رواية زوجي يعشق اخري الفصل الثاني بقلم ساره الخفاجي
💔💔 انتي غيورة
رجعت للبيت اني والبنات جانن يحجن ويتناقشن بس مكدرت افتهم اي شي ومكدرت اسمع اي شي
جانت الاصوات والاعصار والغضب الي بداخلي اقوى جانت مشاعري مخربطة الف شعور بالدقيقة بين غضب يدفعني اروح اكتلهم ثنينهم واخلص منهم ومن خيانته الي ،وبين الحزن الي يگطع گلبي هيج تاليتهة هيج تاليتهة تخوني بعد كل هالحب.
بين خيبة أمل وفقدان الشعور بالحياة جان كل شعور يسحبني بدوامه تجرني لظلام دامس .
ماحسيت الا وفاتن ادگ بلطف على چتفي وتگلي ياحياتي لتفكرين هواية واظلمين نفسج واظلمي يمكن تكون مجرد زميلة بالعمل وياه.
اذا ردتي ومتحملتي اسالي حتى ترتاحين .
ابتسمت بانكسار ودرت وجهي بسرعة حتى امسح دمعة عيني قبل لتوگع .
لاحظن البنات انهياري وانه مهما حجوا مراح ارتاح ودعني وراحن.
دخلت لغرفتي وبدأت الحرب الي شنها عقلي بتساولاته الية وكل سؤال احاول. اجاوب عليه وابرر بس مااقتنع ويطلع سؤال ثاني مااكدر اجذب على روحي اني شفته شون يباوع عليهة نظراته حب مو زملاء وبس اني متأكدة من الي شفتي مستحيل عقلي حيقتنع بغير شي وهوة متاكد مليون بالمئة.
ظل المنظر يتكرر كدامي هوة والمشاعر الي حسيت بيهة بس گلبي جان يحاول بكل قوته يحارب افكاري ويقنعني الي شفته غلط يبرر ويطلعلي أعذار حتى اصدك الي شفته مجرد اوهام .
تعبت وقررت اواجهة وافتهم منه كل شي .
ومثل كل يوم من الاسبوع الي فات احمد تأخر وكل يوم يتأخر اكثر واكثر
ظليت انتظر رجعته وعيوني منشفت من البجي
وراسي احسة حينفجر من التفكير .
شكد احاول اقاوم وماابجي امسح عيوني واظاهر بالقوة مااريد ابين انكساري كدامة بس هم تغافلني دموعي وتنزل على خدودي بدون توقف وهذا الشي يخليني اجن اكثر .
ملازم ابجي لازم اصير قوية ،لازم اتغلب على ضعفي وياه لازم ولازم ولازم ...
بس الحقيقة جنت بهاللحظة أضعف من اي وكت مر بحياتي.
صار نص الليل يلة رجع احمد ومثل العادة ضحكتة متفارك وجهة وفرحان ولايمة ولايدري باي شي
شافني كاعدة على الجرباية وعصبية .
_شكو خير شوكالبة وجهج اليوم ،تعاركتي وية صديقاتج اليوم.
-بصياح لا بالعكس كلش جنت فرحانة لحد مشفت شي خلاني انزعج.
-شفتي بلة ،وهوة يبدل هدومة ومنطيهة ظهرة.
-منو هاي البنية الحلوة الشگرة الي طبيت وياهة للمطعم اليوم ،بعصبية ؟.
_بنية ،اندار حتى يشوف وجهي وتعابيرة ويعرف شيجاوب.
_بس جاوبني منو .
- شنو تغارين علية خبلة بعد كل هالوكت الي عشناه سوة وضحك باستهزاء.
- احمد حجاوبني لوتعرف شسوي.
-اي بلة شحسوين.
-گلي منية هاية البنية تخوني وياهة مو صح.
_ضحك بصوت عالي وباستهزاء لج خبلة هاي زميلتي بس من الشغل .
_زميلتك مو ولازم ايدهة.
_خطية تخاف تعبر وداساعدهة.
_ياعيني يابو گلب الحنين.
_لج خبلة هوة اني اكدر احب غيرج مستحيل .
گدر يمتص غضبي بكلمتين ويقشمرني بس الشك جان ياكلني من داخلي اعرف كلامه جذب.
عفته ورحت نمت بالصالة ظليت ابجي طول الليل عدت ايام وانا على هذه الحال لك اشعر بها وهي تاخذ من عمري ،بس الشك دمرني احسة يضرب بگلبي مثل سچين .
مر شهر من شفتهم ورغم كل محاولات احمد وتبريراته وجياته من وكت ويحاول يصالحني بس مكدرت انسه شكي بالي صار كدامي .
قررت لازم اشوفلي حل واثبت كلامه اذا كان صح راح اعتذر اله واذا لا ،مااعرف شسوي بحياتي ياربي ساعدني .
خابرت فاتن وگتلهة على الي بالي لازم اضع حد لشكي والا راح ادمر حياتي بيدي اذا جان مظلوم ،واذا جان شكي صح ماابقة مستغفلة ونايمة ورجلي بالشمس ماادري .
فكرت هواي. وبدينة نحقق يوم بعد يوم اكثر نراقب احمد وين يروح وين يجي ويامن يحجي .
من جنت اسأله جنت احس بي يضوج ويعصب وغالبا إجاباته تكون باردة مما يزيد شكي اكثر.
وبيوم سألته مثل كل مرة وتفاجأت بردة .
_صرخ مامليتي ماتعبتي كل يوم نفس الاسئلة صايرة متنطاق غيرتج كافي بعد مليت وعافني وطلع من البيت.
گعدت ابجي واعيط واكسر شكو شي يجي بايدي الحزن والغضب والشك احتلوا حياتي الي جانت سعيدة .
اصعب شي بالحياة من تشك بشي ومتكدر تتأكد شكك صح لوخطأ ،الشك يبدي ياكل داخلك يسمم روحك يبعد عنك كل طمأنينة تحس بيه.ويستمر كل ثانية يكبر ويكبر ويتغذة على التسأؤلات والحيرة ومينتهي الا بالحقيقة .
خابرت فاتن وسولفتلهة عالصار.
فاتن بنية خلوقة ومرحة تحب تساعد الاخرين وتنصح وتوجه الإنسان الي متيه مسار حياته .
مرت بصدمات بحياتها خلتها تصير قوية اكثر وتواجه اي مشكلة تصير بطريقهة.
عكسي تماما قلبي ومشاعري تمشيني اتندم على قراراتي مااعرف اصرف اذا واجهتني مشكلة
اجتني فاتن وبدت تعيط عليه بغضب وعصبية
_شنو هاي ،ضوفي شلابسة شبيج ميتلج احد امشي امشي غيري هدومج بسرعه ووسبحي وجهزي نفسج حتموتين نفسج بسبب شك .
هسة حنشوف صدك زميلته لولا .
