رواية ارهنت عمري الفصل الخامس والعشرون بقلم نورا ناصر
ياخاطري المنكسر!
هلبت يصحلک دوه ؟
جر حسرة منها حسيت صدره متروس عتاب وكرفص كبالي ، باوعتله بفضول و يباوعلي بإهتمام ، طالت فترة سكوته ثواني ، مد ايده يحركها على وجهه ، ونظراته بعيدة عني ، عرفته متردد بقيت اباوعله انتظره يحجي .
رمش بعيونه ورجع باوعلي : ميسم انه جنت هناك بذيج الليلة بس مااكدر اكول ليش تعذريني؟
هزيت راسي بأسف ودرت وجهي منه ...
هو دار وجهي عليه ، وحط القران الجان بيده على ركبته ايد جوا وايد فوكه .
كال انه راح اقسملج بالقران انه لا كتلت امج ولا دزيت احد يكتلها تصدكيني ؟ وانه كبال كبرها واحلفلج انه بريء من دمها .
باوعتله ساكتة وكمل كلامه : بس وجودي هناك جان لسبب ثاني ماكدر اكوله واهجم بيوت وخاف هم يصير كاتل ومكتول .
نشغت ابجي ماسيطرت على دموعي ، حزن غريب محاوط كلبي ودم جرحي يفور بيه ، ضربت ايدي بالقبر حييل وعطت متألمة ، هو لزم ايدي يمسحها
يهدأ وجعها .
كال : والله هاي دموعج ماتهون عليه كومي كومي احجيلج كل شي بالسيارة .راح يصير المغرب وانت حالتج موخوش والله احجيلج كلشي بس لاتأذين روحج . انه كلي ثقة بيج اذا مو بيج اثق بيمن جا؟
لزمني من ايدي وكومني ، كمت بس حيلي كله بايد
حطيت حيلي كله عليه ، اباوعله اريد اسمع شراح يكول .
وصلنه للسيارة فتحلي باب السيارة شال مهند نزله
وانا صعدت ، وهو خله مهند ع الكشن الورا ، فز مهند وهو ظل يرجعه لنومته يمسح على راسه ويهمس بأذنه نام وليدي نام بعدنه ماوصلنه ارجع نام حبيبي .
سد بيبان السيارة وصعد ووياه علاكة اخذها جانت ع الكشن الورا ، خلاها بحضني كال وجهج صار اصفر طلعيلج شي واكلي .
فتحت العلاكة بيها نساتل وعصير ، فعلا جنت جوعانه واحس بطني سفطت على ظهري من الجوع ، اخذت نستلة وفتحتها اكلت منها شويه ، رجعت باوعتله
يله احجيلي ؟
ليش تردين احجيلج فضول لو شنو ؟
بريء نفسك كدامي .
انه مايهمني انه بريء كدام الله وكدام نفسي وحتى كدام امج الله يرحمها بس يهمني امرج وراح اكلج .
تحسرت وهو ظل يحجي ..
بيوم الحادث المغرب طلعت سيارتي من البيت شفت حاتم ومرته زينة ، سلمت عليهم وسألته ها وين رايحين
ظل اخوج يدردم ويأشر على مرته .
كال هاي تريد تروح لاهلها ..
اي وين المشكلة وديها وارجع نطلع انه وياك راح ابقى انتظرك مااطلع .
يمعود سوتلها مشكلة ويا ام فخري وتريد اله تروح لبيت اهلها واصلا اهلها مسافرين ماكو احد هناك بس بيبيتها واخوها الزغير .
كال هيج ودفعها من ظهرها بخفة وصعدها لسيارته وراح وانه طلعت من البيت ، رحت يم جماعتي ورجعت للبيت الساعة ب ١١ .
وانه بطريق رجعتي للبيت خابرني حسن ابن عمي
كال شفت سيارة سعيد اخوك يم بيت اهل مرة حاتم
اكلك هو شعنده وياهم ؟
تفاجئت سألته انت متأكد خاف مشتبه زين انت شفت سيارته يم بيتهم لو مسافة عليهم ؟
كال اي طابكها مسافة عن بيتهم .
سديت التليفون بوجهه وخابرت على سعيد اتصلت بي مايرد ، راح ننفضح بسببه! زينة هناك واهلها مسافرين
وهذا الساقط اخوي مستغل الوضع بسيطة بس خل يصبرلي انوب شكد غبي سيارته يم بيتهم شون يجيب المشاكل كوة النه .
سقت سيارتي وماحسبت حساب لاي شي ماجنت ادري دخلتي للمنطقة بذيج الليلة راح تكلفني هواي وراح ادفع ثمنها والثمن راح يكون انت ميسم .
ميسم : باوعلي وجر حسرة ، خليت ايديه على وجهي احتاريت شنو اسوي .
ظل هو يباوع للطريق ولازم لستيرن بقووة
يتحسر ويحجي اذتني حسراته حسيته موجوع .
لاول مرة انقهر عليه .
كمل كلامه : دخلت لمنطقة خوالج شمدريني بذيج الليلة اكو قاتل جاي يحضر لجريمه وراح تطيح براسي
بس حاتم خويي ومعزته بكلبي حيل جبيرة مااكدر اسكت واخلي اخوي يلعب بعرضه شون راح انام الليل وهو يمها وحاتم غافل عن الي جاي يصير .
رحت ووصلت لبيتهم دكيت الباب بكل قوتي
طلع اخو زينة تقريبا عمره ١٢ سنة .
كتله صيح لاختك عندي حجي وياها
طب وورا ربع ساعة انه انتظر واعصابي نار
يله طلعت زينة ووجهه مصبوغ صبغ بالمكياج
استغفرت ربي ودرت وجهي .
صريت اسناني بكل قوتي
وحاجيتها ونظراتي مو عليها بعيدة عنها
كولي لسعيد خل يطلع منا انتظره بالسيارة انه .
ظلت تتمتم وتتلعثم : لا خويه انت متوهم سعيد شجابه هنا موو مووو هنانه والله .
الله ياخذكم ان شاءالله انت ووياه كتلج صيحي لا تخليني هسه ادخل اطلعه بنفسي واذبحه وانت اوديج لحاتم هو يتصرف وياج .
ظلت تعصر بأصابعها والله خويه والله ...
خزرتها اشششش لاتجيبين طاري الله على لسانج انت وحدة استغفر الله استغفر الله
وسكتت شويه وكملت : روحي صيحي لاادخل اجره جر والله .
دارت تريد تروح تمشي على كيفها صحتلها تعاااي احجي وياج .
رجعت تباوع وخايفة وانه اباوع عليها بقرف واشمئزاز
كتلها سمعي ولج ماتظلين على ذمة حاتم مانتشرف بيج بعد اطلبي الطلاك منه لا والله ماتلومين اله نفسج ترا لا يوكف بعيني اخوي ولا حتى ابوي افضحج افضحج افتهمتي ؟
هزت راسها بتردد ، دخلت وسدت الباب وراها
وانه رحت يم سيارتي انتظر اخوي يطلع
شفته اجه من ورا البيت الظاهر اكو مكان دخل منه
جان مدنك راسه .
رحت هجمت عليه لزمته من ياخة قميصه
وضربته بوكس بنص وجهه ، انملص مني وطاح بالكاع
سحلته لحد السيارة فتحت الباب وهو يريد يشرد .
لحكته رفسته برجله بقووة ، طاح وهو لازم رجله
رحت لزمته من ملابسه تشككت بيدي.
دفعني ويصيح بوجهي : مالك علاقة بيه انت مامسؤؤل عني وانه مو جاهل والله اذا ضربتني بعد اردلك الضربة اثنين .
نومته بالتراب وصرت امرغله وايديه تلعب على وجهه مره راشديات مرة بوكسات فقدت كلش اتمنيت ادفنه وهو عايش صار الدم يتطافر من وجهه .
وصاك على اسناني بقووة ووولك مو عندك عرض عندك خوات لك عندك مرة عندك بنات بناتك بناتك مافكرت بيهن صدك جذب ولك الغيرة انشالت منك .
انته اخوووي انته ؟؟ تفف عليك ياسكط اسمع لك من اليوم انت مطرود من البيت والله اذا شفتك ابيتي بعد اله ادفنك وانت عدل.
حسيته راح يفقد الوعي من كد الكتل ، مابقى مكان ماضربته بي ، حتى روحه مابي يشيلها بعد .
سحلتها سحل ع الكاع ، وديته لحد سيارته وشمرته بيها عفته يون من الالم والوجع وتمنيته يموت واخلص منه ورجعت للبيت.
ميسم سكت لحظات ورجع باوعلي بقيت مصدومة وتذكرت عفاف خطية من شافتهم سوا ومحد صدكهه
حسيت باحساسها ، انه هم من شفت سيف ويا شهد من شفتهم جانت نار وتحرك بكلبي .
باوعلي عياش كال انت مصدكتني ؟
هزيت راسي بأي ..
كال كملي اكلج بس نتعدى من يم مطعم انزل اجيبلج الك .
_ لالا لاتعب نفسك كافي عليه هالنستلة شبعت اريد بس نوصل للبيت اريد ارتاح .
_ تأمرين امر هسه نوصل مابقى شي وترتاحين .
تنفست بارتياح عبالك اللحظة الاولى الي اعيشها بأمان بعد ايام من القلق والخوف والالم بكل انواعه .
باوعتله سألته صدك انت ليش ماتزوجت ؟
دار وجهه عليه مبتسم وعيونه بعيوني
كال : لان ما لگيت التگعد گدار أعلى گلبي غيرج!تمنيتج من كل گلبي وگلت اصبر واشوف .
عضيت شفتي ودنكت خجلانه كلش وشفافي تهتز تدعو بعضها لابتسامة .
وهو كمل كلامه ولو هذا مو وكته الحجي
بس انت سألتي ومااعرف غير اجاوبج بصراحة بس انه عند وعدي الج ووعدت نفسي همين اذا صار وتطلكتي من هذا المايع الماعنده غيره وان شاءالله تطلكين منه
بس انه ماراح الح عليج ولا اضيك خلكج بعد راح ابتعد واخليج على راحتج .
بلحظتها وبعد ماسمعت كلامه تلاشت ابتسامتي
ومن اعماقي ضجت . لان بالعادة المراة تحب الي يقاتل علمودها ، وبعد هذا اليوم هواي تغيرت اشياء ومشاعر ومواقف .
وصلنا للبيت نزلت من السيارة تنفست الصعداء وارتاحيت ، اتذكرت من جنت محبوسة بغرفتي
وانا اعاني وابجي محبوسة مثل طير بقفص
وهسه انه حرة طليقة ماحنت اتصور راح يطلق
سراحي ابد والمفاجأءة عياش هو الي ساعدني
وخلصني من ضيم سيف باوعتله همست شكرا
على كل شي والله مااعرف شون اجازيك والله
انت نقذت حياتي .
كال لاتجازيني ولا ابد هذا واجبي لو اي وحدة ثانية مستنجدة بيه جان هم ساعدتها مو بس انتِ .
وانه مدنكة فتحت عيوني وعوجت حلكي بانزعاج .
باوعتله حجيت بانزعاج ماقصرت .
ضحك كال وشبيج عاوجه حلكج وماعاجبج ؟
لا بس اريد ادخل جوا ارتاح شويه تعبانه حيل .
اي يله روحي ولاتفكرين بشي بعد خلصتي وان شاءالله تخلصين منه للابد .
باوعتله بامتنان وهزيت راسي تصبح على خير
دنكت بست مهند وكرصته من خده وانه مبتسمة بوجهه .
انفتحت الباب وطلع حازم ركضت حضنته وابجي
ظل يمسح على راسي بحنية . تشكر من عياش
ودخلني جوا . تلكوني وانه احس هلكانة ميتة من التعب . التموا عليه يردوني اسولفلهم وانه ماريد اتذكر شي .
باوعت شفت وردة شحالها تعبانة حيل رغم هذا كامت من فراشها واجت تشوفني ، لزمت ايدها المن كمتي جان انه اجيتج للغرفة اشوفج .
ولج ميسم شصاير بيج هذا شنو وجهج الحقير جان يضربج ؟ الله لاينطي ان شاءالله .
الحجيه كالت شنو صاير وليش يكتل بيج ليش انت شمسويه .
حازم عض اصبعه اخخخ اذا الزمه والله اكله بسنوني اكل .
جريت نفس كتلهم سالفة طويله بس هو جبان ويخاف من خياله ، يريد يحمي روحه مايعرف شلون يضرب بيه وحبسني وكسر تليفوني .
حازم : يحمي روحه من شنو غير نفتهم ؟
باوعتله وحجيتها بغصة : طلع متزوج بالسر متزوج مرة اخو المرحوم .
كلهم شهكوا مصدومين ... وحازم ظل يضرب قبضة ايده بباطن كفه من العصبية يحجي ويتوعد اله
شون الوحه اريد ابرد كلبي بي ، بس يرجع ابوي اله اخذ حاتم واروح لبغداد اادبه واطيح حظه والله .
الحجية : كل هذا يطلع منه ؟ اعوذ بلله منه مامبين عليه ابد .
اي طلع معدنه جبان يخاف على نفسه من اهله ابد ماعنده شجاعة اهم شي روحه عنده . وانه هسه تعبانة كلش من رخصتكم اكوم اسبح ملابسي كلها تراب مال مقبرة .
كمت من يمهم توجهت لغرفتي تبعتني ام فخري
جرتني من ايدي وظلت تمشي وياي
كالت اي ولج ماشفتيله جدهم شلونه ينفع يفيد لا شتكولين عنه ؟
باوعتلها : بيبي والله مايفيدج رجل بالدنيا ورجل بالاخرة وهمين مايعرف احد كلما يشوفني يسألني انت مرة ياهو ؟ هاي باليوم ٥ مرات يكولها الي .
فتحت عيونها مصدومة حلللفي ؟؟؟
حجيت بتعب ووصلت لباب غرفتي و الله بيبي قابل اجذب عليج ماريدلج الخير انه قابل ؟ انتِ ششوفين ؟
ظلت تضرب كف بكف وتعض بأصبعها اخخخ هاي عمتج جذابه ورجلج هم جذاب كالوا قوي وبي حيل
هسه اصدكمن ؟ اصدكج اصدكهم ، لزمتني من ملابسي ولج خاف تجذبين عليه الرجال مابي شي المكرود بس انت لان متعاركة وياهم ؟
اجتلها الحجية ام فخري جوزي مت البنية جايه من طريق طويل وتعبانة شجاج عوفيها خطية عوفيها .
عافتني كوة لو ما الحجية اريد اطب لغرفتي اسمعها تتحسر وتكول والله هذا اخر امل عندي .
والله بيبي ابقي هيج احسلج هسه انه شحصلت من الزواج .
ولج حمارة انت شهر ماطولتي انت ملسونه لسانج شطوله بت خالج سميحة نسخه منها انت هسه لتنخليني اجيب طاري امج ماتجوز ع الميت غير الرحمة بس شكول انه مو مثلج انه فقيرة وهاديه .
خنزرت عيوني وصرت اتنفس سريع هسه منو المفروض يضوج انه لو هيه والله بطرانة .
طبيت للغرفة اخذت ملابس ورحت للحمام فتحت الماي ونزل على جسمي ، احس روحي توة طالعة
من معركة ، خلصت وطلعت رحت للغرفة ، نشفت شعري اجت يمي الحجية ..
اخذت المشط وظلت تمشطلي ،
كتلها خطية ابوي بس لاينقهر لان عياش خابرهم هو وحاتم وترخص منهم يجيبني .
كالت هسه اخلي حازم يخابره ويطمن عليه ..
_ يمه شتكولين ابوي يقبل اتطلك من سيف ؟ انه ماريد بعد ارجع اله عفية خلي ابوي يطلكني منه .
_ والله شكلج يابنيتي الله كريم خلي نشوف شلون راح تصفى .
جريت حسرة وافكر شلون اذا ابوي ماطلكني منه شون اذا ماقبل هو يطلكني شلون ياربي .
الحجية سوت شعري كصيبه ..
كالت اخليلج عشه تاكلين ؟
لزمت ايديها والله ميته جوع الايام الفاتت انحرمت حتى من الاكل .
سودة عليه هسه اسويلج عشه وتعشي .
طلعت ورحت وراها للمطبخ . . خلتلي عشه كعدت اكل وبعدها رحت للغرفة تمددت على السرير .. غمضت عيوني وبأذني تمتمات عياش من يقرا قران يم گبر امي . تمنيت بهاللحظة اسمع صوته وهو يقرا بأذني حتى اغفه مرتاحة اكثر .
انقلبت ع الجهة الثانية تخيلت نفسي جاي اسمع صوته وهو يسولف حد ما احس انترست اذني بس بنبرته
استسلمت ونمت .
وراها بكم يوم اجه ابوي من الهند جان تعبان رحت يمه
ظل يباوع بوجهي جانت الاثار بعدها حسيته من ملامحه انقهر عليه بس مافتحت ويا الموضوع
لاينقهر اكثر ، التزمت الصمت .
سمعت بعياش جاي يشوفه تمنيت اروح اسلم عليه
مادري شجاني لزمت نفسي احاجي روحي ثگلي يابنيه شجاج ؟ شمدريني شصارلي بعد ماخلصني من سيف وضيمه صرت اعتبره البطل مالتي .
اجاني حاتم سال على الي صار كله وانه هم حجيت اله
كال عمي ابو اسعد خابرني .
تفاجأت وفتحت عيوني اي وشنو كالك ؟
يريد يجي يشوف ابوي وهم يحجون بموضوعج ويعتذرون بس انه كتلهم اذا تردون تجون هلا بيكم بس لا تحجون بموضوع يضوج ابوي ترا تعبان اجلوا كل شي هسه .
خويه ياحجي الي ينحجي وينكال الله يخليك انه بعد مااريد منهم شي ابد غير الطلاك خلي يطلكني هو متزوج .
كام على حيله معصب : صدك جذب تحجين انت ؟ تردين تطلكين شتكول الناس عليج ؟ ومن اول مشكلة شدعوة عليج ؟ وبعدين هذا اختيارج انت لو نسيتي؟
انه هم كمت اواجهه : اي مو ذنبي هو طلع مو ادمي انه مادري راح يطلع منه كل هذا وخويه شبيه واذا تطلكت منه مراح ينقص مني شي هسه انت مو مطلك وعادي يعني .
ايباااه وتقارنين نفسج بيه ؟ من يمته المجتمع يحاسب الرجال لان مطلك وبعدين الناس راح تحجي علينه تكول امها هم جانت مطلكة وهم ماتت مكتولة الله يعلم ليش ؟؟
وهيه هم مطلكة ؟؟ لا عيني لا شيلي هالفكرة من راسج ومدام هم رايديج والولد اذا اجه و اعتذر وحلف مايمد ايده عليج بعد مرة ثانية عادي رجعي شكو بيها . المرة كل شي لازم تتحمل ولا تدوخين ابوي ترة تعبان ومريض خطية .
