رواية حرم الاسود الفصل السابع والثلاثون بقلم بتول ابو الليل
آرون : اني احبج وطالب ايدج للزواج
بقيت صافنه بوجهه انصدمت من كلامه مادري ليش مافرحت ابد ولاحته شويه جنت قبل اتمنئ هل لحظه تصير بينه ويعاملني بحنيه ويتقدملي هسه ليش ماحبيت الموضوع يمكن لأن خلاني الخيار الثاني من شاف أليڤ طلعت من حياته اختارني.
بلعت ريكي بتوتر مجاوبته لزمت جنطتي وكمت اريد اطلع كام هوه مصدوم لزم ايدي قبل لاروح
آرون : وين اليان؟
_عوف ايدي رجاء
سحب ايده عني بقه يباوعلي يريد جواب سحبت نفس بقوه وكلت.
_اسفه آرون ماكدر اوافق علئ الزواج اني وياك مو مناسبين لبعض نسيت الكلام الحجيته قبل ليش هسه صرنه ناسب بعض؟ موو انتَ نفسك الرفضتني الي طلعتني من حياتك انيي موو احتياط عندك يمكن تكون ساعدتني وكفت وياي هواي وابد مانسالك هل معروف طول عمري بسس مانزل من نفسي كرامتي ومبدأي اهم من كلشي اهلي علموني علئ عزت النفس ماكون خيار ثاني ولا اكون بديل ابداً
آرون : اليان فاهمتني غلط والله اني مافكر هيج بيج وقبل من رفضتج جنت متزوج ولوو دخلتج بحياتي راح ادمرج اكثرر راح تتعبين وياي وانتِ معايزه مشاكل كل انسان يمر بتجربه بحياته واني مريت بتجربه خطاء كوني الصح بحياتي لاتكونين مثلهم.
_ماكدر اسفه.
عفته وطلعت من المطعم حيل اختنكت وضجت كرهت كلشي.
اخذت تكسي ورجعت للبيت مالتي دخلت بسرعه لغرفتي نزعت الفستان واني مقهوره وضايجه ليش هيج ضايجه منه ماسوالي شيء كلامه جان محترم بس انيي انزعجت كلش.
بدلت ملابسي وبقيت كاعده بغرفتي اصفن ودايخه.
مستحيل اكون خيار ثاني هوه بنفسه طلعني من حياته هسه من شاف نفسه محتاج بنيه بحياته رجعلي.
تمددت علئ فراشي واني تعبانه نمت بدون ماحس.
كعدت بليل ساعه بـ 8 علئ صوت باب البيت يندك فركت عيوني بنعاس كمت غسلت وطلعت وكفت بالساحه وصحت
_منوو؟
رهف : هاي اني
فتحت الباب جانت رهف اخت آرون سلمت عليها ودخلت للبيت
رهف : شنوو جنتي نايمه
_أي والله رجعت العصر ونمت تعبانه هسه كعدت علئ صوت الباب يندك
رهف : هاا والله اني عبالي طالعه لأن هواي دكيت يلا فتحتي.
_أي شنوو تشربين تتعشين وياي اني جوعانه
رهف : لا اني تعشيت اكلي انتِ الف عافيه
_تعاي سولفي عليه واني اطبخ
رهف : ههه يلا
كمنه رحنه للمطبخ طلعت بيض وطماطه من الثلاجه ماعرف اطبخ هواي اني يعني اشياء بسيطه لوو اشتري كبه جاهزه لو همبركر اشياء معلبه.
_ايي ليوم كلتي تروحين للدكتوره شافتج شكالت
رهف : كلتلي وضعج متحسن وانشالله راح تكون صحتج زينه وتتعافين من الضعف هذا كله.
_حبيبتي الحمدالله
رهف : الف الحمدالله
_اسويلج عصير؟
رهف : كلشي ماريد سوي لنفسج عشه لوو ادري جان جبتلج وياي مسويه لحم بعجين يجنن وكباب عروك
_احب الكباب عروك حيل لوو ادري جان وصيتج يلا باجر عود اخليج تسويلي.
رهف : الله كريم
خلصت العشه مالي اخذته ورجعنه للصاله كعدنه تسوالف عليه واني اكل فجأه كالت
رهف : عادي اسالج سؤال؟
_جواب
رهف : هم اكوو شخص بحياتج
_لا ابد
رهف : شعجب كل هل جمال وانتِ دارسه وطالعه وشايفه اشكال ولامره ارتبطتي
_شوفي حبيبتي الحياة مانطتني مجال اعيش مرتاحه وافكر بالارتباط اول بدايه عمري خلصتها دراسه وبعدين سافرت خلصتها بغير بلد كلش ماحب الاجانب ومن رجعت شفتي شصاار ويايه بعدين تحسنت رجعت سافرت وع هل رنه مخلصتها بعدني ملاكيه شريك حياة مناسب الي.
رهف : الله يرزقج بانسان يحبج ويصونج
_تسلمين وانتِ هم.
رهف : حبيبتي.
_ايي وانتِ هم حبيتي من قبل ارتبطتي.
رهف : مثلج ههه عمري مارتبطت ولانعجبت بشخص ابد خلصت حياتي مريضه وتعبانه واسمع كلام يسم البدن مافكرت بسوالف الحب وهل امور ابد وكل شخص جان يشوفني مقعده ميحبني يبتعدون عني بسرعه.
_الحياة ضامتلنه عوض ينسينه كل المصاعب المرينه بيها بحياتنه.
رهف : انشالله يلا اني تاخرت لازم اروح ابوي وحده بالبيت
_لعد آرون وين؟
رهف : من الظهر مراجع للبيت اتصلت علي كلي عنده شغل وسد الخط
_هاا يمكن يكون مٍشًغوٍلً يخلص ويرجع.
رهف : ايي يلا حبيبتي تصبحين علئ خير
_وانتِ بالف خيرر
عافتني وراحت لبيتهم كملت عشاي اخذت الصحون غسلتهن ورجعت لغرفتي بقيت اكلب بجهازي فعلت نت علئ الرصيد وبقيت اتصفح بالجهاز.
بقيت شيء ساعه كامله اباوع بالجهاز مليت اباوع للساعه بـ 11 شكد اليل طويل هسه شينومني نمت العصر هواي
اخذت كوت من الكنتور وخليت لفاف حوالين ركبتي وطلعت من البيت اتمشه اروح الاسوق اغير من نفسيتي.
اتمشه بالشارع واني مخليه سماعات باذاني وممنتبهه فجأه مرت سياره مني جان دعمتني رجعت ليورا واني خايفه وكلبي يدك بسرعه جان آرون نزل يركض اجه عليه خايف
آرون : اليااان صارلج شيء والله مانتبهتلج
_لا لا مابيه شيء بس ليش متنتبهه لطريقك لو ما الله ستر جان هسه اني ميته.
آرون : ماجنت مركز زين اعذريني بويه أذيتج اخذج لدكتوره.
_مابيه شيء ماكوو داعي.
آرون : انتِ وين طالعه بهل ليل شتسوين؟
_ضايجه بالبيت وكلت اطلع اتمشه شويه
آرون : ليش ضايجه منوو وياج ؟
_لوحدي هيج
آرون : امم ايي اني راجع للبيت تردين اوصلج وياي
_هستوني طلعت شسوي راجعه راح اروح الاسواق هاي القريبه اشتري وارجع مشي الجوو حلوو مال مشي.
آرون : اجي وياج
_ماكوو داعي
آرون : اريد اشتري جكاير.
_اممم براحتك
قفل السياره مالته وتمشينه سويه للاسواق مسافه عن بيوتنه علئ الشارع العام.
آرون : ضجتي مني؟
_لا ابد
آرون : نبقه اصدقاء
_اكيد صداقتنه متخرب
آرون : عفيه يلا تعالي.
دخلنه للمحل اشتريت حلويات واندومي اطبخ بيه وكت جوعي ماعرف اطبخ اكلات وكذا اسد جوعي بهذا.
اخذت هوايه خليتهم بسله واخذتهم للمحاسب حسب شكد يطلعون خلاهم بعلاكه طلعت فلوس آرون دفع
_رجعهن خويه اني ادفع حسابي
آرون : شسالفه هنه 5 الف شبيج
_ارجع كلشي اشتريته والله رجع فلوسه عموو لوو سمحت
آرون : عيب بابا اخذهم منج عود من نطلع
_ماريد شيء هاك خليهم الكم
خليت العلاكه علئ الميز وطلعت من المحل جابها آرون واجه وراي يركض
آرون : اليااان اوووكفي شبيج انتِ صدك تحجين زعلتي علئ هيج موضوع تافهه
_انتَ شتريدد آرون شتريد تغريني عود بالفلوس اخرر هميي تراااا انييي شبعانه منهن ممحتاجه ابدد لوو اعيش علئ بس مي ماخذ ربع منك بعد لاتخرب كلشي الله يخلييك.
آرون : مع الاسف عليج هيج تفكرين بيه جنت اعرفج اثقف من هيج شنوو اغريج بالفلوس شنوو اخرب مستوعبه الكلام التحجينه من باب الاحترام واني وياج دخلنه وصديقتي دفعت حسابج مجنت متوقعج تاخذين كلشي بغير نظره هاج هاي حلوياتج وانطيني فلوسي وبعد مادفعلج شيء.
بقيت اباوعله بعصبيه طلعت من جيبي 5 ومديت ايدي اله باوع للفلوس ورجع باوع لعيوني هز راسه باسف اخذهن من ايدي خلاهن بجيبه وعافني وراح.
بقيت واكفه واباوع وراه اعتقد زودتها مجان لازم اعصب بس خلي يعرفني ماتنازل ابد ولا اخذ من احد اني اشتري واصرف بفلوسي ماريد ناس تصرف عليه.
رجعت للبيت وحدي راح هوه ضاج مني دخلت لبيتي خليت الحلويات علئ الميز ودخلت لغرفتي نزعت الكوت والفاف رحت سويتلي نسكافيه.
طلعت فلم اجنبي بجهازي وبقيت اتابع بيه اتصلت عليه سهر بنت خالتي فتحت عليها خط وبقينه نسوالف.
...
اريانا : عشنه ليله حلووه خاليه من المشاكل بس بيها هواي عتاب
مخليني بحضنه يلعب بشعري يرجع بيه ورا اذني.
_تيمور
تيمور ; همم.
_شنوو هل علامه الي برگبتك
تيمور : منج
_لا موو مني اني مابستك هنا
تيمور : هاا اي اسيل هاي ليوم
_اسيل؟
تيمور : أي
_وشدعوه هيج تتقرب منك ومسويتلك علامات !!
تيمور : غير زوجهاا عادي
_ليكون متقرب منهاا
تيمور : شقصدج
_تعرف قصدي كلشش زين.
تيمور : اي
_صدك تحجي.
تيمور : ترا مرتي عادي بينه عقد قرآن
دمعن عيوني اختنكت كلش دفعته من صدره وكمت من يمه دخلت للحمام واني ميته من القهر.
اني شلون راح اصبر علئ هل وضعيه شلون اتقبل يكوون ويه انسانه ثانيه
كملت سبح لفيت المنشفه علئ جسمي بعدني مطالعه فتح الباب تيمور ودخل للحمام توترت وخفت من دخل فجاه.
ابتسم واجه نحوي رجعت خطوات ليورا سحبني من خصري عليه يمشي ايده علئ شعري المبلل يبعده عن كتافي.
تيمور : اشو ضجتي فجاه ورحتي شصار
_كافي تيمور اريد اروح اشوف تيم.
تيمور : اتشاقه وياج والله مواصلها ابد صح تتقرب مني وشرط هيه الي تتحرش مو اني
_اي عادي غير مرتك
تيمور : أي مرتي
_ماصدكت عفتك رحت خطبت وحده ثانيه
تيمور ; زلمه ومن حقي اتزوج شتردين ابقه منتظرج هوواي انتظرت وصبرت هل سنه قررت اتزوج ومن خطبت القدر رجعج الي.
_اممممم ايي
تيمور : شو بلا ارفعي راسج
رفعت راسي اباوعله باس طرف شفتي وخشمي وخدي.
تيمور : شنوو تشارطنه تذكرين؟
_شنوو
تيمور : كتلج تجيني برجليج
_اي غير زوجي عادي
تيمور : خليتج تتنازلين !!
_لخاطر ابنه سويت كل هذا اريد نكون عائله وحده متفاهمين ونحب بعض.
تيمور : واذا كتلج مانكمل سويه.
بلعت ريكي بتوتر وبقيت اباوعله بخوف شديحجي معقوله بعد كل هذا هيج يكول.
_شقصدك؟
تيمور : اريانا يااا اريانا اني تعذبت غير لازم العدل اعذبج حته نكون متساويين شسويتلج هسه اني ولاشي رجعتج لبيتج ومكانتج وحته اخذ الي اريده منج يعني خلص شغلي وياج اني جنت منتظر هل لحظه بفارغ الصبر انو تجيني برجليج تتوسليني اخذج وصار كلشي جنت متوقعه انتم البنات بتصرف وحركه وحده تنغشون شكدد حنينات ورقيقات بسرعه تتقشمرن.
يحجي واني صافنه بكلامه معقوله وصلت وياه الحقاره يسوي كل هذا بيه واني الغبيه نزلت روحي وذليتها عليه بلعت ريكي بخنكه كلبي صاار يوجعني ودموعي ترست عيوني.
تيمور : خلصت معركتي وياج ليوم هذا الي جنت اريدج تحسينه الخيبه " الذل " والكسره كلهن حسستيني بيهن ورجعتهن الج بس بطريقه موو جارحه مثلج لا حلووه وسهله وراح اتركج مثل ماتركتيني خليتج تحبيني وتتنازلين الي واعوفج.
_ليش هيج تيمور ليش ؟
تيمور : اسالج نفس السؤل وتجاوبيني عليه ليش عفتيني بهذيج الساعه الصعبه انيي وياج موو تراضينه بليلتها وجان كلشي تمام مثل هل ليله هسه بالضبط تراضينه وكلشي رجع تمام ليش بلحظه خربتي كلشي وكسرتي روحي ولج حطمتيني والله اريانا حته بجي بجيييت علييييج اشهر انيي بالسجن اعض باصابعي من الندم شلوون داريتج وخفت عليج اكثر من روحي وغدرتيني حسي بنفس الوجع انيي احبج ايييي احبببج بجنون بخبال احبج والله بس ماااا انزل من كرامتي بعددد والي يلعب وياي اندمه علئ الساعه الصاااار بيهاااا اخلي يشوف شيطان موو انسان عااادي افترت الدنيا ورجعتلج نفس الحظات ونفس الاحداث بس بغير طريقه .
خليت ايدي علئ حلكي واني ابجي بصوت مسموع اصعب لحظه تمر عليه تمنيت ميته ولا صاير كل هذا بيه
خلاني اكرهه واكره الساعه العرفته بيها والي رجعتني اله عمري ماتخيلته يكون اناني وحقود هيج.
تيمور : تدرين جانن هذني دموعج يحركن روحيي حرك جنت احارب الكل عليج المافيا ماكوو اخطر منهم عاركتهم عليج حاربت اهلي واختي بنت ابووي خليتها تكرهني وتعوفنه علئ منوو عليج انتِ بس انتِ شسويتيلي كلشي ماسويتي شلوون جازيتني ؟ بالغدر بالكسره بالخيانه كلشي عكسي سويتي عمرج مافكرتي بيه ولو شويه بس واني جنت استاهل منج حنيه وحب لأن جنت سند الج.
خليت ايدي علئ اذاني اسدهن ماريد اسمع شي ماااريد اتحطم اكثرر صرت ابجي بصوت مسموع واهز براسي بـ لااا.
_كااافي كااافي خلص كااافي
تيمور : تكدرين تطلعين من غرفتي هسه روحي يلا خلص وقتج بعد وانتقامي منج خلصته ليوم .
رفعت راسي اباوعله واني دموعي عشره عشره ضربته علئ صدره بقوه وهمست بصوت مخنوك
_راح تتندم والله اذا ماعذبتك اكثر من هل عذاب اني موو اريانا انتَ متستاهل تضحيتي واهتمامي الك كلشي متستاهل واني ماغلطت يوم عفتك لانك انسان وصخ وتفكيرك اوصخ منك الله ياااخذك.
عفته وطلعت من الحمام كسرتي متنوصف بجيت من كل كلبي رجليه صارن مايشيلني وصلت للباب واني كوه اتنفس اريد ارتاح ماكدر.
كعدت علئ الارض واني ابجي وارجف شصار بحياتي صرت لعبه
شلون كدر يسوي هيج بيه شهل حقد الي بگلبه سوه بيه مثل ماسويت واكثرر عذبني عذاب مجنت متخيلته ابدد كلشي جان بالي نسه الصار وانطاني فرصه اثاري كلشي جان مخططله خلاني اتنازله
كسر كبريائي وحطم مشاعري بيده كرهني بنفسي حيل.
لافه بس المنشفه عليه ماكدر اطلع هل شكل اخذت فروه عنده شتائيه طويله معلكها لبستها وطلعت رحت لغرفتي اني وتيم هيه مقابيل غرفه تيمور
دخلت للغرفه وقفلتها عليه اخذت ملابس لبست وكعدت علئ الارض
لميت رجليه علئ صدري ارجف احس البرد دخل بعضامي كل ذره بجسمي ترجف خليت راسي بين رجليه وبجيت بصوت مسموع كل شكه اشهكها احسها توكف كلبي صرت اناشغ مثل الطفل الصغيرر.
_ياااربي تعبببت والله تعبت ليش هيج يصير بيه كل ماكوول خلص راح تتغير حياتي ترجع للصفر انييي شمسويه واتعذب هييج شمسووويه.
اخذت اليل كله ابجي عيوني احسهن طفن من البجي البجيته من صدك عذبني هل مره خلاني اكرهه روحيي حيل.
تمددت علئ الارض واني صافنه ودموعي تنزل بصمت كل كلمه حجاها احسها حفرت گلبي شكدد حاقد عليه لعد شكدد كارهني ماهمه وضعي ابد ماكسرت خاطره ابد دخت كلش غفيت الفجر.
كعدت علئ صوت تيم يبجي ماكدر افتح عيوني مورمات ومنفخات من البجي البجيته ومصخنه كل جسمي يرجف اريد اكوم ماكدر والله.
اباوع للساعه بـ 9 الصبح كمت علئ ابني شلته اخذته بدلتله حفاظته وملابسه وسويتله ممه رضعته وانطيته علاجه اسوي واشتغل واني احس روحي فاقده
خليته بالارض يلعب انطيته العاب بقه يلعب بيهن كعدت مقابيله علئ الارض لميت رجليه اباوعله واني صافنه وعيوني صايره حمر من الصخونه والبجي.
_انتَ السبب الوحيد الخلاني اتنازل الابوك انتَ جزء من عذابي ومعاناتي وياه هسه ليش صرت ليش انولدت بهل وضع وهل عائله غلطه صرت غلطه المفروض ماتكون موجود مايصير رابط بيني وبين هذاك الظالم الحقير.
خليت راسي بين رجليه وبجيت من حركت كلبي احجي علئ ابني هوه شنوو ذنبه بكلشي صاار اني الي ماعرفت اتصرف اني الضعيفه الي بسرعه ينضحك عليه بكلمتين انغش.
من طيبه كلبي وفطرتي بسرعه اصدك ماتخيل ناس هيج حاقده وتريد تأذيني.
اندك باب الغرفه قافلتها عليه من لبارحه مسحت دموعي حيل وكمت فتحت الباب جان تيمور.
باوعلي بتركيز عيوني مورمات من البجي وضعي الي يكسر الخاطر بلع ريكه بتوتر شتت نظره عني
راح علئ تيم يبوس بيه بقيت صافنه بنقطه ماريد اسمع اصواتهم حته ماريد اكون وياهم طلعت من الغرفه نزلت جوه خليت تيم وتيمور بالغرفه.
رحت للمطبخ كعدت بيه ارجف من الصخونه جسمي احسه صاير مثل النااار وبردانه شويه ودخلت آيلا للمطبخ
آيلا : صباحوو يحلوه
_صباح النور
آيلا : اريانا شبيج ولج شصاير لـيش هيج حالتج.
_ماكو شيء مريضه
آيلا : كومي نروح للدكتور شوفي عيونج وجهج صاير بيج تيمور وينه ماشاف وضعج شنوو.
_مابيه شيء هسه اصير زينه.
آيلا : يازينه يمعوده
_آيلا رجاء عوفيني مابيه حيل احجي عوفيني بحالي.
آيلا : براحتج
عافتني وطلعت مستغربه من وضعي دنكت راسي بقهر شيء منكسر بداخلي احس روحي انطفت من صدك.
سوت اسينا ريوك واخذته الهم يتريكون اني مارحت واصلاً مابيه حيل جسمي يرجف.
تيم منزله تيمور منطي الامه خلصو ريوك نقلت آيلا الصحون تباوعلي بحزن عرفت زعلانه او صايرر شيء بيني وبين تيمور
شويه ودخل تيمور للمطبخ يسوي نفسه يشرب مي يباوعلي بقيت مدنكه راسي ماريد حته اشوفه.
تيمور : احم اكلج اريد اسوي البيان والجنسيه مال تيم باسم منوو مسجل هسه هو؟
مجاوبته ولاكانو سمعت شيء منه سحب نفس قوي وزفره اجه وكف كدامي وكال.
تيمور : احجي وياج ليوم ماعندي شيء واريد اخلص الجنسيه باسم منوو مسجل تيم.
رفعت راسي اباوعله بلع ريكه من شاف شكلي وعيوني همست بصوت هادئ.
_موو ضروري يكون مسجل باسمك ابني يبقه وياي تحلم توصله
بقه ساكت عفته وطلعت للغرفه تمددت علئ السرير نعسانه وتعبانه غفيت شويه فزيت علئ صوت تيم يبجي بالغرفه.
شفته بالكاروك يبجي اباوع للساعه بـ 12 الظهر شوكت مر هل وكت عبالي نايمه شويه صعدت للغرفه بـ 10 ونص تقريباً
كمت الابني شلته اسكت بيه طلعتله حلويات خليته ياكل بيهم ورحت سويتله ممه.
رجعت عليه خليته بحضني رضعته الممه وعفته بالارض يلعب دخلت للحمام غسلت وجهي وتوضيت وكعدت اصلي.
اريد ارتاح اريد تطفه هل نار الي بداخلي احس روحي بحرب يوميه سالفه شكل يوميه شيء صاير.
خلصت صلاتي اباوع لتيم راح يريد يطلع من الغرفه كمت واني لابسه حرم الصلاه اركض وراه طلعت شلته قبل لا ينزل علئ الدرج اباوع تيمور وياه خطيبته اسيل كاعدين بالصاله يسولفون.
اول مره اشوف بنيه مخطوبه تجي وتكعد بيت خطيبها غير تنتظر منا لحد الزواج بس هيه تشتغل وياه يمكن جايته علئ شغل او غير شي
رفع راسه تيمور يباوع شافني واكفه واني شايله تيم اول ماشفته شافني ابتعدت عن الدرج ورجعت للغرفه.
قفلت الباب علينه اني وتيم اخاف عليه يطلع ويوكع هوه راسه بعده لحد هسه متاذي ولازم باجر نرجع بيه للدكتور.
بقيت بالغرفه لليل ماطلعت ولا اكلت ولاشربت شيء الصخونه احسها كسرت اعضامي تكسر.
تيم هم مل من العب والاكل ونام خليته بكاروكه ورجعت تمددت اتصل جهازي رفعته جانت اليان.
_الو
اليان : صدك لو مكالو الگه احبابه نسه اصحابه ليش متسالين عليه ولج
_اليان
حجيت هل كلمه ونزلن دموعي احس اريد اشكي لشخص اريد ابجييي هوواي علئ حياتي ومستقبلي الي خرب كله.
اليان : شبيج اريانا الوو ليش تبجين شكوو شصار تيمور سوالج شيء
_اليان تعالي اخذيني يمج تعبانه حيل
اليان : بس اهدئي واحجيلي شنوو صار ليش هيج منهاره شكوو.
_تيمور رجعني علئ حيله دمرني كلش اريد اموت والله تعبت حيل افكر انتحر واخلص بس ابني يكسر خاطري اكول منوو يبقاله هم يعيش ويه هذول العالم ويحس مثل احساس امه؟
اليان : تخبلتي شنوو هل كلام ع شنوو تنتحرين ميخلوني ادخل جان هسه اجيتج اطلعي من البيت خليني اشوفج ونحجي لاتهتمين لتيمور هوه من زمان هيج حاقد علئ الكل يحب بس نفسه نرجسي الئ ابعد الحدود.
_لا لا اليان ابد لاتجيني ولا تدخلين صدكيني تشوفين تيمور هادئ وممسوي شيء بس هوه من جوه لجوه تخطيطاته كلهاا متنفهم وشيطانيه.
اليان : تمام هسه اهدئي ولاتبجين خلص كوني قويه يوم واحد خليج قويه ولاتهتمين لاتخلصينها بس بجي ولج خلي عندج شخصيه هوه يجيج برجلي والله يتندم.
_هوه هيج من ليوم راح اتغير وماهتم ابد بس ماكدر اتحكم بدموعي ينزلن وحدهم والله حيل انقهر.
اليان : المشكله انتِ عاطفيه زياده عن الزوم حاولي تكونين قويه
_انشالله انتِ وين رحتي اسفه ماحجيت وياج هل فترا بس ملتهيه بضيمي تيم وكع من الدرج جان مات لوو ما الله ستر
اليان : ياااا وهسه شلونه زين ؟
_مضمد راسه صار بيه فطر بالجمجمه وباجر لازم نرجع نسويله اشعه وعلاجات ننطي.
اليان : ياعمري سوده عليه شلون خليتو يطلع وحده غير تنتبهون.
_تيمور السبب بكلشي هوه خلاه وكع
اليان : اوووف منه شبيه تيمور مجاي افهم حته ابنه ماسلم من شره !!
_مليييت اليان طلعت روحي والله
اليان : اصبري لازم يصيرلها حل صدكيني ماتبقين هيج
_هوه مابقه وياه بعد راح نطلك
اليان : وتيم؟
_ابني يبقه يمي هوه يريد يتزوج اني ادخل للمحكمه واكلهم اني ماتزوج وابقه اربي ابني وهوه اصلاً هسه ممسجل باسمه يعني شوكت ماريد اخذه وتيمور ميكدر يسوي أي شيء ضدي.
اليان : والله ماعرف هل مره مراح ادخل ولا راح اشجعج علئ هيج قرار لان اخر مره من اخذتج حملوني كل المسؤليه وتأذيت هواي
_هسه انتِ وين عايشه
اليان : اشتريت بيت وباجر رايحه لتركيا ارجع كل فلوسي الشغلتهن
_بيت؟ منيلج الفلوس وشلون اثثتي ليش ما اجرتي شقه موو احسلج
اليان : مالكيت كلهن غاليات والسمعه البيهن موزينه كلش
_ومنين دبرتي كل هل امور
حجتلي كل السالفه بقيت صافنه اليان مو احسن مني هم تعذبت بس ع اقل ماكوو شخص بحياتها حره تسوي الي تريده عكسي
اليان : يلا حبيبتي اخذي راحتج
_باي.
سديت الخط منهاا ورجعت راسي علئ المخده دايخه وحايره شلون اتصرف كلشي اريده هسه انو اطلك من تيمور واخلص منه مستحيل اتقبله بعد خلص اذا مره ذليت روحي عليه فأ جانت لخاطر ابني لاكثر جنت اريد ابني زواجنه واصلح غلطي
بس هوه ميستاهل أي شيء اسويله يبقه تفكيره حقير وصخ.
اندك باب الغرفه غلست مافتحته ادري بيه تيمور لفيت راسي بالبطانيه بقه هواي يدك بالباب واني مغلسه اخر شيء اختفه الصوت
غمضت عيوني واني تعبانه ماحس اله انشال الغطه عن وجهي فتحت عيوني بهدوء جان تيمور كعد يمي خله ايده علئ جبيني شافني مصخنه وجسمي صاير نار.
تيمور : ليش حابسه روحج بالغرفه ومصخنه وماتحجين
_اطلع من غرفتي
تيمور : عناد متعانديني سمعتي كومي يلا اخذج للدكتور ينطونج علاج شيء هاي حالتج من الصبح تردين تموتين لا اكل ولا شرب
_ههه هل كل هامتك من الصبح هسه يلا فكرت تاخذني لدكتور؟
تيمور : آيلا حجتلي عليج مادري بيج مريضه
_شوفتك تمرضني اطلع من غرفتي واني اصير زينه
تيمور : بدون حجي فارغ اوك كومي يلا
_وخررر اييييدك عنييي وخر
دفعت ايده عني بقوه ورجعت ليورا سحبت الغطه عليه واني ارجف مسح وجهه بتوتر سحب نفس قوي وكال.
تيمور : وبعدين وياج شوكت تتغيرين؟
_اتغير؟ ليش منوو يستاهل حته اتغير عليه شوف نفسك علم نفسك لاتجي تعلمني ومسوي نفسك حنيييين عليه رووووح مناااا تيمور اطلع ممتحمله وجووودك هنااا اطلع
تيمور : طالع بس خلي شيء واحد بالج اني موو ظالم شما سويت ماتهنوين عليه.
عافني وطلع من الغرفه بلعت ريكي بتوتر بقيت لافه روحي بالحاف واني ارجف.
شويه وصعدت عليه آيلا شايله صينيه اكل خلتها علئ الميز واجت كعدت يمي خلت ايدها علئ جبيني وكالت
آيلا : ليش هل عناد كله راح تموتين جسمج كاب نار
_ممعانده كلشي مابيه
آيلا : يلا تعالي اكليلج شيء حته تشربين علاج تنشطين روحج منتهيه من الصبح لحد هسه ساعه بـ 8 وانتِ ممخليه شيء بطنج حته تضرين ابنج تيم هيج
_ماجوعانه والله من اجوع اكل
آيلا : صدكيني من تصومين ومتاكلين ولا تشربين مراح تضرين بس نفسج حته لو زعلانين او صاير شيء بينكم لاكطعين علئ نفسج الاكل والشرب
_صدكيني موو من عنده ماكل ميهمني اذا جوعانه اكل بس اني مالي نفس ممشتهيه شيء
آيلا : غير لأن مريضه ومخلصه ليوم كله نايمه اكيد متشتهين كومي يلا غسلي وتعالي اكلي سويتلج اكل اني والله طبخت علمودج
_حبيبتي والله ماشتهي تسلمين.
آيلا : لخاطري عليج الله حته لوو شويه ترجعينهم بيدي فدوه كومي شويه
استحيت منهاا حيل لحت كمت غسلت وكعدت وياها اكلت شويه كوه اجبر روحي علئ الاكل نفسي مسدوده مامشتهيه شيء ابدد
آيلا : رايحه اجيبلج علاج واجي
_عندي علاجات هسه اشرب
آيلا : اسويلج جاي يعدل مزاجج؟
_لا ماريد
آيلا : صدك نسيت اكولج طلعت حامل
_صدوك الف مبروك حبيبتي
آيلا : عمري الله يبارك بيج ..يلا اني نازله اذا حتاجيتي شيء بس تعالي كوليلي
_حبيبتي سلامتج كلشي ماريد انتِ هسه هم حامل قللي من حركتج واهتمي لنفسج
آيلا : انشالله
عافتني وطلعت من الغرفه طلعت علاج وشربت شويه وكعد تيم اخذته ونزلت جوه
جان الكل كاعد يتعشه تيمور عيونه علينه من نزلنه لحد ماصرت بالصاله جوه
تجاهلتهم اخذت ابني وطلعت للحديقه عفته يلعب بالحديقه لميت رجليه علئ صدري ولفيت روحي بالجرجف من صوف كلش دافي اباوع الابني
طلعت ام تيمور شالت تيم تبوس بيه وتلاعبه هوه يضحك
جنان : بدلي ملابسه اريد اخذه وياي
_وين
جنان : الاهلي رايحه اشوف اخوي مريض واريد اخذه وياي
_بس فدوة لاتخلي وحده
جنان : لاتخافين عليه وياي
هزيت راسي بأي اخذته من ايدها ورجعت صعدت بيه غيرتله ملابسه سويتله ممه شربته جهزت اله جنطه كلشي يحتاجه ونزلت انطيتهم الام تيمور
تيمور : ها وين؟
جنان : راح اخذه وياي لبيت خالك
تيمور : وين ماخذته وهوه مريض ومضمد راسه
جنان : اريدهم يعرفونه اخلي خالك يشوفه لاتخاف عليه عندي كلشي مايصيرله
تيمور : تمام بس رجعي من وكت ولاتنسين تشربينه ممه يفضحج هناك اذا تخلينه جوعان
جنان : لا يمه وليدي شلون مانطي اني اشربه
هز راسه بأي باوعلي عفتهم وصعدت للغرفه مالتي مامنه علئ تيم ام تيمور تموت عليه صح حاقده عليه بس علئ ابني تحبه حيل.
بقيت وحدي بالغرفه مر الوقت بسرعه صارت ساعه بـ 11 بليل وام تيمور مراجعه كلبي صار يلوب علئ تيم كل شويه واكفه يم البلكونه اباوع بلكي رجعت ماكوو.
صارت بـ 12 ونص وهيه ماكوو نزلت جوه متوتره حيل وخايفه علئ ابني معقوله صارله شيء خاف ام تيمور هم متريده وسوتله شي افكار هواي براسي.
بقيت واكفه بالحديقه اباوع بلكي يجون فزيت علئ شخص خله ايده علئ متني درت وجهي جان قصي.
قصي : ها شبيج شدسوين هنا بهيج وقت؟
_امك راحت لبيت خالك واخذت تيم ولحد هسه مراجعه فدوه اتصل عليها وشوف ليش تأخرت خايفه حيل علئ ابني.
قصي : يمكن تبات لاتخافين ابد ماعليه شيء.
_تبات؟
قصي : اوكفي خليني اتصلج عليها واشوف ترجع لوو لٱ.
هزيت راسي بأي اتصل علئ امه اني اباوعله شوكت يخلص ويحجيلي.
_هااا
قصي : هسه شويه وراح تجي.
_تمام
قصي : ارجعي لغرفتج وهسه تجي امي
هزيت راسي بأي مشيت عثرت رجلي وكعت اجاني يركض قصي كومني من الارض احس رجلي انلوت لزمت ايده حيل واني متوجعه دخل تيمور للبيت مدري وين جان طالع طفه سيارته ونزل يباوعلنه بنظرات تخوف.
اني لازمه ايد قصي حيل وهوه مخلي ايده علئ ظهري.
تيمور : خير؟
قصي : خيرات يحلو
تيمور : اريانا !!
ابتعدت عن قصي بسرعه عفتهم ودخلت للغرفه كوه امشي من رجلي صعدت لغرفتي فوك ماكوو دقايق ودخل تيمور للغرفه عيونه بكصته وضايج.
تيمور : شستويييين ويه اخووي بنص اليل بالحديقه؟
_تيمور اطلع من غرفتي ماااالي خلكك تمام
تيمور : لاتغيرين السؤال جاووبي
_شتريد تعرف هاا هم تشك بيه هم متصدكني واني ممطره اجاوبك ولا حته اشرحلك لأنو ميهمني شلون تشوفني ولا يهمني ان رضيت عني او لا لانو راح نطلك مالك حق عليه بعد ابدددد.
اجاني لزمني من حلكي بقوه وعصره حاولت ابعده ماكدرت حيل انوجعت
_عوووفني
تيمور : لوو شما يصير تبقين تخصين تيمور محد يوصلج ابدد حته لوو طلكتج صدكيني محد يتجرأ يوصلج ابددد.
دفعته عني بقوه واني احس روحي تفور منه.
_منوو انتَ وتقرر حياتي صدكني اول منطلك راح اتزوج واخذ الاحسن منك وابني اربي عندي واخليك تتندم علئ كلشي ثق بالله مراح اخليك ترتاح ابددد
تيمور : هههههههه اااخ اريانا ااخ شسوي لروحي الي ماتكدر تأذيج متكدرين تزوجين اصلاً ولا راح تكملين حياتج ويه غيري.
_اكدر والله اخر همي انتَ بعد مثل مانتَ هسه خطبت وراح تزوج اني وعد اتزوج واخليك تشوف كلشي بعينك.
تيمور : ماتزوج بعد خلص ليوم فصخت الخطوبه ...
