رواية خيط وابرة الفصل الثاني والعشرون بقلم شمس العراقية
نور ...
ـ السعادة أحياناً تكون متمثلة بشخص وگأنّه الحياة بعينها! گُل ساعة تمرّ وياه تعيشني أجمل لحظات عمري وتطبع بذاكرتي أحلى أيام حياتي.
السفرة گضّيناها بكل تفاصيلها وحلاوتها وعيشني شعور الحب بكل معانيه تغزّل بيه بأحلى الأماكن ضحكنا سوة بطرقاتها، وأكلنا بإرقىٰ المطاعم وتشارکنا ذوقنا باختيار الملابس هو يختارلي وأني أختارله ..
مشينا بهدوء وجمال شوارع تركيا، ووصلنا لذاك المكان بالذات اللي گعد مراد يغازل بي رهف كعدنا نباوع البحر وتغزل بيه وضحكنا وسولفنا هواي وگأنّ الدنيا كلها ما تتوسعنا
مو بس كان شهر عسل كان صفاء عقل والروح وخالية من الحزن من المشاكل ومن الماضي وتقلباته
بعيدين عن العالم وعن كل ناسنا أني وياه أيد بإيد وروح بروح .. ونهاية كل يوم نرجع لمسكنا الهادئ بوسط الأشجار نسمع صوت الحشرات بالليل، والصبح على صوت العصافير، بعيداً عن الفنادق وزحمة الشوارع بمكان تسكن إله الروح وتأنس بجوار من يحبها وينظر لها كأنها أعظم إنجازاته
وبوسط غرفتنا الناعمة الهادئة وأنارتها وأجوائها الرومانسية ... يضمني بحضنه ويحتويني، وبدون ما يملّ يضل يتأمل تفاصيلي بصمت أفهمه من نظرات عيونه.. أحب من يضل صافن بوجهي ويباوعلي بنظرات حب وروحي تهدأ وأغمر نفسي بحضنه أنام على صدره وأخلي راسي بركبته، وأنسى الدنيا وما بيها وما يظل ببالي غير ريحة عطره .
من يمسح على شعري بحنية أحس كل خوف الدنيا يتبدد وكل التعب يزول بمجرد ما أسمع نفسه الهادئ. گد ما الدنيا كانت جافية ويانا أحياناً، گد ما الله عوضني بهذا الأمان اللي ما ينقاس بثمن..
وهناك بين الشجر ونسيم الليل، حسيت إن روحي أخيرًا لكت الوطن اللي طالما دورت عليه، وعرفت إن العمر ينعاش صح، بس من ينقضى ويا الشخص يفهمك
تخيل الله يرزقك بشخص ما يسوي شي بحياتك غير إنه يطلع أحلى ما بيك... شخص يخلي روحك أهدأ وبالك مرتاح وما يفسر كلامك غلط ولا يدور وراك الزلة بالعكس هو المرايا اللي ما ترويك غير الأشياء الحلوة بنفسك
هذا الشخص ينطيك الثقة العمياء ومتأگد منه حتى لو غلطت بـ يوم يظل مؤمن بيك وبـ طيبة گلبك
ويصبر عليك لحد ما تلملم شتاتك وتصلح اللي انكسر داخلك وتحاول تنسى وتتعايش .
ترى مشاعر الحب بصوب وشعور الأمان والرحمة بصوب ثاني تماماً...
الحب كلمة سهلة جداً بس الأمان معجزة ما تتكرر بالعمر غير مرة وحدة فـ يا حظه اللي لكة هذا الأمان واستوطن بيه ..
من هذيج الساعه والثانية التسجل اسمي بإسمه وأنعقدت روحي بروحه أني قررت ونويت أصونه بعيوني وبگلبي وبروحي وأرضي وأرضي رب العالمين.. لأن إذا ضليت أبجي وعايشة بنص الماضي معناه أكون خسرت كلشي ودمرت نفسي ودمرته وياي
وهو ما يستاهل مني الا كل الحبُ والتقدير ..
النسيان نعمة عظيمة الله وهبها للأنسان حتى ينسى ويتعايش ويستمر بحياته بفرح وسعادة لأن الحياة ما انكتبت نعيشها بس بالحزن والألم لا اكو فد شي عظيم ومهم مرافق إلها وهي السعادة وملحقاتها ولحظات الفرح الحقيقية اللي تمسح على گلب المكسور وتنسيه مرارة السنين كلها ... نور
خلصت سفرتنا واليوم آخر يوم إلنا... فاتحة الجنطة أگبالي وأرتب ملابسنا بهدوء وهو واگف عالبلكون يدخن جگارته هو أصلاً قليل كلش بالتدخين، ومن أجينا لحد هسّة هاي ثالث جگارة بس مع الوقت أحاول أمنعها عنه..
أباوعله بهدوء وعيوني تتمعن بتفاصيله وحركاته بتركيز تام.. لابس تيشيرت ماروني ضگ شوية على عرض جسمه وبرمودة مريحة، مخلي إيد بجيبوبه والإيد الثانية لازم بيها موبايله ومنطيني ظهره وتقاسيم أكتافه وعرضهن يلفتن النظر .. جنت لازمة تيشرته بيدي أصفطه وكل حواسي حسّت بي من التفت عليَّ وعيونه اتلاگت بعيوني
دار وجهه ببطء وعگد حواجبه بخفة ومكر، بعدين أنرسمت على شفايفه إبتسامة دافية بينت بيها غمازته الواضحة، وغمزلي بنظرات مدروسة مليانة عِشگ ولغة هِيام ... حچة بنبرة صوته الدافية
غافر ـ شبيج هيج تباوعيلي وتأكليني بعيونج!
نور ـ خجلت منه وحاولت أرتب روحي وأغطي ارتباكي وأني دايرة وجهي على الجنطة جاوبته عالسريع
لا هيج بس ردت أسألك شوكت طيارتنا؟
ما رد عليّ بس حسيت بصوت خطواته وهي تقترب بهدوء لحد ما صار وراي، وبعدها بخطوة حسيت بدفء إيده وهي تسحب إيدي بلطف وقربني إله.. التفتت عليه وصفنت بعيونه گال وهو يبتسم
غافر ـ أحجيلي أسمعج
ـ شنو أحجيلك
ـ أي شي.. مثلاً شلون جنتي تباوعيلي بالتركيز قبل شوية؟
ـ تنهدت وجاوبته معجبة بيك.. وبصراحة معجبة بيك جـداً
كملت كلمتي وقربني إله أكثر حسيت بحرارة أنفاسه من طخ خشمه بخشمي وعيونه اتلاگت بعيوني بنظرة تخطف الروح وگلبي صار يدگ بكل سرعته ..باسني من شفايفي بهدوء بعدها سألني وعيونه تلمع بمكر لطيف .
ـ بس معجبة؟!
ـ ما گددرت أقاوم تنهيدتي رفعت إيدي وحضنت وجهه وأني أباوع لعيونه بلهفة .. جاوبته ليش الإعجاب مو كافي؟
ـ لا حبيبي كافي وزايد
ـ هزيت راسي برفض لا مو زايد عليك أبداً.. أنت تستاهل الأكثر والك گلبي وكل مساحته أحتلها واستوطنها على كيفك وشتسوي سوي أني ألك وملك إيديك وهذا قدر رب العالمين المكتوب النا ننجمع أني وياك بستر وحب ما ينتهي ..
ـ حلو
ـ أكو أحلى من هيج
ـ لا والله ماكو
ـ نور.
ـ ها حبيبي.. ابتسم بابتسامة دافية وخفيفة وگال وهو يمسح على أصابعي بحنيه .
ـ يعجبني عقلج الواعي رغم شكلج الطفولي وبرائتچ الناعمة وسوالفج وعفويتج اللي أحبها، بس مع ذلك بداخلج إنسانة مؤمنة وواعية جداً. إنسانة تشيل عقل يوزن بلد بوسط هذا الوجه البريء .
ـ خجلت من كلامه وحسيت حرارة صعدت لوجهي .. تدري أنت الوحيد اللي تلمس عُمق روحي مو بس شكلي .
ابتسم بحنية أعمق ومال راسه شوية وهو يباوعلي بنظرة مليانة حب
ـ مو بيدي.. كل يوم يمر أكتشف إنُه الله رزقني بنعمة أكبر هواي ممّا جنت أتخيل .
بعدها أكتفينا من الكلام وسحبني لحضنه..
واگفه ألبس شالي وهو يمشط شعره حبيبي يعني گبل للمطار؟
ـ أي. بس أستعجلي حبيبي، خاف اكو ازدحامات، وأني أصلاً أدور حجة حتى ما أسافر! جان بقيت بعد وكملتها شهر. بس أمي والدوام هنّا المشكلة
ـ تمام.. ثواني وأخلص.
كملنا كلشي وطلعنا للمطار وبالطياره هو غمض عيونه ونام، وأني خليت رأسي على كتفه، نفضت كل الأفكار السلبية من رأسي، واستسلمت للنوم.
بعد مرور الوقت، وصلنا بالسلامة. وأول شخص حسيت إني لازم أطمنه وأرسله رسالة هي لبنى شعوري كأختي الجبيرة ما يفارقني أبداً وبالأخص من تزوجت صرت أحسها حيل قريبه مني .
وصلنا وأخذنا تكسي للبيت وما مبلغ خالتي مسويها مفأجاه أساساً هي زعلانه لان تأخرنا بقينا ١٥ يوم .
فتح باب الحوش ونزل الجنط دخلنا الحوش ودگ باب الأستقبال ماكو أحد
غافر ـ حجيه وينج .. يمكن نايمه
نور ـ لا ما أعتقد مو وگت نوم يجوز يم أمي
غافر ـ المشكله ما أخذت نسخه من مفاتيح يمي نسيتهن والمفاتيح يمها .
ـ أتصل عليها ما تجاوب رجع أتصل على نافع
ـ ها عريس شلونك
نافع ـ صوتك مو بعيد بس لا رجعت
ـ أي شمدريك متگولي منصب كاميرات بالفرع
ـ لا من صوتك والوشيش هناك صوتك ناعم وواضح
شوكت رجعت وليش ما گلت حجيت جان أجيت أخذتكم من المطار
ـ حبيبي تسلم ما تقصر والله هسه وصلنا والحجيه مو بالبيت والمفاتيح يمها كلت اسأل بلكي يمكم .
ـ أي موجودة يمنا هسه أكول الها والحمدلله على سلامتكم وسفره سعيده
ـ الله يسعدلي أيامك حبيب گلبي وأعذرني خاف كعدناك من النوم
ـ لا يمعود تدلل .
نور ـ ضل يحجي وياه وقطع الأتصال وضلينا ننتظرها وسمعنا صوت الهورن وطلعله بقيت أنتظره ودخلت خالتي وهو ضل برا .. عبرتني وهي تفتح الباب بدون كلام .. خاله شلونج .
صبيحه ـ بعد وگت جان بقيتي هناك صرتي تركيه
نور ـ والله ياريت بس لازم أنتِ ويانا أصلاً السفره جانت ناقصتج خزرتني وگلبت وجهه وسگتت ودخل غافر يضحك شافني وأبتسمت ما بينت ردة فعل خاله .
دخل الجنط وهي صاحتله
صبيحه ـ تعالوا وين رحتوا عوفوا الجنط مشتاقتلگم!
نور ـ عفت الجنط وأجيت يمها باستني وحضنت غافر
وتسولف وتضحك وياه وتسألني بمحبه وكعدنا نسولف الها.. وكامت حضرتلنا أكل وأني دخلت سبحت تعبانه .
وأسمعه يحجي ويه خاله على طاري روحه
غافر ـ على باجر أجليها فدوه لعينج حجيه والله تعبان من السفر وهما ما طايرين واليوم يله راجعين من الفندق
صبيحه ـ شتأجل منها فوك ما حضرت عرس صاحبك
مو عيب من خوالك لا ماكو تأجيل باليل نروحلهم
ـ أن شاء الله هذا هو حجيه بالليل بالليل .
نور ـ دخلت أمشط شعري وأجه نزع ملابسه
غافر ـ حبيبي باليل تحضري نروح لبيت خالي مشعان نبارك لنافع على زواجه وأصلاً مقصرين وياه لاحضرت خطوبته لا عرسه لا وگفت وياه وهو وكفاته وياي ما ينعدن بس شسويله مستعجل .
نور ـ تمام أن شاء الله وهديه شنو تأخذلهم .
ـ أبالي ثلاجه هسه أتفقت أني والحجيه لان ساكنين بالعيال يحتاجونها .
ـ تمام أني هم أخذ شيء وياي
ـ لا ما يحتاج أني ثلاجه وأمي ما أعرف شتريد تأخذ لنورس .
ـ ماشي حبيبي .. دخل سبح وتمدد تعبان عبالي أنام أريح جسمي بس خالتي صاحتني تالي گمت ولكيتها تدخل جنطنا .
ـ شگو عايفتهن لحدهسه دخليهن عزليهن ورتبيهن لايجي علينا أحد يباركلج ولو منو يجيج بعد أنتِ واليوم البارحه من تزوجتي حتى الناس تغلس لان سافرتوا مدري منين طلعتوا بسالفة السفر والهنگمه .
ـ ما حجيت دخلت الجنط بالغرفه على كيفك لان غافر نايم بعدين أعزلهن وطلعت ومحضرتلي المنظفات والماسحه .
ـ هاج جلفي البيت بالفلاش ونظفي زين خاف يجينا أحد لان وراج ما نظفت البيت مترب ووسخ .. نظفي زين مو شلون ما جان كظيان واجب
ـ أن شاء الله خاله .. أخذت منها ورفعت دشداشتي وكعدت أجلف وأغسل البيت كله غسلته طلعت كل مواهبي وشطارتي كدامها وهي تفتر فوك رأسي واذا ما عجبها ارجع اغسله من جديد .. حيلي راح وتعبت كلش بس مطوله خلگي وياها ..
كملت ونشفته وشغلت المبخره وهي وگفت تسوي العشه وتباوعلي وتباوع البيت حسيتها مرتضيه بس ما تريد تبين اليه .. دخلت سبحت وطلعت غافر على نومته وخرت الغطا وحس بيه قربني وحضني ونمت تعبانه ..
لليل تعشينا وتحضرنا نروح بيت خالي وعبالي أروح بيت أهلي مشتاقه حيل لـ أمي بس گال من نرجع نمرلهم وهي خابرتها عمي ما يقبل عليها تطلع وتجيني لان البنات ما تكدر تعوفهن وهو بالدوام اليوم
كملنا طلعنا وبعدني ما صاعده السياره گالت
ـ ليكون تردين تصعدين ليگدام هاي هم ما تعرفينها الا واحد يعلمچ .
ـ لا خاله .. فتحت الباب وصعدت وغافر جان يخابر ما أنتبه .. وأجه صعد الأغراض وطلعنا الهم .. وصلناهم
ونافع فتح الباب وخالتي سلمت عليه ونزل غافر مسالم ومباوس ومحاضن هو وياه بكل حب
غافر ـ لك هلا وأخيراً سحلتك وجريتك وراي ودخلت القفص الذهبي،مبروك يابه شايف الف خير
نافع ـ هلا بضلعي هلا بإخوي الله يبارك بعمرك تسلم
نور ـ تقربت بصف غافر.. باوعتله أريد أباركله باوعلي وهو يباوس بغافر همست مبروك نافع بالرفاه والبنين تستاهل كل الخير .
نافع ـ الله يبارك بعمرج عيني نور تسلمين .. أتفضلوا أتفضلو يا هلا بيگم .
نور ـ مشيت بصف غافر وطلع علينا خالي مشعان وعمتي حربيه ولبنى سلمت على خالي ولبنى وعمتي عبرتني ما سلمت عليه بالهوسه غلست عليه وگفت تحجي ويه خالتي وأنطتنب ظهرها ولا كأنما موجوده!
رفعت رأسي لكيته يباوعلي ويباوع على أمه تجاهلتهم ودخلنا وكعدت بصف غافر وخالتي أشرتلي أكعد يمها غلست بقيت كاعده بصفه .
دخلوا ولبنى أجتي تتبسم وتباوعلي جابتلنا ماي ونافع أخذ منها وضيفنا وكعد ودخلت نورس كاشخه سلمت والكل رد السلام وگفت باوستها.. الف مبروك عيني بالرفاه والبنين .
نورس ـ الله يبارك بيج حبيبتي تسلمين .
نور ـ گامت خالتي باوستها وكعدت بصفها ويحجن بينهم هي وعمتي حربيه وغافر أنطلق ويه نافع يسأله على السفر ولبنى هي تجيب بالضيافه وتضيفلنا جابت كيك وعصير وما كعدت وراحت المطبخ وعمتي صاحت وراها
حربيه ـ لبنى تعالي شيلي الصياني
لبنى ـ أي عمه أجييت
نور ـ شلت الصينيه وگمت وراها لمطبخ لكيتها تغسل عالسنك .. شلونج شخبارج .
لبنى ـ هلا عيني زينه.. الحمدلله على سلامتج والله مشتاقتلح همزين كمتي خل أجيب مواعين وأجيج
ـ راحت وجابتهن وگفت تغسل أباوع على أيديها مجويه
ـ أي أحجيلي شلونها سفرتكم
ـ الله يسلمج زينه تخبل .. أكولج ليش هي ما تضيف أو تشيل الصياني ليش بس أنتِ؟
ـ بعدها عروس .
ـ وأنتِ هم بعدج عروس .
ـ شسويلها.. أي ما علينا رحتي على أهلي خالتي حيل مشتاقتلج
ـ لا والله هسه أروحلهم من نرجع.. شبيها أيدج
ـ البارحه خبزت وأنجويت
ـ ديري بالج وباقر وين ما شفته
ـ تعشى طلع ويه صاحبه شوي نوب يچي .
ـ ها تمام.. ليش تخبزين .
ـ أي والله أخبز
ـ ها أني هم أريد أتعلم بس ما أعرف أحب أشتغل
ـ تعالي عليه العصريات وأعلمج
ـ ها هيج دگولين
ـ أي من تجي نوبتي بالخبز أدز عليج .. مره أني مره وحده من البنات .
ـ تمام .. يله تعالي كعدي وأجتي وياي كعدنا سوا وشويه وأجه باقر سلم وهي گامت بعد ما شفناها يمكن ما يقبل تكعد .. وما طولنا ترخصنا وخالتي أنطتها هديتها وتبوس بيها وعمتي حربيه ولا كأنما شايفتني
رجعنا البيت على رغم ضجت من تصرف عمتي بس مو جديدة عليها هالتصرفات ويالطريق غافر طبگ باب بيت أهلي ونزلنا وشفت أمي طايره روحي عليه حاضنتها وهي تبجي وأني ابجي .
سميعه ـ يمه بنيتي رويحتي يا بعد بيتي .
نور ـ مسحت دموعها وسلمت على غافر وشفت لينا وبنات خالي وكعدنا شوي ما طولنا ورجعنا البيت هو ضل يم خالتي يحجون ودخلت غرفتي غيرت ملابسي وأجه غافر حسيته عنده كلام! .
غافر ـ أكولج حبيبي عود باجر عدنا عزيمه عالغده
نور ـ المن العزيمه .
ـ لنافع ونورس
ـ أي عيني تدلل بس عالغده لو عالعشه
ـ لا عالغده .. بس خل اتأكد من نافع خاف معزومين يم أهلج .
ـ تمام تأكد على راحتك وخاله شتگول
ـ هي أقتراحها .. خل أشوفه بالأول
ـ طلع يخابر نافع وغيرت ملابسي وطلعت أحضرله ماعون فواكهه وأسمعه يحجي وياها .
صبيحه ـ وليش تأجل العزيمه شو زواج وتزوجت وسفر وسافرت وهذا ابن خالك وصاحبك وكفاته وياك ما ينعدن مستكثر عليه عزيمه هو ومرته
غافر ـ لا يمه موهيج والله وهذا أخوي يدلل عليه بس گلت لو نأجلها كم يوم واليوم رجعنا من سفرتنا وباجر عندي دوام ومسواك وخاف نور ما تلحك .
ـ يا أمي ليش مصعبها والعزيمه أحنه نطبخها وأنت توكل لدوامك ما الك شغل بينا .
ـ ليش مـا عالعشه أحسن علمود أجيب مشاوي
ـ شسوينا چا المن عازمينهم يرحون مطاعم ويأكلون وخير يمه من أولها مطاعم چا عليمن مزوجتك أنه غير أرتاح بجال مرتك وأتباهى بيها وبطبخها كدام أهلي وحبابيبي وتبيض وجهي وجهك ومو على أساس تعرف تتطبخ وتعلمت!
ـ أي هذا هو يمه عالغده .. لا تعرف تطبخ تعجبج
ـ أي تعجبني ليش ما تعجبني مو مريتك بعد أكيد تعجبني وبنت أختي ولما عاجبتني ما أخذتها الك
ـ فدوه لعينج يمه . خل أخابر نافع وأشوفه لان الأعرفه خالتي سميعه تريد تعزمهم .
ـ أي گالتلي نورس أبوها گايلها الجمعه غداكم يمنا تأكد من نافع وردلنا خبر علمود الصبح تتسوك النا گبل لاتروح الدوامك .
ـ يحجون بينهم وصوتهم واصل يمي.. حضرت ماعون فواكهه ودخلت يمهم كعدت بصف خاله وهو يحجي عالموبايل .
غافر ـ ها هيج الحچي .. كم يوم تبقون .. ماشي حبيبي على راحتك من ترجعون أن شاء الله أي نتخابر عود.. الله وياك .
صبيحه ـ ها شگالك نافع
غافر ـ تعذر مني لان هسه متفقين باجر يرحون المزرعتهم هو ونورس أربعة أيام يله يجون .. يله أجتي بوگتها شتگولين حجيه
نور ـ باوعلي وأبتسم كأنما يگولي خلصتج من العزيمه
صبيحه ـ شگول هذا هو بكيفكم يمه .
نور ـ گمت جبتله ماعون فواكهه وتقربت خليت كدامه ولزم أيدي وباوع على أمه وباسها .
ـ شسوي بالفواكهه أريدج الج .. خلي الماعون وروحي الغرفه گدامي
ـ وخاله كاعده خطيه
ـ عوفي خاله حيري بإبن خاله الميت بيج يله حبيبي
ـ طلعت وهو يباوعلي وخاله تگلب بموبايلها ما اعرف شتسـوي وتدور بالأرقام ..
ـ غافر أبني ما تطلعلي رقم خالتك نهاوند وينه .
ـ ركضت الغرفه لبست وكشخت وتعطرت ومنطيه ظهري أعدل بشعري وسمعت طگة القفل غافر...
گعدت ولگيت فراشي فارغ فتحت عيوني وباوعتله يلزم عطوراته على كيفه ويبخ بهدوء، صفنت عليه شلون يشيل السويج بلا ما يطلع صوت.. لحد ما همست
غـافر!وفززته بمكانه وضحگت
غافر ـ خرب بروح عمامج وأني ما أسوي صوت علمود لاتگعدين.. شو گومي يله!
نور ـ گايمه جعل محد يعصب غيرك. مشيت گدامه سريع، وبخطوة خاطفة سحبني لحضنه
ـ ماكو صباح الخير
ـ فلتت منه وضحكت بس أغسل وأجيك .. رگضت للمغاسل غسلت، ورحت للمطبخ لگيت خاله مسوية ريوك وتريد تغسل المواعين يعني متريگين مخلّصين
صباح الخير خاله غافر تريگ لو بعده
صبيحه ـ لا، بعده ينتظر الست تكعد!
ـ سودة عليه، هسه أسويله ريوك سريع ونأكل سوا
ـ خايبة صدگتي! وراه دوام طويل لـ 8 بالليل يله يرجع وبعدين تعلمي من يكون عنده دوام تگعدين گبله تسويله ريوك مو تضلين نايمه لظهاري! أنتِ مو بنية بيت أبوج، وهسه صرتي متزوّجة وعندج رجال ومسؤوليات لو ما تعرفيهن
ـ إن شاء الله خاله تدللين.. سگتت ودخل غافر باس خاله من رأسها وتقرب باسني من گصتي وأبتسم همست
بالسلامه حبيبي.
غافر ـ الله يسلمج، يله فيمالا
نور ـ الله وياك.. راح الله وياه، وأستلمتني خالتي على الرغم البيت نظيف يلمع والبارحه نظفته، خلتني أعيد الشغل من جديد وهي تدقق وتفتر وراي بكل زاوية لحد ما دگت بـ 12 أنه وياها، ووكفنا نطبخ الغده.
ـ صدك خاله، ليش طبخنا هسه وغافر ما يچي عالغده جان عَفنا الغده للعشة أحسن النا
ـ وأني شأكل حصو! لو بس تفكرين بزلمتج
ـ لا خاله، قصدي ندبر نفسنا أنا وياج، أو نتفق من غافر عنده دوام ما نطبخ غده ثگيل.. نأكل الموجود بالثلاجة والعشة نسوي أكله زينة مو أحسن
ـ لا دادة مو أحسن أنه ما أكل بايت! ووخري من الطباخ بعدج ما طبختي گمتي تتعاجزين من أولها! بنات آخر وگت يتعاجزن من طبخة ما تكلف من وگتها نص ساعة.. شو وخري، كل خير ما منج، جنج لعابة بالأفلام كارتون، الله يساعد گلبي
ـ دفعتني وگعدت هي تكمل الطبخ .. صدك خاله خل أسوي سبعه
ـ شتسوين بيها
ـ مو عروس
ـ غير بطرانه على وگتج وين ضلت عروس وسافرتي سقط حقج..ديله عوفي هالسالفه گومي غسلي ملابس رجلج
ـ عفتها وطلعت مقهورة، سبحت وصليت الظهر ومالي نفس حتى أتغدى، رجعت لفيت راسي وكملت نومتي.
للعصر انفتح الباب بقوة فززتني مرعوبة!
صبيحه ـ الدنيا عصر! أكو وحدة لحد هسة نايمة وغرفتج على حطة أيدج ما مرتبة! ملابس غافر ما مغسولات
شوگت تكعدين يمه! إلا هو يجي يگعدج بنفسه! ما فالحة بس بالنوم، الرجال مو بس بالفراش، يريد أم بيت تطبخ وتنظف وتغسل وتگوي، بس ما منچ فايده
نور ـ گمت وأني شايطة.. خاله هو شگو؟ ومن الصبح غسلت ونظفت والبيت نظيف يلمع! هو منو أصلاً أكو غير أنا وياج ياهو اليوسخ وملابس غافر هسه أغسلهن
ـ هسة تندرتِ
ـ طلعت وگمت نفضت الغطا، وشلت ملابسه وحطيتهن بالغسالة، ونظفت الغرفة ولمعتها لحد ما صارت مرايا، ورجعت تمددت فتحت موبايلي ولگيته كومة متصل عليه! خرب حظي، الموبايل صامت وما حسيت بي وأتصلت بسرعة " ها حبيبي.
غافر ـ ها نور، وينج يابه ضل بالي، إلا اتصلت على أمي گالت نايمة.. بيج شي أبويه
ـ لا حبيبي ما بيّه شي، بس تعبت ونمت شوية وما حسيت على الموبايل
ـ نوم العوافي.. يله گومي تغدي سألت عليج أمي گالت ما مأكلة شي.
ـ أي هسة راح أتغدى وأنت تغديت حبيبي
ـ أي حبيبي يله گومي. وصدك خالتي (أمج) عزمتنا عالعشة، تحضري من أجي گبل نطلع لبيت أهلج.
ـ تمام، سد الخط، وگمت تغديت وخالتي بغرفتها وأجه بالي أسوي شي حلو سويت بسبوسة وطلعت تخبل خليتها بالثلاجة اليوم أخلي يأكل أصابعه وراها
صبيحه ـ ليش يمه يأكل أصابعه قابل شاويتله طلي هي بسبوسة طحين وشيرة ياهو الما يعرف يسويها!
ـ طيبة كلش خاله أصبلج منها
ـ لا ما أريد، يرتفع سگري
ـ ما لحيت عليها عفتها گعدت بالصالة وصبيتلي ماعون وشغلت التلفزيون.. شوية وخالة اختفت، وگمت على كيفي وگلت خل أروح أشوفها وين معقوله طلعت ولگيتها صابة لنفسها ماعون وجاي تأكل
گبل رجعت على كيفي قبل لاتحس عليه بس أبتسمت
بالعافيه عليها .
لليل أجه غافر ورحنا تعشينا يم أهلي وعمي الوجه مدلغم طول العشه ما عاجبه أحد لحگت أمي شبي
سميعه ـ متخبل وكاعد نفس سالفته وگالب علينا البيت جحيم ومعارك هو ولينا .
ـ يبوه خبال كون وشعجب وسوالفه
ـ مدري يمكن يريد يتوب نورس تطب وتطلع تهدد بي ما مخليه عقل برأسه هو يغط يوم يومين ويرجع گالب خلقته عليه .
ـ وأنتي
ـ شبيه
ـ يعني أقصد
ـ دولي نور من كل عقلج حاجيه وگايله لو يموت ما أخلي يلزمني أنه تالي ما تالي أصير على ذمة واحد تضيعينه تلگينه نايم بالحرام بس شسوي لحظ أمج المصخم .. بومه كرطت أبوج وضليت معلعله
ـ لا هيج تگولين ماما وتقهريني
ـ لا يمه شسوي الله كريم نوب صارن برگبتي بناته هم خطيه مظلومات ششافن من حياتهن هذن كظه عمره مخربط والله كاسرات گلبي ومتحمله أبوهن الما ينحمل لخاطرهن والله.. والأ جان من الصبح أخلي يطلكني وأخوج ولينا يمي كافي شگو علينا شو أنتن وتزوجتن ولينا هم تكمل دراستها وتجيها قسمتها يضل أخوج بس يكمل السادس أزوجه ويملي عليه بيت أبوجن .
ـ شلونهن وياج
ـ حبابات نبأ ورده سبأ هم زينه هي بس نورس جانت للسان وكحه بس تزوجت مالها شغله بيه الله يستر عليها ويوفقها .صدك عود تحضري من يرجعون من المزرعه عمتج حربيه تسويلها سبعه متحزمات حزام عود كشخي
ـ أي أن شاء الله.. أحنه هم نريد نعزمهم من يجون
ـ أي شگو بيها ومن يجون ما يحتاج أوصيج بنتي وأعرفج
ـ عرفت قصدها ما يحتاج ماما
ـ أي عفيه بـ بنيتي عاقله تربيتي فدوه رحتلج. الله يسعدج ويبعد عنج الما يخافن الله .
ـ مشت وگلبي نغزني بإخر دعوتها اليه وردت أكول الها على تصرف عمتي وما سلمت عليه .. بعدين سمعت غافر يسلم راح يگوم.. لبست عبايتي وطلعنا ..
غافر ـ عمج شبي
نور ـ هذا عمي من يومه نفس وجه وأطباعه
ـ الله يساعد خالتي عليه بستان ليمون ما يهضمه
ـ ضحكت أي والله
ـ صدك ذكرتيني
ـ شُـنو حبيبي
ـ خاف أمي أو أمج يگولن الچ أمشي ويانا لسبعة مالت نورس مـا تروحين گولي إلهن غافر ما يقبل!
ـ ها بس ليش وخاله أذا سألتني شگول الها
ـ ذبيها وراية وما عليچ أني أتفاهم وياها بس ما تروحين وأنتِ رحتي وياي وباركلنهم بعد شگو .
ـ هذا هو مثل ما تريد .
ـ گومي طفي الأضويه وتعالي يمي تعبان ونعسان بس أريد أحضنج وأنام .
ـ تمام.. نمت بحضنه وما فهمت ليش ما يقبل معقوله لان عمتي تجاهلتني يجوز وضاج هو گلشي ولا أني .. حضنته بقوه وبسته من خده وهو نايم عسى ما أنحرم منك .
وبيوم سبعة نورس خالتي تحضرت شفتها طلعت علبه بيها تراچي گبار ومبينات غاليات! وياهن جنطة ملحف جربايه من الزينات وعلب حلويات كل تغليف وترتيب وشغلات بإكياس ما عرفت شنو بيها!
تقربت عليها خاله مو عبالك هديتج غاليه وثگيله .
صبيحه ـ أي بنت أختي ليش ما راضيه حضرتج
نور ـ لا شعليه بس حسيت هواي يعني! لان غافر راح يأخذلهم ثلاجه .
ـ وأني شعليه بغافر يودي لصاحبه أني عليه ببنت أختي
وما مأخذه لا منج ولا من رجلج لاتحطين عينج
ـ لا خاله بالعافية والله .
ـ ديله أمشي تأخرنا وليش لحدالأن ما لابسه وين ضل وگت
ـ خاله روحي أنتِ أني ما أروح
ـ وليش ما تروحين صغيره أنتِ.. مكيفه بنفسي عندي جنه أطلع وأكشخ بيها وحضرتها ما أروح مو على كيفج أمشي لبسي
ـ خاله غافر ما يقبل
ـ وليش مـا يقبل هيج من گيفه
ـ أي ما يقبل
ـ شو دوخري ورجلج وينه... غافر غافر
ـ راحتله الغرفه وأني بقيت بالصاله ما تدخلت ولا عليه منها لأبنها .
غافر ـ أي أني ما قبلت
صبيحه ـ وليش ما تقبل
ـ يمه كرامتي وينها من مرتي محد يقدر وجودها!
ـ ومرتك منو يمها شبيك يمه غافر
ـ يمه رجعت من السفر وتعبان گبل رحتلهم وباركتلهم ومرت أخوج تلبس نور ولا كأنما شايفتها ليش شمسويه نور! أذا علمود العرس والطربگه نور ما سوت شيء ولا فرحت مثل العواريس والحزن ما يرجع ميت حزنانه على أخوها حقها ميخالف أجي وياها بس لا تنسى نور بنت أخوها يعني من ريحته كافي جذب واليحزن يحزن بگلبه مو بشگله .
ـ هسه وگته هالحجي وهي وعمته أنت شلك دخل يا أمي
ـ شنو شلي دخل شبيج يمه غير مرتي
ـ لاتسويلك سالفه وما تخليها هسه كلهن يسألن عليها شگول الهن وفرحانه زوجت أبني وأتباهى بمريته
ـ گولي الهن تعبانه من السفر وهاي هي بس ما تروح
ـ هسه عمتها وأذا حجت
ـ ما أقبل لا عمتها ولا غيرها أمها مو أمها أذا تحجي هم ما أقبل نور مني وبيه محسوبه عليه وهذا العندي
ـ يعني ما بيها مجال
ـ أبداً والله لاتحاولين
ـ هذا هو أبقى أنت ومرتك وسدوا بابكم من هسه بلش الكطع خير ان شاء الله بعدكم بسم تحزمت وكمت تأخذلها ثأرات على فلانه حچت وفلانه ما سلمت تطلع طويله عليك يا أبني
ـ طلعت من عنده ومشت مزعوچه بقيت بالصاله باوعتله من الباب عالسريع ورجعت بمكاني رجع صاحني
ـ تعالي يمي .. ليش مديتي رأسج ورجعتي
ـ أجي بعدين أخاف أنت معصب
ـ لا أعصب عليهم مو عليج أنتِ شلچ دخل بإعصابي عمت عيني أذا أنتِ تعصبيني
ـ ها يعني أجي
ـ تعالي بويه تعالي .
ـ رحتله وگفت يم الباب... ضايج
ـ على شنو
ـ لان أنزعجب وضجت بسببي
ـ تمونين يا بعدهم كلهم .
ـ أسفه حبيبي .. تأفف شبيك
ـ أجليلي التمسلت هسه على شنو تتأسفين ليش شمسويه أنتِ
ـ يعني أني أمسلت غافر! وينك من جنت تكولي انطرب بكلامج .
ـ صجيجه گون مال الزكج اطير معاني وجهج .
ـ ها مو هسه جنت خوش
ـ وبعدني خوش أحجي عدل نور ومن سوالفج وأني
گتلج تعالي وبس
ـ لا ما أجي والله صار بيها لزك وتطير معاني وجهي أي أطلع على حقيقتك طلعت لابس قناع
ـ أي لابس قناع أخوفج بي .
ـ وأني عبالي حباب طلعت هم تخوف والله ما
ـ أبوسه العقلچ المحجر وافكاره التصفن
ـ والله لازم أشغل دماغي وأفكر بيك وأعيد برمجتك شو گلبي گام يلعب منك
ـ أويلي الحك الموضوع دبگت عالسالفه لزگت هي غير تجي يمي تحركي بابا شبيج بنجرتي بعتبة الباب
ـ گمت أخاف منك والله
ـ نور مو أجيج والله وأستعمل وياج غير أسلوب وهاي مال أخاف منك أطيح حظج عليها أذا تحجينها أنوب
ـ مو شگلك عصبي ما جنت هيج .. يعني أنت هم تتعصب وتگوم تغلط
ـ جلبت لزكت دبگت يالحمزه ما شايفه عصبي بحياتها بس غافر وستوب وگفت عنده
ـ خلص أجييت والله أجييت
ـ أخ بويه أسنح من تشغلي هاي التنعويصه مالتها .
ـ وصلت لعنده ها
ـ وجعا بگلب غافر وعمامج الگواويد
ـ لا بگلبي .. صدك تعال هواي تحجي على عمامي
ـ عمى العماهم ما عندج عمام .. أني كل أقاربج شلع قلع .
ـ ضمني لحضنه ويبوس من شعري بوسات سريعه مثل الأب من يجي مشتاق لأبنته ..رفعت رأسي وباوعتله غافر تعال أكولك شغله
ـ گولي عيني
ـ من تعصب الكايرزما مالتك فول الفول كزكزت عليك عادي أعضك من خدك
ـ أموتج والله تردين تخزيني كدام السرسريه جماعتي مرته عاضته شنو مربي جلب حشى قدرج
ـ صفنت عليه وركزت بعيونه للحظه دگات گلبي زادت
ـ وين صفنتي
ـ بعيونك
ـ رجعي صفني دام حابه هالشيء صفني
ـ عدلت كعدتي هو جان كاعد على طرف الجربايه واني أجيت كعدت بالكاع بس ثنيت نفسي على رجليه
ـ أحجيلي لاتبقين ساكته أحب أسمعج من تسولفين
ـ شحجيلك مثلاً
ـ أي شيء يچي أبالج المهم أنطرب بكلامج
ـ بقيت صافنه وحجيت غافر تدري عيونك حلوات حيل وصافيات ونظرتهن تخبل ورموشك ثخان وخشمك طويل وقلم ما بي طسات عدل وأنت تخلي عطورات لجسمك بس من تتنفس بوحهي ريحة العطر تطلع ويه نفسك والله عبالك شارب عطر .. أحچي وأتلمس بشرته والعب بعيونه ورموشه وناسيه نفسي وهو مستمعلي وصافن على حركاتي حركات جهال صغار .
ـ گملي ليش سگتي
ـ نزلت رأسي خجلانه عبالك تماديت على الوضع وأني ما أعرف شبيه گمت أخربط .
ـ نور لاتتقيدين مني أني رجلج أحجي كملي أسمعج
ـ لا گافي أكوم أحضرلك ماعون فواكهه كمت ولزم أيدي ومنعني وكعدني قريبه منه
ـ رجعي لمكانج.. ليش أنطلقتي وبعدين سگتي شنو اليمنعج تكونين قريبه مني! ليش مرات تحجين وياي بدون حواجز عبالك معاشرتني عمر ومرات تتقيدين كأنما ما تعرفيني ..
صارلنا ٢١يوم من متزوجين ومراقب كل حركه منج وجاي أدرسها رغم أني دارسج وحافظج حفظ بس داخلج ما أعرفه شبي.
ـ جاوبته بثقه أطمئن أنت موجود بداخلي وما تحتاج تسألني هالسؤال لان مستحيل أتصنع الك الحب .
ـ تمام هذا هو سدي الموضوع تعالي يمي أحب حركاتج وسوالفج .
ـ حضني وضمني لصدره .. بقينا ساكتين كأنما هو يسمع البداخلي بدون صوت وأني أسمع داخله من خلال دگات گلبه الأيدي حاضنه صدره . تقربت دفنت رأسي برگبته وطبعت بوسه على رقبته الى أن أستلسمت لنوم بوسط أحضانه .
ورجعت خالتي وتسولف على سبعة نورس وعمتي حربيه مسويتلها أحلى سبعه شگو بيها من حقها
صبيحه ـ شلون مسرحه الشعر والمكياج طالعه غزال غزال والله عرف يختار هالنافع وصدك من نسوانه .
نور ـ تحجي لغافر وهو يباوعلي بقيت ساكته الا أن أجه أبالي أسوي سبعه .. صدك خاله على طاري نورس ليش ما أسوي سبعه أني هم
ـ خير أن شاء الله گمتي تغارين
ـ لا مو مسألة غيره بس من رجعت گتلج أني گلتي سدي هالسالفه وشگو بيها أخواتي يچن مو بالله غافر
ـ لا خيه وينج وين السبعه والسبعه للعواريس وأنتِ سافرتي شتسوين بيها هاي مصاريف وهنگمه زايده
ـ بس خاله والله ما بيها شيء أذا سويت
ـ خاف يمه گمتي تغارين من نورس ومن سبعتها شو ما حجيتي من رجعتي هسه تندرتي
ـ بس خاله أني گتلج
ـ شوگت گلتيلي هسه يله حجيتي وكدام رجلج ما تحجي يمه مرتك تريد سبعه
غافر ـ أتفقوا بينكم أني رايح تأخرت على نافع .
نور ـ ما حچه وطلع وهي ضلت تدردم وگامت لغرفتها حيل إنقهرت وضجت من تصرفها فشلتني كدامه وهسه عباله صدك أني غيرانه من نورس وأني من رجعت من السفر گتلها بس هسه نكرت .. لليل رجع حضرتله عشاه أخذته اله كعدت يتعشى وخالتي كاعده يمه .. ضل يباوعلي عفته ورحت سويتله الچاي .
غافر ـ يمه شبيها نور؟ شنو ما أتفقتوا بينكم .
صبيحه ـ لا شبيها ما بيها الا العافيه مثل الحمامه تفتر عليك شتريد أكثر من هيج بس يجوز ضاجت لان تأخرت وأنت هم ما يصير يا أمي خفف طلعاتك ويه نافع وگابل مريتك بعدها عروس طلعها ونسها..
نور ـ ضايجه من غافر وطلعاته يمتى حچيت أني شبيها خالتي .. ضليت مصدومه بطريقة كلامها رجعت حجت
ـ وأذا على سبعه صدك جذب يمه هاي مريتك شعندي غيرها أذا الها ما أسوي چا المن أسوي والله أسويلها أحلى سبعه أخلي كل نسوان منطقتنا يحجن بيها بس أني گلت علمودها ما سويت گلت رجعوا تعبانين وهي شلها بهل الهوسه بس دام تريد سبعه ما طلبت الا حقها تدلل عليه . يمه نور وينج حبيبتي!
ـ لزمت رأسي أفتريت مو طبيعيه أبداً .. ها خاله وگفت يم الباب رايدتني..
ـ تعالي يمه .. تردين سبعه تدللي على أحلى سبعه الا أسويلج وحتى فستانج أني محضرته ضامته بكنتوري هسه من أكوم أنطي الج حتى صالون أوديج تدللي
ـ كعدت قريبه منها تسلمين خاله ما تقصرين باستني وحضنتني ولمتني بحضنها وأني مصدومه وأباوع على غافر مبتسم برضا على تصرفات أمه! تحجي وبس أهز برأسي وصدك سوتلي أحلى سبعه گلشي من أحسنه
وعزمت كل نسوان جوارينه وخوالي كلهن أجني ما عدا نورس ما حضرت سـوتها وحده بوحده ...
غافر بالدوام وگملت شغلي گله وگلت لخالتي وطلعت لبيت أهلي ضايجه ومشتاقه لـ أُمي .. لگيتها تطبخ الغده سلمت وكعدت ها شلونكم .
سميعه ـ هلا بيج يمه زينين أنتِ شلونج
ـ زينه
ـ شبيج! وجهج مدلغم البارحه عفتج مشعشعه!
ـ لا هيج ما بيه شيء
ـ جنتي شحلاتج بالسبعه وكلهن يسولفن بيج وبسبعتج خالتج طايره من الفرح بس تسولف ومتباهيه بيج والله أني ردت أطير من كلامها عنج.. تزامط كدام حربيه وهذا الأريدنه لان عمتج كاعدتلنا على الزله .
ـ ما بيه شيء بس ماما تصرفات خالتي ما أعرف شلون أحجيلج بس كدامكم شيء وكدامي شيء؟
ـ وشبيها تصرفاتها
ـ لا ما بيها شيء بس .. كعدت أحجيلها وما رضت گامت تحجي وترزل بيه
ـ بسم الله بعدج ما گملتي شهر وبدأت سوالف العمه والجنه وبعدين خالتج وأذا حجت تريد مصلحتج وگلبها على تعب أبنها فوك ما تفكر بيكم .. عيب عليج ماما خالتج ما بيها قصور وأنه أشوفه زينه أكثر من للازم
أحترمي ماما ولسانج أكصه أذا بيوم سمعتلج حجايه ويه خالتج لو مراددتها.. وهي هالولد شعدها غيرج وغير أبنها واكفتلها على كم حجايه واذا حجت خالتج وتكسر رأسج هم .
ـ لا هذا هو
ـ أي ماما أريد گلبج جبير ما أريد يكولن بنت سميعه ما تحترم لو محاجيه خالتها هاي أم غافر يباوع على حلگج ويريد رضاج لهذا أحمدي ربج وتشكري على نعمتج
ـ أن شاء الله ماما
ـ أي بنيتي ويله گومي لبيتج لاتتأخرين على خالتج لوحدها .
ـ تمام مع السلامة وطلعت من يمها ما صدگتني على الرغم من حجيت ردت أفهم تصرفها وشلون أتعامل وياها بس أمي ما فهمتمي ولا فهمتني شسوي لهذا قررت بعد ما أحجيلها وصلت البيت بس دخلت گامت تحجي وترزل بيه .
صبيحه ـ وين جنتي .
نور ـ خاله جنت يم أهلي مو گتلج راح أروح على أمي
ـ وشعندج رايحه على أمچ ومتزوجه كعدي بيتج وگابلي شوفي شمحتاج تنظيف غسل طبخ وأمج تردينها هي تچيج ولو ردتي تروحين روحي ويه رجلج مو لوحدج رايحه راجعه مسويه الدرب سچة قطار .
ـ بس خاله بيت أهلي قريب وما بيها شيء
ـ لا بيها شيء يالفهيمه شتگول علينا العالم توه تزوجت ومرت غافر مسربه على أهلها والله خوش
أنتِ بنيه جنتي تجين وتطبين علينا وعلى خوالج ما سلمتي من الحجي الطلع عليج بس مخچ مجيم ما يحط عندج والمزوجه أذا ينحجي عليها يطيح حظها .
وأنتِ المزوجته غافر كلها تحلف بي وبسمعته وأخلاقه
والنا سمعتنا بين الجيران
ـ ليش خاله أني شبيه
ـ ما بيچ شيء بس لازم تحسبين حساباتج وما أريد تطلع حجايه مرت غافر ومرت غافر .. كظبي بيتج وكعدي والأهل ما يطيرون .
ـ سگتت هذا هو خاله مثل ما تردين
ـ وبعدين شگو ما قدمتي على جامعه جان هسه مخلصه السنه حالج حال ربعج .. ليش كاعده ومكابلتني لا شغله لا مشغله
ـ عالسنه التجي أقدم أن شاء الله
ـ لا داده أذا حملتي ماكو دراسه بعد شنو مأخذتج أدرسج چا ما أريد أشوف خلفة غافر لو سالفة الحمل هم مأجلتها حاجيني نور
ـ لا خاله ما مأجلتها الله كريم منا لوگتها
ـ عبالي ديري بالج أنه أنتظر يوم يوم أزوجه وأشوف خلفته شعندي غيره .
ـ أن شاء الله خاله من رخصتج .. عفتها ودخلت الغرفه مخنوگه خنك من تصرفاتها بس گلت ميخالف بعدها ما متعوده عليه .. لليل رجع غافر وكعد يحجي هو وخاله على طاري العزيمه ما تعوفه الا تسويلهم عزيمه وأتفقوا العزيمه باجر .
صبيحه ـ مريتك تطبخ طبخها شحلاته
غافر ـ أي تعجبج ها حبيبي شو ساكته
نور ـ ها أي تدللوا بس شنو أطبخ
صبيحه ـ جدر دولمه وباميه ولحم وتمن وحشوه ودجاج شوي بالفرن وغافر يجيبلنا سمج شوي .
نور ـ أي أن شاء الله صفنت أني ما أحب الباميه كلش أنوب أطبخها ولا أعرفلها بس اسأل لبنى تعلمني طريقتها مضبوطه .
للعصر راح جابلي المسواك عزلته وطلعت مواد الدولمه خاله گالت نلفها من هسه أحسن وجهزت المواد وهي كاعده وراحت الغرفه وعافتني والله ما أعرف ما مسويه قبل!
بس ما طلبت منها مساعده بس راسلت لبنى وخطيه وياي ما قصرت تدزلي وعلى طريقتها وكعدت الف وتنفل وارجع ألف لما ضبطتها وأجه غافر من برا شافني وأبتسم .
غافر ـ أول مره بالتأريخ راح أكل دولمه من أيدج أوف أوف شنو هاي للفه التموت رفيعه مثل أصابع أيدج
ـ كعد يمي وتقرب لزم أصابعي ويبوس بيهن غافر لاتعيب على دولمتي
ـ منو معيب ولج غير شكلهن يموت دباعي شگد ناعمات مثلج وأني أكول رحت ورجعت وأنتِ بعدج!
أني ونافع طفينا كل حرائق العراق وأنتِ تسوين جدر الدولمه !
ـ لاتتقشمر عفيه
ـ لا والله ما متقشمر يله گملي گملي .. بعد شنو بعدلج
ـ الدجاج بس أكمله أتبله وأعوفه بالثلاجه صدك ليش هلگد طبخ
ـ مو كل خوالي معزومين أمي عزمت الكل يمكن تريد تتباهى بطبخج تعرفينها تحبج وتحب تمدج منج .
ـ تمام حبيبي .. رجعت كملت وهو كاعد يمي يگلب بموبايله نوب يصورني ويضحك عليه خرب غافر گافي خليني أشتغل
ـ مو شكلج يخرب ضحك متعاركه ويه الدولمه
ـ أشتغل ومتونسه على سوالفه ولا حسيت بالتعب لان هو ما عافني والدجاج ما أحتاجيت مساعده هو تبلها وياي وكظاها حضن وبوس وريحته زفر غافر بس اكمل واسبح .. كملنا گلشي وأخذت حمام وگبل نمت بحضنه وهو يبوس ويخبث ويحاول يكعدني تعبانه
وأريد أنام .
ـ نامي منو يمج نامي
ـ غفيت على حركاته الأدبسززيه ومن الصبح كعدتني خالتي عفت غافر نايم وطلعت باوعت خالتي ماكو گلت يجوز راحت تتسوك بس غافر تسوك .. طلعت للحم نكعته وبلشت تنظيف ورجعت خليته عالنار لما كملت كل شغل البيت خاله ماكو
ما أعتمدت عليها قررت أعتمد على نفسي وان شاء الله ما أتفاشل وياهم وغافر كل ظنه خالتي تطبخ وهي ما اعرف وين راحت.. واجهت صعوبه وبجيت لان ما اعرف بس صبرت وشجعت نفسي وأتصلت على لبنى ساعدتني ما عافتني لما كملت الغده وضل بس الدجاج وكعد غافر وكف يباوعلي
غافر ـ فدوه لأم بيتي .. شنو عالريحه الطيبه طبختي
نور ـ أي تعال شوف .. تقرب وخله تمن ومرگه وكعد يأكل .. ها موطيب مو .. بعد وگت نوصي على جاهز والله خليت روحي بي وخاله ما أعرف وين راحت جان ساعدتني يله غافر خلصت الماعون وانت ساكت
سوه حركه بإصابعه
ـ الطعم خورافي والله ولا أروع حيل طيبه هاي ما تعرفين تطبخين وطبخج هيج طيب لو تعرفين شلونه
ـ صدك والله تقربت حضني
ـ أطيب باميه أكلها والله طيبه شبيج أكليها وشوفي
ـ ما أحبها
ـ بس يمي تحبينها تعالي أوگلج منها
ـ لا عفيه غافر والله ما أحبها أكل دجاج وتمن ما أحبها
ـ لا أشو اليوم أخليج تحبينها .. هي طابختها وما تحبها
ـ صبلي ماعون وكعد يوگلني بأيده غصب وشوي شوي أستطعمتها شو طيبه من صدك
ـ لا من جذب ..أكلي حبيبي عافيات على گلبج
ـ أكل من أيده وهو صافن عليه ويمسح شفتي ويرجع يبوسها رومانسيته حتى بالأكل يخليها تشارك
ـ منو قبل شويه گال ما أحبها وما أكلها شو ضربتي زريك عليها دوسه ونص بالماعون
ـ غافر
ـ أفقد من تكوليلي اسمي تستغلين ضعفي كدام عيونج ليش يا ظالمه .
ـ گوم تأخرت ما ضل وگت وگمت وأني وياه خلينا دجاج بالتنور وهو راح يجيب السمك وباقي النواقص وكملت مقبلات والنواقص حضرت حتى الجاي .. ودخلت سبحت رتبت نفسي وأجتي خاله وأسممعها تحجي
صبيحه ـ الدولمه ليش ما مخليتها عالنار يالفاهيه وين ضل وگت
نور ـ خرب نسيتها ذبيت المشط ورحتلها والله خاله نسسيتها بعد وگت يله بعدها ب ١١
ـ وين ضل وگت عوفيها أنت مو مال أحد يعتمد عليج بالعزايم واني حاطه أيدي على گلبي لاتفشليني حتى السمج مو لزوم بس علمود أحتياط والدجاج خليتي
ـ وتذكرته خرب بس لا أحترك طفرت لورا البيت والحمدلله غافر منصي النار من أروح فدوه لعمرك نقذتني وسمعت صوته يصحيني شگو شعور حلو سگن گلبي .
غافر ـ نور وينج يابه نور
نور ـ تروحلك فدوه نور أجييت حبيبي أجيتك ها عيني
غافر ـ جبتلج السمج والخبز
ـ عاشت أيدك بس تعال شوف الدجاج حجيت هيج وخالتي عوجت حلگها.. وهو مشىٰ كدامي شافه
ـ غير صاير للوز بس خل أنصي بينما يجون يطلع حار
ـ صدك
ـ طبخچ يطگ بالكاع وعلي
ـ فدوه لعمرك نقذتني . مشكور
ـ نقذتني شُـنو هاي نوب ما أتحمل نور على كيفج على گلبي والله على ساعه يوكف من سوالفچ
ـ يمه أسم الله عليك لاهيج دگول
ـ تخافين عليه
ـ يمه ليش ما أخاف شبيك غافر وگته هالحجي عبرته وسحبني خله رأسي برگبته وحضني لاهيج تحجي غافر
ـ حبيبي ماكو بينا شكر وأستحسانات واجبي هذا
ـ أخذني ورحنا المطبخ لكيت خاله تطبخ التمن والحشوه لان أني ما أدبره خاف يطلع معجن..وبلشنا أني وياه نحضر المقبلات وتحضيرات العزيمه كلها نضحك ونتشاقه سوا وخالتي ويانا العرفته هي تغااااار على أبنها هو قدر الأمكان ما يخليها متغار .
صبيحه ـ روحي لبسي كلابيتج وكشخي
نور ـ رحت كشخت وسمعت صوت يمكن وصلوا طلعت غافر واكف يسلم عليهم وتقدمنا أني وخالتي وسلمت عليهم وشفت لبنى فرحت بيها .. دخلوا وبلشنا نصب الأكل أني وياه وخالتي كعدت تباوعلي كأنما تريد تشوفني أدبر لو لا .. نور ما گالت باطل أني وياه فرشنا السفره وأثنينا نجيب الأكل ونافع گام أخذ الصينينه مني ويرتب هو وغافر ولبنى بالمطبخ
تصب ولما فضيناها على خير وكعدنا ناكل الحمدلله ..
مشعان ـ طيبه هالباميه .
غافر ـ بالعافيه خالي هذا طبخ بنت أختك
نور ـ نافع گبل باوعلي وضحك
نافع ـ مو ما تحبينها شلون گدرتي تطبخينها
غافر ـ لا طبختها وأگلت منها هم لان طبخ أيدها .
نافع ـ أي عاشت أيدج والله صدك طيبه والأكل كله طيب
صبيحه ـ والله نفسها بالأكل شگد طيب
مشعان ـ معدله مثل أمها .. عفيه عليج خالي عاشت أيدج
نور ـ عليكم بالف عافيه .. فرحت من مدحوني ولبنى تغمزلي وأبتسمت الها ورفعت عيني صارت بعين نورس نظراتها غريبه تجاهلتها ووبعدها گملنا ومن شلت المواعين بس أني وغافر ولبنى راحت تصب الچاي
غافر ـ عوفي الصينيه ثكيله أني أشيلها
نور ـ أجمع بالصينيه وهو يشيل ونافع وعمي غسلوا وأجو وأسمعه يحجي وياها
نافع ـ گومي عاونيها .
نورس ـ لبنى يمها .
نور ـ كملنا ومسحت الكاع وهو كعد من يم الباب ونورس گامت من يم عمتي كعدت بصفه كملت وشفت غافر واكف باب المطبخ يسولف ويه لبنى وهي مستحيه من عنده .
غافر ـ شعجب ما أجه وعود خابرته جان أخذ أجازه زمنيه وأجه .
لبنى ـ والله هم گلتلته ما يگدر وتعذر وأن شاءلله عالجايات .
ـ على راحته وهلا بيكم يمت ما تجون
نور ـ دخلت وهو أخذ الهم الچاي واني ولبنى غسلنا المواعين ونظفت وياي گلشي ما خلته بحيث المطبخ طلعنا يلمع وصبينا الچاي وكعدنا يمهم يسولفون وعمتي منطلقه ويه عمتي ونورس مقابلنا بصف نافع
وبعدها قدمتلهم الفواكهه والحلو ...
مر الوگت والحمدلله كظت على خير وگاموا ونافع وگف ويه غافر يحجي وياه عالصفحه كلهم صعدوا بالسياره هو واكف وياه وبعدها راحوا ورجعت البيت نظيف بس الأستقبال خالتي أستلمته خاله عوفي أني أنظفه
صبيحه ـ لا عوفي أني أنظفه روحي على مطبخ لاتعوفينه للعصر
نور ـ يا مطبخ خاله غسلت ونظفته كله
ـ يمت لحگتي
ـ أني ولبنى كملناه
ـ ها أي زين .
ـ عفته ورحت الغرفتي تعبانه وأجه غافر طلع ظرف شنو هذا حبيبي .
ـ هدية نافع حاولت وياه ما قبل الأ أخذها مليون گال أنت ما محتاج غراض بيت الأفضل أنطيك فلوس
ـ ها أي شگو بيها .
ـ هاج أخذي الج خلي فوك أفضالج .
ـ أخذته منه الله صرت زنگينه
ـ أي العبي بالفلوس طشريهن حبيبي
ـ گمت ضمتهن ورجعت نمت بحضنه تعبانه من هوسة العزيمه
ـ بيضتي وجهي الله يبيض وجهج
ـ وجهك دومه أبيض ورأسك مرفوع حبيبي .
ـ بوجودج يحبيبتي .
ـ ونمت مرتاحه من ناحية گلشي أنهُ عدت العزيمه على خير وما قصرت بگلشي وبيضت وجهه أما هو ما أجازي على وگفته ودعمه وكلامه اليه .. بسته من خده وهو نايم وحضنته ونمت مرتاحه
لبنى
ـ أصعب شيء من تحس نفسك محطة أستغلال! هيج أني شفت نفسي بالأخص المسؤوليه اللي خلتها برأسي عمتي مكيفه عالوضع متعتمده عليه وطلعاتها وطباتها براحتها وما شايله لا هم رجال ولا هم عيال گله برأسي صح البنات هم يقصرن مرات مرات بس أغلبية الشغل برأسي وحتى هنا أعتمدن عليه لان يشوفن أمهن مكيفه عالوضعيه عود مرات تصييح عليهن ومرات لا والله عادي عدها لان شايفه من شايل البيت وحسيتها أرتاحت رادت من يجي ويشيل عنها المسؤولية! ..
أجه موسم الحصاد وگامن يرحن للقريه وعمي مشعان مرات يأخذ زهور وزينب مرات ضمياء وعمتي العرفته كل سنويه هيج وگت يأخذهم هناك وباقر بلغ عمي گاله لبنى مـا تروح الحصاد وأساساً عمي ما يقبل لان يدري البيت كله أني شايلته .
ونورس مزاجيه تشتغل على المزاج من يعجبها يعني ومع ذلك الكل يقدر الشيء التسويه ويعتبرونه أنجاز عظيم على الرغم أبسط من البسيط ومره بالأسبوع تطبخ طبخه والكل يمدح منها وأني الأسبوع كله أطبخ عادي ما الاقي الأهميه مثلها !
صارت تلفتني بهواي أمور وخليت نفسي بخانة المقارنات شنو الشيء البيها مميز وأني لا.. مو قصة غيره بـس هي ما مهتمه للوضع وعادي عدها بس يردونها وحتى رجلها عايفها على راحتها ومسوؤليات الجنه والعيال فقط مسوؤليه لبنى ...!!
شخصيتها بيها نوع من التميز والتفاته! ومن يوم الأجتي فرضت نفسها وشخصيتها عالكل .
گاعده أحضر جنطته، وهو يلبس بدلته العسكرية على السريع والثواني تمر ثگيلة على گلبي. كملت وگفت وراه أتأمل هيئته وعيوني تلمع بالدموع حس بيه، أندار عليه فجأة وفتح إيديه وحضني حيل لصدره وكأنما يريد يخفف عني وحشة فراگة همست بصوت مخنوك
باقر راح أشتاقلك
باقر ـ وأني أكثر والله لو تدرين شيصير بيه من أفارگچ روحي تظل معلگة يمچ بالبيت
لبنى ـ سگتنا من بعد ما ودعته مثل كل مره أضل يوم كامل مخنوگه ومشيت ويا للعتبه وگفته بالباب أودعه بعيوني لحد ما صعد بالسيارة وتحرك بيها وظليت أباوع لأثره لحد ما اختفى ورجعت للبيت، حسيت بخنگه هجمت عليه دخلت للمطبخ لگيته مخبوص باليل مأكلين وكم ماعون باقي بالسنك گلت أستغل الوقت وأنظفه قبل لا يگعدون ويتگومن عليه .
بلشت تنظيف المطبخ وخليت القوري عالنار وسمعت طبة الباب باوعت نافع دخل بإيده جنطته جان عنده خفاره .
نافع ـ ها صباح الخير.. شنو باقر التحق
لبنى ـ صباح النور أي والله راح الله وياه .
ـ بالسلامه .. والباقين نايمين كاعدين
ـ لا كلها نايمه
ـ مسويه چاي
ـ أي خليته على النار أصبلك
ـ أي والله رأسي مصطور ما يگعده وزن غير الچاي .
ـ راح الغرفته وحضرتله الگوب وأجه جر الگرسي كعد يگلب بموبايله بعدني جاي أحضر وأصبله الچاي دخلت نورس باوعتلي والوجه غاضب من أجتي لليوم هاي نظرتها بس تخزر عبالك گاتله أهلها.. وتقربت يمي سحبت القوري من أيدي
نورس ـ خدماتچ لاتعرضيهن على رجلي ويله وخري منا أني أسويله الريوك .
لبنى ـ دفعتني وگفت هي تصب ونافع ما مخلي باله لان عينه بموبايله ورجعت تحجي وهي تصب الچاي
نورس ـ نافع خل نتريك بالطرمه لو بالحديقه الجو حلو
نافع ـ گيفج وأني ما أتريك بس چاي خدر لو بعده
نورس ـ أي يله تعال .
لبنى ـ شالت الصينيه ومشت وهو وراها كعدوا بالطرمه واني الوصله بإيدي ذبيتها هاي شبيها من كل عقلها .. رجعت كملت تنظيف وأجتي عمتي صبت الها جاي وكعدت وياهم تتريگ .
نافع ـ راح أنام ساعتين محتاجين مسواك علمود أتسولكم .
حربيه ـ لا يمه روح نام وأرتاح عود أدز حليم يتسوك ألنا
لبنى ـ دخل الغرفته وجابت الصينيه عافتها عالسنك ولحگته سريع وعمتي صاحت وراها
حربيه ـ يمه نورس اليوم أريد أنتِ تطبخين الغده
نورس ـ ها عمه أي تدللي بس والله مالي واهس شو رأسي يوجعني وياريت أنتِ تطبخين أكلج حيل طيب
لبنى ـ أبتسمت بوجهه ومشت لغرفتها والغده عمتي طبخته! عجيبه هالبنيه عفت عمتي تطبخ ورحت الغرفتي نظفتها وكعدت راسلت نور هالفتره جاي تتعلم الطبخ والحلويات وأني مشرفه عليها وأدزلها وصفات وياها بگلشي وزينه تتعلم بسرعه لان الها واهس
نور ـ البارحة سويت المخلمه مره علمتيني عليها وغافر كلش حبها وصارت أكلته المفضله
ـ عفيه عليج أي هيج أريدج
ـ بفضلج والله أني أمي ما أروح عليها تعلمني أجي عليج ما أعرف شلون أشكرج على وكفتح وياي
ـ لا شنو هالحجي أزعل منج غير أحنه أخوات أي شيء تردينه تعالي عليه تمام
ـ أي أن شاء الله أريد يوم أجيج تعلميني الخبز أحب أتعلم وأخبزله
ـ أي ليش لا تعالي هلا بيج يمتى ما تردين گوليلي أعجن ونخبز وأصلاً سهل مره مرتين تتعلمين
ـ تمام أتفقنا أشوف يا يوم مناسب وأكول الغافر وأجيج
ـ براحتج عيوني .. وأسمع صوت نورس تصيح على صفا!
نورس ـ صفا صعدي نزلي الملابس من السطح نزليلي ملابس نافع وياچ .. خاله الأوتي مالتكم وينه أكوي
حربيه ـ الأوتي مالتنا عطل نگوي بالأوتي مالت لبنى
لبنى ـ أسمعهن يحچن بينهن وأندك الباب فتحته ها
نورس ـ الأوتي مالتج ممكن
ـ أي أنطيته الها وأخذتها وياها لغرفتها علواه تبقي يمها وتخلصني من الگوي لما ملابس باقر فلا أكوي
طلعت لكيت ضمياء تنظف البيت وأني غسلت الحوش وياها وتوني أريد أكعد
حربيه ـ عود أعجبني وخبزي ورا الظهر أعجنن هواي أنتِ وضمياء شو الخبز صاير ما يكفي ولا يلحگ .
ـ ماشي عمه .. گمت نخلت وحضرته ورا الغده أعجنه
وتغدينا ولمينا السفره وضمياء خلت ومشت وعمتي كعدت تحچي عالموبايل تسأل على عمي لان من الدوام رايح القريه .. ونورس بس غسلت راحت لغرفتها ضليت بس أني نهزمن هزيم من المواعين ..
وگفت أغسل بيهن وصاحوا على چاي .
نافع ـ لبنى چاي چاي وين صار
لبنى ـ هسه .. صبيتله هو وعمتي وأخذتلهم وطلعت نورس خزرتني هاي شبيها .. عفتها ورجعت أكمل غسل وأجتي تصب الها چاي .
نورس ـ أنتِ هيج دائما
ـ شُنو
ـ يعني ذابه نفسج وبس تردين الكل يصفگلج! لو شُنو فلمج بالضبط
ـ شقصدج نورس
ـ ما قصدي شيء بس مالها داعي تخدمين الكل علمود يرضون عليج والله أنتِ جنه وفرة العروس عوفيها ما تفيدچ!
ـ عافتني وصفنت على كلامها هاي شتحچي! گملت وعجنت وصبيتلي چاي وگعدت يمهم عمتي تحجي عالموبايل ونافع هم يگلب بموبايله ونورس بصفه تباوع وياه علاقتهم حلوه باوعتلهم بدون قصد گبل خزرتني مال أكوم أطلع عيونها على هالخزرات .. باقر أتصل ولكيتها حجه وعفتهم ودخلت غرفتي هلا عيني
باقر ـ هلا بگلبي هلا بمريتي شلونج بويه
لبنى ـ مشتاقتلك والله أني زينه من أنت يمي ومن أنتِ بالدوام أبد لاتسألني شلونج لان أبد موزينه من دونك
ـ أويلي يربك.. حبچ عذاب لبنى عذاب والله أحس بفرگتچ حتـى الهوى يخنگني نوب صوتج تعبان تخليني الوب عليچ .
ـ بچيت وچر حسره شطولها وتأفف
ـ شبيج متگولليي منو وياج ليش صوتج تعبان والله أنزل هسه وأطيح حظهم المضوچينچ
ـ ما بيه شي والله بس مشتاقتلك
ـ حقچ عليه والله حقچ وأني مقصر وياچ وهالمره بس أنزل نطلع فدمكان نغير جو ونتونس
ـ بكيفك أني مو مهم نطلع المهم تكون يمي والله
ـ أدري بيج وأعرفج ما تهمج هالأمور أنسانه بسيطه وأني عشقتچ وحبيتج بكل أطباعج ما بيج طبع ما ينحب وزلمه شگدني شگبرني والله من يوم الشفتچ صرت طفل يضحي بـ دنيته بس علمود ليلة بـ حظنچ
ـ أحبك باقر
ـ أي شعوطيني بعد وين يسويها البخت وهسه أنومج بحضني وأنت تسنحين والتعب مبين عليج أنتِ تنامين وأني أضل اتأمل وجهج الحلو .
ـ يحجي وأني أستمع اله لما دزوا عليه وراح وسد الخط ورجعت نمت للعصر كعدت رأسي مسطور ونفسي تلعب وعندي خبز .. كعدت أشنك العجين وضربت برأسي القيمه!
گمت أخبز وضمياء على أيدي تطلعلي لما گملت وشفت كرصة خبز حار الله كون وياها ماعون قيمه
ضمياء ـ شُنو مشتهيه قيمة
لبنى ـ أي والله .. خلي الخبز بالمجمده لما أسبح رحت أخذت ملابسي وباب الحمام مقفول محجوز! شون سالفه ضمياء منو بالحمام .
ضمياء ـ يمكن نافع.. روحي سبحي بحمامنه أذا تردين ماكو أحد وناجح بالدوام .
ـ لا ما يحتاج . رجعت الغرفتي وسمعت صوت الباب طلعت وشفته دخل الغرفته گبل دخلت وأندك الباب
نورس ـ منو بالحمام .
لبنى ـ أني
ـ وشبسرعه دخلتي چني خوما چني دومج عرسج ويه عرسنا .. ديله أستعجلي أريد أسبح .
ـ ما جاوبتها سبحت وطلعت گبل الغرفتي عوزها تحاسبني على السبحه هم ..دخلت وتمددت ظهري يوجعني وراسلت باقر حبيبي موجود .. گبل رد عليه
ـ ها حيل حبيبج أي موجود .
ـ باقر أريد قيمة؟
ـ أصيرلج قيمه
ـ لا اريد قيمة صدك والله حباب مشتهيته
ـ اوصيلج من المطعم وأخلي واحد من أخواني يستلمها الچ لو تتنظريني من أنزل أخذج ونأكلها برا كيفج
ـ لا لا اريد طبخ مال ثواب
ـ منين أجيبلج مال طبخ هسه مو وگتها حبيبي ماكو طبخ هسه
ـ ليش شوگت
ـ ليش ما تعرفين شوگت
ـ والله ما أعرف صدك شوگت هي
ـ بشهر محرم حبيبي أول يوم من السنه الهجريه
ـ ها أي صدك تدري أحب أجواء الطبخ كلش وأبدا ما عايشتها وشايفتها
ـ ليش أبوج الله يرحمه جان يطبخ ويوزع لكل المنطقه رقم واحد بالقيمه .. يجيب طباخ يطبخله الفرع كله جدوره .
ـ أي صح جان يطبخ بس أني جنت يم أمي وأمي من غير طائفة ما يطبخون وقليل نجي على بيت جدي بس من جان يطبخ يجيب النا للبيت نأكل منها كلش طيبه متشوفني هسه گمت أمطك عليها .
ـ ما بقى كم شهر وأشوفج أجواء محرم يمنا بقريه مو هنا...هناك عندج حبوبه تجيب ملايه وكل نسوان عربنا يجن علينا وتطبخ قيمة اليحبها گلبج .
ـ أن شاء الله گلبي من يجي محرم نروح القريه
ـ ان شاء الله حبيبي تدللي
ـ هسه أريد قيمة
ـ مو أتفقنا هسه على محرم أصبري عليه
ـ ما عليه أريدها هسه
ـ شبيج حامل وتتشهين عليه منين أجيبلج قيمة مال طبخ .
ـ شلون ما تجيبلي
ـ أوصيلج من المطعم طيبه والله
ـ تمام وصيلي وأريد تمن حگاگه
ـ تدللي بعد
ـ سلامتك حبيبي وفعلاً وصالي وگال نص ساعه وتوصلج گمت المطبخ لكيت نورس كاعده تسوي العشه وصفا على أيدها تغسل المواعين
صفا ـ شگد توسخيين مواعين لخاطر الله ما طلع عشه هذا
نورس ـ أشتغلي وأنتِ ساكته وبعدين شمسويه هنا ماعونين
نافع ـ شگو شبيجن صوتجن واصل للغرفه
نورس ـ ماكو شيء حبيبي .. جاي أسوي عشه وأعلم صفا .
نافع ـ أي بله لغوه صفا صوتج ما أريد أسمعه مناگر ما أريد .
لبنى ـ حچه وطلع وشويه ودخل بأيده علب وخلاهن عالميز
نافع ـ عيني ست لبنى وصلت طلبيتج .. سيادة الضابط موصيلج على قيمة .
لبنى ـ ها وصلت أي والله .. فتحلي العلب وچاب خاشوگه نافع شتسوي بس لاتأكل وياي
ـ أي عندج مانع خوما تأكلينها گلها شنو أفا حوت أنتِ
ـ لا عفيه تخلصها ما بيها غير لكمتين الك شتخليلي منها
ـ طلعتي أم كرش دهاج شبعي بيها .
ـ عافلي الخاشوگه وراح ونورس باوعتلي
ـ شُنو مشتهيه قيمة
ـ أي والله
ـ خاف حامل ولچ .
صفا ـ شبسرعه حملتي!
نورس ـ وأنتِ شعليج بهل السوالف! مو يمج السالفه كملي البيدج وروحي طلعي الملابس من الغساله
صفا ـ أي لاتتأمرين وتصييحين ترى أعرف شغلي.. لبنى بقيلي منها أمانه
لبنى ـ أي ميخالف عبرتني وكعدت وخليتها عالميز أكل بشهيه ونورس يمي تطبخ العشه رافعه شعرها ذيل حصان ولابسه الصدريه وتشتغل وشغلتها مرتبه وبواهس... أكل وأباوعلها وگملت وشفت نافع گبالي
يگلب بموبايله خرب شحس من ما خليته يأكل وياي شلت العلب ورحت عليه نافع والله مو قصدي ترى
جنت أتشاقه وياك
ـ أي وهسه تذكرتي من ترستي بطنج وجايبتلي فضالتج! ما أكل والأ أوصي وأخليج تمطگين .
ـ عليك الله لاتقهرني والنبي مو قصدي
ـ يله هالمره سامحتج نزليها .
ـ نزلتها وكعد يأكل وصبيتلي ماعون وبعد مسافه عنه يأكل ويگلب بموبايله وأجتي نورس تنشف أيدها بالخاولي وگفت وصفنت علينا وحجت برود
نورس ـ كعدتكم فاول .
نافع ـ تعالي ويانا طيبه تفوتج
نورس ـ لا ما أريد لان اليشوفكم ينقهر عليكم عبالك مجاعه
نافع ـ نورس لسانج لاتطلعينها من خشمي
ـ چا المن طابخه العشه وخابصه نفسي وأطبخ وأنت أكلت قيمه بعد ما تتعشى وحضرتج مشتهيتها أكليها لوحدج شگو توزعين خيرات .
لبنى ـ ما جاوبتها شلتها ورحت المطبخ ونافع عافها وگام غسل وجابتها خلتها كدامي وحجت بغضب
نورس ـ خليني أتعامل وياج بطيب لا والله أطلعلج وجهي الثاني وأخليج تكرهين يومج بهذا البيت
ـ أنتِ شتردين لخاطر الله بس ملاحگتني وتذبين بسمچ عليه ما مسويتلچ شيء على شنو حاقده .
ـ ما أريد غير ما أشوف هالتصرفات الطايح حظها بحجه الميانه .
ـ سگتت من دخل نافع
نافع ـ طالع تردين أجيبلج شيء وياي .
ـ أطلع وياك أنتظرني بس أغير ملابسي
ـ وين تطلعين وياي خليها غير وگت
ـ لا هسه عاجبني أطلع
ـ ديله روحي لبسي بينما أشغل السياره
لبنى ـ ركضت لبست وطلعوا وگمت ولزمتني الدوخه الكاع أفترت بيه والأكلته ذبيته فرغت معدتي كلها تملخت .. كرهت القيمه طلعت من عيني من كثرما رديت من رأسي .. دخلت غرفتي تمددت تعبانه .
بعد ما طلعت عالعشه دگوا الباب ما رديت لورا العشه دخلت نورس حاجتني من الباب .
نورس ـ سمعت راده من رأسج بس لا تسممتي من القيمه الجابها نافع
ـ لا أني معدتي متخربطه ليش هو تسمم
ـ لا گلشي ما بي .. وشلونج هسه زينه لان عمتي تسأل ودزتني أشوفچ
ـ أي الحمدلله أحسن .
ـ عندج العافيه .
ـ الله يعافيج أبد ما تنحرز .. راحت وبقيت نايمه الصبح الوقت متأخر واني ما كمت مالي خلك بس سمعت صوت عمتي وهبيه! عمه .
وهبيه ـ وينها گالوا راده من رأسها وأجيت أشوفها ليش لحد الأن نايمه كعدتنها شفتنها .. لبنى يمه نايمه .
لبنى ـ هلا عمه لا كاعده گمت سلمت عليها وتبوس بيه وتتلمس بگصتي وتباوعلي شبيج عمه
ـ شگد غايبتلج شو وجهج وجه وحده حامل!
ـ تذكرت التأريخ وأحسب وهي منتظرتني
ـ ها يمه بشريني من الله يبشرج بالخير من سألت عليج باقر وگالي مشتهيه قيمة وصيت الها توصيل أني الكاع ما شالتني ما عولت يصبح الصباح ويجيبني عمج من الليل شديت عليه ردته يجيبني وطبختلج قيمه جبتها الچ سويتها على حسابج .
ـ فدوه لگلبج عمه والله أكلتها وكلها ذبيتها من معدتي ولحد الأن معدتي تگلب مدري نورس تگول خاف تسمتتي!
ـ لا يا يمه يجوز حامل ما گلتي شگد غايبتلج
ـ خمسة أيام .
ـ وساكته چا ما تحجين تگولين
ـ مو هي كل شهر تتخربط عليه كم يوم يعني مو ثابته
ـ ميخالف حتى لو أنتِ هسه متزوجه مو بنيه گومي لبسي أخذج أسويلج تحليل هسه .
ـ هسه عمه
ـ أي چا بعدين .. گومي شمنتظره وين بختج يوهبيه وجنتج تطلع حامل .. من فدوه لوجهج گومي بالعجل
ـ لبست وخبصتني من فرحتها وخفت أطلع مو حامل وتنقهر لان اني شهريتي مو منتظمه وأخر مره غسلت منها قبل لا أتزوج .
طلعنا ونافع أخذنا وضل يفتر يدور مختبر مفتح وصلنا يم مختبر ونزل ويانا .. تمنيت لو باقر موجود بس يله ان شاء الله أطلع حامل وأفرحه .. سوينا تحليل
نافع ـ يله عمه أوصلكم بعدين أرجع أخذ التحليل
وهبيه ـ لا يمه نبقى ننتظر شورانا ما أروح گبل لا أشوف التحليل .
نافع ـ بي جهال لان اليشتهي قيمه ويخبص سيادة الضابط ويوصي ويصيح عليه المن لأبوي .
لبنى ـ خرب وگعت بللسانه شيخلصني منه
نافع ـ جهالج من هسه نفسهم دنيه وضرابين صياني وأنوب الا قيمه وين ما أكو أكله دسمه وثكيله لبنى عليج الله أستمري على هالأكلات كله هبيط وبقوا رقمي يم أبو التوصيل أني أستلمه الكم .
لبنى ـ عمتي ضحكت على سوالفه وضلينا كاعدين ننتظر التحليل وصاحوا أسمي راحلهم نافع وعمتي وراه وأجه ويباوع التحليل
وهبيه ـ ولك يمه أحجي شگالك .....
