رواية فصلية لظالم الفصل السابع والعشرون بقلم زينب نور
فهد : راحت الدكتورة بعد ما خبرتني هذا الخبر الي هد حيلي دخلت تركض للصاله مال العمليات لان تكول حجم الكيس ديكبر حاليا وحجمة اكبر من الأطفال والطفل ديصعد على صدرها وهيه عدها ربو يعني تموت رأسا اذا ملحكنه الها أضافه الى انو صاير عدها زلال شوي وية الحمل مشكل سببه الوروم الي بيها وبرجليها
رحت كعدت عالكرسي وحيلي مهدود يربي هاي شلون على طول هيه جانت تشكي وجع بطنها واني جنت اكول تتعاير هاي وامي وحبوبتي يكولن تقلصات الحمل عادي بس هية متتحمل وتريد تخلص من الشغل وبالفتره الأخيرة تعبت كلش ومحد دار باله عليها
كلها تكول فصليه خلي ننتقم منها ومحد كال هيه حامل بابني وحتى اني جنت شكد اشوفها تتعب وتبجي اكول تريد اشفق عليها علمود متنضرب وكذا وتتعاير هنه ذني بنات بغداد بس يتنعوصن
عفراء كامت تبجي وتكول شكتلك اني فهد ياما وياما حجيت وياك وكلتلك تره هيه حامل تره متتحمل وهاي مايعه كم مرة كتلك خلي تروح للدكتوره وضعها ميعجب مو زينه ترجع تكول امي وحبوبتي ميقبلن ليش انته شنو شغلك لعد تالي انوب طلعت هاي حالتها ارتاحيت هسه هاي واحد من ولدك راح والثاني الله لا يكولها هم راح يروح ارتاحيت هسه فادك العناد وعلى منو عنادك على خلفتك
دك تلفوني باوعت امي خليته صامت ورجعته لجيبي ما بيه حيل حتى احجي جان صامت بس وضع هزاز وعفراء ما جايبه تلفونها فبس اني ويدكون عليه من كد ما لحو حتى جدي خابر نطيته لعفراء جاوبهم
صدك جاوبتهم وحجت كلشيت وضلت تلوم بيهم عفراء الوحيدة بخواتي الي بكلبها حنيه عكس خواتي الباقيات
ضلت تحجي رادو يحجون وياي ما كدرت الدنيا طفرت من عيني تالي كالت جدي يكول خلي يحجي وياي بساع اخذته منها وحجيت وَيَا وسألني شصار وليش ضربتها وهاي راح واحد من ولدك اني مو كتلك من دام حامل خفف عقوبتها خلي تجيب وتنطينه الوليد وخلي تولي انته ليش متسمع الكلام
كتله هايهيه بعد صارت كال انته مو جنت فوك شنزلك ما تكولي
سكتت كال هسه راح ادزلك الولد يجون وياك لتبقى وحدك سديته محجيت شي وما بيه اصلا احجي وانعادت نفس المأساة من سويناها عمليه لراسها رادو دم خابرت ولد عمي كتلهم من مصرف الدم محتاج بطاله دم للمره جيبو ٤ او ٥ بس خلي واحد يجي بساع يتبرع ما نلحك وخاف متلكون صدك اجا واحد والثاني راح لمصرف الدم
طلعت الدكتوره تركض صاحت النه كالت انته زوجها وقع على مسؤوليتك اذا صار شي بيها احنه ما علينه لان هيه اصلا حالتها حرجة كتلها شي مثل شنو كالت اَي شي وقع على مسؤوليتك شكيت الورقة وكمت اعيط كتلها اذا صار شي بيها بكد الشعره اوديج وره الشمس افتهمتي كامت تحجي وتعيط وتكول لو مو اخاف الله هسه اعوف المريضة واروح لغرفتي إني شعليه الصوج بيكم وين جنتو مخلينها وكومة حجي جا ابن عمي يركض جايب بطاله دم ٣ بس كال شكو افتهم السالفه واتفاهم ويه الدكتوره واعتذر منها وكللها اعذري تره منهار ومن هاي السوالف كوة طبت الدكتوره للصاله العمليات انوب راح يجيب. ابن عمي من يم التحليل لان سحبو بطل منه ورجعو وكالو خير وسولفتلهم عفراء واشتغلت الملامة وشلون ٣ التمورعليه وكامو يحجون وكالو بضرف ٤ اشهر دخلتها عملية مرتين شصار بيك ومن هالحجي وووووو كومة
بعد ما خلصت العمليه وطلعت الدكتوره كمت ملهوف واركض عليها مقبلت تحجي الي بسبب الي سويته فهمت الولد وعفراء كلتلها الثاني والله شفنا حيل تعبان ونبضه ضعيف كلش على ساعه ويوكف النبض ويروح هو هم احنه حاليا ذببناها الطفل الميت واستاصلنه الكيس وهذا راح نتابع حالته وانشالله ما بيها غير العافيه بس للعلم تره حالتها حرجة كوة سويتلها العمليه واختنكت اثناء العمليه رغم الاوكسجين كتلها زين دكتوره شلون وضعها هسه باوعت عليه ودارت وجها وحجت وية عفراء والولد كالتلهم حالتها حرجة واحنه حالياً خلينالها دم لان الحمدلله بسلامتها دمها مصفر وهيه حامل بتوم حتى الدم الي بجسمها ماصينه الأطفال عالعموم بعد ما يكملوها جوه حيطلعوها والطفل الثاني حييقى تحت المراقبه وراح نخلي جهاز نبض الطفل وقلبه على بطن الام ونتابع حالتها بس ارجع واكول إي شي يصير احنه ممسؤولين تره لان حالتها كلش حرجة حتى وضع الام بي خطوره واصلا معجزه الطفل الثاني بعده عايش شكلة متمسك بالحياه لان الي مثل حالتها وحاله الطفل من زمان مات واذا ضلت هيج تنقلوها لغير مستشفى يا اما بغداد او الشمال لان مثل متعرفون مستشفياتنا وضعها مو تمام وملوثه وقله الخدمات وعدم توفر الادويه الكافيه بيها والحمدلله على سلامتها وسلامة الطفل والعوض على الله بالطفل الثاني وها للعلم والشهادة لله اثناء ما سوينالها العمليه وشفنا بطنها جانت مضروبه عليها ومكان الضربه احمر ومبينه متاذيه لان مبينه أيد طابعه على بطنها ومو أيد ناعمة
راحت وكعدو ينتضرون زمرد تطلع اني ضليت واكف ما كدرت اكعد وأفكر منو الي ضرب زمرد على بطنها قابل هيه ضربت نفسها ممعقولة تسويها لان عاشرتها ٤اشهر وعرفتها منو سوة بيها هيج لازم أسئل ام علي اذا تعرف
شوي ربع ساعه وطلعو زمرد يبو حالتها حاله شكد تندمت بوكتها على الي سويته والله عاقبني بابني هالمرة كل روح ما ضاله بيها وعيونها جواهن سواد وصفره واباوع عليها ضاله بس العضم والجلد فوكاه ولا ذيج زمرد الي اول ما شفتها وجبتها ولو هيه بعدها حلوه بس عيونها كافيات بس تعبانه حيل هذا مرضها ووجعها وحملها اخذ نص عمرها
ورة ساعه تفاجئت بوجود امي وجيتها للمستشفى جايه هيه وزينب وعذراء ومره عمي اول ما شافتني طكت بجي ولطمت كالت راح وليدك فهد راح صكر (اخو فهد الي توفى) .....والطلايب كلها صارت من وراه .....😲
ادري على كولة زمرد حديقه مال حيوانات فهد وصكر
جان تكول امي كله من وره هاي الفصليه هيه كتلته هيه متريد تجيب طفل النه وتعمدت تكتله هاي المسومة سكتت ما حجيت لان اذا اريد ارد لامي تنلاص وياها بس ردتها عفراء وانفجرت بوجها وكالتلها يمة حرام عليج خافي ربج كافي يعني اخذتوها فصليه تريدون تموتوها صار ٤ اشهر اني من يمي ضجت ولعبت نفسي تنوموها بكتله وتكعدوها بكتله ما طبيت يوم اذا ما لكيتها تبجي ما يوم طبيت وشفتها تضحك رغم الي مات اخويه وحزام ضهري بس هية ما الها ذنب بالي صار هيه حتى ابن عمها الي كتل ابنج متعرفه الا كايليها هذا وهيه مو منا تدرين بيها من بغداد وتدرين بيها علاقتها مو كلش ويه بيت جدها وتدرين بيها كلش زين بكلشيت لحد هذا يومها رغم الاهانه الي حصلتها كلها وكل الي صار بيها ما جاوزت على احد علت صوتها على احد غلطت على احد شنو الي سوته بس كوليلي لو انتي تريدين مثل بيت فلان تنوميها بالكبور يله ترتاحين تدرين هسه اذا أمها كعدت واشتكت شنو تسوي بيكم كلكم حتى جدي الشيخ تذبه بالسجن عدج علم لو لا لان احنه عشاير همة قانون مو مثلنه احمدي ربج اهل أمها بعدهم ما اشتكو ملتهين بتهم وكومة حجي بعد انفعلت عفراء وانفجرت بوجها وبردت نار كلبي شوي كالتلها كافي يمة كافي انتي مره جبيره خافي ربج وحطي الله بين عيونج اني بتج وكرهتج على هذا عملج حامل وبطنها لخشمها ووضعها صعب كلش ومنومينها بالمخزن بدون لا بنكة ولا تبريد وهيه عدها ربو مزمن وتختنك بساع تكدرين تنامين بدون مكيف انتي هيه حتى بنكة ماكو وتالي الا اختنكت كلش وجان راحت بيها يله خليتوها تنام بالغرفة الجوه وبالشافعات ولخاطر الطفل يله خليتو مبرده الها كافي هذا شنو من ضَلم تره يمة باجر شبر وأربع أصابع ومن تروحين لربج شتكولين لله ها ترضين وحده من عدنه يصير بيها هيج ترضين انتي كوليلي لو احد راد يسوي بينه هيج او راحت وحده من عدنا فصليه شسوين تعاركت بالمستشفى وفككوهن البنات ولد عمي واني عيني على زمرد من الجامه اباوع عليها وعلى جهاز نبض الطفل سهيله دكت الف مره ما جاوبتها اخر شي داكة على امي وجتي تكول يمه شوف مرتك شتريد تكول ضروري اخذته ومالي نفس لا احجي ولا اسمع صوتها خليته على أذني وكتلها بدون نفس ها وجان تنفجر وشلون تعوفني وتروح واني عروس وهاي الدايحة السايعه الي بلا تربيه وبلا اصل جذابه وتمثل وعايفني كاعده وحدي ورايح وياها عالسريع تجي وتعوفها ميصير تعوفني واني عروس وجان انفجر بوجها كتلها دنعل ابوج لابو العرس لابو الخلفج لابو البلاني بيج لابو الي يريدج كلبه حقيره بت الكلب اليوم اوصل واني الج واعلمج التمثيل على اصوله طايحة الحظ لو بيج خير اليوم ضمي نفسج لان بس اشوفج كدامي اطلع بروحج واعلمج منو الي بلا تربيه وبلا اصل والدايحة وخليت وركعت الموبايل بالكاع صار طشار
وكتلها لامي من ترجعين كوليلها احسن الها لا تراويني وجها لا اوديها لجهنم ولد عمي جوي يمي وكالو على كيفك وضلو يصبرون بيه خلص اليوم وزمرد ما صحت فاقده ووضعها جان ابد ميطمن ووضع الطفل كذلك ضليت انتضر باي لحضة ينطوني خبر مو زين ويكولون مات الطفل
ضليت على كعده وحده لثاني يوم وعفراء بقت وياي ما نمت ولا غمضتلي عين وانوب كامت زمرد تفتح بعيونها رأسا الدكتوره تجي تنطيها مسكنات وترجع تنام سألناها كالت الكعده مو بصالحه هسه ابد واولها راح تنهار وهذا الشي مو زين ابد وعالاكيد نخسر الطفل ضلت زمرد نايمة وخلص اليوم الثاني واني ما رحت للبيت بقيت يمها وما كدرت حتى انام وخابرتني امي تكول شلون عايف سهيله وحدها وهيه عروس ميصير خلي احد يم الفصليه وتعال شوي اسبح وارتاح شوف مرتك وارجع عطت بيها وهم غلطت على سهيله وكتلها اذا رجعت للبيت ولكيتها الا اطلع بروحها خلي تولي لاهلها كامت تصيح ولك يمة عروس سبعتها ما طالعه شتحجي انته كتلها انعل ابوها لابو العرس وياها وسديته عفراء خابرها رجلها يكوللها ارجعي وجهالج هم ماكو احد يمهم خلي وحدة بدالج كالت اني ارجع وذا كدرت باجر اجي تالي خابرت الولد كتلهم واحد منكم يجيب ام علي تبقى يم زمرد لان عفراء حترجع نص ساعه اكثر واجت ام علي راحت عفراء اجى رجلها سلم وشاف وضع زمرد واخذ مرته وراح كعدت زمرد بس فتحت عيونها وأتذكرت وشافتني طكت بجي وتخبلت صارت مخبله فدنوب وتعيط وتكول ابني مات ابني مو وام علي تكوللها لا والله وداعتج بعده عايش حتى اسمعي النبض مالته شوفي الجهاز رابطي على بطنج علمود النبض مالته كالتلها ليش شبي ليش مخلينه الجهاز ليش بطني توجعني كالتلها مو الطفل تعبان وخامل وسوولج عمليه ولدلك توجعج بطنج كالت عمليه مال شنو ليش سوولي احجي خاله كالتلها مو جان اكو كيس صاير ويه الطفل وحجمة جبير فسولج عملية وذبو الكيس انتي مو تكوليلي خاله الطفل لسه متحرك هو هذا جان السبب لان طفلج خامل بسبب الكيس هذا والحمدلله سولج العمليه وخلصتي من الكيس وطفلج بعدة بس تعبان ومو زين عليج ولا بصالحج الأعصاب والانهيار لان اقل شي وتخسري يمة شوي سكتت بس ضلت تبجي وتشهك وتباوعلي نضرات كلها قهر وتأنيب ضمير وحقد وكره همزين ام علي كالت الها هيج وما كالتلها عالطفل الثاني خلت أيدها على بطنها وضلت تراقب نبضات الطفل اني اصلا كعدت بره ما بقيت يمها لان بس ابقى وتشوفني ادري بيها تنهار ضلت تحت المراقبه هيه والطفل وكامت تختنك هواي فخلو الها اوكسجين وأبد مذبو بقو على خشمها علمود ترتاح وسوو طبيعي علمودها وعلمود الطفل
يربي اذا درت بالثاني مات واصلا اذا درت جان بيها توم وراح واحد شراح تسوي والله تكلب عاليها واطيها
خلص اليوم والطفل تحت المراقبه بس الدكتورة تكول ماكو تحسن نفس وضعه وهذا الشي يخوف ديسوء ميتحسن
دعيت ربي كتله لجمتني بواحد وعاقبتني لا تلجمني بالثاني دخيلك ربي
بقت زمرد ١٠ ايّام بالمستشفى وسهيله سوت سبعه وما رحت ولا شفت اصلا كل كم يوم اروح اسبح واكل وارجع للمستشفى حتى ما ارتاح خابرتني أمها تحجي ورزلتها وكتلها قسما بالله اذا نفتح الموضوع مره الثانيه تلكين بتج باب بيتج ورقه طلاكها وياها سكتت محجت خليت وسديته بوجها وره العشر ايّام كدرنه نطلع زمرد بس وضع الطفل مو كلش تمام صح صار احسن بس شوي وهيه كامت اذا جر النفس على كيفها تخاف عالطفل
وديناها للبيت وسهيله كالبه خلقتها خايبه حشة السامع انتي والقندرة نومناها بالغرفة ووفرت أساليب الراحة لان ما اريد اخسر ابني وما اريد اخسرها هيه هم نومناها وودتلها ام علي اكل وهالمرة بالجبر خليتها تاكل لحم لان محتاجته وهيه سمعت مفيد للطفل ما عارضت بس ام علي تكول كوة جرعته اجتي عفراء وكعدنه نسولف اني وياها بالهول ومدد وراسي مخلي بحضنها وهيه تحجي وياي وتكول على كيفك كون صارت الك جرة إذن بعد كتلها اني بس خايف لا تعرف جان بيها توم و واحد من الجهال مات وذبته
غير تتخبل طبت سهيله جايبه جاي الي اخذته وكمت اخوط بي حتى اشربه وهيه كعدت يمي تفركلي او (تمرغلي) رجليه ضلينه نحجي اني وعفراء على زمرد كالت جسمها كلة مطكع ليش خويه هيج وبعدين تره تعبانه وحالتها يرثى لها تدري من دنطلعها من المستشفى وكومتها ترجف ما بيها حتى تثبت على رجليها كتلها لا هايهيه بعد خلي بس تجيب ابني بخير وسلامه كافي عليه ذاك راح حتى لو اضطر اشيلها و اصعدها للغرفه ابقيها هناك اهم شي تكوم بالسلامة نطت سهيله وجان تعيط اَي لا هايهية تصعد الفصليه بغرفتي وتاخذ راحتها واني هنا كاعده خراعه خضره مو وجان اندار عليها وأكزز ردت اضربها وكمت اعيط وعتيت رجلي منها وكمت اعيط واغلط استفزتني دفرتها برجلي بس ما ضربتها عاطت وكامت تحجي ما سكتت كمت عليها ردت اموتها بس صارت عفراء بيناتنه وعاطت بيها كلتلها امشي طلعي برة روحي لغرفتج كافي كوة طلعت وضلت دردم وراحت لغرفتها كعدت بالكاع واعد واصف كتلها لعفراء هاي هم بلاء الله ذبه عليه كالت كافي تحمس بروحك راح تموت عوفها خلي تولي ورة شوي كمت طبيت لغرفة زمرد شفتها نايمة ولازمة بطنها تخاف عالطفل اتصورت راح تكرها لان اني ابو بعدها رحت مددت بالهول ما الي نفس اصعد حتى لغرفتي من وره سهيله شكد مكروها غير جدي راح بلاني بيها كرايبك وبت عمتك وحاجزها الك
مرن يومين امي ضايجة لان زمرد نايمة وتحسنت معامله البيت شوي وياها ومتشتغل زين هيه شتشتغل وهذا حال وضعها أجت عمتي عساس تشوف سهيله وضلت تحجي على زمرد وتغلط واشكال وتكول اهتم بسهيله هيه الاصل ومن هالحجي ومدري شنو
&
............
زمرد: من بعد الي صار وطلعنه ورجعنه للبيت واني خايفه عالطفل حتى من الهوى اخاف حتى من اجر النفس على كيفي يعني خاله ام علي جابتلي اكل تكولي اكلي كتلها اخاف عالطفل خاف يضايق كامت تضحك كالت عاد مو لهدرجة هو اصلا محتاج اكل وتغذيه لان هو بنيته ضعيفه وتعبان كمت بكلشيت اسوي اخاف عليه احس تعلقت بي هو قطعه مني من روحي حتى من اروح للحمام على كيفي امشي اخاف عليه وأمشي ولازمة بطني كلش تعلقت بالطفل وقررت اذا جان ولد اسمي دلياز اسم غريب بس كولش عاجبني وحلو واذا بنيه ليان فمن كالتلي خاله انو عارفين جنس الطفل ولد كتلها اسمي دليازلان اني كلت ابني اسمي دلياز جان تكول عيني فهد يريد يسمي على اسم اخو المرحوم باوعتلها بانزعاج كتلها وشنو اسمه بالله كالت صكر كتلها شنووووو كالت اَي والله كتلها ادري أسامي لو حيوانات مفترسه عدنه كالت وج اشش اسكتي كتلها والله لو يموت اصلا اني بس اتحسن وترجعلي صحتي انهزم ثقي بالله ما ابقى دقيقة هنا كالت كيفج يمة ما ادري بعد والله لثاني يوم بليل اني كاعده ومددة وحسبه تجيبني وحسبة توديني وأفكر كتلني التفكير واكول اذا شفت امي شنو اول كلمة راح اكولها الها شنو حيكون رده فعلها شنو اول شي حيجي بالي اول ما اشوفها شنو اسوي وشنو انطق اول شي وشنو وشنو او هذا التفكير الي ابد ميفاركني ابد معقولة شنو الي يخلي امي تعوفني ومتسال عني كل هاي المده اني وأفكر واحجي وية روحي انفتحت الباب ودخلت سهيله مثل المخبله وكالت ولج اني أترزل من وراج ولج حقيره سافله ادبسز بت الشوارع والله الا اخلي يموتج وهذا الي بطنج الا اوكعه مثل ذاك مفهمت شنو تقصد بذاك منو هو بس حلفت وتوعدتلي تموت الطفل لأنو تريد اول طفل لفهد يطلع من بطنها مو من بطني وابن فهد الجبير يكون ابنها والله مخبله على تفكيرها هذا بس خوفتني لان حقيره وغداره وكلشيت أتوقع منها بسببها وصلت لهاي الحاله هسه اني كمت اخاف على طفلي بالزايد فهد ما شفته من الي صار لحد هسه عدا من طلعنه من المستشفى ورجعنه للبيت وانواب بليل احس عليه يجي يشوفني ويلزم بطني بس كرهته حيل وكلش مرت ايّام شوي حالتي تحسنت وكامو الحمدلله ميخلوني اشتغل وميغلطون ويطبون ألي للغرفه حتى لو اموت ما يوصلون الي شوي خف الحمل عني وارتاحيت لحد ما صار اليوم الي كرهته وكرهت حياتي بي وكرهت المحافضه الي ساكنين بيها بيت اهل بابا وفهد ، مثل كل مرة ام علي جابت الي الغده صاح جدهم يشوفني مو حبا بيه بس يكول محد واصل يمج ولا احد ماذيج نايمة بغرفتج ومرتاحة ولا واحد عليه بيج تحافضين عالطفل وتولدين بخير وسلامة وتنطينه وليدنه وبعدها الله ومحمد وعلي وياج وين تروحين ما النه لازم بيج بعد فديري بالج عالطفل وداري حتى وهو بطنج لا يصير بي شي تره اني اول الناس ما ارحمج وتردين نوب تخلفينه وليد يله تولين مرديت عليه ولا حجيت داريد اشوف منو ينطيكم الطفل اصلا هذا ابني وقطعه من روحي حتى لو اكره ابو شفت سهيله تتمضحك وتشاور بفهد وتباوعلي عساس دتغورني ورة ما طلعت من يم جدهم داروح للغرفه جان فهد ديطب للاستقبال وخرت من يمة وما حجيت وَيَا ابد وهو راح للاستقبال جان سهيله تكول لهناء وام فهد اني راح اصعد للغرفه عدنه حفله اليوم لحد يسويلنه ازعاج عود ضحكت هناء وجان تكوللها ابد محد يزعجكم ولا اخلي احد اصلا يزعجكم مرت اخوي اخذي راحتج كليبي وترد ام فهد تكوللها يمه اخذو راحتكم محد يزعجكم لتخافين تباوع عليه وتحجي وسهيله تباوع عليه وتضحك مرديت عليهن ابد رحت للغرفه تغديت كمت اجوع شوي هاليومين اكلت حسيت طعم الاكل غريب كلت يجوز اليوم خاله ممنتبها تعبانه شو ماكو دقايق وأحس معدتي كلبت روحي كامت تريد تطلع وبطني وجعتني حيل احس تزوهرت رأسا اختنكت اريد اجر النفس ماكو كمت ابحث بمكاني زادت الحاله عندي شنو السالفه كمت اوتجيت عالحايط وبس اشاخط اريد بس اطلع وأصيح احد او يشوفني احد ماكو ما بيه وصلت بألف يا علي للباب وجع بطني كعدني للكاع والعرك كام ينزل على وجهي شلال احس نار واشتعلت بجسمي فتحت الباب اني وكاعدة شفت ام فهد وهناء بعدهن بالصاله وأميره دتكوم دك تلفونها كمت كوة وصلت يمهن وأحس الهوه خلص وانكطع شافني باوعن عليه كالت ام فهد خيرج شكو ما بيه احجي ولا بيه أصيح بس ااشر الهن وشافن وجهي ينكط عرك وأشرت بيدي ورديت ااشر انوب بمعنى يصيحن لفهد جان تكول هناء ها غرتي من سمعتي محتفلين وتريدين تخربين الكعده عليهم لا حبابه ما حزرتي لو تموتين ما اصيحة عود عبالج بتمثيلج هذا تخربين عليهم الكعده تحلمين ما كدرت بعد اوكف زين قاومت لحد الان كمت كوة افتح عين وأغمض عين وأحس الهوا خلص بالدنيا كلها وهنه ماكو فايده وأحس دم نزل عليه كمت ما اكدر اتوازن وخلص كلشيت بيه شفت مزهريه مال ورد يمي سحبتها وكطيتها بالكاع كل قوتي بلكت عاد خاله ام علي تسمع وسلمتها بعد ما حسيت بشي ووكعت
