رواية ارهنت عمري الفصل الثامن والعشرون 28 بقلم نورا ناصر

حِدة الصوت وسمارك !

طولك ونبرة ضحكتك، 

والحچايات الحنينة ..

المنها صرت اعشگ لهجتك،

شنسّه منك ؟ ♥

رفعت ايدي الزم ايده وانه اتوسل بي 

واباوع لام فخري شلون تسرسحت وطلعت من يم الحمام وانه بقيت وحدي انازع .

كتله والله من فترة دريت من بعد ماطلكتها يله عرفت وروح امي . 

ظل يهز براسي حيل بكل قووة وهو قابض على شعري ابين اصابعه ومن بين صرير اسنانه 

كال وشون تجذبين عليه توا وتكولين جنتي يم عمتي وانته كاعدة تدكين فج ويا عياش ؟؟  

عفيه اخر مرة جاي تأذيني فدوة وخر عني ترا والله اكول لابوي عليك بس يرجع انه مامسويه شي حتى هيج تسوي بيه . 

رفع راسي حيل حسيت حتى رجليه راح ترتفع من ع الارض ، لزمت ايدي قوي راح تنشلع فروة راسي

كال وفوكاهه تهددين ولج حضري روحج الاسبوع الجاي ترجعين لرجلج افتهمتي ؟؟؟ 

ماااارجع وابوي ماهوا هنا يرجع ابوي يله انته تتصرف لا بكيفك ترجعني . 

من هيج كتله كام يدخن من العصبية 

شال راسي وركعني بالمغسلة 

وترك شعري ومادري شنو ظل يدردم لان صوته صار بعيد بالنسبة الي .

الضربة شبه فقدتني وعيي بقيت سانده راسي ع المغسلة ، واحس رطوبة براسي اباوع ، افتح واسد بعيوني واشوف المغسلة صار لونها احمر . 

انصدمت و تناثرت الدموع على خدودي واحس بحمم تتدفق بداخل جسدي النحيل وروحي المعذبة .. 

نزلت باستسلام للكاع واتلمس راسي واتحسس رطوبة الدم الي مطوقتني ، حسيت بخطوات يمي .

رفعت راسي اشوف بس غواش ، الحجية جايه 

بمحرم الصلاة وصوتها يوصلني تحجي 

بهلع شصاير شصاير جنت اصلي كوة كملت صلاتي 

شبيج ميسم شجاج رفعت راسي شافت الدم على وجهي صااحت يبوووي .. 

على صوتها اجت وردة وام فخري .. 

ركضت وردة كرفصت يمي وتبجي عليه 

وام فخري واكفة الحجية 

تسال هذا حاتم هيج سوا بيج ميسم احجي ؟ 

وردة كالت عمه مو وكته هسه شوفي الدم اخذها اخذ خلي نغسللها ونشد راسها بلكي ينكطع . 

كومتني وردة وغسلت راسي بالمغسلة تبللت ملابسي وحسيت ببرودة قاسية احتلت اطرافي .. 

اخذوني للهول وشدو راسي بس الدم ماانكطع 

ظل ينزل على وجهي . وانا ساكتة وبس دموعي تنزل . 

الحجية تتوسل بيه تريد تعرف شصار 

وانه بس ابجي واعصر باصابعي 

وام فخري ماقصرت كتتت الاكو والماكو 

وشويه ملح وبهارات هم خلت سوتها دراما يعني 

من اول ماوكفت يم عياش بباب الاستقبال مالتهم 

وكل الكلام الي انكال لحد ما شافت حاتم جاي يضرب بيه يم الحمام .

طلعت سامعة كل كلمه كالها الي عياش . 

خافوا عليه كلش ووضعي محتاج مستشفى 

الحجية سالت على حاتم 

ام فخري كالتلها شفته حرك سيارته وطلع ..

خابروا على حاتم حتى يجي يوديني للمستشفى 

هه ضحكت من ظلوا يخابرونه وتمنيت مايجاوب او مايجي تمنيت يخلص دمي واموت واروح يم امي مشتاقة الها اريد اخلص من عذابي ، تمنيت اموت مثلها مقتولة ، مظلومة . 

وفعلا حاتم ماجاوبهم ، اتصلوا على عياش واسمع الحجية تكول عياش طالع كال هسه يجي بسرعة مسافة الطريق همزين جاوبني جان منو يوديها . 

باوعت للحجية بنظرة رجاء وحاجيتها بنبرة الم وتوسل : يمه فدوا لاتكليله حاتم ضربني ، كليله طحت حادث اي شي خوش . 

تحسرت وحجت راح يتخبل حاتم ماظل عقل براسه 

يربي شلون وشراح يخلصه من هاي الحالة . 

وردة كالت وميسم شنو ذنبها يطلع عضلاته عليها عمه احجي وياه مايصير هيج خطية شوفي حالتها هيه هاي حالة بلله اكو واحد هيج يضرب اخته ويخلي دمها بطولها شخلى للمجرمين والقتلة ؟ 

الحجية : جاوبتها والله جنت جاي اصلي حتى مادري شنو كلت بصلاتي من سمعته يصيح . 

وردة كالت : انه ماسمعت شي والله جنت بالحمام بغرفتي جان طلعت وكفت بوجهه وماخليته هيج يسوي بيها . 

توجهت الانظار لام فخري وهي تباوعلهم بنظرات قلقة 

حجت ها شبيكم تباوعولي انه هم خفت وشردت بروحي العزيزة خاف احصلي طراك جا الروح هم عزيزة ع الواحد . 

سمعنه صوت هورن ، ام فخري جابتلي عبايه بسرعة

ولفوني بيها وراسي مشدود بالشال بس الدم بعده يتدفق . 

طلعوني للباب جان عياش نازل من السيارة وواكف بالباب اجه تلكانه .. انحبست انفاسي بلحظتها 

ونظراتي تجمدت وانه اباوع عليه . 

جان يباوعلي ب أسى كبير ، تقرب كم خطوة

وصار مقابيلي حسيته صار بمعزل عن الي حواليه

وعن العالم كله . 

كال بلهفة واستغراب شبيج ميسم ؟ شجرالج منو سوا بيج هيج ؟ 

هو كال منو سوا بيج هيج حسيته عرف احد اذاني 

انفجرت بالبجي .. والحجية جاوبت مكاني 

تعورت محد اذاها بس عجل فدوا يا ابو مهند 

خطية جاي تنزف . 

كال باستعجال اي اي يله يله تعالوا توجه قبلنا للسيارة 

كعدت ورا وبصفي الحجية وهو ساق السيارة بسرعة 

واسمع صوت حسراته يخترق اسماعي 

اباوع واشوفه يشيل ايده ويضربها على الستيرن 

معصب وبده يطير طير ويوصل للمستشفى .. 

والي يمشي كدامه يخبصه خبص بالهورنات .

وكلساع يلف على الورا يباوع علينا ويكول للحجية ضغطي ع الجرح لفيها عدل ، انوب يلف ويكول اتحملي مابقى شي راح نوصل . 

الحجية كالتله دير بالك يمعود راح تدعم خلي بالك ع الطريق . 

يجاوبها بتوتر ان شاءالله ان شاءالله لاتخافين هسه نوصل بسلام ان شاءالله . 

... عياش : من نظرات ميسم الي عرفت حاتم الجلب الساقط مأذيها المطي صاير مثل الحرمه ويستگوي على النسوان...

_ ميسم احجيلي هذا حاتم مأذيج مو ؟ صار شي بعد مارجعتي للبيت احجيلي وروح عمي الاستشهد بحرب ايران اذا صدك هو سوا بيج هيج بس ارجع للبيت اله البسه ثوب فخريه...

سمعت صوتها شهكت والحجية جاوبتني اخخخ يابو مهند حاتم راح يضيع من عدنه بسبب هلي ماتسمى الله لايوفقها .. 

جاوبتها : ومو بس هيه ترا حتى اخوي الخاين والله ماراضي عليه انه ولا جاي اتستر عليه بس احضى بي اله اطيح حظه وربج حجية طلعت ادور عليه ومن خابرتيني رجعت علمود ميسم . 

_ بعد شنسوي وكع الفاس بالراس مابيدنا على شي بس هو سعيد الله يسلمه هيه هاي سوايه يسويها وحدة خانتك ويا ابن عمك تروح تتزوجها ماراح تخونك مافكرت بهيج شي شنو من عقل وين راحت الغيرة .

_ هو انه بس خل احضى بي اله اصلخه بقندرة مرتبه انفضها على راسه وراس الي انطاه مرة قشمر طايح الحظ سوايته هاي ابد ابد ماراح تعدي بدون عقاب . 

ميسم : جنت استمع اله واناشغ وابجي مو من الجرح لا بسبب تصرف اخوي واحس ظهري مكسور وسند ما الي بعد حازم و ابوي بس هسه عياش هم ماقصر ...

وصلنا للمستشفى ودخلنه على الطوارئ 

دخلت و شافت الممرضه الجرح وفحصته..

وعياش فوك راسها .. 

الممرضه جانت شويه كبيره بالعمر وهم ماتتحاجى نترت بيه ذبي الشيلة 

باوعت لعياش وبلعت ريك ..

كام هو دار وجهه 

نزعتها خليتها ع النص واجت الحجية فتحت الشال من راسي .. 

لزمت راسي جاي تشوف الجرح عورتني وعطت وهو بسرعة دار عليها وكلها...حجيه علئ كيفج وياها ترئ متاذيه

هي باوعتله بطرف عينها وكالت ترا اعرف شغلي ماحاجة تعلمني ؟؟ 

اي ندري تعرفين شغلج بس ترا اذيتيها ماتشوفينها عاطت ..

زفرت نفس بقوة وكالت يراد الها خياط .. 

خلت عليه شاش وديتول ضليت لازمته...

كامت طلعت وانه رجعت الشال على راسي .. 

اجت وجابت وياهه المضمد ضلت تحجي وياه 

كلتله ضمدها هاي البنية 

اجه المضمد تقرب مني كال ...بالله اشوفها؟ 

عياش وكف بوجهه كله...ادري شنو كلساع واحد جاي شايفها انتم تضمدوها تسولها تسريحه ؟ 

المضمد جان شويه متعجرف رد عليه بهدوء بعد ما عدل نضارته الطبيه...رجاءا اخي هذا شغلنه لا تدخل 

رد عياش...لا بشرفك اكلك بعد عمك اشو انت عايش الدور زياده عن اللزوم وبعدين هو كله جرح بطول اصبعي لو مسوي عملية قسطره جان شسويت 

المضمد...تخلينه نشوف شغلنه لو شلون؟

عياش عدل غترته...هسه اكلك شلون...اولا يا وليدي انه ما ارضى عل حرمنه تطلع شعفتها للغرب ويضلون يخيطون ويخربطون بيها روح جيبلنه دكتوره وتعال انه منتظرك هنا

المضمد...شنو اشتغل عندك

عياش وبدا يتذمر : شلون طلابه هاااي عمي لا اريدكم ولا اريد دكتورتكم وهسه اشدن جرحها بوصله وتكفه شركم شهل مستشفئ لوين الحقنه بيها اعوذ بالله منكم ومن طبكم الما بي خير...

لزمني من ايدي...امشي يالله امشي يكول مو جاي يضمدونها جاي يصبغون شعفتها...

اخذني وانا مثل الثوله اركض وراه وابجي سحبت ايدي منه بعصبية .. 

الحجية تبعتنه وتحجي وياه ابو مهند وهسه شلون يبقى جرحها مفتوح ؟ 

_ لا حجية شون يصير امشي اخذكم للمجمع بي ضمادة للنساء احسن من هذا المضمد ابو اربع عيون مايتحاجى والله خاف تتأذى عدهم يشتغلون من ورا خشمهم . 

سكتت الحجية و صعدنه بسياره ..

وكفنه بالتقاطع ازدحام كلش وجان اكو طفل يبيع قماشات بازه يمسحون بيها جام السياره الوحده بالف وكفه عياش اشتره وحده..

اباوع عليها سواها نصين نزل فتح الباب الي بصفي ولزمني من راسي خفت منه وتنهدت وبعدها عرفته عين نفسه جراح اختصاص بعالم الطب وشد راسي بالوصله البازه...

باوعتله برفض وهو ابتسم كرصني من خدي 

فتحت عيوني ااشرله ع الحجية واعض بشفتي .

وهو ولا مهتم لاشاراتي .. 

رجع صعد بالسيارة ومشت السيارات واحنه هم مشينه 

الحجية كالت ابو مهند انت تعرف ميسم بعدهه على ذمة رجلها وابن عمها سيف .

جاوبها اي حجيه والرضا ادري وحتى سمعت هالكلام هذا من حاتم هم نفس الشي هم كاله .. بس هيه ماتريده ومو بكيف حاتم بكيفها وبكيف عمي .. 

كال جوابه بنبرة مقتضبه .. 

وصلنا لمجمع طبي ونزلنا جان المجمع انضف وارتب من المستشفى ماحسيت بخوف مثل بالمستشفى 

وجانوا شويه ويعزلون وازدحام ماكو مخلصين المراجعين تقريبا . 

اصلا انه من شفت الممرضة شون تنتر وتصيح والمضمد متعجرف تمنيت ما اسلمهم روحي 

وهسه همزين عياش جابني لهنا الله يحبني ..

اجت المضمدة ضمدت راسي وتحجي وياي باسلوب كلش حلو حتى ماخفت وارتاحيت وع البنج ماحسيت بألم ..دفع الفلوس عياش ورجعنا للبيت .. 

تمارا .. رضيت بالامر الواقع وقبلت نعقد محكمة بعد وعود من عمي وفيض يرجعولي ابني 

بس كلبي نار لهيبه يسعر بيه وماجاي ينطفي

على نبيل والي صار بي ..... 

وبعد الحاحهم قبلت اروح اسكن ويا فيض بالمشتمل مالته بس قبلها حاجيته كل من ينام بمكان هو وافق وكال لا تتوقعين اجبرج على شي انه . 

انتقلت ويا بس كلمن بحاله وحتى مرات احجي ويا بس على كد السؤال اي او لا .. 

طولت اجراءات الدعوة مال حضانة ابني امير 

حاجيته لفيض وتعاركت وياه وعصبت زودت بالكلام ادري مو ذنبه بس مابيدي شي انه نفسيتي صفر ووجودي ويا بنفس المشتمل مأرقني 

مية مرة اتاكد من قفل الباب عليه بالليل يله انام وارتاح ويهدا بالي . 

كعدت الصبح طلعت من الغرفة ، شفته مطبك فراشه والبطانية ومخليهن على الكرويته بالهول .. 

طليت ع الحديقة شفت ملابسه مالة البيت الي جان لابسهن البارحة مغسولات ومشرورات على الحبل . 

دخلت للمطبخ نظيف ومرتب ، باوعت للسطل مال الزبالة شفت كشور بيض معناهه مسويله ريوك

متريك وحتى غاسل مواعينه . 

اشوفه مرتب زيادة عن اللزوم ودقيق بكل شي وماشي على نظام يخليني اشك بي طبيعي ، بعد تجربتي ويا نبيل ماجان هيج ابد ، جنت طول اليوم الملم وراه .

ملابسه مواعين الاكل الي ياكل بيهن مايشيلهن 

فيض يختلف عنه اختلاف فضيع . 

طبخت وغسلت بس ملابسي لان فيض ماعنده اي ملابس وصخة ، يسبح يغسلهن ويا ويطلع شغلي خفيف كلش اصلا حتى البيت نظيف بس هيج كنست ومسحت الاخشاب ، خلصت و رحت يم اهلي شويه.

رجعت سبحت وجان الماي كلش بارد سخان ماكو 

صح الجو مو كلش بارد بس الماي بارد كلش ، طلعت ارجف واسناني تطكطك وحاضنه روحي وامشي . 

منزلة الخاولي على عيوني وعود متوجهة للغرفة 

دعمت بشي واجاني ريحة عطر 

وخرت المنشف بيدي الترجف وطلعت بس عين وحدة واشوفه فيض . 

كتله انه الخاولي على عيني و ماشوف ودعمت بيك انته شبيك هم ماتشوف؟ 

بقى فاتح عيونه ثواني عليه بعدهه خزرني بلا مايحجي وتالي توجهه للحمام .. 

وراها تمرضت كلش ضربتني انفلونزا وظليت بس اكح وبلاعيمي طبكن .. 

جنت كاعدة بالهول واباوع للتلفزيون 

هو اجه من الشغل وكالعادة طب للحمام 

سبح وغسل ملابسه وراح شراهم . 

وانه حضرت اله الاكل بالمطبخ 

شفته اجه اريد اطلع صاحني 

التفتت عليه وجاوبته نعم ؟ 

اتغده واوديج للطبيب مبين عليج مريضة .. 

جاوبته لا ما اريد اروح زينه مابيه شي ..

لا شون مابيج شي الليل كله تكحين اسمعج .. 

تنهدت وجاوبته لا فيض لا تلح كتلك ماروح مابيه شي كم يوم ولصير زينة ..

يا بنت الناس انه مسؤؤل عنج ليش تعاندين .. ؟ 

كلت هف درت وجهي ومشيت .. دخلت للغرفة وسديت الباب للعصر جريتها نومة احس الانفلونزا نايمة بعظامي . 

كعدت العصر شفته ماكو ، فتحت التلفزيون وكعدت اباوع ماكو عندي غير شغل ، فراغ وملل قاتل .

شفت باب المشتمل انفتحت وطب فيض 

وبيده علاكة بيضة ، خلاهه بصفي ع الكرويته 

بدون مايحجي ورجع طلع . 

اخذتها ، فتحتها بيها ادوية ، شراب مال كحة وبندول وكبسول .. غمضت عيوني وسرت قشعريرة بجسمي .. 

رحت اكلت لكمة وشربت العلاج ورجعت كعدت بالهول 

ورا شويه هم انفتحت الباب ودخل فيض وعاكد النونة مالة حواجبه كالعادة .

اجه يمي كال بصوت اشبه بالهمس بس هو مزعوج جان كلش كومي دخلي جوا بالغرفة .. 

كمت على حيلي اباوعله مخنزرة ليش بلله مضتيقتك بشي ؟ وبعدين شهالاسلوب هذا .؟ 

مد ايده لراسه غرس اصابعه بشعره تنهد بضيق 

كال اهووو شيسكتها عاد هسه ؟ 

فتحت عيوني اريد اباوع اله واريد اجاوبه 

توا جاي اكله شبييك و ..

كال اششش ويتلفت صوب باب المشتمل .. 

خله ايده على حلكي وسداه 

طوق خصري بيده ودارني 

صار ظهري على صدره 

تفاجئت شبي هذا اول مرة هيج يلزمني .. ويقرب منه هالقرب .. 

مشه بيه لحد باب الغرفة دخلني بالغرفة وتركني 

كتله شبيك شبيك ؟ 

كال اشششش سكتي صوتج عيب جبت صديقي يسوي السخان صوتج لايطلع ولاتطلعين عيب على مانخلص .  

طلع وسد الباب خليت ايدي على حلكي 

من الفشلة شكد عيب وانه احجي ويا والعلع بس الولد سمع صوتي لان من اجه فيض سمعت صوت حجي يم باب المشتمل والهول مايفصله شي عن باب المشتمل الرئيسي . 

بقيت بالغرفة واسمع صوت الدك بالحمام 

انقهرت عليه جاي يحاول مايكون مقصر وياي 

بس انه ما جاي اكدر اتقبله بحياتي ابد .. 

وراها بأيام اجه وانه بالمطبخ كال بلهجة رجاء 

تمارا اذا تكدرين حضري جايات اجو اولاد خالي ابو راضي .. 

كتله اي صار .. اول مرة يجون النا اقاربه بس اخته ميسم واخوه حازم ومرته وردة ومرة ابوهم اجو مرة وحدة تباركوا اله بعدها محد اجه بس مرات اسمعه يخابرهم ويسلم عليهم .. 

المهم حضرت الجاي واجه اخذه وراح 

بقيت كاعدة بالمطبخ لان اذا اطلع يشوفوني 

صوتهم يوصلني يحجون ويا فيض .. 

واحد منهم كاله فيض شنو رأيك تشتغل ويانه ؟ 

كاله انه شون يعني ؟ 

بالتنكر مالتك خوش شغلة وبيها فلوس .. 

_ وشنيه هاي الشغلة ؟ غير اعرف ؟ 

_ ها!!! بتهريب الگاز فد شغلة تغركك فلوس انته بس سلمنا التنكر مالتك ومعليك ... 

بقيت صافنة معقولة فيض يقبل بهيج شغل ؟

الفصل التاسع والعشرون من هنا