رواية فصلية بديلة ( شموخ ) الجزء الثاني الفصل الثالث والعشرون بقلم ام ملكوت
:-ابتسم وجر حسره حسيتهه طلعت من روحه نزل راسه وصار بمستواي ولفح وجهي انفاسه الحاره
باسني قريب شفتي رجفت اطرافي وعصرت ايده لا ارادي ابتسم وابتعد لزم شعري بعده عن رقبتي وكال بصوت شبه مخنوك وهوه يباوع لشعري..
_احبج جنتي...
رفعت راسي خليت عيني بعينه المدمعه وكتله..
_ليش مخنوك احسك
_بداخلي فرح بكد رحمه الله يريد ينفجر ويتقطر على متونج
_محمد..
كلت اسمه وبلع ريجه بصعوبه سحبني لحضنه حيل ودفن وجهه برقبتي حسيت انفاسه مو منتظمه ودمعه غرك ملابسي بقيت امسد على ضهره وضاق
صدري تمنيت لو اكدر هسه ابجي بحضنه واستمد طاقتي منه مثلما يسوي هوه تمنيت لو اكدر اشكيله على مرتضى ويروح يتعارك وياه ويدافع عني
تمنيت اتخذه درع عن كلشي مؤذي واحتضنه طول العمر ..حسيت بدفو حضنه وحنيته تتخلخل لجروح كلبي مثل البلسم ولا اراديا نزلت دموعي
حاره على خدي بقه لحضات ودموعه تنزل سكته وبعمري ماراح انسى دمعه الفرح هاي يلي طاحت بحضني وهذا موقف من المواقف الحلوه يلي تشفع
للشخص اغلب اخطائه .. اخيرا هدأ وبقه يستنشق انفاسه بشعري لحدما قاطعنه صوت الباب وصاحوله اولاد عمه ماعرف جماعته وكلوله بحجه
الشقه "يمعود عندك وقت خير من الله تشبع من حلالك بس امشينه هسه عدنه اشغال ".. ابتعد وهوه مبتسم على كلامهم مسح دموعه ومسحت
دموعي انتبه علي وعكد حواجبه باستغراب حضن وجهي بكفوف اديه وكال بقلق وهوه يمسح الكحل السال من عيوني..
_ليش هل دموع بيج شي جنه
_لا بس ماتحمل اشوف شخص يبجي كبالي انقهر
_سوده علي هاي من بدايتهه وقهرتج من احتركت دموعي
_لا اسم الله عليك
_تعالي شربي ماي لا تبقى غصتج بصدرج..
اخذني من ايدي للطاوله صبالي ماي بالكلاص ورفعه شربني بيده حسيت راحت الغصه من بلعومي شوي جريت نفس وهو يمسح ببقايا الكحل
مبتسم .. دكوا الباب اقاربه وامي ودخلن كلله يله يردونه بره كلهن اي طالعلهم ورجع التفت علي باس راسي وصاني على نفسي ودعته وبدي مايروح
احس بعدني محتاجه حنيته وحبه الي بعدني اريد اكعد اسولف والتهي ويا عن ضيمي وكأبتي لان ادري لو طلع راح ترجعلي كأبتي والوحده ..
تنهدت وانه اشوفه يطلع اجن النسوان سلمن علينه انه وامي وخالتي وراحن بالساحه رجعت انه للغرفه بعدما شفت كل يلي اجو طلعوا من البيت فتحت شعري لان البروش اذاني ..
مشطته ورجعت لفيته بقراصه رحت طلعتلي دهداشه بدلت ملابسي وكعدت على ميز المرايه ردت امسح المكياج و دخلت شموخ كالت ان ابوي
يصيحلي كمت لفيت حجابي و رحت للصاله باوعت لبابا وهوه فتحلي اديه مبتسم ابتسمت ورحت غصت بحضنه وهو يمسد على راسي ويكول..
_مبروك يبعد ابوج بالرفاه والبنين انشاءلله
_الله يبارك بيك بابا
_شلون شفتي الناس اهله من كعدوا وياج وسولفوا
_لا خوش ناس والمره فقيره خطيه ومالهه حيل حتى تمشي شفتهه انت بعد
_اي خطيه ديري بالج عليهه بويه بعد من ترحين يمهم تره مره جبيره هيه تحمليهه وكسبيهه والج ثواب عند ربج جبير
_حاضر بابا حبيبي لا توصيني بالجبير وانه تربيتك
_يبعد بيت ابوج وحيله..
باسني براسي ورحت سلمت على عمو شهم واعتذرت منه لان ماقبلت طلبهم هوه ومرتضى وهوه قابل رفضي برحابه صدر
وما بين ان ضاج مني او فد شي ..باركولي محمد وسلام ورحت سلمت على احسان وباركلي وهوه يكول..
_محمد رجال والنعم منه وكل المنطقه تحمد بي وباخلاقه فحافظي عليه لانه جوهره بهل وقت
_اكيد انشاءالله بس وين دريت بسمعته بالمنطقه
_انه اخوج رحت طلعت موقعه وبيته وشغله واسم عشيرته وماخليت واحد ما سالته عليه والحمدلله كلهه ثابته على راي واحد ويكول محمد رجال شهم وغيور على عرضه وكفو عند الشدات..
ابتسمت واحس باطمئنان وراحه غريبه تخلخلت لكلبي من كلام احسان عن سمعه محمد بالمنطقه وصعب بهل وكت تلكه ناس تحمد بيك وتقدر
وكفاتك واحترامك الهم ومحمد نال رضا الناس واهله واهلي وروحي ..ربي يرضى عليه ويوفقه من عالي سماه لان يوم عن يوم كاعد يثبتلي ان قراري
بي افضل قرار اتخذته بحياتي وماراح اندم عليه بيوم .. باوعت لخالتي سماء والدمعه تلمع بعيونهه
تذكرتهه شلون جانت رايدتني وتتمنى اصير لابنهه رحت حضنتهه و باركتلي وكالت وهي تمسد على خدي..
_تمنيت هل جمال والادب يكون من نصيب وليدي بس الله حكم ان يكون نصيبج ويه غيره ولا اعتراض على حكمه ربي يهنيج ويوفقج ويه خطيبج حبيبتي
_تسلمين ياخاله ويوفق الكل يارب..
ابتسمت ورحنه انه وشموخ للغرفه كعدت انه امسح المكياج وهي ذبت روحهه عل جربايه هلكانه وريانه تفتر يمنه تلعب بملاعيبهه باوعت لشموخ وكتلهه..
_الله يساعدج خيه
_ويساعدج انكسر ضهري همزين عقدتوا هسه لان مابيه حيل ارجع اسوي ٦ مرات جاي وماي بالخطوبه
_هههه خطيه تعبتج اليوم من جهه تنظيف البيت وترتيبي ونوب الجايات والمايات
_اي والله بس تعبج راحه و مدامج كاعده كومي طكيلي ضهري لان احسه انخسف
_هههه من عيوني..
كلبت على بطنهه بتثاقل ورحت دلكت ضهرهه تالي طكطكته الهه طلع صدك مخسوف وعضامهه متشنجه مو مجرد مثل ضربته.. ابتسمت بامتنان وتشكرتهه
ابتسمتلي وكامت على حيلهه حضنتني ماتحملت وخنكتني العبره نزلت دموعي الماكدرت انزلهه كبال محمد وبجيت بصمت .. بقت تمسد على ضهري
لحدما اكتفيت من البجي واحس ارتاحيت والخنكه اختفت مسحت دموعي وبقيت اجر
بخشمي صار بي سيول شكد اكره هل شغله من ابجي يضل خشمي يسيل وجيب اليسكته .. كمت
غسلت وجهي بالحمام نشفته وطلعت لكيت نقالي يرن اخذته شفته محمد خليت ايظي على كلبي جريت نفس وفتحت خط رديت عليه وانه خشمي منشول وكال بقلق..
_شبيج جنه كاعد تبجين شنو
_لا بس انشلت
_ههههه سوده علي حبيبتي خلي قطره مال رشح
_اي هسه اكوم ادورلي قطره
_اذا ماتلكين رديلي خبر حتى اجي اجيبلج وحده
_لا ماكلك متوازيه
_ليش ولج
_جاي من ابو الخصيب لهنا بس علمود قطره تريد اكلي رزاله معدله من اهلي
_لا شكو بيهه غير صرتي حلالي و مسؤؤله مني عسى ما اجي من اخر الدنيا لازم يفرحون لان مدلل بتهم
_اي بس ما يردون يتعبونك لان يضوجون عليك ويكلولي توه رجع الولد و خليتي يجي والطريق بعيد علمود قطره خشم جان كتيلنه احنه
_اتعنى من البحور والبدور واجيبلك يا حلو الشجر والبذور
_هههه تاليفك هاي
_شلوني بله
_ينطلع بيك
_ههه يله هم زين جا سمعي هاي بس مو من تاليفي
_اشرق قلبها في سمائي
واكتمل حُسناً وبهاءً
انطفئ كل نجماً حولها
لقد انارت سماءً بثغرها
وأخمدت بمقلتيها انوار
حبيسٌ في ابتسامتها
متيماً برمشة من عيناها
وكأن لها سحراً وانا مسحورها
اذ نطقت بحرف من حروف اسمي
كأن حرفاً جديداً ولد بثغرها
تهب ريحاً عاصفة بنظرتها
فتقتلع قلبي من جذوره
ويرتجف جسدي كأن به رعشتاً
وماهي الا رعشت العشاقِ
وعندما يراني قوماً مابك نحلٌ
لقد ابراني تيم الوجدي
وماهو نحول في الجسد انما
اخذ المعشوق اجره العشاق..
_احححي حلوه لهل قصيده
_حلاكي ما زاد وطاب
_همم ماعرف شكول من واحد يتغزل بيه
_يكفيني خجلج الهادئ
_محمد
_ااخ الله كلبي
_هههه شبي كلبك
_نار وتسعر على همسات صوتج
_ ههه تعشيت بعدك
_لا والله بعدنه بالطريق
_لا صدك
_اي والله ازدحام لان
_وانه عبالي بالبيت وهل عندك نت
_لا بعد شوي ونوصل انشاءلله
_ اي انشاءلله
_انتي تعشيتي
_لا هسه نتعشه
_تمام لعد روحي تعشي وانه من اوصل للبيت ادزلج رساله
_تمام توصل بالسلامه انشاءلله
_الله يسلمج جنه
_بيباي
_ الله وياج كمر ليلي..
ابتسمت وسكتت بخجل وهوه ضحك خفيف وراح سديت الاتصال وتمددت عل جربايه بقيت اكلب بالنقال لحدما صاحولي عل عشه كمت لفيت
حجابي زين وطلعت للصاله لكيتهم كلهم كاعدين عل سفره ومرتضى ماكو همزين كعدت يم شموخ سمينه بسم الله واكلنه شويه وسال عمو شهم خالتي سماء عن مرتضى وجاوبته..
_خابرته مساع كال راح ابقى يم صديقي عازمني عل عشه وراح يتاخر يمه
_هاا خوش من يرجع كليله ابوك طالبك حتى لو نايم انه كعديني
_انشاءلله اكله..
سكتوا تالي حجه بابا موجه الكلام لعمو شهم وحسيت بغصه من كلامه..
_خويه شهم انه وعائلتي انشاءلله بعد باجر ننتقل لبيتنه امس رحتله وكالوا خلصنه وبس سووله تهويه حتى مايبقى اثر ريحه شعواط بي
_ليش خويه خليكم عدنه والله مرتاحين بوجودكم يمنه مانريد نتعود عل فركه
_اي والله ياخويه انه هم مايهون علي اعوفكم واروح لان طول انفصالي عنكم جنت احن لايام اهلنه والعيشتنه انه وخواني بنفس البيت بس
شسوي بعد الاهل من يموتون تتطشر اولادهم وهم لو ما اخوك شعلان وكف فوك راسنه يريد يطلع ويزوج اولاده جان بقينه ملمومين وعائله وحده ببيت واحد
_اييه ياخويه راحت ايام كعدتنه سويه واللمه الحلوه ويه الاهل
_بس ماتروح خوتنه انشاءلله احنه حزام ضهر الك ومانعوفك
_تسلم ياخوي الله لا يفرك شملنه انشاءلله
_امين يارب..
كملنه عشه ورجعنه كلمن لغرفته وانه وشموخ بالمطبخ نرتب بي بقت بتهه تبجي مصخنه خطيه عاد خليتهه تروح تنومهه واخذت المطبخ منهه ..
اندمجت بالتنظيف وغسل الماعين وفزيت على صوت النقال اجيت شفته محمد يتصل رديت عليه واجالي صوته تعبان..
_الوو جنتي
_هاا محمد وصلت
_اي الحمدلله قبل شوي وصلت لكيت عدنه خطار ماكدرت اراسلج وهسه طلعوا
_الله يساعدك مبين التعب على صوتك
_اي والله احس جسمي متفلش شكلي داخل فلاونزه
_شكلهه صابتك عيني
_ليش طالع حلو
_اي يعني ينطلع بيك
_ههه جا شلون تحسديني اذا طالع مو حلو
_ههه لا اتشاقه وياك مزيون عين الله عليك
_هاا مشكوره يبعد بيتي
_العفو وانشاءلله مابيك الا العافيه هوه انت تحس هيج لان تعبان كوم اسبح وبدل ونام للصبح تكعد مابيك شي باذن الله
_اي انشاءلله بس تدرين
_شنو
_ ماتدرين شكد فادني حضنج مساع احس خوف وهم سنتين نزلن على متونج تمنيت ماطلع وابقى نايم بحضنج ايام تمنيت كون نقفل الباب واتمدد على صدرج وانام ليله ليلتين عمر عمرين
_احم ايي
_ههه ايييه ياجنه اييه انشاءلله باجر تجين للدوام لوو
_ماعرف يجوز راح اطلب اجازه باجر لان راح نرجع لبيتنه
_هااا
_اي والله
_بيش ساعه ترحون
_تقريبا ب١٢ نتغده ونطلع
_عدكم شي منا منا اساعدكم بي
_لا والله تسلم خيرك واصل وماعدنه شي هنه جم جنطه مال ملابس ناخذهن ونروح
_تمام انه هم اجي انشاءلله باجر اخاف يحتاجوني بشغله
_لا ليش تجي و تعب نفسك وانت تعبان اصلا صدكني لو عدنه شي جان كتلك تعال ساعدنه بس ماكو اجينه بطرك ملابسنه وجيتك وتعبك راح يكون عل خالي بلاش
_هيج رايج
_اي والله وهم الدوام منا وشغل المشروع لازم تشتغل عليه لحدما اداوم حتى لا نتاخر بتسليمه
_ماشي لعد تمام
_يله نام هسه وارتاح لان شكلك مفلش ومابيك تكوم تسبح
_ههه اي والله ليش اجذب عليج مابيه حتى اكوم ابدل ملابسي
_كواك الله
_يكوي حيلج يبعد حيلي
_يله روح نام تصبح على خير
_اجمعين جنة تغطي زين من تنامين
_انشاءلله انت هم تغطه زين وطفي السبلت ادري بيك شاعله
_هههه انشاءلله حبيبتي
_هههه يله باااي محمدد
_هههه بيباي خضار عيوني بيباي..
سديت الاتصال وانه اطرافي ترجف مو برد وانما خجل على توتر شي جديد وشعور جديد اول مره احس بي وماعرف شلون اتصرف وياه من يحجي
هيج لو يتقرب مني .. تنهدت ورجعت امسح بالكاونتر شفطت الكاع وكملت ورحت للغرفه سولفنه شويه انه وشموخ وغفيت بدون ماحس على سوالفهه لثاني يوم الضهر فتحت عيوني كوه
شفتهه ب١ الضهر فزيت مخروعه تأخرت عل دوام تالي تنهدت براحه ورجعت راسي للمخده لمن تذكرت اني ماخذه اجازه يوم كامل .. لفحتني البارده ورجعت تغطيت ونمت مثل السكرانه
حتى الصلاة طارت من بالي ماكعدت الا المغرب على صوت الاذان وحسيت بشعور غريب يوم ونص انه نايمه وفاقده عن العالم تالي اكعد على صوت اذان المغرب ..
ذكرت ربي وكمت دخلت للحمام توضيت وطلعت صليت وكملت طلعت سمعت بيت عمي وبيت اهلي بالصاله يباوعون مسلسل ويحجون رحت للمطبخ اشوف شكو بالثلاجه لان جعت وشكلهم اليوم مطولين بسوايه العشه عاد كلت اكلي لكمه اسد جوعتي للعشه شفت مركه الشبزي شكلهه زايده من الغده طلعتهه
احميهه وانطفت الكهرباء سديت الثلاجه وبقيت اتهمس بالمكان حتى اطلع فزيت على اثر طيف شخص مر من كبالي لزمت كلبي خايفه واحس راح
اطيح من طولي ..صحت منو بس ماكو صوت طلعت امشي كبل لغرفه شموخ واسمع امي وخالتي يدورن عل شموع واللايتات اجه ضوه لايت خفيف من
بعيد ردت احجي وشخص من وراي سد حلكي وهو يسحبني من خصري لغير غرفه بقيت اتحارب وياه شادني شد على جسمه ماكدر اتحرك عضيت ايده وهمس يم اذني بفحيح حار ..
_اشش انه مرتضى لا تخافين تعالي اريد اكلج شغله..
رخه ايده من شافني هدات بعدتهه عن حلكي بنتر وهمست متجنبه سماع اهلنه لصوتنه..
_شتسوي مرتضى شلون تتجرأ وتلزمني بهل طريقه ماترتاح الا لمن الم اهلي عليك..
تجاهل كلامي ولزم زندي عصره حيل وعتني عت وراه للغرفه لا اكدر ابعد ايده ولا اكدر اصرخ
ويشوفونه اهلنه دخلني لغرفته وقفل الباب تخبلت واجيت فتحته لزم ايدي عصرهه بيده الباب وكال قريب اذني..
_اذا ماتردين اهلج يشوفونج بغرفتي كعدي عاقله واستجني خليني اعرف احجي
_اخخ ايدي اذتني وخر مرتضى مابيناتنه حجي وماريد اسمع منك شي بعد خلاص صرت انه بذمه رجال ثاني ومالك حق تمد ايدك علي وتجيبني لغرفتك بهل وقت وبهيج طريقه..
عكد حواجبه بعصبيه وتقرب باتجاهي مامبين منه غير عيونه يلي لمعت اثر ضوه اللايت ابتعدت ولزكني بالحايط سند اديه عل حايط من يم
جوانبي وقرب وجهه لوجهي باوعتله ببرود وتساؤل اريد اعرف وين يوصل بتصرفاته هاي وياي وحومه حوالي رفع ايده مشه اصبعه على طول خدي وعصر فجي حيل وكال بكل ثقه..
_باجر من الصبح تحاجين ابوج وتكليلهم اريد افسخ الخطوبه ردتي تجربين غيري وتحركين كلبي ونجحتي بهل شي وهسه خلص وقت اللعب من باجر تفسخين هل عقد التافه تمام
_ههه شكلك مثل السكران تدري
_جنانه لا تخبليني كتلج تفسخين هل عقد يعني تفسخينه
_مو الناس لعبه بيدك يمته مايعجبك تتحكم بيهم
_شلون ماتفكريني فكريني غير هل كلام ماعندي وباجر اذا مر وماسامع بيج فاسخه العقد تعرفيني شسوي
_شتسوي بله
_شغلي ويه ذاك الحقير مو وياج
_بأي حق وبصفتك شنو بله كاعد تامر وتهدد تعرف كلامك هذا لو احجي لابوي وابوك شراح يفكرون بيك وشنو راح يكولون عليك
_مايهمني احد والكتلج عليه تسوي يا اما اسوي بيج شي لا ابقيج الي ولا لهذاك المايع ابو عدسات
_يشرفك ويشرف عشره من امثالك خوش والضاهر ماكفاك رفضي وفشلتك كدام ابوي بس انه اعرف شسوي
_انجبي ولج تهددين شنو وشراح تسوين بقله حيلتج هاي اصلا
_هسه اشوفك شسوي..
دفعته عني وطلعت بره وهو اجه يمشي وراي باستغراب رحت للصاله على ضوه اللايتات الطالعه
منهه وشفت اهلي وبيت عمو شهم متجمعين حسيت بمشيه مرتضى اجه وراي ادري بروحي ماراح اكدر اسوي شي بس حجيت هيج وهددت حتى يعوفني اطلع من الغرفه لان صدك اختنكت وخفت احد يشوفنه او يسوي بيه شي تحمحمت وحجيت وانه اتوجه لبابا..
_بابا ليش طفت الكهرباء
_مادري يابويه بكل المنطقه طفت صار قطع من الرئيسي يمكن
_هاا وشلون هسه نبقى منا لتجي
_نامي بويه انتي ليش كعدتي
_لا بابا كعدت قبل نص ساعه صليت وطلعت ردت اكل عود وطفت الكهرباء
_يله من تجي الكهرباء انشاءلله تاكليلج لكمه وتنامين
_انشاءلله..
سكتت وماحجيت لبابا عن مرتضى لان ادري راح تصير مشاكل الهه اول مالهه تالي وعمي يطلع بالخجله من سوالف ابنه عاد تغافلت وكلت يولي ماريد اسوي مشكله بنص الليل ماجنت اظن
سكوتي هذا انطاه انطباع وفكره غلط عني .. بقينه كاعدين لل١ بعد طفيت وحتى الجوعه راحت كمنه
رجعنه كلمن لغرفته بعدما ايسنه من الكهرباء دخلنه انه وشموخ ودخل مرتضى ورانه بسرعه وقفل الباب التفتت وكتله بعصبيه..
_شكو جاي هنا ماتستحي
_اولا غرفه اختي مو شخص غريب ثانيا الكتلج عليه باجر يتنفذ والا صدكيني ماخليكم تتهنون بخطوبتكم هاي واسويهه ساعه سوده عليكم..
بقيت اباوعله باستفزاز ومتخصره اجت شموخ وكفت بيناتنه وحجت وياه ..
_خير مرتضى شعندك داخل لغرفتي وتحجي هل شكل ويه جنان شصاير
_يكون احسن لو تفهمينهه ان محد يكدر ياخذهه غيري ويتهنه بيهه ويمته ماتخليت انه عنهه عود ساعتهه يكدر غيري ياخذهه..
حجه هيج لو طفرن شياطين كبالي بعدت شموخ ووكفت بوجهه ووجهتله اصبعي وكتله من بين سنوني..
_شوف تره انه مو سلعه ولا شي يخصك وبكيفك تتخله عني لو تاخذني فاهم واذا ماتبطل وتجوز عني صدكني اروح اشكيك لابوي وعمي واخليهم يتصرفون وياك لانك تجاوزت كل الحدود ومحد كادر يضب براغيك
_روحي اذا بيج خير روحي كليلهم لو تردين جان حجيتي من مساع بس انتن البنات تحبن اليركض وراجن وقصدا ماتنطنه عين بس ماعاشت التخليني اركض وراهه
_على كلامك هذا والله والله اذا ماتطلع منا يامرتضى اروح اكلهم وحتى افتري عليك
_انتي كدهه
_كدهه وشوف اذا ماتصدكني..
نترت بي مبعدته عن الباب وفتحته بعصبيه وفعلا ردت احجي لاهلي عنه لان زودهه وطلع روحي بس قبلما اطلع من الباب لزم ايدي وسحبني حيل
عليه حتى حسيتهه انملخت سفطني عل حايط ولزم رقبتي خانكني قرب وجهه من وجهي وشموخ
مستمره تبعد بي وتحجي وهوه ولا هامه جبل مايهزه ريح حسيت انكطع عني الهوى لو ما رخه ايده وصدمني وجمد نار كلبي لمن كال..
_تردين تشكيني عند اهلج مو شتكليلهم مثلا مرتضى حصرني بغرفته وهددني ..مرتضى مشعول جده من انخطب من غيره شافني .. مرتضى ماتت
الدنيا بعينه من رفضي .. مرتضى ضل ساكت بغصته وهوه يشوفني رايحه للغريب .. شتردين تكليلهم جنان تردين اروح احجي عنج تردينهم
يعرفون شكد احبج ورايدج وشكد روحي متعلعله كل هل سنين وتشتاقلج تردين اروح انه احجيلهم معاناتي بالغربه ومحاربتي لمشاعري اتجاهج حتى
لا اعلقج بيه وادمر حياتج تردين احجيلهم عن كلبي شيصير بحاله لمن ينذكر اسمج تردين
احجيلهم كل ليله لمن انام شلون اتخيل رسمج كبالي واتمناج تكونين يمي واتسامر بجمالج
_مرتضى اطلع بره ماريد اشوفك لا تحجي شي بعد لا تمرمر كلبي وتحطمه فوك ما هوه متحطم كافي تعبت منك ومن كلشي يخصك كرهت حتى روحي التحس انهه تنتمي الك
_احبج جنان حبيتج من الصغر ولهسه ماكدرت مره تملي عيني غيرج ياما حاولت اتجاهل مشاعري واشوف واحب غيرج بس انتي الوحيده الجنت
بكل مره ارجع بيهه من النسوان تتربعين براسي انه دخلت بدرب الحرام حتى انساج واجذب كلبي الحبج
_لعبت نفسي كافي لا تحجي بعد اطلع بره ماريد اسمع شي فات الاوان عنه ماريد بعد ما تعبت
وتحطمت وتدمرت نفسيتي وضحكتي وبالف ياويلاه ياله قررت اتركك وهسه تحجي هل كلام هذا
_خلاص ماكدر اتراجع ولا تكدرين تسوين نفسج ماسمعتي اعترف اني غلطت لمن سكتت وتجاهلتج كل هل سنين بس جنت حاير وخايف ان احبج
وتتعذبين وياي خفت ماكون سعادتج وراح احطمج وبس ماجنت اعرف انج تحبيني ولا جنت
اعرف جنتي تنجرحين لمن اتجاهلج بس صدكيني تجاهلي الج مو كره او ملل وانما من حبي وخوفي عليج هيج سويت
_وحبيبتك الاجنبيه الردت تزوجهه معقوله ردتهه بس خدامه الك لو ردت تحرك كلبي بيهه
_حاولت انساج وابدي صفحه جديده حاولت اشوف احلى منج واحسن وحاولت احب غيرج واسويهه حلالي لان كطعت الامل بيج لمن سمعت
كلامج ويه سراج فوك السطح بيت عمي باقر وايقنت ان الحب يكون من طرفي وبس وانج تشوفيني كل هل عمر كأخ بالنسبه الج حالي من
حالهم بس كله هذا ومافاد وياي ماكدرت اتخذ وحده غيرج حلالي لان مختومه بعقلي من الصغر ان جنانه الي ولحلالي لهذا السبب انفصلت عنهه
وقررت اعرف البكلبج اتجاهي لمن ارجع للعراق بس جانت طريقتي غلط رغم اعرف اتصرف ويه
النسوان واخليهن يحجلي المضموم بكلبهن بس من توصل يمج اتخربط واتغابه واصير شخص تافه مايعرف يتصرف لو يحجي وخليتج تفهميني غلط
_ليش ما سالتني بوضوح ليش ماكتلي اذا حبيتك بيوم لو لا ليش بهذاك اليوم لمن اخذتني على كتر وسالتني عن القميص ماسالت اذا احبك لو اعتبرك
اخ انت تحجي على سراج بس ماكدرت تاخذ شجاعته وجرأته ماكدرت تواجه خوفك وعنادك وتسالني او تحاول تعترف او تبينلي حبك
_اي اعترف صرت جبان بهذاك الوقت وكلامج ويه سراج خلاني اتغابه رغم عيونج جانت تشرحلي حبهه بكل مره الا اني اتغافلت وكلت يجوز اتوهم ..
دخلت بدوامه حرب بيني وبين روحي مره اكول تحبيني ومره اكولن لا وعنادي منعني من ان اسالج وجه لوجه ...
بقيت ساكته ماعرف شكول رغم هذا الكلام التمنيت اسمعه طول عمري وكاعد يتخلخل لاذني هسه بس احس بضيقه صدر واحس فات الاوان
لان دخل طرف ثالث بيناتنه وهل شخص مثل الزجاج لو انكسر راح يجرحنه ثنينه ولو بقه رح يحجب عني املي الجان معلكني بمرتضى باوعت
لشموخ الواكفه على كتر وتشاهد الكاعد يصير وينكال ردتهه تساعدني ردتهه تطلعني من هل قوقعه الدخلت بيهه ردتهه تسحبني من عنده
وتطرده وتنصحني طلبت منهه وصرخت تجي تساعدني بس صوتي جان مكتوم صوتي محبوس بكلبي ماكدرت انطق بي ولا كدرت شموخ تسمعه
وتسحبني ولا كدر مرتضى يعوفني ويطلع .. نزلت راسي وهمست بكلبي على يقين ان ربي بس هوه اليسمعني وطلبت المساعده والعون منه جريت
نفس مخنوك ونزلت دمعتي حاره على خدي وانه اردد بكلبي "ياعون من لا عون له " لحدما كسر الهدوء والصمت مرتضى لمن رفع راسي ومسح
دموعي بيده حسيت اني فشلت حسيت ان كلبي بعده يريده حسيت شي بداخلي يدفعني اله لدرجه ان حيلي انهد ولزمت ايده سانده روحي عليه
تذكرت محمد لمن لزمني نفس هل لزمه وكلي ماتطيحين وانتي بيدي انعصر كلبي وحاوط روحي الظلام صار كبالي طريقين وهو طريق الجنه يلي
يتصدى بكلمات مرتضى وطريق النار اليتصدى منه حب محمد وامله بيه .. محتاره بين الطريقين وين اروح وين انطي وجهي منو اصدك ووين اخطي
خطوتي بجنه مرتضى الجارحه لحد البرود لو لنار محمد الدافيه لحد الحنين..ضعت والفززني ورجعني من ضياعي شموخ لمن حضنت وجهي بين
اديهه وضربتني رفعت راسي وباوعتلهه بذبول وهمه القلق مرسوم على ملامحهم .. بعدت ايدهه عن وجهي ببطئ ومشيت للجربايه محتاره تمددت
وغطيت راسي تمنيت اشرد تمنيت لو ارجع بالزمن ومارد على محمد واكله تعال اخطب تمنيت لو بقت الكهرباء مشعوله وكدرت ارجع لغرفتي وماحاجي
مرتضى هل كلام ومخليني اكمل خطاي بهذا الطريق تمنيت لو بهذاك العام ماخطر على بالي اتوظف واعوف انتظاري لمرتضى جان ماتعرف علي
محمد ولا حبني هل حب .. غمضت عيوني ورحت لعالم مهلك مظلم من بين دوامه الافكار والندم يلي تفتر بروحي احسه نمت وانه تاركه وراي كل
العلكتهم بيه وبمشكلتي .. وبعد هل ليله المظلمه انهد كل الحيل والقوه الجنت اجمع بيهه حتى اكمل ويه محمد انهار جسر القوه والاصرار اليؤدي لمحمد
اختلفت الادوار وصار مرتضى اليلاحكني ليل نهار ويذكرني بحبه ويقنعني ويتوسل اترك كلشي وراي واتمسك بي تبادلت الادوار بين بالي الجان مرتاح
ويه محمد وكلبي المحترك من مرتضى وعشت اسوء اسبوع مر بحياتي رغم راحه كلبي الا ان بالي مامرتاح مرتين زارني محمد ووصلت الكلمه لطرف
لساني واكله خلي نفسخ وتوكف بعيني كلماته وحبه الي واسكت حتى هوه حس علي ووقف كل التحضيرات الجان يسويهه لحفله الخطوبه متحجج
1 تعليق
بالشغل دوامي ماصرت اركز بي ..صرت مره اتذكر كلمات مرتضى وابتسم ويه روحي ومره اتذكر وجود محمد كبالي وعيونه المراقبتني وتذبل
ملامحي صرت حتى الكلمه الحلوه التطلع منه تصير ثكيله على مسامعي واحس بخيانتي اله واحس بتانيب الضمير رغم محمد هوه خطيبي وحلالي بس صرت امنعه من التقرب مني او يحضني ..واخر يومين قبل
موعد الخطوبه المفترض صار الخفت منه وماردته يصير .. انعزمنه بيت عمو شهم بمناسبه عيد ميلاد شموخ ورحنه كلياتنه سويه وصارت حفله تجنن
وماكو احلى منهه وطول فتره الحفله جان مرتضى يباوعلي بحب وانه روحي ذبلانه ماشفت يوم راحه بهل اسبوع واتحطم بكل مره تاخذني امي بيهه
للسوك تختارلي فستان للخطوبه وبكل مره اداوم واسمع غزل محمد وحبه الكثر وصار يبين للغريب وبكل مره اصفن واتذكر كلام مرتضى بهذيج الليله
يرفرف كلبي بطريقه مزعجه ومكروهه حسيت بمحمد رح اظلمه وياي وادمره لو استمريت بهل طريق صار تناقض بداخلي يهدم من حيلي حيل بكل يوم يمر .. بدت الحفله والناس التهت بالاغاني
والكيك ومحد يسمع لو يدير باله حتى لو شخص اختنك يمهم .. انسحبت من بين هل هوسه ودخلني
مرتضى لغرفته قفل الباب وتقدم علي بابتسامه حب على وجهه باوعتله بخوف وسالته وانه اتراجع بخطواتي..
_شتريد مرتضى ليش جبتني هنا و قفلت الباب
_اشتاقيتلج جنانه تعودت اشوفج تحومين حوالي بهل بيت وصار وحشه برجعتج لبيت اهلج
_خليني اطلع منا مرتضى لا تصيحني امي وماتلكاني..
عبرت من يمه ورحت لزمت قفل الباب ردت افتحه وماحس الا لزمني من خصري لفني عليه ودفن وجهه برقبتي تخبلت وصرت ادفع بي بخبال
واحارب وهوه ولا يمه ابتعد اخيرا وباوع بعيوني بذبول وتقرب بدون سابق انذار على شفايفي محاول يبوسني درت وجهي بصدمه عنه وهمس يم اذني..
_اريدهن جنان هادات حيلي هل شفايف
_مرتضى وخر عني لا تتجرأ مره ثانيه وتحاول تسويهه بعدني تره على ذمه محمد انه وحرام قربك هذا مني بكل الاحوال..
ضرب الحايط بقبضه ايده وباوعلي بعصبيه واردف من بين سنونه وعيونه ناطه شرار..
_شكم مره كتلج حاجي عمي يفسخ العقد منهم يعني يمته تتحركين وتخربين كلشي لمن يوصل يوم الخطوبه وتعلنون خطبتكم للعالم لو منتظره اهد بيته على راسه ياله تجوزين عنه
_عوفني افكر مرتضى تعبت انه بهذا الاسبوع وماعرف شسوي ماريد اضحك على روحي واستمر ويه محمد ولا اكدر اكله خلي
نفسخ العقد وينكسر كلبه بالنهايه انه يلي قبلت وانطيته امل ماكدر اروح اكسر هل امل منه وكأن ماصار شي
_جنان حبيبتي كل شخص اله نصيبه وانتي مو نصيب محمد واذا حجيتيله هسه يكون افضل من ان تحجيله بيوم الحفله لو وراهه ليش تخلين العالم
كلهه تعرف بيكم وتخسرينه عزايم وقاعات وتالي يكولون ضحكت على ابنه واخذت فلوسه كعدي
باجر وياه وكليله اريد افسخ العقد وماريد اظلمك وياي ودوري ضهرج وتعاي وهم كليله كلشي ماريد منك لا مهر ولا غايب ولا شي
_خليني افكر بطريقه احجيله بدون ماينقهر
2 تعليق
_ماكو شخص ماينقهر اول تالي ومهما جانت الطريقه التحجين بيهه وياه راح يضوج وينكسر كلبه بس بالنهايه الله يعوضه ويشوفله بت حلال تناسبه ..
صفنت بكلام مرتضى وحسيته منطقي وتاخيري هذا ماراح يسويلي شي غير ان يخلي محمد يتامل اكثر ويحضر ويكدر للحفله وتصير الكسره كسرتين
هزيت راسي لمرتضى بايجابيه موافقه على كلامه وهو ابتسم واخذ راسي دفن وجهي بصدره تضايقت لان حرام اتقبل هل تصرف من مرتضى
وانه بعدني على ذمه محمد .. دفعته عني شوي متضايقه وهو ابتعد رفعت راسي ارد احجي وياه وتقرب باسني خفيف على شفايفي ابتعدت فاتحه
عيوني وشهكت بصدمه ضربته راجدي لا اراديا طلع مني شد قبضه ايده وتقدم علي بس وكف بعصبيه وغمض عيونه بنفاذ صبر وضرب الحايط
دار ضهره عني وحجه بنتر وياي "طلعي بره .. مسحت شفايفي منقرفه من تصرفه هذا وطلعت بره رحت لغرفه شموخ قفلت الباب باوعت لروحي
بالمرايه الحمره رايحه من كثر مامسحت حلكي باوعت بعيوني وياا الله على كميه الضياع والخوف البداخلهن همست بصوت مخنوك ودموعي تنزل
بقهر وخوف "ياربي شسوي انت دليني يارب انت اخذ بيدي للطريق الصحيح لا تخليني أظلم واكسر كلب شخص من بيناتهم يارب ساعدني وخلصني
من حيرتي من جهه مرتضى الحبيته كل عمري ومن جهه محمد الحبني واحتواني بفتره قصيره بس وعيشني راحه البال والأمان الفقدتهه من جهه
5 تعليق
مرتضى شسوي هسه انه ليش هيج حياتي ليش كضيت نص عمري بقهر وحيره وتعب ليش هيج الحب سوه بيه فقدني ضحكتي ومرحي وطفولتي
وبرائتي وكرامتي اي ادري بكرامتي انسحلت لمن نسيت كلامه الجارح وتجاهله الي كل هل سنين بس لانه حجه وانطه اسباب هل تجاهل والكلام
اعترف اني انانيه وماعندي ثبات وسيطره على مشاعري اعترف اني مهما قويت نفسي وحاولت
الكه غيره ترجع كم كلمه من عنده تضعفني وتاخذني سحل لحضنه انت كلي يارب وين الصح ووين الغلط وشنو اليريده كلبي دخيلك ..
.
.
:- اخيرا كاعد اعيش واقطف ثمار تعبي كل هل سنين اخيرا صار عندي مكتب ولو صغيرون بس المهم استلمت شغلي كمتدربه وكلما اباوع لكتاب الجنائيات كبالي احس بفراشات بروحي و اليوم اول الي بالمكتب كاعده اكلب باللابتوب ويه بقيه الفريق وملل صار ساعتين كاعدين محد
اجه امرنه على شي لو اخذنه محاضره بس كلهه لحضات وكسر الصمت صوت طرق الباب دخل شرطي بيده فايلات وزعهن علينه وكال..
_هاي مواعيد دوامكم وجدول التدريب كل يوم تدخلون تدريب جديد وراح تبدون من باجر تدربون ع التعليم النظري عند المحقق ساهر وبقيه المحاضرات كلمن ومحقق خاص بيهه
الكل : حاضر سيدي ..
هز راسه وطلع فتحنه الفايلات والجدول عباره عن اوقات ومهمات واسماء المحققين اجت عيني على اسم راهب وشفت ترتيبه الثاني بالتدريب العسكري
يعني بعد ٣ ايام ياخذنه هوه لمده يومين تالي يستلمنه غيره تدريب يومين وهيج تمشي الادوار عليهم.. صفنت افكر بي لحد الان مامستوعبه اني
شفته صدفه وهوه رئيسي ومدربي بالشغل بعمري مافكرت الدنيا ممكن تجمعنه مره ثانيه وخاصه بعد يلي صار باخر مره شفته قبل سنوات .. اجه بعد
فتره الضابط واخذنه لقاعه الرياضه باشراف المحققين راهب وساهر حتى يقيسون طولنه
واوزانه.. وكفت عل ميزان اليقيس الطول والوزن بنفس الوقت بعدما الشباب قاسوا وضرب وزني ٦٥ وتفاجات من طولي الصاير ١٦٧ وهو قبل كم سنه
جان ١٦٠ رفعت راسي لراهب وهوه صافن عل جهاز تحمحم وكال للشرطي اليسجل يمه اسامينه واوزانه ..
_لازم تخص ٥ كيلوات من وزنهه خلال اقل من اسبوعين
_حاضر سيدي ..
باوعت لوزني وستحيت رغم وزني لايك علي بس بالنهايه شغلي يريد رشاقه وقوه لان الوزنه ثكيل مايكدر يركض لو يتدرب براحته المهم وكفنه واحد
وره الثاني اخذوا اوزانه واطوالنه وكل شخص شكد لازم يزيد وشكد لازم ينقص امرونه نصير كلنه البنات بنفس الوزن والزلم كذلك الهم وزن
واحد لازم يوصلوله ويثبتون عليه .. كملنه وواحد من الولد بحجه الشقه كال للمحققين يقيسون اطوالهم وكال راهب بعدما باوعله متصنع العصبيه..
_شتريد لك باطوالنه احنه مدربين لو متدربين
_اي سيدي صار عندي فضول اعرف شكد طولكم لان ماشاءالله احس روحي قوري يمكم
_ههه تطول لا تخاف اليدخل هنا يبدي النمو عنده من التدريب
_انشاءالله سيدي الله وايدك
_ههه..
ابتسم ابتسامه جانبيه جذابه ولا اراديا ابتسمت عليهه .. راح المحقق ساهر وكف وطك طوله ١٨٢ هزينه راسنه باعجاب تالي صعد راهب باوعت
للمقياس بفضول شديد واشوف طوله ضارب بال١٩٠ رفعت حاجبي بصدمه وبلعت ريجي بصعوبه صليت على محمد لا احسد الزلمه ..
بعدله شويه ومايطلع من الباب انه عود اطول وحده بالعائله اوصل لنازل من كتفه بس جسمه وعضلاته متناسق ويه طوله مو نشاز لايكله ..
انتبهت عليه يباوعلي وانه عيني عليه وعل ميزان تحمحمت بفشله ونزلت عيني عنه ضلوا يصوفرون الولد الموجودين على طوله واحنه ضحكنه شكلهم
كرشوا عليه.. رفعت راسي واجت عينه بعيني وهوه مبتسم بادلته ودرت عيني عنه لا ينتبه احد علينه ويفهمون غلط تالي ماعايزه مشاكل انه
بشغلي الجديد .. كمل التسجيل وطلعونه من وقت من الدائره لان اعتبروا اليوم للتسجيل والتعريف فقط وباجر يبدي الدوام الحقيقي وماصحتلي
فرصه احجي ويه راهب ولو انه على شنو اريد احجي وياه وشكو كلساع افكر بي اففف خل اولي
الم شغلاتي احسلي .. رجعنه للمكتب لمينه غراضنه اتصلت على بابا واجالي طلعتله سلمت عليه ركبت سياره وطار بيه للبيت مسافه الطريق وكال...
