رواية خيط وابرة الفصل الواحد والعشرون 21 بقلم شمس العراقية

صباح الخير على الجميع أحبتي ❤

لميعه ـ الدنيا توجعنا بس مرات الوجع الحقيقي يكون بشخص أنت تحبه وعزيز عليك وربيته وشاهد على كل لحظات حياته وحبه ..

موت صباح صح أذاني وخلاني أعتكف وأنعزل وصح أضحك وأسولف وأشارك أهلي أفراحهم ومشاكلهم بس بنهاية اليوم تجي على بالي هذيج الأيام الأحسب روحي بس بهذيج الأيام عشت والباقي من عمري كظيته هضم بهضم نهضمت من أهلي ومن خضير ومن الوگت وزماني ما نصفني مثل باقي أخواتي بقيت وحيده عود تالي ما تالي طلگوني بعديش بعد ما العمر خلص بالهضم وكسرة الخاطر ... 

كل هذا راضيه بي وأكول ميخالف وما أريد عوض بس لاتوجع گلبي على عزيز گلبي نافع.. هذا أمي وأبويه شايفه الدنيا بعيونه بشخصيته وبمواقفه الحلوه تمنيت لو عندي بنيه ويصير رجل بنتي والله أكون محظوظه زماني ما أعرف سميعه شلون فرطت بيك وهضمتك

    ــــــــــــــــــ

طول فترة العرس أنه عيوني تراقبه تراقب نظراته حسرة گلبه جعلها بگلبي گون والله أمه ما مهتمه وشايله همه بگدي .. لما فض العرس ورجعنا ويسوق وهو ساكت وأمي صافنه عليه وخايفين لايصيرله شيء وتطگ رويحته بس صدمنه بهدوئه وانه هذا الهدوء گلبي ملجوم منه واليسكت گلبه مخزن قهر وهضم .. 

عبرنا من كدام بابهم وباوع على بابهم وتالي مشينا وطبگت السياره ونزلنا بس أني وأمي نباوعله . 

الحجيه عطايات ـ يبعد حيلي بيك شيء أمي وأبوي أنت حاجيني يحبوبه لاتبقى ساكت وتوجع گلبي.. ولك حبوبه خلها تولي ما تستاهل تقهر رويحتك عليها هي الخسرانه شد حيلك حبوبه أنت زلمه حوگ وحيد ما تكسر مره . 

لميعه ـ ضل ساكت ونزل وعاف السياره برا ودخل يمشي ومبين مت مشيته حيله مهدود.. عفتهن ولحگته لغرفته راد يقفل الباب .. نافع عمه 

نافع ـ عمه والله ما بيه شيء بس تعبان وأريد أنام .

ـ بس أنه يضل بالي عندك 

ـ لاينشغل بالج ما بيه شيء ونبهي على حبوبه وأمي لاتجيبون طاريها أبداً أسوي ما أسوي اليحجي عليها وتزوجت الله يستر عليها ويوفقها بحياتها . 

ـ يجرالك بس أطلب منك طلب

ـ گولي عمه بس أستعجلي 

ـ هذاك الدرب لاتوصله وتخرب روحك مثل هذيج المره هذن السوالف ما يوالمنك أنت خوش زلمه معدل .. درب الحرام لاتجيسه يبعد عمتك

ـ لا عمه شسالفه هذيج المره غلطه ما تكرر بعد 

ـ أي فدوه لطولك أنه علمود لان رجلك تأخذ على الدرب وبعدين تتعلم وتتدمن الحرام يتشربك بجسمك واحنه صايمين مصلين وتعبانين عليك.. هونك على رويحتك 

ـ سالمه رويحتك أخذ راحتك .. دخل وقفلها بس سمعت طگة المفتاح وعفته ينام أحسن ما يطلع ويشيل رأسه والف حسبة تجيني عليه أخاف لايروح يشرب السم مثل هذيج المره شرب ولحك العرگچيه ودخل الحرام لجسمه ولو هو جان متندم وگال بعد ما

تعاند گون صدك ما يعيدها.. 

وضل على هذا حاله حاسب نفسه بغرفته سوده بوجهي شگول عليج نور هو يتنفسج هواج إشسويتي بينا .. لكيته كاعد لوحده ويدخن وأجتي أمي وراي وكعدت بصفه 

الحجيه عطايات ـ ها يمه شلونك اليوم . 

نافع ـ المنطقة فرغت من نفسها حبوبه والهوا يخنگني.. حبوبه هي تستاهل حبي الها لو ما تستاهل گولي ما تستاهل ورگدي نار گلبي المورثه عليها رگديها

ـ ما تستاهل يحبوبه أي ما تستاهل خلها تولي ولك يمه الف من تتمناك وتتمنى تصير رجلها أنت زلمه حوك وحيد زلمة مشعان من تمشي ترچ الكاع شمالك بنيه توكعك مو هذا عشمي بيك يحبوبه . 

وعمت عينها العافتك عمت عينها ولك يمه بس ريحتك الطيبه تعيشني عمر چا أذ تصير رجلها وسيدها شيصير بيها من عمت عيونهن الزعلنك وخربن أحوالك 

وبهذلنك وجوني بگلبي ولك حبوبه عيوني ما يچيها النوم وأنت مالك حس.. أريدن أسمع حسك وصياحك ومشاكل عارك يمه عارك سوي التريده بس لاتبقى ساكت انه عايشه على حسك يحبوبه چا أنت مو تعزني ليش توجع گلبي . 

ـ يصير خير حبوبه 

ـ الخير بوجهك.. چا گولي شتريد گول يمه أطلب وأمرني وأنساها يحبوبه أنساها وتنسي مع الوگت تنسي جيب التنسيك وتشيل همومك وتطيب جروحك جيبها والجرح ما ينسي يحبوبه أذا ما يچي من يداوي . 

ـ الله كريم 

ـ يعني مخلها بعقلك.. أي هيج أريدنك ومريتك موجوده شحلاتها والله تعادل الما أريدن أجيب أسمها وأقهرك بس خوش بنيه وحلوه وتلوگلك وشيخة النسوان خوما عودة مطيرچي وخشمها يابس . ها يمه شگلت 

لميعه ـ ضل ساكت ما حجه وأمي جلبت بهل السالفه هو وينه وين الزواج وهذا مو حل والله مو حل بس المن تحجي وياهو اليقنع . 

ـ أنت عرفتها منهي المخليه عيني عليها مو أي عرفتها نويرس يحبوبه .. هاي هي أنه أخليك تدانش فكرك يله لميعه يمه عوفي لوحيده . 

ـ مشت أمي وخليت أيدي على كتفه لاتستعجل بقرار زواجك تمهل وما عليك من حجيهن وأمي ياهي التشوفها تريدها الك لو يوكع بيدها تزوجهن كلهن الك وتخالف حتى الشرع بدال الأربعه تسويهن ثمانيه 

ضحك وضحكته شرحت روحي بعد روحي يعمه . 

سگت وتالي گمت وعفته وحربيه تحجي ويه ٱمي

حربيه ـ چان أستحى متگتدر وعازل نفسه عليمن على نوره! ولو تستاهل ما يگتلني قهر شو هي ما مصدگه أخذت غافر اليشوفها يگول جانت عاشگته ميته عليه والضحكه ما فارگت سنها وما شالت عينها من عنده وتسولف ولا مهمته ولا چن كاسرتلها گلب يسوه رأسها ..

الحجيه عطايات ـ گافي يحربيه گافي شلزومه هالحجي أكسر حلگج أذا تجيبين طاريها تزوجت الله يهينها ويه غويفر يتساهلها وأبنج الله يجبر گلبه ويعوضه چا بيدي وبيدج هذا شغل رب العالمين لاتضلين تمسلين وتهبدين بسوالفج وأبنج وصى وگال ما أريدن أحد يجيب طاريها ويحجي عليها شمالج نجلبتي وأنهديتي على بت أخوج . 

ـ خليني يعمه خليني من نار گلبي على وليدي چا هين عليّ من گسرت گلبه وخلته معلعل وراها وهي سافرت تتونس والله يسوه رأسها الجلبه عنفصت وشالت خشمها علينا وجذب صدگتي مال أبوها غاصبها بس هي رادت تأخذ ثأر أمها وتكسر گلب وليدي وگالت أبوي غاصبني وذبنها برأس صباح وتالي صباح مات وخلاها على حل شعرها بعده ترابه أخضر دزتله خبر وأجه عقد عليها غضبن الله عليهن وعلى گوات عينهن .

ـ مو اكوم أكسر هالعصا على جنابج وتالي وياج شنهي تخالفين شغل رب العالمين أبنج مو نصيبها مو نصيبها وخايفه عليه روحي حاجي كعدي يمه طيبي خاطري بكلمه مو مكابلتني وتحجين على عزيزة گلبه أنتِ أم من عمت عينج وعين الوگت الخلاج تگونين أمه مو بين عليچ مهمتله بس أجاج الليل وگابتلي مشعان لو كاظه عبابتج لأهلج موو شفتج دگيتي عليه الباب وسألتي عنه وعن حاله بس شاطره تلعلعين بلسانج بحجايات مالهن لزوم والله أذا نوب سمعت منچ حجايه لو جايبه طاري نويره ما تلومين الا نفسج أطيح حظج نويره ما ينجاب طاريها وينحجي عليها بالموزينه.. گومي لابارك الله بيچ 

ـ گايمه يعمه گايمه وأحاجي على نورس وأقنعه والأ ازوجه بهل الشهر بس أخ فاتت لو باقيه ما مسافره جان زفيته كدام عينها وأحرك گلبها مثل ما حرگت گلب وليدي . 

ـ يا طلابة الما تخلص خايبه ما تنجبين وتسكتين البنيه تزوجت غويفر وبعد ما يحترك گلبها وأنه شفتها طول العرس هي صاينه نفسها وعيونتها عن أبنج لان هاي الأصول چا شتردينها متزوجه وتعشك غيره صدك ما تستحين على عمرج.

ـ أي لان تحب غافر وجانت تضحك على أبني ومأملته بعشگها وهي گلبها محجوز أم الفنود حرگت گلبه الله يحرك گلبها 

ـ مال أحطنج هسه وأدگج دگه زينه كدام ولدج وبناتج وأغسل شراعج يحربيه عوفي الولد على راحته .

لميعه ـ مشت عصبيه لعنده يبوو جلبن عاد ما ينطنه مفگه چا هو ما عنده عيون يشوف نورس الا انتن تحجلها بس هنا هيج دومهن مستعجلات.. وشويه ورجعت تحجي عليه 

حربيه ـ بس ساكت ما يحجي يعمه حاجيته عليها ساكت 

الحجيه عطايات ـ مو گتلج عوفي على راحته وأنه حاجيته لو صفى باله يجي يگوللننه شجلبتي . 

حربيه ـ چا يضل على هذا حاله 

لميعه ـ ترى الولد ما بي شيء حاله بس ساكت ويأكل ويشرب ويانا بس أول يوم نام وما طلع من غرفته وأخذ أجازه يجوز تعبان من هوسة العرس هو هواي ركض وساعد غافر ويريد يرتاح 

شتردن من عنده موزين ضل بالبيت ما طلع وأنتن ما تخلنه ينسى كلساع وراكضات عليه وتفتحن جروح ونزوجك ونزوجك چا هو هيج ما تنطنه مفگه . 

حربيه ـ وشگو ساكت لا حجايه لا سالفه عليمن عليها خفت جهرتها لو تسوى ما يگتلني قهر مدري شحب بيها . 

لميعه ـ شلزومه هالحجي وعوفي أبنج يحربيه هو من كيفه يرجع يسولف ويحجي يعني الواحد ما يضوج . 

عفتهن وأمي هم گامت وراي وبعد ما لحت عليه ولا جابت طاري نورس سگتت بس حربيه أكلت رأسه ملحگته وخلتها برأسه الا تزوجها لنافع وهو عمت عيني ماله صوت الا بيوم گاعدين كلنا وحجه وصدمني بهذا قراره 

نافع ـ حضروا نفسكم ترحون تخطبولي نورس . 

حربيه ـ ليش والولد فكر وشاف لازم يتزوج وزين ونعم ما أختاريت يا يمه تدلل .

مشعان ـ نافع بابا گوم أريد أحجي وياك يله أبني 

لميعه ـ گام ويه مشعان للغرفه وسدوا الباب وحربيه سنها طلع وفرحانه وباقر باوع على أمي وهز رأسها 

وگام ما شارك .. وشويه وگمت وگفت يم باب غرفته 

مشعان ـ هذا مو حل بابا أذا تريد تنساها الزواج مو ينسيك نور.. لاتستعجل بقرارك بابا وما عليك من حجي حبوبتك وأمك حجي نسوان دومهن مستعجلات . 

نافع ـ لا بابا من زمان هالقرار برأسي بس ما جان أكو وگت مناسب وهسه أنسب وگت 

ـ لان هي سافرت هسه قررت! أحجيلي بابا . ـ أي بابا 

ـ ليش عفتها دامك هيج تحبها وما تريد تكسر خاطرها حتى وعلى ذمة غافر.. ليش خليتها تروح من أيديك ياما گتلك خلي أخطبها الك وعمتك جانت موافقه وگالتلي أذا أبنك بعده يريدها تعال گبعها وأخذها بس أنت ما الله هداك وفرطت بيها وبحبك الها . 

ـ بابا ما بيها داعي نحجي بعد.. سدوا الموضوع وهي تزوجت عيب عليه أذا جبت طاريها وهي على ذمة صاحبي .. وصي أمي تكظ لسانها على نور ترى ما يصير خير أذا سمعت حجايه عنها بالموزينه .. زوجة صاحبي وبس غير حجايه ما أسمع عنها . 

ـ بابا لاتوجع گلبي والله شايل همك هذا القرار عوفه هسه وبعدين من يصفى بالك وفكرك تدلل 

ـ لا بابا هذا هو . 

لميعه ـ الباب جان مفتوح شويه وشفتهم مشعان تقرب وطبطب على أكتافه وطلع ورحت عليه تأنيت بقرارك نافع لاتستعجل عمه . 

ـ أي عمه . قصص ماي هوبس 

ـ چا إذا هيج براحتك والله يقدملك البي خير 

ـ ممنون منج عميمه ولاتشيلين همي ما بيه شيء والله 

ـ الله يريح بالك يعمه.. طلعت من عنده وحربيه مكيفه وفرحانه وثاني يوم حربيه من الصبح مشت لسوك تجيب الحلقات..

أمي خابرت على أخواتي يجن وخابروا محمود وبلغوا وأبوي وعمي رزاق ومنعم أجو من القريه وتحضروا كلنا خوش مشيه .. وزهور وزينب من الصبح راحن عليها يحضرنها لان گالوا يسوله حفله خطوبه لان محمود منطيهم الموافقه يعقدون الهم ويلبسون الحلقات وگشخنا وتحضرنا والكل مخبوص وهو هم كشخ ولبس قاط عيني طولك يعمه .. 

وطلع وأمه وأخواته يهلهلن ويطشن الجگليت دمعت عيني عليه تقرب باسني وحضني ومشينا صعدني بسيارته أنه وأمي ومشعان وحربيه . 

وصلنا البيت وأستقبلونا وسميعه ما مقصره محضره الضيافه والبنات كاشخات وجايبات هاي كوشه مالت حفلات ومرتبات الصاله شحلاتها وحتى الديچي هم جايباته متحزمات لخطوبة أخوهن . 

وطلعت نورس سلمت علينا وحربيه طشت الجكليت وگامت تهلهل وأمي تكرص بيها 

الحجيه عطايات ـ بعدنا گلشي ما مسوين من كرص يگرصج اي والله شبيج مفلفله أم الولد تصير ثگيله رگدي على عقلچ . 

لميعه ـ سگتت وكعدنا گلنا وصبيحه ما شالت عينها من نورس! ولبنى ولينا جابن الضيافه ويفترن ما قصرن وأجن كعدن بصفي ومر الوگت وصار الكلام ودزوا عليها وحربيه ونهاوند گامن وياها وعقدوا الهم وبلشت الهلاهل وطشت الجگليت . 

نورس مبتسمه بس دمعتها بطارف عينها گربت صوبها مبارك نورس حبيبتي تستاهلين ونافع خوش ولد 

نورس ـ الله يبارك بيج عيوني خاله . 

لميعه ـ كعدت والبنات أخذن وياها صور وشغلن الديچي وحربيه طلعت الحلقات حضرتهن وقبل لايگومون الزلم حربيه جابت نافع وهو يحجي عليها . 

حربيه ـ دتعال شوف خطيبتك سلم عليها بارگلها 

نافع ـ يمه شسالفه أني أجي ليش تجرجرين بيه 

حربيه ـ غير فرحانه بيك يا أمي فدوه لطولك مبارك يمه مبارك . 

لميعه ـ دخل وباوع على سميعه وسميعه تقربت باسته 

سميعه ـ مبارك يمه شايف الف خير تستاهل . 

نافع ـ الله يبارك بعمرج عيوني عمه . 

لميعه ـ وتقرب نورس گامت وگفت وهو وگف بصفها دايخ ومتوتر مدري ضايج وجهه بي هواي معاني ما تتفسر . 

حربيه ـ سلم عليها شبيك يمه 

لميعه ـ سلم عليها وأمي باسته وبارگتله وكعد شويه

وأنطنه الحلقات لبسها الحلقه وهي كذلك وبوسط الهلاهل والأغاني وعلگتها صفا هي وأخواتها ذبت

للحم ويمسح بگصته ويباوعلي وأخذوا صور وما طول وگام عالزلم ولما فضت الخطبه عالخير وگمنا وبطلعه حربيه ما گدرت تسگت 

حربيه ـ بنتج شوگت ترجع من تركيا 

سميعه ـ بعد ما گالت وما صارلهم كم يوم من سافروا 

صبيحه ـ ما يطولون أن شـاء الله يومين بزايد ويجون 

حربيه ـ أي زين علمود يحضرون عرس نافع لان أحنه ما مطولين أن شـاء الله لان نافع مستعجل . 

سميعه ـ بالخير عليكم عيني نافع يستاهل كل الخير 

لميعه ـ أمي هزت رأسها ودگت عوجبتها ومشت ونورس وگفت ورانا مستحيه وطلعنا وضلت حربيه تسولف وياها . 

رجعنا البيت وأبوي يريد يرجع العرب . 

الحجيه عطايات ـ لميعه يمه حضري رويحتج نمشي للقصر أبوج مستعجل يريد يرد العرب صايره طلابه ويردونه يفضها 

لميعه ـ أي يمه هسه... دخلت تحضرت والبيت مخبوص ما الك رجل تمشي من مشينا گلبنا ومشن وشفت لبنى تعزل لوحدها وحربيه تصييح على بناتها 

حربيه ـ وين نكبرتن غيرن ملابسجن ونزلن عزلن ونظفن البيت خليتنا محويس يله كلمن تشوف شغلها بساعة زمان أريد أشوف البيت يلمع لمع هسه باليل جاراتي يجن يباركلي على خطوبة نافع . 

لميعه ـ لبست وطلعت مستعجله أخاف من أبوي يعيط ويثولني حتى ما سلمت گبل صعدت السياره ونافع راد مني أبقى بس أبوي ما رضى لان وهبيه وصالحه لوحدهن وهما متعلمين عليه أبوي ملابسه محد يغسلهن ويگويهن غيري وعلاجه أنه أذكره بي.. أنه أيدهم ورجلهم . 

نافع ـ عميمه تعالي قبل الحنه 

لميعه ـ ليش شوگت تعرس 

ـ هالأسبوع بس أكمل ترتيبات . 

ـ بيها الخير أن شـاء الله .. ودعناهم وطلعنا للقصر ومن وصلنا وهبيه وگفت تسألنا خطيه 

وهبيه ـ شلونها جنتي زينه 

الحجيه عطايات ـ جنتج ذهب صافي شلون بنيه الله يعلگها بذيالج يوهبيه تستاهلين هيج چنه أنتِ طيبه ولدج مثلج وجنتج هم گلبها طيب مثل الحمامه تفتر علينا ولا جنها بعدها جاهل مره معدله وهذيج وينها مبينه أم بيت وشيخة النسوان ينكشخ بيها . 

ـ أي فدوه لطولها خوش بنيه ذوق أبني بعد الله يحفظهم ويفرحني بيهم بس أنه ششفت منها شگول على أبنج خذاها وخله وجهي مطحن . 

ـ سعيدين وبعيدين المهم راحة وليدج والله يطلع أبنج بالسلامه وزوجي وأفرحي بي وبمرته الشيخ يضل بالقصر هو وحرمته . 

ـ الله يسمع منچ يعمه 

صالجه ـ صدك ما حجيتن النا شخبار العروس سولفن النا على خطوبه منهي خطوبتوا الها ياهي منهن نويرس لو نباوي 

لميعه ـ لا نورس . 

صالحه ـ بيها الخير الله يسعدهم نافع يستاهل . 

لميعه ـ أمين.. عفتهن وأمي تحجي الهن ودخلت غرفتي غيرت ملابسي هالفتره المرت حيل تعبت كظيتها فراره وبعد وراي عرس نافع هذا أخدمه بماي عيوني يستاهل حبيب عمته الله يتمم الك عالخير 

____________________

لينا ـ الحياة حلوه لوما تصرفات بعض البشر تخلينا نرجع خطوات مو خطوه ليورا ونتعثر بناس صعب نتخطاهم.. 

رجعت من المدرسه لگيت خالتي نايمه يمكن من شغل البيت وهوستهم تعبت ونامت نقهرت عليها ما كعدتها بس لكيت طابخه الغده.. صببتلي وكعدت أكل وگفتلي نورس يم الباب متخصره تجاهلتها ورجعت أكل . 

نورس ـ خوش لكيتي خدامه وأبلاش وعالحاضر أحد گايلج مفتحين مطعم أحنه وگبل الجدر شهل النفسيه العندج على أقل غيري ملابسج غسلي وسخج . 

لينا ـ تجاهلتها تريد تتعارك ومالي خلگها صارلها أيام يحگها جلدها تحير بمنو تطلع قهرة غافر وسفرته هو ونور ميته ميته . 

ـ مو أحاجيج 

ـ شتردين نورس؟ جوعانه وجاي أتسمم والأكل خالتي طابخته على شُــنو تحجين وما عاجبج 

ـ لا حبيبتي أني طابخه الأكل 

ـ ذبيت الخبزه باوعت على ماعون الدولمه خرب حظي والله عليها نفس بالأكل رهيب وكل ظني خالتي طابخه 

ـ شحجيتي 

ـ لا هيج وشعجب أنتِ تطبخين الأعرفه خالتي هي التطبخ 

ـ شبيها ليش ضغطها صاعد 

ـ من ورا ميثم راح بيت جدي وتعاركت وياه 

ـ وتالي هسه شلونها وميثم رجع 

ـ لا زينه الحمدلله أي دزيت نبأ راحت جابته تغده وراح المدرسه .. يله خلصي وغسلي مواعينج مو تعوفين المطبخ مهوس لان أعرفج مخربطه 

ـ شگالولج عليه وسخه وتعرفيني ما صارلج يومين من أجيتي ششفتي عيني

ـ ما يحتاج أشوف بس أنبه 

ـ عافتني ومشت بغرور شگد مكروهه .. ردت ما أكل بس ماعون دولمه يموت باوعت وأكلته عالسريع وغسلت ماعوني .. رحت على خالتي لگيتها نايمه عفتها وطلعت وأسمعهن بينهن يحجن . 

نورس ـ كم مره حجيت وگلت ملابسج لاتعوفيهن مگلوبات بالكنتور عليمن طالعه مخربطه.. شگو مهوسه الغرفه وأنتِ الثانيه گومي سبحي وغسلي ملابسج وراج أذا أجيت ولكيت الحمام وسخ أشحطج بي . 

نبأ ـ كافي من الصبح لحدالأن بس تتعاركين ما مليتي

نورس: ـ من شغلجن! من العيشة! من الوضعية التعبانة اللي أشوفها گدامي.. درستن وتخرجن وصرتن نسوان، ولسة مخربطات وشالعات گلبي، إنتن وأبوية!

عفتهن ودخلت لغرفتي.. 

وثالث يوم صارت الخطوبة الصراحة انصدمت من خبر نافع ونورس! صفنت عليها للحظة، هي للامانة حلوة ومقبولة طويلة وجسمها مرتب متناسق ويه طولها محافظه على رشاقتها وشعرها بللون الجوزي وثخين ومتوسط الطول وعدها شامه يم شفتها شكلها مُلفت! وعيونها لوزيه عسليات ومسحوبات وبشرتها حنطية ممزوجه بين بياض وصفار وخشمها رفيع ومرتب، بس هذا الخشم العالي انطاها نظرة غرور

يعني كـ شكل تجذب وتلفت النظر 

​ما عندي عليها ملاحظات لأن ما عاشرتها ولا اختلطت بيها، كل اللي أعرفه عنها نفسها الحامضة المهم.. الله يسعدك يا نافع تستاهل كل خير ولو نور جانت من نصيبك جان صار خوش ثنائي، بس أنتوا ما عرفتوا تصونون حبكم، هواي بحرتوا والبداية ما ترضي رب العالمين طبيعي نهايتها ما راح ترضيكم .. 

هالفترة التهيت عندي أمتحانات شهريه ونافع مقرر خلال هالفتره يتزوج كلش الوقت مو مناسب مو مال عرس أنطوا مفگه خلونا نشتاق لـ أجواء الأعراس لو عرس ورى عرس لو ماكو .. 

جنت طالعه للخط وأجه نافع وياه ناجح وعمتي حربيه سلموا عليه وعمتي نزلت على نورس . 

نافع ـ أذا يتأخر أمشي ويانا نوصلج بطريقنا . 

ـ لا تسلم ما يحتاج هسه يجي بس أنتوا شعدكم من هسه غباشين 

نافع ـ يله نلحك.. يله وصل خطج 

ـ باي .. مشيت وصفا بالخط گالبه خلقتها صعدت بدون ما أسلم ونورس طلعت كاشخه وعبرناهم ورحنا لمدرسه 

صفا ـ ما نعجبج مـا تگولين صباح الخير 

لينا ـ ما جاوبتها 

ـ مو صوجج صوج اليحاجيج واليصادقج عابتلج وعابت شگلج . 

ـ تجاهلتها ولو بيدي ما أروح وياها نفس الخط بس شُــنو حجتي ونافع يضل يسألني ويخلي بيها الف سؤال والشك يسكن رأسها وأذا أخته نلگفت ونگشفت يذبها برأسي يگولي جنتي تدرين وسحبتي نفسج .

الأفضل أمشي بدربي ومالي شغل بيها وين تصفى خل تصفى .. وصلنا وأفترقنا شگد تحاول وياي وعبالها زواج نافع يقربنا ما تدري بگلبي كرهه ناحيتها مو طبيعي بالأخص أخر موقف منها الحقيره جان موتنني 

ومرت هالفتره على خير مبتعده عنها قدر الأمكان رغم نتواجه دائماً بالأخص من أروحلهم أشوف لبنى أصادفها 

وبيتنا هوسه رايحات جايات عمتي حربيه وزهور يجن يأخذن نورس يجهزن الها عرسها قريب .. ونور نحجي وياها كاميرا هي وغافر مبين عليها حيل فرحانه ومتونسه طول الأتصال تضحك وجهه منور الله

يسعدها .. 

كاعده يم لبنى جاي تشنك العجين تريد تخبز لبنى لاتزعلين مني بس أنتِ وحده مكفخه وعلى گد الأيد 

لبنى ـ ليش شگو أسم الله شهل الحجي لينا أحترمي 

أني مو جاهل بگدج 

لينا ـ هو لان أكبر مني أحاجيج هيج .. ليش تخبزين ترى بعدج عروس بيهن لـ ٦ أشهر عواريس ويتنفضن وأنتِ لازمه التنور وتخبزين ومجاويه أيدج عليمن والمن

ـ ما تعرفين تحجين أسكتي والتزوج بالعيال شتسوي تضل لازمه غرفتها وكاشخه والمشاكل گابه عليها ما تعوفيني .. يله أخذي خبز حار وروحي البيت وسلميلي على خاله . 

ـ حطتلي خبز بالصينيه ومشيت ودخل نافع شايل أكياس نزلهن من أيده وباوعلي وأبتسم 

نافع ـ ها ولچ يمنا .

لينا ـ أي والله أجيت أشوف لبنى ولكيتها تخبز وأخذت خبز وراجعه البيت تأخر الوگت 

ـ وين دبقي وگت عشه هسه وشلون جايب عشه ريحته ترست الفرع يفوتج . 

ـ لا دخيلك.. تسلم عشاك واصل 

ـ لا يابه ما مقبوله منج دتعالي تردين عزيمتي 

ـ والله خاله وعمي محمود ينصبون فاتحتي 

ـ أوكفي خل أعزلج حصتج .. لبنى تعالي عزلي حصتها من المشاوي . 

لبنى ـ أي هسه بس أطلع الكرصه . 

لينا ـ أخذتهن وكعدت تعزلي وخلتهن بالخبز وهو واكف واجتي عمتي حربيه باوعت ومشت مثل ما عجبها شكد احترقت نفسي ولبنى غلست وخلتهن بإيدي . 

نافع ـ بالعافيه .. أمشي أوصلج 

ـ لا لا ما يحتاج أروح مشي 

ـ دنيا غوربت وين مشي أمشي وبله لغوه . 

ـ صعدت بسيارته وعمتي تباوعلنا غلست عليها هو عرض يوصلني ليش هالنحس لما بنت أخوج .. 

ـ عرسي الخميس .. عاد تفرحيلي لا

ـ أي ليش ما أفرحلك والله فرحانه الك من گل گلبي 

ـ ها أكيد 

ـ أي والله أنت تستاهل .. ليكون عبالك ما أفرحلك لو مقهوره لان ما أخذت نور 

ـ لا مو هيج ونور تزوجت الله يسعدها 

ـ چا عليمن 

ـ ها تحجين بالچا 

ـ تعلمت منكم ما گتلي . 

ـ شگولج يابه .. هيج والله بس سألت تفرحيلي تركصين بعرسي ردح مدح هههه 

ـ لا عزا أبويه ميت أني بعرس أخواتي ما ركصت بعرسك أركص 

ـ لو أدري الحزن يرجع الميت أسكن المگابر وخالي جان عزيز عليه يمكن أكثر منجن حيل أعزه حسبة أبوي رباني على أيده .. بس الموت حق علينا كُلنا والحزن اله ساعته والفرح اله ساعته ووگته وأذا عالعالم خير شر ما خلصانين .. أريدج تبينين الهم فرحانه من صدك لان أكو حجي على أساس مقهوره عليه لان تزوجج وما أخذتج ههه 

ـ عزه منو اليحجي أشك حلگه وليكون أنت مصدك وصارلك ساعه تسألني 

ـ لا والله أنتِ أختي مستحيل أفكر غير تفكير ولا تراودني عنج فكره أنه أنتِ معجبه بيه البگلبج بگلبي أثنينا نتبادل شعور الأخوه وبس 

ـ أي بالله العظيم أحجيلهم هالحجي 

ـ عادي طنشي 

ـ هو هم هيج .. ووصلنا البيت نزلت مشكور عالعشه 

ـ أنطي منهن لنورس 

ـ ها طلع العشه الها 

ـ لا والله الج وأصلاً تتنظرني أخذها وياي تتعشى يمنا 

ـ ها أي شگو بيها خل أصيحها الك 

ـ لا لا عوفيها على راحتها هي تچي... يله دخلي عشاج برد . 

ـ تمام باي .. دخلت ونورس تلبس حذاءها وتصيح على أخواتها . 

نورس ـ جنطتي ركضي جيبها 

نبأ ـ هاج وموبايلج نافع يتصل عليج 

نورس ـ أكيد وصل .. جيبي الحافظه مالت الكبه عالكاونتر لا أنساها . 

لينا ـ يم الباب ينتظرج على كيفج لاتستعجلين 

نورس ـ ها وشمدريج 

ـ جنت يمهم هو چابني . 

لينا ـ طلعت عليه ودخلت واني ونبأ صبينا العشه سوا ونبأ محبوبه ولطيفه عكس أخواتها أحسها تشبه خاله لميعه .. وأجتي خالتي وعمي محمود أجه من برا وكعدنا نتعشى وشاف المشاوي كدامي باوعلي بخزره طلع لگمه من خشمي . 

محمود ـ منين هالمشاوي شنو موصيه بس الچ 

لينا ـ لا جنت يم أختي ونافع ذكرني . 

ـ وأنتِ شعندج تأخذين وتلگمين يم البوب مثل الجلبه جوعانه جايبه عشاج من نافع! وبعدين كم مره منبه عليج ما تضلين مسربه على أختج والله أذا سمعت بيج رايحه أگسر رجليج ما عندي بنات دايحات . 

ـ أني مو جلبه والكم أكل من البوب أحترم نفسك وبعدين بيت عمتي وبيت أختي وأورحلها وأني مو دايحه وحكمك على بناتك مو عليه ومكانك عمي وبس لاتشوف نفشم زايد . 

ـ هاي عليمن ولچ عليمن . 

ـ بعد لگمه بحلگي وطفر عليه الله شاهد من قوة الضربه حسيت كلياتي وگفن شايف من تجيك ضربه على ظهرك تحس نفسك نكطع أني هذا شعوري ما أعرف ضرب منين يجيني فقد ونكلب وحش عليه وخالتي تعييط وتجر بيه تحاول بس تخلصني من تگدر أخر حضنتني ونامت عليه شالها ودفعها بعيد وتوالني بهل الضرب طلع قهرة المركز بيه .. 

سميعه ـ يا ظالم يهودي عوفها تنكسر أيدك أن شـاء الله عوفها ولك يتيمه تكسر ظهرك عوفها أشسوت وتضربها ضرب مال كفار .. محموووووود عوفها . 

لينا ـ ما سمع الها ولتواسيلها حتى وگعت على رجليه ويضرب بيها وبيه كلما تحاول تنقذني يدفره يخليها شايغه روحها .. الا نبأ عضته بكل قوتها بس ما ضربها يله أبتعد عني

نبأ ـ عوفها موتتتها عوفها شنو من بشر أنت .. ضربك هذا يذكرني بإمي جنت هيج تضربها لما ماتت! 

محمود ـ نبأ بابا سدي حلگج سدي حلگچ 

نبأ ـ أذا متعوفها قسم بالله العظيم وروح أمي أروح على جديتي وأخذ سبأ وياي وبعمرك وحياتك تحلم تشوفنا وروح أمي أسويها بابا . 

لينا ـ تحجي بتهديد وهي ترجف للحظه أبتعد وهو يراقبها أحس هدت حيلها بهل الكلمتين وگتها عرفت نقطة ضعف عمي محمود بناته ما أعرف شنو الذنب مسوي ويه أمهن يخلي يضعف كدامهن!.. 

يمكن صدك أمهن ميته من قهره وخبالاته لان السمعت عنها يگولون حيل حلوه وخوش مره وطيبه والكل جان يشهدلها بأخلاقها وجمالها ومحبوبة عند عطايات بس ماتت من قهر محمود ومهديه وسحورتها

عفت نفسي وگمت أفكر بمرته! ضل ينفت مثل الصور وصافن على بنته وهو صافنه عليه وكل جسمها يرجف وبعدها شال السويج وطلع وما شفناه روحه بلا ردة أن شـاء الله حادث ونخلص منك يا ظالم يا يهودي . 

نبأ ـ لاتدعين عليه بالموت أحجي أغلطي بس بالموت لا أني أمي ماتت بالصغر ونهضمت ما أريد أعيش شعور اليتيم والهضم مرتين .. شعور اليتم ما ينعاش وأنتِ أكثر وحده حاسه بشعوري لاتدعين عليه بالموت الله يخليج هو صح قاسي وظالم بس نحبه ويحبنه لان يضل أبونا وما النا غيره . 

سمعيه ـ گومي غسلي تنكسر أيدك يمحمود گومي 

لينا ـ گومتني وغسلت ونبأ وسبأ شالن مواعين العشه وغسلن ونظفن المطبخ وأني كاعده مخنوگه والضرب مكانه يوجعني وخالتي يمي تحجي وياي بالي مو يمها ردت أخابر نافع وأكوله وأخلي يطيح حظه بس تالي سگتت وگلت لا خطيه عنده عرس وفرحان ما أخرب عليه فرحته ويتعاركون بسببي مهما يكون خاله وأبو خطيبته

سميعه ـ أمشي نامي عندي عمج مخبل من خبال خبله گون الله جايبلي بهل المخابيل . 

لينا ـ نمت على جربايتها بمكان بابا يالله شعور الحسيته وأني نايمه بمكانه شعور الأمان كله أمتلكته بجيت وينك بابا صح ما حسستني بوجودك وحنيتك علينا بس والله جنت مالي عليه گلبي جنت بإمان بوجودك .. 

لليل گمت مخنوگه طلعت برا وأسمع نورس تحجي ويه أخواتها . 

نورس ـ وعلى شنو ضربها . 

سبأ ـ راددته على الأكل لان نافع ذاكرها بالعشى 

ـ وشصار قابل وأذا ذكرها ما تستوجب يگوم يضربها 

نبأ ـ أبوج ظالم لوتشوفينه شلون يضرب بيها ضرب ويغلط ويفشر بالگوه خلصتها منه . 

سبأ ـ الا جابت طاري أمي يله عافها حتى خالتي من خلصتها دفعها وضربها 

نورس ـ يستاهل ولا يبطل سوالفه وين راح هو 

نبأ ـ ما أدري شال رأسه كالعاده قابل ما تعرفينه 

ـ سكر وعربده ونسوان ومتع! شلون ما أعرفه أني أعرفه بس خل يجي يصير خير لو أنتن لو مكسراته ما يتوب كلما يكول أخر مره يرجع أنكس عبالك جاهل البگده راحوا حج وعمره وهو على هذا الدرب التعبان . 

لينا ـ دخلت المطبخ شربت ماي وكعدت بالمرجوحه ضليت صافنه عالنجوم والسما شلون حلوه وصافيه وأحتاجيت لـ لبنى وبجيت شعوري هي أمي وما أكدر أتعود على فراكها وهي تزوجت وأستقرت ويه رجلها ما أكدر ... 

نورس ـ وين جنت! أصلاً ليش أسألك وين جنت ما أني أعرفك وين كاظي هاليومين بالملاهي ويم النسوان حاضن الحرام ..

محمود ـ نورس سدي حلگج لا أسده الج بالقندره وأطيح حظج .. سدي حلگج نورس وأمشي ولي رجلج ينتظرج 

ـ يمتى تبطل سوالفك يمتى بس فهمنـــــي يمتى 

ـ صوتج نورس صوتج لاتعيطيين وتنسين نفسج أطيح حظج والحكچ بأمج ومحمد ... سدي حلكج وأطلعي . 

ـ تلحگني بأمي أي عادي خلصني منك ومن سوالفك وبعدين وراي تضل عايش شعور الندم وتعاقب نفسك بالمكسرات التعبانه 

عود مقهور لان نبأ ذكرت أمي كدامك والله لو مقهور وتحب أمي من صدك ما تسوي بنفسك هيج يا بابا يا قدوتي يا هيبتي يا ال... محمود يل أسمك يلمع بالحكومه ويمنا طامس بالحرام ليش هيج بابا ليش . 

ـ شتهجم يا بيت بابا يا بيت ليش أنت عندك بيت مثل الأوادم والعالم والناس شو بيتنا بعته وصرفت فلوسه عالنسوان وأيجارات الشقق ليش عبالك ما أدري فلوسه وين راحت!! تالي بقينا يم عمتي ساتره علينا هي وخالي

نوب ركضت تزوجت خالتي سميعه زواجه مالها داعي من الأساس بس گلشي بي مصلحه الك تركضله علمود تلكي بيت يلمك وتلكي من يخدمك ويغسلك ملابسك لان أني حلفت ما أغسل ملابس البيها حرام لا أني ولا أخواتي ولكيت خالتي سميعه على گد أيدك وبعدين شمرتنا عليها علمود تخلص من همنا ويفرغلك الجو 

عيشتنا عيشة لفوه عند العالم من ماتت أمي وهضمتنا وخلتنا أمانه عندك .. أحنه أمانة عروبه لو نسيت 

هو مو المفروض الكاك يمي بهيج يوم مهم بحياتي مو نايملي بالشقق وزواج المتع يا حيف الوگت طمها بالتراب وخلاك أنت تسرح وتمرح بكيفك يا حيف . 

لينا ـ فتحت الباب وطلعت الوجه محتقن جرت شالها شمرته على رأسها ودخل نافع باوعلها وركز عليها كأنما فهم شبيها . 

نافع ـ شگو شبي وجهج صاير جمره! شصاير 

نورس ـ أخذني منا.. نافع طلعني . 

نافع ـ غير أفهم منج شبيج . 

ـ بعدين أحجيلك يله خل نمشي تأخرنا على أم الصالون نبا سبأ أمشن وياي . 

ـ ماشي وخالي وين 

ـ موجود يله نافع شغل سيارتك بدل اسئلتك يله تحرگن صارلجن ساعه شجنتن تسون ما متحضرات دفضني عاد

ـ على كيفج عليهن نكلبتي محمود الثاني 

ـ خلص ما أشبهج بي أنتِ نسخة عمتي يله أنتظرجن 

ـ هسه نجي وراك .. فضنني عاد 

سميعه ـ منو يروح وياج 

نورس ـ ما أدري يمكن زهور لو لبنى ليش تريدين تجين 

سميعه ـ لا أبوج ما يقبل گالن هنا يرحن وياها 

ـ أي ما أحتاج أحد يجي وياي . ديله عاد 

نبأ ـ أجينا بس تصييحين يله سبأ . 

لينا ـ أخذتهن وهي معصبه وما عرضت عليه أروح وياهن عوذه ويامن أروح شكو بيها لو ادخل جهرتي بصالون يله بلكي نافع يدز عليه .. ضليت اتأمل لما حطهن بالسياره ومشىٰ يبووه على حظج يا لينا . 

وبالبيت كعدت أمگيج بنفسي وطلعت أخبل شنو يعني أم الصالون تخلي أحلى مني وگملت ولبست فستاني وسرحت شعري ويفي وأنفتح الباب دخلت خالتي . 

سميعه ـ ما تجين تسويلي حجابي عمج حاجز الغرفه 

لينا ـ أي تعالي تقربت عليها مدري شعور غريب من أسويلها شيء وهي تباوعلي واني اباوعلها وكملت وكفختني على رأسي 

ـ خفت عيونج وجه الفاين

ـ خلف الله عليج خاله 

ـ يله گملي بسرعه خل نمشي ماطول عمج محموم گبل لا يكعد ويگبن خبالاته وما يخلينا نروح وكلهن راحن وضلينا بس أنه وياج .. وأنتِ أذا ما رحتي الا تطگيين 

ـ وأنتِ هم تطگين وياي أعرفج رويحتج خضره . 

لينا ـ أجيت خاله وطلعنا ردنا نأخذ تكسي وعرض علينا سيارة هشام! لميت نفسي وأستحيت منه وگف يحجي ويه خاله . 

هشام ـ أصعدوا أني أوصلكم بطريقي يله عمه 

سميعه ـ لا أبني كثر الله خيرك نأخذ تكسي وعلى أساس نافع يدزلنا ناجح بس تعرف عريس ومخبوص شيلحك وهسه هوسه عليهم. 

ـ أعتبريني بمكان ناجح ونافع لو ما تأمنين بيه عمه 

ـ لا عمه أنت حسبة وليدي وما شفنا منك الا كل خير .. يله لينا تعالي صعدي ماما . 

لينا ـ باوعلي ونزلت رأسي بسرعه وصعدنا بسيارته حكوميه خرب طگيتي لينا تصعدين سيارات فخمه والله شعور البرجوازية ما يعوفني أحب تفخخ مو بيدي هههه

يتبع تكملة البارت

يحجي ويه خاله ويه ميثم للحظه سگت وباوعلي بالمرايا عيونه عسليات نظراته تفحص فحص گبل صديت وجهي عالشارع بلعت ريك بــصعوبه هذا ليش هيج يباوع!! 

خابر على نافع ويسأله على مكان القاعه لما وصلنا ولكيناهم واكفين يم الباب ناجح ونافع ونافع يخابر ومخبوص ومن نزلنا رفع عيونه وصفن عليه وركز عليه هشام! وأشرلي برأسه أشرتله على خالتي وهشام نزل باركله وراح . 

نافع ـ ها العلاقات متطوره! عميمه شگو عليج بعد مو بحال نافع وبطولات نافع... ما نافع طوف 

لينا ـ خالتي وجهه أصفر وبلعت ريگها وگامت تعتعت بالكلام رجع حاجاها بعصبيه 

نافع ـ عمه هشام شوگت دخل عالخط! أني مو مانع ولد قادر ليش تخليني أغلط غلطه أخليج ترجعين مشي

أنتِ ليش ما أتوبيين 

سميعه ـ والله هو عرض علينا وهشام خوش ولد قابل أنت ما تعرفه 

ـ ما تمشي عندي خوش ولد وأبوه منو تعلميني بيهم شبيج رب الحلو تنسين.. شنو نسيتي سوالفهم السكط ويه نور لو أخر سالفه الهم بالمراكز ويه بنات رجلج وفضحونا ليش ما يحط عندج . 

أني نور ما سلمت عليها منهم طعنوا بيها لما گالوا بس ونور تزوجت غافر ولبنى وتزوجت باقر يعني ضلتلج بس لينا ودارت الدويره عليها أستلم العطلات ينافع 

ـ شبيك يا عمه هسه وصلنا بطريقه وهشام والله خوش ولد وما ردت أكسر خاطره وأفشله . 

ـ أي طبعاً يصير جنتل مان ويعرض خدامته كدامج ما أنتِ حاطه بصفج صاروخ روسي! وأنتِ وما گلتي باطل خو أدري بيج تكيفين عالمعضل والتفخخ . 

ـ ولك أستحي أني عمتك أدبسزز 

ـ أخر مره أشوف هشام يحوم لا والله ما يصير خير عمه ضلتلج بس لينا عينج عليها ديري بالج لا هشام ولا غيره كل واحد اصله من مهديه تشطبين عليه لو يصلي ويعبد بابح عباده الكلاص الماي شنو ما تشربينه . 

ـ هذا هو .. هسه ندخل خلصت 

ـ دخلن .. لينا تعالي يمي 

ـ شتريد منها 

ـ شريد منها شبيج عمه على هشام ما تگولين 

ـ يا سالفه هشام شيخلصني من لسانك عاد . 

ـ لاتتأخرين تعالي وراي . 

ـ تعالي ولج خاف هذا هشام يباوعلج لاتنطينه وجه أدري بيج گلبج رهيف 

ـ خرب نافع أني مو هيج والله 

ـ يعني أحذرج لا أكثر.. يله أقتضى التنويه أمشي .

ـ تمام.. عروستك أجتي لو بعدها 

ـ لا أجتي بغرفه التبديل هي والبنات روحليهن لبنى تسأل عليج . 

ـ ماشي عفته ولحگت خالتي لكيتها تتنظرني وباب القاعه مخلين وحده تجمع الموبايلات .. ونزلت على نافع لكيته واكف يدخن نافع 

ـ ها لينا 

ـ هاي تجمع موبايلات ما أريد أنطي موبايلي عفيه 

ـ لا ممنوع موبايل يدخل وحالج من حالهن كلهن حتى أخواتي ولا موبابل يدخل .. التزمي بالقوانين لينا . 

ـ أي أغار طبعاً ويله أمشي وبله لغوه . 

ـ نافع صدك تحجي عليك الله 

ـ أذا تردين عوفي موبايلج يمي من تردين تأخذين صور تعالي أخذي مني بس يم البنيه ممنوع تخالفين حالج من حال الكل . 

ـ ها هيج دگول 

ـ أي بكيفج بعد يله راح أدخل أمشي 

ـ تمام بقي يمك .. أنطيته اله ودخلت وياه وسألتني جاوبتها ما عندي موبابل وطلبت جنطتي ونافع گال الها 

ـ عندي عوفيها 

ـ هزت رأسها ودخلنا القاعه بوسط صخب وصوت الأغاني العالي وشفت خالتي كاعده بصف خالاتي أشرتلي وعيوني تدور على لبنى ونافع دخل عليهن باوعت وشفتهن كاعدات ونورس طالعه تخبل بدلتها صلوخ مفتوحه من صدرها وظهرها طالع وشعرها تسريحته مفتوحه أنخوك طالعه صاروخ يا نور يا دنيا 

فستانها على شكل بدله مكس لان مفصل جسمها تفصال لونها بين شوندري على رماني مكس مخلوط 

بس يجنن للون والمكياج كلش حلو ضليت فاتحه حلگي والله حلوه هالنورس ونافع صافن عليها وهي تحجي وما اعرف شنو تشوفه بالموبايل ويهز برأسه . 

نافع ـ ماشي حلو بس خلي بالأخير أحسن 

نورس ـ أي أني هم گلت هيج.. وأنت هم 

ـ ماشي تدللي بعد شعندج 

ـ لا سلامتك 

لينا ـ باوعتلي وخزرتني هو جان منطيني ظهره خرب هاي على شنو تخزر بعيونها وأني شبيه خفت .. طلعت أدور على لبنى لكيتها واكفه ويه عمتها وهبيه سلمت عليهن . 

لينا ـ تسلمين عيوني خاله .. خجلت وأحمريت من كلامها وراحت ولبنى لزمتني 

لبنى ـ ها شطالع كيك كيك ومنو مكيجج لان سالت كالوا ما رايحه صالون 

ـ أي ما رحت مو شفتج كلت خل أمر على اختي اسأل عليها أشوفها 

ـ والله التهيت وردت أمرلج بس أمري مو بيدي وحالي من حالهن وصفا كالت تجي ويه بنات عمي محمود كل ظني جايه وياهن لما سالت نافع كال ما اجتي عباله تروحين وياي . 

ـ منو بحالي 

ـ شبيج تردين تبچين 

ـ نورس 

ـ شبيها 

ـ ما شفتيها شلون خزرتني نشفت دمي على شنو ما أدري 

ـ خاف شافتج تباوعين لنافع لان سالت عليه وصفا كالتلها واكف ويه لينا! 

1 تعليق

ـ شگد حقيره صفا 

ـ يله عوفيها ميخالف رجلها وتغار عليه وهي هيج تمشي وتخزر أني هم حصلتلي خزره منها 

ـ وگت نافع يصير حصتها لو ماخذ نور جان صار حصتنا 

1 تعليق

ـ هااا شو هيج صار الحچب شجاب نور على بالج هسه البنيه تزوجت التحبه وهو أخذ نصيبه المكتوب. . شو أمشي وبله سوالف مالها معنى عيب ماما شنو حصتنا خوما مالتنا هو هم اله حبايبه واهله وناسه . 

ـ مشيت وياها ما أعرف ليش نقهرت وأتذكر خزرتها على شنو تخزريني قابل أبوگه منج گبر لهل النفسيات . 

وكعدنا كلمن حجزتلها مكان وننتظرهم يدخلون وبلشت الأغاني ودخلوا العرسان بوسط الهلاهل بصوت عالي وجايبات وحده تهلهل هلوهله تشيل القاعه شيل بصوتها..!!

عوذه شگد حقيرات وأحنه من تزوجن أخواتي گلبن عرسهن فاتحه سوده عليه عليجن يأ أخواتي يله أعوضجن بعرسي الا أعزم كل العشيره وأطككهن من القهر أصبرلي أني أعلمچن والله ما أنساها الجن الا شگو بنيه أشوفها بطريقي أكول الها تعالي هلهلي وركصي بعرسي . 

بلشت الحنه وجانت حنه راقيه وفخمه وگلشي من أحسنه أمداج ينور مكيفه مسويه حنه بالبيت دتعالي شوفي شسون أخوات نافع القاعه أفخم قاعه والكوشه والترييب وللبس كله من هذا الطاك والذهب مخرخشات بي صدك بنات شيوخ مبين عليهن من شگولهن بس يستاهلن هذا نافع خوش أخو يستاهل الهوسه .. 

ـ وينهن أخوات العريس عيني وينهن نريد هلاهل سمعونا هلاهل .. هذا نافع أبن مشعان الحبيب مو الياهو الجان شيخ أبن شيوخ ...تحيه لأبن الدفاع المدني ولعروسته الحلوه بنت العميد . 

نافع ـ ممنون يابه ممنون . 

لينا ـ الأجواء حمت كلش وصارت تخبل وكلهن گلمن يركصن حتى أخواتها وعمتي حربيه واكفه بصف نورس وتصفك والفرحه تارستها وكل شوي تهلهل ..على شنو ما أكوم أركص شو هي عمتي تهلهل وبناتها يرگصن والله الا أكوم.. لبلب راح أكوم أركص طگيت بعرسجن ما ركصت . 

لبنى ـ گومي حبيبتي شگو بيها 

لينا ـ وأنتِ ما تگومين 

ـ لا أبد والله باقر ما يقبل يمشي ويوصي بيه وأني مو اجوائي ولا أعرف أركص 

ـ تعلمي العسكري يحب التركصله 

ـ خرب بيومج ذوق العسكري كله عندج بعدين أكعد وياج وأتعلم منج 

ـ تدللي برسم الخدمه .. ما أحس الا حصلت منها كفخه أم الرنه طيرت الحنه من رأسي 

ـ بطلي سوالفج لا أشيل رأسج وما أخليج تفكيرين 

ـ خرب بيومج لبنى مو أيد بنيه أيد بغل الله يعينك يباقر! طفرت منها .. 

وتوسطتهن وبلشت أركص عزلت عليهن وقفلت ملفهن وبدعت برگصي مو روحي وأمدحها بس أني أخبل حلوه فديتني.. وصفا تدفع بيه تريد تأخذ مكاني دفعتها ودكيت بسمار وأركص طلعت كل مواهبي بعرسك ينافع باوعتله يسولف وياها وهي تستمع اله باله مو يمنا الأخ فاقد . 

ومن بعد الرگص بشلت فقراتهم وغيرت بدلتها لبست أحمر ناري ضيك حيل وشعرها نازل وتسريحته حلوه وهو لبس دشداشه وعگال خرب بيومك نافع شيخ! 

ودخلوا والكل فرحان الهم وكلش لايگين البعض هي متناسقه ويه طوله لامانه والشهادة حلوه نـــار 

وأخذوا صور وتذكرت موبايلي ورحت العنده وشافتني نورس خزرتني هاي شبيها وگفت بصفه نافع موبايلي 

نافع ـ شنو ما أسمع الصوت ضرب برأسي طرشيت 

لينا ـ شاورته موبايلي . 

نافع ـ ها أي 

لينا ـ طلع موبايلي وأنطانياه ونورس مطگگه عيونها عليه تريد تأكلني يمه نگلبت عتوي حتى شكلها تغيير وگفت أخذت صور يم الكوشه ونافع أشرلي والله حركاتنا عفويه وحاسبة أخو بس الناس تفكر غير تفكير . 

نافع ـ تعالي أخذي صور تعالي لينا

لينا ـ ما ردت أروح لان مرته حسيتها ما تقبل وگفت بصفهم وزهور أخذتلنا صورتين ومشيت يم لبنى أخذت لوحدي اني وياها وخاله .

لبنى ـ صور عود دزي لنور . 

لينا ـ ماشي من نرجع للبيت .. واكفه أصور فيديو واجتي صفا من بعيد هي وسبأ وجرن موبايلي وين مأخذته جيبنا . 

صفا ـ منو سمحلج تصورين وتدخلين الموبايل وياج للقاعه مو ممنوع!

لينا ـ وشعليج أنتِ موبايلي جيبي دا أكولج رجعي موبايلي 

ـ ما أرجعه الموبايل صار عندي لما تخلص الحنه وبعدين ماكو وحده شايله موبايل بس أنتِ شنو ربج وحد... أحنه أخوات العريس أخذوا من عدنا موبايلتنا شو جيبي خوش واسطات مشتغله ست لينا.

ـ مشت وخلتني شايطه ركضت وراها ولبنى وخالتي مجلبات بيه عوفنيي والله ما أخليها تأخذ موبايلي شنو بكيفها.. جلبت بيها جيبي موبايلي لا والله أكول لنافع عليج ... دفعتني بكل قوتها 

ـ شتگولين 

ـ أكوله أخذت موبايلي 

ـ روحي گولليها أخلي نورس تسوي الحنه عزا على رأسج ورأس الخلفوج أدبسزز متزوج وملاحگته عبالج ما أعرف سوالفج أنتِ وهذيج المستشرفه مسافره ويه الكرن رجلها وتطلب صور ومقاطع علمود تشوف عرس نافع وتبرد دودتها . 

ـ نجبي وأحترمي نفسج لا والله أطيح حظج ولسانج أكصه أذا تحجين على أختي وأشرف منج وتاج رأسج يا ساقطه يا أدبسزز تروحين فدوه لأظافر رجليها شجيبج لعفتها وشرفها . 

ـ عليمن ساقطه أدبسزز عليمن 

ـ ما أحس الا جرتني من شعري بكل قوتها وهي بلشت واني نمت عليها وين اليوجعها وشمرت موبايلي على لبنى خفت ينباك .. والتمن علينا يفازعن طلعت قهري بيها وأنوب حجت على شرف نور الدم جمد برأسي موتتها كتل وعض بكل حيلي الا صارت ملوحه بسنوني وصارت هوسه وتدخل نافع جرني من فواكاها وصاح بينا 

نافع ـ لينا صفا تخبلتن من الله يأخذج طاح حظجن . 

لينا ـ هي البدت تغلط عليه وعلى أخواتي وتحجي على نور وهي لا يمها لا حواليها والله التجيب طاري نور أشرب من دمها وأكلها بسنوني . 

نافع ـ شگوو منو وياج منو حاجي 

لينا ـ والله اسأل أختك تحجيلك بكل مناسبه يسسمننا يطلعهن الفرحه من عيوننا عبالك الفرح حرام علينا مشيت أبجي ومهضومه والعبره ترس صدري أبجي ولبنى تسگت بيه وخالتي إنقهرت وضلت ساكته 

.. أني والله ما خايفه على نور بس ما متصله واذا تحجي ويه خالتي وغافر وياها عالأتصال ومتجيب طاري متحرمه نفسها حيل وكلش عجبتني بينت هي شكد عاقله وواعيه وتصون نفسها عند رجلها حتى لو جانت تحب نافع بس الحقيرات ما يعوفنها بحالها . 

سميعه ـ يله أمشن يمه أمشن أني صوجي أجييت الظاهر أني وبنتي أنكرهنا حتى وهي مسافره ما خلصت من الحچي... أمشي لينا 

لينا ـ أخذتتي خالتي وأني أتعثر بفستاني ونافع ركض ورانا تجاهلته وجلبت بخالتي يحجي وياها وخالتي تبجي واني أنفجرت الموقف صعب حيل حسيت من صدك ما ضل النا أحد وأثاري البشر شگد حقود وما ينسى 

نافع ـ عمه لخاطري رجعي ومن هالشارب أخذلج حگج والحجت على نور أوكعها على رجلج بس لاتمشين وصفا عندي والله بس أوصل البيت أعلكها وأصلخ من جلدها جلد .. بس أرجعي لخاطري عمه لخاطري . 

سميعه ـ لا يمه خليني أمشي أحسن وأنت أرجع على عروستك وشايفين الخير وأذا تحبني والي معزة عندك خليني أمشي مـا أكدر بعد السمعته كافي مو بس ويه لينا! يعمه الحجي بكل مكان أكعد بي عبالك نور زانيه وياك مو بس حبتك الطعن بيها لحدهسه ويا خوفي يشلفنها من بيتها ويهجمنها على رأسها .. خليني أروح خليني يله لينا يله أمي . 

لينا ـ هسه خاله رحت على لبنى واكفه وتباوعلنا من بعيد مربطه أيديها وصلت العدها أنطتني موبايلي ونافع بعده يحجي ويه خالتي ويتوسل بيها وخالتي دگت رجلها . 

لبنى ـ لومو عيالي جان مشيت وياجن وصوجج شگو دخلتي الموبايل وياج جبتي لنفسج والنا الحجايه هيج أحسن يحجن عليج ويگولن جان تريد نافع وتحبه ويحبها وأني أسمع وأتكررظم 

لينا ـ لا أنتِ شعليج ومنو اليحجي أشرب من دمها منو 

منعتني أروحلهن وجرتني على صفحه أخذتني على خاله وهنا واكفات يحجن وعمتي حربيه ترزل بصفا لان تعرف نافع ما راح يعديها على خير . 

طلعت أني وخالتي وگفنا ندور تكسي وأجه ناجح طبگ السياره يمكن نافع دزه وگفت على صفحه وخالتي تحجي وياه رفضت رفض قاطع أحد يوصلها .

ناجح ـ عمه لا من ورا حجي النسوان تسوين زعله فدوه لعينج صعدي أوصلج والدنيا صارت ليل زحمه تروحين لوحدج حتى ميثم رجع ويه حليم للبيت شلون ترجعين لبيت لوحدج ووياج لينا . 

سميعه ـ لا عمه مشكور رحمه الله الديكم ما قصرتوا عمه .. خليني أروح وياي هالبنيه ما أخاف من شيء 

أمشي يمه . 

لينا ـ أخذنا تكسي وخالتي كظت الطريق تبچي بجيت عليها ووياها وتذكرت كلام لبنى ما كفاجن نور طعنتن بشرفها نوب رجعتن عليه ويامن ويه نافع! 

وصلنا البيت ما لگينا أحد وگبل دخلت غرفتي نمت بملابسي مقهوره حــيل .. نمت ما أعرف شكثر مر وگت بس كعدت لكيتهن راجعات تجاهلتهن وسويتلي عشه اليه ولميثم وشفت مخليات جاهز عفته .. 

كعدت اني وميثم تعشينا واكل وهو يباوعلي 

ميثم ـ لينا أحجيلي صدك يحجن على نور وعلى شرفها

لينا ـ ما عليك بهل السوالف ميثم أكل واسكت 

ـ منو حاجي عليها 

ـ گتلك ما عليك .. كمل عشاك علمود أغسل المواعين 

عفته وگمت وأتصلت على لبنى ردت أعرف أخبار الحيه

رفضتني گبل ودزتلي رساله 

لبنى ـ علگت بنار وبانزين! نافع گوم الدنيا وما گعدها 

لينا ـ عاشت أيده .. والله كون هسه أخابره وأكوله على كل سوالفها هي گتله هي ذبحه وأخلص منها ومن سوالفها وأخلص أهلها من عارها بس أخ الخوف لازمني من أيدي التوجعني وأخاف تلوفها عليه وتوكعني بيها وتطلع منها سالمه وما توكع غير برأسي أعرف نفسي بومه حظي نايم بالخيسه ونوب بللسان نافع يهلهلي 

الله يسترني ويستر على أخواتي ويبعد عنا المايخافن الله ... 

__________________

لبنى ـ ما چنت متوقعة العيشة وية العيال هلكد صعبة وتهد الحيل! چان كل ظني السالفة مجرد واجبات بسيطة وشغلات لازمة علية وأسويها وبس بس التشوقه عيني كلشي صار برأسي حتى ملابس الولد مالت الدوام وعمي صارن برگبتي، غسل وكوي وبالأخص عمي! صار يعوف البيت كله ويجيني إلي حتى لو چنت نايمة عادي عنده يدگ الباب ويگعدني علمود أخذ قميصه لو بنطلونه أكويهم. زين، بناته الأربعة ومرته وين؟ من الأخير المسؤولية كلها نشمرت عليّه چني صرت الخدامة مالتهم! . 

رغم كل هذا التعب، ما تذمرت، بالعكس.. حابة شغلي واعتمادهم عليّ مو مشكلة وهي هاي حياة المرة اللي تتزوج،وواجبات ضرورية ولازم أتحملها

​خلصت الخبز وشلته ردت أدخل للمطبخ دخلت عمتي جانت بالسوك ذبت المسواك يم الباب، وشمرت عبايتها على طرف الباب وجرت الكرسي وگعدت وهي تعبانه 

حربيه ـ لبنى گلاص ماي أنهد حيلي من فرارة السوگ

ـ ​انطيتها الماي ورحت جبت المسواك خليته عالكاونتر وگعدت أعزله گالتلي وهي تباوعلي

ـ اكو لحم ومعاليك، طلعيهم وحضري المشاوي علمود نشوي للعشة

ـ ​جاوبتها صار عمة، طلعت اللحم وحضرت كلشي.. عمة گملت شغلي راح أدخل أسبح 

ـ لا يمة، كملي غراض المشاوي وفد مرة فوتي اسبحي.. حليم وينك أطلع أشعل الفحم بالمنقلة

​ـ أجه حليم وساعدني، وبدينا نشوي.. وإني بهذا حالي بثوب الخبز ووجهي المترب من التنور، دخل باقر شافني بهل حالة تقرب مني وعيونه بيها نظرة حنية

ـ روحي أنتِ، أنا أكمل عنج. 

ـ ​تمام .. ركضت للحمام، كل ظني ألحگ أسبح قبل لا يجي أحد بس وحظي المصخم! ما كملت دقيقتين وإلا الباب يندك بكل قوتة 

نافع ـ يمه ياهو بالحمام 

حربيه ـ مدري يا يمة، خاف مرت أخوك فاتت تسبح

ـ ​طلعت بسرعة البرق لفيت شعري وگبل لغرفتي.. سالفة الحمام عدنا سالفة، البنات وحليم وناجح فوك حمامهم لوحدهم وخلصانين بس إني وباقر وعمي وعمتي ونافع جوه، فالحمام صاير مشترك . 

​دخل باقر وراي، وأني أمشط شعري.. حضني من ظهري ويبوس بأطراف شعري الرطب، أخذ المشط من إيدي وبدأ يمشطلي وأني من التعب عيوني بدت تغمض وأتثاوب 

ـ لازم تعبانة حيل

ـ يعني.. گملتوا شوي

ـ إي.. عفت نافع يشوي واللحم قليل، خليته هو يشيش ويشوي... ما أتحمل أشوفج تتعبين هيچ

ـ ابتسمت بوجهه لا عادي تعبكم راحة حبيبي 

ـ خلصي وتعالي نتعشى 

ـ تريد چاي عالفحم مثل ذاك اليوم سحبني لحضنه وگال

ـ خليته أني يا بعد بيتي . 

ـ ماشي حبيبي وطلعنا تعشينا وبس صبيتلهم الچاي قفلت لدرجه بس حضني باقر نمت يحجي وياي وأني مغلسه بس أريد أنام 

ـ حبيبي نمتي شو .. نحن هنا يمعوده گولي غيرها بربج لبنى لاتنامين خرب بحظ الکواد مشتاقلج شو گومي لبنى . 

ـ عوفني باقر عليك الله بعدين

ـ شنهي البعدين 

ـ باقر ... شمدريني 

ـ نامي نامي وباقر يطبه مرض 

ـ حضنته ونمت وكعدت الصبح يروح الدوام گمت سويت ريوك عالسريع وأجه يباوعلي والوجه مدلغم صباح الخير حبيبي 

ـ يا صباح منهن .. تغسليتج جانت مدروسه بعدين أحاسبج عليها . 

ـ أسفه والله جنت تعبانه والنوم سيطر عليه 

ـ مشكلتج هاي .. ديله رجعي كملي نومتج 

ـ تمام حبيبي .. كعدت تريگت وياه وأجه نافع يحجي عالموبايل أشرلي أصبله جاي گمت صبيتله تتريك 

نافع ـ لا .. أي تحضري هسه أجيبلج أمي يا صالون ليش مو حجزتي ها قصدج تغيرينه أي ميخالف أتفقي وياها ..هاا تمام 

لبنى ـ أخذ الجاي وراح يخابر 

باقر ـ هذا بعده وينه الحك على أبو طلبات محمود مشكور ربي أني خلصت من هالهوسه .. صدك العصر روحي وياهن أخذي ملابس للعرس هالأسبوع ترى 

ـ أن شـاء الله حبيبي 

ـ يله ديري بالج على نفسج ولاتهلگين روحج بالشغل ما أطول قبل العرس أنزل وسالفتنا بعدين أحاسبج عليها 

ـ مرتي شمسوي فوك ما نمتي وعفتيني 

ـ حقك عليه حبيبي حضنته من رگبته وبسته من خده ونافع أجه وكح خرب شگد عيب 

نافع ـ أحمم أحمم . 

ـ أبتعدت مستحيه وباقر ضحك وشال أغراضه وموبايله وتوجه لسيارته بالسلامه حبيبي 

ـ يسلمج الله .. أحبج 

ـ أموت بيك .. راح الله وياه ورجعت گملت شغلي وخليت الغده عالنار وكعدن وراحن السوك للظهر يله رجعن عاد صبيت الغده وزهور غسلت المواعين .. 

وأجه يوم الحنه ومن الصبح كعدت نظفت البيت وعطرته وغسلت كل الملابس وبيتنا مهوس والديچي مشغل فوك البنات مسويات الطابق الفوك بروفا لتعليم الرقص بالأخص صفا بس يفرغ البيت تثولنا ثول لما يجي نافع يصعدلهه يله تطفي عبالك تعاند هالبنيه . 

وأجتي عمتي هي والحجيه وخالتي لميعه وطلعت سلمت وعمتي حاضتني وتبوس بيه الف هلا . 

دخلن البيت وأني وزهور أستلمنا المطبخ وجابوا كومه لحم وكعدنا بالطرمه والحجيه فوك رأسنا هي ونافع وعمي مشعان ولازمه الطبر وأكسر وزهور وياي تكطع هي وعمتي وهبيه . 

مشعان ـ أي عفيه عمي . 

الحجيه عطايات ـ عين بارده عليها أم بيت سنعه ومعدله 

هاي النسوان التدير بيوت الشيوخ تستاهل يمشعان جنتك خوش جنه .

لبنى ـ يمدحون بيه وعمتي تباوعلي برضا و مبتسمه وأني الا أشويه أطير وعمتي حربيه ما كعدت ولا شفناها رايحه جايه عالنورس وبنات مشن لصالون وزهور بس غسلت الطرمه لبست وناجح وصلها الهن وضليت أني بالمطبخ كملت الغده وعمتي وياي 

وهبيه ـ گافي يمه كملتي روحي تحضري تروحين الصالون رتبي رويحتج 

لبنى ـ ماشي عمه.. الغده كمل بس التمن يتهدر

وهبيه ـ روحي وما عليج اني ولميعه موجودات . 

لبنى ـ باوعت الساعه خرب ولا ضل وگت ركضت أريد أسبح ونافع حاجز الحمام هذا ينام بالحمام شلون سالفه رحت جبت الملابس عزلت ملابسهم شمرتهن بغرفه عمتي هي من تجي تعزلهن وتكويهن ما ضل وگت عليه .. 

طلع نافع انتظرته يدخل غرفته وطفرت الحمام سبحت عالسريع وطلعت بعدني أمشط شعري ونافع عاط خرب شبي عايط! هذا لفيت شعري وطلعت

نافع ـ قميصي ليش ما مگوي هسه شلبس أني

لبنى ـ ما أدري عبالي عمتي گوته الك 

نافع ـ بربج لبنى هاي سالفه كومة نسوان بالبيت قميصي ما مگوي .. عمه ما تجين تگوين قميصي تأخرت . 

لبنى ـ جيبه أني أكوي .. أخذته وگويته اله هسه أخوجن عريس دگون ملابسه وروحن وأنتن كومه .. كملت واجه ناجح هم وكعدت أكويلهم وعمتي صافنه عليه مثل ما عاجبها الوضع . 

وهبيه ـ نافع يمه أخذ مرت أخوك الصالون ضلت 

نافع ـ يا صالون ماما ترى ما ضل وگت ليش ما حجيتي جان من رحت وديت البدله مأخذج وياي . 

لبنى ـ ما يحتاج أروح بطلت

نافع ـ لاتسويلنا زعله تحضري أوديج لو ناجح يأخذج عمه ما تروحين وياها 

وهبيه ـ لا يمه شسوي رايحه . 

لبنى ـ دخلت غرفتي تحضرت عالسريع وطلعت وهو واكف ينتظرني وأنفتح الباب دخلت عمتي نهاوند وياها بناتها أربعه وأستقبلها نافع باسها وفاتح حلگه وعيونه على بناتها والصراحه حتى أني صفنت عليهن وعلى جمالهن وإناقتهم ولبسهن رسمي وفساتين وكشخه فول الفول من صدك ينگال عليهن هذن البنات الحلوات . 

دخلن للبس والمشيه وطگة الكعب والحجيه وعمي مشعان وناجح وعماتي يسلمن عليهن ونافع دگها صفنه يباوعلهن وحده وحده وبتركيز !. 

الحجيه عطايات ـ هلا يمه هلا هلا .. يا هلا بـ بان هلا سيلين هلا بحوراء هلا بگمر . 

لبنى ـ سلمن عالكل وعلى خالهن مشعان ودخلن الأستقبال ونافع أندار منهن وجلب بعمتي نهاوند جرها من أيدها ومنعها تمشي لـ الأستقبال . 

نافع ـ عمه 

نهاوند ـ ها عمه شبيك ولك تجرجر بيه ولك أيدي 

نافع ـ هاي وين جنتي ضامتهن وهسه طلعتينهن

صدك جذب عمه عندج هيج بنات هسه تطلعيهن اليه هاي ينراد عليها فصل أفصلج بيها والله . 

نهاوند ـ يا فلك ليش يمه شمسويه 

ـ ليش ضامتهن وهسه يله تطلعيهن مو حرام عليج قصص ماي هوبس 

ـ لا مو حرام وجنت ضامتهن من عيونك وهسه أنت راح تتزوج وأخلص من عينك بعد گلت خل أطلعهن . 

ـ أزعل منج والله يعني ضامتهن من عيوني 

ـ أي والله تزعل ترضى ضامتهن من عيونك 

ـ ليش عمه ليش .. ليش حرام عليه أشوف بنات حلوات مثل بناتج أناقه ولبس وكشخه تطگ بالكاع عليج الله هاي الطويله أم الستره الجوزي عيونها گبار شنو أسمها شنو تدوام 

ـ يمه خله عينه على بناتي ولك أترس عينك كافي نسوان تزوجت أعقل ونورس خوش نورس شتريد بعد 

ـ أحجيلي هسه عن بنتج عوفيلي نورس 

ـ أسمها سيلين وهاي تدرس صيدله 

ـ حلوه حيل حلوه وأول مره أحب اللون الجوزي

ـ ولك نافع أطلع عيونك شيل عينك على بناتي 

ـ زعلت منج والله.. مستكثره عليج أصير نسيبج 

ـ لازمه نورس ما تارسه عينك 

ـ مو بحلاتها هاي الطويله بويا صاروخ 

لبنى ـ ضربته ويضحك هو وياها ودخلوا الأستقبال ومشيت ضيفتهن عاقلات وهادئات والحجيه تباوع على ناجح دگها صفنه ونافع يغمزله وعمتي نهاوند تعض بشفتها الهم خرب .. 

نهاوند ـ شو ماكو تحضيرات للحنه 

لميعه ـ بالقاعه حاجزين 

ـ ها شعجب مو بالبيت ها نافع 

نافع ـ هاا عمه هي طلبت قاعه قاعه خليتها على راحتها مو أحسن 

نهاوند ـ أي أحسن زين سويت 

الحجيه ـ مصاريف زايده شگو بي البيت يا يمه 

نافع ـ خوما يوميه تتزوج حبوبه خليها تعيش فرحتها وحجزتلها قاعه وفندق وخلصت من دوخة النسوان 

نهاوند ـ چا كلهن بالصالون گوم گوم ودينا أني وبناتي 

الحجيه عطايات ـ تغدن وروحن 

نافع ـ أي عمه هل نتغدة وبعد وگت يله لبنى صبي الغده . 

لبنى ـ گمت اني وعمتي وهبيه ولميعه وصبينا الغده وفضينا الغده وطلعنا الصالون نافع وعمتي نهاوند والبنات واني وناجح وخالتي لميعه ووصلنا عفتهن يسلمن وبلشت مكياج لما كملنا وطلعنا للقاعه . 

بس مـا كملت الفرحه على خير خربتها علينا صفا وأبتعدت عنهم مقهوره ونافع يرزل بيهن بس بصوت ناصي گوه لازم أعصابه وعمته نهاوند لازمته وتهدي بي وأخذته على صفحه تحجي وياه 

نهاوند ـ لاتخرب فرحتك وفرحة نورس والعالم تباوعلنا ارجع لمكانك ومن تخلص الحنه يصير خير أنه أعلمها وحربيه مربيتكم كلكم الا صفا ما منطيتها تربيه ما تعجبني أبد ما تعحبني . 

نافع ـ بس خل أوصل البيت .. 

لبنى ـ ما رجع المكانه طلع برا وعمتي حربيه ترزل بيها وتعض بشفايفها عليها وزهور وأخواتها يلومن بيها 

حربيه ـ اليوم شيخلصج منه لا أني ولا أبوج ولا أخوانج اليوم يعدمج.. شجابج على لينا ناقصه فضايح وحجي 

الله يكصف عمرج .. أمشي نكبري أمشي . 

لبنى ـ مشيت لغرفه التبديل وصفا تحجي ما بطلت ولا تتوب 

صفا ـ وعلمود منو يريد يگتلني علمود صفيره الحيه واني أشسويت يرجع عليه وشمعنى هي شايله موبايلها وأحنه أخواته حالهن من حال المعازيم ليش شتفرق علينا لو لان أخت نور لازم يداري خاطرها وخاطر عمتي سميعه والله أشوفها لواكه زايده منه الهن شنو نسى ام خشم شلون شالت خشمها ورفضته وراحت تزوجت غافر ام دروب والفواين عباله ما أعرف سوالفها الأدبسزز هسه صارت نور الشريفه الخوش بنيه 

زهور ـ سگتي غضب على يومج سکتي تردين تموتين لازم يحط عندج ولج گالج أذا أسمع الج صوت أشيل حنجرتج وأنت ولا هامج ولسانج شطوله وعليمن على نور مشتهيه الموت مشتاهه يصفا .

​لبنى ـ جنت واگفة أباوعلهن وتوني أريد أطلع وأندفع الباب دخل نافع مثل الإعصار جَر صفا بقوة البنات وراه مرعوبات وعمتي حربية من شافته لحگتهم تركض وتلطم على وجهها بخوف

حربيه ـ يا يمة راح يذبحها 

لبنى ـ ​طلعنا للبيت وزهور ترجف مثل السعفة، وتخابر بعمي مشعان وعرفت عمتي حربية لاحگتهم وصاعدة وياهم بالسيارة وصلنا للبيت، نزلن يتراكضن وناجح رجع للقاعة ولا كأنه صاير شي تجاهل الوضع ومشىٰ

​دخلت البيت، وعياط عمتي حربية يرج البيت وهي تتوسل بنافع 

حربية ـ ولك يمجرم، خيتك كافر أنت راح تموت جوة إيدك! علمود منو تضرب أختك! ولك نسيت شسوت بيك عمتك هي وبنتها 

​لبنى ـ نافع ما يسمع لأحد، فقد أعصابه تماماً، تحول من نافع الإنسان لكتلة وحشية. صفا جانت تتزحف على الأرض ووجهها صار عبارة عن خريطة من دم. الحجية عطايات ذبت روحها عليها وتتوسل بي ونافع واگف، وجهه أحمر ودمارات رگبته بارزة، يتنفس بصعوبة من كثرما تعب، شمر الحزام من إيده وهو يرجف، وصاح

​نافع ـ والعباس أبو فاضل الأسمعها حاجية حجاية، لو متنفسة بحرف واحد على عمتي أو البنات.. ما تلوم إلا نفسها! أنا حچيت ونبهت، وگلت هالموضوع ينسد وما أريد أنفتحه بعد

​حربية ـ منو الحاچي وجايب طاريهن ياهو يمهن هنا يبطلن على نفسهن وعمتك بس تتبچچ أم الفنود 

​نافع ـ يمة! أنتِ خليني ساكت وأنا بلغتچ وحذرتچ وگلت ووصيت بس أنتِ وبنتچ السكط شسويتن؟ كلبتن الحنة لثارات .. وعبالچن الحچي نكضى بس بسالفة الحنة؟ ترى سامع وشايف كلشي، وأدري بظهري كلش زين ينحچي على عمتي وعلى شرف نور!

وكفيل زينب.. نور إذا ينحچي بشرفها لو ينجاب اسمها بحجاية بسببچن! يمة ما أحلفلچ أكثر من هالحلفان.. والله ثم والله إذا سمعت بيچن حاجيات.. لأورث النار بالبيت وأحرگه هو والبي وأسويها والخلقني والسمتني نافع وتعرفيني زين، من تطبگ برأسي أهل بيتي ما أعرفهم 

​حربية ـ طبك مرض! انعل أبوك لأبو نور وياك يا گواد يا ساقط! لو مخلفتلي جلب ولا مخلفتك، تجيب وتقسم بهالحلفان علمود الست وأمها متغزز بعمتك أهمداك يا يمة، تفلة ما تفلن بوجهك بس تستاهل!

​الحجية عطايات ـ كافي! لا أگوم أكسر هالعصا على راسچ شو سگتي الله يكصف عمرج أنتِ وبنتج امشي كبري بنتچ لا أكبرها بيدي يله

​لبنى ـ صعدت صفا فوگ والبنات وراها، ونافع ضل واگف بمكانه، يفرك براسه، ومقهور والحجية أخذته بصفحة تحجي وياه بهدوء. عفتهم ودخلت لغرفتي بلغت لينا شصار، وحضنت مخدتي ونمت بملابسي من التعب

​ثاني يوم، الأمور هدأت وطببعيه الأمور نزلت صفا عين الصخل والبنات وياها وراحوا للصالون، وأني باقر نزل وأخذني صالون لوحدي وبقى ينتظرني. عفت هوسة العرس ورحنا للقاعة بعد الغده

كعدنا ولاحظت لينا وخالتي ماكو.. بس أم غافر وعمتي نهاوند تفتر نافع بكلشي يطلبها، أحسها مميزة بكلشي بكلامها بـ اختيارها بذوقها وبلبسها 

​خلص العرس رجعنا للبيت، باقر دخل الغرفه وقفل الباب وأحتل الساحة... 

ثاني يوم كعدت متأخره وباقر يمي والباب يندگ

باقر ـ لاتگومين 

لبنى ـ أصلاً مابية أتحرك مشتاقتلك ضحك وضمّني كملت نومتنا للعصر. كعدت، لگيت عمتي وجهه مدلغم وأعصابها فايره، كومت عليّ ملابس كومة، وعمتي نهاوند تشتغل وتلمع بالبيت مثل العادة كلش أحب ترتيبها وشغلها مرة معدلة

​مر يومين، وأجو العرسان، استقبلتهم عمتي بالهلاهل والجگليت. تقدمت باركتلها، وما لحگت أكعد، عمتي ذبت براسي عشة وسويته وكملت ودخلت غرفتي تعبانة ولكيت واصلتني رسالة من نور

نور ـ مساء الخير يا حلو.. 

أني وصلت العراق، ماكو هلا؟

​