رواية سواد الاثمد الفصل الثالث بقلم نورس
امشي سريع الشارع اظلم واتلفت بوراي وصلت لنهاية الشارع شفته واگف يم سيارته تنفست براحة من شفته
دا اعبر خطفت من يمي سيارة مآب وياه واحد بالصدر شافني رجع السيارة دگلي هورن عفته وركضت مبتعدة
شخط السيارة صارت كبالي گلبي صار بين رجليَّ شفته نزل ويتقدم بأتجاهي بهمة عاگد حواجبه عيونه مخنزرة
غير رجلي تتحرك ضليت متصنمة بمكاني صار قريب گمت أتراجع بخطواتي وهو يتقدم أكثر لزم عكسي
جرني عليه فاتح عيونه خازرني
مآب :- شمطلعج بهالوكت للشارع ؟ احجججججي بان
نترت ايده :- معليك
دا ادور وجهي أشرد محسيت إلا وايده
حاوطتني لزمني من بطني ورفعني عن الگاع
گمت أصرخ خلى ايده على حلگي يكتم صوتي ، أشمر بجسمي اريد افلت نفسي من ايده بس وين اگدرله وهو بهالضخامة ، محكم قبضة ايده على حلگي حيل
مشى بيَّ للسيارة أشر لذاك الوياه فتحله الباب الخلفي وصعدني بيها وسد الباب وصعدوا اثنينهم بسرعة بالصدر وشخط السيارة بكل سرعته
شهربان :- وحق الحُرررررر يا مآب أفتح الباب واشمر روحي وابليك وگف السيارة
مآب :- بنت امج وابوج اعمليها تانشوف
بدون تردد فتحت الباب وي ما فتحته ضرب بريك انخضت السيارة خض انلزك راسي بالمقعد الأمامي
تجاهلت الخضة دا اريد انزل سبقني ونزل
اجه من جهتي سحبني من متني عيونه ناطه
- وحك القرآن يا بان كلمة زايحة منج املصو للسانج واعلگو برگبتج واحسب الله ما خلقج اهجبي واگعدي
عاقلة تاما اجرم بيج بنص هالليل
- عوووووفني معليك بيَّ انتَ
دار وجها صاح :- شبيرررررر حدر هين اگضبلي هالعثرة
عاندت اريد افلت ايده وانزل ميخليني واگف بوجهي كبال الباب ردت انزل من الجهة الثانية بسرعة اجه الثاني صعد وسد الباب الثاني .. حاصروني
قفل الباب وگام يستغفر وينافخ :- هسع انا هاي وين جانتلي اجي من الغربية لهين يوم بالاسبوع تا اتونس بيه لو تعال اگضب فحلات مستهترات تالي الليل
باوعلي من فوك ليجوة ورفع ايده وهو يبتسم
شبير :- الله بالخير يابا
أشرله لزمني من ايدي قيد حركتي ومآب سد
الباب وراح صعد ليگدام شغل السيارة ومشى
من مشت سيارة مآب مرينا من سيارته جان واگف عالسايد الثاني عيني جانت عليه منتجي عالسيارة
يدنك يباوع للساعة ويرجع يرفع راسه يباوع للشارع تخبلت بالزايد گمت ارفس وأضرب بهذا اللازمني
كمت ابجي واصرخ :- منتظرررررررني يالحيوان منتظررررني الله ياخذك الله ياااااااااخذذذك مآب الله ياخذك
باوعلي بالمراية عيونه دم :- منو المنتظرج ؟
ما رديت تخبل بالزايد ضرب الستيرن بقوة
صاح :- متحجييييييين لحضن يا گواد تا تفينين بهالليل
صرخت :- معليك انتَ معليييييييك نزلني يلا
شبير :- مآب انزل انتَ اكضبها راح تعضني يولي يكول جلب مسعور
ما رد عليه جان عصبي حيل
ملامحه مقتضبة ويسوق سريع
صاح بيه
- ابن اليتزوج بالسرررررر راح تكلبها بينا
- اكل تبن شبير لا احسسسسسب الله ما خلقك
- تعال الزم جلبتك اني اسوق مكانك
وي حجايته عضيت ايده حيل كام يكمز صاح :- شبلاج بنت التتزوج ضباط
- وخررررررر عوفني
- ول حشا الجلبة ظلمتها بيج دحك مآب هذا الكيك الوريتني بيه طلع يابس ما منو لعطة
باوعت للجامة انتبهت للطريق حتى ما رجعني للبيت صحت
- وووووين ماخذني ررررجعني للبيت مآب مووو دا احجي وياااااك
حجيت ردت توسلت ولا عبالك احجي وياه ، ما اتذكر الطريق شلون خلص من البجي والقهر الحسيت بيه
يربي عفته واگف ينتظرني
دك تليفونه شاله رد :- ها يولي .. وياي لتبجين .. همممم ليضل بالج ما اخليها .. عجل سدي الباب ولتخلين امج وابوي يحسون انا وي طر الفجر اردها للبيت .. تووكلي نورجان كلش مالي خلگج هساع
سد التليفون واجت عينه عليَّ بالمراية خزرني درت وجهي منه ، شكله يخوف عيونه حمرررر عروك ايده بارزه گد مشاد عليها
وكفت السيارة كبال بناية كبيرة نزل هو واجه من جهتي فتح الباب نتر :- حدري جاي
- وين جايبني
ما رد وسحبني من ايدي حيل حسيته ملخها
تقرب ويهمس بتحذير وهو يأشر بسبابته
- ولا كلمة حجاية زايدة طلقة براسج واذبج بهالخرابة
شهربان :- متخوفني وخر يلا
رفع حاجبه :- هاه يعني نچرة ومتخافين ؟
لزمني من شعري عطت بوجع
قربني صار وجهه بوجهي
سحب سلاحه :- بالله الكريم والخلقج يا بان تدحگين هالسلاح البيدي .. أفرغ مخزنو براسج وما يرفلي جفن وأشيلج وأزتج بهالخرابة ان جان فتحتي حلگج
.. زين لو لا ؟
هزيت راسي بسرعة ولازمه ايده الشاد بيها شعري
باوعت داير مدايرنا صدك المكان يخوف لو سواها وكتلني منو يدري ، نبرته وتهديده مجانن يطمنن
سحبني ومشيت أتعثر بمشيتي يجر بيَّ ما الحك وياه
دخلنا للبناية صعدنا درج طويل هو گدامي واللاخ يمشي ورانا حتى ما بيها شردة وصلنا گبال باب الشقة مد ايده طلع مفتاح فتحه ودخلنا شمرني بنص الصالة
راح مشى نزع ساعته وموبايله خلاهم عالميز وطلع سلاحه من خصره انكتمت ، عيونه جانت متشكله عليَّ
شبير :- شبلاك لك خرطتنا العافية وجوهنا صارت صفر
- سد الباب شبير
وگف صفن عليه شوي لحد مصاح بيه راح قفل باب الشقة ووكف على جهة متخصر يباوعله ورافع حاجبه
اجاني دنك لمستواي ايده سندها عالحايط حاوطني
گال :- وين جنتي رايحة بان
- مو شغلك
- هاه ؟
- مثل مسمعت و لا عبالك خايفة بهاي حركاتك ترى متخوف چلبي
عض شفته وهو يهز راسه محسيت الا راشدي منه شلع صفحة خدي لزمت مكان الضربة وعيوني مدمعة تحررركني كد ما متجمعة الدموع بيهم ماريد ابجي
رد سألني بنفس النبرة :- وين تردين ترحين بان
رديت من بين سنوني بعناد :- گتلك معليك
رجع ضربني راشدي ثاني ولزمني من شعري وهمس بتوعد
- آخر مرررررة اسألج مرة اللخ أخلي الأقسام تشتغل فوك راسج ووووووووين جنتي مفييييييينة بنص الليل
اباوع بعيونه وبصدري شهگة
خازرني حيل ولازم شعري قوي
صاح :- ويامن احجججججي لج
شهگت ودموعي نزلت لازمة ايده اريده يعوف شعري حسيته تهلس بين اديه ، عافني وگام يفرك بوجهه
صار يروح ويجي بالمكان يحاول يتمالك أعصابه
وگف يباوعلي :- عش تبجين ؟
مرديت نزلت للگاع لميت رجليَّ لصدري الشهگة تطلع غصب عني باوع داير مداير المكان واندار لهذا الوياه
گله :- شبير الجنطة بالسيارة غادي حدر جيبها
- لتتصرگع مآب جاهل يولي
- وشعملت انا
- دحك شهكتها شكت گلبي وصلتين
- الجنطة شبير
سكت ويباوعله بحيرة عافنا وطلع من الشقة ، مشى للميز سحب باكيت الجگاير شغل وحدة وصار يدخن
لازم الجگارة بأيد والثانية متخصر ويباوعلي
ما طول ورجع بيده جنطتي اخذها منه
فتحها ونثر الملابس البيها وياهن جنسيتي
دنك شالها يباوع بالجنسية ويرجع يباوعلي حواجبه معگودة راح للميز طفى الجگارة اخذ سلاحه واجاني
مآب :- تاتنهزمين بانو
- عوفني
- ويامن بان احجي تاما تتأذين
- اريد ماما
حجيتها وشهگت بجي لزمني عصر فكي حيل وگومني
- احجي وما أسويلج شي ويامن تردين تنهزمين
- ماكو أحد مو ويَّ أحد وخررررررر
شد قبضة ايده أكثر عطت متوجعة ما اهتم
- تليفونج وين
- ما عندي
لزمت ايده الضاغط بيها وجهي حسيت عظامي تكسروا
- تكوووولين وين ضامتو لو افررررغ المسدس براسج
- ما عندي مآب وخرررر
- هاه هيج يعني ..
عافني حك گصته وكال :- من الأخير يولي تطلعينو لو امد ايدي وافتشج
صحت بخوف :- ما عندي والله ما عندي مشايلة موبايل هااااك شووف ..
حجيتها وصرت انكث بملابسي وطلعتله
جيوب القمصلة وأنكت بيهن بسرعة
- عجل صيري حبابة واحجي تاما أذيج ...
جاي يحجي اتصل موبايله ما اهتم عافه فصل
ورجع دك مرة اللخ استغفر بنفور وراح يشوف منو
عقد حواجبه رد بنفور :- ها يولي
سكت يسمع الطرف الثاني وعينه عليَّ
- دحگي نورجان هن كلمتين اريد جواب غير هيج اعتبري اختج ميتة بان ويامن جانت منهزمة
سكت شوي ورفع راسه يباوعلي .. منووو هذا .. ها ابن العم گتيلي .. انگلعي وبعد لتتصلين شوي ورادين للبيت
سد التليفون ورجعلي لزمني من شعري نبت المسدس بخصري وسحب اقسام ، بلعت ريگي بإزدراء من الخوف والرعبة الجنت بيها بذيج اللحظة حتى مرمشت
- ما مرجية منج بان الكلفه
صابتني قشعريرة بجسمي وهو
يمشي سلاحه على خصري رد همس
- لبالج تنهزمين وتخلصين يولي هيج صارت الشردة سهلة عندج شنو لبالج انتِ بعدج عند فؤاد الگرن ومخليجن تسيبن براحتجن دحكي يووولي فتحي عيوووونج انتِ صرتي بيت عقيد فدار اقل غلطة منج يطير راسج وما يرفلو جفن
ضليت ساكتة اباوعله وكاتمة انفاسي عينه بعيني
عافني بنترة يلا سحبت النفس ضرب على خدي بخفة ايده وگال :- بعد لتعيديها يالكلفه
شمر سلاحه عالتخم وراح دخل جوة گعدت بالكاع أطرافي ما احس بيهم ، اجتني الرعشة جسمي كله يهتز وگلبي دكاته صارت سريعة بشكل مو منتظم
كام من مكانه وكف گبالي عينه عالباب
حجه بصوت ناصي
شبير :- يولي شبلاج جلاق بين رجلو انهي رجولتو اضل أعلم
حجاها وغمني
بعدين انتبه لرعشة جسمي صاح :- يووول يالثور يالأمعة البنية ترجف شعملت بيها خرطتها العافية
طلع بيده گلاص مي ويباوعلنا مستغرب
مآب :- شكو ؟
- دحك شعملت بالجاهل وتكول كلفه وكلفه بصيحتين ماعت روحها
اجه دنك لمستواي لزم گصتي وهزني ويحجي بقلق
- شبيج بان
لساني انربط اجتني الحالة اريد احجي بس صوتي ميطلع حضنت جسمي حيل هو فسرها بردانة ، راح جابلي غطة ولفني بيه وعيونه تتفحصني بحيرة
عيوني صارت تغوش الؤية مواضحة
أسمع أصواتهم يتناقشون مخبوصين بحالتي
ما ادري شصار بعدها غفيت بمكاني ما گعدت إلا على ايده وهو يمررها على خدي ، فتحت عيوني شفته
دفعت ايده ودرت وجهي عنه تنهد بحسرة وگام مني
مآب :- يلا يولي تهيري تانروح طلع الصبح
گمت طلعنا وقفل الشقة نزلت وياه هذاك الأسمه شبير ما هو ، صعدنا السيارة ومشى طالع بينا للبيت ، وصلنا هناك تلگتنا نورجان بالباب اول منزلت ركضت حضنتني
نورجان :- همزين رجعتي
وخرتها عني باوعتلي وعقدت حاجبها :- هاي شبيه خدج
مآب :- مو هين يولي انهجبن جوة واستفسري واگضبي هاي جنطتها وثقن بالله بس اهجس طالع حرف واحد من الصار البارحة اطر راسجن اثنينجن حدر الگاع
حجاها صعد سيارته وراح
... 《 نورجان 》 ...
دخلنا للبيت اباوعلها تتصفن بغير عالم بس عيونها تتحرك على خدها طبع مال ايد حجيت بصوت ناصي
نورجان :- ضربج مو ؟
لزمت ايدها باردة :- شبيج بان حبيبتي ليش صافنة متحجين
- تعبانة
- امشي نصعد للغرفة تمددي
اخذتها صعدنا فوك احسها مو بوعيها مددت على جربايتها غطيتها وايدي تمسد بشعرها بجيت
- بان ما تخيلت روحي اعيش وانتِ بعيدة عني
- ولا اني
- لعد ليش رحتي
- مجبورة
- شنو الجابرج
- مراح تفهمين حتى لو اگلج
تنهدت وكامت كعدت انتجت على تاج الجرباية
وعينها متشكلة بالسگف ، حجيت بتردد
- محمد سأل عليج
فزت من صفنتها اول مجبت طاري اسمه :- شوكت ؟
- ورة مطلعتي بساعة تقريبًا
- انطيني تليفونج
مشيت جبته الها وكعدت تگلب بيه ، رحت مددت على جربايتي وتغطيت الجو جان بارد حيل عيني متشكلة عليها يمكن اخذتلها بالساعة تطگطك بالتليفون
تحجي وياه ساعة تبتسم .. ساعة تعقد حواجبها ضايجة واني ابتسم على تعبيراتها المتغيرة
خلصت سحبت نفس طويل براحة والابتسامة شاگة حلگها وكامت انطتني التليفون :- هاج
- هيج بحجايتين منه كدر يگلب مزاجج
- بس هو اليفتهمني
- بس لو اعرف شنو اللي بينكم وعلى شنو ناوين
- معليج انتِ الج الصافي
حجتها ونامت بفراشها ودايرة وجها للجهة الثانية
- تحبينه هواي ؟
سكتت ما ردت :- دا احجي وياج بان
اندارت بملل خلت ايدها على عيونها
- نامي نورجان
نامت هي باوعت للساعة بعدها توها بالـ٧:٠٠ الجو ثلج يسوي واهس للنوم واليوم عطلة گمت اغفي لحد منمت
من كعدت بان جانت بعدها نايمة طلعت غسلت لميت شعري ونزلت جوة جان اكو اصوات جاية من الصالة رحت للمطبخ لكيت ماما دتحضر بالريوك صبحت عليها
نورجان :- شنو هالصوت منو عدنا
- مآب وابن عمته
استغربت :- منو هذا ليش هنا
- فدار رايدهم عندهم شغل .. بان وين ؟
- بعدها نايمة
- روحي گعديها دتنزل تتريك
- لا عوفيها البارحة منامت زين
عافت البيدها ودارتلي :- ليش رجعت تكوبس ؟
- لا بس ضلينا سهرانين عالموبايل لوقت متأخر وتعرفين بان جوعية مال نوم بالنهار
ضيعت السالفة وطلعت بسرعة للحديقة
حتى لتجرجر لساني بالاسئلة اكثر وانفضح
السما جانت مغيمة بس الجو حلو
مديت ايدي امط جسمي بكسل وخمول
طلع من البيت واحد لابس زي عسكري ، للوهلة الأولى جان عبالي مآب لو عمو فدار بعدها ركزت بيه
عقدت حواجبي .. لا هذا غريب
شعر خفيف .. طويل جسمه معضل بطريقة مبالغ بيها عضلاته منطيته ضخامة تخوف .. احس البدلة حتطع عليه گد مضابه جسمه .. شواربه تهف مثل عمو فدا
اضليت صافنة عليه وهو عينه بالموبايل ولا منتبهلي
واگف على مسافة قريب من باب الأستقبال البراني
شفته ابتسم بنفس اللحظة رفع راسه .. وشافني
اخذله صفنة ثواني وعقد حاجبه وهو يتقدم بأتجاهي
شبير :- يووول انتِ مو البارحة عيونج خضر وشعرج اسود منو لعب بإعداداتج وگلب ألوانج ؟
رديت بفهاوة :- ها
- شـ ها اگفي بلة تافهم انتِ مو نفسج البارحة شبعتيني عض لو لا
- ها
- أفشر ؟
ضل يباوعلي من فوك ليجوة وجهه بيه ألف علامة استفهام ، توترت من نظراته دا أركض جوة سبقتني ماما وهي تطلع البيت تصيحلي
شدن :- يلا نورجان الريوك جاهز
بعدين انتبهت لهذا أبو عضلات الواگف :- ها شبير هنا تفضل ويانا عالواهس
- لا والله سبقتكم عوافي عندي شغل وي مآب تانخلصو بعد منلحك
- مآب بعده گاعد ديشرب چاي يا عيني دفوت انتَ هم اصبلك كوب ترة جايي ميتفوت
- ما يرد الكريم الا البخيل
ابتسمت وفاتت قبلنا مشى ومن وصل قريب مني همسلي :- يولي انتِ الفحلة الأخرى مو ؟
- رجاءً ما أسمحلك
رفعلي حاجبه :- هاه
- اني انثى
- نثية يولي وانشهد نثية تشحط شحط اشتعلت روحك خالي لام حلويات الخاصكي كلها بيتك وعايف ولد اختك بالحسرة
وگفت :- شدتحجي انتَ ؟
- اكول امش تانلحك عالريوك هذا مآب نفسو دنية طالع لأبوه ما يخلون وراهم يلغفون الأكو والماكو ولد الما شايفة
دخلنا جوة جانت ماما محضرة سفرة ريوك طويلة بس شوفتها تفتح النفس ، نفسيتها كُلش طيبة عالأكل تجمعنا كلنا عالطاولة عدا بان ضلت محد گعدها
عمو فدار ومآب وهذا الوياهم داخلين بنقاش على شغلهم ما افتهمت منه كلمة بالي جان ديفكر بالموقف
المحرج اللي انحطيت بيه قبل شوي
رفعت راسي أباوعله وهو يحجي يشاركهم الحديث
حواجبه محددة ورسمة عينه حلوة انتبهت لأيده رافع ردانه عروگه بارزة انتبهت بأيده وشم كتابة صغيرة بالأنگليزي طالع جزء بسيط منها ولابس ساعة فضية
دار وجهه شافني أباوعله سوالي حركة بوجهه
ارتبكت وأباوع للموجودين محد منتبه عليه
درت وجهي عنه اكمل ريوگي واسوي نفسي ملتهية بماعوني ، غصب عني رجعت رفعت راسي شفت عينه عليَّ ابتسم وهز راسه عبالك يدري حرجع اباوعله
خليت وگمت صاحت ماما وراي :- مأكلتي ماما ؟
نورجان :- شبعت .. بالعافية
رحت غسلت وجهي واباوع بالمراية وجهي احمر
سحبت المنشفة نشفته ونفسي سريع گلبي يدك
هدأت شوي جريت نفس طلعت لگيتهم رايحين لشغلهم
بس مجانت هاي المرة الأخيرة الأشوفه بيها
بعدها بكم يوم جان عندي دوام فتحت عيوني
على دگة المنبه لگيت بان بوجهي بزيها المدرسي
طفرت من فراشي بفرحة :- حتداومين ؟
باوعتلي واكتفت بأبتسامة وگفت رتبت شعرها اخذت جنطتها ونزلت قبلي ، رحت غسلت وبدلت ملابسي واني طايرة ممصدگة انفكت عقدتها ورجعت بان تداوم
كملت صرت ادور على حذائي دنكت جوة الجرباية جريتها بعدين انتبهت غراض بان المدرسية وكتبها كلها جوة الجرباية عقدت حاجبي لعد هاي شماخذة بالجنطة
اخذت جنطتي ونزلت ضل گلبي لاعب منها واراقب حركاتها تتصرف بهدوء ولا مبين عليها شي ولا ينشك
گعدنا دنتريك وفاتوا مآب وراه شبير يسولفون
قطعوا حديثهم من شافونا سلموا وگعدوا
جانت عينه على بان سألها سألها
مآب :- عَجب اليوم
باوعتله مستغربة وهزت راسها بمعنى شكو
صبت ماما چاي وگمت قدمتلهم
اخذه من ايدي وردها :- رجعتي تداومين
دنگت تاكل وردت بهدوء :- غياباتي كثرن راح ينزل بيَّ فصل حرامات تروح عليَّ السنة
شدن :- هو اني ليش سكتت عنج أدري بيج متتحملين گعدة البيت كم يوم تعاندين وتاليتج راجعة لدوامج
هزت راسها ومحجت كملنا أكلنا ووگفنا منتظرين مآب
شهربان :- يلا ترى تأخرنا
قطع سالفته ويَّ شبير وباوعلها قبل ليحجي
دك تليفونه كام طلع برة يرد شوي ورجع
مآب :- انا ما اگدر اوصلجن خابروني عندي شغل مستعجل لازم اروح
- لعد شلون حنتأخر هيج
باوع مآب على أبو عضلات گله
شبير :- توكل خوية انا اوصلهن عندك سيارة ؟
- لا وين الجوة ايدي طالع بيها هم يا الله الحك اوصل للجماعة
- عجل روح انا اخذ تكسي
- أعتمد عليك ؟
- توكل يول گتلك يمي
رفع ايده سلم وطلع بسرعة يخابر بتليفونه
كام هذا على حيله وحجه يستعجلنا
- يلا فحلات تاوصلجن
نورجان :- رجاءً احنا إناث رقيقات ما اسمحلك
- عجل والشوارب التزينت ؟
حجاها وباوع لشهربان ما اهتمت اخذت جنطتها وطلعت قبلنا ، سلمت على ماما ورحت وراهم
يمشي گدامي طويل صاحب بنية جثلة مجان بقيافته الشفته بيها اول مرة لابس قميص وبنطرون أسود بأسود ، نظارته متشكلة بفتحة القميص
رحنا عالشارع ديأجر تكسي ، جانت الدنيا ماطرة
گتله :- خلي نروح مشي الجو حلو
- وين يولي متدحگيها الشوارع فايضة
- عادي نغير جو
شهربان :- حنتأخر لتلحين
- منتأخر بان والله هيانها المدرسة قريبة
بان معترضة وشبير شافني ألح كال :- ما أرد طلب نثية وانا ابو گلب الچبير .. امشي وانتِ اتحملي النتائج حرامات الكشخة تروح تنورتج وحذائج تنتلف
مهتميت ومشيت مكيفة مشيت كلمتي عليهم نمشي عالرصيف ومركزة بالگاع ما ادوس عالخط گبل اعبر للصبة اللخ لحد معثرت اجيت اوگع لزمني ثبتني
انطاني كفخة براسي :- الصفرة امشي عدل شيسوي الله بيج بعد هم صفرة وهم ثولة
لزمت راسي متضايقة واعدل بشعري
اختنگت :- لتضرب
ضل صافن بوجهي :- يول صدك تحجين شحاجيتج انا وعيونج غورگت .. صدك زعطوطة امشي گدامي
مشى قبلي واني واگفة اعدل بالفيونكة اندارلي
مسح وجهه بنفاذ صبر ورجع وهو يستغفر
اخذها من ايدي ووگف هو يحطلياها صار قريب مني اشتميت عطره ثگيل عود بس طيب ، ابتعد مني
گتله :- حلو ؟
- حلو يول حلوو بسرعة تانلحك اختج الكلفه لو اعطيها مجال شوي توصل الصين مشي
حجاها ومشينا مستعجلين اباوع صدك هاي وين رايحة وگفت نهاية الشارع لحد موصلنا يمها جان الشارع فايض ، قبلها بيوم جانت زاختها مطرة قوية
نورجان :- عزة هسه شلون حنعبر
شبير :- من طلب العلا لازم يجيت
- لا عزة تنتلف ملابسي
- عجل انا شهترت
- وهسه شلون
بان گدامنا مشت خلت رجلها عالشارع طمست بالمي
صاح :- راح وايست منه غرك بالماي
- عزة بان غرگتي ؟
كملت مشي ولا جنها عاد اني تشجعت وخليت رجلي مترددة طمست حذائي واحس تعبت مي اجيت ابجي
باوعتله عيوني مدمعة ومختنگة
شبير :- لااااااا يول الا دموع الحريم نقطة ضعفي گلبي ميحملها
- غرگت
- صدك جذب اغرك وياج
حجاها واجه وراي لزم ايدي صاح :- غركنا واليحبنا يغرك ويانا
شال جنطتي على متنه ومشينا للجهة الثانية وكل شوي وصاح :- لذذذذب روحي نجخ بالطين
لحد موصلنا للمدرسة طلعت روحي مدري من حذائي المتلوصة لو هذا الخلصها تصنيف على شكلي فاتت بان للمدرسة عيني وراها انتظرتها تدخل وتقربت لشبير كتله
نورجان :- اسمع دا اگولك
- انا معجبة بيك وحبيتك من اول نظرة وانتَ حلو اعرف اعررف
- يا لا مو هيج والله
- اعترفي يولي اعترفي متعود انا على هالمصارحات
- اهو وكلام الله أريد احاجيك بغير موضوع
- ما كتيلي من شوكت هالمشاعر ضامتها عليّ
تنرفزت صحت :- شُبيرررررر
- دحك حرف الراء يركص بحلكها من تحجيه عيونو يولي
- ترى بان مداومة اليوم تريد تنهزم گول لمآب خليه يتصرف من يمه
تغيرت ملامحه كال
- والله ما تنگضب الكلفه ما عترتاح الا يفرغ المسدس براسها صدك
- حتگله ؟
- لا بنية ومن حقها تريد تعيش حياتها عش تمنعيها
- تنهزم تنهززززم يا الله ماما راح تزعل وبيت عمو يأذوها
- لاااااااااه طز بأختج طبها مرض بس كلشي ولا امج تزعل اكلبها درايفر وحگ الحك روحي يبا لتهمين يمي السالفة
اخذت منه كلمة ورحت واني مطمئنة بدة الدوام محسست بان انُ اني اعرف لهناك ونص اليوم قبل الحلة طلبونا احنا وجنطنا للإدارة اني طرت مكيفة عرفته مآب وبان تباوع مستغربة عبالها صاير شي
صدك من رحنا صاروا بوجهنا هو وشبير اللي من شافني ابتسم وغمزلي ، طلعنا وياهم وبان تتناطح وي مآب
شهربان :- ماريد أطلع اريد اكمل دوامي منو كلك تعال
4 تعليق
مآب :- مزاجي عجبو واشتهى يعزمجن على مطعم تانتغدة
- اتشكره بمكاني وكله غداك واصل يلا رجعني
ولا اهتم الها وصلنا السيارة صعدنا الا هي واكفة الوجه احمر ملامحها باهتة مثل التايه تباوع لمآب وترجع تباوع للشارع عيونها تدور شي ، ضجت مجنت رايدة اخليها بهالموقف بس ما اكدر اعوفها تسوي البراسها
اجت صعدت وركعت الباب حيل صاح :- ول بابي اريدو شبلاجن انتِ واختج وياه
- امشي للبيت مآب
- ماكو كلت نتغدة اول
- تعبانة اريد انام
- ورة الغدة عود
حرك السيارة ومشى اني انطلقت وياهم مشغلين اغاني ويشاقوني بان عينها بالجامة ولا يمنا ، وكفنا يم مطعم نزلنا تغدينا الا هي مرضت تاكل اخذنالها سفري
تأخر الوقت وعبرت وقت حلتنا خابرت ماما على
مآب تسأل علينا فتح سبيكر وانطانياه كالت
شدن :- برابيك وين جنتن
نورجان :- رجاءً ماما ما اسمحلج
شبير صاح :- فحلة
- كولي بربوقات
غم كصته ومآب يضحك كله :- يولي هاي مال مثقفين بعدها ما واصلتك
طمنتها وكتلها راجعين للبيت ، وصلنا نزلت بان جفت حتى قبل لتوكف السيارة لحكها مآب بسرعة جرها من جنطتها رجعها ليورة
شهربان :- شبيك وخر
ما رد عليها واخذ جنطتها فتحها بحوش بيها وطلع الجنسية ضحك ورفعها الها يشوفها
- عجل تنهزمين يالكلفه ولبالج ما اگضبج
- جيبها
- من تردين تنهزمين مرة اللخ تعاليلي وانا انطيها الج
غورگت عيونها وعينها اجت عليَّ صاحت
- انتِ كتيله مو حقيرررررررة الله ياخذج
عافتنا ودخلت منفعلة نزلت دموعي من نترتها
شبير :- لااااااااا الا عيونج انتِ لتبجيها
شهگت وعيني بالكاع صار گبالي :- دحكي يولي ول هالعيون متستاهل تزعليها
- اني حقيرة ؟
- انا الحقير وابن شوارع وطايح حظ
- تگولي الله ياخذج
- مو من گلبها اعذريها منفعلة
مد ايده يمسح دموعي كال :- لتبجيهن يولي گلبي كام يوجعني ومحمد ما اتحمل اشوف نثية تبجي
مسحت دموعي
- رجاءً أنثى
ضحك بصوت عالي وبانت سنونه
- هذا هو يبا أنثى رقيقة
- مثقفة
- ومثقفة هم
صاح عليه مآب من برة غمزلي بالشقة وطلعله ، دخلت للبيت محد موجود لا ماما ولا عمو فدار صعدت للغرفة لكيتها بملابسها على جربايتها دافنة وجها بالمخدة
- بان
رفعت راسها شافتني :- ليش گتيله
- ما اريدج تعوفينا
- ما اگدر ابقى والله لججج نورجان طيف بابا يباوعلي بكل مكان ولازمته الحسرة دا اتأذى من اشوفهم سوية ما اتحمل افتهميني
بجيت على بجيتها :- وحترتاحين بـ بيت عمو ؟
- لا بس محمد يهون عليَّ
7 تعليق
- سجودة وخواتها مراح يرحمنج
- محمد واكف وياي ميگدرن يسون شي
- محمد مو گدهن بان وانتِ تعرفين هالشي كُلش زين
- حنتزوج
عطت :- هاااا من شوكت هالحجي
- حيجي يطلبني رسمي اول منعقد يحجزلنا نطلع لتركيا محد يگدر يوصلنا ومناك اسحبج وراي
- ومنو گلج اني اريد اروح لتركيا
رفعت راسها باوعتلي عيونها حمر :- ليش تردين تضلين هنا يم رجل امج وضباطه المنحطين بكل عقلج انتِ
- وماما ؟
- امج تزوجت ونستنا عوفيها يم رجلها
- بان مستوعبة اللي دتحجيه ؟
- مدا انام ليلي نورجان تعبت من التفكير اريد ارتاح بالنومة
جانت منهارة وتعبانة حيل ما زدت عليها مشيت يمها نزعت حذائها وجواريبها ساعدتها تمدد غطيتها طفيت الاضوية ونزلت
... 《 شهربان 》 ...
مر كم يوم حالتي بالنازل نفسيتي تعبانة ولازمتني الفلاونزة مكسرتني ٢٤ ساعة بالفراش حتى الأكل يصعدوه الي فوك لحت ماما تاخذني للدكتور وعاندت
بالليل انتكست حالتي حيل اهذي ما ادري بنفسي وجسمي كله يرجف گمزت نورجان شافتني ونزلت تركض ، صعدت ماما وراها فدار اجت گعدت يم راسي
شدن :- شجاج يأمي لويش دترجفين
اسمعها بس مالي قابلية حتى ارد والكلمات تطلع مني ما مفهومة
فدار :- تهيروا تانروح للدكتور
- بربك فدار شوف الساعة وين اكو دكتور بهيج وقت خلي ناخذها للمستشفى
- لا طبة المستشفى ما احبها بالليل صاحبي دكتور تاناخذها لبيتو
طلع يخابر وماما گومتني غسلت وجهي
ولبستني قمصلة اجه فدار يستعجلنا
نورجان :- ماما اروح وياكم
رادت تعترض وردها فدار
فدار :- خليها تروح يولي عجل تبقى لوحدها هين
قفلوا البيبان صعدنا السيارة ومشينا ، راسي على جتف ماما ايدها تمررها على خدي مسخنة حيل وصلنا هناك وتلگانا رجال من الباب تصافح ويَّ فدار استقبلنا بـ بيته
فحصني وشدلي كانيولا وانطاني مغذي يوصي بماما على أكلي وكال عندها نقص فيتامينات وهبوط بالضغط انطاهم لستة مال ادوية أخذها فدار گال باجر ندبرهن
رجعنا للبيت نمت ما دريت بالدنيا بعد لليوم الثاني گعدت العصر جسمي مكسر من النومة بيدي كانيولا شلعتها وگمت اتطوطح من فراشي مثل السكرانة
اخذت ملابس ودخلت سبحت بمي دافي احس عظامي رخت وارتاحيت شوي ، لبست وطلعت رحت للغرفة لميت شعري بالمنشفة ونزلت جوة هدوء ماكو احد
لكيت نورجان بالصالة متمددة هي وكتبها نايمة على بطنها ورافعة رجليها تحرك بيهم ما منتبهتلي مندمجة
گعدت عالتخم شافتني اجتني بسرعة :- ها شلونج اليوم
- زينة
- ماما سوتلج شوربة خضار حروح اصبلج
ركضت للمطبخ تطگطك شوي واجت بيدها صينية صغيرة حطت الطبلة كبالي وخلتها گعدت أكل جنت صدك جوعانة ، رجعت هي على كتبها واني عيني عليها تجيب الكتاب مناه تودي مناه لحد معاطت متنرفزة
صحت بيها :- وجع لهالصوت شبيج انگرصتي
- دخت بلة هسه اني ويني وين الدراسة گوة هي ماريد ادرس اريد اتزوج ورجلي يصرف عليَّ
- هي هاي اقصى طموحاتج ؟
- لا منتظرة فارس أحلامي يجيني باللاند كروز
- اني سامعة بحصان
- لا هاي قديمة مال همج احنا مثقفات
كامت سدت الكتب شمرتهم على جهة وركضت للتلفزيون طلعت اغنية لسارية السواس فتحت شعرها
نزعت السترة العلى ملابسها بقت بالبدي نص ردان وكعدت تتمايل عليها حركاتها جاية فيت ويَّ الاغنية
جسمها مليان يخبل مقسم مو مثلي ضعيفة
صارت تتمايل :- ليلة ويا ليلة .. ها يأم كذيلة
شلون اوصل گلبج .. شنهو الوسيلة
هي رايحة مندمجة حسيت بحركة باوعت وراي
لگيت مآب وشبير فايتين للبيت جايين بأتجاهنا
مآب هز ايده :- هي هاي قرايتج يولي
شبير :- انجب دع العلم يردح
اصطكت من شافتهم ركضت طفت التلفزيون
وتلبس بسترتها وهم گعدوا عالتخم ، شردت جوة
مآب :- الكلفه شلونج اليوم
- مو شغلك
هز راسه كال :- عجل زينة دام مو شغلي
صحت لنورجان تجي تمشطلي شعري اجت بيدها المشط گعدت واني كدامها ، رفعت راسي انتبهت لمآب صافن عليَّ اول مشافني باوعتله دار وجهه
اجوا فدار وماما الوجه يضحك لابسة فستان اسود للركبة وفوكاه كوت طويل بيجي مغطي سيقانها البيض
الشعر مرفوع نازل منه كم خصلة تهف على وجها
شدن :- السلام عليكم شلونكم عيوني
حجتها وكعدت تهفي على وجها الولد اخذولهم
صفنة عليها وفدار يباوع لحلگها من تحجي
كعدوا يسولفون وهي راحت للغرفة غيرت ملابسها وطلعت كعدت يمهم ضاربة ميانة ويَّ الولد وخاصة
هذا الأسمه شبير مرتاحيتله ابد عيونه صلفة جنه خاله
فدار :- شبير يمتى راد للغربية
- باجر الصبح
- عجل خابر اخوك ورني ور بالاتصالات يسأل عليك
- تايريد يكمل الاقامة الجبرية
- حيل بيك تايتوبك من دربك الاعوج
- عش هيج خالي متشمت وانا اشوف روحي بيك الوادم لبالها ابنك
- اتخسه وتعكب يالردي تصير مثلي
- هم صدك انا عندي شوارب انتَ ما عندك
شال گلاص المي شمره عليه خلاه يگمز
رجع كعد يباوعله بطرف عينه
- شبير حجاية ثانية اگوم افلعو للسانك
- لا خالي انا بشاربك
صفك ايد بأيد وگال :- اهو شلون نسيت انتَ ما عندك شارب
- اذا ما شلتو الك بحلاوة حريم واكلبك حرمة من صدك ما اتسمى عالزلم
- عادي يبا من شوكت الشوارب صارت مقياس للرجولة
شدن :- نفس المنطق نفس التفكير حبيتك
- يلا نتزوج
گامله فدار متحلف بيه خلى وطفر طلع من البيت
وماما تضحك على سوالفه بليلتها راحوا هو ومآب
يباتون بشقته واليوم الثاني اجوا من الصبح خابرهم فدار طلع بكامل قيافته گعدوا بالصالة يشربون جاي
شبير :- خالي ابو علي خابرني اليوم بالليل طيارتهم تايطلع بـ بنتو كلت اعطيك خبر
- عش مو عالاسبوع الجاي حاجزين
- لا دكتور بنتو استعجلهم لان عندو سفر لغير دولة وجائز يطول بسفرتو ويتعطلون عن علاج درة
- عجل انا اروح وياك للغربية تاشوفو قبل ليسافر
تنهدت ماما وگامت للغرفة ضايجة راح وراها
شبير :- زعلت حلويات الخاصكي
مآب :- شبير اگضب لسانك تاما ينگص
- شحجينا يبا شبلاكم انتَ وابوك تتناطحون بس ينجاب طاري الكيك هيج حلاتو مأثرة بيكم ولو انتَ كيكتك مرة ما تنجرع
باوعلي وذب حسرة :- من ردى حظي
درت وجهي للجهة الثانية طلعوا ماما وفدار يهمسلها وهي تضحك ، شبير غمز لمآب ويحجي بصوت ناصي
- دحك ابوك بلاية شوارب چنو بربوك
ابتسمت غصب عني ودنگت واسمع صوتهم مكملين
مآب :- بالقرآن الكريم ابوي واگع چفي
- حكو مو بس هو كلنا وكعنا وياه
اجه اخذ سلاحه وموبايلاته طلعوا برة وگف يوصي ابنه علينا :- عينك عالنثاية وليدي بالليل تجي تنام هنا والصبح تتوكل لشغلك انا هاليومين وراد هين خاطر تروح وراي تاتشوف امك روحها لايجة عليك
مآب :- هذا هو لتوصي
62 تعليق
سلموا وراحوا ومآب راح لشغله ، للعصر اندك الباب طلعت اشوف منو اجاني صوته فتحت الباب وعيوني مفتوحة بصدمة واني اشوفه گبالي ضحك
محمد :- بان الحلوة شلونج
همست واباوع وراي خاف وحدة تطلع :- شجابك
- اشتاقيتلج
- واني لا يلا روح
رفع حاجبه :- ها هيج صار الحجي
گزيت على أسناني :- حذرتك ألف مررررررة من الجية لهنا فدار وابنه يشگوك شگ والحُر
- والحُر التحلفين بيه الزمج املص لسانج .. وخري لج سويلي مجال افوت
- ما
- بان وخري
- ما تربيع
- راح انطيج دفرة اخليج تذبين اللي بطنج وخري لج
- ما تكعيب
لزمني من جتفي دفعني جوة وفات للبيت يمشي خلاني اكمز ركضت وراه اجلب بيه اريده يرجع وهو ولا مهتم يباوع للبيت ، جان تطلع ماما تشوفه
شدن :- محمد !
ابتسم كلها :- شلونج مرة عمي
- شجابك
- حلو طردة
- لا مو هيج تفضل
حجتها وهي تأشرله عالصالة وعينها عليَّ خازرتني درت اني الگايلتله على مكانا ، نزلت نورجان شافته ركضت سلمت عليه مكيفة بيه وهو يشاقيها
باوعتلنا ماما گالت :- اطلعن برة ماما عندي حجي ويَّ محمد
- ليش اني هم اريد اسمع
- باااااان برة
صاحت بيَّ باوعلي محمد وغمزلي عود اطلعي خليت وگمت ضايجة ونورجان تحوص وراي تنك فوك راسي
نورجان :- محمد ليش هنا انتِ گتيله يجي
- لا هم تفاجأت بيه
- صاير حلو شكله من هذول المثقفين
- ايع جيبي يم كلشي الا الثقافة
- عود ليش تذمينه انتِ مو تحبيه
درت وجهي مطنگرة :- ما أدري ..
ضليت كاعدة بالحديقةو اباوع للسما فرحانة بشوفته صوت ماما عالي بس ما افهم شيحجون ركضت نورجان للبيت تشوفهم لشوي وطلع ضايج گمتله
شهربان :- ها ؟
محمد :- طاح حظج وحظ امج
- لتتجاوز محمد غير دنفتهم شكو
- اجيت طلبتج منها تگلي ما عندي بنات للزواج شنو مربيتلجن شوارب واني ما ادري
- صوتها هذا وعياطها متأكد بس هيج گتلها ؟
مرر ايده بين شعره
- گتلها اخذج وانهزم ومحد يلگالنا أثر بس يعاندون سواء هي او ابوي
- اهووو وانتَ وكتها جاي دتفتح وياها هيج موضوع
- لعد شوكت متگليلي اذا هذا الملازم الچلب ناصب النا سيطرة حتى مكاعد اكدر اجي اشوفج
- هذول غير عنا محمد ميقبلون غريب يفوت بيتهم لو يحتك بيهم ديربالك فدوة وبعد لتجي لهنا ربك فدار بالأنبار ومآب عنده شغل
- ما اصبر كم يوم وهم اجيج
- شبيك ابني تريد تبليني
- عوفج هسه وجهج ليش تعبان طالعتلج هالات وضعفانة شنو مگاعد تنامين
- عندي أرق اخلص الليل سهرانة للصبح يلا انام
تقربت منه وعيني عالباب همست :- ما جايب من هذا الحبوب
عض شفته وطلع من جيبه علبة صغيرة انطانياها
- حباية وحدة باليوم بان
فتحت العلبة واباوع بيها :- شو هاي بس ٤ باقيات
- الي جية ثانية اجيبلج علبة كاملة خلصي هاي هسه
- قليل محمد
- كتلج وحدة باليوم واني ما اطول تخلص العلبة تلگيني يمج
- شوكت يعني
- ما ادري بس اشوف شوراي واراسلج من نورجان
حكيت ركبتي :- زين انطيني جكارة
- النوب ؟
- جگارة محمد
- ليش لازم امج لكفتج تخمطين من باكيتها
- لا بطلت تدخن من تزوجت العقيد هسه فضني انطيني وحدة حيطلعون
- بوسة بدالها
رجعت اباوع للباب محد موجود سحبته من ياخته بسته من خدة بسرعة كتله :- يلا انطيني
طلع الباكيت من جيبه فتحه سحب وحدة خلاها بحكلة
- هاي بقن اثنين بالباكيت انطيني بعد بوسة ويصيرن الج
- الطمع مو حلو
- بكيفج
-ولي ماريدهن
گرص خدي وغمزلي ابتسم بمكر وشمرلي الباكيت دزلي بوسة بالهوى وراح ، ضميته بجيب قمصلتي خليت ايدي بجيوبي ودخلت جوة صارت ماما بوجهي
شدن :- ها ولى المسعد
- اي شراد منج
- لا والله وانتِ اطرش بزفة عأساس متدرين
- ما ادري حتى مگتله تعال
- لعد ليش كايلتله على عنوان البيت تردين تسويلي مصيبة شلووون بيج بان
- والله مگتله هو من ذاته جاي
نورجان :- اجه خطبج من ماما
- وشگتيله ؟
شدن :- رفضت طبعًا
- ليش
24 تعليق
- هي يحتاج الها ليش هم عايزة اقبل واخلي بنتي تصير چنة لكفاح وسالم
- بس محمد يحبني
- حبته حية هذا يحبج ويحب عشرة عليج ليقشمرج بكم حجاية معسولة
- اني احبه ماما
- اي كملت السبحة محمد المتعاطي وبان المخبلة جهالكم شيطلعون لعد
دمعت عيوني همست :- اريده
- تبجين عليه بان گرة عيني اي والله واني الازامط بيج اكول متعبر عليها سوالف الحب التعبانة
- ليش انتِ مو حبيتي العقيد ؟
- وانتِ تقارنين عمرج بعمررررري لج طفلة بعدج طفلة وينج وين الزواج وفرضًا اني وافقت شنو ابالج سالم راح يقبل ياخذج اله ميرحمونج والله دستري السالفة وكوليله خلي يكف منج وبعد ليجي لهنا فدار لو عرف يعلكنا فلقة ما عندي بعد طاقة لمصيبة لخ
رحت للمطبخ اخذت جداحة وصعدت فوك للسطح طلعت الباكيت سحبت جگارة شغلتها وكعدت ادخن
فزيت على صوتها :- عزززززة رجعتي تدخنين
گمتلها ايدي على حلگها واحجي احذرها
- صوتج حظي تردين تخزيني
وخرت ايدي وتحجي بصوت ناصي :- محمد انطاج مو
هزيت راسي ومديت ايدي :- تردين ؟
- اي
انطيتها الها بعدها توها سحبت نفس شحطت
وگامت تگح واني اضحك وادك على ظهرها
- عيع شلون تشربيها تخنك
- بعدج جديدة على هالسوالف بنتي
- خبرة بان الكلفه على گولة مآب
- بس صوتج لا تلكفنا شدن
مر كم يوم رجع فدار للبيت وراح ابنه بمكانه للأنبار مرتاحة هالكم يوم اكثر من القبلهم بالليل من اتعب اخذلي حباية اهدأ وانام مرتاحة بدون كوابيس
لحد مخلصن الحبوب العندي خابرته
- خلصت العلبة محمد شوكت تجي
- بس اكمل الشغل العندي وعيونج
- ديلا اليسمعك يكول وراك الشركات هو انتَ كلك خلك واحد مسربت ٢٤ ساعة دايح بالشوارع
- لسانج اخ من لسانج اذا ما ملصته الج بسيطة
- دمشي ابني يهدد عود
- ها متخافين يعني
- متخوف چلبي
- حلو انتِ مرة خليج عند حجايتج
سد الخط بوجهي ضليت صافنة ، هذا شنو براسه
ضليت لازمة گلبي مرن يومين ماكو شي هدوء حتى محمد اختفى اخابره ميرد لحد ما بالليل نايمة بفراشي وفزيت على ايد نورجان وهي تهزني .. نزيت
شهربان :- شكو
- هذا محمد عالخط يريدج
اخذته منها وعيني عالساعة بالـوحدة الدنيا نص الليل
خليت التليفون على اذني :- ها محمد
- وجعا انزلي للحديقة
فتحت عيوني :- لتگولها
- انزلي لج
انطيت التليفون لنورجان ونزلت ركض حافية فتحت الباب على كيفي وطلعت اباوع بالحديقة ماكو احد
محسيت الا اندفع عالحشيش وصار فوگاي
ايده على حلگي كاتم صوتي
محمد :- بان الحلوة الساحلة گلبي بخضار عيونها
وخرت ايده :- تخبلت انتَ شجابك
- اشتاقيتلج واجيت اشوفج
- فدار هنا محمد فدوووة روح والله يموتنا وما يرفله جفن
- ها طردة ؟
- اي يلا روح ليگعدون
- مو صار كم يوم خابصتني وينك ووينك
- مووو هيج عبالي اشوفك بالحلة مال مدرسة لأن مآب مو هنا دنروح ونرجع مشي
- مو ردتي حبوب ؟
عين عليه وعين عالباب :- اي بس دوخر چنك ثور جعصتني
- ثور ودايح بعد بان بعد طلعيهن جاي اجمع
حجيت اتوسله :- عليك الله روح والله اروح بيها بس يطلع واحد ويشوفنا
كام مني طلع علبة من جيبه خلاها بيدي وضل لازمها باوعتله مستغربة سحبني عليه يريد يبوسني درت وجهي صارت بخدي ما وخر عضه حيل وباوعلي
- هاي عقوبة صغيرونة ولو ما اجت بالهدف
فركت خدي بوجع همست :- چلب
- شگلتي ؟
- روح محمد ليگعدون
- النا لقاء ثاني بان الحلوة
غمزلي وراح للحايط شال نفسه بسرعة طفر ضليت صافنة ممستوعبة الصار ، طبيت جوة اصفن وكاتلني البرد طالعة بملابس خفيفة مال نوم رجليَّ مثلجات
طبيت للغرفة صارت بوجهي
نورجان :- شعنده جاي بان ماما مو حذرتج
- والله مگتله يجي ليش متصدگون
- مالنا حيل للمصايب خلينا عايشين بهدوء شوي مصدكنا نخلص من عمو سالم تالي تدلين محمد على مكاننا
- لا خلص گتله هاي آخر مرة بعد ميجي
- نشوف
دارت وجهة ونامت تكررت جيات محمد مرة ومرتين ميطول يشوفني ينطيني الحبوب لو اوصي على فد شغلة ماما مانعتها عني يجيبلياها ويروح بسرعة
مثل كل يوم كعدنا الصبح بدلنا دنروح للمدرسة
گاعدين دناكل وخابر مآب على ماما گلها خلي البنات يطلعن ، رفعت راسها بعدها تاكل بلگمتها
نورجان :- شبسرعة بعدني مماكلة شي
شدن :- عنده شغل ماما بالعجل گومن
سوت لفة لنورجان وانطتها تاكل بيها طلعنا جان واگفلنا بالباب ملتهي يخابر بالموبايل ، شخط السيارة ومشينا سوة الطريق ٥ دقايق من نزلنا صاح
مآب :- دحگن يولي اخاف اتأخر بالحلة ممنوع وحدة تعتب رجلها برة المدرسة سمعتن لو اعيد
- بله ما اجيت لليل شلون نبات هنا
- اذا ما كدرت اجي ادزلجن واحد من ربعي طلعة لوحدجن ماكو وخلي اگضب وحدة كاسرة حجايتي تاما اعلگها من شعرها
خله وراح غميته وصارت عيني على نورجان ملتهية تنزل بالتنورة ضيكة ضابة جسمها ضب وطافرة من جوة
- بان باردة
- ليش ملابسة ستريج جوة التنورة مطلعه سيقانج المن
- شمدريني گلت تغيير وشفت الشمس طالعة معبالي هيج برد
- خلي تفيدج كشختج
كملنا الدوام وبالحلة لگينا واحد من طرف مآب
منتظرنا يم الادارة وصلنا للبيت وراح
بالليل كاعدين بالصالة نقرة دروسنا اتصل تليفون نورجان شافته اخذته وركضت صعدت فوك
گلبي لعب .. گمت وراها
لگيتها تروح وتجي بالغرفة بأنفعال تحجي وي شبير
نورجان :- معليك بابا معليك .. لتصيح عليَّ
حجتها وغورگت عيونها خلتني افور
سحبت التليفون منها صحت بيه
- اسمع لك ما عاش اليرفع صوته على اختي شنو شحاسب روحك
- عجل اذا انتِ هيج نجرة كولي لأختج تاتشوفلها تنورة اكبر من اللابستها اليوم لو بس شاطرة تهترين على شبير ومكسزر الرگبة ذاك
- معليك بيها تلبس ضيك واسع حريتها اطلع منها انتَ
- حلووو ونخليجن تسيبن براحتجن يولي دحكي عدل انتِ بيت عقيد فدار ودامجن ابيتو سمعتجن من سمعتنا واليمسجن يمسنا تنانيرجن هاي بعد اذا دحكت وحدة لابستها ما تلومن الا نفسجن
- دمشي لك شو كلمة والثانية وصحتوا بيت عقيد فدار شنو مشترينا بفلوسكم لوما هو الكتل روحه حتى ياخذ ماما
- راح اسكت لخاطر حلويات الخاصكي الا جان عرفت شعملج على هاللسان اليهتر
بعدني مرادة سد الخط بوجهي باوعتلها صحت بيها
- انتِ اللخ شبيج تبجين
33 تعليق
- مسمعتي شلون يصيح
- على روحه ليش سكتيله مخليته يستقوي عليج بعدين تعالي شبير شمدرية بلبسج وشجاب رقمه يمج
باوعتلي بتردد تفرك بأيدها صحت :- متحجين
- اني وياه دنتواصل يعني سوالف وهيج
فتحت عيوني :- ومن شوكت هالحجي
- من اجانا آخر مرة
- وساكتة ؟
دنگت محجت عضيت ايدي حيل محروگة أعصابي
انكيتها التليفون :- امسحيه خيولي واحد منحط مثل خاله
- شمدريني هو سجله
- يريد يدوس زايد هذا ابتعدي عنه نورجان ترة واحد مو راحة وابو بنات سمعتهم ذاك اليوم يتفقون حتى يجيبون بنات لشقة مآب
- عزة
- اي شعبالج لعد ضباط ويمج الحساب ٩٠٪ منهم نفس الخيسة طلعي منهم كم واحد شريف بس وفدار وابن اخته خارج الدائرة
- ومآب
- هذا أخس منهم يبين كدامج بس هو وبس وصاحب وكفات ومن ورة شراب عرك وابو ملاهي
- عززة
- اي ضلي ضلي عزة وعزة لحد متوكعين بيد واحد اضرب من عقيد فدار وضباطه المنحطين
عفتها ونزلت جوة لگيت ماما تلبس بحذائها تريد تطلع
- وين رايحة ؟
شدن :- للصيدلية هسه اجي ما اتأخر
- بيج شي مريضة
- لا حبيبتي ليضل بالج دا اجيب حبوب لراسي موتني من الألم
راحت بس استغربت تعابيرها جانت متحيرة وخلصت اليوم كله تتصفن ، داومنا ثاني يوم وبرجعتنا وصلنا مآب لراس الشارع وطلع مستعجل كال عندي شغل
امشينا للبيت لگينا سيارة طابگة بالباب
وحدة تباوع بوجه الثانية مستغربات دخلنا للصالة صار بوجهنا عمو سالم كاعد عالتخم وماد رجله عالطبلة
بـ بسطاله وماما واكفة كبالة تحجي وياه تريده يروح
شافنا وفز :- ليش هيج مرة اخوي حارث ما راح يرتاح بگبره وهو يشوفج حارمتني من شوفة بناته
شهربان :- انتَ شجابك
سالم :- احجي عدل لا أكسر سنونج بحلگج لج أبوج خلاجن أمانة عندي و وصاني عليجن تبقون بناتنا
شدن :- مالكم بنات يمي وتوكل مناه بيتنا يتعذرك
- بيتكم ؟ حقج يابة حقج عايشة رغد انتِ وبناتج بزود العقيد وفلوسه بس ما گتيلي عاد زواجكم بعقد لو الوضعية فالتو كم يوم وتنذبين
جرت نفس طويل تتمالك أعصابها :- لتخليني اتجاوز سالم تبقى عم بناتي تطلع بإحترامك لو اطرد
گام ونتر :- طالع مالي شي يمج بعد وليتي وصرتي بذمة رجال بس بنات اخوي ما يبقن بـ بيت رجال غريب مرجوعهن النا
- بأحلامك اخليك تطول وحدة منهن شنو توك تذكرت عندكم بنات وين جنتوا من مرضن من جاعن انتوا سائلين شلون دبرتها وعيشتهن كل هالسنين حتى جاي دتكول بنات اخوك
- لتضلين تاكلين خ** البنات جانن صغار ومتعلقات بيج الا لو الود ودي اني من زمان ماخذهن من حضنج اخاف لتصير بيهن ريحة تربية امهات الملاهي ويعيبنا بكبرهن مثل امهن وبيبيتهن
- إييييييياك ثم إياك تجيب طاري امي على لسانك
لك أمي أشرررررف من أطهر واحد بعشيرتكم سمعت لو لا ولا عبالك تلوي ذراعي بهالحجي والتهديدات اللي متوكل خبز بناتي جانن بحظني ويضلن بحظني رضيتوا والما رضيتوا
- حارث موصيني عليهن قبل وفاته اريد ابري ذمتي
- لا والله صاحب ضمير انتَ مشهودتلك بيوم الاجيت هديت علينا تسحل بيهن من حظني
- انطيتج فرصة وضيعتيها جنت قابل حتى تشوفيهن بس ورى السويتي بيَّ وشردتج من بيت اخوج المگرن بعد تنسين عندج بنات
اندار النا صاح :- وانتن يلا گدامي للسيارة
- مووو بكيفك بناتتتتي ذن بناتي محددددد اله الحق ياخذهن مني لا انتَ ولا الاكبر منك اطلع ساااالم لا اخلي الزلم تشوف شغلها وياك
هجم عليها لزمها من شعرها عيونه ناطه :- طلعلج حس مستقوية بالعقيد مالج
- بيك خيرررر متجي تهدد نسوان بنص بيته وهو بدوامه
ضربها راشدي وكعها للگاع صار ظهرها للحايط :- لو فارغلج جان شوفتج منو البيه خير بس ولا يهمج نتحاسب غير وكت تاليتج مطلگة وواگعة بيدي
بصق عليها وهي بالگاع لازمة بطنها أثر الوگعة وتتلوة من الوجع گوة تجر النفس ، اندار النا يخوزر چلبت نورجان بأيدي حيل وترجف من الخوفة البيها
ردت اركض على ماما اشوفها لزمني دفعني ليورة
صاح :- گدامي للسيارة وتنسن عندجن ام بعد
- شسسسسسوويتلها حيوان
شاغت روحي واني اشوفها تون تلوب بالگاع من الوجع لزمني ويجرجر بيَّ ادفر بيه اريده يعوفني وعيون نورجان وراي تبجي صعدني للسيارة قفلها عليَّ ورجع يسحول بنورجان اللي گطعت روحها من البجي
لحد مطبگت سيارة فدار ونزلوا يركضون هو وشبير لزموه ، شبير اخذ نورجان من ايده خلاها وراه وفدار گدام عمو صاروا وجه بوجه ومصايح مينفهم منهم شي
ادفر بالباب اريد احد يفتحلي عبرت لمقعد السايق وفتحت السيارة ونزلت اركض للبيت روحي طايرة على ماما ، لكيتها بالكاع فاقدة ملابسها انملت دم
انخلست من منظرها اريد احرك رجليَّ احسهم خدروا لحد مستوعبت الموقف وركضت برة لكيته لازم عمو سالم من ياخته ويهدد بيه حلگه يخر دم
صحت واني ابجي :- عمووووو الحك ماما حتموت
4 تعليق
طبوا يتراكضون هو وشبير انخبصوا شالها
وطلعوا بيها صعدوها للسيارة واندار لشبير
فدار :- بان وياي وانتَ جيب اللخ والحگني لتخليها لوحدها
صعدت ويَّ ماما ليورة وعمو فدار يسوق بسرعة عصبي حيل گعد يستفسر مني عالصار وشجاب سالم لبيته
طريق الساعة سواه بنص ساعة اول مرة اشوفه منفعل بهالطريقة يشيل تليفون ينزل الثاني على ساعة نندعم
وصلنا للمستشفى ونزل شايلها تلگوه الممرضين يتراكضون خلوها على سدية ودخلوها للطوارئ
اخذتلي زاوية وگعدت لامة رجليَّ لصدري ودموعي تنزل بلا صوت واباوعله گدامي يروح ويجي بأعصاب
لشوي واجوا شبير ونورجان من بعيد ركضت حضنتني وحالتها مو احسن من حالتي رايحة منتهية الوجه احمر والشعر مكفش تشهك بصوت عالي تكسر الگلب
لهناك وطلعت الدكتورة كالت :- مريضتكم سقطت عيني وين جنتوا نازفة لحد ما موشل جسمها من الدم
كتبتلها بطلين دم ومقويات وكالت حالتها مستقرة بس تحتاج راحة ولازم تبات بالمستشفى اليوم يتأكدون من وضعها حتى لا ترجع تنتكس ، أشر فدار لشبير حتى ياخذنا كمتله
شهربان :- ما اروح ابقى يم ماما
نورجان :- اني هم
فدار :- بلا تهتر مو سمعتن الدكتورة كالت زينة بعد عش هالتمضيك مال مزعطة اخذهن شبير وعينك عليهن لتغفل عنهن ابد تلگه مآب منتظركم بالبيت خاف يجي عمهن الگواد يتعرضلهن مرة الاخرى
شبير :- سهلة انا اله
- لا يووول هذا حصتي تاشوف شلون يتعرض لأهل بيتي وانا ما موجود اذا ما شيلتو الرتب العلى اجتافو فلا اتسمى عالزلم
شفناه شلون صاير أعصاب خفت منه صراحة ملحيت وياه بالكلام رجعنا للبيت وي شبير تلكانا مآب يسأل عالصار والليل كله مبطل اتصالات ويَّ ابوه يسألون على عمو سالم وبيا مكان دوامه حتى يسووله جرة أذن
مر كم يوم طلعت ماما من المستشفى حالتها صارت احسن بس عمو فدار ضايج لأن مگلتله على حملها
وماما مشيلتني اللوم عبالها اني
دليت عمو بعنوان البيت لو محمد
رحت خابرته وكتله بالصار صاح :- اخ هبة البربوك هاي
شهربان :- واختك شعليها
- مرة جفتت عليَّ بالغرفة واني احجي وياج تلگيها سامعة اسمج وراكضة حاطتها بحلك ابوي
- زين شمعرفة بمكان البيت
- شبيج انتِ متعرفين ابوي تلگينه مراقبني بوحدة من جياتي عليكم ولاگف العنوان
- عيشنا بخوف محمد حتى من المدرسة كعدونا خاف واحد يتعرضلنا منكم
- شبيج بان كل عقلج اني أأذيكم
- مو انتَ ابوك هو المشكلة
- ابوي اني احجي وياه ليضل بالج
بالليل كاعدين الولد شافونا ضايجات لا دوام ولا طلعة محبوسات ليكول سجن صاح شبير
شبير :- كومن تاطلعجن غيرن جو
نورجان :- عليك الله ؟
- وعيونج تهيري يلا
كمزت صعدت فوك تبدل مكيفة واني على كعدتي باوعلي
- وانتِ الكلفه متكومين
- مالي خلك
- مالج خلك هاي تنسيها وياي افررجن بغداد كلها اليوم كومي يولي خلصينا تاما نتأخر
شدن :- روحي ماما اشتمي هوى صار هواي مطالعات
صعدت لبست قمصلة فوك ملابسي وخليت الكبوس على راسي يدفيني ، اباوع لنورجان محتارة شتسوي بروحها ضربت البنطرون والهاينك وفوكاهم قمصلة نفخ بيضة وكعدت تلبس بحذائها
- ادري وين رايحين هي فرة بالسيارة
- الكشخة بانو الكشخة من اساسيات الانوثة والاتكيت العلمتها النا شدن
باوعت لشكلي بالمراية وجهي تعبان أثر السهر لامة شعري جوة الكبوس وسادة السحابة نص وجهي ممبين بس عيوني طالعة
تنهدت ومشيت للكنتور غيرت ملابس
ونورجان فوك راسي تريدني اخلي ميكب
- عليج الله بس كُحلة يبرز لون عيونج
خليت سحبه وحدة باوعت صدك برز لونهم ورسمة عيني بينت خليت مرطب لميت شعري ذيل حصان
نزلنا بسرعة على صوت شبير وهو يستعجلنا ، صعدنا السيارة بس احنا وياه خلص الطريق اغاني وهاي رايحة منطلقة وياه يصفگون ويطگون اصبع .. اندار النا
شبير :- وين تردن ؟
- للأعظمية
افترينا شوارع الأعظمية مبتسمة ودموعي تنزل لا إرادي مدري حنين مدري فرحة واني امشي بالمكان الجان بابا يمشي بيه
تونسنا حيل وشبير رغم ما ارتاحله بس سوالفه تونس
رجعنا للبيت ومشت الأيام ، رجعنا لدوامنا والتهينا امتحانات نص السنة مضل الها شي ماما كل يوم گابة مشكلة ويَّ عمو فدار تريد تطلع تدور شغل تضيع وقت بيه ممتعودة على كعدة البيت وهو ميقبل
طلعوا من الغرفة كالعادة يتناطحون على نفس السالفة مآب باوعلي :- ما فضت ؟
شهربان :- لا ابوك قافل
- امج متمل ميبسة راسها
- من حقها مو بكيفه يمنعها
- رجلها يولي رجلها شنو بعقلج انتِ
- واذا ؟ شنو يستحكمها لو صارت مسجلة بأسمه ويمشيها مثل ميريد
اجوا فاتوا للصالة گطعنا كلامنا
گعد هو عالتخم وماما صارت كباله متخصرة
شدن :- وتالي فدار
فدار :- ما عندي مرة تشتغل
- هاي بالأنبار مو يمي
- الماشي عليها يمشي عليج اثنينجن نسواني
- اختنگت افهم ممتعلمة على هيج عيشة
- طبعًا حلتلج فرة المراكز تالي الليل
- ها هيج صار الحجي ؟
- عيوني انتِ ول ابويا دحگي والقرآن راسي يريد ينفجر ما عولت اخلص من لغة المركز تاجي هنا تكمليها عليَّ بنكدج اهجبي وصيري حبابة دام النفس عليج طيبة
- سهلة من باجر طالعة ادور شغل وشتريد تسوي سوي
حجتها وراحت للعرفة عض ايده يتمالك اعصابه وگام وراها كمت :- عزة هذا حيكتلها
لزمني مآب رجعني لمكاني
مآب :- لتخافين گلبو رهيف مينيطه يأذيها
- لا والله ؟ هيج يحبها
11 تعليق
- يحبها لا يمو بعد بس الاعرفو ابوي اول مرة يطول وي وحدة فوك الشهر وما زتها
فتحت عيوني :- يعني متزوج من قبل
- خير من الله
هزيت راسي :- جيد
اجت بزونتي الاعب بيها لميت كتبي وگمت شلتها وصعدت فوك انام ، ثاني يوم داومنا بالحلة طلعت قبل نورجان ادور واحد من الولد حتى يرجعنا
صارت عيني بعين عمو سالم واگف كبال المدرسة هو وواحد واگف وياه بزيهم العسكري بلعت ريگي من شفته يتقدم باوعت داير مدايري نورجان ماكو
سحبت وحدة من صديقاتي وصيتها توصل لنورجان لتطلع من المدرسة وتگولها عمو سالم هنا راحت تركض
صار گبالي :- تمشين بالحسنى لو اسويج فرجة لأمة محمد
شهربان :- ميحتاج رايحة وياك
سالم :- نورجان وين
- ممداومة اليوم
ضرب ايد بيد واندارلي بنتر :- يلا لج گدامي
مشيت وياه يدفع بيَّ صعدت ليورة
وياه رجل عمتي گاعد بالصدر اندارلي
ستار :- شلونج شهربان
يباوعلي من فوك ليجوة عض شفته :- سالم بناتكم قطع تچوي لأمهن
صعد عمو يسوق الطريق كله يفشر ويغلط على
امي واذا رديت انكفخ يلصمني على حلگي
نزلت دموعي من جاب طاري بابا واسمعهم يقسمون عليه هو والچلب ستار اتهسترت اجيته من ورة الكرسي خرمشت وجهه بأظافيري يمكن نبتتهم جوة اللحم
وگف السيارة ونزلي عمو فتح الباب وجرني ضربني راشدي حسيت صفحة خدي انشلعت وحرارة تطلع منه
صحت :- حيوانات چلابببببببب
61 تعليق
- تربية شدن بنت ام الملاهي شترجة منج قابل بس سهلة اني اعيد تربيتج منا وجاي
- تاجج راسسسسك بنت ام الملاهي تشرفك وتشرف عشيرتك من جبيركم لأصغر واحد
لزم ايدي لواها وره ظهري عطت بوجع حسيتها انكسرت ، كمت اصرخ الشارع فارغ حتى محد يسمعنا نزلت دموعي بوجع همست
- ايدي عمو ...
دفعني بصق عليَّ وسد الباب حيل ورجع يسوق ، ما اعرف شلون خلص الطريق مدري من وجع ايدي لو من الحرگة البگلبي واني اسمعهم يغلطون على أهلي ويخططون يسحبون نورجان يجيبوها وراي
وصلنا لبيت عمو نزلني يسحل بيَّ من شعري
تلگتنا مرة عمي عقجت وجها من شافتني
كفاح :- سويت البراسك يلا ارتاحيت
سالم :- عمتهن رايدة تشوفهن
- لعد اختها وين
- ماكو ما لگيتها
- هسه سجودة تسوي علينا هوسة طلبت نورجان بالأسم
- شسوي الباجر اروح لبيتهم واجيبها وياي ما اخليها
- ورجل امها يقبل
- خيولي هذا يهوبز مستقوي برتبته شنو احنا اقل منه قابل اذا فتح حلگه واعترضني اخلي صاحبي رتبة لواء يتصرف وياه
- شصار بأتفاقك ويَّ بيت شاكر
- تأجلت السالفة ابنهم عبد مسافر عود اجيب نورجان وارجع اخابرهم يستعجلون بالعرس اني هم ماريد اخليها يمي اريد اخلص جزعت روحي من هالسالفة
باوعتلي :- هسه هاي وين اوديها ؟
- شمريها بوحدة من الغرف وقفلي عليها الباب ترة تشرد درب امها منا لباجر لحد متوصل سجودة ونتصرف وياها
- ما عولنا نخلص من شدن وحارث النوب تلحگنا بزرتهم
اخذتني تسحل بيَّ اني احس روحي فاقدة من ألم
ايدي بس احركها تأذيني حتى مالي قابلية اقاوم
دخلتني بغرفة فارغة مبيها أثاث وباردة
ثلج گاعها مرمر طلعت وسدت الباب
لميت روحي بزاوية الغرفة بردانة وعيني صارت بالسگف عظامي تطگطك مرت الساعة والساعتين لحد متيهت الوقت بدت تظلم الدنيا الغرفة مبيها گلوب بس ضوة خفيف من الشباك يوصلني من برة
گمت اون بوجع من ايدي ودموعي تنزل
بديت ارعش برجفة من گد البرد مصاريني تگطعت من الجوع ، اعتازيت ادخل حمام گمت سحلت نفسي للباب وادك بيه صوتي گوة يطلع مبحوح سمعت طگة القفل
انفتح الباب صارت هبة گبالي
هبة :- ليش تدكين بالباب خبصتيني ترة مدا اعرف اخلص الفلم
شهربان :- حمام ..
گوة طلعت الحجاية من حلگي باوعت للمكان واجت جرتني من ايدي شاغت روحي عطت بوجع وهي گمزت
- وسم ومرض جفلتيني
مرديت عليها وگمت وياها اخذتني للحمام كملت وغسلت وجهي واباوع لنفسي بالمراية ، وجهي مورم أثر ضربته وشعري رايح مهلس حالتي حالة اندك الباب
- فضيني شنو نمتي
باوعت لروحي ولأيدي .. عضيت شفتي وفتحت الباب مادة بس راسي اباوعلها شافتني صاحت :- ها يلا
شهربان :- شوفي ..
سكتت عقدت حاجبها
هبة :- شبيج
ضليت ساكتة تقربت عليَّ تباوع شكو بحركة سريعة جريتها من شعرها وسحلتها جوة الحمام وقفلته
گامت تعيط :- وخررررري والله اگول لبابا يجنزج
- ليش فتنتي لأبوج على عنوان بيتنا
- مو اني وخري يلا
حجتها ورادت تدفعني لزمت ايدها لويتها
خبصت البيت بالعياط واني أزيد على ايدها
2 تعليق
حسيت ايدها شوي وتنكسر گد مضاغطة عليها
گامت تبجي دفعتها عني لازمة ايدها گامت تغلط وتهدد
طلعت وياها رجعتني للغرفة راحت وقفلت الباب عيوني ثگلن من التعب مددت عالگاع برودة تصل بعظامي بس ارتاحيت مخدرة وجع ايدي نمت واني محاسه بنفسي گعدت على ايد تتحرك على وجهي
فتحت عيوني شفت محمد گاعد كبالي ، شهگت ودفنت راسي بصدره وهو يمرر ايده على ظهري ويهمس
محمد :- كافي يروحي هانت وعيونج مضل شي اخذج ونطلع مناه
باوعتله :- ضربني
- اني اله الگواد
- اريد ماما
- ماخذج گومي يلا قبل ليگعدون
گمت وياه عضيت شفتي باوعلي بخوف :- شبيج ؟
- ايدي توجعني يمكن مكسورة
- لتحركيها
لزمني من الجهة الثانية ويمشي بيَّ على كيف
نزلنا الدرج صارت بوجهنا هبة خزرتني
هبة :- بابا يدري ؟
محمد :- لا واذا درة انتِ حصتي
طلعنا من البيت صعدنا سيارته وشخطها بسرعة ، مايلة راسي عالجامة وعيني عالشارع حسيت عليه يطخ ايدي
- هانت حبيبتي لتبجين عيونج الحلوة
2 تعليق
- حيأذون اختي محمد
- ميگدرون امجن هي الوصية عليجن اي تصرف منهم تروح تشتكي يسحولوهم
- ابوك ظهره قوي
- والعقيد هم ما مقصر رايحله بنص المركز مگوم الدنيا وما مگعدها وخاتمها بتهديد لأبوي وستار وطالع خلاهم يصطكون
- اشوفهم اجوا جرجروني
- ليغرج بابا هم لو يردون جان راحوا لبيته واخذوجن بس كاتلهم الخوف متشوفيهم اجوا بالختلة حتى اذا اعترض العقيد يگله هي اجت وياي برضاتها
وصلني للبيت سيارة مآب واكفة بالباب راد ينزل مخليته شخط سيارته وراح ،
توني دا ادخل للبيت طلعوا مآب وابوه شافوني اجاني بهمة مخنزر بوجهي
فدار :- وين جنتي مفييييييينة
صار گدامه مآب يمنعه يحاول يحجي وياه بس هذا وين ولا يتفاهم صار صياح لحد ما طلعت ماما على صوتهم اجت شبكتني وتبجي
شدن :- ليش هيج بان ليييييش تشلعين گلبي تدرين بيَّ مو حمل فراك وحدة بيجن
الافتهمته بيومها نورجان موصلتلهم انُ اني رايحة
ويَّ عمو سالم برضاتي متصورلها اني مخابرته لحد مشرحتلهم الصار گعد العقيد يتوعد لعمو سالم واذبح واصلخ ..
ما نمت ذيج الليلة من وجع ايدي اخذوني للدكتور طلع بيها خلع
گعدونا من دوامنا فد مرة وماما كالت تأجلن هالسنة متكملن ، اني مقبلت بس محد سمعلي جانت خايفة علينا ليرجع عمو يخطف وحدة بينا وفدار مأيدها
بليلة جمعنا بالصالة جان عندهم مشكلة صايرة ابيتهم ويريد يروح للغربية هو والولد اباوعلهم مخبوصين
وجه كلامه لماما
فدار :- دحكي يولي انا طالع وي طر الفجر للأنبار وبعد ما أأمن اعوفجن هين يبات مآب وياجن الليلة والباجر يزتجن لشقته تبقن هناك محد يدري بيجن لحد ما اگضي شغلتي وأرد
اباوع لماما مخبوصة اكثر منه من جهة احنا ومن جهة هم وضعهم يخوف خلصوا الليل يتناقشون بالصالة وكل شوي يصير صياح لحد مطلعوا من البيت
وصتنا ماما نلم ملابسنا ، الساعة عبرت الـ١٢:٠٠ مطفين اضوية البيت وكلمن بغرفته بس جذب اذا غمضتلنا عين فدار والولد طلعوا برة البيت ما رجعوا بعد
اجتني نورجان :- محمد ديتصل
گمزت رديت عليه گلي انزلي للحديقة .. نزلت ركض طلعتله لگيته واگف لثامه على وجهه ويتلفت
شهربان :- شعندك جاي محمد فدار والولد هنا ترى
- اجيت اشوفج قبل لا اروح
عقدت حاجبي :- وين ؟
- طالع لتركيا
- لويش شعندك هناك
- ورى ما رجعتج ابوي صار يلح عليَّ اخذ بنت خليل حتى يلوي ذراعي واني ما لگيت صرفة غير انهزم منهم
- ولشوكت تبقى هيج
- بس هالفترة بين ما ترجع سجودة تسافر مستگعدة بالبيت ماخذته طول بعرض مصار كم يوم من اجت وگامت تحكم وتدرين ابوي ما يردلها كلمة
بعدنا دنحجي انفتح باب الشارع وفاتوا فدار وراه مآب وشبير ركض محمد طفر عالحايط بسرعة واني گلبي احسه صار بين رجليّ من شفته يتقدم عليّ عيونه يتطاير منهم الشرار...
