رواية قدر مكتوب الفصل الثالث بقلم ام مصطفى
خلصت الامتحانات وبدت عطلة نص السنه
وصارت ذكرى سنوية اهلي
بيبي كالت نسوي عشة ثواب الهم
نعزم عمامج ونسوانهم
ونروح للمقبرة جانت المقبرة قريبة علينا ابغداد ودائما اروح اني وبيبي نزورهم ونجي
بيبي وعمه اسراء اسوكوا للعزيمة وبيبي وصت عمو لؤي يجيب خروف يذبحة
طبعا عزمت عمامي وعمتي احلام
وبدوا يجون العوائل
عائلة عمو امجد الجبير
مرت عمي قبس جانت وحده متكبرة كلش لكونها مديرة مدرسة وشايفة نفسها كلش عماتي احلام واسراء ابد ميحبنها
وعدهم اثنين ولد الجبير سرمد اكبر مني تقريب بخمس سنوات
وادم اصغر مني بسنتين
اما ملك عمرها ٦ سنوات
عائلة عمو لؤي
مرت عمي كوثر هاي صرافة وتحب الكشخة واللبس والطلعة بس هي حبابة
عدها ٣بنات اثنين بعمري تقريب وحدة صغيرة وحمودي عمرة عشر سنوات
اما عمتي احلام ماعدها غير ولد واحد الي هو علي وبنية الي هي مريم
.....
الكل طبعا اجتمع ع العزيمة الي سوتها بيبي بثواب اهلي
وبدن يسولفن طبعا مرت عمو لؤي تحجي بالملابس والتحفيات واشتريت هيج وجبت هيج
ومرت عمي امجد تتفاخر بدرجات ولدها
وبدن يستعرضن عبالك
عمة اسراء كامت واشرتلي
-ها عمة
-تعالي يمي نسوي الحلاوه بثواب اهلج ذن فارغات جايات عبالك بحفلة ولا يستحن
-عمة هي ليش مرت عمو امجد هيج شايله خشمها علينا
-مديرة عود
-مديرة بالمدرسة بس خوما علينا
-بعد هذا طبعها
عوفينا منها
رنود حبيبتي اني احتمال هذا الشهر ازوج راح تبقين انت وامي وحدجن بالبيت حبيبتي اريدج تنضمين وقتج وادرسين زين وتساعدين امي بالبيت خطية مابيها حيل وحدها تشتغل بالبيت والبيت جبير
اريدج تساعديها وديري بالج واياج تقبلين اطلعون من البيت
-نطلع وين نروح
-شوفي ذن الكاعدات كلهن عينهن ع هالبيت مكفاهن عفنا بيت ابوي الهن باعنه واخذن الغلوس هنوب رجعن ع بيت المرحوم يردنه
-عمة يصير متزوجين اني خايفة
-ليش حبيبتي تخافين
-عمة خاف صدك نعوف بيت ابوي ونروح لبيت عمو اني مااكدر اعوف هالبيت بي كل ذكريات اهلي وثانيا مرت عمي امجد مينعاش وياها مسوية بيتها مدرسة
-والله صدك حقج بس ليش اكلج اريدج تصيرين سباعية وتساعدين بيبي
حتى لا يكولون بيت جبير ومتكدرله
-ان شاء الله راح من باجر اعود نفسي ع شغل البيت
-عفية حبيبتي
كملة العشة وكوثر مرت عمي لؤي كامت ساعدتنا بعدها خلصنا العشة
كعدنا سوه كولنا عمامي وعماتي
عمو امجد كال لعمة اسراء
-شوكت عرسج اسراء
-هالاسبوعين ان شاء الله
-جهزتوا
-اي كملنا بقت بس خفايف
-وان شاء الله هم دفعتي منج فلوس للبيت والذهب
-شي قليل يعني اني جهزت نفسي وخليت الثكيل عليه
-ليش ادفعين منج هو غصب عليه يجيبلج
-سامر ماعنده يادوب اثث البيت
-ماعنده ممجبور يزوج انت هيج راح تعوديه عليج
-لا متفاهمين
-اي زين نشوف تاليها
المهم يوم انت حضري نفسج انت ورند ترحون ويانه تعيشون
-ليش ليمة وبيتنا
-يوم البيت جبير عليكم واني مااكدر اعوفكم وحدكم هنا
-لا تخاف ماعلينا شي واحنه متعودين ع كبرة
-وليش متجون يمة وهذا اللبيت ناجرة ونستفاد من ايجارة
-لا مابعازته مااريدة عندي راتب ابوك وراتب المرحوم عايشة عليهن خير من الله
-بس مايصير الناس تاكل وجوهنا
-لا مالك شغل اني مااعوف بيت المرحوم ومااطلع منه الا ع جنازتي
-عمرج طويل
عمو ماعجبة هالحجي ضاج
وكل لمرته يله كومي وصاح ع الولد سرمد وادم يلة كوموا بابا
بيبي حجت باجر سنوية اخوكم متروح ويانه للمقبرة الصبح
-روحوا انتوا
-ليش مو هستوك جنت حريص علينا منبقى وحدنا بالبيت وبعدين ليش متروح لقبر اخوك مو لحم اجتافك انت وجهالك من خيرة لو نسيتوا الاخذتوه منهم
-لا منسينا بس اني اروح ع راحتي غير يوم
-يله كوموا نروح
عمي جان حيل طماع رغم ابوية جان عنده بيت ثاني واخذوه كعد بيه عمو لؤي وبيت جدي صار العمو امجد
ابوية هم جان عنده فلوس بالبيت اخذوهن حتى السيارة السوه بيها الحادث باعوها
وذهب امي تقاسموا وجان هذا السبب الي خله خوالي يقاطعون عمامي وبيبيتي ام امي بوكتها تعاركت وياهم ع الذهب رادت الي يبقى بس جشع عمامي وطمعهم خلاهم يطردون خوالي
وطبعا بيبي ماتت ورة امي بسنه من حركة كلبها ع امي ........
الصبح رحنا لاهلي لمقبرة الاعظمية
وكعدت يم كبورهم راحة نفسي وصارت كبالي كل الذكريات
بابا ماما سيف اخوي ع الاقل جان انت بقيت سند الي ليش كلكم عفتوني وحيدة والله اشتاقيت الكم هواية
اتمنى يرجع الوكت يوم واحد واحضن امي وابوي واشم ريحتهم حيل اشتاقيت الهم
بيبي بقت تنعى وتبجي
واني ابجي بسكووت شكد صار من فاركتهم بس نار بكلبي متنطفي عبالك اليوم عافوني والله الفراك صعب خصوصا اذا عزيز عليج شخص ومتعلقة بيه صعب ينسي لو احد يجي يسد مكانه واني عائلتي كلها راحت بيوم واحد .....
رجعنا تعبانين بس نفسيتي ارتاحت من بجيت وكعدت يم قبورهم
ومرت الايام وصار عرس
عمتي اسراء الي احس راحت روحي وياها عمتي هي ربتني وجانت مثابة ام واخت وصديقة الي كولش حنينه علي وتحبني
من اجت الزفة وراحت خلصتها بس بجي اني وبيبي نبجي عليها ....
وبقينا وحدنا اني وبيبي
صار مسؤولية البيت اكثره علي لان بيبي مريضة وجبيرة بالعمر مو مال تنضف وتغسل
هي جانت تطبخ وتسوي خفايف
تعلقت حيل ابيبي وصرت اخاف افقدها
احبها حيل وداومت ونجحت للعدادية
الرابع عام
جنت حيل شاطرة واحب دراستي كولش،وسنه ع سنه انجح بتفوق جانت مرت عمي امجد تغار لان بتاتها ميجيبن مثل درجاتي ودائما تعيرهن تكلهن رند يتيمة وتطلع متفوقة واحسن منجن انتن كولشي متوفر الجن ويادوب تنجحن ....
بهاي السنه المشؤومة بيبي حيييل تمرضت
عمة اسراء كامت تروح وتجي بوكتها حامل هي
وبيوم بايتة يمنه عمة اسراء واحلام
بيبي تخربطت نص الليل
خابرنا ع عمو امجد
بسرعة اجه اخذها لمستشفى
كعدت ابجي ع بيبي متت خوف عليها
-ليش تبجين رنوده لا تخافين عمة ان شاء الله ماكو شي
-عمة مااريد هم افقد بيبي مثل مافقدت اهلي لو بيبي صار عليها شي اني وين اروح
-اسم الله حبيبتي ان شاء الله ترجع سالمة
ان شاء الله يارب
بس بيبي مارجعت
اجانا الخبر بيبي ماتت
وهاي الصدمة الي هدتني حييل تاثرت ع بيبي يمكن اكثر من اهلي لان اتعلقت بيها وربيت ع ايدها
من جابوها بالتابوت جلبت بيه
بيبي عفية لا تعوفيني احبج وين اروح اني ليش تخليني وحدي
منو الي اني
عمة اسراء تجر بيه جرتني حييل
عمة اني يمج انت لا تعذبين بيبي هي توصي بيج ليل نهار
عمة ليش الي احبهم افقدهم ليش
اخذني عماتي غسلن وجهي ودخلني للغرفة عمتي احلام خلت راسي ع رجلها وكامت تقرة قران علي لحد مانمت
شفت ابوي بالحلم واكف ويهز براسة
-بابا مشتاقتلك اجيت علي
جان بس يباوعلي بحزن بعدين راح يمشي واني اركض وراه
فزيت بابا بابا
عمتي صاحت اسم الله بنتي اسم الله
عمة ابوي جان واكف هنا
-اسم الله حبيبتي تتحلمين
كامت تبجي خوي علمت بامي ماتت واجيت تلكيتها
كالت كومي حبيبتي غسلي وجهج وتوضي وصلي واقري الهم قران
بعد ماخلصت الفاتحة طبعا اجة عمو امجد اخذني لبيتهم بحجة ميصير ابقى بالبيت وحدي ومن هنا بدت حياة جديده الي من بيت البيت اتنقل
