رواية جريمة المنصورة الفصل الثالث بقلم محمود الأمين
يبقى أخو المجني عليها سارة الشاطر.. بس سارة معندهاش غير أخ واحد بس، وهو كريم الشاطر، أحد المشتبه فيهم.. يبقى إزاي ده أخوهم؟!
لقيت سليمان، دكتور الطب الشرعي، بيقرب مني وبيقول:
_ البطاقة دي اللي وقعت من وائل لما كان بيطلع الجثث، ووقع من طوله.
= وائل ده بيشتغل معاك من إمتى يا دكتور سليمان؟
_ قريب بدأ شغل معايا. أنا كنت محتاج حد، وهو جه وقال إنه اشتغل في مشرحة قبل كده وعنده خبرة في ده.. ولما جربته طلع فعلًا عنده خبرة في الموضوع، بس إنت بتسأل ليه؟!
= عشان الشخص ده يبقى أخو سارة المجني عليها، بس تحرياتنا بتقول إن سارة ليها أخ واحد اسمه كريم، فده مين؟! لسه هنعرف بعد ما نعمل تحريات عنه.
_ أنا مش عاوزك تكون زعلان مني إني شككت في كلامك، بس إنت لو شغال في المشرحة هتشوف حاجات كتير، وهتعرف إن الأموات ليهم عالم زينا بالظبط.
= دكتور سليمان، الكلام ده مش وقته. إحنا دلوقتي في لغز جديد.. شخص كان بيشتغل عندك في المشرحة من فترة قريبة، والشخص ده يموت في المشرحة، وبالتشريح تكتشف إنه ميت مسموم، والمفروض إنه عارف إن أخته وعيالها اتقتلوا، ورغم كده مقالكش.. يبقى شغله هنا مش صدفة، وواضح إن الموضوع متخططله من بدري.. بس السؤال هنا: ليه وائل ده اتقتل؟ هل كان مطلوب منه حاجة ورفض ينفذها، ولا دوره خلص في حاجة هو عملها؟
_ فعلًا اللي حصل ده غريب.. بس أكيد مع التحريات في حاجات هتظهر وهتساعدك.
...
مشيت من المشرحة، واتواصلت مع وكيل النيابة سامح صقر عشان أبلغه باللي حصل في المشرحة، وإن التقرير هيترفعله بعد ساعة من دلوقتي من خلال دكتور الطب الشرعي.. فرد عليا وقال:
= أنا كده كده هحقق مع كريم الشاطر، أخو المجني عليها. هو اللي فاضل في المشتبه فيهم، واللي حصل ده بيضغط عليه زيادة.. واضح كده إن كريم هو اللي ورا اللي حصل.
_ معقول يا باشا؟!.. هيقتل أخته وعيالها؟! طب ليه؟!
= إنت نسيت إنه مدمن، ومش أي إدمان.. كريم ده بيشم، يعني مش واعي ولا مدرك هو بيعمل إيه.
_ ما هي النقطة دي في حد ذاتها تطلع كريم من الموضوع.. إنت بتقول إن كريم مش واعي ولا مدرك هو بيعمل إيه؟!.. إزاي واحد مش واعي ولا مدرك هيخطط التخطيط ده، وهيخلي مسعد يتعاطى حبوب هلوسة الفترة اللي فاتت دي كلها، وكمان يخليه يشتري كتاب شمس المعارف ويظن إن الجن هو اللي عمل كده؟!.. لا يا باشا، أنا بتفق معاك في حاجات كتير، بس المرة دي هختلف.. اللي عمل كده فاهم كويس هو بيعمل إيه، ومخططله.
= أنا همشي معاك للآخر.. إيه بقى سبب إن وائل ده يتقتل، لا ويموت في المشرحة اللي هو شغال فيها أصلًا من فترة قريبة؟! شايف إن دي صدفة؟
_ أكيد مش صدفة، وجايز تحقيقك مع كريم يوصلك لحاجة يا باشا.
= أكيد هنوصل لحاجة، وهنحل القضية دي.
...
قفلت مع وكيل النيابة، ورجعت على مكتبي تاني عشان أطلب من الرائد محسن يعمل تحريات عن صاحب البطاقة الشخصية اللي لقيتها واقعة في المشرحة، واللي كانت باسم وائل سالم الشاطر.. وأول ما محسن سمع الاسم اتكلم وقال:
_ أنا سمعت الاسم ده فين قبل كده يا باشا؟!.. أصل المجني عليها اسمها سارة سالم الشاطر، وأخوها كريم سالم الشاطر.. يعني صاحب البطاقة الشخصية دي يبقى أخوهم؟!
= المفروض إنه أخوهم، ومات في المشرحة، والتشريح أثبت إنه ميت مسموم بحاجة أشبه بحبة الغلة اللي بتتستخدم اليومين دول في الانتحار، والعالم كله بيتكلم عنها.
_ أيوه يا باشا، بس التحريات بتثبت إن سارة الشاطر عندها أخ واحد، وهو كريم.. الأخ التاني ده جه منين؟!
= ما أنا عاوز أعرف.. هل الموضوع مجرد تشابه أسماء؟ وأنا استبعد الحل ده بصراحة.. ولا هو أخوهم فعلًا، ورجالة البحث الجنائي مش شايفة شغلها كويس؟! وده الأرجح واللي هيطلع صح.
_ يا باشا، إن شاء الله مفيش الكلام ده.. الناس بتحاول تجيب كل المعلومات عن أي متهم وعن أي مجني عليه، وأكيد لو كانت غلطة هتكون مش مقصودة.
= شغلنا مفيهوش الكلام ده.. نسبة الخطأ في شغلنا معدومة يا محسن، فاهم؟!.. اتفضل اعمل التحريات دي، وتكون عندي في أقرب وقت.
******
وصل كريم الشاطر النيابة حسب الاستدعاء اللي وصله، عشان أبدأ التحقيق معاه، خصوصًا بعد ظهور وائل اللي اتقتل ومات في المشرحة.
_ طبعًا إنت يا كريم عارف سبب وجودك هنا؟!
= أكيد عشان جريمة القتل اللي راحت فيها أختي وعيالها، وحسبي الله ونعم الوكيل في مسعد اللي حرمني من أختي الوحيدة.
_ أختك الوحيدة.. طيب، التحريات اللي عندنا بتقول إنك ممنوع من دخول بيت أختك بأمر من جوزها، عشان إنت ليك في الأبيض.. وإنت عارف يعني إيه ليك في الأبيض.. مدمن يعني، وكنت بتشم، وكنت بتاخد فلوس من أختك عشان مزاجك، ولما جوزها عرف طردك وطلب منك متجيش عندهم تاني.. فإنت قررت تنتقم وقتلت أختك وعيالها، ولبسته هو الموضوع.
= أنا أقتل أختي وعيالها؟!.. طيب ليه؟!.. لو على كلام حضرتك يعني، يبقى أنا مشكلتي مع جوزها، كان أولى إني أقتله هو.. بقى ليه أخلص على أختي اللي ما ليش غيرها في الدنيا؟
_ طيب ووائل.. مش ده أخوك برضه، ولا ده غريب عنك؟!
= وائل ده من أم تانية، ومبتعاملش معاه خالص، ولا بعتبره أخويا.. بس أنا عاوز أعرف إيه دخله بالموضوع ده؟!
_ كان شغال في المشرحة اللي جثة أختك وعيالها هتتشرح فيها، ومات هناك، وتشريح جثته أثبت إنه مات مسموم.. ده غير إن تحليل الدم بتاع مسعد أثبت إنه مش ملبوس ولا حاجة.. مسعد كان بيتعاطى حبوب هلوسة، ومش أي حد يعرف يجيب حبوب الهلوسة دي، ولا أي حد يقدر يدخل بيت مسعد غير واحد قريب منه، والله أعلم إنت عملتها إزاي بعد ما اتطردت.
= بص يا باشا، أنا موضوع أخويا ده ميهمنيش، وقولت لسيادتك إن الواد ده من أم تانية، يعني مات أو عاش مش فارقة معايا، وأنا مقابلتوش غير مرتين.. أما موضوع إني كنت بحط حبوب هلوسة لمسعد، وإنه مش ملبوس، فالكلام ده مش صح.. أنا اتطردت من بيته، ومن ساعتها مدخلتوش تاني.. بس أنا عاوز أقول لسيادتك على معلومة.. معظم المشاريب اللي كان بيشربها مسعد كانت على قهوة المعلم عظيمة، وفين وفين كان بيشرب حاجة في البيت.. وده كلام أختي، الله يرحمها، مش كلامي أنا خالص.
_ قهوة المعلم عظيمة.. طيب، إنت للأسف مش هينفع تمشي، لأنك حتى لو بريء من تهمة قتل أختك وعيالها، فإنت عليك قضية تعاطي، وأنا عارف إنك متعرفش.. فعشان كده أنا مضطر أتحفظ عليك.
*****
كنت قاعد في مكتبي مستني التحريات عن وائل سالم الشاطر.. عاوز أعرف إيه دخله بالقصة دي، وإزاي فريق البحث الجنائي مقدرش يوصل للموضوع أول مرة.. ولكن في الوقت ده جالنا بلاغ عن خناقة كبيرة في نفس المنطقة اللي حصلت فيها جريمة القتل، وإن في ناس كتيرة اتصابت إصابات خطيرة.. اتحركنا على هناك، عشان نلاقي نفسنا قدام قهوة، وعرفنا إنها قهوة للمعلم عظيمة.. وفي نفس الوقت جالي تليفون من وكيل النيابة بيبلغني إن مسعد كان بيشرب كل المشاريب بتاعته في القهوة دي، وكان طالب مني ضبط وإحضار المعلم عظيمة للتحقيق معاه.. ولكن أول ما دخلت القهوة، لقيت على الأرض جثة، وكانت جثة...
