رواية ارهنت عمري الفصل الرابع والثلاثون 34 بقلم نورا ناصر

أردتكِ بطريقة مؤلمة بحيث كان اي فتات منكِ يكفيني.

... باوعتلها ، رق گلبي على حالها ، الظاهر أذيتها 

ماجنت اعرف بيها بعدها بنيه ، كل ظني من راحت ويا لبغداد تمموا زواجهم وبلحظتها أيست . 

هسه احس الدنيا ماوسعت فرحتي ، هم هيه بحضني ومريتي وملكتها وهم بعدها مثل ماهي .. طفلة بريئة ماكدر العار سيف .. 

ظلت تباوعلي ببلاهة كالت : شنوو تقصد ماجاي افهم عليك ؟ 

ضحكت مديت ايدي الها تعاي يمي .. 

برطمت شفايفها تمتمت بزعل ماريد ..

_ زعلانة عليه يابعد رويحتي ؟ 

_ احجي فسرلي كلامك وشنو علاقة حاتم بالموضوع .. 

بعدني ماد ايدي الها : تعالي بحضني واسولف لج ..

اجت الي مثل غركان يتشبث بمنقذه ، اخذتها حضنتها بست راسها مبروك صرتي مريتي . 

ابتسمت وتناقضت ابتسامتها ويا دموعها الي غسلت خدها والمتبقية تلالي بعيونها الندية .. 

مديت اصابعي مسحت دموعها بقيت اسولف الها .. 

بديت كلامي بضحكة .. 

خليت كافور لسيف بالجاي وبيوم الحنة مالتكم ..

كالت ببرود وهذا شنو بعد ؟ ماعرفه اول مرة اسمع بي .. 

اعشاب الكافور ماسامعة بيها الها عدة فوائد ومنها تقليل القدرة الجنسية ؟ 

ضحكت كالت وشنو يعني ؟ عار ماينزعل عليه ..

طكيتها ضحكة ولزمت وجهه باثنين ايديه وبستها على شفايفها .. 

خلت ايديها على صدري ودفعتني زعلانه منك انه .. 

وانطتني ظهر وهيه كاعدة ، سحبتها من خصرها 

خليتها على رجليه .. وقيدتها ، باوعتلها تباوعلي 

بزعل . 

ظليت اوخر شعرها من على وجهه واخلي ورا اذنها 

الحلو ليش زعلان عليه ؟ 

صار كم يوم متجاهلني شنو معناهه ؟ تعلمني عليك وتتركني ؟ 

خليت اصبعي على حلكها : لج انت صخرة بنص روحي وماتتحرك ومستحيل اتركج ، انت شمعة ومضويه حياتي مخيط خياط وي روحي شون اعوفج لاتحجين هيج تمام ؟ 

هزت راسها : جا شنو هاي تصرفاتك كبل العرس احسك تتهرب مني ؟ 

افاا انه اتهرب ولج كضيت عمري كله اركض وراج مايصير انت تركضين وراي يوم يومين حتى اعرف تحبيني لا ؟ 

مدت ايدها تلعب بشعر صدري .. ومبتسمة 

سألتها ها تحبيني ؟ 

باوعت بعيوني وبعدها ابتسامتها على وجهه 

كالت بذوبان ممزوج بخجل اي احبك .. 

اخذتها لحضني مرة ثانيه .. وابوس بيها .. 

ابتعدت عني كالت لحظة لحظة وحاتم شنو علاقته بالموضوع ؟ 

_ حاتم يا محفوظة السلامة هو الي نفذ العملية جان هو يودي الاكل للشفية بالبيت الي على شط ويخلي الكافور ابطن الجاي وسيف يشربه وهو الممنون .

تعلكت ايديها بركبتي كالت وهسه شنو ؟ راح تطلعون حاتم من السجن ؟ 

_ اي حاتم خويي والله لو متعمد يسوي بيكم هيج جان فلا طلعته وخليته يخيس بالسجون لا والله جان كتلته بيدي بس هو مامتعمد وانخ واكف جنت والبندقية ثارت جان هو هم كتلته بس هو عار المصيوب ماصار بي شي ، اعرف مو هينه ينطعن بظهره مرتين مرة من مرته ومرة من ابن عمه الي عاش ويا سنين وابيت واحد وبينهم عشرة تاليها يخونه بهالوضاعة ، بويه حگه يفقد عقله ويتخبل . 

_ ما طاح بيها اله انه طلع خبالاته عليه فتح راسي وفتح بطني بشهر واحد اخخخ الج يروحي . 

_ شنو هالتشائم شنو هالحقد ييبويه لج فرحي كدامج ايامج راح اعيشج بيها ملكة وماخليج اتعبين بعد .

ابتسمت : كلي امل بيك .. 

_ جا يله كومي نغسل وناكل ترا وجهج اصفر مبين ايام صارلج ماماكلة زين .

_ كلها بسببك انته .. 

كرصتها من خدها : عاد انسي السالفة ويله كومي .. 

_ اوعدني ماتتكرر ولا تعيدها هيج عذاب والله .

_ افاا تتعذبين وراسي يشم الهوا اسم الله عليج من العذاب يابعد گليبي انتي . 

عبست ملامحها وبرطمت شفايفها : خل نشوف . 

_ ان شاءالله تشوفين .. 

جريتها من ايدها ونزلتها من السرير واخذتها للحمام .......

طلعنا من الحمام ، هو راح ع السرير وانه وكفت انشف شعري .. 

تعشينه وغسلنه ورحنه ع السرير اريد انام تعبانه من الفجر كاعده اليوم .. عياش اخذ البياض يريد يطلع 

رحت وكفت كباله لاعفية وين رايح والله استحي .. 

تقرب مني ولج منين تستحين هيه فرحتي تنوصف اليوم خلي اروح افرح امي .... 

لا عفية الله يخليك والله عيب خلي يطلعون ولد عمي مبين بعدهم لهسه مايرحون .. 

اي مايرحون اطمئني يردون يقضون ع المفطخ الي زاد من العشه يله يروحون اعرفهم كلهم كرووش ومايشبعون من البلع .... ولج والله لو ادري بيج بعدج بنيه جان ذبحت ويا العجوله جمل .. 

دنكت واستحيت رحت اركض للسرير وتغطيب بي وهو اخذ البياض وطلع .. 

سمعت صوت هلهولة كلش عاليه كدرت اميزها هاي صوت عمتي ام عياش ، وراها طب عياش ووجهه يشع من الفرح .. 

اجه يمي وحضني من اكتافي اخذني لصدره باس راسي بوسه حنينه وكلش دافيه سحرت اعماقي ..

دفن راسه بركبتي وتنفسني بعمق .. ويترك اثر على بشرتي .. 

ثواني وجان نسمع صوت بنات عمي اخوات عياش 

 يم الباب يطبلن ع الباب ويهوسن ..

 

ظل يباوعلي ويضحك كال عرفوا انتشر الخبر .. 

ضميت وجهي بيديه وهنه بعدهن بعد شويه يكسرن الباب من كد الطبل .. 

كال ولج وصلت حدها هذول جاي يستفزوني .. 

انتظري راح اجيب المسدس 

. 

جريته من ايده احجي بهمس عن لايسمعوني تعال يامسدس والله اخاف هم هسه يضوجون ويملون ويرحون تعال ننام .. 

تجاهلني وراح جر دشداشة بيضه من الزاويه لبسها وباوع لروحه بالمرايه كال هاي شنو ؟ هسه مااسلم منهم هسه يكولون ها توك مطهر ؟ 

متتت ضحك وهو راح لبس تراكسود اسود وطلعلهم بالمسدس كلوله لو مو تطلعنه بالمسدس الليلة للصبح هذا اخر عرس ونريد نفرح ولاتكول لا بعد منا لمن ما تعرس مهند يله نفرح هالفرحة ..

عاد هو ظل يهوس وياهم وشال مهند يبوس بي ويركصه وانه راسي صار طبل من كد الهوسه 

ماحسيت بشي ونمت .. 

يوم ثاني كعدتني بوساته وحركاته كمت غسلت ولبست 

طلعت من الغرفة وهم تلكوني بالهلاهل والهوسات ..

على طول اليوم عسى ماافوت للحمام اطلع يهلهلون ...

وانه ميته من الخجل ماعبالك بيت عمي استحي كلش .. 

                  ☆☆☆☆

تمارا .. اليوم احنه بالمحكمة انه وفيض 

بعد عناء وطول انتظار وركضة ربحت دعوة الحضانه 

وجايه استلم ابني من المحكمة . 

واكفين انه وفيض وننتظرهم يجون .. 

باوعتله رفعت راسي اريد اهمس باذنه 

اوصل لجتفه انه ، ميل راسه قرب اذنه 

من حلكي يريد يسمعني .. 

همست : فيض اشو تأخروا ؟ 

ضحك : لا ماتاخروا تمارا انت الي جايه وكت 

نسيتي سحلتيني من الفراش الساعة ٥ ونص وخلصتي مل شي ولبستي عبايتج ساعة ٦ ونص وهيه المحكمة تفتح ساعة ٨ والطريق بينه وبين المحكمة نص ساعة بس .. 

ابتسمت بوجهه واحس حرارة بخدودي .. 

كال اي هيج خلي هالضحكة الحلوة دومها مزينة وجهج . 

بعدني مبتسمة ودنكت .. لحظات رفعت رتسي اباوع 

على ارجاء المحكمة ، كزمة ناس اكو ، ناس جايه تتزوج ناس جايه تطلك ناس جايه علمود تسوي راتب رعايه وغيرها وغيرها .. 

سمعت صوت شرطي يصيح ويه رجال ثاني .. 

جريت فيض من ايده : فيض شكو ؟ شبيهم يتعاركون ؟ 

كال هذا عليه القاء قبض ومايقبل يروح ويه الشرطي .. 

ليش شمسوي وعليه القاء قبض .. 

ضحك كال والله مادري ماجنت وياهم .. 

وظل مركز بيه ومبتسم .. 

رفعت حاجبي وهم اضحك شبيك ؟ 

ههه مو انه الي شبيه انت شبيج تمارا اليوم تسولفين وتضحكين يوميه اشلع الحجي منج شلع وهم ماتحجين كوة ، اعرف فرحانه بس مو يومين وتبنجرين وتعكدين النونه .. 

وخله اصبعه الابهام بين حواجبي وسحبه ليفوك .. 

اكتفيت بالابتسامة وسكتت ، طخيت راسي بكتفه .. 

ظل يهمس بأذني : هسه لو عندج عشر جهال جان كل فترة نجي ناخذ واحد من المحكمة ونشوف ضحكتج ونسمع صوتج . 

واذا عندي عشر جهال هم تقبل لو هم تشرد بس هالمرة تروح وماترجع بعد ؟ 

اي صح شردت وعبالي انت صدك موخوش وحتى حجيت عليج بس من رجعت انبأني گلبي انتي بريئة وانو انتي قدري وقسمتي ونصيبي ماكو واحد يكدر يتملص من قدره .. 

خو ماحاقد عليه لان جنت اضربك وانت صغير ؟ 

لا ماحاقد عليج بس اكدر اخذ ثاري منج بطريقة ثانية 

وظل يغمز بتك عينه . 

عضيت شفتي وهمست يا لئييم .. 

ظلينا نباوع بالارجاء حسينه عيون الكل علينا .. 

باوعنه بعيون بعض ، ميل راسه وهمس بأذني 

ابد مو وكته كلامنه ولا حتي بالمكان مناسب ابد . 

هزيت راسي بموافقة وباوعت بنيه كاعدة وتباوع علينا ، شكلها تعبان خمنت انو جايه تطلك .. 

صار مكان يمها ، كال فيض روحي كعدي هناك احتمال نطول وانت اكيد تعبتي من الوكفة .

هزيت راسي بعدم موافقة : لا خليني واكفة يمك ماعليه شي . 

كال لا حبيبتي نرجع للبيت وشبعي مني . 

رفعتله حاجبي كوه وشبه ابتسامه على وجهي . 

انتبهت اول مرة يكولي حبيبتي . 

يلله روحي لاتعاندين .. 

والله استحي .. 

اخذني من ايدي وسيرني لحد المكان الفارغ الي بصف البنيه كعدت مجبورة . 

هيه ظلت تحوس حسيتها تريد تحجي وياي ، باوعت عليها وهزيت راسي مثل الي ينطي اشارة لبداية كلام .

كالت انتوا مخطوبين وجاي تعقدون ؟ 

كتلها : لا متزوجين احنه .. 

كالت ها عبالك دمكم متشابه .. 

اي ابن عمي ... 

اي تتشابهون شويه بس هو عيونه ملونه .. 

حركت حواجبي بانزعاج ودرت وجهي عنها وحجيت بقلبي : هجم بيتج شون شفتي عيونه ملونه 

 شون لاحظتيهن ملونه .. وحركت شفايفي . 

وراها جابوا امير ابني ، عمه اخو نبيل جابه ، 

بعد عمري شحاله من جابوه

وصخ وملابسه مهترئة ونعاله تك وتك .. وشعره مكوش لا حلاقة لا تمشيط .. 

متت قهر عليه ماعولت تخلص الاجراءات واخذه لحضني .. بقيت واكفة على نار والمحكمة ازدحام كتله ..

خلصت الاجراءات واخذناه حضنته حيل وهو لامستغرب مبين متعود لان اغلب وكته بالشارع 

رغم مرت فترة كلش طويله على فراكنا ..

تقريبا سنتين ونص .. 

صعدنه بالتكسي وانه اعدل بشعره وارجعه ليوره 

طلع خبزة من جيبه وكعد يعلس بيها 

متت قهر عليه ودمعت عيونب احس كلبي انفطر من الالم .. 

كتله بصوت يخنكه العبرة : جوعان حبيبي ؟ 

التفتت علينه فيض وظل يباوع .. 

باوعت عليه بقهر .. 

نزلنه يم السوك نزلنه من السيارة ومشينه لحد مطعم 

دخلنا وجاي نصعد فوك .. كام فيض شال امير وصعد ع الدرج دفن راسه ابطنه وظل يدغدغه وامير طكاهه ضحكة طفولية بريئة .. دمعت عيني عليه فرحت وضحكت على ضحكته .. 

اشرلي اكعد وهو اخذ امير وراح وانه بقيت كاعدة 

رجع مغسل وجهه وايديه بالمغاسل مال المطعم .. 

وكعده على الكرسي .. طلب النه اكل وكعدنا ناكل ..

امير اشر على الكباب كال هذا ينطوه لبابا بالشارع وهو ينطيني منه .. 

كوة بلعت الغصة احس مرارة بحلكي مااعرف شون راح اتخطى هذا الكم الهائل من الوجع والالم .. هسه هم حركت نبيل من ابنه يمكن هو محتاجة اكثر مني بس ماترهم يبقى يمهم .. معذبينه وهاملي ايديه كلها مجرحة ووجهه بي اثار ضرب .. 

سألته عنها كال نتعارك ويا اولاد عمو وعددلي اسمائهم ..

كال بيبي وكعت ورجلها مكسورة وماتكدر تسويلي اكل بس تخلي خبز بجيبي من اجوع اكله .. 

مرة عمو تخلي الاكل وتودي لغرفتها تاكل ويا جهالها 

عمه اجت قبل هواي ماعرفت شكد المدة سبحتني وسبحت بيبي وبعد مااجت لان تعاركت ويا مرة عمو .. 

هذا الي كدرت افهمه من كلامه الطفولي والبريء 

رغم مايعرف يلفظ بعض الاحرف بس كدرت اجمع هالكلمات منه .. 

تغدينه بالمطعم ظل امير يضرب على بطنه ويكول شبعت البطينه .. ظلينا نضحك انه وفيض .. 

نزلنا للسوك واشترينه اله ملابس ، طول فرتنه بالسوك وفيض شايل امير لان نعاله يفشل تك وتك ووصخ كلش وفيض اخذه وشمره بالحاويه مالة الزباله بقى حافي وشاله .. 

اشترينا اله حذاء وملابس ولبسنا بالسوك وخلينه الوصخة والمشككة بعلاكه .. كال فيض اله تشترين ملابس ، رفضت لان هواي اشترا لامير : لا لا غير مرة عفية .. 

_ انه جاي اكلج اخذي شبيج؟ يمته تبطلين هذا العناد ؟

هزيت راسي ماريد عندي هواي وانه هم اخيط يم امي مااحتاج وفر وراك هواي مصاريف ووراك المحامي هم .. 

ماعليج جاي اكلج انتي الج الصافي .. 

 

اصريت بالرفض وهو اخذلي على ذوقه .. 

ورجعنه للبيت .. 

اخذت امير كبل للحمام وسبحته بسرعة وخليت لاصقات جروح على جروحه سويت اله كلاص حليب وكعد يشرب بالمطبخ .. 

رحت شفت فيض يريد يطب للحمام ركضت حضنته 

رفعت رجليه اريد الوحه ، همست بأذنه بأمتنان شكرا .. 

حضني حيل بحنيه وايده تتحرك على ظهري .. 

كال وعدت ووفيت ان شاءالله .. 

وخرت من حضنه بس ايديه متعلكه بركبته .. 

ظلت تدموعي تنزل على خدي .. مد ايده مسح دموعي ومركز بملامحي باستغراب : ليش البجي ؟؟ 

بغصة جاوبته : نبيل .. 

جر حسره وخله ايديه على خصره .. 

كتله مو قصدي بس خطية يمكن امير يفيده اذا بقى يمه نبيل بلا عقل بس امير يفتهم ويداري ، ضميري جاي يعذبني خاف اذيته من اخذت امير منه . 

ظل يمسح دموعي الي على خدي فديت طيبة كلبج وبالنسبة لنبيل اكو الله يحميه ويرعاه ان شاءالله واحنه هم ماراح نحرمه من ابوه نخلي يروح يشوفه وهو هم هنانه يمنه مو بعيد .. 

خليت ايديه على صدره وامررها واوصلها لجتافه ومبتسمه رغم الدموع بعيني ، باس ايدي وطب للحمام .. 

ميسم : طلع حاتم من السجن اخذني ورحنه نشوفه 

رحنه لبيت اهلي وكعدنه يم ابوي ودخل حاتم ..

سلم على عياش واجه سلم عليه بوسني من راسي 

مرتين و٣ واربعة سامحيني خيتي والله موقصدي اذيج والله ان شاءالله مسامحتني ؟ 

هزيت راسي ولزمت ايديه ولا يهمك خويه فدوة الك ان شاءالله احنه مابيننا حقد .. 

بس كليلي خاف يأذيج عياش اجيكم اخرطه خرط .. 

باوعله عياش ماتتوب من سوالفك ولك ؟؟ 

وخزره .. 

والله بالسجن بس افكر بميسم ومن كلولي سوت عمليه ثانيه تمنيت الطلقه بيه ولابيها كلت وين تتحمل بس الله اله بيها ارادة الحمدلله على كل حال والله ماجنت بوعي ذيج الفترة واريد اروح لعمتي ابوس راسها وايدها واعتذر منها . 

عياش اي تعال هلا بيك بس مو تجيب وياك بندقية تكتلنه كلنا هالمرة تسفرنا للاخرة فد نوب . 

حاتم رفع ايده باستسلام لا بعد التوبة اذا الزم سلاح والله لو ميت واحدكم بذيج العصرية السودة جان عمري ماسامحت روحي ولا كدرت اعيش مرتاح البال ويمكن جان حتى كتلت روحي الفترة الي عشتها بالسجن بس الله يدري بيها ماجنت مهتم للحبس بس شون كدرت اضربكم . 

ابوي الشيخ كاله ان شاءالله تعلمت درس وهسه حتى ندورلك مرة تتزوج وتنسى كل الماضي .

ماريد اتزوج بعد لعبت نفسي من كل النسوان .. 

لا يا ابووك مو كل اصابعك سوا وانت جنت مغمض عينك عن سوالفها رغم جان كل شي واضح كدامك 

احمد ربك ماخلفت منها الله هم يحبك .

الله كريم خل ترتاح نفسيتي وانسى وانوب افكر اتزوج يله عياش اريد اروح لامك اعتذر منها والله عمتي عزيزة وغاليه عليه .. 

عياش : يله مشينه .. 

وبيوم جنه انه وعياش بالغرفة اندكت الباب بقووة ..

طلعنه بسرعة وردة جانت باللهول وتلهث دموعها كلها دموع وابنها على ايدها يبجي مفرفر وعمتي تحاول تفتهم منها .. 

ركضت عليها شبيج وردة باوعتلي وانفاسها متسارعة دموع مستمرة تنزل باوعت لعياش وحاجته خويه الله يخليك الحك حازم اخذ السجينه راح يكتل اخوه راح يكتل فيض ...