رواية قيود العوف الفصل الرابع والاربعون 44 بقلم ريتا

-ها عمو شو صفنتي ؟

باوعت عليه لثواني ونطقت ..

-أخذني للكراج عمي 

أومأ براسة بقبول وگال ..

-تعالوا عمو تفضلي

التفتت علىٰ امي وگلت إلها طالعة لكريلاء حدت وجهة وگالت بعدم رضا ..

-وين راح تفرفرين بيه جُمان وين ماخذتنة شتندلين انتِ وطالعة لكربلاء وحدج محافظة كاملة شتعرفين بيهااا

-انتِ وياي ماما 

-ولج شدتشوفيني أشوف أمشي بيه خير بيه حظظظ شجاااي تسوين بعمرج يمة شجاااي تسوين ماشفتي شصار ويابلوة وگعت علىٰ روسنا أخر مرة

باوعت بحيرة وأتقربت وحچيت بهمس وياهة ..

-ماما أحسن مكان النا كربلاء هسة .. والله تعبانة وضايعة بس أريد أزور وارتاح حتىٰ أعرف أفكر أريد أتصرف عدل ماما دخت واحتاريت لا تضغطين عليه تعبت حيل وإذا أبقىٰ هيج راح اتخبل

نفخت بغضب وگالت ..

-أمشي نشوف تاليهة وين نشووووف الله يصبرني الله يصبرررني 

صعدنة ويه السايق وطلعت السيارة ألتفتت علىٰ الشارع باوعت بنظرة طويلة اتنهدت.. ورجعت نظري للأمام نص ساعة تقريباً و وصلنا للكراج انطيتة الكروة ونزلنا ما أعرف وما أندل شيء هنا صرت أمشي وأسأل عن السيارات الي تطلع لكربلاء مشيت بماما وگالت ..

-أمل: راح أتعبج اني ماما 

-جُمان: تعبج الوحيد راحة ألي أكو احلىٰ منه ؟ 

-أمل: ثگيلة اني وراح تفترين بيه واتعبين وين رايحة يا ماما خلي نرجع لبغداد 

-جُمان: ما اگدر بغداد بعد مو أمان النا ماما يعرفون كل خطوة نخطيها بيها وبعدني رغم العرفتة شصار بيهم بس خايفة عليچ وعلىٰ نفسي كافي خلي نرتاح تعبنة 

-أمل: كل خوفي عليچ اني دتشوفيني بعد مو أمج القوية الي عينها بظهرج لو مشيتي صرتي انتِ المسؤولة عني وعن نفسج واني كل خوفي هذا يا يوم لأن داشوف المصايب الدتصير .

                                            

              

                    

-جُمان: الله ويانه الله موجود هو راح يقويني ويخليني أكمل 

-أمل: ونعم بالله 

رفعت راسي من سمعت صوت واحد يصير كربلاء كربلاء بسرعة مشيت وصلت أله واتفقت وياه علىٰ السعر صعدت أشياءنا وصعدنا چانت لسه السيارة ماكامل عددها گعدت ماما وگعدت يمهة أنتظر يكمل عدد الناس حتىٰ نطلع ...

مرت فترة بدت تنترس بقىٰ عدد قليل ومن ضمنهم چان الكُرسي الي مقابيلنة فارغ .. دقائق وصعدوا ناس وصعدت مرة و وياهة طفل يطلع عمرة الـ7 سنوات گعدوا يمنة وطلعت السيارة ..

سرحت بخيالي وعيوني علىٰ الطريق .

أفكر بيه إذا رجع وعرف شلون راح تكون ردة فعلة ؟ 

راح يفتقدني ؟ ويشتاقلي ؟ لو خلص فعلاً كرهني وكره وجودي وبرد گلبه مني وراح يكون بُعدي أريح اله !

غمضت عيوني وحطيت راسي علىٰ الجامة فتحت تلفوني ودخلت علىٰ رقم منار بديت أكتب الها بالرسالة ودموعي تنزل علىٰ خدي بقهر دزيتها وطلعت الشريحة كسرتهة وشمرتهة من الجامة وحذفت الواتس أعرف إذا بقيت رقمي راح يعرف مُكاني عن طريقة ..

عيوني تدمع مانايمة ولا دقيقة الأرق والتفكير ذبحني صارت عيوني تغمض لوحدهة لحد ماغفيت ..

******

"منار ماعرف شوكت راح تقرين هذي الرسالة بس اني وماما طلعنا وأضطريت أطلع بهيج وقت لأن أعرف ماراح تقبلون نطلع .. واني تعبت تعبت هواية وبعد الي صار بصراحة دخت وضعت وتفكيري أتشتت .. منار اني خجولة منهم كلهم وأعتذر ألهم لأن اتصرفت هيج تصرف أبيتهم وانتهكت خصوصياتهم تصرف مو حلو ومو لائق مني ما اگدر أبقىٰ موجودة وياهم برغم الي صار حتىٰ لو ماسمعوني شيء ولاموني بس أعرف فقدوا ثقتهم بيه .. راح اشتاقلكم هواية وأتمنىٰ تكونون بخير دائماً اني وماما زينين ليبقىٰ بالكم يمنا لتحاولون تدورون علىٰ مُكاني لأن اني طلعت من البصرة راح أگدر أكمل مثل كل مرة وأوگف علىٰ حيلي أحبچ وأريدج تكونين سعيدة وراح يبقىٰ گلبي وياج وروحي وياچ أعتذر مرة ثانية ...

شهگت ونزلت دموعي كملت قراءة الرسالة ورفعت نظري الهم كل واحد علىٰ وجهة ملامح توتر وخوف وحيرة ..

-جميلة: يا يا عمت عيني يمة وين راحن وين

-رغد: يعني انقهرنا وزعلنا علىٰ ألي صار بس مو معناها كرهناها ومنريدها !! وخو من فهمناا عوف علىٰ الي صار انا حتىٰ نسيت هية شنو سوت والله شلون منريدهة شلوون 

-جميلة: يمة بنيتي عمت عين گلبي سودة عليه شافتني ماحچيت وياهة ولا سألتها عن حالها عبالها انه ماريدهة وزعلانة منها امداني عبني غمة 

            

              

                    

شهگت بدموع وحجيت ..

-منار: روح روح أطلع دور عليهاا قاااسم ورجعهااا فدووه 

-قاسم: بشرفج ؟ وترجع والله ماترجع وماتحط رجلها هنا بعد عزيزة نفسها هاي البنت 

-رغد: ااااي يعنيي شلووون نبقىٰ هيج مانعرف شنو أخبارها و وين راحت مجرد نبقىٰ علىٰ الرسالة !

-منار: ماعرف ماعرف اووووف 

-رغد: زين تتوقعون رجعت لبغداد ؟؟

-قاسم: أستبعد رجعتها لبغداد 

-منار: طلعت من البصرة يعني طلعت لمحافظة بس ويييين وين يا محافظة راحت 

-قاسم: خرب بال*** شلون طلعت منا المطاااية الي گدام الباب شلون عبرتها عليهم وهو بلغهممم

-جميلة: عبنهم غمان وثولان وانا هم غمة شمالني رحت حطيت راسي ونمت ماگدرتي تگعدين هنانة يمصيوبة مو شفتي البت لامة جنطتهااا

-رغد: شوووكت هاي ؟؟

-منار: ماچنت متوقعة راح يرحون لأن توسلت بيهن وحچيت وياهن حتىٰ ويه خالة امل حچيت شلون تركوني وراحوا شلون 

وجهت نظري لقاسم الي مسح وجهة بغضب ونفخ وأخذ السويچ وطلع يمشي بعصبية ..

گعدت الحجية بالگاع وگالت بتعب ..

-جميلة: مالت عليجن وعليه جمينه اااخ وين وليتي يا يمه

-رغد: وليتي ؟؟

-جميلة: وانتِ ركزتي علىٰ هاي الحچاية مادامج تسمعين زين ما سمعتي طكة باب حركة صوووت صخام شمااااالج 

-رغد: وإذا سمعت يايمة راح أطلع أهرول أتفحص منين هذا الصوت وين عايشين بالغابة ونستغرب 

-جميلة: دسكتي رغيدة سكتي 

بللت شفتي وعفتهم ودخلت للغرفة سديت الباب وگعدت بالگاع دموعي تنزل علىٰ خدي فتحت تلفوني أتصل عليها بس كُله مغلق ادز رسائل ماكو متوصل إلها..

تگطع گلبي وأخذني التفكير والف حسبة صارت براسي شراح يصير بيهم وين راح يعيشون يارب أحفظهم دخيييلك گلبي خلصص من الصدمات اني ..

مرت ساعات ونفس الشيء تلفونها مغلق قاسم طلع بعد مارجع وأهلي صاروا يتواصلون وياية كل ساعة رقم واني ما أفتح الرسائل وما أجاوب أحس گلبي برد اتجاههم وكل تبريراتهم وكل كلامهم ماجاي يقنعني ولا يرجع لهفتي عليهم تركوني وباعوني بوقت صعب عليه وهسة اتذكروني بعديش ؟

            

              

                    

قاطع صوت تفكيري ورجعني للواقع صوت الباب من أنفتح دخل قاسم ونهضت وگفت ..

-منار: هاا ؟

هز راسة وگال ..

-قاسم: ماكو لحد ألان 

-منار: شلون يعني مااكو ؟

-قاسم: ماكو مالگيت ألها أثر و ردت أحدد موقعها بس ماكو شيء يربطني بالموقع أحتمال مطلعة شريحتهة وماسحة كل شيء عن طريقة نگدر نحدده حتىٰ بهاي عرفت 

-منار: لا لا تگولهاا لاا عفية لعد شلون قاسم 

-قاسم: يعني شسوي منار ابقىٰ أركض وراها وأطلعها من جوة الگاع وأجبرها وأفرض رأيي عليها ! شوفي الي سوتة أكبر دليل أنُ البنية بعد ماتريد أحد يوصل إلها تريد تبتعد خافت وحقهة لأن وين ماتروح المشاكل تركض وراهة عوفيها ترتاح فترة 

-منار: شلون ترتاح فترة و وين قاسم ترىٰ جُمان كُل شيء متعرف ومتندل شيء ولا عندهم قرايب ولا ناس عرف يعني بين قوسين هية هسة دتهرول بس حتىٰ تستقر

-قاسم: بالكاميرات طلع رقم التكسي ألي صعدوا وياه ومنتظر أتصال منهم من يوصلون اله ونشوف وراها وين أخذهم 

-منار: زين خاف يطلع ميعرف شيء أبو التكسي ؟

-قاسم: نتخذ غير أجراء وطريقة ثانية 

-منار: اووووووف جُمان اوف 

-قاسم: منار انا گلبي ميت ماتذكر شنو حچيت وياهة بهذاك اليوم ؟ حاچيني چفصت ببطنها حچيت عليها وقسيت ؟ سويت بعلي ماتذكر شيء من الموقف دخت .

-منار: يعني عصبت اي بس قليل وطلعت قاسم من بديت تعصب كلش 

-قاسم: يعني ماچفصت ماحچيت شيء مو حلو عليها ويجرحها

-منار: ماعرف قاسم يعني چانت ردة فعل طبيعية إذا صيحت بس ماجرحتها بس مع ذلك يبقىٰ الموقف صعب عليها هية لأنُ صارت گدام أمر الواقع 

-قاسم: والله ما أدري حيل أعزها وأحبها والخلقج بس صدمتني بهذاك اليوم أتمنىٰ فعلاً ما أكون جرحتها وأتاثرت مني بكلام بقىٰ ببالها

-منار: بعيداً عن الموقف بس اني أعرف جُمان استحقرت نفسها وانسحبت لأن هيَ مو هيچ قاسم جُمان متمد أيدها علىٰ شيء مو إلها ومتخون ثقة الناس بيها هاي تربيتها خالة أمل خلتها تمشي علىٰ طريق صحيح وبنفسها انصدمت بالي سوتة استصعبت موقفها وأبتعدت 

-قاسم: يعني ليش أچذب عليج منار هذي المسألة مو أول مرة تصير ويانة لا هواي وناس من نص الشغل يسربون معلومات بس يتحاسبون بأبشع الطرق .. بس ولا مرة صايرة ويانة بنص بيتنا لأن احنة أساساً مانترك أثر يخص شغلنا هنا اي صحيح نشتغل أحيانًا هنا بس ماتبقىٰ ورقة موجودة أول مايكمل الشغل يتأمن بمُكان خاص بيه بس انا دخت واتخبلت من شفت شكلة وأتذكر قبلها بساعات چان يشتغل بيهن هنا گلت هايهية 

            

              

                    

-منار: الحمد لله كل شيء راح واتعدىٰ وماضاع تعب أحد بيكم 

-قاسم: الحمد لله 

-منار: لعد شوكت يتصلون بيك ؟؟ 

-قاسم: من يصير جوة أيديهم 

-منار: اااي شوكت 

-قاسم: حبيبتي هاي مو شغلة دقائق فدوه اروحلج ليش ماعندج صبر 

نفخت بتوتر ومسحت وجهي وگعدت بالگاع بقيت علىٰ أمل معرفة أبو التكسي ودعيت يارب يگدر يفيدنا بشيء..

*****

ماعرف شگد مر من الوقت بس فزيت من حسيت السيارة وگفت والناس صارت تنزل فتحت عيوني بأستغراب وفرحة علىٰ بالي وصلنا بس باوعت من الجام واگف گدام مطعم زفرت بتعب وانتبهت لماما الي گعدت علىٰ صوت الضجة الي صار..

-ها ماما وصلنا ؟؟ 

-لا حبيبتي لسه دينزلون للمطعم تردين شيء أجيب الج ؟

هزت راسها بالرفض وگالت ..

-لا أمي بس أريد بطل مي 

نهضت ردت أنزل و وگفت بخوف ماگدرت أنزل خفت أتركها ولو لحظة و بنفس الوقت صعبة نزلتها راح تتعب بللت شفتي بحيرة وانتبهت للمرية الگاعدة يمنة نهضت رادت تنزل طلعت فلوس وگلت إلها...

-خالة بلا زحمة اني ماكدر أنزل وأترك أمي يصير تجيبين ألي وياچ مي 

ابتسَمت الي وأخذت الفلوس مني وگالت ..

-صار حبيبة تدللين 

نزلت فترة قصيرة ورجعت هي والطفل و انطتني علاگة بأبتسامة واسعة استغربت من أخذتها چان بيها عصائر ومي وكيك رفعت راسي إلها وگالت ..

-الطريق طويل حبيبة 

-ماكو داعي خالة والله ما أشتهي وميصير اني نطيتج بس فلوس المي ليش كلفتي علىٰ نفسج 

طلعت فلوس ردت انطيتها طبگت حواجبها وگالت بأبتسامة ..

-ليش تنطيني فلوس ماطلبت منج اني جبتهم بنفسي ؟

-بس هذا حقج خالة ميصير 

-وشنو كلفني طار مني نص ربع حبيبة لازم نسهل الدنيا علىٰ نفسنا وغيرنا مو كل شيء يطلع من عندنا وننطي لازم ناخذ مقابل عليه أكو أشياء سهلة وبسيطة ماتستحق ناخذ وننطي بيها ونعظمها ..

اتشكرت منها وسكتت شربت ماما مي وانطيتها عصير وبقينة ننتظرهم يرجعون التفتت عليها من گالت..

            

              

                    

-منين انتوا من البصرة ؟

بلعت ريگ وصفنت بوجهة صَرت أخاف واتوتر احجي بشيء يخصني گدام أحد بعد الي صار ما أگدر أثق ولا أأمن أبد شافتني ساكتة وصافنة بدون جواب هزت راسها وگالت ..

-أعتذر حبيبة عن السؤال 

-ماكو داعي للأعتذار خالة 

سكتت ورة فترة رجعت أنطلقت السيارة ومرت ساعات هواية بين شوية نغفىٰ وشوية نگعد نسولف اني وماما دخت من الطريق كُلش صرت أعصر بعيوني أنتبهت الي وگالت المرية ..

-هاية وصلنا خالة لكربلاء دقائق قليلة بعد 

شوية ارتاحيت وفرحت من گالت هيچ باوعت صارت القبة گدام عيني أخذت نفس بتعب وغرغرت عيوني دموع .. وصلنا ونزلنا مشينا دخلنا للتفتيش طلعت واستلمت جنطتي ثگيلة تعبتني وميدخلونهة بتفتيش الأمام وماما تعبت لازم ترتاح فكرت اأجر فندق نرتاح وبعدها نطلع نزور ..

مشيت شوية وصارت الفنادق گدام عيني كُلها دخلت أجرت فندق ليلة انطيت جناسينا اني وماما أخذت المفتاح ودخلنا للغرفة أول مافتت غسلت إلها ومددتها عصرت رجليها وجسمها فتحت حجابها سويت مساج لراسها تعبت حيل حبيبتي بس الزيارة راح تفيد نفسيتهة .

عفتها نامت دخلت سبحت وارتاحيت شوية وحطيت راسي بس ماجاي أگدر كل دقيقة أفكر بيه يجي علىٰ بالي ياترىٰ عرف ولا لسه وإذا عرف شراح يسوي ؟ ويرجع فكري علىٰ منار وينغمت گلبي تنهدت وبعدت أفكاري عن راسي ونمت حتىٰ أريح نفسي وراي تعب بعد وبعد وما أعرف شلون راح تصفىٰ بس اني معتمدة علىٰ الله اولاً والحُسين ثانياً و راح يعينوني ..

فتحت عيوني وفزيت بخوف علىٰ طرقة باب الغرفة تنطرق بخفة حيل بالبداية گلت يمكن جاي أتوهم بس بلعت ريگ من رجعت انطرقت هم بخفة طرقات خفيفة وسريعة لبست حجابي و حچيت من ورة الباب ..

-منو ؟

اجاني صوت ولد گال ..

-اني هاية فراشات ألكم خاف تحتاجون

التفتت علىٰ الفراشات الموجودة بالغرفة ورديت ..

-لا خوية شكراً ممحتاجين 

-خاف تحتاجونهن اخذيهن الغرفة باردة 

-ممحتاجين خوية 

گلت الكلمة بحدة شويه وحسيت بيه أبتعد حطيت أيدي علىٰ گلبي بخوف .. ماعرف يمكن تصرفة عادي لأن أهل الفندق ؟ بس اني صرت أتوتر من كل تصرف من المقابيل باوعت للساعة وگعدت ماما توضينا وحضرنا نفسنا حتىٰ نزور طلعنا وقفلت الغرفة ردنا نطلع استوقفني الولد المسؤول عن الغرف وگال ..

            

              

                    

-انطيني مفتاح الغرفة تركي هنا وين ماخذتة وياچ ؟

ميلت راسي بأستغراب وحچيت ..

-نعم نعم ؟ شلون انطيك المفتاح علىٰ اي أساس ؟ جناسينا عندك أعتقد ماكو داعي تخاف بعد والغرفة بيها أشياء خاصة إذا ضاع مني ساعتهة ألك حق تحاسبني 

حچيت الكلام وبدون ما أنتظرة يجاوبني عفتة واخذت ماما وطلعت ..

-أمل: جُمان صايرة ترمين رمي ماما مو تحچين 

-جُمان: لعد شلون ماما علىٰ اي أساس انطي المفتاح 

-أمل: اي لتنطينهم مجال بس هم لتصيرين رعنة أخاف عليج منهم 

وگفت وطگيت صورة للفندق واسمة والشارع خاف أضيع علىٰ الأقل هيچ راح اندلة مشينا واني ماعرف وما اندل شيء هنا صرت أمشي وأسأل منين نفوت وعلىٰ السؤال لحد ما دخلت للتفتيش ومنها فتت للأمام فوتت ماما حتىٰ تزور وزرت وياها انهاريت تعبت من البچي ذبيت كل همي وكل حملي يمهم ودعيت من كل گلبيبي ربي يسرها الي وارتاح ويسخرلي من الأقدار أفضلها واجملها 

أدعي ولساني يلهج بالدُعاء ماوگف أنتبهت علىٰ نفسي جاي أدعي اله وروحي جاي ترفرف عليه بدعواتي زادت دموعي وشهگتي اي فعلاً اني كُل إلي أريده يكون بخير وربي يحفظة الي حتىٰ لو صار بعيد عن عيني بس والله روحي أحسها يمه مسحت دموعي وأخذت ماما ورجعت دخلت للصحن گعدت بيه صليت ركعتين وماما هم صلت وبقيت گاعدة وأقرأ قرآن ..

ألتفتت علىٰ صوت من وراي ابتسَمت من شفتهة نفسهة المرة اجت گعدت يمنة وگالت ..

-تقبل الله زيارتكم 

-أمل: منا ومنكم عيوني 

-جُمان: من شوكت انتِ هنا خالة 

-والله خالة اني بكل وقت أجي أزور بيتي قريب وبس اطگ عباتي واجي 

-جُمان: يعني انتِ من كربلاء ؟؟ 

هزت راسها بابتسامة وگالت ..

-اي خالة 

رحبت بيها ماما وهي صارت تسولف وياهة لاحظت ماما صارت مثلي وأزيد كلمة زيادة عن الرد متحچي بس المرية تضحك وتسولف وياهة وعن حالتهة لحد ما گالت ..

-وين گعدتوا الليلة حبيبة ؟ 

-جُمان: أجرنا فندق هنا قريب علىٰ الأمام 

-يا وسفة والله وبيتي موجود وفارغ ترحون فنادق ؟؟

-أمل: بس بلا زحمة أم منو حضرتج 

            

              

                    

-ام رهف

-أمل: عاشت الأسامي و الله يديمج أريح والله دتشوفين وضعي يا ام رهف 

-ام رهف: ربي يشهد ماعندي غير بنيتي و وليدهة واني وعايشين بخير الله محد ويانة شرفوني للبيت وأخذوا راحتكم يمي أمانة الله 

-جُمان: لا خالة تسلمين ماكو داعي والله مرتاحين احنة وهم ماراح نبقىٰ بس هاي الليلة بس أريد اسألج وين اگدر أحصل بيت إيجار هنا بمنطقة زينة وسعرة مناسب خالة 

صفنت بوجهي لثواني وأردفت ..

-ام رهف: يعني تردون تعيشون هنا حبيبة ؟ 

-جُمان: اي خالة

-ام رهف: والله يمة منطقتنة هادئة وخفيفة وناسها زينة وبيت حماي بصف بيتي عرضة للإيجار وأني اكدر أطلعة منه بسعر يناسبج 

-أمل: وين هلمنطقة ؟ وشسمهة يسلمج الله ام رهف گلوبنا خالصة منريد مُكان يتعبنة وجيران ميخافون الله 

ضحكت وردت ..

-ام رهف: اني جارتج وشحدة الي يمسكم بحچاية يمسني اني ولتخافين اني لو أعرفها مو زينة ماعشت بيها اني وبنتي وطفلهة صارلي سنين ..

باوعت الي وگالت ..

-أم رهف: انطيني رقمج حَتىٰ اخابرج باچر حبيبة واجي اخذكم تشوفونة 

بلعت ريگ وجاوبت بتوتر ..

-جُمان: خالة شريحتي مسدودة ميطلع الي الشخص الي متصل بيه ماعندي رقم حالياً 

بوزت شفتهة لثواني وبعدها نطقت و أتفقت وياها علىٰ المُكان الي راح نتلاگىٰ بيه بقت شوية يمنا بعدها طلعت گالت إلي أمي ..

-أمل: شتگولين انتِ 

-جُمان: ماعرف يوم خلي نشوف البيت بلكت يعجبنة ونگدر نستقر فترة 

هزت راسها وماحچت بعد بس بين علىٰ وجهة ملامح قلق وتوتر أعرفها تفكر بيه وتخاف عليه حتىٰ من چنت ببغداد من اتمرضت بعد صارت تخاف لأن هي الچانت ظهري .. اتنهدت وحمدت ربي علىٰ كل حال أخذت ماما ورجعت ومثل ماحسيت فعلاً ضيعت مُكان الفندق وصرت أمشي وأسأل بالناس واشوفهم صورتة لحد ماوگعت بيه ..

رجع صار بوجهي اول مافتت هذا الولد گلبي نغزني منها مارتاحيت لنظراتة ولا لتصرفاتة أبد فتت وقفلت الغرفة وفعلاً ثاني يوم أخذت جنطتي وماما وطلعنا ولگيتها بالمُكان نفسة مشيت وياها مسافة أخذت تكسي وانطتة عنوان المنطقة ..

            

              

                    

مايقارب عشر دقائق الىٰ ربع ساعة وصلنا ونزلنا مشينة شوية وگالت ..

-ام رهف: وهاي منطقتنا 

باوعت إلها چانت زينة لا بأس بيها اني شسوي بشكل المنطقة أهم شيء أرتاح بمُكاني ..

وگفتنا يم بيت شكلة عادي وبسيط فتحت الباب ودخلت شوفتني كل كتر بيه چان صغير ونظيف ومرتب من الداخل گالت علىٰ سعر إيجارة چان معقول بالنسبة الي هزيت راسي وگلت إلها ..

-جُمان: هايهية خالة 

باوعت الي بأيدي بس الجنطة وگالت ..

-ام رهف: زين ماعندكم بعل أشياء تجيبونها مو ؟

اتحمحت وحچيت ..

-جُمان: لا خالة كُل شيء عندنا عرضناه للبيع وبعناه ان شاء الله بس يسقتر وضعنا نأسس من جديد وعلىٰ گدنا 

هزيت راسها برضا ابتسَمت وماما تشكرت منها وأردفت هي ..

-ام رهف: اني يمكم بابي بصف بابكم بالضبط 

-جُمان: يعني خالة نگدر نگعد بيه اليوم ؟

-ام رهف: طبعاً حبيبة 

بقت شوية وراحت ومر هذا اليوم بين جية خالة أم رهف وكُل شوية جايبة إلنا شيء وتگول لازم اضيفكم إنتوا خطاري وميصير تسوون شيء 

و هو البيت كان نص الأثاث موجود بيه و مرت أيامي وشوية شوية بديت أتأقلم علىٰ الجو والمُكان المنطقة هادئة ومُريحة نوعاً ما .. 

بقت أم رهف ما تركتنا ويانه بس بقينة مثل ما احنة حريصين حتىٰ بالكلام الزايد وهي من نوع الي تتفهم ومتلح ابد ومن عرفت طريقتنا صارت متسأل أصلًا و بديت أفكر بعلاج ماما وبدراستي بعدني تعبانة وحسيت بالمسؤولية بشكل مو طبيعي بس جاي أقاوم واكافح لخاطرها ..

*****

وعدت الأيام والعوف مارجع من شغلة وكل يوم من يتصل بيهم يفرفح علىٰ أخبارها وبكل مرة يطلعون اله عذر بس هو مايقتنع وأحيانًا يشكك بكلامهم ..

"صفنت وأتذكرت هذاك اليوم وشگد شدد عليه قاسم بيه ..

-قاسم: ماكو مايعرف الرجال شيء بعد زيادة 

-منار: اي لعد من أخذهم للكراج ماعرف وين راحوا 

-قاسم: يعني شلون يعرف بعد روحي وصلهم ورجع حالهم حال العبرية وهو سائق تكسي ..

-منار: زين خلي اخابر عوف متأكدة هو يگدر يرجعهة راح يتخبل من يعرف بيهاا طلعت 

            

              

                    

گلت الكلام وأخذت تلفوني بسرعة سحبة مني خزرني وگال بعدم رضا ...

-قاسم: لااااا مناااار دير بااالج تگليله راح بشغل مُهم تردين تخبلينة انتِ !! يترك شغلة ويجي بدون مايفكر ويحصل معااقبة وتصير اله مشاااكل وهمة يردونهاا من الله 

-منار: لعد شلووون گلبي ممرتاح ماگدر أنتظر خايفة

-قاسم: أرجوج إلا عوف وبهلفترة بالذات منار إذا صار عندة خبر متأكد راح يترك كل شيء وراه ويرجع علمودها وهذا الوقت مو لصااالحة عنده شغل مُهم حيييل وهذا مسودن بيها ويحصل مخالفة وعقوبة 

" اتنهَدت ورجعت لواقعي ماگدرت أكسر كلام قاسم بعد بس مديفوت يوم واني مافكر بيهه كل الي أريد أعرفة أخبارها بس تعرف من تتواصل ويايه راح ينعرف مُكانها جُمان صارت تعرف بعد ميفوتهم شيء وهي تريد تبتعد .

فات قاسم وهو يحجي بالتلفون وعروق گصتة ناطة گعد يمي باوعت اله بأستغراب أخذ نفس صبر نفسة مسح وجهة عدل صوتة وگال ..

-قاسم: اي عوف زينة زينة .. لا أحسن طلعت وأكلت ، اي دير بالك علىٰ نفسك يله باي 

سد التلفون وشمرة زفر حيييل بغضب وگال ..

-قاسم: ماكو مابقىٰ عذر بعد كلهن خلصن 

-منار: هذا عوف ؟ 

-قاسم: ياكل بروحة بكل مرة يخابر رغد وتطلع أله حجة شكل وانا حجة شكل ماصدگني وشكك يحلفني بكل أمام وانا اسكت وأخلي الحجية تحچي وياه وعلي صرت أكل بروحي لحم انا هم بس ماگدر أحچيله يأثر عليه أنتظر يرجع 

-منار: يمتىٰ يرجع لعد ؟

-قاسم: مطول شهر شهرين ماعندي علم 

-منار: اوووف 

گلت الكلمة وغمضت عيوني بتعب أردف وگال ..

-قاسم: بيج شيء شو وجهج مصوفر ؟

-منار: عندي غثيان بمُعدتي صار يومين أذاني كلش

-قاسم: يومين وماحچيتييي ؟؟ 

نهض ولزم أيدي گومني واني تحت وضع الصدمة وين يجر بيه ..

-منار: شكو وين شنو

ماجاوبني فتح الكنتور وصارت يبحوش بيه لحد ماطلع الي بشت وجر شال گال ..

-قاسم: لبسي يله أمشينا 

-منار: وين لا ميحتاج شوية بس أتمدد ترتاح مُعدتي 

            

              

                    

-قاسم: گتلج لبسيي !! 

حد بكلمتة ماچان بيه أجاوبة بعد اخذتهم منة لبستهم لزم أيدي وطلعنا لاگتني الحجية وحچت بخوف ..

-جميلة: ها يمة وين ياااع شمالج ولج منيرة وجهج مخوضر

-قاسم: تلعب روحها يمه

گال الكلام وما أحس إلا الحجية ضحكتها صارت من الطول للطول ..

-جميلة: لحگ ياعلي

-قاسم: يمه تفكيرج نگعي وشربي مايه يله فيمالا 

ضربتة علىٰ كتفة وگالت ..

-جميلة: ايا *** تضمضم عليه تطرد عيون ولك 

-قاسم: هو غير أكو شيء حتىٰ أضمة

أسمع ضحكتها ورانا طلعنا وگلت اله..

-منار: شنو قصدها الحجية ؟ 

-قاسم: سوالف متزوجات من تزوجين تعرفينهن 

قلصت عيوني ورديت ..

-منار: انتتتت فدددد ووواحد 

ضرب راسي براسي بخفة وگال ..

-قاسم: مؤدب ولطيف ومحترم وحلو وفقيييير من أهل الله 

-منار: انننننننن ومحترم ومؤدب ومن اهل الله ؟؟

-قاسم: عندج شك ؟؟ 

-منار: مو عندي شك إنما كُلي شك

-قاسم: غير تصعد هسة شلون راح اركضها وي خيل الحمزة 

-منار: مابيه حيل أفتح الباب تعبانة فتحة ألي 

قلص عيونة ورمقني بنظرة سخيفة وفتح ألي باب السيارة وگال ..

-قاسم: أصعد يمذوبني 

ضحكت وقلدت عليه بصوتي رفع الي حواحبة وهو متخوصر يباوع للشارع ويعض بأصبعة يتوعد .. صعدت وصلنا وسويت تحاليل وشافتني الدكتورة گالت ماكو شيء مجرد حالة نفسية ابتعدي عن التفكير والقلق والتوتر هنَ سبب من أسباب وجع المُعدة والشعور بالغثيان ..

كتبتلي علاج أخذنا من الصيدلية وطلعنا مشينا شوية وگف السيارة ونزل جاب ألي لفات وعصائر ..

-قاسم: أكلي أكلي 

- مو گلت الك مابيه شيء هسة شنو نفع جيتنا 

-قاسم: مايرتاح گلبي لحد ما أتأكد بنفسي

-منار: أوف بالغ بالغ 

            

              

                    

-قاسم: ماجاي أبالغ يابعد حيلي غير هذا مثل ماسمعتي كافي منار انا ملاحظج شگد تعبانة هاي الفترة 

اتنهدت ورجعت راسي علىٰ الكُرسي .. فعلاً اني هاي الفترة حيل تعبت وهملت نفسي وصحتي صرت أفكر بأهلي الي طلعوا الي فجأة وبجُمان الي ماعرف وين مُكانها 

-قاسم: انتبهي لصحتج أبوس عيونج انا

-منار: إن شاء الله 

-قاسم: باچر أنزل واجب

-منار: عوود صدك ؟؟

-قاسم: اي والله بعد روحي خلصت الاجازة بعد خلصت وما شفت منهة شيء 

گالها بنبرة حزينة مصطنعة وهو يباوعلي ..

-منار: سودة عليه 

-قاسم: بلكت تلتفين علىٰ حالي وتشوفين هذا الولد المگرود المسكين وتحنين عليه وتفرحينة

-منار: الله يلتفت لحال ويفرحه لهلمگرود 

وصلنا وگف السيارة وگال ..

-قاسم: اويلييي ع اااالحظظ نزززلي لا تحصلين ألج گرصة معدلة 

فتحت الباب ونزلت واني أضحك ماعرف ليش من احارشة وانكد عليه ونتكافش أحس براحة ههههههههه اي لعد شلون أعرف يحبني من صدگ يتحملني لو يبزززع مني بسُرعة ياا معقولة يسووويها قويسم ؟؟ 

*****

-رغد: شمسسس راح اتخبببببلل راح اتخبببل بدون ساااابق إنذار تتصل بيه تگُلي خلصصصصص أريد القضية تنسسسد 

-شمس: مو طبيعي وضعها شلون تطلب منج تنسحبين منها وتنسد ؟ وهي تحب بنتها لهلدرجة وتحارب بكل مابيهة حتىٰ مياخذونها منها ؟

-رغد: مرتين تتأجل الجلسة مرررررتيييييين من وراهم انا متأكدة جااااي يلعبونها حتى تنسد القضية ويطمطمونها مثل كل مرررة مثل ماا گاالت

-شمس: زين بس أهدأي رغد شنو راح تسوين هسة ؟؟

-رغد: هسة عندي شغل ساعة تقريباً واخلصة وووبوجهي راح أروح إلها للبيت وافتهم منها شنو هلخررط الي سمعتة منهااا وأساسًا ماكو أسباب مُقنعة لتأجيل الجلسة بكل مرة 

-شمس: زين شتگولين انتِ تحسين مهددينها ؟

-رغد: مو أحس أنما متأكدة ولهذا السبب أريد أروح لأن انا عرفتهم شنو من ناس هذول وشنو اطباعهم ونفسياتهم وما أستبعدها منهم 

-شمس: انتِ ومنووو راح ترحييين ؟؟

-رغد: انا وحدي رايحة 

            

              

                    

-شمس: شنووووو ؟؟ شبيچ رغددد شلون ترحين وحدج متعرفين شيصيرر ميصير هناك شلون ترحين بـس أنتِ 

-رغد: هذا شغلي شمس وشيصير خل يصير المهم أخذ الزبدة وأعرف شنو جاااي يصير من وراي والله ماا أخلي الماي تعبر من جواي وانا ساااكتة 

-شمس: رغد يااا رغددد انا أعرفج ماراح تسكتين وراح تورطين نفسج ولچ خاااايفة عليچ ماا مرررتااحة

گعدت وفتحت الحااسبة وحچيت ..

-رغد: ماراح يصير شيء شمس هسة عندي شغل خليني اخلصة وبعدين احاااچيج 

سديت التلفون وحطيت عيني بحااسبتي رجعت أقرأ وأركز بكل معلوماتهم والي عرفتة عنهم هزيت راسي بقرف وهمست .

-شنوو من عاااائلة شنو من ناااس ماعندهم موقف بيه خير ويه اي بشر سمعة زفت أخلاق زفت كلها تشكي من لطلطتهم ماخذين خاوة علىٰ الوادم يسرحون ويمرحون وإذا رادت تنلاص عليهم يسدون أكبر حلگ بفلسين ..

مرت ساعة وخلصت شغلي أخذت أغراضي وطلعت جاي أمشي وصار بوجهي مهيدي أبتسم بطريقة مستفزة بوجهي زفرت بقلة صبر وعبرتة شكلة وصوتة وهو كله يسد نفسي .

توني جاي أطلع من المحكمة و وگفت علىٰ صوت مو غريب عليه صاح بأسمي من وراي ألتفتت بفضول وانصدمت من شفتة أتقدم وگف گبالي وگال ..

-شلونچ رغد ؟ 

جاوبتة بأستغراب وتلبك حاوطني ..

-هلو مصطفىٰ شجاي شتسوي هنا ؟

حك طرف عينة بأصبعة ألتفت بعيونة يمين شمال وگال ..

-أريد احچي وياچ مُمكن بس مو هنا بباب المحكمة 

هزيت راسي بقبول مشىٰ مسافة ومشيت وراه وگف ألتفت عليه وحچيت ..

-شكو مصطفىٰ خوفتني ؟ أكو شيء 

-سمعت شمس تحچي وياچ ومتوترة وتصيح بقىٰ بالي وسألتها وسولفت ألي عن الي صار رغد وين رايحة وحدج ؟

-رغد: خلص دور شمس صار دورك مصطفىٰ ؟ شبيكم ياا عاالم هذا شغلي يعني أروح أستفسر أشتغل أعرف شجاي يصير 

-مصطفىٰ: بس لا تنكرين القضية مُعقدة والأطراف مو سهلة ومن أهل الله ويجون للطريق ..

-رغد: يعني شسوي مصطفىٰ ؟ أخضع وأسد القضية وأنسحب ؟ وياخذون البنية ؟؟ بعد كم سنة لا سنين لا سنتين لا ثلااااثة والله ولااا اقببببل 

-مصطفىٰ: زيَن امشينا انا وياج 

-رغد: وينن ؟؟

            

              

                    

-مصطفىٰ: للعائلة الردتي ترحين إلها 

-رغد: وانتَ ليش تجي وياي ؟؟

-مصطفىٰ: كل شيء يصير تحذراً وهم أكون شاهد في حال صار أختلاف بالحچي لو صار مراوغ نشوف الموضوع ليش وصل لهنا وشنوو سببة 

گلبت وجهي ااخ منج شمس هاااي سوالفهاا .. بالنص ساعة انا احچي وياه وهو قاافل لحد ماتعبت وأخذني الوقت گلت أله ..

-رغد: اوف يله أمشي ويااي 

طلعنا من المحكمة ورحنا علىٰ عنوان بيتهم وصلنا نزلنا دگينا الجرس هووااي لحد ماتعبت أيدينا ألتفت وگال ..

-أحتمال ما موجودين أمشي 

ماسمعت كلامة ورجعت ادگ بيه ودگيت الباب محد طلع زفرت بغضب ودرت وجهي جااي أمشي وسمعت صوت الباب أنفتح ألتفت بسرعة شفتهة طلعت تمشي بتردد تقدمت إلها وگالت بتوتر وتلبك ..

-ءءاا .. رغد شتسوين هناا ؟

-رغد: عندي كم حچاية وياج لو سمحتي 

-منو هذا الي وياچ ؟

ألتفت علىٰ الي تقدم وگف يمي وگال ..

-ضابط 

بلعت ريگ وحسيتها اتوترت بالزايد وخافت اتنهدت وگالت ..

-تفضلوا داخل 

دخلنا وگعدنة وقدمت إلنا الضيافة ورادت ترجع ماعرف شتسوي وأردف مصطفىٰ ..

-مصطفىٰ: تفضلي ارتاحي ماجايين نشرب شيء 

باوعت الي بنظرات متوترة وگعدت ..

-رغد: مُمكن أعرف السبب الي يخليج تنسحبين وتسدين القضية بعد حرصج وأصرارج علىٰ أنُ تلگين محامية توگف بوجههم ؟؟

جاوبت بتردد وارتباك ونبرة تسبب الشك ..

-أسباب شخصية أعتقد من حقي أحافظ عليها 

-رغد: وانا بدوري محاميتج من حقي أنُ تنطيني سبب مُقنع لأن القضية مو طبيعية ؟ جلستين أتاجلت بعدها تخابريني تطلبين مني الانسحاب وسد القضية وإنهاء كل شيء 

-أي هذا الي شفتة مناسب 

-رغد: شلون شفتي مناسب ؟ وانا أعرف شگد تحبينها للبنية وماتگدرين بدونهة حاچيني شنو سوولج ؟ هددوج 

گلت الكلام وارتخت ملامحها باوعت لمصطفىٰ ألي انتبه عليها وگال ..

-مصطفىٰ: تگدرين تحچين وانا كـ ضابط أتعهد ألج مايمسج شيء ولا راح تنضرين بس يكفي أنُ تحچين الحقيقة 

            

              

                    

-الحقيقة الي حچيتة بعد ماعندي شيء زايد أضيفة عليه 

-رغد: أبد ماجاي اقتنع ولا راح أقتنع

بسرعة وگفت بچت وحچت بأنتفاضة ..

-شتررردون شترررردون كااافي الله عليييكم كااافي انتوا دتجبروووني أكذب لو شنو حچيت الكم الحقيقة اني شفت هذا المناسب ماعندي شيء ويااهم بعدددد

ضغطت علىٰ فكي وگفت گبالها وحچيت ..

-رغد: ميخالف بس خلي بالج ما أقتنعت وانتِ مجبورة تبررليني هسة راح اعوفج لأن واضح نفسيتج تعبانة وأعصابج منهارة

گلت الكلام وهي تبچي وطلعت صعدت بالسيارة اجة مصطفىٰ صعد وگال ..

-مصطفىٰ: شغلتها مو خالية ولا تفوت العقل مبين مهددينها ومخوفينها 

أخذت نفس وسكتت راسي شيء يضرب بشيء حقدت عليهم وزاد كرهي ألهم وأصراري علىٰ هلقضية وحلفت ما أسدها والله..

بقيت طول الطريق انا ازفر نفس وأحس بعدني بداخلي نفس يخنگ وصلني للبيت وگف السيارة ..

-رغد: شكراً مصطفىٰ تعبتك وياي وشفت ماكو داعي أساسًا 

-مصطفىٰ: أكو داعي لأن بعد الي شفتة وسمعتة حتىٰ انا ماقتنعت وصار عندي شك هاي العائلة مسويتلها شيء وبالغصب 

-رغد: مو گلت الككك 

-مصطفىٰ: دخلوا براسي خليني أشتغل عليهم انا هم وأشوف شنو سالفتهم هذول 

-رغد: عندي كل شيء يخصهم تحريت وجبت معلومات كاملة عنهم 

-مصطفىٰ: حوليهن ألي 

هزيت راسي وأخذت رقمة وسلمت عليه ونزلت گلت من أفوت وأرتاح راح أحول اله كل شيء يخصهم .. ونشتغلهم اثنينة 

توني جاي أفوت للبيت وأتصل عليه عوف جاوبتة واجاني صووتة وهو يحچي بعصبية ...

-عوف: هسة تنطين التلفون لجُمان رغد 

فتحت عيوني بصدمة بلعمت وصرت امتمت زفرت وعدلت نفسي وحچيت ..

-رغد: عوف انا بالشغل مو بالبيت شلون انطي التلفون إلها ؟؟ 

-عوف: رغد وداحي الباب مامرتاح ألكم ضامين عليه شيء ؟ ليش بكل مرة أسألكم عنها تطلعون أعذار وهية من نزلت لهذا اليوم ما محصلهااااا لا تخبببببلوووني

ضربت وجهي بأيدي بخفة واحتاريت شجاوي أول مرة أحس بنفسي بعد ما أريد أخلق عذر جديد واكذب عليه بخصوص هذا الموضوع كافي ..

            

              

                    

لزمت التلفون صرت أقرب أيدي علىٰ السماعة اسدها حيل وأبعدها وأرجع اسدها بأيدي واحچي ..

-رغد: الووو عوووف ماجاي أسمعك صوتك يگطع 

كتمت السماعة لثواني وبعدت أيدي ورجعت كتمتها وحچيت ..

-الووووووو

وسديت التلفون بسرعة .. ياربي لشوكت مو حتىٰ عرف وشك بينه شلون تاليها شلون .. فتحت الباب وفتت للبيت دخلت أخذت ملابس وسبحت طلعت وتوني گاعدة بالصالة انشف بشعري

فات عليه قاسم تقدم الي بسرعة وگف گبالي شمر عليه ملف وفلاش باوعت بصدمة وعدم أستيعاب وگال ..

-قاسم: شووووفي يا نذل وس*** و*** الي دبر عملية خطف ام جُمان و ألف سالفة الحادث وسوىٰ الهوسة وخبصناااا وصارت كل المصااايب من وراه 

*****

فلست وربع مابقىٰ بجيبي صرفت الراتب كله علىٰ الإيجار واشتريت أثاث وكل شيء يخص البيت صفيت علىٰ الحافة فكرت بعلاجهة وفكرت بمراجعتها ماراح يفيدني الراتب لوحدة لازم دخل ثاني وياه 

أسبوع واني اقنع بماما بموضوع الشغل بس ماجاي تقتنع تعبت وقررت ما أحاچيها لحد ماتقبل لأن هذا الحل الوحيد الي منه وتقبل مرت يومين واني فعلاً مطبقة هاية الخطة ..

-أمل: ولچ يوم ليش هيچ متحچين ويايه وعازلة نفسج عني مو كل تفكيري بيج جُمان أخاف عليج شتسوين بالشغل يا ماما 

-جُمان: وعلاجج ؟ ومراجعاتج ؟ أبقىٰ ساكتة عنج واتركج هيچ ماما ترىٰ الشغل مو عيب وكل البنات جاي يشتغلن

-أمل: ماما ليش ماجاي تفتهميني خلي اولي اني انتِ شنو تعرفين هنا حتىٰ تدورين شغل وين تشتغلين يا أمي والله كلبي يمج 

-جُمان: ألف مكان موجود والف شغلة موجودة ماما فدوه لتعترضين انتِ علمتيني أعتمد علىٰ نفسي وهسة ترفضين 

وبعد محاولات عديدة لأقناعها وألف طريقة حتىٰ تقبل قبلت أخيراً ..

وثاني يوم أجت النا خالة ام رهف وجابت بنتها رهف وياها اتعرفنا عليها چانت لطيفة مثل