رواية بدون كلام الفصل الثالث بقلم جمانه السعيدي
عطور....هاي المره كانت آخر مره يدخل بيتنا عمي ونشوفه
لان اخذ اخر شي باقي من ريحة ابوي
بعد ما بقى عدنا شي يسوه يجي علموده
صح فرحنا انطانا ٥٠٠ الف والمسواك الي جابه
مشينا بيهن حالنا فتره
بقينا منتظرين عمي ينطينا حصتنا من البيت مثل
ما وعدنا
كعدنا نخطط اني وامي شلون راح نستفاد من حصتنا من الورث
عطور...ماما شنو رائيج نشتري بيت زغير على كدنا
حتى نخلص من الاجار
امي...خاف ما يكفن يجوز يكفن نشتري بيهن قطعة ارض
بس اذا اشترينا قطعة ارض
شلون راح نكدر نبنيها
عطور....الله كريم اهم شي ما نصرف الفلوس
لازم نخلي بيهن شي للزمن
حتلو قطعة ارض بعدين نبنيها لو نبني بيها غرفة بلوك ونكعد على الاقل كاعدين بملكنا
امي...اي ولله صدك ضمان اللج انتي واخوج للمستقبل
اني مادايمتلكم
عطور.. اسم الله عليج عمرج طويل
امي...يايمه الموت علينا حق
عطور...لا يمه لا تكولين هيج رحمه الاهلج
عطور بقينا ننتظر عمي يحن علينا وينطينا حصتنا
هلكد مااحنا على نيتنا صدكنا عمي يجيب الفلوس ويجينا للبيت
بس عمي اخذ من عدنا الشي الي يريده
ليش يسئل عنا
ااجر بيت ثاني بغير منطقه ونقل عائلته والاثاث باعه
يريد يشتري اثاث جديد
هد البيت وبدو العمال يبنون بيت جديد
على أحدث موديل
وامي المسكينه تنتظر حصتها من بيت جدي
مر شهر وثنيبن وتلاثه واربعه وخمسه
وكلشي ماكووو
عطور...يمه شو عمي ما انطانا حصتنا
امي....ما تشوفين عنده بناء
عطور...والبناء شعلي ينطينا حصتنا ويكمل بناء
ااكيد هو حاسب حسابه على البناء لو ما عنده فلوس
مافكر يهد البيت ويبني من جديد
امي....ولله ماادري خاف نسا
عطور...وهو يمتى ذاكرنا حتى نسا
اني ااكول ترحيله وتكوليله اريد حصتنا
امي.. يااا يمه عيب شلون اروح ااكوله هيج
عطور...شكو بيها قابل جاي نكدي منه حصتنا نريده
امي.. لا يمه اصبري علي عنده بناء يكمل وينطينا حصتنا
جمانه السعيدي
عطور...ولله مااضن راح ينطينا حصتنا
امي....لا يمه هو اجانا هنا وكال حصتكم تاخذونه
عطور...قبل لا توقعين وتتنازلين
امي...لا تاخذين غيبة عمج هو ضام حصتنا
ايجوز يخاف نصرفها
عطور....مثل الفصل الي كال خاف يصرفونه
واخذه وحتى سؤال ماسئل عنا
امي....وين يرحن قابل ياكلنا
عطور....لا اكلنا ومراح نشوف وجها مره ثانيه
امي جانت حاسه بخسة ودنائة وغدر عمي
بس جاي تكابر كدامي خاف ااكول امي ضيعت حصتنا
من البيت
سنه كامله وعمي يشتغل بيته ويعلي طابق على طابق
كله مرمر وزغارف وديكورات
واحنا نباوع بعيونا حتى ماذكرنا بمسواك
كمل البيت ورجع عمي جاب عائلته تسكن بلبيت
والسيارات تنزل اثاث جديد كل شويه طابكه سياره
طلع عمال نظفت الشارع كدام بيته صار يخبل
امي...بيت عمج اليوم نزلو بلبيت
عطور....انشاء الله ما يتهنون اكلو علينا فلوسنا
امي...لا تكولين هيج مهمه يكون بيت عمج
عطور...من عما الي عماهم كون
امي...نروح نباركلهم
عطور...ليش هما جايين سائلين عنا
امي...ميخالف عيب بيت جديد لازم هديه
بلكت عمج اذا شافني بيتهم يذكر الفلوس وينطيناهن
عطور....اي من دبش راح ينطيج فلوسج
اوكفي اخذي وياج علاكه تشيلين بيها الفلوس
خاف يوكعن منج بلشارع
امي...اروح اباركلهم
عطور...ومنيين تجيبين هديه تناسب هذا البيت
اذا اخذتليهم مواعين لو كلاصات يركوعهن براسج
امي...يااا ماعدي فلوس هواي
عطور.. يمه اكعدي واسكتي فدوه فلوس الهديه احنا أولى بيهن
امي..عيب من عمج
عطور...عمي هم يعرف العيب ماعتقد
لو يعرف العيب ماعافنا هذا حالنا الناس الغريبه تتصدق علينا
امي...ميخالف لا يكون كلبج اسود
جمانه السعيدي
عطور....راحت امي اشترت دولكه وكلاصات
سيت بكارتون مرتب وسبحت وغسلت ملابسها
وتعطرت وراحت عليهم
اول مادكت الجرس شافوها بلكامره
طلعو عليها العامله الي تشتغل بيتهم
اي عيوني عدهم خدامه تشتغل بيتهم لان الهوانم مالهن خلك تنظيف هذا البيت الجبير
امي...شلونج خاله
....هله خاله
امي....اريد ام يوسف اباركلها
...مو هنا طالعه ( طبعا هيه موجوده بس ماتريد تشوف امي ولا تريد امي تدخل بيتهم ) خاف تحسدهم
امي...انتي ما تعرفيني اني ام مصطفى مرت حماها
........مااكدر ادخلج للبيت اعذربني
امي...اني جايه اباركلكم
....اسفه مااكدر اخليج ادخلين
طبكت الباب بوجه امي
رجعت امي بالطريق لاكها عمي بسيارته راجع للبيت
وكفت حتى تسلم علي
سووه نفسه ماشافها
نزل من السياره
اجت علي تباركله
فتح الباب ودخل بقت تحجي وياا
ابو يوسف على الخير والبركه اجيت اباركلكم
عبالك مايشوفها دخل وطلك الباب
عطور.. ولله امي هاي عجيبه بعد كلشي صار رايحه تباركلهم
هما اصلا مايردوها تدخل بيتهم ولا توصل يمهم
بس هيه عاجبه الذله والمهانه
رجعت للبيت ضايجه
عطور...مو كتلج لا تعبين نفسج مايردونج
امي...واني شنو رايحه اطلب منهم غير رحت اباركلهم
عطور...مايردون منج شي بس ابتعدي عنهم
ذوله ناس صارو أصحاب فلوس
مايردون ناس فكر تتقرب عليهم
امي...الله يسامحهم
عطور...الله لا يسامحهم لادنيا ولا اخره
بعدها بكم يوم بيت عمي عزمو الشارع كله
على عشا محترم بمناسبة البيت الجديد
نصبو كراسي بلشارع والناس تعشت
بعد ما خلص العشا بدو يوزعون الاكل الزايد على البيوت
ودزولنا حصه من بقايا الاكل
عطور.. هذا شنو الاكل
امي.. بيت عمج دزو
عطور ... هااا دزو فضالتهم ليش ما دزولنا من الاكل الزين
ليش ما عزمونا
امي...عيب هذا الحجي الشارع متروس ناس
عطور.. رجعي
امي.. لا ولله ماارجعه بي لحم ودجاج صار اسبوع ما ماكلين لحم ولا دجاج
خلي اخوج ياكل بطنه خايسه من المعكرونه والعدس
عطور...رجعي يمه ما ناكل فضالتهم
امي.. شبي اكل نضيف انتي لا تاكلين اني واخوج ناكل
خلت الاكل امي بلصينيه وكعدت تاكل هيه واخوي
واني زعلت منها
دخلت للغرفه وبعد ما طلعت حتى ما تعشيت
شنو هلقهر ياربي ليش هبج يتعاملون ويانا
مانريد خيرهم بس يبتعدون عنا
بلاعداديه البنات أرقى واحلى والملابس كلها حديثه
وكل وحده عدها ابدال اللبسه الوحده اربعه وخمسه
واني لازكه بنفس البس كل يوم مااغيره ابد
صح نظيف بس عادي
كلما اشوف البنات يتهامسن عليه
ااكول ميخالف اني جايه ادرس مو جايه أعرض ازياء
العبره بلاخير منو ينجح
مو منو الي ملابسه احلى
المهم اني كنت أنجح كل سنه ودرجاتي زينه
اما بنات عمي كل سنه يطلعن بااخير السنه اكمال
بدرسين وتلاثه
الجبيره سهاد اكبر مني بسنتين
رسبت سنتين بلسادس وبعدين ازوجت ما كملت دراستها
والثانيه منى
المدرسه كلها تحجي بيها
وواحد يوصلها للمدرسه وواحد.يرجعها
وبلمدرسه حيل كسلانه
والسانها شطوله وكحه تتعارك ويا اكبر وحده
لا تخاف ولا تستحي
اني مبتعده عنهن ثنيينهن مالي خلك المشاكل
بت عمي منى هلكد ما كسلانه دزو تنبيه الاهلها ااكثر من مره
بعدين تركت المدرسه وكعدت بلبيت
هيه اصلا ماتحب تقرا جايه للمدرسه علمود الونسه
والطلعه
همزين خلصت من وجودهن بلمدرسه
مالي شغل بيهن ولا بأي احد من بيت عمي
حتى مااشوف اي احد منهم
اطلع المدرستي ومن ارجع ادخل واقفل الباب الثاني يوم يله اطلع من البيت
جمانه السعيدي
رجعت من المدرسه شميت ريحة اكل طيب
فتحت الجدر تمن ودجاج وماعون زلاطه على الكاونتر
عرفت هذا مو طبخ امي
لان احنا مايدخل الدجاج بيتنا اله بلمناسبات
لو الناس تسوي ثوابات ودزلنا
عطور...شنو هذا الاكل مبين طيب شوفي البر ياني متروس حشوه والدجاج يخبل منيين هذا
امي..دزولنا اهل الرحم
عطور...اي غير اعرف منو الي دزلنا
امي...ناس مااعرفهم
عطور...يمه احجي الصدق منيين هذا الاكل
امي...من ببت عمج اليوم عدهم عزيمه
عطور.. هااا دزولنا الفضاله مووو
امي.. ليش تتكبرين على النعمه شبي اكل نضيف وطيب
صار ااكثر من اسبوعين محد جابلنا دجاح
عطور...اذا دزو بيت عمي اكل مره ثانيه رجعي
احنا ما ناكل فضالة ااكلهم
امي...يمه نعمه من الله اكلي واسكتي لا تتبطرين
عطور...مره ثانيه رجعي الاكل
لو اني اروح ارجعه بمعرفتي
امي...اسكتي مره ثانيه مااخذ منهم
عطور...تمام بعد ماريد اكل
راح انام ومن اكعد أكلي طماطه وواكل
شكد اضوج من اشوف بيت عمي يدزولنا فضالة الاكل
لو يحبونه جان دزولنا من رأس الجدر
مو ينتظرون الناس تخلص ويجمعون باقي الأكل
ويدوز النا
شكد اكرهم حتى اكلهم حرام لان فلوسهم كلها حرام
بلنسبه الولد عمي كبرو وابدال السياره الوحده بابهم
صارت اتلاثه وكلهن من أحدث الموديلات
بس استغفر الله عليهم سمعه موحلوه
الناس يكولون ولد عمي يشربون مشروبات كحوليه
ويدورون نسوان وشغلات مو تمام
الناس تكول لان اني حتى ما شايفه شكولاتهم شلونها
الله يبعدنا عنهم ويبعدهم عنا
ويكفينا شرهم
