رواية ارهنت عمري الفصل العشرون بقلم نورا ناصر
لو بيه خاطف حلم .
چا ما صرتلك حَطب وتصير چتالي .
الغصة ذبحت كلبي ودممته مووتتني شوفته
رافعه راسي اباوعله كاسرة ركبتي عليه مصدومة
كمت على حيلي وبعدني لازمة امير من اكتافه
ولازكته بيه باوعت لنبيل ومركزة بي
شلونك نبيل ؟ بنبرة كلها بجي حاجيته ....
فتح عيونه يباوعلي ببلاهة ليش تبعتينه رجعي للبيت هسه نتسوك ونرجع ردي للبيت يله ردي
شهكت بصوتي عالي احس كلبي انفطر الله لاينطيهم بعدوني عنك
مادري منين اجه اخوه نفسه الكالوا عليه اخذ بيتنه
وكعد بي ظل يغلط عليه وخري منهم يلله وخري ماكافي الحالة الي هو بيها بسببج ..
باوعتله بحقد اسكت انه المحكمة برأتني مو كيفج تحجي
ظل يغلط عليه اجه فيض من وراي ودفعه وصيح بوجهه بعصبية لا تغلط عليها افتهمت لا احطك بالكاع وادوس على راسك بالقندرة
ذاك ظل يغلط على فيض ويجر باخوه وانه فيض لزمني من ايدي اريد افلتها واروح اتبعه وابجي وهو يهدي بيه
هو يجر بيه وانه اجر بس هو اقوة مني انه حيلي مهدود امشي وراه وكلساع ادور اباوع على امير ونبيل واشوفهم يبتعدون عني شكد اريد اصبر بدونهم ايوب واحد صبر وانه الثانية من بعده تعبت من الصبر ياربي
اريد ابني زوجي طلكونه كوة مايعتبر طلاك هذا لا انه رايدته ولا نبيل يدري عن شي وزواجي من فيض هم نفس الشي باطل انه جاي احس روحي بعدني مرته لنبيل ماجاي اكدر استوعب غير شي...
هدني فيض هدني خليني اروح الهم والله اذا خذتني للمحكمة ماتلوم اله نفسك
ماوديج للمحكمة يمعودة ماوديج بس ارجعج للبيت يامحكمة يابطيخ امشي عفية امشي انفضحنه
كوة عبرنه الشارع اكله هدني مايهد لازم ايدي قوي وصلنا لبيت اهلي فتح الباب ودخلنا هدوء ماكو احد بالحديقة وفيض بعده لازمني اخذني صوب المشتمل مالته
جريت نفسي منه رجع سحبني عطت بي وخرر شتريد مني ووخرررر
همس اشششش بس نحجي وارجعج تعاي تمارا تعااي
دخلني للمشتمل مالته وسد الباب طاحت عباتي اجه يمي دفعته وخرر شتريد تسوي بيه ..
راح قفل الباب واجه بقيت مصدومة وخايفة منه خاف يسويلي شي بس انه واثقة منه فيض فقير مايسوي شي بس شنو يريد..
هدأت شويه وعدلت عباتي خليتها على اكتافي وهو راح للمطبخ ، المشتمل مالته عبارة عن غرفة ومطبخ وهول بنصهم مفتوح عليهم كلهم وحمام وتواليت برا ماكو داخل
كعدت ع القنفة وايديه على وجهي اصفك بيديه على وجهي حسيت بخطواته تقترب مني وخرت ايديه من على وجهي شفته جايب كلاص ماي بيده كرفص كدامي ووجهه عليه
وخرته منه: ماريد اريد اروح للبيت اريد ابقى وحدي
قرب كلاص الماي من حلكي وهو يحجي بتوسل بس شربي حتى تهدأين ونحجي انت لازم تسمعين مني تمارا
باوعتله وملامحي كلها غضب هزيت راسي ماعطشانه
: ميخالف ريكج ناشف مبين شربي شويه
اخذته منه مرغمة وجرعت شويه وخليت الكلاص ع الطبلة الي بصف القنفة
جريت نفس ومسحت دموعي وهو كاعد كبالي
يباوعلي مقهور كال ها هسه ارتاحيتي
ظليت ارفع ايدي واضرب على فخذي واحجي شأرتاح فيض شرتاح ..وينها الراحة وابني بعيد عني
لزم ايدي على كيفج ويا نفسج مو هيج كل شي واله حل
وكفت على حيلي اله مصيبتي مالها حل اله انه مصيبتي مالها حل
تمارا انه والله الي جاي اسوي على مودج صدكيني
فيض انه اريد عائلتي رجلي وابني انه وياك مانرهم سوى
شسوي لعمي والله انه هم ماريد اتزوجج غصب بس هذا كله لمصلحتج انه بس اعقد عليج بالمحكمة اوكل محامي وارفع دعوة حضانة واردلج ابنج
خو سويها لله وكلي محامي وخلي يردلي وليدي اله تتزوجني وعود انه اشتغل وارجع عليك فلوس المحامي
شسوي لعمي هذا شرطه يردلج ابنج شرط اتزوجج اهل نبيل مايردونج بعد وهو مو صاحي هسه امشي خل نباشر بالاجراءات مالة عقد الزواج لايجي عمي يكلب الدنيه وكلما عقدنه وكت كلما رجعلج ابنج
ماريد فيض ماريد ، هميت روحي اريد اطلع رحت حركت اليدة مالة الباب تذكرت مقفول التفتت عليه كتله فتحه واشر ع الباب
اجه يمي كال وين تروحين ؟
غمضت عيني وتنهدت بقووة وجاوبته للبيت بعد وين اروح
ماتغيرين رأيج ؟؟ نروح نعقد ؟لاتضيعين المشيتين تمارا عمي اذا اجه
مايخوفني عمك هو الصار بيه شويه حتى اخاف منه انه شفت الموت بعيني افتح الباب الله يخليك
فتح الباب وانه طلعت من يمه وهو تبعني وظل واكف كبال باب الاستقبال مالتنا يريد يتأكد اطب او لا دخلت للبيت سديت الباب ، شفت امي
سألتني ؛ ها يمه رجعتي ؟؟
حسيت رجليه بعد ماتحملني كعدت يم ابوي الي صفى لا ايد ولا رجل بسبب الكلب الحقير الي هجم بيتي ومرض ابوي ونبيل وبعدني عنهم وعن ابني
وكعدت ابجي وامسح دموعي بعباتي شجاني وماحجيت من جان سنة هو يركض وراي ويتحرش بيه بس هم جنت اخاف من الفضيخة وخايفة محد ينصفني هلي سكتت وماحجيت تاليها خوش طحت بيها انه والمسكين نبيل وابني الي مادري شحاله ومنو يهتم بي
مسحت دموعي وتذكرت امير شلون صاير جبير وعمره ٥ هسه جاي يكبر بعيد عني هالشي يحرك كلبي حرك
شسوي يربي شسوي اضحي بنبيل واخذ امير واعيش ويا فيض بس كلبي ماينطيني وضميري يأنبني شنو ذنبه نبيل اصلا بسببي وسبب سكوتي صارله كل هذا زين شسوي شسوي!!!!!
ميسم : سيف كال حضري نفسج صديقي ومرته عزمونا ، رحت بدلت ووكفت ع المراية
وهو كاعد وراي ع السرير
كال : اكولج ميسم اذا سألوج عن دراستج كوليليهم خلصت سادس وع السنة الجاية اكمل كلية
التفتت عليه لازمة فرشة الشدو : شنو يعني انت تستنكف مني ؟ ترا انه شاطرة بس غير الي صار ويا امي كسرني وخلاني اكره الدنيا
(هو جذب كاضيتها تدفع كله خمسينات كوة انجح بس ماريد انطي بنفسي كدامه)
كملت كلامي ورجعت اخلي مكياج
باوعلي رافع حاجبه وبعد شغله ثانيه حاولي تحجين مثلي احسن
رجعت التفتت عليه معصبة وسألته شتقصد احجي مثلك ؟
يعني مثل لهجتي
لا والله ليش وشبيها لهجتي
مابيها شي بس هيج احسن
ماعرف احجي مثلك متعودة على هذا كلامي
هو شيراد الها ماتكوليلي قابل راح تحجين غير لغة هيه نفسها بس كم كلمة مختلفة
ليش تستعار مني سيف ترا انت هم اصلك مو منا
فلا تتكبر عليه احسن .
اوووو انت شأ اگُلج تطلعيلي الفين قصة وقصة خلصي وفضيني
رفعت ايدي بالهوا وبيدي الفرشة علامة الاستهزاء وكملت مكياجي رحت للكنتور طلعت عبايتي ولبستها طلع هو من الحمام وعطره سبقه يفح وملى الاجواء
وظل يباوعلي من فوك ليجوة
كال لتلبسين عباية احنه ابغداد
وليش الي ابغداد مايلبسون عبايه ؟
اوووو شون راح تفض اليوم والله مادري اكلج لتلبسيها وخلص ملابسج الجوا حلوة وواسعة مابيها شي
لا انه متعودة واذا ما اللبسها احس روحي مصلخة
كعد ع السرير وبدأ صبره ينفذ ولج ميسم شبيج اني رجلج سمعي كلام
ادري رجلي ماعندك غيره عليه ؟
عصب واستقام بوكفته يباوعلي معصب ولج شنو قابل مطلعج مصلخة حتى ماعندي غيره عليج اشو تجفصين تجفص بالحجي ؟
لا مو تجفص هذا الي جاي اشوفه
نزع سترته بعصبية وشمرها كال انعل ابوها من طلعة بيها مغثة بطلت مراح اطلع وراح اعتذر من صديقي اكوله المرة تمرضت
اسم الله عليه ليش تريد تمرضني كوة وتفاول عليه
دووولي زعطوطة شون تورطت بيج اني
اخذ تليفونه وطلع من الغرفة
بدلت ملابسي ونزلت جوا
شفت عمتي كالت خير شبيكم ليش صوتكم طالع وسيف نزل معصب ؟
احتاريت شنو اجاوبها بس ماكو احسن من الصراحة والحقيقة كتلها عمه جاي احسه مامتقبلني يريدني اغير لهجتي ولبسي وهالشي جزء من شخصيتي شلون اغيره ما اعرف
لا بنيتي شنو مامتقبلج بس انتوا مامتعودين على بعض بمرور الايام تتعودين عليه ويتعود عليج
ان شاءالله عمه
اني من يرجع احجي وياه ...
لا عمه ميحتاج ...
لا يحتاج اكوله يخليج على راحتج مدام انت ممسوية شي غلط
هزيت راسي بالايجاب ورحت يم سارة حبابة كلش اكعد وياها واسولف والعب بنتها والتهي واحس يتقلص احساسي بالغربة ..
سيف طلع بعد مارجع بعد العشاء صعدت فوك
كعدت ع السرير اخابر وردة واسأل عنها
اندفعت الباب بقوة ودخل سيف حضرتج شاكيتني لامي ؟
فتحت عيوني بصدمة وكلت لوردة بعدين اخابرج هسه باي ، سديت المكالمة اريد احجي اجه يمي خله وجهه بوجهي لاتصيرين زعطوطة ميسم مشاكلنا لا تطلعيها برا افتهمتي ؟ لا كل شي يصير الكاه يم امي
بلعت ريك واحس خايفة منه اريد ادافع عن نفسي مجاي امتلك الشجاعة الكافية واشوف عيونه شون يتطاير منهن شرار الغضب
كتله انه ماردت اكول الها شي بس هيه سمعت صوتك تصيح ورادت تعرف شنو السبب خو ما اجذب حجيت الها الي صار بيننا
رفع ايده بتهديد اول واخر مرة تحجين لامي عن مشاكلنا تمام ؟؟
بلعت ريك واحس ريكي نشف وهزيت راسي واحس دموعي على اعتاب جفوني ، راح هو من يمي وانه تغطيت ونمت ...
يوم ثاني حسيته اخذني لحضنه وخلاني على صدره ويلعب بشعري تظاهرت بالنوم مليت من محاولاته الفاشلة بالتقرب مني هالمرة صار الرفض مني سويت نفسي نايمة لحد ما مل مني تحسر وكام حسيته جان جاي يبدل ملابسه ........
من سمعت صوت الباب انطبكت بهدوء عرفته طلع
للشغل بس ماكعدني ، تندمت لان مااستجابيت اله
انقهرت عليه وحتى ماكدرت انام بعد ظليت اتقلب بفراسي باوعت صارت ساعة ٨ ونص كمت من السرير رتبت الغرفة وهو على بالي باوعت للتليفون
جريت تليفوني وخابرته اجاني صوته ورا شويه
الوو ها ميسم خو ماكو شي ؟
لا لايظل بالك بس ليش ماكعدتني احضر ملابسك اسويلك ريوك ماعبالي راح تروح للشغل بسرعة هيج جان كعدت وياك الصبح
ضحك : لا اني متعود وريوك برا اتريك حبيبي ليظل بالج وهم مليت من كعدة البيت طلعت اليوم للمكتب
_ لا انوب كعدني وياك
_ لا حبيبي ابقي نايمة نومة الصبح حلوة وحضري نفسج العصر نطلع
_ها!!
_ لتخافين مراح اضغط عليج سوي الي تحبي والي تريدي تمام ؟؟
_ اوكي يله باي كمل شغلك لا اعطلك
_ باي.....
العصر اجه تغدى ونام لان تعبان كلش
والمغرب طلعنه افترينا وتالي تعشينا ورجعنا للبيت
كعدت ع السرير بعد مابدلت ملابسي
اجه يمي حضني من اكتافي كال ها تونستي ؟
جاوبته مبتسمة اي
اخذ راسي خلاه على صدره ويلعب بشعري ويطبع قبلاته على كصتي ..
تجرأ بلمساته كتله تعبانه
كال اششش ماكو هيج حجي صبرت عليج هواي
مو ع الاساس تروح للطبيب
مابيه شي مو اله اروح ..
اخذني للسرير هستوة يريد يتقرب الي ونسمع صوت جده والعوجيه مالته تدك ع الابواب مالة الغرف الفوك ويصيح اريدددُ شيئا يؤنسووني
انوب وصل لباب غرفتنه دفعت سيف من الجرباية
كتله روح شووف جدك مدري شنو يريد
ظل يضرب ايده على فخذه كال جدي شي يونسه اروحله يتونس بيه مو احسن من الذلة مالتج هاااي
ضحكت وخليت ايدي على وجهي وهو راح يلبس ملابسه ويدردم يكول حتى الرغبة راحت اليوم اسمطك سمط جدو
راح يريد يطلع لزمته من ايده وينه رايح
رايح اربطه لو اروح لامي تشوفله صرفه لو ترجعه لبيت خالي
طلع وانا ركضت للحمام ....
سيف ... فجأة لكيت نفسي متعلق بميسم هوايه بعد ماجنت بس اريد اخاف الله بيها وارضيها وماافشل اهلي كدام عمي الشيخ بس هسه لا حبيت الكعدة وياها صوتها كلامها ويايه نشاقى ونضحك تعلقت بيها حييل
حتى شهد نسيتها
بس بيوم جنت راجع من شغلي الساعة ٢ الظهر دخلت للبيت سمعت صوت حسين ابن اخويه
استغربت ظليت ادور ع الصوت عرفته جاي من المطبخ
رحت طبيت للمطبخ وشفته تفاجأت ويا شهد دتصب اله اكل وتحجي ويا وهم يجاوبها بهتت وبقيت واكف مكاني ..
هيه شافتني ورفعت تك حاجب ..
اجاني حسين يركض شلته وحضنته وبسته ونزلته راح يركض برا المطبخ
وشهد مسويه نفسها متجاهلني تغرف من الجدر وتحط ع الماعون
وتحجي يا هلا بالعريس ياالف هلا شلونك شخبارك الف مبروك والله لو ما متأخرة جايه جان هلهلت
الك تستاهل لعد غير انت زوجي وافرحلك
التفتت وراي بتفحص سريع سديت باب المطبخ وفتت يمها لزمتها من ايده اشش ولا كلمة شجابج ها وين جنتي كل هالفترة
انت غير المفروض تسأل عليه مو اني زوجتك
شهرين اني نايمة مستشفى وابني منا ومنا ولا واحد بيكم سأل
حجت هيج وسحبت ايدها مني بقوة وابتعدت مني خطوات وهيه تعرج
شمدريني بيج اني اتصل بيج تليفونج مغلق اسال اهلج يكولون ابيت خالتها وماينطون اي تفاصيل ثانية عنج
تدري بأهلي اني وهم علاقتنا متوترة
باوعت عليها شبيج وليش دخلتي مستشفى ؟
_سويت عملية لرجلي
_اشو بعدج تعرجين
_مانجحت العملية
باوعتلها بأسى : ليش هيج سويتي ليش رحتي بدون متكوليلي
انت السبب بكل هذا سيف انت السبب انوب انصدم بيك متزوج ليش هيج تسوي بيه ليش هسه شسوي اني شسووي
نبرة صوتها علت خليت ايدي على حلكها اسكتها واباوع لعيونها الي صارت تلمع بالدمع
اخذتها لحضني صارت تشهك بالبجي
بعد لحظات وخرتها مني سمعت صوت برا المطبخ
عفتها اريد اطلع
جرتني من ملابسي بعد كومة عدنا حجي وين رايح ؟شوكت تعلن زواجنا ؟
اخذت ايديها وخرتها مني بعدين نحجي اكيد اكو احد اجه هسه ليشوفونه سوى
ها راح نرجع لحياة الظلمة شوكت تعلن زواجنا هاا احجي لو بس هيه مرتك ترة اني هم مرتك وانت غلطت بحقي غلطة جبيرة ولازم تصلحها
بعدين كتللللج ، حجيت هيج واني اباوع عليها بتحذير وبنبرة تهديد ، حسيتها خافت رحت فتحت الباب وطلعت من المطبخ
شفت ميسم انصدمت بيها ...
تمنيت ماسامعة شي
من الي حجينا اني وشهد
وبنفس الوقت انقهرت عليها ظلمتها وياي وورطتها صرت في حيرة من امري بين ميسم وشهد واثنينهم ضحايا تسرعي باتخاذ قرارات مصيرية ومهمة بلحظة ضعف ...
ميسم : كعدت الصبح من النوم الساعة ١٠ غسلت ونزلت جوا شفت طفل يلعب يم الدرج باوعتله وضحكت شكله حلو كرصته من خده وابتسمت اله
باوعت شفت شكله مألوف يمكن شايفته من قبل مادري وين !!
سمعت صوت بالاستقبال اكيد خطار اجو يباركون بس عمتي خطية ما كعدتني ، خلي اصعد فوك اخلي مكياج خفيف وابدل الكلبية الي لابستها
صعدت لبست فستان شيفون فيروزي لونه وتصميمه بسيط وخليت مكياج هادئ ورجعت نزلت ، شفت سارة
سألتها منو هنا ؟
كالت هاي شهد هنا ارملة اسعد الله يرحمه روحي سلمي عليها بالاستقبال كاعدة
اها زين رايحة اسلم .. باوعت للطفل تذكرت عمتي تشوفني صوره وتكلي اخذته امه والها اشهر حارمتني منه وتدعي عليها ..
طبيت للاستقبال شفتها تحجي وي عمتي ومبينات متنرفزات اثنينهن مبينات جاي يتعاركن بالحجي او عمتي جاي ترزلها اخر كلمة سمعتها من عمتي
كالتلها ولج اني كلبي محروك على اسعد اتحركينه بالزايد وتاخذين رويحته بالدنيا وتحرمينه مني
شهد جاوبتها عمه والله رحت علمود علاج
علاج علاج شهد لا شهر ولاشهرين انوب اهلج مايريحون الكلب ويطمنونه ع الطفل
بقيت محتارة اسلم لو ارجع بس عمتي انتبهت عليه وسكتت وانه من شفتها هيج كلت سلام عليكم انتبهت عليه شهد ظلت تباوعلي وعمتي كالت تعالي يوووم ميسم فوتي سلمي ، شهد هاي ميسم زوجة سيف
شهد بس شافتني عوجت حلكها مادري ليش وانوب اسمها نرفزني ذكرني بليلة عرسي من جان سيف يصيحني شهد
كامت كوة عليها سلمت عليه وكالت اعذريني مجايبه هدية ويايه جيت من اربيل ورأسا جيت لهنانه
عادي حبيبتي الحمدلله على سلامتج
الله يسلمج كالتها من ورا خشمها ..
كعدت شويه بس بهتت بمكاني وهاي شهد تريد تاكلني بنظراتها ، كلت اترخص واكوم خاف يردن يكملن عركتهن ، ترخصت وكمت
رحت للمطبخ يم سارة شكلت ايديه وكتلها اساعدج بشي ؟
كالت لا كعدي تريكي ولج
_ لا ما اشتهي
_ ولج اكلي راح تنكسمين بالنص افكر بيج اذا حملتي شون حتولدين وانت هيج ؟
هو غير تخلص هالبلوى بالاول ؟؟ حجيت بقلبيي
وكعدت اكلت ..
تغدينا الظهر كلنا سويه ونظرات شهد دقتني
ماعرف شبيها وياي فسرت نظراتها على انها تعالي
لاني من غير محافظة وفجأة يروح تفكيري لليلة عرسي ويرن بأسماعي صوت سيف وهو يصيحلي شهد!!
وارجع وابعد هالتفكير واكمل اكل
سألها عمي عن حسين ابنها ليش ماجاي يتغدى
جاوبته نايم من يكعد اصبله
سألها راح هنا يمنا ان شاءالله لو ترجعين ؟
_ لا عمو راح ابقى يمكم
وباوعتلي حسيت بيها دنكت ماجاي اكدر اتحكم بردة فعلي وترتني شعليه اذا بقت او لا !!
بعد الغده كمت غسلت مواعين وصعدت فوك غفيت شويه وكعدت على صوت سيارة سيف دخلت للكراج انتظرت شويه اشو ماكو ماصعد ..
كمت من الفراش عدلته ونزلت شفت حسين ابن شهد بالممر حجيت ويا وتوجهت صوب المطبخ الي ع الهول بعدني ما واصلة للمطبخ انفتحت الباب
وطلع منها سيف رحت اريد اسلم عليه شفت شهد طلعت ورراه تفاجئت فتحت عيوني وافكار تدور براسي واسئلة بداخلي ، باب المطبخ ماينسد الي اسبوعين يمهم انه شمعنى اليوم مسدود وسيف وشهد بالمطبخ
اجه سيف باتجاهي كال هلووو بتثاقل بقيت نظراتي على شهد الي واكفة صافنة علينا
وحتى تجاهلت سيف وبقيت بس اباوع
اجه لزمني من خصري ودارني بالاتجاه الي جاي يمشي بي واخذني فوك لغرفتنا
ظليت بس افكر وهو طلع باكيت جكايره وظل بس يدخن
كابلته وكعدت متفاجئة من الوضع الجديد هو بالعادة يجي يبدل ملابسه ويتغدى صح يجي تعبان مرات ينام للمغرب مرات لا يكعد يسولف وياي ونضحك ونشاقه بس هسه مدري شجاه كتلتني الحيرة
سألته اصبلك غدا تاكل ؟؟
هز راسه علامة عدم الموافقة
ليش شبيك اليوم
ماكو شي بس تعبان ولزمت قضية صعبة وصاحبها مغثة لتشيلين هم انت
طفى جكارته وكام على حيله اخذ ملابسه وراح للحمام
....
وانه رحت كعدت ع السرير طلع واجه تمدد يمي واخذني لحضنه بس يتحسر هواي
وانوب ايد مخليني عليها والايد الثانية بيده جكارة يمتص منها الدخان وينفثه
باوعتله مقهورة شبيك سيف ليش هيج حالك انقلب فجأءة ؟؟
باوعلي خزرني سحب ايده من جوه راسي بالقوة وكام كعد كال لاتظلين تلحين ميسم كتلج شبيه خلص مرة وحدة اسألي
سكتت وهو راح للكنتور غير ملابسه وراح للمراية يمشط
سألته راح تطلع
اكتفى بهز راسه علامة الايجاب
كتله اطلع وياك ؟
جاوبني معصب لا حبيبتي اخذج تنكدين عليه ابقي هنانه احسن رايح لصديقي اني
كمل تبديل ونزل جوا كمت بسرعة تبعته
وجود شهد سوالي هاجس
شفته طلع وحده لسيارته صعد ساقها وراح
رجعت للبيت صارت شهد بوجهي ماحاجيتها صعدت فوك
بس كلش ضوجه وين اروح يربي
بدلت ملابسي خليت مكياج ورجعت نزلت
شفت سارة تريد تطلع بوست بنتها وهيه سلمت وراحت بقيت افتر بالبيت لو اكعد يم عمتي وابوهه
بس اخرب ضحك لان مو بعقله وعيب اضحك هو رجال كبير بس ماكدر الزم نفسي رجعت صعدت فوك حاجيت وردة سألت عنها وسديته رجعت خابرت سيف
حجيت وياه شويه وكال اني يم صديقي المغرب ارجع روحي هسه سديته وانه ضايجة منه ومن حالي...
لليل انه وشهد وابنها جنه بالمطبخ بس ابد مابيناتنا اي كلام انفتحت الباب واجه سيف بيده كارتون بيتزا خلاها على ميز الطعام وكال هاي بيتزا للي يحبها وباوع لحسين وغمز اله وحسين رفع ايديه وكال ههييه شكرا عمو رفعه وباسه
اجت شهد وكفت بصفه وتضحك احس نيران الغيرة بروحي تأججت وكفت اباوعلهم شهد فتحت الغلاف وسيف باوعلي وابتسم
سأل عن الكل وينهم كتله عمتي وعمي راحوا يودون الجد وسارة ورأفت طالعين
شهد كالت يعني بس احنا العائلة الوحيدة الموجودين وضحكت ضحكة
سيف دنك وظل يحك بلحيته
وانه محتارة حيرة بس الله يعلم بيها
كامت شهد طلعت ببسي وكلاصات وخلتهن ع الميز وظلت تقسم البيتزا
سيف كالي يلله ميسم تعالي گُعدي خلي ناكل
كعدت وهم هم كعدوا بس بقيت اباوع ومااكل لان مااحب اللحم سيف كال ميسم لاتخترعين وعبالج هاي ثريدة مشوية ترا هاي اسمها بيتزا
شهد ماصدكت وطكتها ضحكة عاليه
كام سيف طخها بزندها وخزرها
استغربت تصرفه وشون يلزمها
ومنا هيه لابسه بدي اسود وضاب عليها وحتى شويه قماشه خفيف ومبين زندها منه وجسمها مربربه
بقيت باهته حتى ابتسامة مااكدر ابتسم مديت ايدي لكلاص الببسي وظليت اشرب حتى مااكدر اكوم احس رجليه لزكت بالكاع
بعدها سيف خلص و كام وانا بقيت كاعدة وطول الوكت ساكتة وهو يسولف ويا ابن اخو اكثر شي وشهد تشارك بالحديث
من كام سيف شهد باوعتلي وكالت خو ماتغارين ؟؟
صفنت شويه يلله جاوبتها ومنين اغار ؟ من طفل يعني
ضحكت والله انت فقيرة وعلى نياتج شالت كلاصات الببسي وكامت متوجهه للسنك وكملت كلامها كالت هنيالي والله ههه هنيالي
بلعت ريك وصرت ارجف شنو هنيالج وشنو تقصدين
التفتت عليه تباوعلي بعين ونص شبيج حبيبتي ليش عصبتي كلت شي هسه اني ؟
بدخلة سيف كال شكوو وعينه على شهد وخازرهه ....
