رواية خيط وابرة الفصل الخامس والعشرون بقلم شمس العراقية
ـ كاعده عالجربايه وأيدي على خدي وأصبع السبابه عالراسي الابهام صاير على فكي مالت واحد طاكه العوز والفكر بس اني لا هاي ولا هاي لا عوز ولا فكر
طاكني أحساس الامومه وأحس بروحي حامل وعقلي يفكر ويخطط شسوي تالي إندفرت دفره بأحساسي
نور ـ دنجبي نور كل شهر تكولين حامل وماكو كعدي راحه هيه متأخره خمسة أيام وشنو هالاحساس اللي يخليني احسب يوم يوم
مرات الشهر ٣١ هم احسبه واطفر يوم مالت الشهر احساس حقير اني ما صارلي غير كم شهر من تزوجت
ليش هيج ديصير ويايه
دخل اكوم اسوي عشا قبل لا تجي خالتي گمت دخلت المطبخ اخذتلي فره زينه ونظيف مابي شيء خل اطلع احسن احس روحي مالي خلك
بلشت كلاواتي ارجع احسن رجعت للمطبخ فتحت الثلاجه زين اكو فنكر واكو صدر دجاج شسوي اممم احسن شي اسوي همبركر فتحت الكاونتر اكو بِقْسَم زين زين
طلعت الصدر قطعته وخليت بصل وفصين ثوم وفلفل اسود وملح شوي خليت محضره الطعام ثرمته كملته خليت بِقْسَم عجنته وسويته بالقالب
همزين ضبط وياي وخليته عالكاونتر من تصير بالسبعه ابلش أگلي حتى اكمل من وكت واسبح من الريحه
سمعت طگة الباب ودخل غافر وينزع بحذائه اني اتأمله .
غافر ـ شلونج
نور ـ اها الله يساعدك
ـ هههههه حفظتيها يساعد بختج عيني اي شلونج اليوم تفترين
ـ اليوم سويتلكم عشا مرتب
ـ ههههه زين زين
ـ باسني بخدي ورفع شعري
ـ تعاي تعاي اني أشتاك مابيه
ـ غافر خاله تجي شويه نوب
ـ معليه بخاله اني احب واشتاك وأنتِ تسوين اغراء
ـ خليت ايديه على كتفه سويتله ابتسامه الارنب
ـ لچ كل دقيقه تجين أبالي
ـ أها عبالي كل ثانيه مسوي فضل
ـ لج تنكرطين خرررب شون اكلج هسه
ـ لا بعدين غير تاكل الهمبركر وتمدحني مدح ذهاباً واياباً كدام خاله
ـ أنتِ متعقده من أمي شسالفه يمعوده والله هي تحبج
ـ امم واضح والله
ـ ههههههه ضلت بنفسها نورس ونوب نورس أخذت نافع ضلت تگرظ بگلبها
ـ وأنت مكيف على جروحي كال نورس كال اسكت احسن اسكت لتقهرني غافر
.. صار يدغدغني لحد ما إستلسمت مرت ساعتين وخاله ماكو خابرها كالتله تبقى يم بيت خالو مشعان
كمت كملت العشا وصحتله غافر حبيبي ابو جهالي
ـ والله أنتِ من تكولين ابو جهالي أخرط العافيه
ـ ههههه ليش عيني
ـ تحسسيني عندي عر جهال وأنتِ منا ماكله گلبچ سالفة جهال يمعوده ما صار ثلاث أشهر من تزوجنه وأنتِ من أول الشهر تنگين دصبري ياعيني
ـ أريد اسوي تحليل معليه
ـ نور فدوه لطولج اني حالياً ما أريد والله ليش تضخمين الموضوع
ـ كافي سد الموضوع ما أريد كلبت خلقتي وصبيتله العشه وتعشينا ولملمت المطبخ وكعدت عالتخم هو يتابع طوبه مدري شعاجبه بمنتخب البرازيل واجت خالتي ساعه عشره
صبيحه ـ ها شلونكم تعشيتوا لا
غافر ـ هلا يمه عيني شو تأخرتي أي تعشينا يمه نور اليوم مسويه بركر شكد طيب تاكلين اصابعج وراه
ـ عوزي وعوازي اكل أصابعي عشتوو شمسويه المندي قابل هو بركر
نور ـ ضليت مصغره عيوني عليها وهي تنزع جواريبها
غافر ـ يلا نور كومي بدلي عالسريع
صبيحه ـ ليش وين تردون عيني هو ضل وكت
غافر ـ اسويلها تحليل يمكن حامل
صبيحه ـ اوو شبعنا من جذبها كل شهر هيج تالي فاره ماكو بطنها وام نفس الدنيه تضل بس تشهى تالي كلشي ماكو وأمشي طب جوه اكعد ارتاح تاخذك بس تفرفرك وصرف عالماشي خما يهودي انت مو تتعب بفليساتك .
نور ـ تحجي وأني ساكته حرف ما نطقت وهو هم ساكت مجاريها شنحجي مره جبيره .. گمت اخذت تلفوني ودخلت للغرفه وهو طلع شويه ورجع.. تمددت بفراشي ولا نطقت بس هيج الدخان من خشمي تكول تنين وتحترك الغرفه الا شويه
أجه نام بصفي وسحبني على ايده منطق حرف
غافر ـ نور أنتِ مرض وأنتِ دوه
نور ـ انت خبيث تعرف شون تراضيني وحضني بكل قوته
ـ ههههه يكولون هرمون الأكسيتوسين يصعد من أحضنج وتنسين الزعل متشوفيني كل شويه حاضنج حتى تروح الطناكير ونعيش بسعاده
ـ نغمرت بسعاده روحيه أتمنى لو تضل طول عمري عايشتتها ..
وتمر الايام وزاد قلقلي مر ١٢ يوم والشهريه ماكو
هو سألني وجاوبته ماكو شهريه بس لا تحجي يمكن تنزل
غافر ـ زين تعاي نسوي تحليل والله ما أكول لأحد
ـ أبد حلم ابليس بالجنه يحبيبي
ـ نور لا تدوخيني الله عليج
ـ ضليت اني وياه عناد واني رأسي يابس شحطني شحط واني فاحطه من الضحك حط العبايه على رأسي وشايل الشال بيده
غافر ـ هو أنتِ حجابج نص ردان دمشي
نور ـ طلعنا وأساساً خالتي مو بالبيت.. خليت الشال على رأسي جانت ساعه بالتسعه بليل مرينا من يم بيت اهلي أمي ولينا كاعدات باب البيت وحاطات جيس حب وجيرانه ام علي وام تقوى كاعدات على منادر الأجواء حلوه نسمات الهوا تلعب بحجابي وشعري
سلمنا عليهن وشفنا من بعيد نورس ونافع يتمشون ومبين على ملامحها الطنكوره دكينا هورن هو فز وهي انرعصت
نافع ـ خرررب بروحك غافر ليش هيج
غافر ـ شبيك صاير بزر نستله ما تتحمل
نور ـ ضحكت عالموقف وعفنا ورانا يسب ويلعن وطبگ السياره بصف المجمع ودخلنا للمختبر اني اضحك وهو يسحب بيه .
غافر ـ نور كافي يلا
نور ـ شبيك مستعجل هو ماكو حمل
غافر ـ بومه أنتِ بومه
ـ كعدني عالكرسي والبنيه سحبتلي دم وسجلنا الاسم وطلعنا اخذني لكافتريا نزل أيس كريم ككو واني ردت بطيخ وللاسف ماكو بطيخ عدل بدل قفلت عالبطيخ اجت ريحته بخشمي طلعنا لغير مكان ندور بغير أمكان لحد ملكينا كوفي خاص ودخلنا المكان فخم وراقي
طلعنا من بعد ما شربت واكلت كلشي يخص البطيخ
غافر من هسه اكلك أنت تدخل الجنه لا حساب ولا كتاب
غافر ـ افااا هاي كلها لن شبعت كرشج حبيبي هذا واجبي
ـ فدوه لعمرك هسه خالتي ترجع ويضل بالها
ـ ديلا زقوچ دصعدي عيني
ـ وأنت هم أشتريلك سياره ناصيه هاي البرادو عاليه شيصعدني بيها
ـ مو جنت تصعدين بسياره نافع أشو ما تحجين على سيارته
ـ هههههه اضحك من گلبي كتله مو ما متعلمه على سيارتك
ـ دصعدي يابه ما ضل وكت
ـ صعدنه بالسياره وصلنا الفرع وميثم وهشام باب بيت أبويه لازمه من كتفه ويحجي وياه!
غافر ـ مو عبالك ناسين شيء
نور ـ والله يمكن بس شُـــنو شنسينا؟! خرب التحليــل
ـ خـــرب بمصنمج لج أنتِ اليجي وياج ينسى روحه
ـ درجع قبل لا يعزل المجمع
ـ هذا صماخج شمحطوط بي
ـ حلاوه فدوه لصماخي تروح أنت وعشيرتك
ـ هههههه تنگط ثقه بت الاوادم بيعي لهل الاوادم ثقه
ـ غاليه ثقتي بنفسي ما تنباع حبيبي.. وصلنا المجمع لكيناه المختبر هستوه يريد يعزل هو يسحل بيه يرتب بعباتي وشالي عبالك مجديه بس والله لايكتلي اجنن طالعه
ـ فستق حلبي فدوه لطولج .
ـ أخذ التحليل قبلي ها حبيبي شكو شبي التحليل
ـ ماكو حمل لا تنقهرين حبيبي
ـ شلون ماكو ونساتي وكرهت الحلاه اني من تتاخر اصبر أموت عالحلاه وهلمره كرهتها وريحه البطيخ والدوخه هذني كلهن جذب خــرب بحظچ نور
واني ليش اتأمل ليش صار كل تفكيري بالحمل
ـ شصار قابل واذا تأخرت مو كتلج لا تنقهرين وتحسبين غيـــر أنتِ حامــــل
ـ أحلــــف بالعباس ابو فاضل
ـ بالعباس ابو فاضل أنتِ حامل هاي التحليل positive
ـ يعني اني هسه حامل بطني جنين الحمدالله ياربي
نور ـ مبروك عيني ام جهالي
ـ ضحكت مبروك ابو الجهال
ـ الله يتمم الچ على خير يارب وتكومين بالسلامه .
ـ الله يسلمك حبيبي .. وطلعنا للبيت والطريق كان قصير لكن أحلامي شكبرها شكد فكرت شكد تعبت مرت عليّ فترات أتمنيت الموت وره وفاه والدي
فقدت حب الطفوله بيوم من الايام جنت اتوقع گلبي مات
بس گلبي ما مات لا گلبي خضر بحب وحنيه وأحترام رجع ينبض من جديد نسيت كلشي ما اتناسيت لا بل نسيت معنى الكلمه ودعيت الله يوفقني بحياتي ويتتملي على خير وحنيته حبه اللي كل ما يطلع من البيت يحضني يبوسني يسألني شمحتاجه شتريدين عاجبني أجيبلج حاجه ..
الطريق كان طويل بافكاري لكن قصير بعجلات السياره
مر للماركت أشترى جكليت كتله خل افرح أمي
غافر ـ خاف نايمه باجر روحيلهم أنتِ وأمي
نور ـ تمام ومشينا وشفنا نافع كاعد بالباب بيتهم عالكرسي وناجح يصلح بسيارته دكله هورن
نافع ـ هلا هلا استريحوا يابه
غافر ـ يسلملي الحبيب هاي جكليت حلاوه
نافع ـ خير شنو أترقيت واني ما أدري
ـ هههه لا يابه بس اكو شغله صارت وفرحت كلت أفرحك وياي
ـ بالخير عليك عيني شما كانت شغتك ولو لفيتها بالي طلعت بمكانها شتسمونه اذا ولد واذا بنيه شتسمونها
غافر ـ هههههه لك انت شنو الله كريم خل يجي بالسلامه ويوم اللي تفرح أنت هم .
ناجح ـ عليمن يابه هالتلميحات دكولوا راح تصير اب وفضو السالفه على أساس مستحين انت وياها هو اليزوج شكو يستحي يخلف
نور ـ قصفنا قصفه بمكانها غافر خلانه موقف يسحد عليه ما طول بالكلام باركوا اله وصعد ونافع اكتفى بكلمه خفيفه من شفايفه ونظره دافيه
نافع ـ مبروك
نور ـ وصلنا البيت ولگينا خالتي كاعده عالتخم وتكرز حب
غافر ـ الله يساعدج حجيه
صبيحه ـ هلا يمه شو ماكو رجعت من زمان وانتوا ماكو كلت اكعد اشويه هلبت يجون تاخرتوا فرد نوب
غافر ـ يمه نور حامل
صبيحه ـ يا يمه بالمبارك شو تعاي دحبج
نور ـ رحت عليها باستني وباركتلي انطتني ٥٠ الف
ـ هاي مباركه مباركه دللي نفسج بيها تاخذها غافر باجر شتريد تاخذلها اكل ما تخلي بنفسها حاجه أبداً وما اوصيك بعد عليها .
ـ گام باس رأسها ودخلنا للغرفه نزعت الشال والعبايه حضنته من ظهره غافر كل يوم أحمد الله انت بحياتي
دارني عليه لازم وجهي بين كفوف ايديه باس رأسي وكصتي .
غافر ـ أنتِ نعمه والنعمه عظيمه تنباس وتنحط عالرأس نور أنتِ كل حياتي ..
نور ـ وغمرني بحضنه وحبه... ومرت الأيام وفرحانه بروحي وخاله الفتره زينه وياي صح مرات تحچي وتعيب على شغلي وتتنقد بس ميخالف أتحملها دام غافر زين وياي وهي هم خالتي بمقام أمي والله يحنن گلبها .
كاعده أطبخ الغده وخالتي يمي تساعدني وفتحنا موضوع الدارسه وجابت طاري لينا
صبيحه ـ الله يجزيها الخير أمج على وگفتها ويه هاليتيمه ما مقصره وياها ولازمتها دروس خصوصي بلكي الله يعوضها وتشد حيلها وتجيب طبيه .
نور ـ أي والله كل همهه لينا ومتفائلين بيها وهي هم شاطره ما شاء الله.. الله يسهلها ويسهل لي .
ـ يسهل الچ؟ ليكون تردين تقدمين
ـ أي خاله أقدم وأكمل أن شاء الله
ـ ماكو دراسه وأنتِ حامل وهذا الموضوع ينسد
ـ بس خاله أني أريد أكمل دراستي وغافر موافق
ـ چا على گيفج وگيف غافر وبعدين صرتي حامل ما يفكر بإبنه وراج رجال وبيت ويريدون منچ
ـ عادي أنظم وقتي خوما كل الوقت أدرس يا خاله
ـ والله التريد تتدرس ما تتزوج تكابل كتابها وتدرس مو عكب ما تزوجت هكذا الوكت تندرت لا داده ماكو هالشيء .
ـ بس هذا مستقبلي
ـ مستقبلج تكملينه بيت أبوج مو بيتي.. دام تفكرين بمستقبلج شگو فكرتي بغافر ووافقتي .. فوك ما تعرفين شيء ورضيت وسگتت أدور دراسه لا كملت على رأسي .
ـ خاله ما بيها شيء الواحد ما يعرف ويتعلم وأني والله جاي أتعلم وهلكدامج ما مقصره وأذا عندي قصور گوليلي وعلميني أنتِ خالتي وأذا على الدراسه كلهن اليتزوجن يدرسن وأكيد أكو ظروف تعكس ويانا قابل بيدنا ياخاله يا حبيبتي .
ـ شأعلم منچ ما تتعلمين تجرين يوم يومين فرة عروس وعگبها تدخلين غرفتج تطبگين بابج وتنامين بس فالحه بالنوم .. والدراسه عندي ماكو والله عندج ظروف غافر ما جرج من شعرج وجابج والف وحده تتمناه وتتمنى مكانج وأمهات بيوت چا مثل حظي جاهل كلشي ما تدبرين تضحكين علينا بهل الأكلات تعلوم جهال مو مره محزمه وتكظ الطباخ تخلي ريحة الطبخ مهفهفه بالبيت
ـ تحجي وأني دمعتي تجري على خدي ما جاوبتها
ـ يله گملي غداج گبل لايرد رجلج ما يلكه شيء يأكله عبالي أزوجه أرتاح وأريحه تالي نشلع گلوبنه أثنينا من البيت ما أكدر أطلع منه أخاف لا يطگ عليج الطباخ لان بعدج جاهل وگلشي ما تدبرين .
وحجيت وگلت لأختي ما أريدج ولا جني حجيت دبگتن على أبني دبگتن .
ـ گامت لغرفتها وهاي هي هيج دائماً تحجي هالحجي نفس كل مره حافظتهن حفظ وأني هم حفظتهن وساكته ولا مره جاوبتها أكول ميخالف أبنها وحيدها مالها بالدنيا غيره وهو كذلك أعذرها لازم يجي يوم وتحبني وتتقبلني... الله كريم نور أتحملي ميخالف
وأصبر بنفسي .. وگملت الغده طبخت اللحم وخليت عليه قطع مكعبات بتيته وصارت مرگه ثخينه وطيبه وسويت وياها تمن وسلطه وخضروات هاي يوميه
هيج أطبخ والله ومن الصبح أكعد علمود الحك طبخه
.. سمعت طبة الباب مديت رأسي غافر يفتح الباب يريد يدخل السياره الكراچ وطلعت عمتي بثواب الصلاة تدردم
صبيحه ـ جان تحرگتي فتحتيله الباب حتى هاي ما تدبرينها تلگي أخذي من أيده بس فاگه حلگج لسوالفه
نور ـ تنفست بقلة صبر وطلعت وراها ونزل المسواك جان مزعوج من الحر ..أخذ كم علاكه ودخل البيت ودنگت أشيل المسواك وصاحت بيه خالتي
صبيحه ـ دلحگي رجلج حضريله الحمام ملابسه كلاص ماي بارد هسه تندرتي على المسواك أمشي وراه مشتعل أهل أهله من الحر .
نور ـ شلت كم علاگه ورحت وراه لكيته نايم عالظهره عالسبلت ويفرك بكصته .. الله يساعدك
غافر ـ ويساعدج
ـ أحضرلك ملابسك تسبح مو
ـ أي هسه بس أرتاح حساسيه شبت بجسمي من الحر
ـ ماشي رحت الحمام أخذتله ملابسه وشفتها جابت كلاص الماي ودخلت الغرفه وأسمعها تحجي وياه
ـ هاك يمه برد أفادك .
ـ شربت يمه من البراد أجيت والله ما عطشان
نور ـ عفتهم ودخلت عزلت المسواك وحضرت الغده وهو طلع من الحمام
غافر ـ نور لا تصبين الغده هسه بس لما أريح جسمي
صبيحه ـ هي صبته بعد بس تريد تكظي هالغده وتشوفك طبخها .
غافر ـ ها اليوم هي طابخه وأني أكول الريحة شگت خشمي من طبيت يله دام هيج أتغده .
نور ـ كعدنا نتغده وهو يأكل ويباوعلي يريد يعرف شبيه وأني دمعتي بطارف عيني مهضومه منها .. گمت وصاح وراي
غافر ـ نور وين بابا؟
ـ شبعت الحمدلله
ـ وين شبعتي .. ما أكلتي
صبيحه ـ وين گايمه رجعي كملي ماعونج چا نسيتي بطنج روح تريد منج تغديه وراحه .
نور ـ أبتسمت بوجهه ورجعت كعدت وهو يفلس للحمه اليه أكلتها ومندگه رأسي لما گملت وگمت خليت الجاي عالنار ورحت غسلت وسمعته يحجي وياها
غافر ـ شبيها
صبيحه ـ شبيها قابل بس حامل وتعبانه وتدلل عليك
نور ـ أخذت نفس وگلت هو ماله ذنب أكلب خلقتي بوجهه .. دخلت وأبتسمت حبيبي أصبلك عصير
غافر ـ أي صبي
نور ـ أخذه من أيدي وشربه وكرصني من خدي وراح يغسل
صبيحه ـ شگو بومتي بوجهه والرجال يرجع تعبان يلكي وجه مرته يضحك مو كالبه خلقتها والله على هالحجي يومين ويلحك ربعه لو يجيبلج وحده وتهجم عيشتج .
نور ـ لا أسم الله
ـ أسم الله چا دري نعمتج وديري بالج عليه لاتجي وحده وتلفه منج وتخليج بصخام وجهج .
ـ خوفتني بكلامها وأجه هو وسگتت وكف هو صب الجاي هو بالعاده قليل يصخرني لان وحيد امه فه متعلم على هاي شغلات مرات يصب أكل لنفسه الچاي عادي بس يم خاله مو عادي شافته صب الجاي ومشى الغرفه لو گلبت الدنيا على رأسي .
ـ جم دوب أضل أعلم بيج وما تتعلمين! ولج يمه مالات رجلج أحفظيهن شنو يريد شنو يطلب مو تخلينه هو يكظي اليريده وما يصخرج .
ـ أي خاله هسه بس أغسل المواعين
ـ أي هسه تندرت دگملي مو تضلين ساعه بيهن هنا ماعونين .. چا لو عندج حموات حمويين شتگولين هالوحيد وما خادمته وكاظيه شغلته .
ـ گوه لزمت نفسي وأخذت نفس يارب منك الصبر لما راحت غسلت ونظفت وباوعت على غافر بعده كاعد يباوع التلفزيون يتابع أخر أخبار المباريات ..
ها حبيبي محتاج شيء
غافر ـ لا روحي نامي وأرتاحي
ـ تمام .. رحت الغرفه وناويه أحجي وياه لان خايفه من خالتي تكون قانعته بموضوع الدراسه ويوافقها وما يخليني أكمل دراستي .. شويه وأجه حبيبي
ـ ها عيني
ـ أريد أحجي وياك بموضوع
ـ وهو
ـ دام شغلت جگارتك وجهك ملامحه ما تبشر ما أحجي
ـ شعليج بجگارتي أحجي شعندج
ـ أنت شعندك عوفك مني
ـ ما عندي شيء بس متعارك ويه صاحبي وغثني مو يمج السالفه والله
ـ ها تمام.. عوفني بعدين أحجيلك
ـ موضوع الدارسه شاغل تفكيرج مو
ـ شمدريك خاله حجتلك
ـ لا ما حجتلي بس أدري شاغل بالج هالموضوع
ـ أي والله .. وتخليني أكمل مو
ـ أي أخليج مو أنطيتج كلمه تكملين هذا هو .
ـ فدوه لعمرك .
ـ دتعالي يمي ليش بعيده عني تعالي لحضنچ .
ـ نمت بحضنه وأني مستبشره بي خير وأعرفه ما يخلف كلمته حتى لو خاله عارضت ومنا لوكت التقديم الله كريم ..
الثاني يوم العصريات متحضره أريد أروح للبيت أهلي وهو كاعد يم خاله يشرب چاي .. لبست وأخذت كم شغله أخذتهن لينا تفرح بيهن وشلت جنطتي وطلعت
صبيحه ـ وين يمه شو ما گلتوا نطلع
غافر ـ لا حجيه ما نطلع بس أوديها لبيت أهلها
ـ ها تباتين
ـ لا ورا العشه أجيبها تجين ويانا
ـ لا يمه روحوا أنتوا .. أنه الصبح جنت يم خالتك بس يمكن أروح على بيت خالك مشعان .
ـ ماشي حجيه على راحتج.. يله نور .
نور ـ وصلني يم الباب ها حبيبي ما تنزل
غافر ـ لا گلبي صاحبي ينتظرني نروح للكوفي من أطلع أجي أخذج .
نور ـ مر تعشى يمنا أسويلك
ـ أشوف شلون ترهم وأخابرج حبيبي .
ـ تمام حبيبي .. نزلت وشفت سيارات أثنين بحوشنه وحده سيارة عمي محمود والثانيه حكوميه ركزت عليها زين هاي لهشام!يمكن ووصلت وشفت باب الأستقبال مفتوح وأنصدمت بوجود عمي قادر وأبنه هشام يمنا
خير أن شـــاء الله ...
_______________
لينا ـ الشر شگد تبتعد عنه يبقى ملاحقك وأني لان من البدايه أنطيت مجال لصفا وسگتت وتغاضيت عن كل سوالفها وبالأخير!! ..
طول فترة الأمتحانات بالي وتركيزي على أمتحاني بس مع ذلك عيوني تراقبها وأشوفها أول وحده تخلص وتطلع لوحدها ومرات يوصل أبو الخط وهو ماكو وأني أغطي وأنطي أعذار بعدها بالأمتحان وتجي نفسها عالي وشكلها يوحي بسوالف ومصايب ما تنحجي بلعت الموس وسگتت عنها وخلصت الأمتحانات حتى ما أسألها وين جانت!
ما جنت متوقعه ولا مخليه على بالي هشام حتى شوش أفكاري بفترة الأمتحانات بس غلست عليه لان كلام خالتي هو الطمني لا أساساً شايله فكرة الزواج من رأسي .. كل الأريده أكمل دراستي وأحقق حلمي وحلم أمي وأيضاً صار حلم خالتي داعمتني ولزمت اليه دروس خصوصي وبلشت الحمدلله وأموري ماشيه تمام وميثم يوديني ويرجعني صح عمي يحجي ويدردم بس خالتي واكفتله عظم سمج برزدمه ما تنطي مجال واني هم مغلسه عليه لان ما أريد أتعارك ويسويله سالفه ويبطلني ويروح كل تعبي .
الى أن بيوم راسلتني لبنى وحجتلي عن صفا وضليت مصدومه صدمة عمري وبداخلي حجيت عزه العزاج صفا وصلت بيج المواصيل من بيت أهلچ!
لبنى ـ مو أحاجيج وين وليتي
لينا ـ وياج وياج .. أي وشگلتي الها
ـ شــگول الها ولچ الوقت جان متأخر! بس سألتها شمطلعچ بهل الليل
ـ وشُـــنوْ جاوبتچ
ـ گالت على أساس كاعده بالحديقة وفاتحه بث ويه صديقاتها لان أخوانها ما يقبلون بس المشكله هي جانت لابسه عبايه فوك ملابسها وشال على رأسها وجنطة والموبايل بيدها! وأني متأكدة كلش زيــن
الباب الخارجي أنفتح والله سمعته زين .
ـ غمضت عيوني وضربت على كصتي بكل قوتي
ـ أي من مشت حلفتني ما أجيب طاري لاحد على سالفة البث ما أدري بس لينا أبتعدي عنها ولاتختلطين بيها نهائي وأني من زمان أمنعج منها بس ما أتوبين
ـ لا ما عندي علاقه بيها وأصلا من الأمتحانات ما شايفتها ولا جايتكم بس يصيرلي مجال وأجي عليها وأفهم منها شنو سالفتها .
ـ لا لينا عوفيها ختولي مالنا شغل بيها ولا عليج ديري بالج تحجين وياها .. ولاتجين لهنا أني أجيكم
ـ الله كريم
ـ لينا ما أوصيج فدوه خليني بالج وعينج بكتابج واني صوجي حجيتلج تندمت والله لان أعرفج تضلين ورا السالفه شأيصبرج ويجوز صدك فاتحه بث ما نريد نسوء الظن بيها .
ـ لا لا شعليه
ـ ديله روحي بعدين نحجي
ـ تمام عيني .. راحت وصفنت على لبنى شگد على نياتها وما تدري بسوالفها والعابيها ضحكت على عقلها بحجة بث! بس ما تضحكين على عقلي يا صفا وخوش بث بنص الليل يا ساقطه بس يصير خير ..
"لازم أروحلها وأخصم الموضوع وياها وأخلي أهلها على بينة وأولهم نافع لازم يدري بأخته خل يتلاحك الها ولسمعتهم ولو تأخرت بس ما جان بيدي حل غير أنه أسكت بس هسه مو مال سگوت بعد لازم أحجي لنافع لازم بس بالأول أشوفها وأحجي وياها
نفس الوقت خايفه على نفسي منها وخايفه على سمعة أهلها والله ناس أوادم والهم أسمهم بين الناس والحكومه والمجتمع من عمو مشعان مهندس وخطاط معروف واله أسمه ووزنه بس تذكر أسمه كلها تكولك هذا ابو حربي والنعم منه لو أولأده كلها وظايف ومعروفين بس أخ من صفا وأغلاطها وين ممكن تأخذهم ..
أصفن بيني وبين نفسي شلون الوحده تگدر تخون ثقة أهلها وهما تعبانين عليها ودرسوها وصلوها ومدللينها وما مقصرين بشيء وياها .. شلون يهون عليها تخون شيبات أبوها وتنزل رأسه بالحضيض ما تنقهر عليه ..
" ما ينكسر گلبها على جدها حبيب شيخ ورجال طيب حلال طلايب والناس تعرفه ..
أنقهر وگلبي يوجعني عليهم من أشوفهم ميتين بالفلاحه وتعب الزراعه وزراعتهم ضخمه يسلمون المحاصيل لدوله بس علمود يأمنون حياة حلوه
لـ أحفادهم .. لو تعب أخوانها بدواماتهم وقلة النوم والسهر ومحرومين من نومة الصبح ..
لو أمها وأخواتها من يروحن القريه يشتغلن ويتعبن ما فكرت بسمعتهن ، زين ما فكرت بنفسها!! وشــنو الدافع اليخلي البنت تغلط أغلاط ثمنها غالي وهو الشرف وسمعة أهلها ..
رجعت من المحاضره وأدرس وبالي يم مصخمة الوجه أخذت كل تفكيري وناوية اليوم أروحلها وأفهم منها وأخصم الحچي وياها ..ولكيت عمي متعارك هو وخالتي من شافني خزرني بعيونه دگول عيون ثور أعور أعوذ بالله .
محمود ـ وين جنتي خاتون وين أكو درس هلگد يطول
لينا ـ عمي غير الأستأذ تأخر بشرح المحاضره خوما بكيفي أجي قابل رايحه ألعب غير أدرس يا عمي
محمود ـ والله شما أشوف رايحه تلعبين وتاليتي العب بخلقتج .. أمشي أنكبري من وجهي لا بارك الله بهل الخلقه الزفره .
لينا ـ عبرته وأنطاني مگفاه وخله أيده ورا ظهره وكف يم الباب وغميته وسويتله حركة كرون الثور! وخالتي تدفع بيه وكل ظني ما شافني طلع يباوعلي بالجامه مال الشباك وما أحس غير أندار عليه وضربني بأيده دگول مو أيد طفالي شمعة شبابي .
محمود ـ بنت الگلب عبالج ما أشوفج لج أدبسزز مسربته أني الج اليوم أذا ما طيحت حظج وربيتج انه مو أبن ياسين والله أكود على عرضي اذا ما صگطچ .
لينا ـ من الضربه حسيت رأسي أفتر والدنيا صارت ظلمه بس صياح خالتي وتواسيلها وجرتني منه وسحبتني وحسيت ماي بارد وماي قطرات خفيفه فتحت عيوني أني بالحمام جوه الدوش .
سمعيه ـ هيج أحسن الج لو كاظه رويحتج وعايفته هو وخبالاته .. چا هيج تسودن وضربچ .. من خرب بحظج وحظي من لفيلتي واحد طايح حظه وأيده والضرب ولج يمه حاجيني من جعل أيدك بالشل يمحمود أهمداك حاط عقلك وياها .
لينا ـ أخذتني الغرفه وأسمعه يحجي ويهوبز لوحده أمداك يالعار وطاح حظ الوگت الخلاك تأخذ مكان أبوي وتصير علينا زلمه ابو النسوان العركچي الساقط ..
محمود ـ أذا ما زوجتج وذبيتج بحلك جلب أني كواد أصبريلي يا أدبسزز أني أعلمج والله الا أزوجها والله .
سميعه ـ زوج بناتك وما الك شغل بناتي عوف البنيه يمحمود لا والله أخذها وأشيل رأسي وأهج منك ومن طلايبك حاط گورك من گورها حتى أصغر من بناتك خاف ربك بيها يتيمه أم وأب .
ـ لاتخافين بناتي يتزوجن وأحس زواج لان مربيات وبنات بيوت مو مثلها الأدبسزز أحترام ما تحترم والا ازوجها غصباً عليج وعليها أذا ما كسرت رأسها ورأسج وياها جلبتيها عليه حتى أنتِ هم أزوجج وأخلص منج على شنو مبقيج على ذمتي شو گلشي ما محصل منج وجه الرجال أمده الحظي على هيج زواج .
ـ والله علواه الله وأيدك يوم عيد والبس ثوب أصفر بس تطلگني وأفتك منك ومن طلايبك وساعة الكشره صرت بيها على ذمتك .
ـ ها فرحتي بس لـو تموتين ما اطلگج أطلع جنازتج من هذا البيت وأنتِ على ذمتي أنه أعوفج وأعوف السليمه على راحتجن أصبريلي يسميعه تحاجيني معلك هو أنتِ بهذنيج صخمتي وجوهنا وخليتنا علج بحلوك الاوادم عاد أعوفج أنتِ وهاي دگول مصراع أني الجن والله أطلع كواد أذا ما ربيتجن .
لينا ـ حچه حچه وسگت وطفه من كيفه وأجتي يمي خالتي خاله عليج العباس لاتزوجيني ما أريد أتزوج
سميعه ـ چا بكيفه أشتغل عنده أنه خل يمشي شوره وكلمته على بناته عگبها يمشيها عليه بس أخ من هذيج الساعه التصخم بيها وجهي من جعب الجدر ووافقت على هالزيجه الگشره
وهسه عكب ما طاح الفأس بالرأس أنه أحجي يلطمني على حلگي لجن ما عندي لطمات ونواحات بس أصبري عليه وأنه خالتج بس أكظي السادس وجيبي معدل زين أخذج أنتِ وأخوج وأهج على ديرة هلي وهناك أوصلج وأدرسج وهو غصب على رأسه دگول جلمود حصو يطلگني ويفگني من طلايبه .
لينا ـ الله كريم خاله .. عافتني وضليت أفكر بكلامه هذا ما أرتاحله من يخلي شيء برأسه يسوي لان مر يومين سگوتي! وثاني يوم رجعت من المحاضره وشفت يم بابنه سيارات حكوميه وسيارات مال ناس طاگين ومن الطبقه البرجوازية!! شچاي يصير ... دخلت البيت وأسمع صوت زلم گبل دخلت المطبخ وشفت نبأ تعاي أحاجيج منو يمنا ..
نبأ ـ خطابة
لينا ـ المن الخطابه
ـ الچ من طرف ومعارف وأصدقاء أبويه
ـ وأبوج منيله هيج معارف وأصدقاء وناس طاگين والله اليعرف سوالف أبوج ولسانه الوسخ.. أثنين بالفرع ما يعرفونه أصلاً بصخل ما أسرحه صدك تحجين لو ناصبه عليه .
ـ لا والله صدك أحجي .. حتى نسوان جايات وياهم!
ـ تشاقيين
ـ لا والله فوتي وشوفي بعينج
ـ مديت رأسي وباوعلي وخالتي عضت شفايفها وضليت أباوعلهن هذن ما يوالمني عمي اني أذا أكابل واحجي فشك صدك جذب عمي شجابك على هيج ناس صدك لو كالوا العار تلكي بإحسن مجتمع .
عبرتهن ودخلت غرفتي وخالتي گالت الهن
سميعه ـ هاي مو العروسه هاي بنتي بعدها جاي تدرس
ـ وينها نريد نشوفها
ـ هسه تجي بس أكوم أشوفها
لينا ـ صفنت خرب بعقلج خاله بس لا تقدم الهن وحده من بناته ويسويها البخت ويي راح تعلك شيخلصنا من محمود .. غيرت ملابسي وطلعت واجتي سبأ ضيفتهن وهنا يصلن عالنبي انبهرن بيها خاله شجاي تسوين .. ترى أني العروس
سميعه ـ من كون لا عرستي ولا شميتي ريحة الرجال گومي أنكبري بغرفتج وأذا شفت طولج الا أحش رجليج أمشي ولي .
لينا ـ شبيج .. كرصتني قوي خرب... وگمت للمطبخ وگفت يم نبأ وصار الكلام وگاموا باوعت بصف نبأ وشفت هواي زلم كبار ونبأ أشرت عليه
نبأ ـ هذا أبو القاط العريس
لينا ـ حلو خوش ولد
ـ چا ما توافقين
ـ يمه .. لا عيني لا خليني هيج خل أختج تتزوج
ـ منو گلج هاي خالتي بكيفها تخطط وسبأ مكيفها عبالها الزواج طلعات وطبات ونسه هسه يرحون والي حجي ويه ابويه وأخصم الكلام وياه
ـ خفت منها هم طلعت تخوف! وطلعن النسوان فرحانات وسبأ مبتسمه هاي طلعت ما مصدگه تتزوجت ما تدري خالتي بدلتها وياي علمود تنقذني من خطط السليمه أبوها .
وراحوا وشويه وگبت العيطه وأني ما گلت باطل دخلت غرفتي وفلتت بريشاتي وأسمعه يگول
محمود ـ ما تريده مو ميخالف مو بعيني سميعه مو بعيني ... هشام موجود!
سميعه ـ شجاب هشام! محمود عوف البنيه بحالها ما تريد تتزوج وأذا تريد زوج بناتك وانت دكول الولد تعرفه والناس مبين عليهم أوادم انطيهم بنتك وهي دارسه ومكمله .. زوجها .
ـ لا ما أزوجها وبكيفي وبنتي وأني حر محد اله دخل بيها
ـ چا شگو تتدخل بلينا وهي مو بنتك ما الك سلطه عليها
ـ لا اليه سلطه عمها وكسار رأسها ورأسج أني أعلمجن
لينا ـ من غضب على يومك مصيبه مو عم مصيبه
وما گال باطل الحقير ثاني يوم العصر أجو جدي ياسين وعمي قادر وهشام وحجوا وأني بس صافنه على هالمهزله وخالتي تضرب على وجهه وتبچي مربطه أيديها وحايره وياي
سميعه ـ وين أولي وين أنطي وجهي وين أوديج وأضمج أخليج بقوطيه وأخلص وين .. المن أروح من غضب على يومك يمحمود وعلى أهلك تحجي يگولون أهلها هما الكلمتهم تمشي تسكت يأكلك القهر
.. تعال يصباح وشوف بناتك شعملو بيهن وضليت أنه كلشي ما بيده .. ربي من يمك حلها وتلطف بحال هاليتيمه وين تولي على مهديه صخام الصخمج يسميعه وهاي اليتيمه أمانه بركبتج .
لينا ـ أباوعلها كطعت نفسها ودخلت علينا نور وخالتي حجتلها .
نور ـ ولچ لينا خوما توافقين
لينا ـ لا يا موافقه شتحجين أنتِ .. الظاهر صبيحه ثاولتج خلتچ تخربطين بالحچي .
نور ـ عبالي .. لا ولج بس شلون وليش بهل السرعه شگو يمعودات صاير شيء شو أحجلي خل أفهم السالفه كلها ونلگي حل وعمي تخبل بكيفه يزوج ومنو لولد عمي قادر .
لينا ـ خالتي حجتلها وصفنت عليه وگالت
نور ـ أي گولي لخوالي كومي خابري خالو مشعان خل يتدخل
سميعه ـ دگيت عليه ما حصلته چا ما دگيت منو اليه غير خوالج يوكفولي
نور ـ عليمن تدگين أوكفي خل نتصل على نافع بس هو يگدرلهم ويسد السالفه كلها
سميعه ـ خاف يتعارك هو وخاله وما أريد أشب النار بينهم مهما يكون ابو مرته بعدين يصير ما يصير يذبنها برأسسي وبرأسج يگولن نخته هي وبنتها..
نور ـ ويگولن اليگولنه چا تتزوج من ولد عمي قادر هو صح هشام خوش ولد بس أهله طايح حظهم عرجهم نكس . ومستحيل هالزواج يتم مو على كيف عمي هاج نافع فتح خط أحجي وياه .
لينا ـ عفت خالتي تحجي ويه نافع واني دخلت غرفتي وأبالي فكره كون تفيدني ومن زمان أبالي .. شلت موبايلي وطلعت حساب هشام ما ضلي بس هالحل! وأن شــاء الله يفيد ويكون أدمي مو مثل أهله
دزيتله رساله هشام أني لينا أريد أحجي وياك ...
رأساً جاوبني كأنما منتظر مني رساله
هشام ـ ها بنت العم .. گولي شنهي حجايتچ
لينا ـ مو يگولون بنت العم سندها أبن عمها
ـ أي أسندج بروحي
ـ تسلم بس أريد منك طلب لان أعرفك رجال واعي وفاهم وعقلك منفتح عكس أهلك وعمك محمود تماماً وحرامات هيج بذره طاهره بوسط هيج مله عذراً بس أهلك ما أحبهم بستان ليمون ما يهضمهم .
ـ گملي لينا
ـ أختصرها عليك من الأخير شوف يا أبن عمي أني زواج حالياً ما مفكره كل همي دراستي بس مع الاسف محد مهتم لـ أبسط أحلامي وعمك الظالم بس يريد يزوجني وشاد گوره وگوري عبالك عدوته من سالفة المركز هو يكرهني أدون غلطه بسيطه يحطني ويگتلني والبارحه كتلني موتني من الضرب
ـ يضربج
ـ أي والله وروح أمي وأبويه الماتوا وخلوني على أيده شابعني دك بالنعل والغلط ما أسولفك عليه نوب طلعلي بسالفة الزواج داخله عليك خلصني والله اريد أدرس ولازمه دروس للسادس بس عمك بس يريد يزوجني .
ـ بس لينا أنتِ متقدملج ضابط ويانا والولد خوش ولد وأهلي وعمامي موافقين عليه بس كالوا أنتِ تقدم وبما أنه أبن عمج وأريدج وصلتج خبر من جنتي تمتحين وأني أولى بيج من الغريب مو صح .
ـ على رأسي شخصك الكريم بس أني ما حالياً ما مفكره بالزواج لا منك ولا من غيرك وكل همي دراستي والله
ـ شوكت تفكرين
ـ من أكمل السادس وكل الأريده منك تبعد هذا الغريب المتقدملي وانت حاجي أهلك وقنعهم بطريقتك بس عاد لما اكمل السادس
ـ وأذا كملتي السادس وأتقدملج
ـ ما أكدر أنطيك كلام بس أكولك أي غريب يتقدملي أرفضه وأوافق عليك .. بس حاليا زواج ما أتزوج .
ـ هذا هو بنت عمي أتفقنا منا لما تكملين السادس نحجي أما حالياً الموضوع ينسد وما ينفتح نهائي وترجعين تكملين دراستج ولاتشغلين بالج والسالفة صارت عندي وأنتِ نخيتيني وتدللين بس من تكملين السادس الي حچي ثاني وياچ. !
ـ تمام .. يعني أطمئن
ـ أطمئني بس شدي حيلچ بالسادس وبعدها الله كريم
ـ بلعت ريگي بــصعوبه أحس ورطت نفسي بهذا الأتفاق بس ما عندي حل ثاني جاوبته تمام أن شـاء الله
ودخلت عليه نور وعفت الموبايل وصفنت بوجهي
نور ـ ويامن جنتي تحجين ويعدين وين عفتينا ورحتي گومي يله أمي خابرت نافع بس طلع بالقريه وهسه چاي بالطريق وگال السالفة عندي هو تكفلها يحلها الچ
لينا ـ گمت وياها وخالتي باوعتلي بشك ورجعت باوعت على نور وصارن يتبادلن النظرات وقلقني بنظراتهن! وأكرهه هاي النظرة يحسسني جنت أحجي ويه صاحبي وأني جنت أشوف حلي لـ المصيبه الجابها على رأسي جلمود الحصو!.
.. هي دقايق وسمعنا صوتهم وگاموا كلهم وشفت ظهر هشام وباوعلي بنظره دافيه ومشوا وعمي رجع ساكت ويفرك بوجهه وحاير وكون هاي حيرتك تضل طول عمرك حاير ومحتار ..
سميعه ـ شو گاموا لا حس لا خبر وعمج مصطور شبي
نور ـ ماما خاف نافع خابرهم لو خابر على عمي محمود لان بس هو يرعبه وأله سلطه عليه .
سميعه ـ والله يا يمه ما أدري بس هو من خابرته گالي أجي وما يكون الا خاطرج طيب عميمه فدوه لطوله تخبل من گتله
خل أكوم أفهم من عمج شبي!
نور ـ وين تردين عوفي يمعوده وأتصلي على نافع وسألي وشوفي يجوز هو الخابره ونهى الموضوع بإتصال .
لينا ـ نور أنطتها الموبايل قبل لاتخابره أندك الباب وأنفتح فتحه من السيم ودخل نافع يفر بسبحته باوعتله أول مره تنحل سالفه مو من ضمن بطولاتك يا نافع!
نور لبست شالها عالسريع ودخل وباوع لـ الأستقبال عمي جان يحجي أتصال .. عافه وباوع النا وسلم
نافع ـ الله يساعدهم
سميعه ـ هلا بيك هلا يمه ويساعدك
نافع ـ شلونج عميمه شلون عافيتچ أعذريني تأخرت بس جنت بالقريه هسه هاي وصلتي گبل أجيت عليج
سميعه ـ زينه يعمه... أنه زينه لو أسلم على لينا
نافع ـ گالوا چاين عليجن خطابه أقصد جاين عليچ بس الأشوفه أيدي والجول وينهم شو ولا واحد .
لينا ـ وجهلي الكلام وهزلي رأسه معناها شگو .
سميعه ـ والله يمه ما أدري شو فجأه كاموا وخالك ضل ساكت ويفرك بوجهه ودگوا عليه وما فهمنا شصار علواه تفهملنا من عمك .
نافع ـ چاي يحجي ويه الأمر هسه يخلص وأفهم منه بس هما ليش راحوا شو أشك أكو أنه بالسالفه!
لينا ـ باوعلي بنظرات شك وراح على خاله وشويه واجه ويفر بسبحته ورفع رأسه ونظراته أجتي صواب عليه كأنما يحاول يقرأ عيوني تهربت منه وگفني من گال
نافع ـ نور ممكن تعوفينا لوحدنا
نور ـ ماشي .
لينا ـ نور طلعت بس عيونها عليه وتقرب بعد مسافه وحچه وتركيزه على عيوني يريد يوگعني بس حاير شلون!
نافع ـ تعالي أحجيلي شمسويه من ورا ظهري لدرجه قبل لو أوصلهم يمشون وينهون سالفة الخطبه كلها!
لينا ـ ما فهمت شلون يعني
ـ لا أنتِ الفاهمه ولاتغشمين نفسج عليه! وأني أجيت حامي وأخلي طشارهم ماله والي واللي يتدنالچ أطيح حظه بس أجيت ما لكيت ولا فرخ كدامي والأستقبال فارغ! والسالفه مسدوده لدرجه گلت معقوله سمعوا بيه راح أجي وخافوا شسالفه داخل عليهم مراد علم دار !.. ششگتيني بـ بطولاتي لينا
ـ لا حشاك والله وأنت مو قاصر ويكفي كلمتك الها وزنها ويخافون منك وهاي جبيره عندي بس السالفه
ـ أختصريلي بالنظيف وبله لغوه شلون مشية الغريب تتنكسل ووياها هشام هم! أقنعيني لينا أشسويتي شلعبتي من ورا ظهري
ـ لا لا نافع شألعب من ورا ظهرك
ـ لاتخيبين ظني بيچ وأحجيلي وأنه أخوچ والله محد يغصبج على زواج وخشمي يشم الهو لو مو خالي لو أبوج يطلع من گبره هم هذا الشيء ما يصير فاهمه
ـ لا لايضل بالك ماكو شيء والله ومن أحتاج أحد يوكفلي أنت أول شخص أفكر بي بدون تردد
ـ لا واضح هواي واضح .. بعني هسه ما تحجيلي شمسويه من ورا ظهري .
ـ ما مسويه شيء علمود أحجيلك صدگني
ـ مشكلتي ما چاي أصدگج بس راح أصدگج ولابد يچي يوم وأعرف سر الطبخه وأنه ما ينضم عليه سر لينا أعرفه أعرفه.!
ـ سگتت ومشه ورجع صغر عيونه وصفن بوجهي شبيك .
ـ ماكو شيء سلامتج بس إذا حاجيه ويه هشام أعدمج لينا أعلکج بالعامود برأس الفرع أخلي جهال المنطقه كلهم يتفلون عليچ
ـ عوذه شُــنو من عقوبه هاي
ـ ها
ـ شُــنوْ! نافع شبيك ولاتخاف ماكو شيء من ألبالك
ـ أن شــاء الله وهشام أني أعلمه هو وأهله أذا ما طيحت حظهم
ـ عوفهم نافع
ـ أنتِ أنجبي وأمشي سويلي چاي أم الفواين .
ـ ها شو هيچ .. عافني ودخل الأستقبال مزعوج وسويتله چاي ودخلت نور والحبيته بيها ما سألت بس أضمن عليها سمعتنا أحنه البنات بينا طبع نحب نتنصت..
أخذتلهم الچاي وعمي خزرني خليت كدامه ومشيت ونافع ضل يمنا ما أعرف شُنو يحجي ويه خاله بس حسيته جذاب دبگ هنا لان نور موجوده بس لا أستغفر الله هو محترم نفسه كلش وهي كذلك شبيه كمت اخربط ..
نور طبخت العشه ونافع تعشى ورا العشه شرب الچاي وطلع واني أختفيت من كدامه ما أريده يغير نظرته بيه بس والله ردت أحل الساالفه بدون مشاكل هو وعمامي وعمي محمود مهما يكون أبو مرته وأنوب بسببي يتلاغون ويرجعن عليه الحبايب يفضحني والله يسوني عشيقته!
وهيج أشوف أفضل وهشام ما قصر وياي خطيه ومنا لما أكمل السادس الله كريم يحلها الف حلال!!
وفضت هالسالفه عالخير وعمي بعد ما فتح الموضوع الله هداه وأقتنع بكلام هشام وعافني بحالي بس ما أكتملت وياي تذكرت صفا لازم أروحلها وأفهم منها
والله كلما أباوع بوجه نافع عبالك أني جاي أغلط
مو أخته صفا ..
شفت خاله كاعده.. خاله أريد أروح على لبنى عادي
سميعه ـ لا مو عادي بالليل أخابر واحد منهم يجيبها ليش أنتِ تروحيلها .
ـ الله عليج خاله حبابه خليني أروحلها ومشتريتلها حلويات
ـ لينا ماما ستري عليه ومنا عمج ولسانه شيخلصني منه أذا أجه وسأل عنج شگوله
ـ گولليه يم اختها وين رايحه قابل أمانه وافقي
ـ بس لاتتأخرين وأخذي ميثم وياج يوصلج شوفي يم الباب
ـ تمام ولبست وطلعت مستعجله وگلبي يدك من الخوف .. دورت على ميثم ما لگيته يله أروح لوحدي وأني أمشي وگفني صوت مره!
ـ لينا شلونج حبيبتي!
ـ أستغربت سؤالها لان ما أعرفها ضلت تباوع بوجهي بتركيز ومبتسمه!!
ـ شُــــــنو ما عرفتيني؟
ـ لا ما عرفتچ.. عفواً منو أنتِ
ـ أني أخت أبو مسار مختار المنطقه
ـ أها أي أهلا وسهلاً
ـ وبيج أكثر حبيبتي شلونج بدراستج جاي تروحين محاضرات مو
ـ أي الحمدلله زينه
ـ الله يوفقج حبيبتي تستاهلين كل الخير والله من شفتج بالصور ما عبالي بالحقيقه هيج حلوه طلعتي تخبليين ما شاء الله عليچ!
ـ يا صور عن شُـــــــنوْ تحجين
ـ أها لا هيج خربطت بالسوالف شبجت بالحجي بينج وبين بنت حماي .. وأنتِ خوش بنيه وعاقله مو مال صور وهل السوالف !
ـ ممكن تفهميني زين.. يا صور تحجين دوختيني وياج
ـ لا لا السالفه مو يمج مو گلتلج خربطت بينج وبين بنت حماي لان الأعرفه أنتِ بنيه مربايه وأهلج خوش ناس والله أمج شلون مره كلها تحلف بحياتها
درست عدها شلون معلمه الله يرحمها .
ـ الله يرحمها بس قبل لاتمشين فهميني
ـ شُــنوْ أفهمج حبيبتي بس حبيت أسلم عليج لان أمج معلمتي وحيل جنت أعزها وأحبها يله أني أترخص منج ديري بالج على نفسچ!
ـ مشت وتلتفت وراها وضليت مصطوره بكلامها تحجي وترجع تنسحب شبيها هاي ونفس الوقت گلبي نغزني منها .. كملت طريقي وصلتهم لكيت بابهم مفتوح عالنص ولبنى تغسل الحوش شافتني شهگت گبل ركضت حضنتها مشتاقتلج شلونچ
لبنى ـ فدوه لوجهج زينه والله أني هم مشتاقتلج فوتي فوتي .
لينا ـ منو أكو يمكم
ـ ماكو أحد بس نورس والبنات هسه رجعن من القريه ودخلن الحمام وصفا فوك بغرفتها!! اي سولفيلي عن سالفتج ويه هشام شلون أنحلت شصار ما صار عبالي أجيج بس باقر نزل وأنتِ گلتي تمرين وما مريتي بعدين عرفت بسالفه هشام
ـ ما صار شيء تأجلت وبس.. أني صاعده أشوف صفا شويه وأجيج .. مشيت وجلبت بيه منعتني شگو
ـ لينا گتلج عوفيها وأنتِ تشوفيني لو جايه تسألينها وأذا سألتيها ما تگولج منين عرفتي أكيد دگول أختها گاللتها وفضحتني والسالفه توكع برأسي عوفيها يرحم أمي بگبرها وهاي للسان ما ناقصين تصيرلنا مشكله
ـ شگو خايفه شمسويه قابل صاعده أحجي وياها كلمتين وأنزل عوفيني لخاطر الله وهذا خوفج بطلي اليشوفج يگول أنتِ الطالعه بالليل مو صفا .. كفختني على رأسي خرب يومج لبنى أيدج ثكيله يوم تصگطيني والله الله يعينك يا باقر
ـ أحجي عدل لا أكسر حلگج وأني حجيتلج تتبعدين عنها مو تجين تحجين وياها .. أمشي أرجعي قبل لا يجون
ـ أهوو لبنى شو عوفيني.. عفتها وصعدت فوك وشافتني نورس عوجت حلگها وتهز بيدها هاي شبيها منو يمها .. وصلت ودگيت الباب گبل فتحتلي ومن فتحت لا أرادياً صارت عيني على بطنها لان تلفت النظر!
صفا ـ هلا والله همزين شفناج شجابج منو دلاچ الدرب
لينا ـ أجيت أحجي وياج بموضوع مهم .
ـ ديله فوتي قبل لايچي نافع من الچم
ـ دخلت غرفتها وعباره عن أكل وحلويات! مفتحه ماركت بغرفتج
ـ ها أي حليم راح أشترى وأشترالي تردين هسه أجيبلج
ـ لا شكراً .. وگفت على حيلي وهي تباوعلي بتركيز
صفا لا عبالج أني غافله عنچ وعن سوالفج وطول هذيج الفتره وفترة الأمتحانات وتطبين وتطلعين وتتأخرين وأغطي وانطي أعذار لسايق.. ترى كل سـوالفج عندي وأعرف بيج تطلعين وياه وطلعاتج بإخر فترة الأمتحانات صارت تتأخر وهذا التأخير وراه شيء .
ـ أشوفج تحجين بصيغة التهديد!! ما عرفتچ والله يمعوده شوراي مجرد طلعات بسيطه أشرب عصير نفتر ونرجع مثل كل مره شگو قابل ولاتخافين ماكو شيء من البالج وأني أحسب حسابات وأفكر بإهلي وبسمعتهم وسمعة أخواني شبيه خبله ما برأسي عقل لا خيه لا
ـ وطلعاتج بنص الليل هم بسيطه .. ملامح وجهه تغيرت ورجعت ضحكت وكعدت على الجربايه وفتحت جيس الجبس وبطنها بينت أكثر!!
ـ هاي لبنى ماتضم سالفه شبسرعه گالتلچ وأني توقعتها فقيره وما تحجي بس يله عادي وأني حجيت لبنى وگتلها جنت فاتحه بث
ـ وبث بنص اليل ما خفتي أحد من أهلج يشوفج تردين تقنعيني صفا أحجي گلشي ترى كاشفتج
ـ أي بث وأهلي جانوا مو بالبيت ولا تتقنعين هذا العندي وبعدين مستحيل أسويها وأطلع ما أخاف على نفسي على أهلي وصح جنت بفترة الأمتحانات أطلع بس مو بنص اليل لا يمه شسالفه .
ـ ما أدري گلبي ما مرتاحلج وشلعتي گلبي بسوالفج لازم أحطلج حد
ـ ههههه ليش هو شگو شبيج لينا قابل ما تعرفيني دتعالي كعدي خل نأكل خوش حلويات تفوتچ هاي النستله تحبينها .
ـ كعدتني وقدمتلي وهي تضحك وتسولف كأنما ما عدها شيء .. صفا الله عليج ما طلعتي من البيت والله
ـ والله شبيج كل عقلجن أطلع تخبلتن شلون أسويها
بس يله مسامحتجن حقجن تفكرن هيج تفكير بيه وتظلمني وأني عوذه كاعده وساكته منين طلعتن اليه بهل السالفه .
ـ ما كدرت أصدگها بس ماشيتها وضلينا نحجي
واني أستمع الها ومن بين الكلام حجيت الها عن أخت أبو مسار
ـ شبيها هاي نوب منين طلعتلج
ـ ها لا بس شافتني بالطريق سلمت عليه ما أعرف حيرتني أنتِ هم شايفتهن تعرفيهن لان أول مره أشوفها
ـ يمعوده أنتِ مخليه بالج يم أبو قنادر شدعوه هيج تفكرين بي ومأخذ عقلج هل أبو مسار ونوب أخواته شسالفه لينا أحجيلي شمسويه وضامه عني
ـ نجبي شمسويه قابل ما تبطلين سوالفج وبعدين شدعوه هلكد سمنانه وصاير عندج كرش كافي تأكلين
ـ يا كرش منيلي عوذه منچ
ـ بدون قصد لزمتها من بطنها وهذا شنو!
بس أنصدمت بطنها قويه! گبل دفعتني وگامت وهي تضحك!
ـ ولج من خلصت الأمتحانات أرتاحيت وكظيتها أكل ونوم وشويه سمنت ونوب أكلنا هالفتره صاير كله دسومات من ورا لبنى وحملها أبويه كل يومين والثالث يجيب سمج وباقر كلما ينزل مشاوي من عدا نافع وناجح يشون وتعرفين مجموعين وأكل وخرب جسمي
ـ ها أي شگو بيها أكلي بالعافيه يله أني اروح
ـ هلا بيج حبيبتي وأمانه تعالي علينا لاتكطعين رجلج من عدنا وأحنه صديقات وصارلنا شگد لاتخربين صداقتنا بإفكارج
ـ هو أني خربتها لو أنتِ مو راحه
ـ ديله عاد شمسويه مو حجيتلج شنو ما تصدكيني
ـ لا مصدكتچ مصدگتچ ديله باي تأخرت هسه خالتي يضل بالها
ـ الله وياج عمري .
ـ نزلت وياي ونورس باوعتلنا بنص عين
ـ الله يثخن للبنچن
صفا ـ وأنتِ ليش مقهوره من صداقاتنا من بنت خالي حبيبتي .
لينا ـ حضنتني كدامها وأني أدفع بيها أريد أخلص نفسي منها وجان يدخل نافع باوعلنا بشك وركز نظره عليه وأجتي لبنى تعض بشفايفها وتتوعدلي
.. نزلت أيدها من جتفي ومشيت
نافع ـ اليوم يمنا شجابج .
لينا ـ خرب بيومك ولا يوم گالي هلا بيج.. جاوبته والله أجيت أشوف أختي ما تجيبونها النا .. باوع على لبنى ورجع باوعلي ورجع باوع على أخته صفا ثلاثتنا دمجنا بنظره وحده!
نافع ـ ها أي هلا بيچ
نورس ـ حبيبي الحمام محضرته الك
لينا ـ عبرني ومشيت واني طالعه لبنى لحگتني وتحجي عليه.
لبنى ـ گبل للبيت وبعد ما توصيلن يله كدامي وبعدين نحجي بس هسه باقر راح يجي ونافع هنا مو وگت حجي .
لينا ـ أي ماشيه شبيج وبهل الأثناء دخل باقر وأبتسم
باقر ـ يا هلا والله اليوم لينا يمنا شلونج يابه
لينا ـ هلا بيك زينه الله يسلمك
ـ ضلي عالعشه اليوم يمنا
ـ لا والله ما أكدر تسلم
ـ لا ما يصير لبنى أحجي وياها وقنعيها
ـ راح ولبنى تعض بشفايفها وتدفع بيه أي هسه أمشي شبيج بيت الخلفوج
ـ أنجبي بس أمشي وخلصيني
ـ أي رايحه وطلعت ويم الباب ورجعت تذكرت صفا وأني علمود شنو چايه عبالها بسوالفها والعابيها تضحك على عقلي وتأكل حلاوه برأسي وما أروح قبل لا أكول لنافع وخل يتلاحك لأخته وكومه خرطت عليه جذب عبالها صدگتها الأدبسزز بس كون يصدگني وما يشرگني وياها وقبل لا أفتح الباب وصلتني رساله
صفا ـ وين راجعه لينا
لينا ـ رفعت رأسي وشفتها واكفه تباوعلي رجعت كتبت الها وأنتِ شعليج
ـ لينا روحي البيتكم وعندي موضوع وياج أريد أحاجيج بي بس مو هنا من تروحين نحجي تمام
ـ ما عندي شيء أحجي بي وياج عوفيني بحالي
ـ روحي البيتكم قبل لا يطلع نافع ويسألج وأذا سألج الموضوع المهم اليخص أختج لبنى!ما راح أحجيلج عنه
ـ يخص لبنى شعندج صفا
ـ أمشي من يم الباب لينا ووگفتج غلط هسه تلگين نافع يباوعلچ بالكاميرات لاتجيبين الشك لنفسج ترى هو شگاك ويخلي باله .. بسرعه تحركي .
ـ نزلت أيدي من الباب وباوعت على الكاميرات وعصرت جنطتي ومشيت والخلاني أمشي أسم لبنى! قلقتني وأمشي وطول الطريق بالي يمها وگفت بنص الطريق راسلتها صفا شعندج وشدخل لبنى شنو مسويه وأختي شعليها صفا أذبحج والله أرجع أكول لنافع گلشي وأخلي هسه بهل المغربيه يحلل ذبحج والله أسويها صفا والله
صفا ـ أصبري لاتهددين حبيبتي وثواني وتوصل!
لينا ـ شُــــنوْ التوصل؟!
ـ صوره!! أي وصلتج فتحيها وشوفيها وين بينما يوصل الج المقطع الفيديو!
ـ أنتظرت الصوره تحمل والأنترنت ضعيف وحملت فتحت عيوني على وسعهن من الصدمه ومن الشفته لبنى ربها ما خلقها بالحمام چاي تسبح!! ليا ساقطه مصورتها ..
صفا اليوم أذبحج ومحمد اليوم أذبحج رجعت بخطواتي بس وگفني صوت الأشعار فتحته مقطع فيديو! فتحته وأني أيدي ترجف هم لـ لبنى بالحمام تسبح وكل جسمها مبين بالفيديو من الصدمه والرجفه وكع الموبايل من أيدي گبل شلته على صوت الأشعار الوصل
ـ شوفي لينا وسمعيني زين وفتحي عينج كلش زين تمام كلش زين فتحيها وكلمه وحده تحجين عني وعن الشفتي الصور والمقاطع الكدامج وبعد عندي ما دازتهن الچ يصيرن ترند بكل العراق ويله أمشي بطريقج للبيت وشوفي المقطع على كيف كيفج قبل لايطلع نافع .. أستعجلي .
ـ نزلت دموعي وأشهك وخليت موبايلي بالجنطه وسرعت خطواتي للبيت وصلت وأني أيدي ما أكدر الزم بيها الباب ترجف من الخوف ومن الي شفته ولزمتني الرجفه بكل جسمي ..
وصلت البيت والحمدلله ما شفت أحد ودخلت من باب الأستقبال الداخلي وبسرعه دخلت الغرفه وقفلتها على نفسي وطلعت الموبايل من الجنطه عالسريع وأريد أفتحه من ما ينفتح الرجفه سيطرت عليه الزمه ويوكع من أيدي .
ووصل الأشعار لـ المقطع الثالث وهنا كانت الصدمه الأكبر الأواجهه بحياتي كلها!! فتحت المقطع وغمضت عيوني وعصرت الموبايل ما كدرت أكمله مجرد شفت مقتطفات وگلبت الشاشه ونار شبت بكل ضلوعي أحتركت حرك وأحس عيوني طلعن من مكانهن وكتمت صوتي وكزيت على سنوني صــــــــفا !!
الأدبسزز مصورتها بغرفة نومها هي وباقر بوضع العلاقه! حاولت أركز على موقع التصوير منين مصورتها ما كدرت أعرف لان ما أريد أشوف كون تنعمي عيوني ولا أشوفچ يا أختي بهيج وضع .. رجعت گلبت الشاشه والطم على وجهي صخام الصخمني عزه العزاج لينا وين وكعتي .. ورجع وصلني أشعار رسالتها
صفا ـ شفتي المقطع زين .. وسدي حلگج زين هم وبضغطة زر أنشره بإكبر كروب بالعراق وأخلي أختج على لسان ومحط الأعجاب! وبالأخص المقطع الأخير ملفت النظر والمشاهده شفتي زين مو ....
شكرا لزيارتكم عالم روايات سكيرهوم
