رواية ارهنت عمري الفصل الثالث والثلاثون بقلم نورا ناصر
وكل شي تم بسلام ، تطلكت منه بالشرع والقانون
وانا انتظر الخلاص من اخر قيود زواجي الفاشل
وهي اشهر العدة ..
اخذت ملابسي وطبيت للحمام فتحت الماي عليه وانحنيت اباوع على اثار العمليات الي ابطني ..
غمضت عيوني وانطلقت الافكار تزاحم راسي ..
يمكن لو ما هالعمليات جان هسه انه مسجونه مكان حاتم بس يم سيف ..
صدك الي يكول وجع ساعة ولا وجع دوم
صح توجعت بسبب الطلقات والعمليات بس هسه مرتاحة تطلكت من سيف وانفك وثاقي منه ..
طلعت من الحمام مشطت شعري ، عافيتي جاي ترجعلي شويه شويه بعد ماتعب كل شي بيه
وصفيت بس جلد وعظم .. شدة وخلصت والحمدلله .
نمت اخر ليلة وانا انتظر الصبح بفارغ الصبر
انتظر تطلع اول خيوط الفجر اكوم اصلي اشكر ربي واحمده على كل نعمه .
كعدت الفجر صليت وانه احس بالسعادة
واحس انقشعت اخر احزاني ..
بقيت اتكلب ما اكدر انام لحد ما كلهم كعدوا
طلعت من الغرفة ، رحت لابوي بالديوانية
شفته كاعد والحجية يمه رحت صبحت عليهم
وانه مبتسمة ، وهم من شافوني مبتسمة ضحكوا
سألتهم تريكتوا ؟ ....
الحجية كالت لا بعده الجاي على النار ..
_ انت خليج انه اكوم اسوي الريوك اليوم نتريك سوا
ابوي خله ايده على راسي يمسحه بحنيه ..
وانه كمت من يمهم وتوجهت للمطبخ
حضرت الجبن والكعك والاكواب ع الطاوله
وخليت البيض لحتى ينسلك ع الطباخ ..
وحضرت الخبز ..
اجت وردة وبيدها ابنها عمره ٥ اشهر حاليا ..
تمشي وتتثاوب كالت صباح الخير وتثاوبت
جاولتها صباح النور واخذت منها مهدي ابنها ابو خدود سايحة مثل خدود امه قبل لا تضعف وتصير رشيقة .
ظليت ابوس بي حييل ومااشبع منه هذا يصلح واحد يتريك بي شلنه بهذا الاكل كله كون ينشال ونتريك بمهودي .
كالت ولج البارحة كله مانام واليوم كاعد من الصبح موتني ..
جان جبتي يمي انه هم لوين يله نمت وهم كعدت على وكت ...
دخلت الحجية كالتلها انت ماتعرفيله ردي على نومته يرد ينام اذا انتوا نص الليل وكاعدين تلعبونه وتضحكون بي ..
جاوبتها والله عمه هذا ابوه مو انه بس يكعد يركض عليه يلعب بي ومن ينعس يشمره عليه .
طب حازم يدكم بازرار قميصه باوع لوردة وكال
: ذبتها براسي خو انت لازم تحطيني بالنص .
جاوبته والله ماكلت غير الصدك ..
_ يله يمعودة كلاص جاي تأخرت ع الشغل ..
انطيت مهودي لوردة ورحت صوب الطباخ وانه احجي
انتظر شوي نتريك سوا ..
اجه يمي : ها اليوم كاعدة وكت ومحضرة النه الريوك وجهج مورد ..
... ابتسمت .. اله ..والتهيت احضر الجاي ..
ام فخري كالت هنه بيضات وحطتهن بالماي وهذا كله جاهز ..
حازم ؛ جا شنتريك قوزي ؟ هنه بيضات جبنات كعكات والف الحمدلله والشكر ..
وردة كالت خلصت العدة نسيت انه اشوفج وفرحانه وكاعدة من وكت .. ..
استحيت كلللش ودنكت راسي ..
خلينا الريوك وكعدنا نتريك كلنا .. حازم راح على شغله ووردة راحت تنوم ابنها والحجية كامت تحضر للغدة وانه كمت اغسل مواعين وام فخري راحت يم ابوي وكعدت تسولف وياه .
كملت غسل المواعين ورحت غسلت وجهي
وبدلت ملابسي ، لبست كلبية بنفسجية طوخ بيها تطريز ذهبي بسيط ع الصدر وبيها خط رفيع اسود على طولها كلش نازكة ، خليت شال اسود على راسي .
وطلعت للبستان الجو شويه بي برودة بنص شهر ال ١١ .
ظليت افتر بالبستان واكص صور بتليفوني للزرع ولاظافري الي مصبغتهم بلون بنفسجي ومطولة اظافري ومحددتهم ، اخر فترة هواي صرت اهتم بنفسي وصرت احب نفسي اكثر بعد ما تحررت من قيود سيف .. قبلها جان القلق مسيطر عليه ومالي خلك روحي ..
افتريت شويه وفتت جوا ، رحت اريد اكعد يم ابوي
دخلت للديوانيه شفت يمه عياش .. تفاجئت سلمت عليه وانه مدنكة هو رد عليه اريد ارجع كال تعاي كعدي .
استحيت ورحت كعدت يمهم هم ظلوا يسولفون وعبالك غيروا كلامهم من شافوني ..
وكف وكال يله عمي انه اروح محتاج شي عمي ؟
..
كله ابوي سلامتك ..
_ من رخصتك بس راح اخذ ميسم احجي وياهه ..
اشرلي ابوي : روحي بويه ويا شوفي ابو مهند شنو يريد من عندج .
تجمع الدم بخدودي متتت من الخجل وكمت على حيلي ارجف وهمست وانه مدنكة : صار ..
طلع وانه طلعت وراه ، مد ايده وسد باب الديوانيه .
طخ بيه ابتعدت عنه شويه مشيت وراه طلع وتبعته وكفنه بالحديقة .
باوع منا ومنا وانه استرق النظر اباوعله وارد ادنك
صار صوته اشبه بالهمس : مشتاكلج من ساسج لراسج .
بلعت ريك وتمتمت : نعم ؟
كال : مشتاكلج من راسج لاظافر رجليج ..
صخام خجلت كلش كتله هو هذا الموضوع جا انه اروح .
اريد ادير وارجع ، لزمني من ايدي ورجعني ، نفضت ايدي منه بخجل وخليت ايدي على حلكي اكتم ضحكي .
كال : جنه جاي نحجي بيج انه وابوج ..
كحيت اخفي توتري وحجيت : ان شاءالله خير تحجون بيه ..
_ خلصتي عدة هسه حتى اجي اخطبج انه من حاجيت ابوج كال ظلت يمهه اذا وافقت هيه انه موافق ، موافقتي من موافقتها ورضاي من رضاهه .
_ اي بس هسه بعد وكت خلي تعدي فترة مو رأسا تجي تخطب فشلة من العالم هسه يكولون توها تطلكت وبسرعة تزوجت .
_ولج انه گليبي مجروح ومنتظرج تضمدينه .. ولج حبج هد حيلي رجعيلي حيلي بعد ما بيه صبر شنو ابقى بس اباوعلج واتحسر ؟ يمته تجين يمي ويمته يمتلي حضني بعطرج ؟
كلماته قويه لدرجة احس على اثرها قادرة على تحريك قلبي من اليسار لليمين وانجذبت نظراتي اله بدون مقاومة رغم الخجل الي مزاحمني .. سرت قشعريرة ببشرتي تضخ نبض حاير بشراييني حاولت يائسة التمسك بالوقار والسيطرة على نفسي لكن كان كل
هذا مجرد سراب .
ظل يباوع للمسافة الي بيني وبينه وماهي الا سنتيمترات قليلة كال يمته تنشال هاي الخطوات الي بيننا ونصير واحد .
وامتدت اصابعه الدافيه لحتى تداعب خدي لتهز كياني وتكهرب كل عصب بجسمي على اثر ملامسته لبشرتي
لمساته جانت دافية عذبه وايقضت مشاعر غريبة .
هذا الي كدامي مو عياش القاسي لا هذا الرجل الي عشقني من صدك .. انخفض صوته وصار اشبه بالهمس وتمتم بصوت اجش : حسي بيه عاد ولا تهتمين للناس ..
جان بنظرات عيونه شوق وحنين عمييق محتاج هواي لحتى يشبع شوف مني .. وتعمدت عيونه تمتلي بيه .
صارت نبضات قلبي تخفق بقوة وذعر ، احتاريت شنو اجاوبه ، بعد مااجاني لبغداد جان كلش متغير وحنين عكس ماجان قبل صار واحد ثاني تماما .
باوعت بعيونه بتوسل : فدوة بس شويه اصبر فد كم شهر .
عكد حواجبه ، برطمت شفايفي ..
ضحك كال ولا يهمج اصبر ميخالف ...
انفتحت الباب وطلعت الحجية .. تمشي وتحجي
ابو مهند هم زين لحكت عليك عندي موضوع وياك ..
_ كولي حجية حاضر انه امري وتدللي .
_ ابو مهند اخيك حاتم .
بحزن رد عليها : ها شبي حجية بي شي ؟
_ لا بس والله تعبان هو بالسجن ومتندم كد شعر راسه وانت تدري بوضعه بلكي تكول لخوالك يتنازلون مايصير هو بعده شاب يضيع حياته بالسجن وهو مامتعمد انت مو جنت واكف وشاهد على الي صار ؟
هز راسه بقبول : مايصير خاطرج اله طيب بس خلي ميسم تصير الي وبعدهه نطلعه من السجن .
باوعلي وضحك وانه ابتسمت ودنكت راسي ..
هو كمل كلامه : خاف يضوجنه ويهد علينه عاد اذا صارت مريتي ما له حق يفتح حلكه بعد اعرف شون اسكته وانه جنت مقدر وضعه الي صارله مو شويه .
باوعتلي الحجية وربتت على جتافي كالت الله يسعدكم ان شاءالله ميسم هم تعبت هواي اريدك تدير بالك عليها وان شاءالله انت ماتقصر وكدها وكدود .
ميل روحه وباسهه على راسها وكال تدللين حجية يطلع حاتم واحنه اخوة والله انه تبريت من اخوي على موده بس هو مصر يحملني ذنب اخوي .
_ اي والله بس يسأل عنكم من رحناله للسجن انه والشيخ وبس يسال على امك وعلى ميسم ومن كلامه ندمان والله والله يصلح حاله ان شاءالله .
_ الله كريم ان شاءالله نطلعه لا تهتمين انتي ..
_ ماتقصر ابو مهند ..
_ يلله محتاجين شي انه اروح تأخرت على شغلي .
_ لا سلامتك الله وياك ..
_ محتاجة شي ميسم ..
هزيت راسي مبتسمة وهمست لا سلامتك ، ابتسم بوجهي .. باوعتله شفته راح حسيت ببرودة مفاجأة تزحف لقلبي .. دخلت للبيت ويا الحجية ..
وكفنه بالمنور سألتني شنو كالج ؟
حجت وهي مبتسمة
خجلت ودنكت ... استحيت احجي ..
هي كالت ادري كالي ابوج بس انت شنو رايج ؟
_ ها ! أأأ ، بعده وكت هسه ..
_ براحتج ارتاحي يمه تعبتي انت والزواج لاحكين عليه
_ اي والله يمه تعبانه كلش ..
حضنت وجهي بيديها ، ابتسمت الها .
عفتها ورحت للغرفة ..
تمارا .. صليت المغرب ودخلت للمطبخ لحظات وانفتحت الباب وطب فيض اجه كعد على الكرسي
ومد ايده على ميز الطعام ، استغربت حتى ما سلم
هو بالعادة بس يدخل يكول سلام عليكم .
حسيت صوت انفاسه متخربطة او متعبة او بي شي .
باوعت لوجهه شفته بي اثار ضرب .
ظل يسحب نفس ويزفره ، يغمض عينه ويفتحه
انقهرت عليه ، رحت وكفت يمه هو مغمض صار خيالي
على وجهه ، فتح عيونه .
سألته ها شبيك ؟ منو مسوي بيك هيج ؟
عدل كعدته وظل يكح ويمسح شفايفه عن الدم
كال هذول ولد خالي ابو راضي هذا محمد تبعني
للمشروع وظل يتحرش وانه ماتحملته ضربته وهو خابر على اخوانه وتعاركنه .
يبوووي هذول شنو يردون منك ماكافي كل يوم مشكلة بسببهم .. يوم مشكلة ويه عمامي يوم يجون هنا ويصيحون شنو الي يردون يوصلون اله بالضبط؟
مادري تمارا مادري ..
شنو يعني ماتدري هيه خو ما دنيا سايبه اشتكي عليهم ..
ماريد مشاكل اكثر وياهم تدرين بيه انه مسالم ...
لعد خليهم يدوسون ابطنك هذول يراد واحد ينطيهم عين حمرة مبينين مو اوادم ..
لا عيب تمارا عيب ..
باوعتله بعدم رضى و رحت جبت ثلج وعصارة جروح وكطن ومعقم ورجعت للمطبخ ، خليتهن ع الميز الي كاعد بصفه هو ، جبت الثلج ودنكت عليه هو تفاجأ ظل يباوعلي مستغرب رمقته بنظرات عدم رضى
وخليت الثلج ع الكدمات وعالجت جروحه
غمض عيونه كاتم ابتسامه ، حسيته يتنفسني
انزعجت وتمنيت اخلص بسرعة واروح
ضجت وانه بقربه .
بقى كاعد بمكانه سويت عشى بسيط وخليت يمه
كتله كوم غسل حتى نتعشه ..
فتح عيونه كال نتعشه ؟ تتعشين وياي ؟
_ اي .. جاوبته ببرود ..
كام بسرعة غسل واجه وانه جنت كاعدة انتظره
لمن اجه كعدنه ناكل بهدوء ، اول مرة اتعشه وياه ..
كلما ارفع راسي اشوفه يباوعلي ..
كمت من الاكل واخذت الصحن الي جنت اكل بي وخليته ع السنك وبلشت اغسل المواعين ..
هو خلص اجه ورايه للسنك خله المواعين ع السنك
وكال عاشت ايدج .
بلعت ريك وجاوبته بدون ما اباوعله : تسلم ..
خلصت غسل مواعين انوب نظفت المطبخ جلفته جلف وانوب غسلته ورجعت رتبته .. غسلت ايديه ، ونشفتهم طفيت الضوه وطلعت ، شفته فارش فراشه ولابس شورت وفانيلا تعلاكه مدد رجليه وجذعه مرتجي على الكرويته الي وراه .
باوعتله بطرف عيني واريد افوت للغرفة
كال بصوت مخنوك بتردد وخجل : تمارا !!!
رجعت بخطواتي باوعتله وكفت اباوعله وانتظره يحجي يكول شنو يريد ..
اشرلي بيده ع الفراش الي يمه ..
خزرته واريد اروح اركض للغرفة ..
كام من مكانه ، لزمني من خصري وحضني وظل يجذبني اله .
برفض وانه احاول اتملص منه ، كتله وخر فيض
ماكدر اتقبلك اتركني ..
ماسويلج شي والله تمارا بس تعالي يمي نحجي .. او بس كعدي يمي خليني احس صدك انه متزوج
شنو نحجي مابيننا حجي وخر عني اريد اروح انام ..
حجيت هيج ودفعته من صدره ..
سحبني لحد فراشه الي بالهول وكعدت على الفراش وهو مثبت ايديه بيده .. لازمني من زنودي ...
باعي تمارا انا هسه زوجج الله يخليج تأقلمي وياي راح يصير النه سنه متزوجين واحنه على هذا الحال .
باوعتله بقهر : اتأقلم ؟ قصدك استسلم ؟
_ لعد شنو ؟؟ هيه هاي الحياة لازم تمشي ابنج يجيج والله بس صبري ..
_ فيض انه عندي حياة ثانية تنتظرني اتأمل ااا نبيل يصير زين هو والله يتذكرني زواجنا مجرد حبر على ورق لا تتامل مني شي فيض ما افيدك .
_ كافي تمارا كافي كافي تهينين رجولتي انت مرتي وعلى ذمتي وتحجين بزوجج السابق .
ترك ايديه بقووة وارتجى ع القنفة ويتحسر
باوعتله و حجيت : فيض نبيل يرجع يصير زين بس يتعالج يصير زين من تطلكنا جان مابي شي جان يتعالج متأكدة .
سكت عني ، جر باكيت جكايره وظل يدخن ..
تقربت عليه احجي فيض ليش سكتت مو جاي احجي وياك ؟
طفه الجكارة وقرب وجهه مني ركز بعيوني ..
افهميها تمارا انه زوجج انه ونبيل مريض مو بعقله ابد مايصلحلج زوج بعد ابد لاتتأملين هواي ثاني شي اهله مايردوج بعد افهميها عاد .
ظليت اشهك وابجي وانا كاعدة ودموعي تطيح بحظني .. تقرب مني رفع راسي بيده ..
ظل يحجي تمارا انه اريدج بحياتي
مليت تعبت وانه اعيش وحدي من صغير ابوي مات وامي تزوجت وعشت جوا ايد عمامي وتحت رحمتهم
اشتغل واحط بيدهم من تزوجت شويه كفوا عني هسه اريد كائن يملي عليه حياتي اريد احس انه عايش على هدف وصدكيني راح اسعدج .
بعدت ايده مني وعفته ورحت للغرفة ..
كملت بجي وكلامه يدور براسي
هو هم حقه انه منو يتقبلني بعد الي صار بيه ..
زين منه هو قبل يتزوجني ووعدني يرجعلي ابني وفعلا كل شهر يخلي بيدي مبلغ يكول جمعي للمحامي ..
مسحت دموعي ، بدلت ملابسي
لبست كلبيه ميديم وربع ردن رصاصيه
وطلعت من الغرفة ..
رحت شفته متمدد وعيونه ع السكف
جاي يدخن وصافن باوعت عليه ..
شكد قهرتني الجروح الي بوجهه ويه كلامه الي بعده بمسامعي ، اثنينه مظلومين ..
وخرت الغطه وتمددت بصفه خليت راسي على زنده
هو طفه الجكارة وسحبني ، خله راسي على صدره
خليت ايدي على صدره رفعت راسي باوعت بعيونه
كتله انت وعدت ماتسويلي شي ؟ بس خليني اتأقلم
مثل ماتكول انته ؟
هز راسه بموافقه ونظرات عيونه مشرقة وتشع بالامل ..
ميسم .. الكل طالب نعجل بالخطوبة التزمت الصمت وخليت قراري الهم هالمرة عسى ولعل اتوافق وانسعد
لان جربت قراري السابق وفشلت .. ماردت حفلة
ولا اي مراسيم بس عياش اصر اله حفلة مهر ونعزم اقاربنا .. خابرني وحجينه ..
كتله اثنينه متزوجين من قبل وسوينه حفلات وعرس وهالسوالف هالمرة مو اله بعد الغيها والله استحي ..
كال عيني ونظرها انتِ شبيج شايله هم للناس ، احنا الي راح نتزوج واحنا الي نفرح وبعدين انه اعتبر نفسي اول مره راح اتزوج وانت همين هيج اعتبري نفسج ماشي ؟
ضحكت وكتله تمام بكيفك وسوينا حفلة مهر وعزمنا اقاربنا وعقدنا سيد .. جان فرحان بيومها ، بس انه اريد اشيل راسي من الخجل ما اكدر وهو كلساع وكاللهم ابوسها ؟
وهمه بصوت واحد ومكيفين اييييي
ويبوسني على خدي وانه ماارفع راسي
احس خدودي راح ينفجرن من الخجل ..
اول ليلة بقينا للصبح نحجي بالتليفون .....
وراها عزمني ابيتهم ، طلعنا من الصبح
حللنه دم ومشينه كم شغلة من اجراءات عقد المحكمة
ورجعنه الظهر للبيت .. مستعجل ع الزواج كلش ..
تغدينه كلنا سوا وورا الغدة اخذني على صفحة
كال تعالي شوفي ، طلعنه من باب خارجي وجان
مشتمل بصف البيت توه مبني بس بعده مامخلص
بي غرفتين وحمامات ومطبخ وهول وبناء كلش حلو ومرتب ..
كال هذا بنيته لعفاف وبنياتها ، تردينه انت ؟
وخلي عفاف بذاك البيت ويه امي ؟ واحنه نكعد هنانه ؟
دنكت ماعندي اي اقرار ولا جواب ..
باوعتله كتله بكيفك انت وين مايصير نكعد
وعفاف اكبر مني هيه هم رأيها مهم ..
اذا تدارين امي مثل ماتداريها عفاف خلينه هنا بهذا البيت ..
احطها ابطن عيني والله عمتي فقيرة وانه احبها كلش
هيه هم تحبج وعفاف هم يتيمة ومالها احد.ومامنها اذيه ابد واخوي الناقص ظلمها وتعرفين الباقي واحنه ان شاءالله عائلة وحدة بس ردت اوسع البيت حتى يكفينه كلنه .
عوجت حلكي يعني جاي تختبرني ؟
كرصني من خدي وضحك : لا ولج لاتفكرين هيج ..
طلعنه من المشتمل كتله لاتنسى الجمعة غداك يمنه ..
يعني عازمتني مرتي ؟
اومأت اله براسي بمعنى اي ..
وشراح تطبخين الي ؟
انت شنو تحب ؟
بعدج ما تدرين شنو احب ؟ شو سنين عايشين سوا
والله مامركزة ...
جا على شنو مركزة ..
ضحكت بس على مداهركم انت وسميحة وعركاتكم ..
الله لايعودها هذيج الايام يمعودة انسيها لاتفكرين بسلبية فكري بالايجابيات الي بيه ..
بعدني مااعرف عنك شي ...
بالايام الجايه ان شاءالله تعرفين ..
بس لاترجع نفس عياش كبل من جنت تعارك وتكتل سميحة ..
انت لاتصيرين مثل سميحة ولا تخافين ولو انه اعرفج مو مثلها لذلك اختاريتج الج .
وصلني لبيتنه رحت نمت تعبانه .. للعصر كعدت جيكت التليفون ماكو لا مكالمات منه ولا مخابرة استغربت جان ماتتعدى كم ساعة اله يخابر يسأل او يدز مسج
كلت يله يمكن مشغول ..
لليل هم ماخابر ، كمت خابرته اول شي مارد
مالحيت هواي عفت التليفون وكعدت العب مهودي جان يمي وامه جاي تغسل ملابسه .
اجاني مسج منه فتحته باوعت كاتب
ها حبيبتي ؟ مخابرة عليه تردين شي ؟
ضجت شبي هذا ؟ مو هيج معودني .. بجه مهودي مت افتر بي وانطيته ممه وظليت امشي بالهول وانه لازمته ..
اجت الحجية اخذته مني ،
يمه مو هيج يتعود .. ومنو يشيله امه وراها شغل وانه ايد للبيت وايد للخطار ..
خلي يتعود انه اشيله عود ماعندي شي ..
ضحكت كالت انت وراج عرس وهم يصير عندج واق ويق وتحتارين بيهم .
ضحكت كلامها صحيح باوعت للتليفون اشو دز مسج وشرد حتى ماكلف نفسه يخابر شبي ؟ المشكلة اشتاقله واشتاق لسوالفه . يلله اروح اتفرج ع المسلسل مالتي يمكن هسه هو نام وعافني .
باوعت للمسلسل وخلصت الساعة صارت ب ١٢ وهو ماكو ماخابر تحسرت تعودت كل ليلة نسهر نسولف
لحد ما ننعس ، يلله انام شسوي بعد ..
نمت والصبح كعدت تريكت واحس مفتقدته كلش
خلي اخابره ، اتصلت بي فصله وراها رجع خابرني .
عاتبته كال مشتاقتلي ؟
انت وينك اشو متغير
بهاليومين اتغير ؟ بس والله مشغول كلش ..
بشنو مشغول ؟
اريد اكمل تجهيزات العرس حبيبتي ..
الله يعينك وباجر الجمعة لاتنسى
لا ماناسي بس شنو اكو بالجمعة
هاي شنو لحكت نسيت ؟
ها ها اروح اشوف غرفة النوم لا لا مانسيت ..
صدك تحجي ؟ وتكول مانسيت ..
كولي شنو انتِ ؟؟
مو اتفقنه تجي تتغده يمنه ؟
ضحك يعني الغده اهم من غرفة النوم ولج انه وين وانت وين انه مستعجل اريد اجيبج يمي ..
يعني ماتجي باجر ؟ كلتها بنبرة زعل ..
لا مااكدر على زعلج اجي طبعا ..
اوكي ... لاتكطع بيه تمام
ضحك اموت عليج من تشتاقيلي ..
يله مع السلامة ..
يوم ثاني كعدت من الصبح ورحت للمطبخ بقيت صافنة شنو اطبخ اله؟ دخلت الحجية انتبهت عليه
كالت شبيها عروستنه ؟
تقربت منهه ماتدرين بعياش يا اكله يحبها بلله ؟
ضحكت والله مادري بس هو يحب الكشمش بالاكل ..
يعني نكثر كشمش نحط بالبرياني وبالدولمة وبعد ؟
ام فخري كالت خو ماتردين بعد تحطين بالتشريب وبالزلاطة وباللبن والشربت هو وين ينحط الكشمش بعد غير بالبرياني والدولمة .
ضحكنه يله جا نسوي دولمه وبرياني .. وظليت احضر وياهم الاكل للساعة ١١ كل شي حاضر ..
خابرته ماجاوبني ، دزيت اله مسج
جيب عمتي وعفاف والجهال وياك لاتنسى ..
لل ١١ ونص انه كاعدة على نار وراها بدقايق
دخلت عمتي وعفاف والجهال وياهم
سلمت عليهم وكعدوا يمنه ، استحيت اسأل ع عياش
ظليت افرك بيديه ، الحجية سألتهم وريحت كلبي ..
عمتي كلتلها طلع وخابرنا كال روحوا كبلي ..
رغم بيدي التليفون بس اصريت اتجاهله كافي
انه اسأل وانه اخابر وانه ابادر ، صح مشغول
بس يرادلها شوية ثگل .
لل ١٢ اله ربع يله اجه حازم كال اجه عياش ..
ومدينه السفرة ، طبيت سلمت عليه يم ابوي
وبعدين كعدنه نتغده بالهول كلنه ..
كعدت كباله ماكعدت يمه وهو ظل يسولف ويه ابوي
وماباوعلي ابد ، ضجت كلش متتت من القهر ..
شبي يبيع ثكل ؟ يريد يعرف غلاوته ؟ لو شنو الموضوع اتمنى افهم .
كملنه غده ، صبيت الهم جاي صارت ب ٢
هو اترخص وكام كال انه رايح عندي شغل ..
تبعته للباب بلكي يحجي شي يكول شي ماكو ماحجه
من وصل لباب البيت ، كال ها محتاجة شي ؟
هزيت راسي بمعنى لا ...
هو اخذ راسي بيد وحدة وباس كصتي وكال اذا تريدين شي خابريني ماشي ؟
هزيت راسي بحزن وانه مدنكة ..
الايام البعدها قلت اتصالاته صرت متأكدة ١٠٠ % هو متغير غير عن الاول .. معقولة لان ضمني اله هيج صار ؟
شكوك صارت تعصف براسي وتحيرني ..
هو مستعجل ع زواج رحنا انه وزمن ولمياء واختاريت بدلة العرس وحجزنا عند الصالون .. وتحدد موعد العرس .. اصر اله زفة وخبصة وهوسه وعشى اله اول ماله اخر عبالك اول مرة يتزوج ..
بس انه ضايجة وحايرة وخايفة
كاعدة بالكوشة واحس رجلي تنداس ..
باوعت اشوفها ام فخري ..
ها بيبي ترا رجلي انجعصت والله بعد ماكدر امشي بالزفة ..
خزرتني سكتي ولج ناس تتزوج مرتين ناس ولا مرة خليني ادوس رجلج شصار يعني ؟ بلكي ايدي بيدج واعرس وراج .
كالو اجه وراح يزفونكم كلبي صار مثل الطبل
دخل عليه بطوله الفارع ولابس الزي العربي
دنكت بسرعة اريد اجر نفس ماكدر
اجه كعد يمي وظلوا يهوسون ويصفكون ويهلهلون
وهو كاعد يمي مثل الحجر ولازم جف ايدي بيده .
بعدها اخذني لبيتهم ... وسط الهلاهل والكولات
بما انه احنه باب بصف باب العرس صار واحد ابيتنه
وبيتهم بقيت ابيتنه طول وقت العرس
يعني لليل اجه اخذني راسا للغرفة زفونه ..
كعدت ع السرير وهو يمي وخواته يصورونه ويهلهلون ويهوسون ، دار الحلقه من اليمين لليسار ويضحك ويا اخواته ويشاقة وانه مثل صخرة مشتعلة بالنيران .
بعدها طردهم كاللهم يله طلعوا خل نرتاح ..
ماقبلوا يطلعون وظلوا يهوسون ويهلهلون
صاح عليهم ترا هاي ثاني مرة اتزوج ادري فرحانين بس ماقصرتوا ..
ظلت اخته تصيح بنت عمنا واختنا تصير جنتنا ماريد الغريبة تدوس عتبتنه ..
وكلساع وكالتلها هوسه ..
فوك النص ساعة هم مجلبين
اخر شي طلع المسدس خلاهم كلهم يشردون ....
ظليت ارجف من شفت المسدس
ان جانت سميحة ماانكتلت بي انه انكتل بي وربي ....
راح ضماه ونزع الغترة واجه يمي ..
حضني من اكتافي .. كال هذا العشى تعالي نتعشى ..
وخرت ايده وكتله ماريد ... بنبرة زعل ..
وركض رحت للحمام ..
نزعت البدلة وظليت افتح بالتسريحة واشمر بالماشات بالسلة الي بالحمام سلة ملابس فارغة .
طلعت شفته يصلي ...
رحت ركض فتحت الباب باوعت يبوووي هوسه هوووسه كوومة ناس اصواتهم بالبيت .. باوعتله شفته جاي يسلم ، ركضت طبيت بالفراش .. وغطيت روحي كلي ..
دقايق حسيت الغطه ينشال من عليه .. وخر الغطه وصار بوجهي ، خنزرت عيوني .. وهو مبتسم باستفزاز ..
كال مدام ماتردين عشى يله نبلش ..
فتحت عيوني بخوف وذعر على اوسعها ورمشت عدة رمشات ..
تسللت ايده لوجهي وثبتها وره ركبتي .. ظل يبوس بخدي ونزل على ركبتي
.. همست بخوف شديد أأأ .. هو كال اشششش ..
سكتت وتجمعت الدموع بعيوني .. سحب ايده من وره
ركبتي وصارت تتحرك بحرية على طول جسمي .. طوق خصري وجذبني اله ، دفن وجهه بعنقي وظل يستنشق ريحتي بعمق .. بقى ثواني على هذا الحال
وبعدها رفع راسه وباوعلي ..
جنت مغمضة عيوني حسيت بنظراته عليه باوعتله
بخوف كال افييش يايمه هذا المكان الي ترد بي روحي
برطمت شفايفي ورجعت غمضت وانه اجر نفس مليء بالاستسلام .. وتوقف لساني عن الاحتجاج ، وارتجف قلبي مثل عصفور حبيس ، واطراف اصابعه الي تعبث بوجهي صارت ترسل سحر يسري بجسمي مثل سريان النار بالهشيم ، وايقظ بيه مشاعر غريبة ..
ورا ماخلص كعدت حضنت نفسي ابجي متألمة
وهو يباوعلي مبتسم ، علامات الانتصار على محياه مدد يمي وكال والله اثاري الكافور جايب نتيجة
خرب بعقلك حاتم والله تستاهل اطلعك من السجن ..
