رواية ارهنت عمري الفصل الخامس والثلاثون 35 بقلم نورا ناصر

ظل ابنها يفرفر بين ايديها اجت عفاف اخذته تسكت بي .. انه نزلت لمستواهه ع الكاع وثبتت جسمي بركبتي ، اباوع بوجهه مصدومة سألتها بذعر ولج وردة شمسوي فيض وراح حازم يكتله ؟ 

ظلت تباوعلي وتباوع على عياش تجاهلتني ووجهت كلامها اله : بس لحكه خويه محد بالبيت عمي وحاتم ماكو ومالكيت غيركم .. 

لزمتها من زنودها اهز بيهه : احجي شبي فيض شمسوي ؟ 

صاحت وتلطم على وجهه مامسوي شي فيض بريء مو هو الي كتل عمتي موووو هو والله .. 

عياش تقرب من عدنه وسألها بشك : وانت شمعرفج مو هو انت تعرفين القاتل ؟ 

التفتت لعياش مصدومة .. 

لالالا ماعرفه صرخت بارتباك وتلعثم شفافها ترجف 

وكملت حجيهه بس لايكتله لايكتله بريء ماكدر بعد ماكدر اسكت راح اطك راح اموووت الله ياخذني وارتاح من هذا الحمل الدمرني .. 

عياش : لا انت تعرفين القاتل احجي منو ؟ احجي مبين عليج تعرفين شي وضامته لاتروح روح بريئة بلا ذنب وانت تتحملين دمه .. 

ظلت تدك على وجهه ابوي ابوي ابوي كتل عمتي .. ابوووي بعد ماابيه اضم هذا السر مابيه 

بس لا حازم يكتل اخوووه لايكتله .. 

خليت ايدي على حلكي وانطلقت مني صرخة هلع وذعر .. بسبب الي تخلل لاسماعي من كلام صادم .. 

عياش سألها : عندج دليل على كلامج هذا .. ؟

مسحت دموعها وملامحها كلها بجي جرت نفس وبعدهه تشهك صفنت شويه وكانها تفكر 

حجت وهيه ترجف السجينه مدفونه بالحديقة 

وذهب عمتي فوك بغرفة ابوي جوة جربايته . 

انه كاعدة بالكاع والطم على خدودي عبالك امي توها مكتولة توه انفجعت بخبرها مامصدكة اخوها الي من دمها ولحمها يكتلها وعلمود شنو وليش . ؟مامسويه شي امي لازانيه ولا ناهبة ولا بايكة ليش يكتلها ليش مظلوومة مظلوومة وبريئة .. 

رجع عياش سالها بسرعة وين راح حازم ؟ ماتدرين ؟ 

جاوبته لبيت فيض .. 

وين صاير وبيا منطقة ؟ 

ظلت تهز راسها بعدم معرفة .. 

طلع تليفونه وظل يخابر .. كال حازم مايرد .. 

اجه يمي لزمني من ايدي ظل يهز بيه يصحيني من صدمتي : ميسم حياتي ميسم حبيبتي تندلين بيت اخوج فيض وين ؟؟ بس لو تكليلي المنطقة ؟ 

غمضت عيوني اتذكر وين مرة رحنه الهم نباركله بزواجه فتحت عيوني وجاوبته اتذكرت وكتله المنطقة ووين واقرب نقطة دالة على البيت .. 

هو راح يركض وانه توجهت لوردة فتحت عيوني عليها اباوعلها بقسوة : راح تحجيلي كل شي وهسه ..

غمضت عيونها وجرت نفس وطلعت منها شهكة بجي ..

ظليت اصيح بوجهه احجي احجي ليش ساكتة شون كدرتي تسكتين شووون ..؟؟؟ 

صيحت بوجهي منو كلج كدرت منو كلج ،؟؟ باليوم اموت مية مووووته من اباوع لحازم اموت من احجي ويا اموت من انام بصفه اموت من اكل وياااه امووووت

اجت عمتي تهدي بينه انطتها كلاص ماي انكطع نفسها 

كالتلها على كيفج ويا نفسج انت ترضعين ، وانت يمه ميسم البنيه مابيدها شي الي صار صار قدر الله هذا قابل هيه اشتركت وياهم بالجريمة . ؟

خليت ايدي على راسي جا خل تحجي خل اسمع منها شون عرفت خالي كتل امي شوون ؟؟؟ شفتيه ولج وردة ؟ شفتيه خنكها ؟ شفتي طبب السجينة بخاصرتها احجي يامصخمة احجي .. 

رفعت عينها بعيني وظلت تحجي .. 

وردة : بالليلة الي انكتلت بيها عمتي ابوي طلع بالليل .. 

بس قبل لايطلع جان كلش متوتر .. 

طلع وانه رحت لغرفتي ، مادري شكد غفيت وكعدت ميته من الجوع .. 

طلعت من الغرفة ورحت للمطبخ ، طبيت بدون ماافتح الضوه ، لان مايحتاج جاي ضوه من الهول توجهت للثلاجة ، طلعت اكل وسديتها سمعت صوت حركة بالحديقة طليت من الجام مال باب المطبخ ، شفت ابوي جاي يحفر ، ظليت اباوع عليه واستغربت شيسوي ابوي بهالليل وشيحفر وهو مو ع اساس ايده توجعه اشو مبين مابي شي ؟ 

 بقيت صافنة عليه شفت طلع سجينه جبيرة من العلاكة الي يمه شمرها بالحفرة وهل فوكاهه التراب ..

بلعت ريك وانه ميتة خوف وظليت ارجف وبقيت واكفة بمكاني مثل الصنم ، سمعت صوت باب من الغرف انفتحت ، طليت شفت اخوي راضي فات من يم المطبخ . 

وبنفس اللحظة سمعت صوت باب البيت ينفتح 

سمعت صوت انفاس ابوي وهو يتنفس بتعب .. 

وراضي يكله ها بويه شسويت ؟ 

تكلم وهو يحاول يلتقط انفاسه بصعوبة .. 

كتلتها كتلتها كتلت صبيح كتلت عمتك .. 

رجفت ايدي وحسيت كلبي راح يوكف 

شهكت بصوت عالي وطاح الصحن من ايدي وتكسر وسوه صوت ضجة 

كلش جبيرة .. 

على الصوت اجو اثنينهم للمطبخ انفتح الضوه 

وظلوا يباوعون عليه بنظرات قاتمة سوده ومظلمه  ، بقيت واكفة ومخليه ايديه على جوانب وجهي .. 

باوعت لابوي بنظرة اسى وحاجيته : ببوويه ليش ليييش كتلت عمتي ليش ؟ 

ارجف واحجي ودموعي على خدي حارة تجويني . 

بخطوتين  راضي صار يمي ، لزمني من شعري ونزلني للكاع وابوي جاي سجينه وخلاهه على ركبتي .. 

راضي كال لابوي اذبحها لاتفضحنه .. 

ابوي .. لك تخبلت الناس شراح تكوول علينه راح يشكوون بينه احنه ..

نكتلها ونشمرها يم عمتي ونكول جانت بايته يمها وانكتلن اثنينهن .. 

يحجون وانه ارافس جواهم والسجينه احسها اخترقت بشرتي وتحز بركبتي توجعت .. 

رفع وجهي باتجاه ابوي وظل يحجي وياي ..

ماتحجين موو وردة ؟؟ اذا حجيتي اذبحج ..

الروح عزيزة خفت انذبح مثل عمتي .. 

ظليت اهز براسي بمعنى والله مااحجي .. 

ابوي كال تحبين حازم مو ؟ 

هزيت راسي بمعنى لا .. 

كال ادري بيج تحبيه متأكد ميه بالمية .. واذا حجيتي حازم بعد مايريدج ويتزوج غيرج عمتج طغت وجان لازم اكتلها عاندتني وشوفي هاي ايدي من وراها لهسه توجعني ويمكن يكصونها الي وحاجزة البيت الها وماتقبل تنطي وهذا احسن حل اكتلها واخلص منها ..

طل بوجهي كال وردة ماتحجين مو ؟ ازوجج لحازم ؟ 

هزيت راسي لاا .. كال اذبحه هو همين اذا حجيتي لو فكيتي حلكج بحجايه .. 

راضي كال بويه هاي ماتسد حلكها ولاتسكت نذبحها ونشمرها يم عمتي احسن .. 

نشغت وخر ايده عن حلكي كلت والله مااحجي والله مااحجي بس عوفوني بويه انه بنتك تذبحني والله مااحجي ولا اكول لحازم ولا اتزوجه والله . 

ظل يمسح على راسي ويبتسم عود يطمني بس انه قطرة دم مابقت بيه اريد بس اشرد من يمهم .. 

كال روحي ، كمت ظليت امشي واتعثر علما وصلت لباب المطبخ كوة باوعت شفت ذهب عمتي متطشر على الكاع متت من القهر ، خليت ايدي على حلكي ورحت لغرفتي وانه ميته من الخوف وبس ابجي .. 

من بعدها كطعت الاكل كرهت الدنيه واهلي 

ايام وانه اتمنى اموت عيون عمتي مافاركتني ..

الباقي انت تعرفيه ابوي جبرني على حازم 

من بعد ما شاف حالتي تسوء راد يطمطم السالفة 

ويبين للناس انو مو حاقد على عمتي ولا شي والدليل زوج بنته لابنها  .. 

والله ياميسم مارضيت اتزوج حازم اعرف راح اظلمه وياي ابوي كاتل امه شون اتزوجه ؟ شلوون ؟ 

بس ابوي جبرني وجيت وكتلكم ماريد انتوا اصريتوا 

وحتى حازم اصر ، بس ماجنت اكدر احجي 

ابو قاتل خفت لا يكتل حازم همين خفففت ..

بس هسه لا بعد ماكدرت اسكت ماريد حازم يصير مثل ابوي ويروح يكتل نفس بريئة وابني شنو ذنبه ابو يكتل ؟ خلي يكتلوني اهلي انه مذنبه لان سكتت وماحجيت بس فيض ماله ذنب خطية . 

ميسم : طول ماهيه تحجي انه ابجي اكوم واكعد احس حرارة بروحي ماتنطي منين اتلكاها ياربي ،  ركضت ع التليفون لاصدك انوب حازم كتل فيض يبوووي 

خابرت على عياش مايرد عليه ظليت الطم على خدي وعمتي تهدي بيه ووردة كاعدة وتشهك وابنها نام على كد البجي الي بجاه تعب ونام . 

تمارا .. بيوم جان فيض بالشغل ، اندكت الباب الساعة عشرة الصبح كمت فتحتها صارت كبالي بنيه تقريبا عمرها ١٥ سنة استغربت شكلها ماشايفتها من كبل .. 

حاجيتهه تفضلي تردين شي ؟ 

كالت انه بنت خال فيض بس انت ماتعرفيني .. 

اي وشتردين ؟ 

ابتسمت بارتباك .. استحيت منها وكتلها تفضلي 

دخلتها جوة كعدت ، كالت ابوي دزاني اله عندي 

حجي اكوله اله واروح .. 

_ اي بس فيض مو هسه يجي منا للساعة  ١٢ او حتى مرات يجي الساعة بالاربعة .. 

ظليت تسحب بتنورتهه ليكدام وتحجي متوترة: ها ميخالف انتظره حتى لو اذا ماعندج مانع ؟ او ماازعجج .. 

_ لا عليمن حبيبتي البيت بيتج بس خاف اهلج يظل بالهم عليج ؟ زين شعجب جايه وحدج ؟ 

_ لا مايظل بالهم هم دزوني وامي ماموجودة وخواتي متزوجات واخواني ماموجودين لهيج اجيت انه .. 

ضحكت بوجهه شعليه منها هو فيض عنده هواي خوال يمكن مو اله تصير اختهم  هذول الي يتعاركون ويا يمكن غير خال يريده بشغله صدك وواجب عليه اكرام الضيف . 

كمت ضيفتها ورحت للمطبخ وكلساع عيني عليها ..

وهيه كلساع تباوعلي وتبتسم .. خلصت شغلي وطلعت اغسل التواليت الي بره وانشغلت كلش هواي ومنها غسلت الطارمة وخليت الماي على الزرع الي  بالحديقة .. 

اريد اطب شفتها تريد تروح كتلها ها وين رايحة ؟ 

كالت اشو تاخر فيض وابوي خابرني كال تعالي .. 

_ اي مو كتلج يتأخر وهسه الساعة توها ب ١١ 

وبعدين شلون ترحين وحدج ؟ 

_ اي عادي اتمشى بيتنا مو بعيد .. 

استغربت كلش وظليت اباوع الها .. 

كالت يله باي حبيبتي وبوستني وراحت طلعت تركض .. 

بقيت صافنه دقايق وبعدين تبعتها للشارع ماشفتها شبسرعة اختفت خاف اجت سيارة اخذتها ونبتلي 

اووو شعلينه بيها ... 

رجعت وافتريت بكل المشتمل خاف اكو شي سوته او اكو شي ناقص بس الظاهر كل شي بمكانه .. رحت دورت الكنتور مالكيت شي ناقص احتاريت بأمرها شعدهه هاي جريت نفس ورحت جبت امير من يم اهلي غديته .. 

الظهر اجه فيض حجيت اله كل شي .. 

كال ليش ماخابرتيني اجي .. 

_ مو كلت خاف بالشغل انته ومرات ماتسمع التليفون من يدك وبعدين شنو الي تريده منك هاي ..

_ مو تكولين ابوهه دازهه زين ماكلتلج شنو اسم ابوها؟ 

هيه شنو اسمها .. 

_ ها لا والله فاتني اسألها اصلا بقيت مصدومة بجيتهه .. 

_ يله اذا عدهم شي عود يخابرون ويكولون .. 

_ هيه كالت اروح مشي طلعت للشارع وراهه بثواني ماشفتها خاف صار ع البنيه شي ويبلونه بيها ومنا انته شونهه علاقتك بيهم .. 

_ تفائلي تمارا يمعودة ماناقص تشاؤؤم انه واذا صار عليها شي راح نسمع اكيد .. 

قوست شفايفي بمعنى ماادري .. 

هو سأل عن امير كتله تغده ونام .. 

كال العصر اخذه لابوه يشوفه .. 

ابتسمت بوجهه واحتضنت خده بيدي كتله عمري  ماتقصر والله ماراح الكه مثل حنيتك وطيبة كلبك .. 

اخذ ايدي وباسها كال شعندي غيرج .. 

تغدينه انه وياه ونمنه والعصر كعدت  سبحت امير وبدلته وكاعدة امشطله .. واحجي وياه .. حبيبي راح تروح لبابا تشوفه .. هو يهز براسه . اندكت الباب بقووة .. 

طلعت من الغرفة كعدت فيض كام بسرعة غسل وجهه وطلع فتح الباب وانه تراجعت للغرفة سمعت صوت زلم .. 

فتحت الباب وظليت اطل ع الهول شفت حازم اخو فيض من امه ووياه اثنين زلم سامعة صوتهم من كبل 

اعتقد اولا خال فيض ابو راضي .. 

ظلوا يتعاركون ويا فيض بالحجي .. 

يكولوله انته كتلت عمتنا صباح والذهب مالتها ابيتك بعده وكل فترة تروح تبيع قطعة بالسوك واحنه مراقبينك .. 

دكيت على صدري من الصدمة امير يريد يطلع جريته وطببته للغرفة .. 

فيض واجه اخو ها حازم تصدك حجيهم جلي وياهم تتهمني .. 

حازم :  بنبرة اسى عدهم دليل ضدك ذهب امي ابيتك بعده وانت كبل متعارك ويه امي ورايد منها فلوس وكتلها بالحرف الواحد ادري بيج عندج ذهب وعنظج فلوس وماتنطيني .. 

جاوبه فيض  بنبرة عتب : اي صح طلبت منها فلوس وتعاركت وياها ولهسه متندم على الي سويته بس ماكتلتها شلون اتجرأ اكتلها بلله ؟ امي هاي جنتي وناري حتى لو تركتني حتى لو عافتني وانه بوكتها ماجنت موجود .. وهذا بيتي كدامكم يلله فتشووه واذا  لكيتوا الذهب مالة امي هاي انه كدامكم وركبتي كدامكم شماسوون بيه سوو  . 

راضي بابتسامة صفره خبيثة : شون واثق من نفسك وتحجي .. 

فيض بثقة ؛ اي مابايك ولا كاتل .. 

اجاني فيض للغرفة وكفت بوجهه انت شون راح تخليهم يفتشون بيتنه ؟ 

خليهم يفتشون تمارا اخوي جاي يتهمني خليهم يشوفون خل يرتاح كلبه لبسي عبايتج وامشي لاهلج 

لا ماتركك وياهم وحدك لاااا ..

نبرة مليئة بالاستسلام كال : امشي تمارا الله يخليج .. 

هذا اخوي حازم مايأذيني ولا يظلمني انه اعرفه .. 

لبست عبايتي واخذت امير وطلعت بره .. 

وكفت بالطارمة ماانطاني كلبي اروح خاف يأذونه اصريت وعاندت  اوكف يم الباب  .. 

وره دقايق بس سمعت صوت جوه .. واحد يصيح 

ولك حازم هذا ذهب عمتي باع حتى الوصولات وياه وبأسمها ؟ 

دخلت جوة تفاجئت وفيض واكف باستسلام متفاجئ 

حازم تقدم لفيض يصيح بوجهه ولك فيض شجاب ذهب امي لبيتك وبكل قباحة تنكر ؟؟ احجي انت كتلتها احجي 

وطلع سجينه وشهرها بوجه فيض الي باقي واكف مستسلم ومايعرف شيحجي مصدوم ويباوع على الذهب ..

اندكت الباب حييل احتاريت بين اركض افتحها لو ادخل افك فيض منهم .. كبت العيطة والهوسة وصار صوتهم عالي ظل حازم يضرب بفيض بيده وبيده السجينه ومتردد يدخلها بي وذولاك الحقراء يشجعون بي ويتهمون فيض ويكولون لحازم عوفه خلي نسلمه للشرطة .. 

رحت ادفع بحازم وصرت بينه وبين فيض واصرخ بوجهه لا مااسمح الهم ياخذونه مني تعبت مو هيج يصير بيه كل مرة ياربي .. 

ظليت اصرخ وفيض لازمني من ايديه يكلي رووحي منا تمارا انا اتفاهم وياهم  .. اندفرت الباب ودخل اخوي ووياه رجال طويل ضخم لابس دشداشة نيلي واجوا صوبنه .. 

عياش : سمعت صوت صياح عالي دكيت الباب حيل محد فتحه شفت ولد طلع من البيت الي بصف المشتمل ظل يباوع كتله انه كرايب فيض واكو طلابه 

اكدر ادخل ؟ 

كال شصاير هذا صوت اختي .. فتح الباب وطب وانه طبيت وراه .. كل الي ابالي تكاتلوا 

رحت لحازم رافع السجينه ليفوك ويرجف 

سحبته شافني كال فيض فيض كاتل امي وبايك ذهبها .. 

باوعت للكاع اكو ذهب ويمه وصولات .. 

المرة كالت الذهب هذا ماجان هنا اليوم دزولنه بنيه طبت لبيتنه واكيد هيه خلته فيض مايسويها ولا بعمري شفت هذا الذهب اله اليوم ..

فيض كالها سكتي وروحي طبي جوة .. صرخت هيه كووة يردون يتهمونك نسيت صارلهم سنة يعاركون بيك يوميه مشكلة .. 

عياش : حازم لاتصدكهم وامشي اسمع مرتك شتكول .. 

راضي : عياش شجابك ؟ احنه جايين ناخذ ثارنه هذا كتل عمتنه .. 

_ هه متأكد ؟ ولك انتوا كتلتوها واكو ادلة عليكم والشرطة بدربها لبيتكم وابوك راح يعفن ويموت بالسجن .. اختك اعترفت عليكم كافي الله كشفكم امشي حازم واسمع من مرتك .. 

راضي ومحمد انصدموا وطلعوا يركضون بره .. اخذت حازم وطلعته من بيت فيض ، حازم مصدوم ..

مايعرف شيسوي .  

كتله لا توصخ ايديك ويه بيت ابو راضي ..

كال وردة شكالت ؟ 

امشي واسمع منها وانه بلغت الشرطة هسه راح يروحون لبيت خالك .. 

اخذته لبيتنا وهو مصدوم محتار شيسوي ظلينه نسولف .. كتله سمعت مرة فيض شكالت 

كالت اليوم دزولنه بنيه دخلت لبيتنه اكيد غافلتهم وخلت ذهب امك ابيتهم ..وفيض برئ 

سكت حازم وظل يضرب على راسه .. 

كال وهم شنو مصلحتهم يتهمون فيض ؟ 

ماسمعت المرة وحجيها كالت صارلهم سنه كاملة شادين وياه اكيد مامجاريهم بشغلهم الوصخ ويردون ينتقمون منه ولك هذا اخوك سندك وحزام ظهرك شون تسمع لهذول الحقراء الوصخيين

الذهب صار كدام عيني شمدريني .. 

والذهب وحدة مو دليل كافي 

كال وردة تعرف ابوها كتل امي ؟ 

امشي واسمعها شراح تكلك .. 

اخذت حازم لبيتنا وهناك جانت وردة بعدهه كاعدة يم ميسم بس شافونه بقت وردة كاعدة بالكاع ماكامت شافت حازم ودنكت اجت ميسم تلكتني 

اخابرك ماترد حازم شسويت لفيض ؟ خو مااذيته ؟ 

تجاهلها حازم وراح كبل لوردة .. 

لزمت ميسم من ايدها وطمنتها .. اطمأني حبيبتي لحكت عليه باللحظة الاخيرة .. 

وسمعنه صوت صياح حازم لازم وردة من ايديها ويصيح بووجهه بعصبية .. ويطلب منها توضح اله ..

ظلت تحجي وترجف ضربها على وجهه ..

ركضت عليه لزمته بعدته عنها ..

ظل يصيح عليها وانه لازمه : ولج شوووون سكتي كل هالفترة شلووون شلووون كدرتي ابوج كاتل امي وتدرين وماتكليلي ليش ولج ليش ؟؟

كالتله وهيه تبجي .. انه ماردت اتزوجك انته اصريت شسوي ..

بصياح جاوبهه : خووش خوووش منا ورايح ماتبقين على ذمتي اطلكج اطللكج ماريدج بعد ماريدج .. وابني اخذه 

بتوسل : هددوني حازم هددوني يكتلوك ويكتلووني .. 

واذا طلكتني وين اروح ؟ هم ارجع ويكتلوني ؟ 

ظل يصيح ماريدج بعد مااااريدج ....... لاترجعين للبيت بعد افتهمتي لا ترجعين .. ماريد اشوف وجهج خووش ؟؟ 

ميسم : طلع حازم ووردة انهارت ، اجاني عياش لاتخلين وردة تطلع منا خوش بقيها يمج اهلها يذبحونها ترا .. بقيت اباوعله ساكته ، مد ايده  مسح دموعي بأبهامه تفهم موقفي .. راح لامه وصاهه على وردة ..

 وراح عياش تبع حازم  .. 

رحت كعدت يمها اباوعلها ظلت تبجي .. احتاريت شنو اسوي .. سكتت حاقدة عليها واذا احجي ااذيها وهيه ماناقصة .. مو سهلة ابوها كتل امي موتها حرمها من حياتها وعاش حياته باع البيت واخذ حصته وتهنه بيها ووردة كلش زين تعرف وساكته .. عايشة ابينه وتاكل ويانه وتشرب وتظري منو كتل امي ،تضحك وتسولف ويانه ومتزوجة اخوي وكل مرة نسولف على امي بقهر تسمعنه ، نحجي على القاتل تسمعنه .. تشوف حازم شكد متعذب وهو يبحث ويدور ويروح يسال الشرطة على القضية وين وصلت والتحقيق وباقيه ساكته !!! 

حسيت كرهتها بهاللحظة كره مو طبيعي ، اخذت مهند ودخلت للغرفة خليته بحضني وكعدت وسكتت وعبالك امي اليوم ماتت مهند يمسح بدموعي ... 

لزمت وجهه بيديه انت هم يصير جدك كتل امي بس انته شنو ذنبك ؟ انته ماتدري بس خالتك تدري معتبرتها اختي تشوف لوعتي وعذابي على امي وساكتة .. 

ضحكت باستهزاء وانه بكل ثقة اتهم ابوك يامهند ويطلع جدك خالي اخو امي من نفس البطن يكتلها اخته من دمه ولحمه ليش وعلى يا مال على وصخ دنيه ؟ ماراح ياخذ وياه منه لاطابوكه ولا حتى ورقة 

 مهند بلكنته الطفولية البريئة وهو يمسح وجهي ودموعي بيديه الصغار انت ليش تبجين مو عيب انتي جبيرة انه من ابجي تكولين لاتبجي انت جبير رجال هسه لاتبجين ماما .. 

اخذته لحضني واشم بي واشهك وابجي ... 

دخل عياش يباوعلي بحزن ، اخذ مهند مني 

كاله حبيبي روح العب بره .

مهند : راح اروح يم مهودي ابن خالة وردة ببيت عمه عفاف .. 

_ اي حبيبي روح .. 

طلع مهند .. اجاني عياش اخذني كلي لحضنه مثل طفل تعلكت بركبته وحضنته واسهك وابجي 

عياش اليوم امي ماتت اليوم اليوم انفتحت جروحنه وانترست ملح .. 

على كيفج ويا نفسج حبيبتي مااحب اشوفج تبجين هسه المجرم ياخذ جزاءه والحمدلله الي الله كشفه ..

لاتاأذين عيونج الحلوة احبها .. 

وخرت من صدره ياوعتله هو يمسح دموعي .. 

همست بغصة والعبرة تارسة صدري 

سامحني .. 

ابتسم على شنو بلله ؟ 

يوم من الايام اتهمتك انته كتلت امي ماحسبته خالي والله .. 

اششش انسي كل هذا ماريدج تتعذبين انت بحضني اكو احلة من هيج ؟ 

خليت ايدي على حلكي وشهكت .. 

ليش يكتلها عياش والله راحت اعتذرتله وباست ايده طلبت منه السماح وسامحها هيج ..

_ طمع وجشع بني ادم مايخلص ولا ينتهي .. 

مايملي عينه غير الرمل وتراب الكبر بس هذا 

شكد يسعي وهذا الي وذاكه الي تاليها لو يحصل قطعة قماش ابيض وخشبات يندفن بيها لو لا لو يحصل واحد يترحمله  واحد يصلي عليه لو لا مايحصل هاي دنيتنه احنه مابيدنه شي بعد .

ظل يهدي بيه مسحت دموعي سألته عن حازم .. 

كال راح لخوالج وخالج ابو راضي طوقوا بيته واخذوه الشرطه .. 

ميسم على كيفج ويه وردة تره خطيه هيه هم عبد مأمور مابيدهه شي .. 

جان من تزوجت حازم واطمأنت حجت ليش وصلتنه لهذا الحال ؟ 

ميخالف يمكن خافت انته اخيتها مالها احد هسه 

نطقت من بين اسناني : كارهتتهه .. 

كال اششش لاتكولين هيج مريتي كلبها جبير وطيب ماتكره ولاتحقد . 

جريت نفس بضيق وهزيت راسي برفض .. 

كال مو لخاطرها لخاطر مهند تصير خالته وانه ابووه .. 

ظليت امرر ايدي على لحيته .. 

ميل راسه دفنه برقبتي وباسني رفع راسه 

يباوعلي .. كال احبج ولج لاتبجين ماريد اشوفج تبجين الله عليج حلفتج .. 

بسته على خده وخليت راسي على كتفه .. 

طلع من الغرفة وره دقايق صارت هوسه اجه يركض اخذ مسدسه كمت على حيلي مخروعة .. 

كال اخوان وردة اجو يردوها .. 

اريد اطلع وراه كال ابقي هنانه لاتطلعين وطلع يركض بس انه شيصبرني يمه خاف يكتلونه شلون بيه .. 

طلعت واسمع صياحهم ولتموا كلهم واجو اولاد عمي وابوي وحاتم واجت الحجية تركض .. 

عمتي وعفاف اخذوا وردة وابنها وصعدوها فوك السطح مال المشتمل مالة عفاف لبدوهه هناك .. 

وانه ظليت خايفة على عياش ميته خووف .. ..

وراها اجوا الشرطة ورادوا وردة تقدم افادتها .. 

دخل ابوي وحاتم وعياش ورادوا وردة تنزل .. 

صعدت الها شفتها كاعدة منتهية .. منهارة وتبجي .. 

باوعت الها كتلها يردوج جوة نزلي .. 

حاجيتها من ورة خشمي .. 

كامت تمشي وتتجى ع الحيطان شمرت نفسها عليه .. 

سامحيني ميسم وخاف يصير عليه شي ابني امانتج .. 

طوقتها بيديه تمتمت من بين دموعي وعبراتي 

غلطتي بحقنه وردة .. 

_ مجبورة ميسم والله محبوووورة .. 

نزلتها جوة كوة تمشي وتوصي على ابنها .  

عياش ظل يهدي بيها ويطمنها 

لاتخافين خويه انت امانتنه .. ماراح يصيرلج شي .. 

ابوي كاللها احنه نحميج محد يمس طرف منج راح ناخذج بسيارتنه ونرجعج لاتخافين .. 

هزت راسها ومسحت دموعها حضنت الحجية وتوصي على ابنها عمه اهلي يذبحوني مايهدوني ديري بالج على ابني .. حازم تخلى عني مايريدني بعد كال راح يطلكني .. 

الحجيه حضنتها لاتخافين عمج موجود وولدنه كلهم يحمونج مايكدر احد ياذيج وحازم مصدوم خطية عذريه هسه .. 

ياريت عمه ياريت يسامحني .. 

يسامحج يحبج لاتخافين .. 

عمه ابوي كتل امه 

وانت مالج ذنب يابنيتي مالج ذنب ..

عمه انه شاهدة وتسترت ع الجريمة حازم يكرهني هسه .. 

ابوي كاللها يلله بويه .. لزمها من ايدها وراحت وياه .. 

عياش راح وياهم وبقوا بيت عمي يمنه خايفين لا كل شي يصير ويجون يهجمون علينه بيت خالي .. 

راحت وردة انطت افادتها ورجعت تمرضت ايام وهيه يمنه حازم يصيح ما اريدها تجي الحجية تاخذ مهدي تودي اله يشوفه وترجعه  .. 

اهلها يوميه جايين داكين الباب يريدوها بس عياش ماينطيها الهم وواجهم بكل قووة .. 

بالليل جنه متمددين على السرير  انه وعياش ، مخليه راسي على صدره وهو يلعب بشعري ، اخذت ايده وخليتها على بطني كتله هم هالشهر ماكو طفل .. 

باسني وره اذني وظل يهمسلي على كيفج لاتستعجلين بعدنه ماصار النه سنه من تزوجنه .. 

اخاف خاف تتزوج عليه .. وانت همين جاي تكبر شوف شعرك شكد بي شيب .. ومديت ايدي لشعره وغرست اصابعي بخصلاته .. 

افا كضيت عمري اركض وراج تاليها اتزوج عليج وانه اذا اريد مرة تخلف لي جان ازوجت من زمان ليش بقيت اتانيج انه اريدج انتي وظل يمرر اصبعه على شفتي .. 

ابتسمت .. 

كال وبعدين ترة عندي مهند الذيب مالتي كلش كافي ها وعندي بنات اخوي هم بناتي وانه ربيتهن ومهودي ابن حازم هم عدنه اشو بيتنه متروس جهال ماكو مجال نحط رجلنه بي .. 

ضحكت اي والله هم صدك ...... 

بقت وردة عدنه شهرين تقريبا رجعت علاقتي بيها تدريجيا شويه كدرت انسه وعياش دوم يوصيني عليها مايقبل اصير جافه بالتعامل وياهه كومه يحجي بأذني 

عرفت عياش شكد طيب بس بساعة العصبية يحجي كلشي بس ابد ماينفذ من الي يكوله ولا اكو مجال للحقد بكلبه رغم الي سووه بي بيت خالي بس حمه بتهم وماخلى احد يأذيها .. حتى حازم .. 

وره هالشهرين اجه حازم لبيتنه دخل جوة رحت يمه كعدت كتله ها جاي تشوف مهودي ؟ 

غمض عيونه وجر نفس باوعلي كال لا جاي اخذ

وردة روحي كليلها خلي تحضرر نفسهه ترجع وياي .. 

خليت ايدي على زنده اي زين تسوي والله الدنيا ماتسوى .. 

هز راسه وانه كمت صحتلها نزلت بيدها ابنها شافت حازم بالهول انطتني مهدي راحت وكفت مقابيله 

كالتله حازم اذا جاي تريد تنتقم مني اخذ ابنك وردني لاهلي خلي يكتلوني .. 

كام بعصبية سحبها وحضنها حييل عبالك صدك جاي ينتقم منها وظل يعاتبهه وتعاتبه تشهك وتبجي ..

اكثر شي خفت عليك هددوني يكتلوك وكلت يسوونهه والله حازم انه ردت ابتعد عنك بس انته اصريت .. 

حط ايده على حلكها اششش لاتحجين هيج كااافي سكتي امشي للبيت يله .. 

اخذها ويريد يطلع .. تالي باوعلي كال حضري نفسج العصر نروح لبيت فيض اريد اعتذر اله .. 

هزيت راسي بموافقة وهو رااح ..  وعاشوا حياتهم طبيعية .. وصار عدهم اخوان اثنين واخت  لمهودي .. 

بعد سنة من زواجنه يله صار عندي حمل والله رزقني اول اولادي ومن بعد سنتين صار عندي بنت واخر العنقود هم بنت .. 

عفاف وبعد معاناة حصلت على الطلاق وبيوم كاعدين وجاي نحجي ويمنه ام فخري 

عمتي كالت اكو وحدة اجتني  كالت اريد اخطب جنتج وتأشر على عفاف .. 

ظلت ام فخري تحرك  بشفايفها بانزعاج 

ماظلت بس العوبة عفيف يخطبونها وانه ظاله 

... 

وبيوم اجتنه بنت عمتي متزوجة ببغداد اقاربنا .. 

كالت تدرين بسيف صار عنده بنيه ..

كتلها ليش هو تزوج ؟ 

_ اي مو تزوج مرة اخو المرحوم اسعد البنية الي اسمها شهد ..؟ 

_ مو ع الاساس طلكها ؟ 

_ لا ماطلكها اصلا من جنتي زعلانه كبل لاتطلكين منه جنت اشوفهم سوه بالشارع ومرات بالمول لو بالسوك .. 

حجيت بكلبي معناهه جذب ماطلكها ومن اجه هنا يتوسل ارجعله جذب وكال طلكها ، يله الله خلصني مني ورزقني عياش يسواه ويسوي الف من امثاله .. يروحوله فدوة .. 

تقوت علاقتنا ويا اخوي فيض ودائما نروح يمهم ويجون علينا صار عدها اطفال اثنين اولاد والي عرفته زوجها السابق حالته فد نوب ومحد يهتم بي فخلوه بمصحة عقليه ... 

خالي الي قتل امي  مات بالسجن بظروف غامضة .. 

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم