رواية قتل زوجتة وعشيقها ولكن الفصل الثاني بقلم ياسر عوده
لما سمعت كلام بنتي اتعصبت اوي، قررت اني لازم اخد حقها بايدي، وعلشان كده انا ماقعدتش، طلبت منها انها تستناني في البيت وماتتحركش، وسألتني انا رايحه فين قولتلها مالهاش دعوه ونزلت وقفلت عليها، وروحت على بيت جوزها، وهناك دخلت عليهم بالزعيق والتهزيق، انا هزقتهم كلهم وفضحتهم كمان، كنت فاكره انهم هيخافوا مني خصوصا اني هددتهم اني هروح انا وبنتي نعملهم محضر في قسم الشرطه، وقتها لقتهم مسكوني ودخلوني اوضه من الاوض، والثلاثه نزلوا عليا ضرب، ضربوني بطريقه متوحشه، حسيت ان روحي هتطلع مني، وسبوني بعد ما بهدلوني وقطعولي هدومي من كتر الضرب، ومش بس كده دوول خدوا مني التليفون وكمان خدوا مني البطاقه الشخصيه بتعتي علشان ماعرفش اروح القسم واعملهم محضر، بس دا مامنعنيش اني فعلا رجعت البيت وخدت صوره من البطاقه وطلعت على القسم، وهناك عملت محضر بالضرب للثلاثه، وحكتلهم على كل حاجه، وكمان عملت تقرير طبي يثبت حالتي وحاله الضرب اللى انا فيها، ووعدني امين الشرطه انه هيجبهم وهيرجعلي حقي وحق بنتي، وروحت البيت وكانت صعبانه عليا نفسي وقتها اوي، حسيت بالعجز لاني ماليش حد، حتى اخويا الوحيد سابني وهاجر بره البلد، من ساعه لما مراته ماتت سافر ومرجعش تاني من وقتها.
بعد اللى حصل دا بكام يوم انا لقيت حسن وامه واخوه جايين عندنا البيت، وكنت عارفه انهم اتمسكوا وباتوا ليله في قسم الشرطه، وعرفت بردوا انهم مانزلوش الحجز وانهم كمان عرفوا يوكلوا محامي يخرجهم من القسم بس بكفاله، بس الموضوع ماخلصش وهما لسه على زمه قضيه وهيتنطق الحكم فيها، وممكن يتحبسوا هما الثلاثه، وعلشان كده هما جولنا، بس ماجوش يضربونا زي ما حصل قبل كده وضربوني ومن قبلها ضربوا بنتي، لا المرادي الموضوع مختلف، هما كانوا عندنا علشان يستسمحونا ويرجعوا نادين بنتي عندهم البيت، كانوا جايين علشان يصالحوا نادين ويرجعوها بيتها، وطبعا انا كنت عارفه انهم كانوا جايين علشان المحضر اللى انا عملاه فيهم هما الثلاثه، وهما بيعملوا كل ده علشان اتنازل عن المحضر، اصل مش من الطبيعي بنتي تعيش معاهم في بتهم وانا هفضل سايبه القضيه ماشيه وممكن يتحبسوا، وعلشان كده لما جم عندنا انا مسحت بيهم الارض، كنت عارفه ان مافيش حد فيهم هيستجراء ويرد عليا او حتي يقولي كفايه، وكمان اللى كان مطمني اكتر اني قاعده في منطقتي وبين جيراني، يعني وقت لما يحصل حاجه اهل المنطقه هيتلموا عليهم ويقطعوهم، وبعد ما هزقتهم طردتهم وقولتلهم اني ماعنديش بنت للصلح، وعرفت حسن اني هرفع عليه قضيه طلاق وهاخد كل حقوق بنتي واولها الدهب اللى باعه علشان اخوه المدمن، وعرفته انه لو مارجعهوش هيتحبس بيه، دا غير طبعا مؤخر الصداق اللى هو كاتبه على نفسه، واللى ممكن عن طريقه احبسه على الاقل 3 سنين كمان غير الحبس بتاع الدهب والعفش كمان، وفي وسط كل ده الاقي بنتي نادين تتكلم وتقول:
-لا يا ماما انا عاوزه ارجع مع جوزي.
لما سمعتها بتقول ده اتقهرت منها، وقولتلها ازاي هي بتقول كده، وقتها قالت ان هي لسه بتحب حسن وعاوزه ترجع معاه وهترجع معاه فعلا.
وقتها حسيت ان لساني اتشل، ماعرفتش اقولها ايه، واللى اتكم حسن وقتها وقام وباس راسها وقالها:
-انتي طول عمرك بنت اصول، وانا مستحيل انسى جميلك اللى عملتيه معايا، انا واهلي غلطنين فيكي ورغم كده انتي عملتي باصلك.
وكمان امه واخوه وقتها اتأسفولها، ولقتها طلبت مني ادخل معاها الاوضه علشان تتكلم معايا لوحدنا، ودخلنا الاوضه سوي ووقتها قالتلي:
-انا يادوب مكمله شهر جواز، لو اتطلقت الناس هتقول عليا ايه، اكيد مش هيسبوني في حالي وهيطلعوا عليا اشاعات وكلام ما يعلم بيه الا ربنا، وعلشان كده لازم اروح مع جوزي.
-يا بنتي انتي عارفه هو جاي ليه، جاي علشان المحضر اللى انا عملاه، وبعد ما المحضر دا ما ينتهي هينتقموا منك، انا اللى عملته فيهم من شويه هيطلعوه عليكي، اقعدي معايا وسبيهم يتحبسوا ويتربوا علشان يعرفوا ان الله حق وان بنات الناس مش لعبه في ايديهم.
-انتي فاكره يا ماما انهم هيسكتولك لغايه لما تحبسيهم، طبعا مستحيل يسكتوا، هما لو اتأكدوا انك هتحبسيهم او هتحبسي أي حد منهم مش هيسبوكي، انتي ماتعرفيش ممكن يعملوا معاكي ايه، والمحضر مش هيحميكي والشرطه مش هتعين ليكي حراسه تمشي وراكي، علشان كده المحضر مش هيفضل مسكتهم كتير.
-طيب مدام انتي عارفه كده عاوزه تروحلهم برجليكي ليه؟
-علشان سمعتي وعلشان خيفه عليكي وعلى نفسي، انا لو روحتله بمزاجي، وانتي اتنازلتي عن المحضر اكيد هو واهله هيقدروا دا، واكيد الموضوع هيتلم وكل واحد هيعيش حياته.
انا سكت وقتها وسمعت كلامها، وقتها كان كلامها منطقي ووافقت انها تروح بيت جوزها، ولما راحت وبعد مرور اسبوع كلمتني وطلبت اني اتنازل عن المحضر، وسمعت كلامها بعد ما اتأكدت انها بخير وان كل حاجه تمام، وبعد ما اتنازلت عن المحضر كنت خايفه من ردت فعل جوزها واهله، بس ماحصلش حاجه، حسن واهله كانوا بيتعاملوا مع بنتي معامله كويسه اوي، ومر شهر واتنين وكل حاجه كانت تمام، حتي اخو حسن المدمن دخلوه المستشفى علشان يتعالج، ودلوقتي مر على الموضوع ست شهور ونادين كانت بتتصل بيا كل فتره وتقولي ان حسن بيعاملها احسن معامله وان كل حاجه على احسن ما يرام، وانا كنت نسيت كل اللى حصل بنا، بس ايه اللى حصل، ازاي حسن قتل بنتي، وازاي بيقولوا ان بنتي كانت على علاقه مع شريكه في الشغل انا مش مصدقه الكلام ده نهائي، اكيد دي لعبه هما لعبوها عليا وعلى بنتي، انا لازم ارجع حق بنتي وماسبهوش يضيع ودمها يروح في الارض.
انا استنيت اخد تصريح النيابه بدفن بنتي بعد ما اتعرضت على الطب الشرعي، ومشيت في اجراءات الدفن، وسترت بنتي ودفنتها، وتاني يوم انا روحت للنيابه، كنت عاوزه اقابل وكيل النيابه المسئول عن التحقيق، وعرفتهم اني ام نادين المجني عليها، وفعلا خلوني ادخله، ولما قعدت قالي انه كان هيبعتلي علشان ياخد اقوالي، وقتها انا حكتله كل حاجه، من ساعه لما بنتي اتجوزت حسين لغايه لما جالي خبر موتها، واترجيت وكيل النيابه انه يرجع حق بنتي، والحقيقه انا صعبت عليه ولقيته بيقولي:
-مش عاوزك تقلقي، لو بنتك ليها حق اوعدك اني مش هسيبه، ولما اوصل للحقيقه كامله اوعدك اني هجيبك هنا وهعرفك كل الحقيقه.
انا احترمته اوي وشكرته، وطلب مني اني امشي وهيعرفني بكل المستجدات.
لما روحت لقيت محامي من اللى ساكنين في العماره اللى عايشه فيها، شقه ايجار قديم ولقيته بيقولي:
-انا سمعت عن اللى حصل لبنتك يا ست ناهد، وانا جاي دلوقتي علشان تعمليلي توكيل علشان اتابع قضيه بنتك، احنا هنا كلنا عرفينك وعرفين بنتك نادين كويس الله يرحمها، ومافيش حد مصدق اللى سمعناه، وقررت ابقى المحامي بتاعك في القضيه دي مجانا بدون اتعاب.
انا شكرته طبعا ووافقت على عرضه، الحقيقه انا ماكنتش عارفه هو جاي علشان فعلا متأكد من براءه بنتي، ولا جاي علشان هي جريمه قتل ووسائل الاعلام ابتدت تتكلم عنها وعاوز ياخد اللقطه وبس، المهم اني وافقت وخلاص وعلى الاقل الاقي حد يعرفني اللى بيحصل، وهو بصراحه كان بشكل شبه يومي يجيلي ويعرفني كل جديد في القضيه، يعني مره جالي وقالي:
-نتيجه تقرير المعمل الجنائي والطب الشرعي طلع يا ست ناهد، واتضح في التقرير ان مافيش أي محاوله كسر او عنف في باب الشقه، يعني كل حاجه كانت ماشيه بشكل طبيعي، ومش بس كده المسدس اللى استخدمه حسن جوز نادين مش مرخص، ودي تهمه ليه لحيازه سلاح بدون ترخيص، والغريبه ان التحريات اكدت انه مش معتاد على حمل السلاح، ودا ممكن يحض افتراضيه ان كان عارف وهو داخل الشقه ان مراته معاها راجل مش زي ما قال في المحضر انه لما دخل اتفاجيء بوجود العشيق.
وفي نقطه مهمه اتذكرت في التقرير عارف انها حساسه شويه.
-نقطه ايه يا استاذ؟
-لقوا حمض نووي للمجني عليه التاني اللى هو العشيق داخل المجني عليها نادين.
-ودا معناه ايه يا استاذ انا مش فاهمه.
-معناه ان في علاقه جنسيه حصلت بين الاتنين فعلا.
وقتها انا اتفاجيئت وقولتله:
-ايه الكلام اللى انت بتقوله ده، الكلام دا مستحيل بنتي ماتعملش كده.
-اهدي يا ست ناهد، دي الحقائق اللى كانت مكتوبه في تقرير الطب الشرعي، ومستحيل تكون غلط.
-انت عاوز تقولي ان بنتي كانت على علاقه براجل وحسن دخل عليهم وقتلهم وخلاص على كده؟
-انا ماقولتش كده، انا بقولك كل النقاط المهمه في التقارير علشان تبقى عارفه كل حاجه، وكمان في معلوم هتانيه مهمه لو فعلا طلعت زي اللى في دماغي، القضيه كلها هتتقلب وهيكون في رد تاني على كل الاتهامات دي.
-معلومه ايه يا استاذ؟
-لقوا في خدوش وجروح على جسم نادين الله يرحمها، كان واضح ان الخدوش دي اثار تعذيب، وان سببها يمكن يكون سلاح ابيض، وطبعا كان طبيعي النيابه تسأل عن سبب الخدوش دي، اصل الزوج قال انه دخل على مراته لقاها في علاقه مع العشيق ووقتها مسك المسدس وضربهم بالنار وهما في السرير، وكمان المفروض ان العشيق ده حبيب المجني عليها يعني عمله معاه علاقه بالتراضي، يبقى ايه سبب الخدوش والجروح اللى على جسمها، واكد الطب الشرعي انها خدوش وجروح حديثه مش قديمه.
-انت تقصد ايه يا استاذ؟
-اقصد لو اللى في بالي صح، يبقى المجني عليها اجبرت على اقامه العلاقه، ومستحيل تتجبر بدون ما تكون تحت تهديد السلاح، ومعني الكلام ده انها ماكنتش زوجه خاينه وتم اغتصبها، وفي فرق كبير بين الاتنين.
كلام المحامي ريحني شويه، حسيت ان براءه بنتي ممكن تظهر، بس امتي هيحصل ده الله اعلم، وبعد مرور كام يوم لقيت المحامي جيلي وكان باين على وشه ابتسامه وقالي:
-عندي خبر بمليون جنيه يا ست ناهد.
-خبر ايه يا استاذه؟
-لا مش هينفع اقولهولك دلوقتي، السيد وكيل النيابه طلب حضورك في النيابه وقلي بشكل شخصي اني اروح واجيبك، وقالي انه عاوز يقولها الخبر بنفسه.
ماكنتش عارفه ايه اللى بيحصل، بس انا طبعا سمعت الكلام وغيرت هدومي ونزلت معاه، ولما دخلت لوكيل النيابه وقعدني انا والمحامي قالي:
-انا كنت وعدتك اني هجبلك حق بنتك لو كانت بريئه، وعلشان كده انا بعتلك علشان تسمعي براءه بنتك بنفسك.
وقتها لقيته طلب من العسكري احضار المتهم، ولقيت العسكري جاي ومعاه حسن جوز نادين، وقاله وكيل النيابه:
-عاوزك دلوقتي تحكي كل اللى قولته في المحضر الرسمي يا حسن.
ووقتها حسن ابتدي هيتكلم وقال:
