشمرون ابنج عليج بس والله ماارجعه اله تتزوجين فيض 

ظليت افكر بكلامه جا شسوي والله يسويها عمي ويحبسني وامي هم ظلت تقنع بيه 

وقبلت امري لالله وعقدنا سيد 

وراها عمي كال عقدوا محكمة حتى فيض يتكفل بابنج بالمحكمة وناخذه 

وحددنه موعد العقد كعدت من الصبح بدلت اندكت باب المطبخ طلعت امي ورجعت كالت فيض يكول يلله 

طلعت اباوعله بعصبية بس هو مامهتم ومدنك راسه وحتى مايباوعلي ويجر حسرات وحدة ورى الثانية 

طلع مشيت وراه اباوعله بحقد 

طلعنه من بيتنا رحت مشيت بصفه

كلتله انت صدك راح تتكفل بابني بالمحكمة حتى اخذه ؟؟ 

هز راسه بمعنى اي .. 

خاف تجذب عليه فيض ؟ 

باوعلي  شفتيني مجذب عليج من كبل؟ 

وكفت بنص الشارع شافني وكفت رجع 

كال امشي تمارا امشي يله وين وكفتي بنص الشارع 

توعدني اول شي تتكفل بابني وهسه تحلف كدامي يله اروح وياك 

تقرب مني يحجي صاك سنونه تمارا عن الخبال عيب احنه بالشارع 

احلف ترجعلي ابني واذا لا وجذب حتى ارجع للبيت وعقد السيد بسيطة بلله بس كول كبل لانعقد 

غمض عيونه وتنهد كال لا حول ولا قوة الا بالله ياربي رحمتك صبرني ، ورجع باوع عليه وبلع ريك بصوت مسموع 

اي تمارا اي والله ارجعه الج تدللين 

تبعته بدون ما اجاوب ولا حرف .. ظليت ادردم بقلبي راح ياخذني مشي للشارع شكد غبي 

لا والله مو غبي بس يستنكف ياخذ سيارة عمي لو ابوي .. 

مشينه واشوف واحد يشبه نبيل وبيده امير ابني 

لالا امير هو الي يكود نبيل حبيبي كبران صاير يهتم بابوه المريض بعد عمري خليته صغير مر هواي وقت هسه معقولة يعرفني لااا 

ماتحملت باوعت فيض يمشي قبلي 

وكفت حتى ما انتظرت السيارات توكف بسرعة عبرت والسيارات ظلت تدك هورن ووحدة منهن اجت تدعمني شمرت روحي ع الرصيف واباوع فيض واكف مصدوم يباوعلي مااهتميت اله كمت عدلت عبايتي ورحت اركض ورا نبيل وامير .. 

وكفتهم بالشارع اخذت امير لحضني وابجي بحركة وانه مكرفصة ع الكاع ورافعة راسي اباوع على نبيل ودموعي على خدي 

اباوعله فاتح عيونه وظل يتمتم تم تما تماااارا !!!