رواية اختفاء عروسة في شهر العسل الفصل الأول بقلم ياسر عوده
اختفاء عروسه في شهر العسل
مستوحاه من احداث حقيقيه
قبل ما نبداء بقول لاي حد ان القصه متذاعه بقناه على اليوتيوب ومش سامح لاي حد يخدها ويذعها.
بقلم ياسر عوده #القَصَّاصْ
الاول اذكر الله وصل على الحبيب المصطفى وادعوا لاخوانكم بفلسطين والسودان وكل بلاد المسلمين .
اتمنى منكم تعلقوا اقل حاجه 10 تعليقات ده غير التفاعل ده اللى بيشهر الصفحه واعتبروه ده تقدير من حضراتكم ليا وشكرا احبائي.
كانت الساعه 2 بعد نص الليل، وكنت قاعد في مكتبي، وفكرت اني انام شويه لغايه الصبح علشان اروح، انا كنت شغال ورديه الليل في القسم، ويدوب طفيت النور ولسه عيوني هتغمض شويه، سمعت صوت خبط على باب المكتب، قومت من مكاني وشغلت النور مره تانيه، وطلبت من اللى بيخبط يدخل، وقتها لقيته العسكري اللى بيقف حراسه على باب المكتب قالي:
-اسف على الازعاج يا عمرو باشا، بس في واحد بره عاوز يقابل حضرتك، ومن لهجته في الكلام تقريبا كده هو مش مصري.
-خليه يدخل خلينا نعرف هو عاوز ايه.
خرج العسكري ورجع بعد ثواني ومعاه الشخص اللى بيقول عليه، وطلبت منه يقعد وسألته عن اسمه واوراق تحقيق الشخصيه، ساعتها طلع جواز السفر بتاعه، وطبعا ماكنش مصري وكان اسمه عامر.
من هيئته وملامح الرعب اللى على وشه حسيت ان في مصيبه حصلت، وسألته عن اللى حصل وقتها قالي:
-انا مش من هنا، وكنت جاي انا ومراتي علشان اقضي شهر العسل، احنا لسه عيرسان ومتجوزين من اسبوع تقريبا.
-الف مبروك يا فندم، طيب ايه المشكله، حد ضايقكم؟
-مراتي اتخطفت مني.
وقتها انا اتعدلت في قعدتي، اصله بيقول مراته اتخطفت منه، والمواضيع دي احنا ماسمعتاش عنها من زمان، ازاي مراته تتخطف هنا في بلدنا، وسألته:
-ممكن تقولي التفاصيل وتعرفني ايه اللى حصل من ساعه لما جيت على البلد؟
-زي ما قولت لحضرتك انا ومراتي ساره حددنا مصر علشان نقضي فيها شهر العسل، واحنا هنا من كام يوم ولما جينا نزلنا في فندق من الفنادق الكبيره اللى في القاهره، انا شغال رجل اعمال وساره دكتوره جامعيه في بلدنا، وانا وهي اتجوزنا عن قصه حب، وهي بتحب مصر اوي لانها جت هنا اكتر من مره، اصلها بتدرس في الجامعه ماده التاريخ، وطبعا انت عارف يا فندم ماينفعش تاريخ من غير مصر علشان فيها اقدم الحضارات، وعلشان كده هي طلبت مني ننزل مصر نقضي شهر العسل وانا وافقت على طول.
اول لما جينا فكرت أجر عربيه ملاكي طول ما احنا قاعدين في مصر، علشان نتفسح فيها ونروح للاماكن السياحيه، بس ساره رفضت وقالتلي اننا حتى ل أجرنا العربيه مش هنعرف نتفسح بيها، الافضل اننا نشوف سواق بعربيه، ووافقتها واول يوم وصلنا فيه وبعد ما ارتحنا طلبت عربيه اجره، ووقتها جالنا عربيه وسواقها كان اسمه راضي، وبمجرد اننا اتكلمنا مع السواق ده حسينا انه اجتماعي جدا، وكمان كان مثقف وعارف اماكن سياحيه واثريه كتير، ووقتها انا وساره قررنا ان راضي يفضل معانا طول ما احنا هنا في البلد، وفعلا اتفقت معاه على كده، ومن تاني يوم ابتدي يجلنا الفندق وياخدنا يفسحنا في الاماكن الاثريه اللى يعرفها، وكمان الاماكن الشعبيه المشهوره في مصر وكل حاجه كانت ماشيه تمام، بس الليله دي لما كنا بنتفسح وبنتصور في الاماكن دي زي العاده، لقيته بيقول انه هيودينا منطقه ساحره في مناظر طبيعيه جميله، وافقت انا ومراتي طبعا وفعلا طلع بينا، بس الطريق كان فاضي وانا انتبهت للموضوع ده، ولما اتكلمت مع السواق وقولتله:
-ماله الطريق فاضي كده ليه، اومال الزحمه المعروفه عن مصر فين؟
-احنا كده من نص الليل الطريق بيفضي والدنيا بتبقى تمام.
ودخل بينا في شوارع شكلها قديم شويه، المنطقه واضح انها اثريه فعلا وفجأه لقينا حد بيقطع علينا الطريق، رموا جزع نخله قدام العربيه، وقتها راضي وقف بسرعه، وظهر شخصين قدمنا، وكل واحد فيم كان معاه مسدس، وفحوا باب العربيه وشدوا راضي وطلعوه من العربيه، واول لما شافونا خدونا بالعربيه.
روحنا لمكان مانعرفش فين بالظبط، وبعد ما سرقوا كل حاجه معانا قالولنا انهم هيسبونا نمشي وهيخدوا العربيه، انا ماكنش عندي مشكله في الحاجات اللى سرقوها مني، وقولتلهم ان العربيه ماتخصناش، وكل اللى عاوزينه انهم يسبونا نمشي، وفعلا طلبوا مني اني انزل، وبعدها هينزلوا ساره بعديا، وقتها كنت مبسوط ان الموضوع هيعدي على خير، ولما نزلت واستنيت انهم ينزلوا ساره، لقيت واحد فيهم بيقول للتاني:
-بصراحه البنت دي عجباني اوي، اطلع بينا نخدها لمزاجنا.
وقتها التاني سمع كلامه ولقيته اتحرك بالعربيه بسرعه ومالحقتهوش، وفضلت ازعق واستنجد بالناس، وقتها ظهر شخص ماشي بعربيه ووقلي، ولما عرف اني مش من البلد وعرف اللى حصل معايا جابني قدام القسم وسابني ومشي.
ـــــــــــــــــــــــــــــــــــــــــــــــــــــــــــ
دي كانت الاقوال اللى قالها عامر، وماكنتش مصدق اللى قاله، معقول اللى حصل دا، كأني بسمع فيلم اكشن، ويحصل هنا في ديرتي، وقتها كنت محتاج اعرف من عامر تفاصيل اكتر، زي شكل مراته علشان نوزع اوصافها، وبعدها سألته عن الشخصين اللى خطفوا مراته ووقتها قال:
-كانوا ملثمين ووشهم مش باين، بس اجسامهم كانت ضخمه اوي.
-اسمعتهمش بينادوا بعض باي اسماء:
-لا.
فهمت انهم كانوا حرصين اوي، ومش بس كده من طريقه الخطف واضح كمان انهم محترفين اجرام، بس انا عندي خيط امشي وراه، السواق صاحب العربيه الاجره اللى اسمه راضي، انا لازم اوصله باي شكل، والموضوع ماكنش سهل، رغم ان عامر ماكنش يعرف عنه غير اسمه الاول راضي، بس هو قال ان راضي كان بيروح ياخدهم من قدام الفندق اللى ساكنين فيه، وطبعا في كاميرات هناك، وعلشان كده انا طلبت تفريغ الكاميرات علشان نعرف نوصل لـ راضي، حتى لو ماظهرش في التفريغات وظهرت العربيه هنعرف نوصله عن طريق العربيه.
طبعا عامر مشي بعد ما خلصنا المحضر، وتاني يوم جالي نتيجه تفريغ الكاميرات وقدرنا نوصل لـ راضي فعلا، بس في معلومه تانيه مهمه اوي جتلي، المعلومه دي ان في محضر اتعمل في قسم شرطه تاني، والمحضر دا عمله سواق عربيه اجره قال انه وهو معاه اتنين سياح من بره البلد وماشي بيهم في منطقه المقطم، طلع عليهم اتنين قطعوا عليهم الطريق وهددوه ورموه بره العربيه، وخدوا العربيه ومعاهم السياح، وعرفت ان قدم البلاغ دا امبارح وبالتحديد قبل ما عامر يقدم بلاغ باختطاف مراته، وطبعا السواق دا يبقى راضي، وطلبت من القسم التاني يبعتلي المحضر اللى عمله راضي، ومش بس كده انا طلبت ضبط واحضار راضي علشان احقق معاه بنفسي.
لما جالي راضي قعدت معاه وطلبت منه يحكيلي اللى حصل، وقتها قال:
-انا لما صدقت يا باشا ان ربنا بعتلى عامر باشا ومراته يركبوا معايا العربيه وهفضل معاهم لـغايه لما يرجعوا بلادهم بالسلامه، اصل عامر باشا ماكنش بيدفعلي بالمصري، دا اول يوم اداني 100 دولار مره وحده، واتفق معايا ان كل يوم هيديني 150 دولار وافضل معاهم طول اليوم، انا قولت خلاص ربنا فكها عليا وهسدد ديوني واحسن من احوالي، بس ليله امبارح لما كنت واخدهم للمقطم يتفسحوا هناك، طلعوا علينا ولاد الحرام ورموا قدمنا جزع نخله، وخدوا العربيه مني وخدوا معاهم عامر باشا ومراته الدكتوره ساره.
-وانت اللى اللى خلاك عاوز توديهم المقطم في الوقت ده؟
-عادي يا باشا، اصل منطقه المقطم مكان جميل وانا قولت هيعجبهم اوي، وانا كنت بحاول اخليهم فرحانين واوريهم اماكن ماشفوهاش.
-انت بتقول كان بيديك في اليوم الواحد 150 دولار، مش شايف ان المبلغ دا كبير شويتين؟
-رزق يا باشا، ربنا بعتلي رزق اوقول للرزق لا؟
-لا طبعا يا راضي، طيب تقدر توصفلي الاتنين اللى طلعوا عليكم وخطفوهم؟
-كانوا ملثمين ومالحقتش اميزهم باي حاجه.
-تمام ، عاوزك تحددلي المكان اللى اتخطف فيه عامر وساره.
وفعلا لما راضي حدد المكان، انا ارسلت فرق من المباحث علشان يتم التحري وكمان القبض على كل شخص تم اتهامه من قبل بالبلطجه او محاولات الخطف، ودي كانت اجراءات طبيعيه بتتعمل في الظروف دي.
المشكله الحقيقه اني عارف ان خلال وقت قليل اوي الموضوع هيتنشر في جميع وسائل التواصل الاجتماعي وكمان في صحات الاخبار، دا غير ان سفاره البلد اللى منها عامر وساره هيتدخلوا طبعا علشان يضغطوا على الشرطه لسرعه احضار ساره، وهيبقى في اهتمام كبير من المسؤلين لان الموضوع يخص ضيوف عندنا، فانا كنت بسابق الزمن اني اوصل لـ أي حل قبل ما الدنيا تتقلب زي ما انا متوقع.
بس للاسف الموضوع مشي اسرع مما كنت اتخيل، وحصلت مصيبه كبيره اوي، لما جالي بلاغ انهم لقوا العربيه المبلغ بسرقتها، ومش دي المصيبه انما المصيبه الحقيقيه انهم لقوا جواها جثه ساره، او اللى هما متوقعين انها تكون ساره، لان الجثه مشوهه تماما.
في الوقت دا اتنقلت لمكان البلاغ، واول لما وصلت هناك عاينت الجثه اللى جوه العربيه، كان المنظر صعب، واضح جدا ان الضحيه اتعرضت لعمليه اغتصاب وحشيه ودا واضح من سبب النزيف اللى كان مغرق العربيه، وكمان ملامح وشها متدمر من كتر الضرب والجروح اللى كانت على وش الضحيه، وهدومها اللى كانت متقطعه كلها ومافيش أي هدوم عليها تقريبا، وحتى بصمات اليد تم تشوهها بشكل غريب لان المجرمين قطعوا اصابع ايديها.
انا اول لما شوفت المشهد ماكنتش مصدق نفسي، معقول دي ساره وطبعا كنت عارف اللى هيحصل بعد كده، وعلشان كده كنت بتحرك بسرعه، اول حاجه بعت اجيب الطب الشرعي والمعمل الجنائي لفحص الجثه وكمان مسرح الجريمه، ولما حضروا ابتدوا يشوفوا شغلهم وفضلت موجود منتظر لما يخلصوا شغلهم، وكمان طلبت من الفريق بتاعي البحث عن أي كاميرات مراقبه في المكان وتفرغها، وكمان البحث عن أي شاهد عيان عنده أي معلومه تدلنا على المجرمين اللى ارتكبوا الجريمه دي.
ولما الطب الشرعي خلص شغله اتكلمت مع الدكتور وسألته عن المعلومات اللى وصلها بفحص الجثه وقتها قال:
-الحقيقه انا مش فاهم كميه الحقد اللى واضحه في عدد الطعنات اللى ماتت بيها المجني عليها، هي اتطعنت حوالي 9 طعنات تقريبا، بس الطعنات دي حصلت بعد ما تم اغتصاب المجني عليها بطريقه وحشيه، لدرجه انها كانت عاجزه تماما عن الحركه، وبعد عمليه الاغتصاب تم قتلها، وبعد القتل بعدد الطعنات الكتير اللى حصلت، وطريقه تقطيع الهدوم، والاهم من كده ان الكدمات والضرب اللى في وش المجني عليها حصل بعد القتل، واضح ان الشخص اللى عمل كده كان مغلول منها جدا وعاوز ينتقم منها.
-غريبه يا دكتور، دي ضيفه مش من اهل البلد، وبقالها هنا كام يوم بس.
-مش عارف بس انا بقولك اللى استنتجته من الفحص المبدئي، وكمان احنا قدرنا نحصل على الحمض النووي للمغتصب سواء كان شخص او اكتر من شخص.
-طيب في أي دليل على المقاومه؟
-ايوه فيه بس المقاومه دي ماستمرتش كتير، واضح انها اتعاملت بعنف شديد جدا.
وعرفت من الدكتور انهم لقوا بقايا خلايا جلده في ضوافر المجني عليها، وان دا دليل قومي جدا ومهم ضد الجناه وهنقدر نستغله بعدين في القبض عليهم واثبات التهم عليهم.
وبعد ما خلصت كلامي مع الدكتور اتكلمت بعد كده مع رئيس فريق المعمل الجنائي علشان اسأله عن المعلومات اللى حصل عليها، وقتها قالي:
-الكرسي الخلفي للعربيه هو مسرح الجريمه، احنا لقينا غرابيش على ضهر الكرسي الامامي وواضح ان دي حصلت اثناء مقاومه المجني عليها للمجرمين، وكمان بفحص الدم اللى كان موجود في العربيه اتضح ان كل الدم يخص المجني عليها، بس المكان اللى حصلت فيه الجريمه مش نفس المكان اللى لقينا فيه العربيه، لانه قريب من منطقه سكنيه وصعب ان يحصل الاعتداء والقتل في منطقه سكنيه لان اكيد حد من السكان هيسمعهم وهيتدخل، واضح ان الجريمه حصلت في مكان تاني، وبعدها تم نقل العربيه للمكان ده.
-شكرا يا فندم على المعلومات دي.
وبعد ما خلصت كلامي مع رئيس المعمل الجنائي، طلبت من المساعدين بتوعي بسرعه احضار المعلومات اللى طلبتها منهم، ولما روحت المكتب واشتغلت على القضيه، وقتها جاتلي معلومات ان مافيش أي كاميره مراقبه موجوده في المكان اللى لقينا فيه العربيه، وكمان مافيش أي تأكيد ان الجثه اللى في العربيه هي نفسها ساره، ودا كان لغز جديد انضم لمجموعه الالغاز اللى كانت في الجريمه.
