رواية اميرة الزين الفصل الثاني
نورا: ده تفكير غلط.
محمود: كفايه يا بتي، خلاص اللي حصل حصل.
حليمه: اوعاكي ف يوم تجيبلي عيل بجصه ولابسلي حلج وتجولي اتجوزه، والله يكون بجطع خبرك.
نورا: ريحي روحك، انا مبفكرش ف الجواز من أصله.
حليمه: طاب جومي من جدامي بدل ما احدفك بطبج الشوربه، خلفه تجيب الضغط أن كتي انتي وله خيك.
محمود: انا رايح اجعد مع الرجاله ف الجامع الكبير.
نورا: هو صح يا أبا، جدي هو اللي بني الجامع الكبير.
محمود: اه امال ايه.
نورا: الله يرحمه.
اما ف القاهره، فكانت اميره تستعد للسفر مع اصدقائها.
محمد: بتلمي عزالك ورايحه علي فين.
اميره: طالعين دهب يومين كده.
محمد: مش ملاحظه انك بتسافري كتير.
اميره: بابي حبيبي، مش حضرتك يهمك سعادتي.
محمد: ما انتي عارفه اني عايش عشانك.
اميره: خلاص بقا.
محمد: طاب روحي ومتتاءخريش.
اميره: هما يومين بس وهنرجع انا والشله، بس كنت عايزه اخد مفتاح اليخت عشان نصطاد.
محمد: خدي رقم تليفون الريس محروس وهو هيعملك كل اللي انتي عايزاه، بس خلي بالك من نفسك كويس. هتسافرو طيران ولا بالعربيات.
اميره: بالعربيات طبعا عشان متعه السفر.
محمد: هبقا اكلمك كل شويه عشان اطمن عليكي.
اميره: اوك.
ليتركها محمد وينزل الي أسفل ليجد ناديه تقف أمامه.
محمد: ايه ده، واقفه كده ليه.
ناديه: يا بيه امانه عليك متخليش اميره تسافر.
محمد: ليه يا ناديه، هيا اميره صغيره.
ناديه: ايوه طبعا صغيره، وبصراحه انا بخاف عليها اوي، ده انا وعدت المرحومه اني مفارقاش ابدا.
محمد: ده لما كانت صغيره، لكن دلوقتي كبرت وبقت تعرف تاخد بالها من نفسها كويس.
ناديه: امرك يا بيه.
محمد: خليهم يعملولي فنجان قهوه وهاتيه علي المكتب.
ناديه: حاضر يابيه، بس في حاجه تانيه كنت عايزه اقول لحضرتك عليها.
محمد: خير.
ناديه: كل خير انشاء الله، اصل ياسمين خطوبتها الاسبوع الجاي وكانت عايزه تاخد اجازه يوم الخطوبه.
محمد: عال عال، وهتتخطب لمين الانسه ياسمين.
ناديه: لواحد من الحته عندهم اسمه صالح وشكله ابن حلال اوي.
محمد: وعرفتي منين.
ليسمعو صوت اميره وهيا تنزل من علي السلم.
اميره: ما أنته عارف يا بابي، داده اروبه كبيره.
ناديه: كده برده، طاب انا مخصماكي.
اميره: مقدرش علي زعلك وخصامك يا قلبي.
محمد: بطلي بكش يابنت، المهم يا ناديه ادخلي اندهيلي ياسمين.
ناديه: حاضر.
محمد: مش هوصيكي يا ميرو تاخدي بالك من نفسك كويس.
اميره: يوووه بقا، هو انا لسه عيله صغيره.
وهنا تدخل عليهم ياسمين.
ياسمين: أوامرك يابيه.
محمد: الف مبروك يا بنتي علي الخطوبه، اسمعي جهازك كله عليا من الالف الي الياء.
ياسمين: بفرحه كتر خيرك يا بيه، ربنا يخليك لينا يارب، ويبارك لك ف الست اميره.
اميره: ميرسي يا ياسو، هو الفرح أمته.
ياسمين: الخطوبه بعد بكره.
محمد: بس داده ناديه قالت الاسبوع الجاي.
ياسمين: ما هو حضرتك كان الاسبوع الجاي، بس اصل العريس رايح الجيش، عشان كده قدمنا ميعاد الفرح.
اميره: هتعملو الفرح فين.
ياسمين: عندنا ف الحاره.
اميره: واو، خلاص انا مش هسافر عشان احضر خطوبتك.
ياسمين: بفرحه بجد ياست اميره.
اميره: اه بجد، وكمان ليكي عندي هديه حلوه، طقم دهب.
ياسمين: بدموع الفرحه ربنا يخليكم ليا، ربنا يسعدكم ويفرحكم دايما يارب.
محمد: ياله ادخلي غيري عشان تروحي، بس قبل ما تمشي فوتي عليا ف المكتب.
ياسمين: هيا داده ناديه عارفه البيت عندكم عشان نيجي الفرح.
ياسمين: اه يا ست الكل امال ايه، ده الحته كلها هتنور وهتشرفينا، ربنا يعلي مراتبك يارب.
اما زين فكان يتحدث ف الهاتف.
زين: ايوه تمام، أمته، طيب ماشي، هكون ف الزمان والمكان، سلام.
ثم يغلق الخط ويغير ملابسه لينزل الي أسفل.
زين: امال فين الناس يا اما، اما نوره يا نوره، وه راحو فين، اخش المكتب اشوف ابوي.
ليدخل زين المكتب.
زين: انته هنيه يا أبا، وانا بدور عليكم، فينها امي ونوره.
محمود: راحو عند بيت خالك، جالو زهجانين جولت يروحو يفكو عن نفسيهم شويه.
زين: طاب معايزش مني حاجه.
محمود: له يا ولدي، كتر خيرك.
زين: طاب يا أبا عن ازنك اروح اشج علي الارض.
محمود: روح يا ولدي، ربنا يستر طريجك.
ليخرج زين ويذهب الي الأرض ليجد صديقه عدنان ف انتظاره.
عدنان: ايه يا عم زين، هو الواحد ميعرفش يجعد معاك واصل.
زين: يا صاحبي انته فاضي، وموراكش غير الرميح ورا البنته، ومش عاتج اي حاجه فيها ته مربوطه، وانا مفاضيش.
عدنان: جريت فيها يا اخوي اهو، ابوي حلف عليا لاتجوز يا يطردني من البيت ومن البلد كلها.
زين: احسن تستاهل، حلال فيك عشان تحرم.
عدنان: ده هجيجوزني ليلي بت أخته.
زين: والله خساره فيك، بت مؤدبه ومحترمه ومتعلمه.
عدنان: يا عم روح بجا، ديه مبتعرفش تجول كلمتين علي بعض، ودائما موطيه وشها ف الأرض، انا عايز واحده تجلعني مش ابله تمسكلي العصايه.
زين: ما انته ياما اتجلعت، ايه مشبعتش جلع، صدجني يا صاحبي الحلال مافيش احسن منيه، والابله ليلي هتمشيك علي العجين، والله فرحان فيك جوي.
عدنان: ياحظك المجندل يا عدنان، يا زينه شباب الجيهه.
زين: بتجول ايه، زينه شباب ايه، جول مفلوت شباب الجيهه.
عدنان: انا ماشي.
زين: خليك جاعد معايا ونسني.
عدنان: ما انته من وجت ماجعدت وانته عمال تهزج في.
زين: وانته تستاهل ضرب المركوب، هو في حد عاجل يعاكس واحده متجوزه.
عدنان: مين ديتي، محصلش.
زين: حصل، والوليه جات واشتكت منيك، وكانت هتعرف ناسها وجوزها وناسه، بس انا اتاءسفتلها وجولتلها انك مش هتعمل كديه تاني.
عدنان: ما انا معذور يا صاحبي، الوليه حلوه جوي.
زين: وبسببك طبعا خدتلي كلمتين.
ليضحك عدنان.
عدنان: اكيد خالتي حليمه جالتلك: مليكش صالح تاني بالواد ديتي، ده مفلوت وفاشل وسمعته عفشه، مشيك معاه هيضرك ياولدي، ديتي خلفه تجيب العار.
ليضحك زين.
زين: زي ما تكون كت جاعد معانا.
عدنان: جام عم محمود جالها: لساه شباب يا ام زين، بكره يكبر ويعجل، ربنا يهديه، الشباب كلهم كده.
راحت امك جالتله: والله ديتي لو ولدي لاجعد عليه افطسه واجيب أجله، خلفه الشوم تجيب لأهلها العار.
عدنان: يا ابوي علي امك ديه، محدش عاجبها.
زين: احترم نفسك بدل ما اعرفك شغلك.
عدنان: له وعلي ايه، انته يدك تجيله جوي.
زين: ايوه كده، وانته عريس ومعايزش الخبطلك خلجتك. المهم الفرح ميته.
عدنان: لسه شويه.
زين: ليه، ما خير البر عاجله.
عدنان: كلام ف سرك يا صاحبي، اصلك في بت ف المشتشفي زي الجمر، جايه منجوله من مصر، واخوك ايه كل يوم يروح بحجه اني بزور عمي.
زين: هو عمك تعب ميته، وليه مجولاش.
عدنان: عمي مين اللي عيان، ماهو جاعد ف بيته زي العفريت.
ليمسكه زين من ياقه جلبابه.
زين: يعني انته مهتحترمش نفسك، كمان بتعاكس الغرب. طاب يمين كبير لو جاتني منك شكوي تاني لأكون راميك ف المخزن ومسيب عليك الكلاب. ده انا جاعد ف البلد الم نصايبك، جري ايه فاكر نفسك مين انته.
عدنان: طاب البت ديتي وبس، أصلها حلوه جوي.
زين: سمعتني جولت ايه.
عدنان: بتاءفف طيب يا صاحبي خلاص.
اما في القاهره، كانت اميره قد ذهبت الي النادي.
سوزي: ممكن اعرف بقا لغيتي السفريه ليه وجمعتينا هنا.
اميره: عندي ليكم مفاجأة.
لولو: قولي.
اميره: اصل ياسمين اللي بتشتغل عندنا فرحها بعد بكره، وهتعمله ف حته شعبي، وانا عمري ما شوفت فرح شعبي، وقولت نروح نتفرج ونشوف الناس دول بيعملوا أفراحهم ازاي.
لولو: اوه مكان بلدي، انا مستحيل اروح، دول ناس لوكل.
سوزي: عارفه يا ميرو، انا حضرت فرح شعبي قبل كده، حاجه جنان موت، وبيعملو حاجات حلوه.
اميره: يعني هتروحي معايا.
سوزي: طبعا، وكمان هنلبس زيهم.
اميره: ازاي.
سوزي: انا لما روحت فرح بنت الساعي اللي عندي دادي ف الشركه، لبست حاجه اسمها عبايه، وفردت شعري وحطيت عليه اسكارف كبير، وبقيت شبههم. كانت مغامره ممتعه اوي اوي وانبسطت جدا.
اميره: وانا كمان عايزه اعمل كده.
سوزي: خلاص نروح بكره نشتري الحاجه، وكمان هنروح كوافير شعبي.
لولو: خلاص وانا جايه معاكم.
سوزي: بس خلو بالكم، مينفعش ولا واحده فينا تاخد الاكس بتاعها عشان ده عيب عندهم.
اميره: اوك.
لولو: طاب هنعمل ايه بقا، انا زهقانه.
اميره: تيجو نروح النايت.
سوزي: لاء، تعالو نعمل حفله باربكيو.
اميره: اوك، نطلع الهرم. اصبرو اكلم يويو.
سوزي: كل مره خروجه لازم يكون معانا.
اميره: غصب عنك.
لولو: اه طبعا، وهو احنا نقدر نتكلم. طلبات الليدي ميرو أوامر.
لتتصل اميره علي يسري.
يسري: قلبي.
اميره: حبيبي، اخبار طنط ايه.
يسري: بكره هتعمل العملية.
اميره: الف سلامه عليها، ده انا كنت عايزاك تيجي معانا، هنسهر ف الهرم عاملين باربكيو.
يسري: اجيلك يا روحي، اصلك وحشتيني اوي، ولو اني زعلان.
اميره: مين مزعل حبيبي.
يسري: مافيش عادي، ما انا طول عمري زعلان، منه لله بابا ضيع كل أملاكنا وسابنا انا وامي محتاجين.
اميره: وحياتي قولي في ايه.
يسري: حد جنبك.
اميره: اه البنات صحابي.
يسري: خلاص بقا.
اميره: طاب تعالي واتساب.
يسري: حاضر.
لتغلق اميره الهاتف مع يسري، ثم تراسله عبر الواتساب.
اميره: مالك بقا قولي.
يسري: مافيش، اصل المتبرع بعد ما اتفقنا علي ربع مليون كلمني من شويه وقالي عايز نص مليون، وبعد مش هيفضل فلوس للمستشفي، ومش عارف اعمل ايه.
اميره: هو ده بس اللي مزعلك، ولا تفكر حتي، حالا هحولك تلت ميت الف جنيه.
يسري: لاء طبعا، أنا تقلت عليكي اوي.
اميره: بتزعلني منك ليه بقا، مش احنا واحد، واهم حاجه طنط تعمل العمليه.
يسري: خلاص امرك.
اميره: المهم اجهز بقا وتعالي روح معانا.
يسري: لو حولتي الفلوس هروح لخميس المتبرع عند المحامي عشان ياخد فلوسه ويمضيلي بيهم وصل عشان يحضر ف ميعاد العمليه.
اميره: مش مشكله، الايام جايه كتير. باي يا قلبي، هحولك حالا اهو.
ليغلق يسري الهاتف مع اميره ليقول:
يسري: بت عبيطه اوي، صدقتني، بس انا برده مقنع.
وهنا تدخل عليه زوجته، نعم فهو متزوج من فتاه فقيره وله منها بنتا في غايه الجمال.
يسري: عايزه ايه.
نبيله: مافيش، بس اللبن بتاع تيا خلص وكنت عايزه فلوس اشتري لبن.
يسري: بتقولي ايه، العلبه مبقلهاش اسبوع.
نبيله: اعمل ايه طيب، البنت بتكبر، وكمان عايزين بامبرز.
يسري: نعم يا اختي، متلبسيها كوافيل وابقي اغسليها، ولا انتي اتشليتي. غوري اعملي فنجان قهوه ساده، واياكي القهوه تفور، هكبها علي وشك. الفقر ده.
نبيله: ليه كده طيب، انا عملت ايه. حرام عليك، كل ساعه و التانيه ضرب وشتيمه.
يسري: شكلك وحشتك العلقه، ما هو انتي كده مبتناميش غير وانتي متكسر عضمك.
نبيله: بخوف خلاص، انا اسفه، حقك عليا.
يسري: تعالي اتنيلي لبسيني الجزمه، خليني اغور من وشك بومه.
نبيله: مش هتشرب القهوه.
يسري: مش طافح.
ليتركها ويخرج صافعا الباب خلفه.
لتحتضن ابنتها وهيا تبكي.
نبيله: حقك عليا يا بنتي، غصب عني. انا عارفه انك جعانه، هعملك يانسون، علبه اللبن مفيهاش حاجه خالص، وياريت معايا فلوس كنت جيبتلك.
وبعد عشر دقائق من بكاء تيا المتواصل، تسمع نبيله صوت طرق علي الباب.
لتفتح لتجد البواب أمامها.
البواب: اتفضلي ياست نبيله، الدكتور باعتلك الطلبات ديه.
نبيله: شكرا، كتر خيرك.
لتاءخذ نبيله الاشياء وتدخل.
نبيله: الحمدلله، جابلك اللبن. هعملك الرضعه بسرعه اهو، ولا احميكي واغبرلك الاول. اهو ربنا هداه وجابلك بامبرز.
نبيله: ربنا يسامحك يا امي، رمتيني الرميه السوده ديه وروحتي اتجوزتي وسافرتي، وهو بيبيع ويشتري فيا عشان عارف ان ابويا ميت ومليش حد، بس ربنا اكتر الكل ويصبرني علي العيشه ديه، وياريت معايا حتت شهاده كان زماني اتطلقت منه واشتغلت.
نبيله: ياله اديني مستحمله عشانك يا بنتي، وبدعيله ربنا يهديه.
اما يسري، فها هو يجلس علي مقهي ويحتسي القهوه وهو يفكر في طريقه جديده لطلب أموال مره اخري من اميره.
يسري: انا لازم ابقا مليونير، طول عمري عايش علي الصدقه والإحسان. حتي تعليمي لو مكنتش اشتغلت واطحنت وطلعت عيني كان زماني ممعاييش اي شهادة وعايش علي السحت.
يسري: وبعدين ماهما معاهم فلوس كتيره اوي، اشمعنه انا يعني اللي شوفت الذل ف حياتي. انا لازم ابقا مليونير وادوس علي الناس اللي ياما داسو عليا، الجماعه الاغنيه دول منحلين وأولادهم زيهم.
ونتركه مع أحقاده ونذهب الي الصعيد، حيث كانت حليمه تجلس مع أخيها ناجي.
ناجي: ايه يا خيتي، عايزين نفرحو بالعيال، ولدي ياخد بتك وولدك ياخد بتي.
لترد عليه نورا.
نورا: انا هتعلم يا خال، مش هتجوز.
ناجي: والله عال، ياحليمه ربيتي ياخيتي.
لتصفعها حليمه صفعه قويه جعلت فهما ينزف دما.
