رواية كيف تصطادين عريسا الفصل الثالث بقلم مريم سمير
بصلي وابتسم ب خوف
_ احتمال كام في المية تبقي خرجتنا بكرة الفجر لو قضينا الليلة هنا؟؟
= نعم؟؟؟؟؟ هي العربية باظت؟
_ شكلها كده
= طيب عادي ، صلحها
_ أصلحها ازاي؟
= مش انت مهندس!!
_ مهندس مدني
= طب وليه مدخلتش هندسة ميكانيكا؟
_ معلش مجموعي مجابش ، هو دا وقته ؟
نزلنا من العربية وفتح الكبوت _ مريم افتحي الفلاش
فتحت الفلاش ونورت بيه
_طب ايه هتصوريني امتي؟ أنتي حاطة الفلاش في عيني؟
قفل العربية وبصلي _ الحمد لله
= ايه صلحتها؟
_ لاء ، العربية والله اعلم شكلها فيها عطل
= اقسم بالله؟ انت جايب مجموع هندسة بالغش يا احمد؟
_ ليه ؟
= امال هي مبتشتغلش ليه ؟؟؟ ما عشان فيها عطل!!
جت عربية نص نقل وقفت قدامنا
° لا حول ولا قوه الا بالله
_ ازيك يحاج
° دا شكل العربية باظت ، لا اله الا الله
_ طب ايه يحاج هتعرف تساعدنا؟
° لا اله الا انت سبحانك اني كنت من الظالمين
رديت وانا متعصبة = هو فيه ايه يعمو هو حضرتك جاي تقول اذكار المساء؟ دا ايه الشوري دي
° كان علي عيني اساعدكم والله
_ امال وقفت ليه يحاج؟؟
° بطمنكم ، في رعاية الله
خبط أيدي علي جبهتي = أنا هرن عليهم في البيت أطمنهم
_ وانا هفتح فيديو يوتيوب ازاي هصلح العربية
مسكنا فوناتنا وبعدها بصينا لبعض
قولنا في نفس الوقت : مفيش شبكة!!!!
= هنموت هنا
_ لاء فيه حلول
= اه طبعاً .. يا قطاع طرق يا تجار أعضاء
_ بس انا عندي حل
= هو انا علي طول كده لازم لما أفرح تقلب معايا ب هم
_ يمريم..
= لا حول ولا قوه الا بالله ، بس انا كان نفسي اعيش السنادي
_ يا..
= هو يا عملية سطو يا اغتيال مفيهاش تالت
زعق _ ما خلاص بقي انتي ايه مبتفصليش؟
= انت بتزعق لمين؟
_ تصدقي فعلاً هي دي المشكلة دلوقتي؟؟ ، بصي كده هناك
= ملهي ليلي ؟؟ آمنت بالله ، يعني بدل ما تعمل لأخرتك تفكر هتشرب ايه؟
_ لاء مهو مش قصدي علي..
= مكنتش اتخيل ابدا إن اخلاقك بالشكل دا ، عاوز تشربني حاجة أصفرة وترجع تشيلني تجيبني العربية؟
_ اشيلك ايه انتي مش شايفة نفسك دا انتي معدية الميت كيلو
ضحكت = لاء بجد انت التربية معدتش عليك ، ربنا يهديك
شوح ب أيده وبعد كده مشي = احمد انت اكيد مش هتسيبني لوحدي هنا!
_ تصدقي بالله؟ لو طلع علينا حد لأسلمك ب أيديا دول
= انت رايح فين ؟
_ أنا كنت بشاورلك علي الفندق!
بصيت علي الفندق الي قصادي = طب ليه سوء الظن؟
_ انتي بتسأليني أنا؟
= طب ما تحاول تصلح العربية ؟ اصل انا مش بايتة في فندق برا البيت
_ لاء مهو..
= انسي مستحيل
_ أنا بس..
= وترجع تتفق معاه يقولنا مفيش غير أوضة واحدة وتعملي فيها مصدوم لكن مضطر
حط أيده علي وشه _ مريم؟؟
= نعم
_ احنا هنروح نسأل هناك علي ميكانيكي
= طب ليه انا متسرعة؟؟
زعق _ انتي بتسأليني أناااااا ؟؟
دخلنا الفندق ووقفنا عند الريسيبشن
_ لو سمحتي ، متعرفيش ميكانيكي شاطر يصلحلنا العربية ؟ عطلت بينا علي الطريق
° ولا يكون عندك فكرة يفندم ، هكلم الأسطا حمدي حالاً
_ متشكر جدا لذوقك
ممكن تقعدوا تستنوه هنا
قعدنا علي كنبة وبصلي _ انتي كويسة؟
= اه الحمد لله، يوم من أوله لأخره مش مصدقاه
_ خير إن شاء الله محصلش حاجه
= زمانهم قلقانين علينا ، بابا زمانه..
_ متخافيش أنا هفهم باباكي كل حاجة
= بس هو هيفضل يزعق ومش هيقتنع واكيد مش هيخليني أخرج لمكان برا البلد تاني
_ ثقي فيا صدقيني مش هسيبه غير لما يصدق ويقتنع إن الغلط كان مني وانتي ملكيش ذنب
= مش عارفة لو مكنتش موجود كنت هعمل ايه ، شكراً يا احمد ، من واحنا عيال وانا طول ما بحتاجك بلاقيك من غير حتي ما اطلب
_ احنا مش ولاد خالة؟
= يعني، ممكن بعد الي عملته نرجع تاني
_ بتتكلمي بجد؟؟؟
هزيت راسي _ طيب ممكن اسألك سؤال ؟
= اكيد، إسأل
_ ليه مع انك مبتفكريش في الجواز..
= منا عرفاك مش هتسكت غير لما تعرف
ضحك _ محتاج أفهم ، بتكرهي الرجالة ودي أنا عارفها من زمان ، مش عاوزة تدخلي في الجوازة الي مشتركة فيها العيلة كلها ماشي مفهوم ، بس ليه بتكتبي عن حاجة انتي متحبيهاش ولا حتي مقتنعة واحد في المية بيها؟
= تفتكر يا احمد بكون مبسوطة وبابا بيقلل مني قدامكم؟
_..
= يمكن من الأسباب الي خلتني أمسك في الي بعمله اني أثبتله اني ليا فايدة ، بعرف أعمل أي حاجة ، أخليه يشوفني ولو مرة واحدة غير البنت الي خلفها ومش بتعرف تفكر ، لو هو الي فكر لحظة واحدة بس كان عرف اني مش عاوزة أحس اني بجري في ساقية ، الوظيفة والبصمة والجري ورا الدنيا عشان مرتب آخر الشهر ، مش دي العيشة الي كنت عوزاها لكن هو شايف اني حتي مليش حق أختار حياتي ، ف عاوزني اتجوز واجيب بنت تيجي تلومني عشان اختارت أب قاسي؟ ، اخلي بنتي تعيش الي عيشته؟ ، أنا لومت امي مرة عشان اتجوزت ابويا مش قادرة انسي نظرتها ليا يومها ، مش عاوزة اتجوز راجل اكمل معاه عشان خاطر العيال ، اكمل عشان مخربش بيتي ، كل صحابي بيقولولي أنهم مكملين غصب عنهم ، اروح ابقي زيهم؟ ، لا ماما راضيه تفهم ولا عارفة احس مع بابا اني ممكن اتقبل رجالة تانية ، أنا مش هبقي من الستات دول ولا هتجوز راجل يخليني أكره اني عايشة
مد أيده ب منديل _ أنا آسف، مكنتش أعرف كل دا
مسحت وشي = أنا مقولتش الكلام دا قدام حد ابدا
_ ولا كأنك اتكلمتي ، انتي عرفاني حافظ بير اسرار
= لاء معاك انت بتقلب البيوت أخبار والله
_ متدخلنيش في تفاصيل بعد اذنك دلوقتي
بصلي ف فهمت وقلبت عيني
= ماشي يا احمد اسأل سؤال تاني
_ ليه بتساعدي بنات خالتنا في موضوع الجوازة ؟ انتي مش شيفاني زي الرجالة الي قولتي عنهم؟
= انت كويس.. اظن انك عريس كويس ، يمكن بعد الجواز تتغير شوية بس هتفضل دايما طيب انا متأكدة، أنا عمري ما هنسي انك كنت السبب اني اجي النهارده الحفلة ، لا هقدر أشكرك ولا هعرف حتي أرد الي عملته معايا
ابتسملي وقبل ما يرد عليا جت موظفة الاستقبال وقفت قدامنا ° العربية اتصلحت يا فندم ، الأسطا برا عشان تحاسبه
_ أنا متشكر جداً
طلعنا برا وحاسب الميكانيكي وركبنا العربية وكملنا طريق السفر ، سألني سؤال فضلت أسأله لنفسي طول الطريق ، ليه هو الوحيد الي مش شيفاه زي الرجالة التانية ؟ يمكن عشان كان أقرب حد ليا زمان ومكنتش بخاف بابا يعاقبني عشان دايما كان بيحاميلي؟ ولا يمكن عشان موقف النهارده شوفته راجل طيب مش راجل يتهرب منه؟
نمت من غير ما احس وصحيت علي صوته
_ مريم ، مريم اصحي احنا وصلنا
فتحت عيني لقيت الجاكت بتاعه عليا ، بصيتله ب استغراب _ دا ، الجو كان برد واحنا راجعين
اديته الجاكت = متشكرة يا احمد تسلم
طلعنا فوق واول ما فتح الباب لقينا العيلة كلها في وشنا، كلهم وقفوا قدامنا وعلامات الاستغراب ، القلق ، الاستفسار علي وشهم ، بابا قرب مننا وقبل ما يتكلم أحمد سبقه
= أنا آسف يا عمو بس العربية عطلت بينا في نص الطريق واستنينا شوية لحد ما اتصلحت ومكنش فيه شبكة أطمنكم علينا
° عاجبك الي حصل؟ روحتي هناك وارتاحتي؟؟ اديكي عرضتي نفسك وابن خالتك لموقف بايخ
= مفيش حاجة حصلت يا عمو والله ، أنا الي غلطان اني متأكدتش من العربية قبل ما نسافر ، معلش حقك عليا مش هتحصل تاني ، وادينا قدامك اهو زي الفل الحمد لله
نفخ بابا ب راحة ° الحمد لله، حمدالله علي السلامة يبني معلش تعبناك
فتح الفون بتاعه وقعد في النص وحواليه كلنا قعدنا
شوفوا = قد ايه ناس حضرت؟ كلهم كانوا عاوزين مريم بس تمضيلهم ، وناس كتير فرحت جدا عشان شافتها والكتاب بتاعها مكسر الدنيا
فضلوا يبصوا علي الصور ويباركولي ، بصيتله وابتسمت ، يبخت الي هتتجوز احمد من بنات خالتي ، علي الاقل راجل سوي وسط كل الرجالة الي بنسمع عنها .
اليوم خلص ، روحت البيت نمت بسرعة من كتر ما كنت مرهقة ، صحيت الصبح علي رنة فوني
= أيوة يا احمد خير حد يصحي حد دلوقتي؟
_ جذمة بني ولا سودا علي الطقم الي بعتهولك واتس؟
فتحت الواتس وشوفت الصورة = سودا
_ ماشي حلو اوي
= رايح فين بدري كده ؟
_ النهارده هعمل انترفيو للي هيقدموا في الشركة
= ربنا يوفقك يارب ويبقي يوم خفيف
_ و النهاردة.. عيد ميلادي
= بجد؟؟ كل سنة وانت طيب
_ وأنتي طيبة يمريم ، معلش صحيتك بس كنت محتاج رأيك
= كنت محتاج رأيي في اللبس ولا متوتر ؟
_..
= متخافش ، الشركة هتبقي كبيرة وهتكبر ب شغلك ، ركز واوعي تظلم حد جاي يقدم ، بص على تلت حاجات
_ ايه هما ؟
= مؤهله ، حالته الاجتماعية ، احتاجه للشغل ، ممكن ميكونش معاه شهادات خبرة بس هيشتغل ب أيده واسنانه عشان يثبت نفسه في أول الطريق ف متجيش عليه وافتكر انك في يوم كنت مكانه وكنت محتاج أيد تتمدلك وب كده هتعرف تختار أحسن ناس فيهم
_ متشكر يا مريم ، كنت عارف اني لازم اتصل بيكي انتي
= العفو ، ايدك اتمدت علي الفون تاني الصبح وفكرت تتصل بيا قول علي نفسك يا رحمن يا رحيم
_ فيه ايه يا مريم ما احنا كنا ماشيين حلو
= اصطبح وقول يا صبح ، سلام
قفلت معاه بس مرجعتش أنام تاني ، يمكن اعمل حاجة أرد بيها ولو واحد في المية من الي عمله؟
= ماما ، ماما انتي فين
° تعالي يمريم أنا في المطبخ
= صباح الخير
° سبحان الله، صاحية بدري يعني مش عوايدك
= هقولك علي حاجة بس بالله عليكي متفهميش غلط
° أنا عمري فهمتك غلط؟ قولي يحبيبتي
= النهارده عيد ميلاد أحمد، عاوزين نعملهوله
بصتلي وضيقت عينها = بصي يماما..
° لاء بصي انتي ، شكل السفرية جابت نتيجة
= شوفتي ؟؟؟؟ أنا قولت ايه والله كنت عارفة ، عاوزة اعمل كده عشان الي عمله معايا مش عشان أي حاجة تانية ، المهم تتصلي ب خالاتي وتقوليلهم نتجمع النهارده في بيت العيلة
° ماشي
= ويقولوا ل بنات خالتي ، عاوزة كلنا نبقي موجودين
نزلت اشتريت الهدية ومامته كلمته يجي بعد ما يخلص شغل ، بليل وفي بيت جدتي بالتحديد وصل أحمد ومعاه بدأنا احتفال
= كل سنة وانت طيب يا احمد
حطيت قدامه بوكس وكله بدأ يحط هدايا قدامه ، كان مبسوط اوي والضحكة مفارقش وشه ، قطعنا التورتة وكلنا ، بدأ يفتح الهدايا ، بنات خالاتي كانوا جايبين هدايا ف شكرهم ، فتح هديتي وبصلي
_ متهزريش
= الأصلية والله
بنات خالتي بصوا ل بعض ب استغراب ° كورة!!!
= أصل..
_ دي احلي هدية جتلي في حياتي ، أنا عاوز انزل ألعب ماتش
= حصل ، حجزت الملعب الي في بلادنا ساعتين ، يلا بينا؟
كلنا نزلنا ، روحنا الملعب وقسمنا بعضنا فرقتين ، مفتكرش العيلة فرحت ولا ضحكت من زمان زي النهارده
° إلحقوني بسرعهههه
اتجمعنا عند انجي الي كانت بتعيط وقاعدة علي الارض
أحمد رد بسرعة _ إصابة؟ ثواني هجيب تلج
ردت وهي بتعيط ° لاء
_ يعني وقعتي ولا حصل ايه؟
° ضافري اتكسر
_ أفندم؟؟؟؟؟
بصلي ف بصيت الناحية التانية، طب اعمل اي يجدعان؟ كل ما احاول اخليه يختار بينهم يقفلوه ويقفلوني معاه
رجعنا البيت وكملنا سهرتنا هناك
= بص بقي ، البنات جايبة هدايا ودافعة، قدرني
_ نعم؟
= هتقعد معاهم وتشوف انهي واحدة دماغها مناسبة معاك ، أنا زهقت والله
_ بيعملوا كده عشان فاكرينك خاطبة؟
= وانا مش كدهههه ، أنا يدوب بقدم نصايح مرة تنفع مرة لاء ، فيه خمس بنات كنت قولتهم شوية حاجات ومشوا عليها واتجوزوا ومن ساعتها بقي وهما فاكرني خاطبة وليه متساعدناش زي ما بتساعدي الغريب وإحساس بالذنب بقي طول الوقت
ضحك _ انتي عاوزة ايه يمريم؟
= قدرني واقعد معاهم
_ لاء
= تمام ، علي خيرة الله ، ليلي
_ مريم متهزريش
= أيوة تعالي يحبيبتي ، يلا بسم الله
سيبتهم علي الطربيزة وقعدت جمب ماما علي الكنبة
° ارتاحتي؟
= هيختار منهم دلوقتي
° ضيعتي احسن فرصة ممكن تجيلك
= مع اربع بنات؟؟ ، علي الاقل هما عاوزين ، أنا لاء
° منا مش مكتوبلي افرح ببنتي زيهم
= يماما بالله عليكي مش وقته خالص الكلام دا
ليلي خلصت كلام معاه وبدأ التانيين يقعدوا ، مع كل واحدة يقعد معاها كان بيبصلي ويقولي ماشي حاضر! تهديد دا ولا ايه ؟ ، لا إله إلا الله اهو دي اخرة عمل الخير بقي
خلص ف ندهلي _ تعالي يمريم
= لاء هما أربعة بس وخلصوا، اختار براحتك اختار الي في مصلحتك محدش هيجبرك علي حاجة
_ تعالي بدل ما اقوملك تعالي
قعدت قدامه = ملكش حجة بقي ، الاختيار صعب أنا عارفة بس نعمل أي هي بناتنا محصلتش
_ كلمة كمان وهكسر الصالون عليكي
= استهدي بالله ، حصل ايه؟ طب أيه رأيك في ليلي ؟
_ كلمتني عن بحب أكتر السمنة ولا الزبدة وازاي بتعمل الديك الرومي في الفرن وميتلسعش
= طب إنجي؟
_ عن اللبس والموضة وازاي أجيب اغلي ساعة في العالم
= طب وسلمي؟
_ عرفتني إزاي أشتري البطيخة ام ١٠٠ جنيه ب ٢٥
= لا حول ولا قوه الا بالله، الامل في شهد؟
_ عرفتني الفرق بين الأريل وأوكسي
= كده خلصوا؟ طب نعيد من الاول ، ايه رايك في ليلي؟
_ أنا عاوزك تقعدي تستخفي دمك
سكتت وانا ببص قدامي وبحاول مبصلوش
_ لاء تعاليلي ، مش قولتي اقعد معاهم؟ اديني قعدت
= لاء بص بجد..
_ بضهر إيدي ، مسمعش صوتك تاني بتقولي اني بفوت أحسن جوازة ، أنا اقعد مع مراتي تكلمني في اكل او لبس أو غسيل؟؟؟
= امال انت عاوز ايه؟ علي فكرة انت الي قاصد تصعبها علينا
بصلي _ عاوز واحدة دماغها حلوة احب اتكلم معاها ، تكلمني في شغلي ومهتمة وصلت ل فين ولما تلاقيني تايه أو فيه مشكلة تسمعني، أنا قعدت مع الأربعة معرفتش أتكلم ، كل ما احاول أتكلم واحدة تقاطعني عن قد ايه هي المناسبة ، أنا مش عاوز واحدة مناسبة ، عاوز واحدة عاوزها
= حقك طبعا، بس خالتي ممكن تصوت تلم علينا البلد لو متجوزتش واحدة من بنات خالاتك
_ ماشي منا عاوزة اتجوز واحدة من بنات خالاتي
= طب يا عم وقعت قلبي ، ها مين عجبتك؟
_ بعدين هبقي اقولك
ماما ومامته وخالاتي كلهم فجأة زغرطوا ، بصيت أنا وأحمد لبعض = الجوازة علي الطريقة الحديثة
_ قصدك ايه؟
= هيحطوك قدام الأمر الواقع
_ ايهههه؟ فيه ايه يماما حصل ايه؟
° خالتك مايسة بنتها خلاص هتتجوز
كانت خالتنا مايسة خالتنا الكبيرة ، مش بنشوفها غير في الأعياد تقريباً، بنتها ريم كانت أكبر حفيدة هنا بس نقلوا في اسكندرية عشان شغل جوزها ، بدأنا كلنا نكلمها ونبارك ، نتفق ازاي هنسافر وامتي وهنلبس ايه ، وك عادة كل الامهات المصرية كل واحدة روحت بيتها وبدأت تجهز الشنط ، كنت بتكلم أنا واحمد في الفون
_ دا احلي عيد ميلاد عدي عليا ، متشكر يمريم
= معملتش حاجة
_ انك تفكري في اكتر حاجة كان نفسي فيه وقولتهالك وسط الكلام دا عندي كبير اوي
= هدايا ليلي وانجي وشهد وسلمي ، كل واحدة جيبالك هدية بتعبر عنها
ضحك _ ليلي جيبالي شنطة شوك ومعالق
= وانجي ساعة براند تجنن
_ كله كوم وسلمي الي جابتلي قفص مانجا
ضحكت = والله بنات لذيذة اوي
_ أنا بحبهم بس زي اخواتي
= هعتبر نفسي مسمعتش حاجة
_ اعملي حسابك هتسافري في عربيتي
= اه إن شاء الله اصل انا هروح أكرر الي حصلي قبل كده ، مستحيل
_ مش هتركبي غير معايا يمريم
= علي جثتي يا احمد
نزلنا الصبح وقدام البيت كانت العربيات الي هنسافر بيها ، قسمنا نفسنا عليها ف ندهلي احمد
_ لا حول ولا قوه الا بالله، دا مفضلش غير الكرسي الي جمبي!
= بجد والله؟؟؟
_ اركبي مامتك ومامتي وابويا معايا
= انسي ، هاجي علي ناقة ولا اني اركب معاك تاني يا احمد
ماما خرجت راسها من العربية ° اسمع صلاة النبي حلو؟
= عليه الصلاه والسلام
° والله إن مركبتي حالاً لأنزل أفرج علينا الي رايح والي جاي
فتحت الباب وركبت بسرعة = بس افتكروا الي بقوله ، مبيعرفش يسوق وهنتقلب في ترعة
° سوق يحبيبي ربنا يبارك فيك
ساق وباباه بصله من مراية العربية
' والشركة عملت فيها ايه؟
_ الحمد لله كله تمام ، عينت عدد لا بأس بيه ك بداية
' أنا عاوز الشركة دي تبقي من أكبر الشركات في مصر يباشمهندس
_ اه إن شاء الله يا بابا ربنا يسهل
' وحط في دماغك إني هاخد منك جواب نهائي في موضوع الجواز بعد الفرح الي احنا رايحينه
رد بسرعة _ لاء، أنا.. محتاج لسه وقت
' المفروض العروسة الي تقول كده مش انت الي جاهز ونازل مخصوص تتجوز
_ انتوا الي خلتوني أنزل مخصوص عشان كده! أنا مختارتش حاجة
' وانت الي قدك متجوزين وفاتحين بيوت
_ بس علي الاقل كنت تاخد رأيي مش تعمل زي ما بتعمل علي طول وكل حاجة تمشي زي ما انت عاوز!!
' انت اتجننت؟ انت بترد عليا ؟؟
ماما اتدخلت ° استهدي بالله يا ابو احمد ، احنا علي طريق ورايحين مناسبة حلوة ، روق كده محصلش حاجة
بصيتله لقيت عنيه بتدمع ف مسح عينه بسرعة قبل ما حد ياخد باله ، كان لازم يبان جبل زي ما دايما بيبين بس انا كنت عارفة إن جواه لسه الشاب الي عنده ١٧ سنة وكل أحلامه راحت منه عشان باباه قرر أنه يدخل كلية قمة ومفكرش ياخد حتي رأيه ، يمكن قال الكلام الي نفسه يقولهوله علي طول بس عمو كالعادة مفهموش ، وكأني أنا وهو ممنوع نتكلم قصاد ابهاتنا ، بنخاف منهم مش بنجري عليهم ، ووقت ما نقول الي عاوزينه.. مبيسمعوناش .
وصلنا ونزلنا قدام بيت خالتي الي كانت واقفة عشان تستقبلنا، سلمنا كلنا عليها وطلعنا علي فوق ، بيتها كان واسع وليها كذا شقة في العمارة الي ساكنة فيها ، بدأت كل واحدة فينا تدخل عشان تنام شوية وترتاح من تعب السفر ، صحينا بليل اتعشينا وقعدنا كلنا ك شباب سوا ، كنت أنا وأحمد والاربع بنات وريم وأخوها سمير
ريم : كنتوا وحشني اوي والله ، مبسوطة اوي انكم هتبقوا معايا في فرحي
= الف مبروك يريم ربنا يتمملك علي خير ويفرحك يارب
يارب يمريومة عقبالك وعقبالكم كلكم
ليلي : بما اننا قاعدين سوا يبقي نلعب لعبة زي بتوع زمان
اتحمسنا كلنا للفكرة وريم قامت جابت إزازة ولفتها، الدور جه في الاول علي ريم وليلي
ليلي : قوليلي بقي يستي ، ايه خلاكي تعرفي ان الي مخطوباله حاليا وبعد كام ساعة هيبقي جوزك أنه الراجل الصح بالنسبالك؟
ريم : عمري ما صحيت عيني ورامة من العياط وانا معاه ، حنين اوي وجدع جداً ومستمع كويس ف هعوز ايه اكتر من كده؟
كنت ببصلها ولمعة عينيها وهي بتتكلم عنه ، كان شكلها حلو اوي ، يارب لمعان عنيها مايطفي ابدا .
الازازة لفت ف جت علي سلمي وسمير
سلمي : انت متجوزتش ليه لحد دلوقتي يسمير؟
سمير : انتي امي قالتلك حاجة ؟
ضحكت ° لاء صحيح ليه فعلاً متجوزتش؟
سمير : عشان عاوز اتجوز البنت الي بحبها
بصيناله كلنا ب دهشة ° انت؟؟ بتحب ؟؟
سمير : ياه من زمان
سلمي : وليه متخطبهاش؟
سمير : هي متعرفش لسه ، وانا مش عارف اقولها عشان.. خايف ترفض
بصيتله = بس انت لازم تقولها ، في الحالتين هتبقي الكسبان ، يا توافق وتبقوا سوا يا ترفض ف تعرف حقيقة مشاعرها
ريم : وانتي يمريم متجوزتيش ليه ؟
= مش في دماغي جواز دلوقتي ، لما يجي وقته إن شاء الله
الازازة لفت وجت عند احمد وانجي
إنجي : عاوز تتجوز واحدة عاملة ازاي يا احمد ؟
الأربع بنات كانوا مركزين جدا ومستنين يجاوب عشان يفهموا دماغه ف يحاولوا يبقوا زي ما هو عاوز ، لفت نظري السؤال ف بصيتله أنا كمان
_ اعرف أتكلم معاها وطيبة واحس إن كل حاجة تمام عشان هي موجودة
° يعني ايه؟
_ يعني.. هتعرفوا قريب
بصيتله ب استغراب عشان جاوب إجابة محدش فهمها ، افتكرت كلام باباه لما قال إنه هياخد منه قراره بعد الفرح وربطته ب كلام احمد ، هتعرفوا قريب؟ يعني خلاص اختار .
دخلنا نمنا وصحينا فطرنا، ريم راحت الكوافير وبدأنا احنا نعمل ماسكات ونظبط الفساتين الي هنلبسها ، بليل لبسنا وحطينا ميكب ، خلصت اول واحدة ك العادة ف نزلت استناهم تحت عشان الشقة كانت زحمة
_ شكلك.. حلو اوي
بصيت قدامي لقيت احمد خارج من عربيته لابس بدلة فورمال، شكله شيك ولا كأنه العريس
= وانت كمان
_ هما خلصوا ولا لسه؟
= يعني ، شوية وهتلاقيهم نازلين
سمير جه ووقف قدامي ° مريم ، كنت عاوزك في حاجة
= اه اكيد ، فيه ايه؟
بص علي احمد ف عرفت أنه مش عاوز يتكلم قدامه
= طيب ، تعالي ، معلش يا احمد بعد اذنك راجعة تاني
وقفت في جمب أنا وهو = خير فيه ايه؟
° أنا هسمع كلامك وأقولها النهارده
= حلو جدا ، انت عازمها علي الفرح؟
° أنا بحب ليلي
= ايه؟؟؟؟
° طب أيه اجيبلك الميكرفون بتاع الجامع؟ اصل فيه واحد ماشي علي اول الشارع لسه مسمعش
حطيت ايدي علي بوقي وانا بضحك
= انت بتتكلم بجد؟؟
° بس هي مش حاسة ب اي حاجة خالص
= هساعدك، أنا هتكلم معاها
° بجد يمريم؟
= عيب عليك احنا اخوات ، إن شاء الله تبقي من نصيبك
رجعت ل احمد الي كان عليه مضايق
= فيه حاجة ؟
_ كان بيقولك ايه؟؟
رفعت حاجبي = ليه؟
_..
= علي العموم بقي قدامك تلت عرايس بس
_ يعني ايه مش فاهم؟
= ليلي طلعت برا الحسبة ، سمير بيحبها
_ أنا مش حاطط في حسبتي غير واحدة بس
= مين هي؟
_ انتي يمريم
= نعم؟؟؟
_ أنا عاوزك انتي
كنت بصاله ومش عارفة انطق ، بلعت ريقي وانا متوترة
= لاء ، انت عارف كويس اني مش هتجوز
