رواية زوجي يعشق اخري الفصل السابع والعشرون والاخير بقلم ساره الخفاجي
طلعوا الزلم وبدينة نشتغل بالبيت ونحظر ونرتب واخذتني عمتي لمحل قريب عليهم اشتريلي بدلة وواجر وياهة 6بدلات لان عاداتهم بالسبعه العروس تلبس سبع بدلات اختاريت البدلات الي عجبني وقستهن واخذناهن جان زوج نور ويانه بسيارته خلينة الغراض وراهة وصلنه لصالون سوتلي المكياج والشعر ورتبتني ورجعنه للبيت كعدت عالكوشة والعالم بدت تجي وتوصل ورة شوية طبت مرة بيضة عيونهة كبار لابسة شال وقميص وتنورة متروسة شوية حسيت بروحي اعرفها. من شافتني عينهة دمعت واجتي بوستني .
خالة ولاصغرن بيج بس معرفتج.
_حقج متعرفيني صار كم سنه مشايفتني ،اني امج ياروح امج ،شكد مشتاقتلج شكد ردت اوصلج ومكدرت.
_ظليت ساكتة بس عيوني تكت دمع شون لكتني هسة شمدريهة اني هم أريد اشوفهة واجتي يارب اني بحلم لو بعلم. .
_اسكتي لتبجين يمة لتنتبه عمتج ،عادل يمشي ويوصي يكول لتكولين انتي امهة عبالهم يتيمة .
_عادل ،عادل جابج ،شومكلي .
_خلاهة مفاجاءة إذا احد سال اني صديقتج او من كرايبج .
_ظليت ابجي وامسح دموعي حتى لحد ينتبه عليه بدت الناس تصفك ويغنون وموسيقى وهوسة وآني بالي يم امي ،امي اووف صار كم سنة مكايلة هالحجاية امي ،لوتدرين شفت بحياتي من بعدج يايمة ،بس أنتي عفتيني صح ابوية الله يرحمة مقصر بس تبقة البنية تحتاج امهة شكد متكبر تبقة بحاجة امهة .
جنه بهاللحظات نروي عطشنه بالعيون اني عطشانه لشوفتهة وحنانهة وهية لشوفتي ،اجتي عمتي كومتني ابدل البدلة الثانية كتلهة أريد كرايبي تفوت وياية صاحتهة وطلعت .
أول مفاتت سديت الباب وحظنتهة وظلينة نبجي .
مااعرف نبجي على البعاد الي اكل من عمرنة عالاشتياق عالسنين العدت واحنه مشايفين بعضنة
غيرت بدلتي وعدلت مكياجي بس بينت عيوني مورمة طلعت تلكتني عمتي شبيهة عيونج كتلهة طب مكياج بيهن وديحركني .
فتت للصالة ونفس الهوسة وصور وخبصة وعلى. هالحال بدلت 7بدلات وصار الليل وكل العالم تعشت وراحت ظلت امي تريد تنفرد بية مكدرت كتبتلي ورقة وخلتهة بايدي فتحتهة رقم تلفونهة ...وبوستني وراحت.
صعدت نزعت البدلة وفتت للحمام روحي لعبت من الهوسة سبحت وطلعت لغرفتي لكيت عادل ،،والظاهر المكتوب مامنه مهروب .
كعدت ثاني يوم ب6لان هذا قانونهم بلشنة بالريوك اني وتبارك من بين ميكعدون البقية ورة شوية اجتي نسرين .
هاي بعدجن ممخلصات شكد فاهيات .
_كومي أنتي يالشاطرة.
_وليش اكوم هذا شغلجن بلة تبارك معذورة حامل ،انتي العروس شبيج.
_مابية بس انتظر تكومين حتى اتعلم منج.
والله جان بعيني بس اني خطار وخالتي متقبل الخطار يشتغل.
_بلة هاي شتحجي وياهة هزيت ايدي وكعدت .
ورة شوية نزلوا الولد وعمتي شوهاي صبحت علينة وباوعت لنسرين يمة جنت اتمنى اصبح بهالوجه يومية بس القسمة بعد.
_مصار شي خالتي حبيبتي إذا تردين ابقة يمج ويومية صبحي بوجهي .
_يمة فديت اللسان الي ينكط عسل ،عين غطة وعين فراش واكيد هذا بيتج ميحتاج تساليني حتى تبقين .
كامت نسرين بوست عمتي وكعدن يتريكن ويبسبسن ويضحكن .
عادل خلص الريوك تقربت من اذنة وحجيت بصوت ناصي ..
أريد اطلع تقبل .
وين تردين اني اوديج.
اروح اشوف امي .
خوش حظري نفسج العصر من ارجع اخذج تجين انتي لولا صدك.
_لا وين تجي البيت مكلوب كلاب من حفلة البارحة من يساعد تبارك اني مكرمة .
_روح عادل الأسبوع الجاي اداوم .
_خوش الي يريحج وطلع.
لمينة الميز وغسلت اماعين الريوك ونظفت المطبخ وخليت الغدة عالنار صعدت خابرت امي حتى نلتقي لحگتني عمتي وين طالعه گتلهة عادل خابرني گلي حظري نفسج أكيد مقبلت بس سكتت عادل يصرف وياهة اجة عادل واخذني ومحد فك حلكة رحت شفت امي وظلينة ساعه نبجي ونذكر اني احجيلهة عن حياتي شون صارت ورة مراحت وعافتني طفلة 14 سنة عمري وهية سولفلي على حياتها وزواجهة الثاني وشون لعب بيهة لعب ومقبل تاخذني وياهة.
رجعنة والكل جانت وجوهة مدلغمة يابة شكو تبارك طرحت اخذنة من خاطرهة وكعدت شوية وياهم وصعد عادل اجتي عمتي ،كلة من وراج لوماطلعين وتعوفين الشغل عليهة جان مصار الي صار
،اني شعليه عمة هوة الله كاتبلهة هذا الشي
،اش اسكتي كلة من وراج .
عفتهم وصعدت ابجي شافني عادل ظل يسال شبيج وليش تبجين .
حجيتلة هز ايدة وكالي شيحجون لتهتمين أنتي عليج بية اني وبس وآني احبج وهذا شي كافي .
وحظني ،
بدت الايام تمشي وكل يوم مشكلة اطلعهة الي عمتي وصار شهرين على زواجنة .
وبيوم اجتني ،
اكلج شو أنتي لحد هسة محبلتي ،ومن ذاك رجلج هم ماعدج جهال ،خاف عاگر وطلگج ،
خالة والله مابية شي ،بس كلشي قسمة .
ظلت تسمعني حجي وآني دموعي تجري هالشي موبيدي ليش ميحسون ويسكتون ماكو مرة بالدنيا متحب يصير عدهة طفل ليش يضغطون عليه .
آخر شي كالت شون مااشوف قشمرتي ابني وكربستي نفسج بي لان متخلفين وهزت ايدهة وطلعت دتمشي بالممر جان تكول بصوت عالي ،موكتلك هاي بت خالك نسرين مثل الوردة شمالك ركضت على هالعاگر ماافتهم ساحرتة ممعقولة حب لاعيني.
عرفت سبب عداوتهة الي ظليت ابجي لحد منمت بدون مااحس على روحي لليل اجة عادل يكعدني ،
_بيش الساعة.
_ساعه 10صحي النوم.
_حييل هواي نمت .
_شبيج صاير شي.
_لامصاير عادي.
_هم سمعتج حجي .
_عادي غلس شخبار الشغل .
_الكل تسال عنج ،شوكت ترجعين.
_غير امك شوية تهدة إذا ارجع وهية مقابلة تزيد وياية وآني مالي خلك.
_براحتج ،بي ترة هية هيج ههيج مراح تقنع.
_ههههه أي عرفت نسرين السبب.
_منو گلج هههه.
_محد وحدي عرفت .
خلي اسويلك عشة أكيد جوعان.
_اي والله .
داگوم جان اوكع دخت رجلية متحملني .
_شبيج سمر.
_لان مماكلة شي هسة بس اكل يرجع ضغطي طبيعي.
_ليش تبقين هالكد مماكلة من اجوع اسوي لكمة واكلهة،شنو هالعجز.
_اي الله كريم ،بكلبي اكول هية تقبل غير تلعب طوبة إذا سويت شي بغير وقت المحدد .
رحت سويت بتيتة وطماطة تكلاه وكبة وزلاطة وصعدت نتعشة اني وعادل داكل أول لگمة نفسي كامت تگلب عفت الاكل وگمت عادل ظل يحجي عليه وثاني يوم اخذني جبر للدكتور يسويلي تحاليل .
واجاني طاير من الفرح .
_ها موكتلك فقر دم ،انت تكبر المواضيع.
_لج يافقر دم ،انتي حامل .
_لا الله عليك صدك دتحجي .
_اي والله .
بدون وعي من فرحتي شبگتة كدام العالم يارب الحمل لها والشكر جبرت خاطري وسديت الحلوك الوراي ظليت طول الطريق اردد الحمدلله الحمدلله .
وصلنة البيت وبشرناهم بس امه مفرحت جانت تريد حجة حتى تفارگنة .
مرت 4اشهر اني وعادل فرحانين ومن عمتي تريد شغل صعب مني عادل يسوي بمكاني لان يخاف يصير شي إلى أن اجة يوم تبارك صاحتني دتغسل الزولية رحتلهة گالت خلي نشيلهة اني وياج وهية موثكيلة والثكل عليه حيصير گلت قابل شحيصير شلت وياهة جان تكلي اوكفي لحظة عافت الزولية عليه وراحت تسد المي بهاللحظة وگعت وحسيت شي صار ركضت خابرت عادل وللدكتورة گبل وطلعت مهددة بالاسقاط ...
سولفت لعادل عالصار صار نار رجع للبيت صعدني ونزل ظليت اسمع عياطهم بالبيت صعدلي گلي حظري ملابسج على كيفج وممنوع تنزلين من الغرفة واكلج اني اجيبة .
ليش يمعود شكو .
راح نطلع منا لملمي غراضج لحد مالكة بيت.
_اكو بيت.
_وين.
_بيت ابوية نسيته ناخذ واحد من المشتملات نكعد بي .
خوش لعد خلي نخبرهم حتى يطلعون ونحظر روحنه بهالفترة .
مر شهر اني حابسة روحي بالغرفة لان عادل ميقبل انزل ومن بين مطلعوا الناس الي جانوا ساكنين البيت اجة اخذني سلمت عليهم من داطلع لأن كلت عيب .
جاوبتني عمتي ،الله لاينطيج ابني حيعوفنة على مود شكولج عاط عادل واخذني وطلعنة ...
بديت حياة جديدة وية عادل والله رزقني توم ولد وبنية سميتهم آمل وضياء ....
الحمدلله الله جازاني لصبري وتعبي ورزقني من اوسع ابوابة رجال يحبني واطفال يملون حياتي كملت دراستي بعد شريد اكثر من كل هذا ....
ورة كم سنة تلاگينة اني واحمد صدفة بمول هوة وية ابنة وآني وية عادل وجهالي هوة اجة سلم وحدة عادل صار نار رد السلام واخذني حتى نطلع من المول ..
جانت بعيون احمد هواي ليش ،،،هواي حزن .
بس كل الي صار بحياتي جان بسبب طيشة ونزواته .
كنت اتوقع اموت ورة احمد مااكدر أعيش السعادة حتفارقني للأبد بس صار العكس اني حاليا بقمة سعادتي وراحة بالي .
صح بجيت وتاذيت هواية بس بالاخير كسبت نفسي وروحي وتعلمت اصير اقوة .وهوة الي جان قوي وضامن حبي وسهولة الحياه بعدي ،تندم وديعاني اكثر مما اني عانيت...بالختام
ماتنسد باب ويضيع طريق الا تلگة ألف طريق وباب ينفتح بوجهك ...عمرة الانسان مامات ورة انسان راح ومن طبيعة البشر يتاقلم وينسة ويواصل ويكمل.
والمرة بطبيعته قوية ،قوية كلش رغم كل الضعف الجسدي والضعف الي المجتمع يقيدهة بي ويخليها تصدك انه هية ضعيفة ومتكدر ،هية قوية قوية بارادتها قوية بقراراتها قوية ببناء حياة جديدة من صلبهة فلتخلين اي انسان يبين الج انتي ضعيفة او متكدرين ،اثبتيلهم العكس .
إذا جنتي متعرضة لخيانة لتبجين عيشي لنفسج لاطفالج الحياه مو فقط رجل يكون بيهة .
كومة نساء بمجتمعنة يعتبرون الطلاك مصيبة وميكدرون يتخذون هالخطوة ،حتى وان مكدرتي تطلگين ،ابني نفسج من جديد صيري انسانة جديدة قوية أول خطوة تسويهة باشري بتحقيق احلامج الي تخليتي عنهة لسبب او لاخر ادرسي اتعلمي اقري واصلي اجتهدي ثابري حتعبين بس اطفالج يستحقون منج اكثر مما تگابليهم وتبجين على حياتج او على انسان مقدرج يستحقون يكون عدهم ام يفتخرون بيهة قدوة الهم تحدت كلشي حتى وجع گلبهة في سبيل توصل فكرة لاطفالهة .
الياس والاستسلام عمرة مجاب نتيجة غير الدمار للنفس وللحواليهة ...
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
