رواية قيود العوف الفصل السادس والاربعون بقلم ريتا
غمضت عيوني من رجع لفظ أسمي ألتفتت عليه بثقل أتنهدت من صارت عيوني بعيونة غرغرت دمووع وشفايفي يرجفن نطقتتت بصوت هزيل مبحوح ويرجف
-عوف !!
-لوعة گلبة .
نطقها بتنهيدة ونبرة صوتة التعبان أخذت گلبي مني ماقلت صدمتي بعدني لسه مصدومة بيه وبراسي علامات أستفهام هواي مو وحدة شلون عرف مُكاني وموقعي هنا حتىٰ وقت دوامي هم !! ..
أنتبهت اله واگف بملابسة العسكرية رفعت نظري وركزت بوجهة الشاحب وعيونة الي مثبت نظراتها بعيوني ذبلانة وتعبانة وكأنُ مانايم ولا دقيقة ..
فرك وجهة و ألتفت براسة أشر علىٰ السيارة وگال ..
-تعالي أمشي وياي جُمان
رمشت بوجهة عدة رمشات ميلت راسي بعدم استيعاب و رجع گال ..
-نسولف بمُكان قريب هنا
جاوبتة بتلعثم والكلمة تطلع مني بالويل ..
-زين و .. وقت دوامي.. عندي شغل هسة
-لا تخافين كلمتين علىٰ بعضهن مانطول
گال الكلام وألتفت بخطواتة بأتجاه السيارة مشىٰ گلبي يدگ بقوة واحوالي تخرربطت أخر شيء چنت أتوقعة هو أنُ يرجع يدورني ويلگاني ..
ابتسَمت ابتسامة واسعة بدون أدراك و وعي رفعت ايديه مسحت وجهي ومشيت
ويه كل خطوة أخذ نفس اجت بالي الف سالفة قلقت وارتبكت عزاا أكيد راح يغسل شراعي وماكو حچاية تبقىٰ بگلبة عليه ..
صعدت شغل السيارة ومشىٰ بينا ماعرف وين ... بس استغربت سكوتة وهدوءه ألي موتني طول الطريق ساكت وهادئ ماحاچاني ولا كلمة و ما أسمع بس صوت تنهيداتة الخفيفة المستمرة ..
وگف السيارة بمُكان معزول ماكو ما موجود بيه ولا شخص اباوع من الجام فارغ ألتفت عليه بلعت ريگ وحچيت ..
-ليش وگفتها هنا ؟
بقت نظراتة مثبتة ليگدام لثواني غمض عيونة نزل راسة ورفعة بنفس اللحظة أخذ نفس قوووي وگال ..
-عوف: گليلي شسوي بيج هسة ؟
من گال هيچ وسعت عيوني بخوف وتفكيري أختلف وبهتت شقصدة ؟ شنو يعني ؟ باوعت للمُكان وأحتل الخوف گلبي حچيت بتلعثم ..
-جُمان: شش.. شنوو قصدك شتسوي بيه
ألتفت عليه حط عينة بعيني لوىٰ شفتة صار يعض وياكل بيها من الداخل كأنُ جاي يحاول يهدأ بنفسة هز راسة وصار يطرق طرقات متتالية بأيدة علىٰ الكشن فزيت برعب من ضرب الستيرن حييل بعصبية وگاال وهو كاز علىٰ اسنانة ..
-عوف: جُماااااان اااانتِ وتاالي ويااااااج ؟
اتصنمت لثواني لفيت أيديه أيد بأيد نزلت راسي وصرت اعصر بيهن أعرف شنو راح يحچي أعرف نتر بيه وگال ...
-عوف: ليش دائماً تخليني أشتعل عليج و تمرديني مرد بتصرفاتج هاي ؟ ليش هيچ تصرفييييين فهميني وچ ليششش
بقيت ساكتة أردف وهو يحد علىٰ الكلمات وحدة وحدة بنبرة صوتة .
-عوف: طلعتي وطريتي المحافظات كلها لوحدج أجيتي هنا وانتِ ماتعرفين راسج من رجليج وين ؟؟ تعرفتي علىٰ وحدة وأجرتي منها بيت گعدتي وتأسسين وتشتغلين زين وبعدين جُماني ؟ وين توصلين ؟ وين عبالج لهنا وهايهية خلصت يعني من تسوين هذا كله ؟
ألتفت عليه وحچيت ..
-جُمان: شلون عرفت
-عوف: شلون عرفت ؟ يعني هذا ألي يهمج ؟
-جُمان: لا .. بس أريد أعرف شلون عرفت بكل هذا ؟
-عوف: مايصعب عليه
اتنهدت وذبيت نفس حار صدري مقبوض محتارة ومصدومة وأحس ضاع مني الكلام گال بنبرة صوت تعبانة ومبحوحة ..
-عوف: كاافي جُمان كااافي تعبتيني وحگ داحي الباب شليتي حالي أكو شيء معقول وأكو شيء ما معقول مو كاافي تهرولين وتدوهنين بيه وبروحج .
حچيت بضياع وعيوني متركزة علىٰ الجامة ..
-جُمان: لأن صعبة عليه صعبة أبقىٰ حتىٰ لو ما سمعتوني شيء وماجرحتوني بكلمة بس اني أحس وأعرف وأدركت الي سويتة شنو محد يتقبل شخص مو ثقة ببيتة غير هذا اني شلون أبقىٰ شلون ألي نفس وعين و أنسىٰ وأتصرف كأنُ ماصار شي !!
-عوف: وهذا الحل برأيج ؟ تهرولين بگاع الله ؟
-جُمان: الي يغلط يتحمل نتيجة غلطة غير هذا عوف اني مارجعت لبغداد واجيت أعيش بمحافظة غريبة عليه لأن صرت أخاف منها وگـلبي مايرتاح بعد ردت أبتعد وأستقر بمكان جديد وأشتغل وأعالج أمي هذا كل الي ردتة
احچي وهو صافن بيه وملامحة مشدودة كملت كلامي بتردد ..
-جُمان: وحتىٰ من اجيت هنا مارتاحيت ورجعت أحس بنفس الشعور أحسهم يلاحگوني وين ماروح أمشي بخوف أتلفت والقلق ياكل ويشرب وياي بس شسوي أريد أعيش تعبت تعبببت شسوووي گلي شسوي ؟
فرك وجهة فتح الجام دار وجهة عليها زفر نفس أرتفع صدرة كله منه هز راسة وگال ...
-عوف: تعالجين الغلط بالغلط عيناي انتِ تطلعين من متاهة وتدخلين نفسج بمتاهات .
-جُمان: ميخالف أهون ألي من أذيتك حتىٰ لا تتأذىٰ بسببي وتصير ألك مشاكل وتضطر تنحط بين خيارين لو تتفاوض بسببنا خليني بعيدة وأنتَ مرتاح ..
-عوف: منو گال من انتِ بعيدة انا مرتاح ؟
-جُمان: اني
-عوف: إذا نرجع للي صار ونحچي بيه مو بس انتِ غلطانة لا جُمان انا عندي غلط وانتِ عندج غلط بس رغم هذا كله چانت رحمة من ربي وحسبت حساب ثاني ولويتهم وكسرت روسهم ليش حملتي نفسج كل المسؤولية لوحدج ؟ انا هم عندي غلط اثنينة نتحمل مسؤولية الغلط ونصححة مو نزيد الغلط غلطين
-جُمان: غلطك مو مثلي بس شلون أصحح غلطي ؟ شلون عوف اني..
ماكملت كلامي غصيت بعبرتي غمضت عيوني وسكتت ..
-عوف: لا تسكتين كملي شوفي وضعنا وألي احنة بيه هسة كله بسبب الحچي الناقص ولا مرة گدرنا نكمل حچينة ونعبر عن الي بداخلنا دائماً كلامنا ناقص ومُبهم خلينا لو مرة بس نحچي بشكل واضح كل شي
-جُمان: أكره موقفي وياكم أكره شكلي من مديت أيدي علىٰ خصوصية بيتكم أنهضم شيء ياكل بگلبي مو ثوبي ولا طبعي وأگول سهلة اني الي ماجاي أتقبل وأنسىٰ
-عوف: مو نهاية الدنيا كلنا نغلط مو معصومين المواقف الصعبة تخلي الأنسان يضيع ويصغر فكرة وعقلة مو كل أنسان قوي وگلبة ميت حتىٰ يگدر يتحكم بنفسة بهيچ وضع ويتصرف تصرف صحيح
-جُمان: شنو ألي أختلف ؟
-عوف: ألي أختلف ما أريدج تضيعين أكثر تغلطين بس تتعلمين منه مرات الغلط حياة ينقذ ويوعي ويفهم هذا غلطج درس ترك ألج ألف رسالة بعقلج لو رجع بيج الزمن ومريتي بهيج موقف راح تعيدين نفس التصرف ؟
-جُمان: لا طبعاً ماراح أعيد هذا الغلط مرة ثانية
باوعلي بنظرات مطولة بعدين گال ..
-عوف: يعني هاي ولو أشك بيها
-جُمان: تشك بشنو ؟؟
-عوف: لا هيج مو يمج
-جُمان: اممم
باوع بيه ثواني وگال ..
-عوف: تعبتيني و مرمرتيني شعلتيني شعل شلون بيج انتِ ليش تسودنيني أكثر بسوالفج هاي شلون تسوين هيج ؟ وتطلعين هلطلعة ؟
-جُمان: لأن ماريد اأذيك ما أنسىٰ شلون خاب ظنك بيه بردت اتجاهي كلمتين علىٰ بعضهن صارن گدامي بالگوا يطلعون منك عاقبتني ببرودك وهذا أسوأ عقاب يتعاقب بيه اي أنسان حرب نفسية تأنيب ضمير خليتني أحس وأدرك كل تصرف طلع مني بدون ماتحچي وتعاتبني وتشمر حچي عليه
-عوف: أسكت من يموت عندي الكلام .. صح چنت بارد گدامج بس ماشفتي الهوسة الچانت بگلبي ... انا أترك المقابل هو يراجع نفسة ويحس بغلطة ليش أجرح وأشمر وأسب وأنواع الحجي البي خير والمابي خير يطلع مني هاي مو من شيم الزلم هاي سوالف مزعطة
-جُمان: مو كل أنسان يحكم بنفسة وعقلة هاي حچايتك .
-عوف: صحيح بس الأنسان الي تمرغلة الدنيا هواي عيب عليه يبقىٰ جاهل بوكت العصبية إذا ماحكمت عقلك وتداركت نفسك راح تضيع بعصبيتك وموقفك وكل حچاية تطلع منك غلط
-جُمان: اي بعد منو يگدر ألك أنتَ
-عوف: محد بس الله وعيونچ .
ابتسمت شبه ابتسامة ونزلت راسي ..
-عوف: شلونها أمولة ؟
-جُمان: يااا هاي علىٰ أمي ؟
-عوف: اي غير عمتي العزيزة بعد طاحت الرسميات
فتحت عيوني علىٰ وسعهن ورديت ..
-منين أجت عمتك ؟
-عوف: تصير تصير
باوعت للوقت ردت اللطم حچيت بسرعة ..
-جُمان: ياااا أتأخرت علىٰ شغلي
-عوف: يا شغل بابا دشوفيني جايج بترابي من شغلي وحظ حظي طايح انعل ابو ششغلج چا مو جاااي نمسلت !!
-جُمان: ها العفوا
-عوف: يله هسة شنو أخذج للبيت حتىٰ تحضرون نفسكم ؟
جاوبتة بأستغراب ..
-جُمان: يا بيت ؟ نحضر نفسنا لشنو ؟
-عوف: ترجعين وياي
گال الكلام وهو مقلص عيونة ويباوعلي بجمود بلعت ريگ وجاوبتة ..
-جُمان: ما أرجع اني لأي مكان
صفن بيه ضحك مستهزئ وگال ..
-عوف: طبعاً حاليتلج الگعدة والخوارة هنا
باوعت اله رفعت حاجبي وحچيت ..
-جُمان: اي وفد مرتاحة كلششش
-عوف: طبعاً هي هاي سوالف العيارات
-جُمان: اي خوش
-عوف: شوكت لحگتي صارلج شهر بس والله فلك انتِ
-جُمان: بس لا تحسدني
-عوف: كافي لا تتعبيني أكثر بعد كافي عناد لخاطر داحي الباب عنادج مرمرني وين توصلين بيه بعد ويي شوفيني ساكت لخاطرج خاطرج چبير عندي ما أحب أكسر بيه بس وجودج هنا ماجاي يعجبني جُمان وصرت مثل القبج أركض وراج منا ومنا
-جُمان: واني هم تعبت كافي منا ومنا أريد أستقر ليش تتحمل مسؤوليتي بكل مرة عوف علىٰ أي أساس اتركني أستقر رجعة ماگدر أرجع وياك لبيتكم بأي صفة وبيا عين ميصير ميصيير
-عوف: واللسان رشاش ياهو يگدرلج تريد تستقر ام المصااايب وين احاچيها وين ترد وتسولف
-جُمان: اهوو اهوو استغفر الله بعدين المصايب هية تركض وراي مو أني اروحلهه
-عوف: أنتِ اركدي والمصايب تكف عنج
-جُمان: يحچي الأملح لعد متشوف نفسك
-عوف: ياهو الأملح ؟
-جُمان: أنتَ
باوع لنفسة ولملابسة وطگها بضحكة طويلة ..
-عوف: وعلي صدگ طالع أملح بس من ورة راسج دربي منين ماعرفتة أريد اللحگ امرغلج من ورة سوالفج لوعتيني تلوع
-جُمان: اي كله اني وانتَ فقير ؟
گلتها وخزرتة ضحك بتعب وگال ...
-عوف: ااااخ يالعيارة حيل مشتاااقلج وداحي الباب أيامي باهتة بدون شوفة وجهج ما مستلذ بـ ولا يوم جُماني تعبتيني بعنادج وتصرفاتج وگـلبي مايگدر يقسىٰ عليج حتىٰ وانتِ شالة حالة يخاف يجرحج بحچاية غلط بس إذا تستمرين هيج اطبگج انتِ وگلبي سوىٰ وانعل يووومكم والله لحد هسة ساكت ألكم
-جُمان: عوف شسوي فهمني شسوي أبقىٰ أهرول منا ومنا يعني ما أستقر بمُكان وأرتاح ما يحق ألي أعيش طبيعي بدون خوف جاي أركض حتىٰ بس أرتاح بس ماجاي أشوف الراحة ومامستقرة بشي !
-عوف: مو مستقرة بگلبي بعد وين تردين
-جُمان: ههههههه أستقر ببيت بحياتي شعوري يستقر وخوفي ينمحي أرتاح أريد بس
نظر ألي نظرة مطولة جدية وغامضة وگال ..
-عوف: جُمان هلمرة أريد أخصمها وياچ بعد مابيها مجال
-جُمان: تخصمها بشنو ؟
-عوف: بالزواج
حسيت گـلبيي خفق بقوة من گالها رديت ..
-جُمان: بالزواج منين ؟؟
-عوف: من أبوي
-جُمان: ياااااا شبيك شنو هااي
-عوف: شبيج جُماني غير انتِ شتشوفين ترف عيني علىٰ غيرج مو مدوهنتني وشاگتني ششگ بالنص
أخذت نفس درت وجهي ردت اللگي الدگمة وأفتح الجامة أحس گصتي عرگت و وجهي بوخ فتحتها بسرعة غمضت عيوني والهوىٰ كفخ وجهي رجع گال ..
-عوف: خلي نتزوج وتستقر حياتج وياي وماتضطرين لكل هذا كافي خلي حد وأنهي كل هلضياع الجاي يصير أوعدج أحميج بروحي وأحقق الج كل مطالبج خليني أداوي جروحج و اشيل الخوف من روحج المتعوبة واترسها أمان .
مسحت گصتي جريت نفسي بصعوبة وبقيت اباوع اله ..
-جُمان: خايفة
-عوف: انا أمانج
-جُمان: گـلبي خايف
-عوف: مني ؟
-جُمان: ماعرف
-عوف: عاشگج والله رايدج و روحي كلها بيج كل الاريدة وأتمناه نتزوج ويصير عندي جاهل صغير منج أسمع صوتة وضحكتة تترس روحي مثلج ..
باوعت اله بحيرة عيوني تتنقل بين عيونة منتظر مني جواب نظراتة تگلي قبلي لا ترديني وگـلبي جوابة مثل نظراتة بلعت ريگ و أحس الخجل ترسني جاوبتة بتلبك ..
-جُمان: انطيني وقت خليني أفكر بيه
-عوف: مثل ماتردين يجرالج عيناي
ألتفت وحرك السيارة وبقىٰ بالي يدور بكلامة گـلبي يدگ سريع مثل الي تخربطت أوضاعة وعقلي صار يضرب شيء بشيء ماعرف من جدية الموضوع ماعرف من كلامة ألي أكو شعور حلو بداخلي وشعور ثاني بيه خوف ما مطمئن...
*****
-منار: ماما شنو الي تردينة مني بالضبط شنو ؟؟
-تجين يمي بنتي حبيبتي غير احنة أهلج ونريدج تجين وتعيشين يمنة !!
ضحكت مستهزئة وجاوبت ..
-منار: فدوه احچيلج غير سااالفة هاي ماخلتني أقتنع أبد لأن بعد الي سويتوه بيه ماشوف عندكم محنة عليه ولا حُب اتجاهي
-لا ماما حسي بيه گلبي طاگ عليج ومشتاقة ألج الأنسان ميغلط بحياتة سامحيني فدوه بنتي أنتِ
-منار: الأنسان يغلط غلط يگدر المقابل ينساه ويسامحة عليه بس مال أهلي يشمروني ويتركوني شلون أسامح واني هنت عليكم واحد واحد لو ما الله حابني ماعرف شصاير بيه هسة وجوة إيدين يا ظالم
-يعني شنو أفهم من كلامج هذا ماراح تطلگين وتجين النة ؟؟
-منار: لا طبعاً اني احب زوجي ومرتاحة وياه ومستحيل أسوي الي تردونة واخرب بيتي بأيدي
-ويهون عليج أمج تغضب عليج وتكسرين كلامي علمود رجال غريب ولج اني امج !!
-منار: غريب عليج ماما مو عليه اني يصير زوجي ألي حماني بروحَة واخذني من شمرتوني للذيابة وعفتوني ومحد منكم سأل عني بعد كل هذا وترديني اتطلگ منه واجيكم ؟
-لأن هذا مكانج احنة أهلج بعدين زواجج مو حقيقي چان شنو هلأصرار بكل بساااطة تگدرين تطلگين منه بس انتِ تردين تكسرين كلام أمج وگلبها منج
-منار: ما أكسر كلامج بس بنفس الوقت ما أسوي الغلط زوجي أحبة وزواجي منة حقيقي مو مزيف وإذا تردوني فعلاً وتردون تصححون غلطكم وياي وتعوضوني تكفيني مخابرتكم ويكفيني أعرف إنتوا بخير بعد مارايدة شيء
ماحس اله انوخذ التلفون منها واجاني صوت علي وهو ينتر بيه ..
-لججج مناار صايرة تراددين بأمج وتكسرين بكلامهة أخر وكتت الأمهات تربي وتكبر وأخر شيء تنعض أيديهن وتنكسر كلمتهن
دمعت عيوني رفعت راسي ليفوگ وجاوبتة ..
-منار: وعليكم السلام وأني الاشوق خوية ؟
-انچبييي انچبييي من تاخذين كلامنا وتجين هنا تصيرين أختي المتكسر بكلمتي وكلمة أمها علمود رجال غريب
لويت شفتي ورفعت حواجبي وحچيت بشك ..
-منار: عجيب ليش هذا الإلحاح شتردون مني ليش هيج مُصرين علىٰ جيتي ؟
اتلبك وصار يتعلثم بالحچي ..
-سكتي سكتي هااي فوگاها تعاي شوفي شنو هنا وعيشي يمنة واشتغلي وطبي وطلعي شبييييج غبييية شبييج أعرفي شلون تختارين وين تعيشين حماارة
-منار: أعرف شنو أختار ومختارة الصحيح غير هذا الحچي إذا عندكم أتصلوا بيه وإذا نفسة ياريت تكفون عني ماريد مشاكل بسبب هلموضوع ..
گلت الكلام وصار يفشر عليه أنواع الفشار أستغربت هذا علي ؟ أخوي هيج صاير ؟ زفرت نفسي مهضومة ميخالف ليش تنهضمين تركوج وأنتِ بأصعب موقف تستغربين منهم بعد ليش..
بس اصرارهم وأسلوبهم وياي من يردوني أجي دوخني وخلاني أشك بيهم ليش من أرفض مايحاولون يتفهموني أبد وكأنُ جاي يأمروني أمر بقبول هذا الشيء
نهضت وگفت گدام المراية جريت الكحلة كحلت عيوني وجريت الحمرة لون أحمر مشطت شعري نزلت غرة ورفعت الباقي طگيت صورة ودزيتهة إله ماچان عندة نت طفيت تلفوني وباوعت لنفسي ..
ميخالف انتِ قوية مريتي بأصعب وبقيتي قوية .. لا تحاولين تسمعين ألهم قاسَم احتواني بوكت أهلي ما اعترفوا بيه وهسة يردوني أترك ألي أخذني وتقبلني بظروفي القاسية كلها بدون ميسمعني كلمة موحلوة مستحيل ..
وأساسًا اني دافكر أبدي حياتي وياه فعلاً .. باوعت للغرفة شلون فارغة بدونة طول اليوم أفتقدة من أنام افتقد عطرة يمي وسوالفة وياي يتحمل نكدي ونفسيتي ...
قاسم صار صديقي ورفيقي قبل مايكون زوجي .. وأحس ما أريدة يبتعد أريدة يمي ما أريد يغيب ويروح عني لعد ويه منو اتكافش واسولف مواقفي السخيفة ويضحكلي ويتقبلني بكل روح ؟؟
أخذت المعطر ترست الفرشة والغرفة منه شغلت السبلت طفيت اضويتها وطلعت للمطبخ طفيت جدورة الطبخ وخلصت كل شغلي بعدين رحت يم الحجية بالغرفة شفتها گاعدة وتسبح ...
-منار: تقبل الله بيبيي
-جميلة: يمه بعد گلبي مرت الحنين قسومي
اي هاي من يوم الي گلها اخذج للحج والرضا صارت كلمة الحنين تجي قبل أسمه عند الحجية ضحكت و گعدت علىٰ طرف الميز وگلت الها ..
-منار: لسه ما أجت رغد شعجب طولت
-جميلة: مدري تكول عندهه غضايا مدري شنهي تطلگ بالوادم أگلها ولج اليجيج نصحي قنعي كليلة الله مايرضىٰ بالطلاگ يمدهور يمفلوك يمصرگع
-منار: بيبي الي يقدم دعوة علىٰ هيج موضوع واصل لنهايتة بعد منو يقنعة
-جميلة: أندري بالمسودنين شمالهم ويعة أمي چا المن تعرسون انجعموا وسكتوا
ضحكت علىٰ سوالفها وهي ماراضية عليهم سمعت طگة ألباب وفاتت رغد مثل عادتهة رجليهة مورمة من الكعب وتعرج بالمشي گعدت بالگاع تعصر بيهن ..
-جميلة: وانتِ شجابرج لابستلج حذاء بوزة بطول بوز غرور
-رغد: من ضيمي طولي ١٦٠
-جميلة: ياع چا انتِ گصيييرة هم معصعصة وهم طويلة شتردين بعد
-رغد: حجية منيلي معصعصة ناعمة ناعمة وجسمي وطولي سمبتييييك و كل شيء متنااسق
-جميلة: وهذا لاستيك شنو ؟
-رغد: سمبتيييييييك
-جميلة: اي وشني هذا
-رغد: يعني الجسم الرشيق والمتناسق
-منار: صح ناعمة والله وجسمها وطولها يموتن رغد
-جميلة: گومي من يمي لا أشوف طولج و أموت حبوبة
-رغد: جمولة خير خير شو مختلفة علينا هاي الأيام ؟؟
-جميلة: دسكتي رغيدة وعلي مالي خلگ عمت عيني گلبي موجر وطاگ علىٰ جمينة وعلىٰ أمها بعد روحي روحهن وينهن هسة
من ذكرتهم اتنهدت وغمضت عيوني بوجع ..
-رغد: والله انا كل يوم أذكرهم البيت فاهي بدونهم ضافوا النة نكهة وروح
-جميلة: عمت عيني والله لو أعرف وينها إله انا اروحلهم برجيلاتي واجيبهم سودة علىٰ گلبي
-رغد: اسم الله عليج حجية
-جميلة: يمة منار انتِ ماتعرفين شيء
مسحت دمعتي النزلت مني هزيت راسي بالرفض بتنهيدة ..
-منار: حالي حالكم بيبي ماعرف شيء عنهم
-رغد: يله گوموا انا جوعانة يمة نهضي ماجعتي عندج علاج ترىٰ رجليج ماتصير زينة إذا ماتاخذينة بوكتة
-جميلة: تعالي ولج گوميني أريد أمشي بيهن للرضا بلكت يصيرن زينات عمت عينهن من رجيلات مابيهن خير وفايدة
راحت رغد إلها واني طلعت فتت للمطبخ حضرت الأكل وفاتت الحجية گعدت علىٰ ميز الطعام سمعت رغد تصيح بأسمي رحت إلها..
-هـآ حبي ؟
بسرعة جرتني من أيدي وگالت ..
-رغد: منار عندنا مُهمة علىٰ الحجية ماتعبر عليها بس انتِ المُكلفة بيها
فتحت عيوني وباوعت إلها بصدمة وعدم استيعاب ..
-منار: شنو شكو منو شصاير اني شعلييه
-رغد: باعي منار والله احچيلج بعدين بس هسة ضروري انتِ تسوين نفسج تخافين كلش وحدج
-منار: خرعتيني رغد واني بسرعة أخاف صدُگ
-رغد: باعي أريد أروح لبيتنا الثاني وما تعوفني وحدي والله وماتمشي عليها اي چذبة اچذبها مستحيل تعرفني كلش زين لذلك هنا يطيح الموضوع برگبتج
-منار: واكذب عليها !!
-رغد: يعني هسة إذا تروح وياي تبقين وحدج بالبيت
-منار: لا يمةةة طبعاً لااا
-رغد: چا يله مروتج منار عندي شيء ضروري يصير ضروري وبس انتِ تگدرين تساعديني بموضوع الحجية
هزيت إلها ومشيت دخلت وفاتت وراي أكلنا وخلصنا قبل ماتنهض الحجية گالت رغد ..
-رغد: يمة انا اليوم راح أروح لبيتنا الثاني
-جميلة: خير ان شاء الله شعندنا رايحين ألهم گعدي گعدي مالي خلك شوفة وجه بعرور
باوعت ألها بلعت ريگ وگالت ...
-رغد: يمة انتِ ليش ترحين وياي ؟
-جميلة: شنهي نوب هاي جديدة چا ترحين وحدج ؟
-رغد: اي انتِ تبقين يم منار شلون اثنينة نروح ؟
-جميلة: يااع وچ رغيدة وتفوتين بين غرور وحيدتج وانا ماترديني أروح وياج أموت غير
-منار: لالا حجية لعد شلون تخلوني وحدي وترحون ؟ أخاف اني
-جميلة: وچ شني فرخ جاهل وتخافين البيت محصن من يرا ومن داخل
-منار: أموت إذا أبقىٰ وحدي أخاف حجية
-جميلة: چا گعدي رغيدة ماكو روحة صبري علىٰ ما يجَي اخوج ونروح
-رغد: لا يمة ما أگدر ضروري أروح فدوه لا تعرضيلي عندي شيء مهم هناك وهم عندي أشياء لازم أجيبها وغراضي نصها هناك يمااا
-جميلة: وصما وعلي ما مرتاحلتج شوراج ؟؟
-رغد: شني السالفة يماا ترىٰ بيتنا !!
-جميلة: وشنهي الشيء المهم بله سولفيلي إياه
-رغد: مو هسة والله اسولفلج بس هسة ما أگدر
-جميلة: گعدي وسكتي ماوديج لغرور وحدج گـلبي يروح مني غير
يمكن بالساعة واحنة نقنع بيها ماخلينا طريق ما اجينالها منه وماكو كلمة ما حچيناها بألف يابو علي يله قبلت ورضت تروح وهم تحلفها وتوصيها ما تسويلها مشكلة ويه غرور ..
فتت للغرفة سبحت وطلعت فتحت تلفوني لگيتة متصل عليه 4 مرات وكاتب جوة الصورة
"اووويلي احترگ ابوي"
"شو مكحلة عيونج ومطلعتلج كذلة وانا من يمچ ألي الله"
"وهاي الحمرة من أنزل لا تحطينها گبالي ترىٰ تخرب بيناتنا ونعبر الحدود ونحتل البلاد "
ضحكت وخليت شعري مفتوح واتمددت بسرعة اتصلت بس ماكو ماحصلتة وقبلها چان بساعة متصل عليه
سديت تلفوني وغفيت ماعرف شگد مر من الوقت بس فزيت علىٰ رنة التلفون شفتة هو بسرعة فتحت خط واجاني صوتة ..
-قاسم: يابعد حيلي الحدود وأهلة
-منار: هلاو
-قاسم: ياكلني الهلو نايم ؟
-منار: اممم فزيت علىٰ مكالمتك
-قاسم: ميخالف بعد روحي رجلج انا هنا كاتلني الضيم وفوگ هذا تحاچيني صوت الله يرضاها وعلي مايرضاها
افتهمت شنو يريد ضحكت سديتة واتصلت عليه كاميرا
-منار: وهسة ؟
-قاسم: شني السالفة انا مصدوم اليوم صورة وفيديو وصوتج ناعم منار لا تلوفينها عليه وانا هنا
-منار: ما مشتاق الي؟
-قاسم: ياهو انا ؟ انعل أبوي إذا ما مشتاق الج غير البارحة حلمت بيج وفزيت ابچي عليج
-منار: وشلون سكتت ؟
-قاسم: حطوا بأيدي سلاح وگوموني وسكتت
-منار: أختلاف ثقافات
-قاسم: شلونها أميرتي
-منار: مشتاقتلك هواي يمتى ترجع ؟
-قاسم: لازم ماكو أحد تنكدين عليه
گالها وقلص عيونة ..
-منار: هو صح محد يسمع تفاهتي غيرك بس بعيداً عنها اشتياقي ألك انتَ
-قاسم: مناري هذا شعورج ليش بس من أروح بله من أجي أريد أروح لسيد لشيخ يشوفلي چارة أكله شيخنا مرتي أبتعد عنها تريدني وتشتاقلي وتحچي وياي حچي حلو يخليني احترگ خليني أجي يمها تسولفلي مغامراتها بالطفولة من چانت تبوگ بنعول البنات وتشمرهن فوگ السطح
-منار: ههههههههههههههههههه بس ماكملت الك الخطة الثانية شنو
-قاسم: تدرين أول مرة يصير عندي فضول كمليها أشوف
-منار: مو شنو چنت أكرهن واني طفلة ماحبهن اموت منهن من يجون إلنا الخطة الأولىٰ اشمرهن فوگ السطح والخطة الثانية چنت اشمرهن بالمُبردة وأسد الباب ههههههههه وهنة يدورن عليهن ومحتارات هههههه
-قاسم: ولچ انتِ شيطان
-منار: وتمر أيام وأمي تفتحها تشوفهن مرعدات تمرعد ههههههههههه ترزلني وتسكت
-قاسم: ليش تكرهينهن بله ؟
-منار: حقيرات وياية چانن يحتقرني واسلوبهن زفت ويتأمرن عليه واني شلون أنتقم منهن لعد بهلطريقة
-قاسم: أيا شيطانة والوادم تشتري وانتِ تشمرين
-منار: ههههههههههههههه
بقيت فترة اسولف وياه ضحكت وتغيرت مودي ومزاجي كله لحد ما صاحوا عليه جماعتة سديت الخط منه ..
حسيت روحي مرتاحة ومتأكدة كلش و فكرت وگلت بس يرجع نتمم زواجنا اني احبة و ما أريد احرمة أكثر حرام عليه بس يارب وفقني وخليني أسعدة ويسعدني بحياتي وياه ...
*****
نزلت ونزل السائق نزل جنطتي مشيت للباب الرئيسي مال البيت عقدت حاجبي من شفت الحماية وعددهم المُبالغ بيه گدام البيت
باوعت بأستهزاء هذول كلهم علمود منو ؟ علمود غرور ؟ بعدين شسالفة حتىٰ القصر مو هيج حراسة ام المظاهر تموت علىٰ التفخفخ ..
وصلت للباب ردت أدخل اعترضوا طريقي حراسها الجدد و وگفوني ..
-وين مدام ؟
صفنت بوجهة جريت نفس وأبتسمت اله ..
-رغد: أبتعد من گدامي حباب
-مايصير مدام لحد مانبلغهم إذا سمحوا تفوتين
-رغد: ايباه وهاي طلبات وأوامر منو بله ؟
-أستاذ أدم
عضيت شفتي عصرت أيدي لمُجرد ماسمعت أسمة ابتعدت خطوات بالأخير الحارس مأمور ماله ذنب أشرت إله يبلغهم رفعت أيدي علىٰ الكاميرات ارفرف بيهز بإبتسامه خبيثة ...
فتح الباب وگال ..
-تفضلي مدام
أخذت جنطتي ودخلت أعوذ بالله صدگ سعلوة أجت ألي و وجهة مايكش الذبانة ..
-رغد: هلاوووووو
-غرور: شعندج جاية هنا
-رغد: لا غرورة أزعل عليج يعني تردين تمنعيني من بيتي ؟ زحمة لا تحچينها أخاف علىٰ كبريائج ينجرح
عيونها الشر ينط منهن شادة وجهة عليه وانا الضحكة تارسة وجهي أدري كل ما أضحك تضوج أكثر..
-غرور: مو بيتج هذا ما أريدج تفوتين لبيتي نسيتي شسويتي بيه أخر مرة اجيتكم وبكل عين صلفة تجين لبيتي
-رغد: ليش شسويتي أخر مرة ما أتذكر ذكريني
-غرور: أخذي جنطتج ورجعي مالج فوتة هنا
رفعت صبعي حكيت طرف أنفي وحچيت بأبتسامة مستفزة ..
-رغد: متأكدة بيتج ؟ مكالمة وحدة أحط ورقة حصص البيت گدامج واشوفج بيت منو ابتعدي عن طريقي تعبانة الجنطة ثگيلة
حچيت الكلام وهي تخزر بيه وتكز علىٰ أسنانها متوترة وخايفة حسيتها وتريد تبعدني بكل طريقة بس وين تگدر ؟ تخسىٰ هذا البيت داخلتة وحالفة ما أطلع منه ألا والي بيه دافعين حق أفعالهم ..
مديت أيدي بعدتها عن طريقي ودخلت كل شيء متغير بالبيت حتى أثاثة شنو الموضوع وهو كل شيء بيه جديد چان باوعت محد موجود من فتت البيت فارغ ..
أخذت مفتاح غرفتي فتحتها وفتت نفس ماهي وگفت الجنطة وأسمع صوت عياطها واصل لسابع جار تتوعد مادري علىٰ شنو ضحكت وشمرت نفسي علىٰ الچرباية فتحت تلفوني ودزيت رسالة لقاسم .
"تم و هسة راح نبلش بالخطة "
*******
فتحت الباب ودخلت للبيت شفت ماما مثل عادتها يا أما تشغل قرآن وتگعد تسمعة لو تشغل باسم ..
دخلت أمشي خطواتي علىٰ صوت القرآن تقربت يمهة بستهة ضحكت وگالت ..
-أمل: عطرج الطيب شميتة أول دخلتي الله يساعدج يبعد أُميمتج
-جُمان: يساعد الجميع ياروحي
-أمل: روحي سبحي وأرتاحي
أبتسمت ورجعت بستها وحضنتها حيييل كل قوتي وأحس أريد بعد احضنها بعد ما أشبع منها والله..
فتت سبحت وطلعت عطرت نفسي وصليت قريت شوية قرآن حتىٰ ما أكون هاجرتة لو أقرأ كل يوم نص ورقة من القرآن هذا شيء عظيم عند الله ..
طبخت و أكلنا نظفت البيت و انطيت ماما علاجهة گعدت گبالها وماعرفت شلون أفاتحهة بالموضوع توترت وخجلت ..
-أمل: جُمان
-ها ماما
-أمل: بيج شيء حبيبتي ليش ساكتة مو من عوايدج كل يوم تسولفيلي شنو يصير وياچ بالشغل وشنو تسوين ؟
بلعت ريگ ورديت ..
-جُمان: ماما أريد أحچي بموضوع مختلف شوية
-أمل: شنو يمة صاير وياج شيء صخااام مو اني گتلج ممرتاحة خلي يولي هذا شغلج ما منة فائدة
-جُمان: شنو ماما صبر صبر وين ربطتي مو هيج الموضوع
-أمل: اي لعد شنو
غمضت عيوني وحچيت بتردد ..
-جُمان: ماما اليوم شفت عوف
-أمل: عوف ؟ عوف الي نعرفة ؟ عوفنا ؟؟
-جُمان: اي ماما
-أمل: يمة وليدي وينة ولج وين شفتي شلون
اتنهدت وگعدت اسَولف المختصر طبعاً وأكو أشياء خجلت احجيهم بس فتحت وياها موضوع الزواج ..
-أمل: وانتِ ليش ماراضية ؟
-جُمان: ماعرف متوترة وخايفة
-أمل: منين تخافين ؟ منة اني گـلبي كله يرتاح لهلوليد وعلي أحسة وليدي رزن وثگيل يعرف حچايتة من يذبها وصيت ورتبة وشان وشاريج ورايدج فوگ كل شيء شتردين بعد أكثر من هيج ؟؟
بقت تسولف وياي حسيت امي فرحت أكثر مني تحبه أعرفها من زمان من كان يجي إلنا امي ترتاح أله وتمدح بيه ..
مر اليوم حضرت ملابسي حتىٰ الصبح ما أحتار وأخذ وقت واني أدورهن بين الهوسة لگيت كُل شيء إلا جنطتي نفضت الغرفة نفض گعدت أفكر أخر مرة چانت وياي بالمحل بس من فتت للبيت ماهي بأيدي
شلون نسيتها هناااك شلون بيها جنسيتي وهوية الراتب ومستمسكاتي نفخت وخابرت ضحىٰ حتى أتأكد گالت بلي موجودة بقت بمُكانها حسيت روحي ارتاحت شوية وگلت الصبح من اروح بعد أخذها
گلبت بتلفوني مستغربة اليوم ولا اي رقم اجتني منة رسالة ولا اي شيء سديتة مرتاحة بلكت كف عني واللتهىٰ بشيء ثاني قررت احچي لعوف وأگُلة عليه بس اشوفة حتىٰ ميگول ليش ماگلتيلي وكل شيء يصير ليش أجيب المصايب لنفسي ويثبتها عليه ام المصايب ..
أجتني رسالة ابتسَمت من عرفتة رقمة ردت انصدم واتمنيت انصدم بس شلون وهو يعرف كل خطواتي دوخني وما أگدر انصدم هذا الأنسان كل شيء منه جائز فعلة قريت الرسالة الدازها الي ..
"فكري زين لذة عيني"
"لا تحرميني منج"
سديت التلفون والضحكة علىٰ خدي والله احببببببة احببببة روحي بيه اعشقة وأعشق اهتمامة بيه وحنيتة عليه أسرني بحنيتة سلب گـلبي واتملكة بيها صار بكل تفكيري أسمة ماعرف شگد مر وقت وأني أفكر بقراري بس!!
"عقلي وگـلبي اثنينهم خضعوا أله "
"أعترف غلبني الخوف بس حُبة غلب خوفي "
"محبوبي ألأجلح "
متت بهليلة اضحك لوحدي وأبتسم افتح تلفوني أريد ادزلة موافقة كل بيه يريدك ويريد قربك بس أرجع وأگول لا احچيها بوجهة أحلىٰ بس شلون أخجل ما أگدر واخرب كل شيء ببالي أدري
عضيت شفتي ورفعت تلفوني فتحتة دخلت علىٰ رقمة ردت أكتب نزيت بخوف شمرت تلفوني من سمعت تطفر فوگ سقف بيتنا وركض اي ركض
أسناني صارت شيء تطگ بشيء الصوت قوي و واضح باوعت لأمي نايمة جريت حجابي لبستة ورجلية صارت وحدة تضرب بالخ من الرجيف ما أگدر أمشي بعد سمعت صوت زلم قوي صار بييتنا جريت نفس ردت بس أعرف وافتهم شجاي يصير قويت روحي رفعت بردة الشباك حسيت نشف جسمي قطرة دم مابقت بيه من شفت العسكر مداهم كل بيتنا ...
