رواية انتقام مؤجل الفصل الثالث بقلم محمود الأمين
الجثتين كانوا لراجل وست، والراجل هو الدكتور عادل، الدكتور اللي معاه الصيدلية اللي كنا بنحقق معاه عشان العلاج اللي بيخص العصب السابع، واللي مات في الصيدلية عنده سمير، الولد اللي كان شغال عنده.
وواضح إن الاتنين ماتوا بسبب تسريب الغاز اللي كان في الشقة.
بصيت للرائد أدهم وقولتله:
_ تفتكر إن كل اللي بيحصل ده صدفة؟ من بداية جريمة المهندس طارق اللي قتل مراته وبنته، وتحليل العينة أثبت إنها مش بنته وإن مراته كانت على علاقة بحد، مرورًا باللي حصل في الصيدلية وموت الولد اللي عنده 17 سنة مسموم بمركب كيميائي، وبعدها موت الدكتور الصيدلي نفسه هو ومراته بسبب تسريب غاز. الموضوع لا يمكن يكون صدفة أبدًا يا أدهم.
= طبعًا يا فندم، مش صدفة. في حد بيحاول يخفي ويدفن كل دليل ممكن يوصلنا للي عمل كده في المهندس طارق، خصوصًا بعد موضوع الحقن اللي حضرتك اكتشفته قبل ما نكتشف الجريمة دي كمان.
_ آه صحيح، فكرتني. مش إنت قولت إنكم عملتوا تحليل سموم لطارق؟ إزاي اللي أخد منه عينة الدم ماخدش باله بعدد الوخزات الكبير اللي موجود في دراعه؟
= بصراحة مش عارف يا فندم، بس بعد ما نخلص هنا ممكن نروح للدكتور اللي سحب العينة من طارق، وأكيد هيكون عنده جواب على السؤال ده.
....
في الوقت ده وصل وكيل النيابة، ومعاه رجالة الطب الشرعي والمعمل الجنائي. وكيل النيابة دخل وبص على الجثتين واتمشى في الشقة، ومن الواضح إنه أخد باله من حاجة إحنا ماخدناش بالنا منها، ولكن الحاجة دي كانت غريبة.
إزازة شمبانيا من نوع غالي كانت موجودة في المطبخ، ومشروب منها. ورجع وكيل النيابة واتكلم وقال:
_ دكتور صيدلي، الصيدلية بتاعته على القد وصغيرة، ومش معاه مصدر دخل غيرها. تفتكروا ممكن يكون جاب إزازة الشمبانيا دي منين؟!
= قصد حضرتك إن ممكن تكون الإزازة دي ليها علاقة بموتهم، وتكون دي جريمة قتل، مش مجرد تسريب غاز؟
_ بالظبط يا حضرة الظابط، ودلوقتي هنشوف دكتور الطب الشرعي هيقول إيه.
...
وفعلًا، بعد شوية، دكتور الطب الشرعي نادى علينا وقال:
_ الفحص المبدئي بيوضح كذا حاجة. الموضوع فيه شبهة جنائية. أول حاجة هي ريحة الفم، واللي بتدل على إنهم كانوا سكرانين، في ريحة مشروب كحولي واضحة خارجة من الفم عندهم هما الاتنين، بجانب وجود مادة لزجة عند المناخير، ودي اللي استخدمها المجرم عشان يكتم نفسهم ويتأكد إنهم اتخدروا ومش هيصحوا لو شموا ريحة تسريب الغاز.
= يعني قصد حضرتك إن في حد خلاهم يسكروا في البداية، وبعدين كتم نفسهم وفتح الغاز؟
_ ده التصور اللي عندي. أكيد تشريح الجثث هيبين إذا كان في حاجة تانية ولا لأ، وإن شاء الله في أقرب وقت تقرير الطب الشرعي هيكون عندكم.
....
خلصنا كلام مع الدكتور، وبعد ما اترفعت البصمات واتجمعت الأحراز، اتنقلت الجثث للمشرحة عشان يتم التشريح النهائي، ومن ثم رفع تقرير الطب الشرعي للنيابة.
وبعد ما خلصنا، اتحركت أنا والرائد أدهم على المعمل الجنائي، وقابلنا هناك الدكتور اللي سحب عينة الدم من طارق عشان يشوف هل في سموم في الجسم ولا لأ. والتحليل أظهر إن مفيش سموم.
وفعلًا قابلناه، كان اسمه الدكتور عمرو، وكان بيخلص شغل. رحب بينا، وبدأت أتكلم معاه:
_ دكتور عمرو، حضرتك اللي سحبت عينة الدم من المهندس طارق، المتهم بقتل مراته وبنته، عشان تشوف هل كان في جسمه سموم أو كان بيتعاطى حاجة؟!
= أيوه، أنا هو. في مشكلة ولا حاجة؟!
_ هي في الحقيقة مشكلة، ومشكلة كبيرة أوي كمان. إحنا طول الفترة اللي فاتت كنا شاكين إن العلاج اللي بيخص العصب السابع تسبب في تدهور حالة المهندس طارق ووصله للحالة الصعبة اللي هو فيها دلوقتي، ولكن العلاج طلع مفيهوش أي حاجة، ومطابق للمواصفات 100%. ولكن اكتشفت إن المهندس طارق في وخزات كتير بتدل إن طارق كان بيضرب حقن كتير في المكان ده، فإزاي حضرتك ما لاحظتش حاجة مهمة زي دي؟
= حضرتك عارف إن إحنا في الشتا، والمتهم ده جه ولابس شتوي، وإحنا دورنا إننا بندور على عرق في الإيد عشان نقدر نسحب منه عينة الدم، وأنا سحبت الدم من المعصم، وأكيد الوخزات دي مش موجودة في المعصم.
_ لأ، هي مش في المعصم، هي عند منطقة الكوع ولكن من فوق. حضرتك فاهمني، مش كده؟
= أيوه، أيوه، فاهم حضرتك. فعشان كده أنا ما شوفتش الوخزات دي. ولكن بأكد لسيادتك إن جسم طارق ده مفيهوش أي حاجة تدل إنه كان بيتعاطى مخدرات، سواء حقن أو أي حاجة تانية. ولو حضرتك مش واثق من كلامي، ممكن تخلي أي دكتور تاني في المعمل يعيد التحليل، ولكن صدقني ده اللي حصل فعلًا.
....
في الوقت ده وصلني تليفون من القسم بيبلغوني إن طارق بيموت، وإن جسمه بيتنفض بطريقة غريبة، ولازم يتنقل المستشفى حالًا.
اتحركت بسرعة أنا والرائد أدهم على القسم، وإحنا في الطريق كلمنا عربية الإسعاف اللي سبقتنا على هناك.
وأول ما وصلنا، لقينا جسم طارق بيترعش وبيعمل أصوات غريبة، ده غير عينيه اللي كان فيها كتل دم، ودي كانت أول مرة أشوف حالة بالصعوبة دي. وعشان كده اتنقل بسرعة على المستشفى، وعشان صعوبة الحالة دخل العناية المركزة بسرعة، واتعملت أشعة على المخ وتحاليل مستعجلة عشان يعرفوا المريض ده بيعاني من إيه؟!
الفضول كان هيموتني، إيه اللي وصل المهندس طارق للحالة البشعة اللي أنا شايفها دي؟! لدرجة إني قعدت في المستشفى 48 ساعة مستني أعرف إيه نتيجة الأشعة والتحاليل، لحد ما الدكتور طلب يتكلم معايا.
_ أنا مش عارف أقول لحضرتك إيه!.. أنا هنا في المستشفى بقالي 10 سنين، وياما وصلتني ناس حالتها خطيرة وبتموت، سواء في سبب جنائي لكده أو لأ. ولكن اللي عمل كده في المريض اللي جوه ده شخص عاوز يموته بالبطيء. التحاليل والأشعة اللي قدامي بتقول إن في تلف في 40% من خلايا المخ، والإشارات بتاعة المخ انهارت لدرجة إن الشخص ده ممكن يتصرف تصرفات غير بشرية، وده بسبب إن الجزء اللي اسمه الفص الجبهي في المخ تضرر بشكل كبير، وده هيأثر عليه في كل التصرفات، وهيخليه مش طبيعي في تصرفاته، وده فعلًا اللي حصل ووصلوا إنه قتل.
= طيب السبب في كده الحقن اللي كان بياخدها؟!
_ بالظبط. المادة اللي في الحقن دي بيختفي أثرها من الجسم بعد ساعتين، لكنها بتأثر على الدماغ، وممكن تصيب الشخص بأمراض خبيثة كمان زي السرطان.
....
كلام الدكتور كان صدمة كبيرة بالنسبالي. مين الشخص اللي ممكن يعمل كده ويوصل بني آدم للحالة دي؟ حتى لو بينتقم منه عشان حاجة معينة، ميوصلش بالتفكير لكده.
رجعت المكتب بعد ما سمعت الكلام اللي قاله الدكتور، وإن دلوقتي طارق دخل في غيبوبة، والله أعلم هيفوق منها إمتى، ده لو فاق أصلًا.
كنت لسه هقعد على الكرسي، ولكن في الوقت ده العسكري دخل المكتب وقال إن في واحد عاوز يقابلني بره ضروري. في البداية مكنتش قادر أقابل حد، ولكن لما عرفت إن الشخص ده يبقى صاحب سمير، الشاب اللي كان في الصيدلية، خليت العسكري يدخله بسرعة.
وأول ما دخل الشخص ده، عرف نفسه وقال إن اسمه ياسر، وإنه صاحب سمير، وإنه جاي يقول كلام مهم في القضية. واتكلم وقال:
_ سمير منتحرش زي ما كل المواقع كاتبة، سمير اتقتل. هو كان بيكلمني على الواتساب، وعرفني كل حاجة.
= مين اللي قتله؟!
_ الدكتور صاحب الصيدلية اللي اسمه عادل. أصل سمير اكتشف إن الدكتور عادل وواحد تاني عاوزين يموتوا مريض، ولما واجه الدكتور عادل اتقتل. وأنا مش جاي أقول كلام كده وخلاص، سمير كان مصور فيديو للاتفاق اللي تم ما بين الدكتور وما بين الشخص ده، حضرتك ممكن تشوف بنفسك.
...
مسكت التليفون من الشخص ده، وبصيت عشان أشوف مين الشخص اللي مدوخنا، واللي عمل كل ده... والصدمة إن الشخص ده يبقى...
