رواية ارهنت عمري الفصل الواحد والعشرون بقلم نورا ناصر
وانا لو ادريك ماترهم لروحي
ماتعبت گلبي ونبضتك
انا لو ادري العشك وياك لعب صغار
للنسيان يمعود نذرتك.
كمت على حيلي واكتسح التوتر اعصابي ، اندفعت الافكار المشوشة لتفكيري احس نظراته وهو يباوعلها بيها الف معنى ومعنى..
... اندارت على سيف وبيدها الكلاصات وهنه يقطرن ماي من ايدها وملاويها الي مزينة رسغها يخرخشن تأشر وتحجي ؛- مبينه مرتك عصبية وماتتحمل هاي عود اول يوم الي هنا وهيج ضاجت مني .
كمت على حيلي ودفعت الكرسي اريد اطلع
سيف اعترض طريقي خليت ايدي على صدره اريد اوخره من طريقي لزم ايدي حيل ويباوع بعيوني بنظرات قلقه وكال ميسم شكوو ؟
دنكت مقهورة هزيت راسي برفض وبعدته مني بالقووة ، كلبي دكاته الف وعيوني جمر تحركني اريد ابجي اريد افهم شجاي يصير صعدت فوك وما ان دخلت للغرفة طبكت الباب حيل وراي وصرت وحدي نزلت دموع عيوني بغزارة على خدي ..
سيف : طلعت ميسم من المطبخ معصبة باوعتلها صعدت فوك فتت جوة وسديت الباب تقدمت كم خطوة باتجاه شهد وصرت كدامها
خزرتها : شهد شنو حجيتي كدامها وهيج عصبت ؟
نترت بعصبية : شوكت تعلن زواجنا ها ؟ شنو نسيت اني زوجتك قبلها ؟ شنو ذنبي اني مخليني وراك وهيه بالواجهة ؟
جريت نفس بقوة وعصبية خزرتها وصحت بيها اششش سكتي مااسمعلج صوت مفهووووم ؟ انت السبب بكل شي صار وبسببج اني ظلمت ميسم ويايه
لا بالله هسه صارت ميسم مظلومة ومنو ظلمها اني ؟؟ اسمع سيف معليه يجون اهلك تعلن عن زواجنا لا والله اني بنفسي اكوللهم لا اخاف ولا استحي
لزمت ايدها ولويتها : شكلتي لللج ؟؟ تهددين مووو ؟ لج والله اذا فتحتي حلكج بحجاية اوديج ورا الشمس والله
سحبت ايدها مني وابتعدت عني كم خطوة ترجف وخايفة : وشتريد تسوي يعني مثلا انت اكبر جبان لو مو جبان جان اعترفت بيه كدام اهلك بس انت حتى من هاي تخاف
تقربت عليها وهي تبتعد لزكت روحها بالباب الثاني الي يطل ع الحديقة رحت حصرتها اباوعلها بكل عصبية
_ شهد لاتنسين اني محامي وكومة قضايا مارة عليه واكدر اخلي بركبتج تهمة بس الله ليعلم بيها وتطبين السجن وتتعفنيين هناك وحتى ابنج هم يصير حسرة عليج شوفته وانت كلش زين تدرين محد يوكفلج لا اهلج ولا غيرهم ظهر ماعندج ولا سند ، كعدي وسكتي احسلج .
عفتها ومشيت كم خطوة باتجاه الباب الثانية
اجاني صوتها وهيه تنتحب : هذا حبك الي سيف مو صرعتني احبج واحبج هيه هاي رجولتك ؟
التفتت عليها : غصبا عليج اني رجال وانت السبب بكل شي محد كالج تختفين فجأة تنهزمين وتولين بدون علمي اذا جنتي صدك معتبرتني زوجج
نطقت من بين دموعها : وهسه كولي شحسوي لشوكت اني ابقى هيج لشوكت ؟؟
_ انت كيفج بيدج كل هذا ، اني ما اكدر اصدم ميسم هسه مصار شهر من تزوجنا اذا تردين اصبري واذا لا اطلكج ماعندي مانع مو ردتيها من قبل تطلكين اني حاضر هسه
_شكد حقير ونذل انت هذا كله على مود وحدة توك عرفتها ..
_ هذي زوجتي الي دتحجين عنها
_ واني شنو؟؟ اني لعبة عندك ؟؟ شفت مالي سند ظليت تلعب بيه بكيفك ؟ وفوكاها تهددني هاي رجولة بلله شفتني مرة وحيدة هيج تسوي نفسك رجال عليه ؟؟
رحت لزمتها من حنجها تأوهت متألمة ولزمت ايدي الي لازمها منها
_شتردين تسوين بس كوليلي هذا لسانج ميفيدج وماكو دليل عندج احنا متزوجين حتى نسخة من العقد ماعندج واذا اكو دليل فأني امسحه واذا تطلب الحال امسحج انتي هماتين ماعندج غير تصبرين او اطلكج .
ظلت تشهك وتبجي جريت نفس بقووة : عفية شهد انت ليش دتسوين هيج ؟ مو اني احبج بس سوالفج تخليني اكرهج من صدُك!! لج شهد مصار شهر من تزوجت ماكدر افشل اهلي كدام عمي هسه
_عفية انت شكد متناقض مرة تهدد مرة تكول تحبني تره اني مو ذنبي اني احق بيك منها اني حبيبتك ااالاولى وبعدها مرتك وهم الاولى هيه شنو انت متأكد تحبها ؟؟
_ انت لو ممخليتني ورايحة مجان صار كل هذا خليتيني بدوامة ماكدر اطلع منها
جرت نفس تباوعلي بعدم رضا وتبجي
حجيت بنبرة اطمنها بيها اريد اجبر واكسر ماريد هسه ينفضح كل شي مو وكته : اصبري كل شي واله حل الله يخليج نفكر سويه ونلكى حل لكل هذا تمام ؟
هزت راسها بقناعة .. وتجر بانفاسها ..
اني هسه راح اصعد اشوف ميسم
دفعتني من كتفي اي عيني رووح شوفها خطية الرقيقة انجرحت مشاعرها روح داويها محتاجتك
باوعتلها هزيت راسي بأسف عفتها وصعدت اشوف ميسم ...
ميسم : .. كعدت ع الارض وعيوني تحركني حيل والدمع ينزل مثل المطر على خدي لميت رجليه وحضنتهم لصدري خليت حنكي على ركبي وظليت اباوع كدامي بس ماشوف شي . وبالي بغير مكان .
لشوية حسيت الباب انفتحت دخل منها سيف للغرفة واجه كرفص وكعد كبالي .
صارت عيوني على صدره ماباوعت لوجهه شلت حنكي من على ركبي ودرت راسي صفح صار خدي على ركبي حتى اتجنب اباوعله .
اجاني صوته ..
شبيج حياتي شنو كالتلج شهد وهيج ضجتي ؟
جريت نفس بضيق خليت ايدي على بطني حسيت بالم وي جرة النفس القوية الي ماطلع زين
وباوعتله : هيه تكدر وتتجرأ تحجي وتستهزء بيه لو ما انت الي سخرت مني كدامها ونطيت بيه
_ ترة دا اشاقه وياج ليش هيج بسرعة تطنكرين انت مو جاهلة ولا زعطوطة بسرعة تزعلين وتسوين من الحبة كبة .
_ شقة ؟ جا ماسمعتها شون طكتها ضحكة شعلوها وطارت فرح لمن استهزأت بيه
_ ماضحكت عليج ضحكت على الكلام الكلته ليش انت تفهمين بالعكس!!!!
حجيت بنبرة هادئة ومسالمة : بس انت لازم تحسن اسلوبك وياي وخاصة كدام اهلك اني الي كياني ميصير هيج تجرح انوثتي كدامها وتستهزء بيه .. تقبل اهين رجولتك ؟
خنزر عيونه : كال : شحدج .
بعدت نظري منه ضربت راسي على الحايط الي وراي بخفة وغمضت عيوني بللت شفايفي وعضيتهم ونفسي يطلع بقوة ..
مد ايده احتضن وجهي وظل يتلمس خدي
بعدت ايده مني وكمت تمددت على السرير
اجه يمي عود يراضيني بقيت مصرة احكره
ومااجاوبه ابد لمن مل وعصب فتح الباب وطلع
من الغرفة سد الباب بقوة ، اهتزت اكتافي من شدة الصوت وشهكت من البجي ..
مر وقت اريد انام ما اكدر مية فكرة ابالي احس بينهم شي مخفي هالاحساس يهاجمني ويأذيني واطرد هالافكار عني وارجع احاول انام بس ما اكدر .
صارت ساعة ١١ وانه بعدني متمددة على السرير ومنطية ظهر لباب الغرفة والنوم مايجي لعيوني حسيت الباب انفتحت ووياه دخلت ريحة عطره لعبت باعصابي عرفته اجه ، بقيت وماحركت ساكن وانا اسمعه يتحرك بالغرفة ومبين جاي يبدل ملابسه ويتحسر
خلص واجه ع السرير وتمدد وغرقنه اثنينه ببحور افكارنه انا مية سؤال ابالي محتاج اجابة احس نفسي حيل ضعيفة ليش هيج ضعيفه كدامه انا .. شون اتعامل وياه مااعرف ومنا البلوى الي اسمها شهد هاي مبينه راح تصير مشاكل الها اول مالها اخر .
وانه بعدني غركانه وغايصه واحاول اطلع نفسي من هالمعمعة حسيت ايده تسللت لجسمي سحبني من خصري لحضنه ودارني اله طخيت بي وصار وجهي بصدره ..
دفعته حيييل مني وحجيت باحتجاج واصرار : وخر سيف وخرر
لزمني من اكتافي حيل ويباوع بوجهي ومخنزر : لاتسوينها قصة عااااد كافي
سحبت ايديه منه : لااء مووو كافي من تحترمني عود اجي يمك هاي لا مرة ولا مرتين تستهزأ بيه واليوم كدام هاي وهيه بروحها مو طايقتني ، تحز بنفسي ماجاي اكدر انسى ووووخر
اخذت مخدتي ونزلت من الجرباية وخليت المخدة ع الكاع وخليت راسي عليها .
اجاني صوته براحتج سوي مثل ميعجبج
طلع وطبك الباب . وانه ظليت ابجي انوب تذكرت امي
تذكرت غربتي هنا احس غريبة
زدت بالبجي .
ما ادري شوكت رجع بعد لان غفيت واخيرا استسلمت للنوم وتمنيت مااكعد .. فزيت ب ٣ شفته نايم ع السرير .. والصبح كعدت شفته ماكو رايح للشغل
كمت تعبانة احس روحي مكسرة ارهاق مو طبيعي
نمت مقهورة وبس افكر الشكوك موتتني
غسلت ونزلت جوا شفت عمتي كاعدة بالهول
رحت صبحت عليها وكعدت يمها
كالت البارحة اجينه بالليل وابد ماشفناج ؟
دنكت وجاوبتها : اي عمه نمت على وكت ومانزلت بعد ابد .
مدت ايدها لوجهي ورفعت راسي : شبيج ليش هيج عيونج حمر كلش انت باجية ؟
بلعت ريك ورجعت نصيت راسي احس العبرة خانكتني اريد ابجي مرة ثانية تمنيت امي يمي احضنها وابجي
صفيت وحيدة هيج احس روحي
هزيت راسي : لا عمه بس تذكرت امي البارحة وبجيت عليها ..
كالت : بقهر : الله يرحمها اقريلها قرأن واهديلها صلاة ترتاحين يا بنتي البجي مايفيدج ولو اني انصحج بس اني ماطبق النصيحة على نفسي كل يوم كبل لا انام ابجي على المرحوم واتمنى انام وما اكعد والحكه .
خليت ايدي عليها وهمست والعبرة خانكتني صوتي كوة يطلع : اسم الله عليج عمه عمرج طويل الله يرحمه وينور قبره .
:تمتمت: امين ياربي امين ..
دمعت عيونها مسحتها بطرف شالها :
كالت ميسم خاف سيف مضوجج ؟
ماردت اطور الموضوع الصار البارحة كافي
بلكي مايعيدها ويهزأ بيه
نكرت وماحجيت .
كالت انتوا شوكت تخلصون شغلتكم مايصير هيج راح يصير شهر من متزوجين اهلج ماسألوج ماكالوا ؟
توترت : اي سألتني الحجية بس كلت الها سيف مريض شوية كالت على راحتكم وابوي مايدور ورانه هيج سوالف حتى خواتي ماسألهن واثق من عدنا ومن تربيته .
_ اي يا بنيتي صح صارت هوسة بليلة عرسكم بس مايصير هلكد تأجلونها نريد نفرح بيكم بلكي يصير عدكم طفل .
_ الله كريم عمه ان شاءالله
خلت ايدها على كتفي : كومي بنيتي تريكي اكيد هسه جوعانة انتِ .
هزيت راسي وكمت اريد اروح للمطبخ صارت شهد مقابيلي بالممر اجت عيني بعين شهد كبل دنكت راسي لا تشوف عيوني مورمة وتشمت بيه .
وسارا بالمطبخ واكفة ع السنك تغسل مواعين.
بس صوتي فضحني من كلت صباح الخير بي بحة ومخنوك كوة طلع .
ردن اثنينهن صباح النور .
شهد لزمتني من زندي واخذتني للممر
همست اكولج شنو تقصد خالة من كلتلج كملتوا شغلتكم لو لا انتوا بعدكم ؟
حجت هيج وهيه مبتسمة
غثتني تمنيت عندي جرأة اضرب راسها بالحايط الي وراها .
بعدت ايدها مني حجيت : خصوصية هاي شعليج انتِ رجاءً لاتحشرين خشمج بكل شي عيب .
حسيت بنشوة الانتصار عفتها ومشيت فتت للمطبخ
كعدت على ميز الطعام وهيه دخلت مبتسمة
عضيت شفتي والكره تجاهه بداخلي بأعلى درجاته .
ابنها وبنت سارا يلعبون ع الكاع عدهم لعبة ويضحكون وهيه كاعدة ع الكرسي ومخلية رجل على رجل تباوع عليهم ورجلها تهتز وايدها جوة خدها .
كالت ساروو السنة الجاية يمكن اخلي حسون يمج وارجع اداوم بالجامعة .
كالتها سارة اي والله خوش خطوة هاي اشجعج عليها وشريد منه حسوني فدوة عاقل اخلي بعيوني وخالة هم ماتقصر وياه داومي ولا تديرين بال .
_ لا خاف خالة تطلع او تعبانة او خاف تعيرني تدرين بيها بعد اخلي بأمانتج انت احسن .
_ اي خلي عادي يلعب توتة وهيه هم تحبه .
انه من يمي اسمعهم يحجون واربط كلام سيف من كال : حبيبتي بالكلية وياي ..
تجرأت وسألتها : انت شنو درستي بالكلية ؟
باوعتلي وشالت استكان الجاي وشربت منه يله جاوبت
: درست قانون حبيبتي بس ماكملت مرحلتين وصارت ضروف وبطلت .
رمشت عدة رمشات وفتحت عيوني على اوسعها
وبلعت ريك سألتها : انت هم جنت ويا سيف بنفس الكلية ؟
رفعت تك حاجب وجاوبت اي حبيبتي جنت ويا ...
سارة كالت صدك وهم جنتي تعرفيه ؟
_ اي اعرفه مو دا اكولج ويايه بنفس القسم .
_ يااا اشووو هاي معلومة اول مرة اعرفها
_ شعبالج لعد ويا راح تعرفين معلومات بعد اكثر
_ الله يستر منج ام الفواين ولج اشو سيف هم ماكال هو ولا مرة ولا انتِ حجيتي ؟
_ هو خبيث ومايحجي
من كالت هيج باوعتلي بنظرات اعجز عن تفسيرها .
سارة : ياا ولج ميسم تحجي على رجلج دكومي كفشيها يله شهد حتكفشج يله اتعاركن واني انطيجن النعولة اسهل امر .
شهد : ايباااه وين بيها عليه هايه بأصبع من اصابعي افرها فر .
سارة : والله اني الي يحجي على زوجي اخلي بجدر المركة باعي شهد بهذا الجدر اخليج اذا حجيتي على رأفت .
شهد : لا عاد رأفت يخوف يمعودة خليني بعيدة عنه مااندك بي اني .
يحجون وانه تجمدت نظراتي بالفراغ و ابتلعت الاهانة الي وجهتها الي شهد قبل لحظة ، كاعدة مصدومة شهد ويا سيف بالكلية خاف نفسها حبيبته بس شلون تزوجت اخو وشجابها عليه !!
عفتهم وكمت مثل المخروعة وصعدت اركض فوك
يتراولي عمتي صاحت عليه بس بدون وعي مني
تجاهلتهه .
صعدت للغرفة اصعد واتعثر والزم بطرف المحجر مالة الدرج ، رجليه ترجف وايديه وحتى گلبي.
ادور ع التليفون ذاكرتي انعدمت وين خليته يربي وينه اريد اخابر سيف ما اصبر بعد ، خبصت الغرفة خبص
يمكن مو بس ادور ع التليفون لا اريد اطفي الحريق الهائل المشتعل بيه الي لو طلع من جوفي يحرگ الكون كله .
رحت للميز اريد اكلبه من فوك ليجوا ، بس منعني شوفة النقال ولا ماجان يوكف كبالي شي اخذته ودكيت رقمه
اريد اسمع منه وانفاسي احسها نار تطلع مني
وكلبي دكاته بأذني مسموعة .
اريد اسمع منه شراح يجاوبني اذا كال اي معناهه مابينهم شي وهو صادق ويايه لكن اذا كلامه خالف روايتها معناهه خايف من شي ومايريد يفصح كدامي واكيد شهد هيه حبيبته القديمة وماتقبل غلط .
اجاني صوته بلهفة الووو ها ميسم ؟
سيف صدك شهد جانت وياك بنفس الكلية قبل ؟
اول شي ارتبك وكال لا بعدين كال شنو كالتلج شهد ؟
رنت كلماته براسي اقشعر الها جسمي ، و الطوفان الي بداخلي اقوى من دروعي الهشة
عطت بي انته جذاب سيف جذااااب كلامك مايتطابق ويا كلامها .
عاط بعصبية اكولج اني هسه بالشغلة جد جد جدي مشعول وانت مخابرتني تتمزعطين والله يا ميسم
حجاية وحدة زايدة منج اجيج هسه واعوف كل شي وراية اجر سيارة وارجعج لاهلج والله وورقتج توصلج افتهمتي ؟؟؟؟
كال هيج وسداه بوجهي ، تسمرت بمكاني بفزع
لحظات وانهاريت كعدت ع الكاع وتربعت انحب وارتفعت شهكاتي المكتومة مع تواتر افكاري القاتمة وكلبي يعصف وينعصر من القهر ....
لحظات ومسحت دموعي بظاهر كفي ، واذا جانت حبيبته شنو اسمحلها تاخذه مني مستحيل اخليها
لا يربي لااا واذا صدك سيف نفذ تهديده وطلكني
شون بالشماتة انه شلوون الله لايكولها ان شاءالله .
كمت على حيلي اقوي روحي بروحي
رحت غسلت وجهي وتريكت كوة بلعت اللكمة
اباوع على شهد على حباية ونص اتعجب وين اهلها وليش مايسألون عليها اكيد مرتاحين منها .
ساعدتهم بالشغل وتغدينا ، قبل جية سيف
عدلت نفسي لبست و مكياج خفيف وكعدت انتظره
بغرفتي .
من دخل يباوعلي ضايج وعيونه بهامته
بلعت ريك ورحت يمه
كال كولشي لاتحجين ضايج خوووش ؟؟
كتله اووكي ، تريد غدا اصبلك .
دايرلي ظهره وواكف ع المراية ينزع بالساعة مالته .
كال تغديت قبل لا اصعد .
شعجب لعد من شوكت انت جاي ومنو صبالك غدا ؟
وشعجب ماصعدت لهنا بدلت بالاول ؟
شهد صبتلي غدا وجنت تعبان كلش وادري بيج راح تلغين زايد واني مالي خلك بقيت جوا يم امي بين ماارتاح يله صعدت .
ظليت بس اباوعله واتنفس بقووة وهو يفتر بالغرفة ويغير ملابسه .
التاف عليه باوعلي شبيج ميسم ؟
همست بقهر انت تعرف شبيه ؟
اجه يمي يحجي بثقة : شهد جانت وياي بالكلية وازيدج من الشعر بيت نفسها حبيبتي الي صحتج بأسمها ليلة عرسنا ارتاحيتي هسه ميسم لو لا ؟
