رواية قيود العوف الفصل التاسع والاربعون 49 بقلم ريتا

نص ساعة وانا گاعدة منتظرة بس ماكو يمكن الولد نايم بهلوقت !! أو ياخذ وقت حتىٰ يسحبة ويدزة وقاسم هم عندة شغل خو مايبقىٰ فاتح التلفون أكيد مو فارغ اوووف الانتظار موتني .. 

بعدني بنص تفكيري ودوهنتي سمعت طگة قوية صارت طبگت حواجبي وبقيت گاعدة بمُكاني دقيقة تقريباً سمعت صوت أبوي صوتة چان واضح ويعيط شجاي يصير شكو أخذني الفضول ومشيت ترددت أفتح باب الغرفة سمعت طگة باب وصار صوت العياط بعيد عني ..

بسرعة مشيت لشباك غرفتي لأن يطل علىٰ حديقة البيت من برة وأگدر أشوف كل شيء الي يفوت والي يطلع بعدت البردة شوية وقربت نفسي وسعت عيوني من شفت أبوي لازم خلف وغرور واگفة تنتر بأيديها نتر ..

ما أگدر أسمع شيء منا بعيد صوتهم عني بس أشكالهم مو طبيعية أبوي فاير فور وخلف يتطوطح بمُكانة منين مايلزمة أبوي يجي وياه وضعة أبد مو مستقر غرور واكفة بنصهم وبس أيديها أشوفها تتحرك صوتها ما اسمعة ..

حسيت أكو شيء تقدمت سريع أخذت تلفوني فتحت الكاميرا سويت مسافة صغيرة بالبردة خاف ترفع نظرها وتشوفني لأن الشباك واضح من برة فتحت الكاميرا فيديو وصرت أصور وبين ما انا أصور أشتدت بيناتهم كلششش أبوي لزم خلف وطلع يمشي بيه سرررريع 

ركضت وراهم سدت الباب الخارجي بسرعة وحالها يحير ويشكك تتلفت بعيونها علىٰ كُل مكان فريت نظري علىٰ المُكان كله لاحظت ماكو ولا حارس ولا واحد منهم أله أثر زاد شكي رجعت تمشي سريع ولسه عيونها تتلفت سديت التصوير وتقدمت قفلت غرفتي ..

دزيت التصوير كله لقاسم وبقيت محتارة لا گدرت أسمع ولا گدرت أعرف بس أكيد شيء قوي صاير وضعهم مخررربط يصفن وبهيج ساعة !! مبين خايفين ومتوترين چانوا كلش  ..

مرت ساعة ساعتين وهدوء ماكو أي شيء صار صمت غريب قاسم صارت الرسائل خط واحد تروحله شفت رسائل شمس الي حارگتني بيها حرگ تسأل عن الاختفاء المفاجئ جاوبت كل رسائلها ورسائل مصطفىٰ مسحت وجهي هملت شغلي والقضية قطعت التواصل بخصوصها هاي اليومين وهذا كله راح يأثر علىٰ القضية لأن أستغلال الوقت من صالحي وانا مو يم الموضوع ..

                                            

              

                    

فتحت قفل الباب وطلعت جفلت بمكاني تفتر بالصالة رايحة جاية والتلفون بأيدها نزت من أنتبهت ألي وملامحهة توترت حچت بتلبك ..

-غرور: شعندج گاعدة بهيج وقت !؟

-رغد: لأن بكيفي انتِ شكو حتىٰ بوقت نومي حاطة روحج 

-غرور: لا بس ءء أقصد رجعي نامي ليش گعدتي

تحچي متوترة كلش ابتسَمت بشك وجاوبتها ..

-رغد: ماعاجبني أنام 

-غرور: خاف ماتگدرين تنامين ؟؟

-رغد: اي عندي أرق 

-غرور: ها مزعج مزعج الأرق 

-رغد: كلشش 

-غرور: عندي منوم كلش زين دائماً أستعملة تردين أنطيج منه تنامين وماتحسين بشيء بعد ينعس 

صفنت بيها لثواني وجاوبتها ..

-رغد: اي انطيني ميخالف بس كون ينومني؟

-غرور: ههههه اي كلش ينوم اني مجربتة و أستعملة بس لحظة أجيب الج منه 

هزيت إلها راسي وراحت صعدت فوگ رجعت ظهري علىٰ الحايط منتظرتها دقائق ونزلت تقدمت ألي بأبتسامة مدت أيدها بيها حبايتين ..

-رغد: ليش أثنين ؟

-غرور: لأن يله يتغلبن علىٰ الأرق وبسرعة تنامين 

أخذتهم منها وگالت ..

-غرور: لحظة أجيب ألج مي من البراد

رادت تتحرك قلصت عيوني ورديت ..

-رغد: ماكو داعي غرور أعرف مكان الماي وين وعندي رجلين توصلني مايحتاج 

درت وجهي وألتفت ردت أمشي ميلت راسي وگلت إلها..

-رغد: عود مشكورة علىٰ المنوم أول مرة تسوين ألج عمل بيه خير 

تغيرت ملامح وجهة المشدودة ضحكت وگالت ..

-غرور: مو تدللين 

ضحكت بأستهزاء كملت طريقي وفتت للمطبخ نغزني گـلبي منهن مشيت بسرعة فتحت الجرار سحبت كيس منه وانا أتلفت بنظري خليت الحبايات بالكيس وضميتة بالمُكان السري المُعتاد للبنات ..

فتحت البراد طلعت كاسة مي شربتها وفاتت عليه شمرت الكاسة شافتني وابتسامتها من الطول للطول ..

            

              

                    

-غرور: شلون راح تنامين نومة هنيالج عليها

-رغد: شدعوة هلگد ثاقة بيه 

-غرور: ههههههه مجرب 

رفعت حاجبي بشك عفتها وفتت للغرفة مديت أيدي طلعت الكيس و اباوع اله بشك ..

غرور عمرها بحياتها ما تتمنىٰ تساعدني وتحب تشوفني ألوب لو تشوفني غركانة وتگدر تنقذني ماتمد أيدها وتتركني أموت وهسة جاية تريد تساعدني !! 

ههههه لا والله ماعبرت عليه طگيت سكرين للحبوب ودزيتهم لصديقتي وكتبت إلها ..

-رغد: فاطمة تگدرين تعرفيلي شنو نوع هذي الحبوب ؟

دزيت الرسالة وانتظرت تفتحها ذبيت روحي علىٰ الچرباية صدگ تعبت وحيل هم باوعت الهن عقلي يگلي راح يريحونج أخذي وگف الشيطان بنص راسي وقفلت وانا اباوع ألهن والوب علىٰ النومة ..

متت واتأذيت كلش جسمي تعب أمشي اگعد ما أرتاح عيوني تطلب النجدة مني زفرت نفسي صرت ابچي وعيوني متركزة عليهن أعرف راح ينومني وراح يريحني اي أعرف كلامها صح بس أدري تريد تضرني أكو ضرر و أذية من وراهن ..

صبرت بعد وتحملت ساعات بين البچي بين السوادين الي صابتني فتحت شعر نثرتة نزعت ملابسي بللت جسمي مادري شصارلي تحملت كل هذا في سبيل ما أضعف وأخذهن لحد ما أعرف يمكن يكونون دليلي عليها تحملت لخاطر أمي لخاطر وجعنا ولخاطر أخواني دست علىٰ روحي وحملت شعوري وتعبي .. 

رفعت راسي علىٰ صوت رسالة وصلتني فتحت تلفوني چانت من فاطمة وقريتها ..

" رغد مُمكن تجيبين هذي الأدوية وتجين ألي ؟ "

قريت رسالتها وكتبت إلها..

-رغد: أكو شيء خطر ؟ 

دزيتها وبقيت شوية وصلتني رسالة منها ..

"أنتظرج" 

قريت الرسالة بأستغراب ونهضت جسمي متكسر بس بالي يم كلامها مُبهم مو مفهموم منه شيء طلعت سبحت بماي باارد بقيت نص ساعة جوة الدوش والماي البارد ينزل عليه خلصت وطلعت لبست حضرت نفسي فتحت تلفوني لسه قاسم ماكو منه اي خبر وفاطمة رسالتها مثل ماهي بعدهي..

أخذت الكيس ضميتة بجنطتي وأخذت تلفوني وطلعت چانت الساعة بـ٨ ونص الصبح البيت بعد الشيء المُبهم الي صار البارحة هدوء وكلهم ماعرف وين غاطين .. 

طلعت الصبح چانوا الحراس موجودين عكس الفجر خففت خطواتي وگفت بنصهم تقدم واحد وگال ..

            

              

                    

-تفضلي ست وين توصلين ؟

-رغد: وين چنتوا الفجر ؟ 

گلت الكلمة وصفن بوجهي لثواني والي وراه حسيتهم جمدوا يباوعون بصمت جاوبتي بمتمتة وگال .. 

-موجودين ست 

رفعت حاجبي وجاوبتة ..

-رغد: الفجر ؟ موجودين ؟ الساعة بين الـ4 والـ 4 ونص موجودين ؟

بلع ريگ وجاوبني ..

-هاا الفجر ست الفجر امي تمرضت وأضطريت أروح 

-رغد: وين رحت ؟

-أخذتها للطوارئ 

ضحكت بأستهزاء نكست نظري عنه وثبتة عليهم وحچيت ..

-رغد: وانتوا هم أمهاتكم تمرضن الفجر 

بقوا ساكتين و نزلوا روسهم محد منهم جاوبني ردت جواب بس حتىٰ هذول ماعرف شنو موضوعهم درت وجهي عنهم ومشيت أجرت تكسي وطلعت للمستشفىٰ لفاطمة ..

وصلني السائق ونزلت خابرتهة انطيتها خبر وصلت طرقت الباب ودخلت عليها نهضت بأبتسامة سلمت عليها وگعدت علىٰ الكرسي تركت الميز وگعدت گبالي فتحت الجنطة وطلعت الحبوب انطيتة الها ..

أخذتة مني تباوع اله وملامحهة غريبة ماعرفت أفسرها..

-رغد: فاطمة الحبوب هاي شبيها ؟ علىٰ مرتين ردة فعلج عليهن مُبهمة ؟

رفعت نظرها ألي باوعت شوية ونهضت وقبل ماتطلع ألتفت وگالت .

-فاطمة: انتظريني هنا شوية واجي

هزيت راسي وبقيت منتظرتها بداخلي شك وبداخلي حچي وهلشكوك البيه كلهن وضعي وضعي هو ألي جاي يأكدهن ألي بدون ما أشوف الدليل بعيني ..

مرت خمس دقايق تقريباً أنفتح الباب دخلت وجهة مطعون گعدت گبالي وهمست ..

-فاطمة: رغد منين جبتيهن منو انطاهم ألج ؟ بس لاا شربتي منهن ؟؟

-رغد: شنو هذن ؟

-فاطمة: حبوب مخدرة 

نطقت الكلمة وغمضت عيوني بتنهيدة أتضح شكي صح أتأكدت شكوكي اخ ياغرور منو يخلصج مني منووو فتحت عيوني وهي لسه تباوعلي ومنتظرة مني جواب ..

-رغد: أريد تسويلي تحليل 

-فاطمة: تحليل شنو ولج ؟؟ حاچيني ماخذه منهن !!؟ 

            

              

                    

-رغد: وضعي فاطمة وضعي غريب هذا يوم ثالث ألي ولا جاي أعرف نفسي يوم واحد نمت بيه و وضعي تخربط وتخربطت نومتي وراه وحالتي وتفكيري واستقراري صرت مو انا وتصرفاتي ما تشبهني 

تباوعلي مذهولة حطت أيديها علىٰ خدها لزمتني وگالت بصوت يرجف سريع ..

-فاطمة: نهضي وياي ترحين نفحص دمج هسة 

هزيت راسي شلت جنطتي وطلعت وياها مشيت فتت لغرفة التحليلات اجت بنية مديت أيدي سحبت من وريدي دم أخذت مني العينة وفاطمة واگفة لزمت ايدي طلعتني ودخلت ماعرف شنو سولفت ويه البنية نوب طلعت ..

-فاطمة: باچر تظهر النتيجة 

هزيت راسي متفهمة وحچيت ..

-رغد: أعرفها شنو بس ردت اتأكد من شكوكي عن طريق الحبوب 

-فاطمة: بس گليلي شلون وصلن ألج شلون اخذتيهن ولچ منو قشمر عليج حطولج اياهن بعصير كذبوا عليج وأدعوا هذي الحبوب تفيدج بخصوص وجع معين احجي رغددد 

-رغد: تدرين ماعرف وما أتذكر شلون شربتهن ! لأن فكري متشتت وماجاي أتذكر ولا شيء من ثلاث أيام 

-فاطمة: جرعة زايدة ولج رغد !!

-رغد: أنتظر التحليل فاطمة أنتظر النتيجة لأن أريد حيفي منها

هزت راسها وسكتت بعد ماحجت گعدت يمها شوية بعدها اجرت تكسي وطلعت لبيتنا ردت أخذ الملفات وأطلع لشغلي فكري تخربط وأشتد كل شيء عليه احتاريت بشنو أفكر بس رغم مضرتها ألي أدري هذا السبب ألي بسببة راح اللوعها والله راح اجرها من خوانيگها هي وكل عائلتها بدون استثناء .. 

شكوكي صرت ما أحتاج يتأكدن لأن واضحات بس الدلائل راح تفيدني بالقانون راح أحطهن وحدة وحدة واخنگها بيهن ..

نزلت ودخلت وگفت گدام الباب دگيت الجرس ماعندي مفتاح البيت شگد ذلوني يله فتحت منار الباب مدت راسها صرت بوجهة قلصت عيوني وحجيت بغضب مصطنع ..

-رغد: بعد لو موگفيني بعد شوية هنا

-منار: ههههههههههه أسفة حبي بس ليش واگفة هنا 

دخلت وحچيت وانا بالباب ..

-رغد: منيلي مفتاح ماعندي 

-منار: اممم فوتي فوتي أكو مفاجأة 

-رغد: خير ياطير هواي مفاجئات صارت اليوم 

-منار: لا هاي مختلفة تعالي فوتي 

هزيت راسي ومشيت فتت لصالة وصارت گبالي خالة أمل فتحت عيوني علىٰ وسعهن مذهولة ابتسمت ورحت إلها حضنتها حييل أحبها خالة أمل أنسانة جميلة قلباً وقالباً .. 

            

              

                    

-رغد: خالة وين چنتوا ! فدوه والله گـلبنا راح وياكم 

-أمل: يابعد عيوني اهجول ويه ام راس يابس 

-رغد: وينها وين جُمان ؟؟

-جُمان: هنا اني هنا

ألتفت علىٰ صوتها والابتسامة انرسمت علىٰ كامل وجهي حضنتها وعضيتها بكتفها صرخت متوجعة ..

-جُمان: يماااااي

-رغد: ولج چا هيج تسوين والله تستاهلين تعالي اعضج بأيدج بعد أطلع الدك منها 

-جُمان: محامية متوحشة 

-رغد: اشششش اششش 

-جميلة: تعالي خايبة ليه شو ماعاينتي الي امده الوكت فروخيش ربي جريوك ياكلك 

-رغد: ولج جمولة غير عمري انتِ غير جميلة الي تجمل أيامي 

عصرتني عصر بحضنتها دمعت عيونها وگالت الي..

-جميلة: وعلي مانام أفكر بيج دليلي يگلي انتِ بيج شيء 

-رغد: شوفيني شبيه عيونييي شوفيني اللاستيك علىٰ گولتج كله گدامج  ؟؟

وگفت أفتر كدامها والبنات يضحكن ضحكت وغطت حلگها بشيلتهه عيونها مدمعة وتضحك ..

-منار: هههههههههههه تغير السمبتيك وصار لاستيك بسبب لفظ بيبي جمولة 

-جميلة: وانتن هاااااي شنيييي نوب تصيحن الي جمولة وعلي أكوم أكسر العكازات علىٰ ظهورجن مستهترات امهات لسونة 

-رغد: گومي حتىٰ احطج جواي 

-منار: نلعب مصارعة 

-جميلة: يله بله هاي مرت المسودن وهاي أخته 

-رغد: وانتِ أمه 

-جميلة: ماعرفه ماعرفه

ضحكنا كلنا وسولفوا ألي شلون عوف لگاهم وشصار وياهم انصدمت من الي صـار الوضع الي چانوا بيه چان وگفهم علىٰ الحافة بس ربنا اله حكمة وضحكت وماستغربت من أخوي لأن هو بحد ذاتة داهية ومايفوته شيء ..

-رغد: وينه هسة عوف ؟

-جميلة: ببيتة 

ترخصت منهم وصعدت اله عيوني فاتحتهن بالقدرة بس رغم هذا قاومت دست علىٰ روحي بشكل وقاومت وبهيج وضع القوة الصارت عندي والإصرار عظمة من الله لأن حالتي يُرثىٰ لها ..

            

              

                    

دگيت باب غرفتة وفتت لگيتة گاعد يقرأ قرآن أبتسم بوجهي ابتسامة واسعة صدق وتقدمت أله اول ماصارت عيني بعينة دمعت عيوني وبچيت بچيت ورحت حضنتة وهو متفاجئ ومذهول مني ..

-عوف: رغد أيامي سلوة عمري !!

شهگت وحچيت بصوت متفطر ..

-رغد: عوف اااااخ عوف 

بعدني عنة موسع عيونة متفاجئ مذهول مسح دموعي بحركة سريعة ويحچي وياي مرعوب ..

-عوف: رغد شبيج ليش تبچين وليش هيچ وجهج شاحب شصاير بغيابي!!

-رغد: تأذيت حيل تأذيت 

-عوف: أفصم ظهرة وافگس عينة الي يأذيج منو وياج شصاير !!

أخذت أيدة گعدت وگعد گبالي بالگاع نزل نظرة لأيدية يرجفن حسيتة تخبل من صدگ نظراتة ونبرة صوتة انترست غضب وقلق ..

-عوف: مريضة ؟؟ ولج شبيج شبي وضعج ليش ترجفين ليش تبچين حاچيني

اتنهدت ونزلت راسي ماخذة نفسي القوي هو أبوي وأمي وهو الي يفهمني بس رفعت راسي وبديت أحچيلة كل شيء كل شيء بدون ماضم عليه حرف واحد وهو يستمع أشوفه عيونة صارت براسة ضرب أيد بأيد بدون مايقاطعني ومن وصلت لوضعي غصيت بشهگتي طلعت الي احس بيه بدموعي ..

-عوف: الله لوماخذ عمري أهون ألي من السمعتة 

-رغد: اسم الله

-عوف: طاحت بيج رغد !! خرب بال*** انعل **** وحگ داحي الباب هاي دموعج أضعاف إضعاف اخليها تبچيهن لوعتج أضعاف الوعها 

-رغد: انكشفت عوف أصلًا نكشفت كل شيء صار واضح 

-عوف: وهذا المطي قاسم شلون مايگلي بروحتج وبخطتكم شلون تسوون هيج شيء من وراي !! 

-رغد: ماعرف صارت بسرعة هو ماقبل انا الي أقترحت هذا الاقتراح ولحيت وحتىٰ الحجية ماقبلت بس تعرفني إذا ردت شيء أسوي 

-عوف: ضريتي روحج يابعد روحي ولج رغد لو صاير بيج شيء انا شسوي !! ولج شسووي 

يحچي متعصب وخايف لزمت أيده أهدأ بيه ..

-رغد: شوفني گدامك رادت تضعفني بس الله أقوىٰ منها انطاني قوة وخلاني أصبر وأتحمل وما أضعف چنت أگدر ادوس علىٰ كل شيء واخذ الحبوب واريح نفسي وانهي كل ذرة وجع بجسمي بس عوف ثأري أقوىٰ وأهم مني ومن كل شعوي

-عوف: ولج انتِ لبوة علىٰ أمي لبوة بنت لبوة !! 

-رغد: وعلىٰ أخوي انا أختك انتَ بنص عيوني تصير قوتي أخذها منك لو ضعفت 

            

              

                    

لمني بحضنة حسيت نفسي هدأت من حچيت اله داخلي أرتاح بعدني عنة وگال ..

-عوف: بعد ماكو داعي ترجعين ولا ترحين أبد 

-رغد: بس عو..

-عوف: ولا كلمة رغد انتِ جبتي الدليل بأيدج ليش راجعة خلص كل شيء والي رحتيلة صار موجود انا أتصرف بعد 

-رغد: بس ماحچيت الك عن شيء 

-عوف: شنو ؟

طلعت تلفوني راويتة التصوير يباوع وماعندة ردة فعل صافن بس..

-رغد: هذا صار اليوم الفجر وبعدها مارجع لا أبوي ولا خلف وغرور وضعها مُزري مرتبكة وخايفة كلششش 

-عوف: ايباه من الفجريات وين رايحين الحبايب 

-رغد: ماعرف !! 

-عوف: سهلة والله لأنعل شريف مابيهم ال*** لابو الجابهم خ*** ال*** 

اتنرفز كلش وعصب بطريقة فضيعة باوعت اله وسكتت فاير فور يصم أيده ويفتحهة باوعلي وگال ..

-عوف: روحي لغرفتج نامي حاولي تنامين وإذا مافاد بلغيني لا تأذين روحج وتسوين شيء 

هزيت راسي ونهضت من يمة نزلت وفتت للغرفة حطيت راسي الوجع ساطرني ماحس بشيء تذكرت امي وبچيت تذكرتها من اتمرض وتحط راسي بين رجليها وتقرة سورة الفاتحة 7 مرات مادري شلون بس بنص دموعي صرت أقرأها وامسح علىٰ راسي بخشوع بعدة لساني يلهج وبعدها غمضت عيوني غفيت وماحسيت علىٰ الدنيا ...

مرت يومين ودزتلي فاطمة النتيجة چان دمي بيه نسبة لكن قليلة وأگدر أعالجها بصورة سريعة أخذت النتيجة وراويتها لعوف هز راسه متوعد .. 

ومن أسألة عن شيء مايحچيلي يتصرف بهدوء وسكوت أعرفة هذا اسلوبة ويفجرها بالأخير بشيء يخلينا مصدومين وهو يوگف بس يتفرج بس انا جاي الوب أريد أعرف شلون أبقىٰ هيج !!

سكتت بله و أشوفها وين توصل وياك يعويف حتىٰ التسجيلات سكت عنهن وماجابلي طاريهن بعد.. 

رجعت أتواصل ويه مصطفىٰ بخصوص الموضوع وصدمني من گال .. 

-مصطفىٰ: رغد البنية وأهلها اثنينهم سافروا 

-رغد: شلووووون !! 

-مصطفىٰ: بلغتج واتواصلت وياج بشكل مستمر بلغتج بكل شيء حرف حرف بس ماچنتي تجاوبيني ومن شفتج هيج گلت خلص أنسحبت منها سحبت مراقبتي عن أهلها بعد ماصاروا جواي 

            

              

                    

حطيت أيدي علىٰ راسي رجعَت اقره هواي هواي كلام وهواي مكالمات وكل شيء داز ألي بس انا وين چنت بعالم ثاني وملتهية بضيمي وچنت أعرف هلقضية بالذات الوقت بيها مكسبي الوحيد ..

تنهدت وگلت اله ..

-رغد: حقك عليه مصطفىٰ القصور مني أعرف 

-مصطفىٰ: بيج شيء ؟ ترددت وگلت مستحيل وحدة مثلها تخاف لو تنسحب بس مالگيت ولا أجابة ولا اهتمام للموضوع حتىٰ 

-رغد: الحكم أقوىٰ 

دزيتها وشمرت التلفون الله ياخذ غرور شسوي بيها ما أرتاح شسوي اااخ موكلتي طفرت والقضية انسدت شلون افتحها وموكلتي ماعرف أراضيها وماعرف شنو صار 

ضربت رجلي بأيدية يااا وسفة هسة يگولون خافت مكالمة وحدة وخافت منها وانسحبت منها رجفناها عمت عينج غرور شسوييي بيج بعد هلضيم بس اصبريلي اصبرريلي ..

****

-منار: اييي ؟؟؟ 

-جُمان: اي هو هذا كل الي صار يعني 

-منار: جُمان يعني باعي باعي 

فاتحة عيونها وتحچي مذهولة والضحكة تارسة وجهة ..

-جُمان: شبيج انتِ ياا شنو هذا وضعج

-منار: يعني عود صدگ وگفتوا گدام القبة وصار بيناتكم هيج وافقتي واعترفتي بمشاعرج وهو هيچ گال الج !! 

-جُمان: اي والله 

نهضت شالت المخدة وياها وتعصر بيها وتباوعلي ..

-منار: شسوي ولج شسوي أحس أبقار ترافس بمعدتي وصلت لراسي باعي باعي راح يطگ عندي فيوز من الفرررررحة

-جُمان: منار بديتي تتخبلين صدگ 

گعدت بصورة سريعة گدامي لزمت أيديه وهي تقلد ..

-منار: ردتج انتِ وماردت غيرج لذة عيني روح گـلبي

عود تقلد وتحچي ومغمضة عيونها وسارحة بيها راشدي يصحيها علىٰ زمانها ويرجعهة لواقعها ..

-جُمان: خاااالييييي 

-منار: وجع لهلصوت عوفيني سارحة واتخيلكم ماجاي أشبع من غزل عوف وحنيتة واهتمامة والله واگع وگعة من سابع سما

نزلت راسي خجلانة وحچيت  ..

-جُمان: امممم

-منار: يعني هسة معقولة قاسم أخووو ؟؟

-جُمان: ليش ؟

            

              

                    

-منار: صحراء !! لايسمعني كلام حلو لا يتغزل واثنينة واحد يصنف علىٰ الثاني تخيلي حتىٰ إذا ردنا نتغازل بالمكالمة تصير عندي حالة غريبة بحيث قبل ما ينطق الكلمة أسد التلفون واگلة فصل النت 

-جُمان: ههههههههههههههه خرب

-منار: بس احبه والله جُمان احبه تخيلي أسبوعين صارلي ماشايفتة وگـلبي مفرفح عليه الثور 

-جُمان: منار مو صايرات خفيفات كلش ؟

-منار: شتگولين نثگل عيب ؟

-جُمان: اني لا لا هواي ثگلت 

-منار: اني هم بطلت الثگل ما مريود أريد رجلي يمااااي

-جُمان: هههههههههههه ياااا منااااار

-منار: والعباس گـلبي طگ بعد ما أتحمل وأحس صارت عندي مشاعر جياشة تجاهة أريد أعترف بيهن لا أنساهن 

گلت الكلام ونهضت أخذت تلفوني وفتت للغرفة خابرتة ماكو دزيت رسائل ماكو خط واحد مرت ساعة ونفس الشيء .. 

يعني الواحد حتىٰ لو يجمع اله كم حچاية ماتنطون فرصة راحت عليك قاسم بعد سقط حقك ولا كلمة مال حبچيات تحصل مني بعد نفخت ونهضت من صدگ انغمت گـلبي مادري لأن مشتاقة اله ..

لبست كيمونة تعطرت وطفيت الاضوية ونمت مشاعري مخبوطة ومعصورة غفيت وماعرف شگد مر من الوقت سمعت طگطگة يمي ماهتميت إذا نايمة لو عبوة تطگ يمي ماهتم وما أنهض..

شوية وحسيت أحد تمدد يمي وعطرة وصلني ابتسَمت واني بين النايمة وبين الصاحية حسيت بأيد تلتف حول خصري وبوسات خفيفة تنطبع علىٰ خدي نازلة لطرف شفتي ..

رفعت أيدي حطيتها علىٰ أيده وفتحت عيوني من شدد عليها درت نفسي لجهتة چانت اضاءة الغرفة خفيفة أگدر أشوفة فتحت عيوني عليه ابتسَمت وعيوني مفتوحة للنص ..

-قاسم: مناري 

-منار: همم

-مشتاقتلج 

گال الكلمة وباسني بطرف شفتي كزبر جسمي وگـلبي يدگ سريع سريع بس ما رايدتة يبتعد عني عاجبني وجودة ومسافة القرب الي بيناتنة ..

خليت عيونة بعيونة باوعت اله وخليت راسي بصدرة وهمست ..

-منار: هذا انتَ قاسم

-قاسم: لا خيالي دزيتة علىٰ البلوثوت 

ضحكت بصوت رفعت راسي صحصحت شوية ..

            

              

                    

-منار: ليش ماگلت ألي اليوم راح تنزل ؟

-قاسم: ردت أسويها مفاجأة ألج مافرحتي ولج ام الحدود ؟

-منار: شلون مافرحت ودي أكرصك واخرمشك 

-قاسم: مشاعرج المعوقة شگت أبوي بالنص

-منار: قوقو 

-قاسم: قوقو ؟ 

-منار: قوقي 

-قاسم: ولج شني هذن !!

-منار: أختصار حرفك مالگيت غيرة شدلعك لعد 

-قاسم: هذا دلع منعول والد والديه حبيبتي !! 

-منار: معليك اني عاجبني  

-قاسم: رحمة للرضا ستري علينا خليه بس بالغرفة هذا 

-منار: هههههههههههههه

-قاسم: وعلي لحد يسمعة نوب أتخزيني بين العربان نوب قوقو وقوقي !!

-منار: بيناتنا حبي 

-قاسم: اويلاه حبي اويلاه 

-منار: مشتاقتلك قوقي 

گلتها ودحست نفسي بيه كلش أحسه مصدوم بيه كلش وحقة هيج بدون سابق إنذار بعد ما أريد اتدلع زيادة ولا أبتعد عنه خلص استوعبت واقتنعت مالي غيره هو زوجي واني احبه وكل شيء بيه قابل ويسمح ألي بهلقرب ...

-قاسم: اويلييييي وشعلي ابو ابوي من الفجريات شعليييي 

-منار: لعد هذا ميعجبك وهذاك ميعجبك لعد شيعجبك ؟؟

-قاسم: تعجبيني أنتِ مناري تعاي بحضني تعاي اليوم الله هاديج عليه شو ماكو حدود 

قرب نفسة استنشق عطري مسح بأصبعة علىٰ رقبتي بخفة حط عينة بعيني وهمس  ..

-قاسم: احضنيني طفل يجفل من اليمشون

 وضميني عطر خدران بثيابج 

هذا انا العنيد الصرت حبابج 

هذا انا الوحيد الصار شجرة عيد بثيابج ..

گال الكلام وقربني اله وحضني حيل ومستمر يبوس بوجهي بلهفة حسيت بيه تعبان وبدون كلام زايد غفيت علىٰ صدرة وهو مشدد علىٰ حضني ...

ثاني يوم فزيت باوعت لمُكانة فارغ نهضت أخذت ملابسي وسبحت وكل ما اصفن شوية وأتذكر البارحة أبتسم مرتاحة من شعوري خلصت وطلعت من الحمام وتعطرت رطبت وجهي وشفتي 

فتحت باب غرفتي بعدني ماطابگتها شفت شفت رغد طلعت من غرفتها تهرول صعدت فوگ تركض باوعت بأستفهام چانوا ما موجودين الولد أكيد عندهم أجتماع بيناتهم صاير شيء ..

            

              

                    

أبد ما أتدخل إذا صار موضوع بيناتهم الأخوة شگد ما اني فضولية بس موضوع يخصهم ما أسأل عنه وأتدخل إذا حبوا هم يسولفون وإذا لا فـ يبقىٰ خاص بيناتهم وينسد من جهتي ...

******

صعدت الدرج أركض و مشيت بسرعة فتحت باب الغرفة وشفت قاسم وعوف گاعدين وفاتحين الحاسبة عوف شكلة صاير نار مطعون وجهة طعن وعيونة حمر من العصبية 

-رغد: التسجيلات ؟

بقىٰ ساكت وبس صدرة يصعد وينزل من قوة نفسة هز راسة قاسم وتقدمت گعدت يمهم ..

-رغد: أنطوني الحاسبة أشوف 

أخذتها منهم چانت الفلاشة مركبة بيها والتسجيل واصل للنهاية و واگف رجعت التسجيل من البداية چان مختصر التسجيل الفارغ مقصوص وبس الأصوات والأحداث مبقينها فتحت التسجيل طبگت حواجبي بصدمة من سمعت صريخي ..

-رغد: هدنيييي ولك هدنيييييي 

-غرور: ألزمها أدم ألزمها راح تفضحنا هااااي

-أدم: استعجلي

-رغد: ولكممممم مو كااافي السويتوا بينه مو كااافي يالتتسمىٰ ابوووووي شتريد تسوي بيه بعد شترررريددد

-أدم: صمي حلكج بنت ال***

جمدت من سمعت صرختي وكلامي ..

-رغد: لااا لاااا غرور لااا

-غرور: شربيهن شربيهن يفيدنج 

-رغد: لا تنطينييييييي ولج ابتعدي عنيييي

-غرور: گعدها أدم متنلزم هاي الطرگاعة 

-رغد: لااااا لتنطيني شيء وانا ماحچي وما أجيب طاري عن الي شفتة بس وخرررري

-غرور: اي وانا هيج غبية واصدگ بيج دشرررربي 

هنا ماسمعت بعد غير صرخاتي المتتالية وصوت أبوي وهو يگلها ..

-أدم: بعد قرن ماتتذكر شيء

-غرور: طبها مرض حسيتها انا من طبت للبيت وراها شيء ودازينها جيتها مو خالية عبالهم تعبر علىٰ غرور 

-أدم: جيبي الأكياس 

-غرور: شتسوي بيهن ؟

-أدم: هاي الكمية ماتبقىٰ بالبيت أريد أوديها بالمخزن وهذا ابنج السرسري راح ينعل ابو ابوهن خسرنا كميات بالشرب باوعيلة حتىٰ الجاهل من يشوفة يعرف بيه مدمن 

            

              

                    

-غرور: ويعني شسويلة مادام يريحنة خلي يشرب باليوم حباية شتأثر عليك إذا يرتاح بيها ماگدر امنعة بعد فات الأوان 

-أدم: فات الأوان وكل يوم يشرب ويخسر بينه !! هذن بيهن طن فلوووس وابنج يبلع بيهن بلاش شوفيلج چارة وياه بعد ماكو 

-غرور: وليش تحسسني انتَ ماضايگ طعمهم أدم عبالك مادري بيك تتعاطىٰ 

-أدم: بس مو مثل ابنج كاض روحي أعرف شكد أخذ وشوكت من أحتاجها هذا مخبل أدمن أدمن 

-غرور: دكافي كافي

-أدم: غرورر !!

-غرور: بعدين نسولف هسة دشيل هاي وياي للغرفة راحت ماعت 

-أدم: أربع حبايات شتردين يصير بيها بعد 

وگف هذا التسجيل رفعت راسي عيوني مدمعة ومهضومة من الي سمعتة بعده يكرهنا بعده يريد أذيتنا ومثل كل مرة السبب مصالح وفساد ..

نزيت علىٰ ضربة عوف للميز ..

-عوف: شريف مابيهم خوات ال*** يتاجرون بيهن هاي الاتفاقية ويه حامد هذا السبب ألي منه حامد لزمهم وخلاهم يلوصونها بعرس قاسم 

-قاسم: ولا مصدوم وعلي بالعكس فرحان كلش منين ماتجي ربك يخليها لصالحنا 

-رغد: بس فهموني وين صاير المخزن الي يخزنون بيه هذي الكميات ويتاجرون بيها !!

-عوف: عندي العنوان موجود بالتسجيلات الباقية مخازن خاصة بيهم ترجع لحامد هاي المخازن 

-قاسم: خوات العمية چم مخزن ضبطنا وبعد أكو وعلي ماخذينها فلاحة ملاجة

فريت نظري بيناتهم وحچيت ..

-رغد: زين عرفتوا موضوع ذاك اليوم وطلعتهم الفجر ؟

-عوف: لأن مبلغين عليه و صار أسمه مطلوب عرفوا ورادوا يشردونة 

-رغد: خلف ؟؟؟

-عوف: اي مطلوب 

-قاسم: تدري مستغرب من شغلة إذا خلف مبلغين عليه ومطلوب أبوي شلون طالع منها وبالتسجيلات متضح اثنينهم يتعاطون والعائلة كلها أتاجر ليش خلف بس ؟؟

-عوف: منو گال بس خلف كلهم مبلغين عنهم هذول الأطراف الي يشتغلون چانوا ويه حامد وجماعتة صار واحد يكشف بالثاني من صار القاء قبض علىٰ المجموعات ورؤسائهم الأطراف هاي بلعت هوىٰ صار واحد يطلع بفساد الثاني من الخوف 

-قاسم: لصالحنا 

مد روحة أخذ الحاسبة سحب الفلاش منها فتح كنتورة وطلع مثل القاصة فتحها وطلع منها أربع فلاشات قفلها ورجعها لمُكانها هذا كله وانا وقاسم بس نباوع شكله عصبي ومايتحاچىٰ ..

            

              

                    

أخذ سلاحة حطه بخصرة وسحب كل أشياءة تقدم خطوتين وگف گدام قاسم ونطق بحدة ..

-عوف: تعال وراي 

نهض قاسم مسح أيديه ببعضهن ضحك وگال ..

-قاسم: حاضر سيدي ..

أبتسم اله وهز راسة طلع قبله وراد يطلع وراه قاسم وگفتة بفضول وحچيت ..

-رغد: شنو هاي الحركات والألغاز شو مافهمت شيء وين رايحين شنو هذن الفلاشات ليش ماتگلولي أحس نفسي مثل الأطرش بالزفة بنصكم ؟؟ 

لزمني من كتفي وهو يحچي ..

-قاسم: بعدين رغودة انتِ سويتي العليج هسة يجيج الصافي 

گال الكلام وطلع بسرعة نزل جوة فريت أيدي موتوني والله موتوني هذول الأثنين معقولة راحوا للعناوين ؟ زين ليش ماسمعت الباقي انا سمعت بس هذا التسجيل سطروني يبوووو 

نفضت فكري وطلعت يله هسة انا شسوي بعد بس يتم إلقاء القبض عليهم شغلتي تبدي وياها بالمحاكم ..

لبست وطلعت للمحكمة خابرتني شمس بخصوص الوكالة خلصت كل شغلي جاي أطلع صار بوجهي مهيدي ردت أعبرة وگفني ..

-مهدي: شلونج رغد 

-رغد: زينة 

-مهدي: أستغربت صارلج كم يوم ماتداومين كلت يجوز مريضة 

-رغد: وانتَ شكو مهدي داومت أو ماداومت تحت أي ظرف من الظروف الي منعني أداوم أنتَ مالك علاقة بيه ولا الك حق تسأل 

-مهدي: لا يكون تفكرين وعبالج أسأل عنج مشتاقلج لو أركض وراج ؟

باوعت اله من فوك ليجوة ضحكت مستهزئة وحچيت ..

-رغد: لا طبعاً غير أول لازم تكون بتفكيري انتَ صغير علىٰ تفكيري 

تصنم ومثل كل مرة يوگف گبالي ولساني يرشرش عليه يذب حچاياتة الي عبالة يجرحني بيهن لو ينرفزني بس تنگلب عليه وأفشلة ويبقىٰ متفشل وساكت لأن أنهي حد الكلام بلسانة .. 

بعدني واگفة گدامة ونظراتي المستهزئة تحول عليه رفعت نظري وأنتبهت مصطفىٰ واگف مسافة ومكتف أيديه يباوع بنظرات غريبة أستغربت وجودة ابتعدت ومشيت وصلت اله ..

-رغد: مصطفىٰ ؟ 

لسه نظرة ماتركز عليه إنما متمركز علىٰ مهدي ألي ملتفت ويباوع اله هم بعدم رضا هزيت راسي هذا ما منه فايدة وشكو واحد يشوفني احجي وياه لو أوگف يسوي مشكلة وياه ويخرط ما مهتمة اله بس إذا زاد الموضوع محد يخلصة مني .. 

            

              

                    

نكس نظره عنه مصطفىٰ وباوعلي ..

-مصطفىٰ: هذا مو راحة ماعجبتني نظراتة 

-رغد: منو تقصد ؟ 

-مصطفىٰ: الولد الي چنتي واگفة يمه

عرفت قصدة همهمت وسكتت صدگ مو راحة بس شنو عين صگر من أول نظرة عرفه ..

-رغد: ها اي مو مهم محامي چان يستفسر عن شيء و وضحتة اله 

-مصطفىٰ: زين 

مشىٰ ومشيت وياه طلعنا برة وحچيت ..

-رغد: ما گلت ألي شعندك هنا ؟ أكو شيء صاير 

حسيتة توتر صار يفر بنظراتة اخذ ثواني وجاوبني ..

-مصطفىٰ: لا ردت أسأل عنج وأشوفج 

صفنت بوجهة وصفن بوجهي نوب گال ..

-مصطفىٰ: يعني أشوفج حتىٰ أسألج شصار وليش هملتي القضية هيج يعني 

هزيت راسي متفهمة مشيت وياه مسافة صارت الكافتريا بوجهنا ..

-مصطفىٰ: تعالي نگعد هنا 

دخلنا وگعدنا طلب چاي وبنص الظهرية والحر اليكتل ..

-رغد: چاي بنص الحر 

-مصطفىٰ: يگعد راسي وزن 

ضحكت متفهمتة ..

-مصطفىٰ: اي رغد ؟ اسمعج 

-رغد: ماعندي شيء زايد مصطفىٰ عن الي حچيتة مريت بوعكة صحية خلتني أهملها بصراحة ماگدرت أركز وحتىٰ دوام ماداومت ونسيت القضية من أساسها 

-مصطفىٰ: شنو من وعكة تنسيج أكثر قضية تراهنتي عليها ؟

جمدت عن الكلام بقيت اباوع اله اتمنيت احجي بس شحچي شگول أبوي ومرتة شربوني جرعة مخدرات زايدة ومرضوني لأيام ونسوني عيشتي بيهن .. 

-رغد: أحم شوية خاصة 

-مصطفىٰ: رغد بعد مايصير تفتحينها لأن أخذت البنية وشردت هي واهلها وسافروا 

-رغد: زين وتتوقع ماراح يلگونها ؟ هيج تفكيرها صغير المثلهم راح يحفرون الگاع حفر حتىٰ يطيحون بيها 

-مصطفىٰ: بعد احنة القينا الحجة وهذا أختيارها هيَ مالج ذنب

-رغد: حرامات لا ساعدتني ولا خلتني أساعدها 

            

              

                    

گلت الكلام وانا افر بقصبة العصير عم الهدوء ماطلعت كلمة بعد رفعت راسي شفتة صافن بيه صفنتة وشكلة بعيد عن الكلام الحچيتة ارتبكت من نظراتة المسبلة 

حسيت بحلگة كلام ومتردد يحچي ومتوتر لدرجة وترني وياه جر نفس طويل ثبت نظرة عليه وگال ..

-مصطفىٰ: رغد أريد أتقدم ألج 

*****

كضيتة من چتافة ضغطت عليه وگعدتة علىٰ الكرسي صاح متوجع ..

-خلف: اخخخخ بويه اخخ

-قاسم: وعلا التعلك چنك مرة تطلگ 

-عوف: حي الله خلوفي الورد 

گالها عوف وسحب الكرسي عكسة وصار گبالة يباوع إلنا مصدوم حجة بتلبك ..

-خلف: هسة شتردون مني شتردون ليش انا هنا 

-عوف: سمعتة قاسم ؟

-قاسم: سمعت سمعت 

-عوف: چا غير أخونا ومشتاقين الك وسوينا هاي اللمة الحلوة 

-خلف: شتريد مني عوف أدري بيك جاي تستهزأ 

يحچي ويلهث عبالك يركض چان يجر بحچايتة جر نفسة ضيق كلش..

-عوف: گبر لفك 

نهض ودفر الكرسي فز من حركتة ورفع راسة وگف گبالة وتغيرت نبرة صوتة تحول الوضع جدي مد أيده لزم وجهة بيهه وعصرة عصر وانا من أشوف عوف يعصر بوجه واحد فد استخطي لأن أيده مشهود إلها ..

-عوف: شوف ولك كلب لا جاي أشوفك أخوي ولا واحد اعرفة وادگك بالقندرا علىٰ راسك واطبعها طبع علىٰ حلگك مال تغشم روحك گدامي ماتفيدك 

-خلف: شتحجي انتَ شمسوي انا والله مامسوي شيء

-عوف: أحا يحلف نوب ابن النطيحة والمتردية يحلف چذب ابن المطگطگة يصيح شمسوي ؟ شمسوي ؟ أسأل روحك سااافل 

بقىٰ ساكت فر نظرة عليه تحسة يريد يبچي الجبينة الخنيث ..

-خلف: مامسوي شيء مامسوي طلعوني منا عوف انا أخوك شلون تگعدني هنا هاي الگعدة وتحچي وياي هيج 

-عوف: يا أخوي يا نعل البلحگك وداحي الباب اشيلك واهبدك بالگاع صبري قليل كلش ولك خلففففف 

فز فزة وگال بصوت يرجف ..

-خلف: هااا

-عوف: مامسوي شيء وتريد تطلع تهريب ولككك ك*** تريدهم يحطونك بالحاويات حالك حال ال*** وتطلع منا لا من شاف ولا من درىٰ

            

              

                    

فتح عيونة وگال ..

-خلف: شنو هذا الاتهام هذا الحجي مو صحيح 

-عوف: مو انا احب اليزامط مو صحيح مو 

بقة يباوعلة مشيت گبالة شغلت الحاسبة ركبت بيها الفلاش طلعت التسجيلات صار يسمع وفاتح عيونة مصدوم ..

-خلف: ش شنو هذن 

-قاسم: اكلك ترىٰ لعبت روحي والحُسين نفذ صبري بعد 

جريتة من شعرة غطيتة بنص الماي خليتة دقائق يلوب ورفعت راسة يريد ياخذ النفس ماكو يتعاطىٰ وبسرعة يختنگ ..

-خلف: لا لا لاتخليني اختنگ أموت أموت 

-عوف: وموتتهم شني فايدتك انتَ زيادة بعدد السكان 

گالها وأشر ألي بحواجبة رجعت غطيت راسة كررت العملية عليه ثلث مرات انتهىٰ بعد صار يلهث يغمض عيونة ويصيح ..

-خلف: اخخخ اخخخ 

-عوف: اوووي اوووي 

جريت راسة رفعتة وانا فوگة وحچيت ..

-قاسم: هسة تحچي لو اگطع نفسك بعد كلش

هز راسة بثقل وگال ..

-خلف: لا احجي والله بس عوفني وخر الماي هذا وخره 

-عوف: وخره بله خل نشوف العزيزة شتگول 

اتنهد يلگط هواه لگط باوعت اله وهزيت راسي شنو هللعبان نفس شكله كارثي مو طبيعي بسبب السم اليبلع بيه عيونة حمر وجهة عبالك وجه ميت تحس ماكو بيه دم ولا روح ..

-عوف: غرد 

-خلف: اي صحيح صحيح 

-عوف: هواي تمسلت 

-قاسم: شلون راح أغط راسك وبعد ماطلعة اله من تطلع روحك

-خلف: اخخخخخ

-عوف: احجي عدل حيوان جاي تعبرهن عليه لو شني ؟ مسوي روحك بعالم ثاني غير مدمن أنتَ أصحىٰ من المطي ماشي ويه دمك واصل للعرج 

-خلف: شتريد احجي عليمن

-عوف: انتَ تدري صادرة بيك مذكرة قبض انتَ وأبوك ؟ 

هز راسه يلهث ..

-عوف: حلو أبوك وين ؟ علىٰ حد علمي لازم هو وياك لأن اثنينكم بنفس النگرة والليلة موعدكم ؟

            

              

                    

-خلف: أبوي راح يسحب فلوس 

-عوف: يسحب فلوس ؟ لو يبيع بالسم ويجيب ؟

-خلف: دخيلك بعد ماگدر أتنفس راح اموت 

-قاسم: شلحيت من موت الكرفك سولف وموت 

-عوف: ماتموت ياعار مات حتىٰ تموت انتَ كمل وين راح يبيعهن ؟

-خلف: ماعرف وين يبيعهن يمكن أمي تبيعهن اله لو دلال 

فتحت عيوني علىٰ وسعهن من جاب طاري دلال صح هي بنت غرور بس ولا مرة شفت عليها شيء حتىٰ تصرفاتها وياي ويه عوف عادية وماتحتك بينة بيوم ..

-قاسم: دلال شعليها ؟

-خلف: تاخذ كميات تبيع منهن بالجامعة علىٰ البنات 

باوعت بتعجب لعوف الي طگ الميز برجلة وصاح بيه ..

-عوف: يا حواوين يا قناااااادر ياسرسرية 

-خلف: والله انا ما ابيعهن والقران مابيع منهن ولا الي شغل 

-عوف: كمل ؟ كمل وأمك الدايحة وين توديهن ؟؟

-خلف: ابوي ينطي قسم منهن لأمي وقسم هَو يبيع منه بالم*** وعندة أماكن ثانية مانعرفها 

-عوف: ولك خلفففف

-خلف: والله مادري والله 

-قاسم: أمك وين توديهن !!

-خلف: تتفق ويه دلال وعندها صديقات يشتغلن بالم** هم تبيع عليهن 

-عوف: الدياحة والدياثة وين واصلة عندكم ؟

-خلف: عوف كل شيء أعرفه حجيتة عليك الله طلعني والله مابعت ولا تاجرت بحباية انا 

-عوف: وين عرفت حامد ؟

صفن بوجهنا وبلع ريگ ارتبك وصار يرجف ..

-قاسم: انبلع لسانك زماااال 

-خلف: عن طريق أبوي 

ضحك مستهزأ وگال ..

-عوف: توقعت توقعت بس شلون انطيني تفاصيل ؟

-خلف: بالم*** عنده م** رحت مرة وي أبوي وشفتة هناك 

-عوف: وهاي تجارتكم وشغلكم بهذا السم هنا بدأ ؟

-خلف: اي صار هو ينطينا عناوين الأشخاص الي يتاجرون بيهن وبدأ ابوي يشتغل بيهن وأمي عرفت عارضت بالبداية بس بعدين من شافت الفلوس والشغل قبلت وصارت هي تلتقي بحامد وهي تروح للأماكن تجيب .

            

              

                    

-عوف: چا غير دودة أمك طبعاً تكيف 

-قاسم: موعدكم يا ساعة ؟

-خلف: منو تقصد

-عوف: الاستمطاء العندك نادر 

-قاسم: انتَ وابوك 

-خلف: ليش احچي شتردون تسوون بيه

-عوف: غط راسة قاسم

-خلف: لااااا لاااا 

يحچي ويهز راسة بخوف ويرجف وعينة علىٰ الماي ضحكت وباوعت لعوف خرب عقلة علىٰ هلتفكير عاف كل شيء وگال لا تدوخ روحك هذا مُدمن نفسة علىٰ گدة لا أتعب روحك ولا تحتار بيا طريقة تخليه يعترف حط سطل ماي گدامة وغط راسة بيه مرتين ويكت الأول والتالي ..

نفضت فكري وتقربت گعدت گبالة ..

-قاسم: سولف

-خلف: بـ ١١ ونص بالليل 

صفن بيه عوف وذب تنهيدة تهد الحيل يفر براسة متأسف للوضع .. 

-عوف: خوات ال*** محسوبين علينا هاي التذبح 

-قاسم: اي وعلي 

-عوف: كم واحد وياكم ولك ؟

-خلف: والقران مادري الاعرفه هو الي حجيتة 

-عوف: ها 

-خلف: اي اي

-عوف: وجعي 

 تقدم عوف مد أيديه بجيوب ملابسة وهو اتخبل صار يرافس مرافس ..

-خلف: لالا وخررر شتريد تسوي وخرر 

هفة براشدي فر بيه وجهة فر ومد أيده طلع كيس كامل كش وجهي من شفتة شجاي يصير لخاطر محمد شنو هلكميات اليبلعون بيها ..

-عوف: هذا كله تريد تطلع بيه ؟

-خلف: موتني ولا تاخذه جيبة ماگدر أعيش بدونة أموت 

شمرة عليه لگفتة منه وهو متخبل متسودن صار يصرخ صريخ ..

-خلف: ولكم ماگدر أعيش بدونه عوف كل شيء حجيتلك كل شيء وحق القران ماچذبت عليك بشيء بعمري ماتاجرت بيه انطيني اياهن ماگدر بدونهن أموت والله أموت 

-عوف: لو نخله تطلع براسك ماتشم ريحتهن بعد 

 انبح صوته من الصريخ صار يبچي بچي عليهن عافة وطلع عوف رحت وراه وگال ..

            

              

                    

-عوف: انطي خبر للعقيد مؤمل بالمُكان والموعد المضبوط خل يتحضرون وفوت جيب هذا الملطلط وتعال

هزيت راسي رفعت التلفون باوعت اله وجريت نفس اخ يا وسفة يتسمىٰ أبو تحز بخاطري وچبيرة علينا نشوفة ينسحل گدامنا بأيد هذا وهذاك ..

نفضت تفكيري وخابرتة وبلغتة بالمُكان سديت الخط صارت عيني عليه يدخن ويزفر نفسة مختنگ مو سهلة علينا گدام العالم أبونا هيج حتىٰ لو محد يعرف بعلاقتنا بيه المگطوعة الناس تشوفة أبونا واحنة النا سمعتنا وصيتنا غمضت عيوني ودخلت جريت الكلب هذا وطلعت بيه ...

*****

اليوم ثاني جلسة علاج طبيعية لماما من بداية الجلسة لنهايتها ماما تحس بالوجع وتتألم هذا الشيء وجعني بس الاخصائية تگول هذا شيء مُمتاز إلها 

گعدت علىٰ القنفة متفرجة شلون تحرك بيها وشلون تسوي إلها التمارين صار علاجها بالبيت لأن تتعب ماما رايحة راجعة للمركز ..

فرحت حيل من گالت أنُ شهرين من العلاج وتگدر ترجع تمشي طبيعي .. مرت ساعتين وراحت لحد موعد الجلسة الثالثة أخذت ماما سبحتها وغيرت ملابسها نومتها علىٰ ظهرها وطلعت ..

-منار: ها حبي شلونها بعد الجلسة 

-جُمان: زينة بس شوية متوجعة 

-جميلة: اي يمة طبيعي تتوجع غير تفرفر برجليهه وتمغط وهيه مابيهه تشيلهن مو وحدة تمغط بيها

-منار: حجية لعد اذا مو هيج متگدر تمشي 

-جميلة: اگلج حبوبة ماتسويلي لرجيلاتي انا وعلي گاضيات بلكت تردهن أليه 

-منار: حجية انتِ بسبب الكبر هيج صار بيج 

-جميلة: خايبة ويني بعدني شباب 

-جُمان: شگد عمرج حجية ؟

-جميلة: وعلي مدري ماعرفة شكثر

جاي نسولف وفاتت رغد راجعة من الدوام سلمت سلام بارد كلش وفاتت لغرفتها بعد ماطلعت شوية وترخصت الحجية راحت إلها ..

مر اليوم أنشغل بالي عليه اخابره ميجاوب ادز رسائل ميفتحهم اليوم كُله ماشفتة من الصبح لهسة الساعة صارت وحدة ونص بالليل واني گاعدة أنتظرة ..

صرت احوس حوس مو بس هو حتىٰ قاسم ومنار صارت تلوب مثلي ..

-منار: موتني شلع گـلبي هلرجال ولج أتذكر شفتة البارحة الفجر من نزل وبعد ماشفتة !!

            

              

                    

-جُمان: واني هم شفت عوف البارحة وبعد ماكو 

نهضت تفتر وتعض بشفتها بتوتر ..

-منار: بس أريد أعرف شغليش ليش ميحچون !! 

-جُمان: علمي علمج 

-منار: يعني من الصبح لسه يوم كامل حتىٰ من ينزل شغل شلون بقوقي شلون

-جُمان: قوقي !!!

فرت وجهة عليه مصدومة وطگتها بضحكة اختنگت بيها واني اباوع إلها صافنة بوجهة وهي تضحك ..

-منار: شلون طلعت مني عود هذا السر بس بيناتنة بالغرفة 

-جُمان: تسمين قاسم قوقي !!

-منار: بؤبرني شحلاتة 

-جُمان: ولج طول بعرض هو وعضلاتة وهيئتة ورتبتة وشواربة وين واصلات تگليلة قوقي !!

-منار: فكرت هواي يله حچيتة أحس بالمشاعر الجياشة المليانة حب تجاهة من اگله قوقي عبالك اگله حبيبي حياتي گـلبي 

-جُمان: صخم الله وجهج فشلتينا اسكتي

-منار: اوف قوقيتي اوف وين صااار

حطيت أيدي علىٰ راسي سطرتني ودوختني تروح وتجي تدردم لحد ما أتصل تلفونها رفعته متحمسة بس سرعان ماتغيرت ملامحهة من صفنت بالمتصل بلعت ريگ ومشت لغرفتها ..

لويت شفتي بأستفهام بس شكلها مابشر بخير .. مشىٰ الوقت واني لسه مانايمة عيوني ماتغفىٰ إذا ماشوفة صرت أوهوس خاف صارله شيء ..

معقولة أحد تعرض اله ؟ صار اله حادث صرت أفكر وحطيت أيدي علىٰ گـلبي من يمشي الوقت وماداز الي ولا رسالة ولا متصل بيه .. 

طلعت گعدت بالصالة شوية وسمعت طگة باب وگفت بسرعة شفت قاسم فات حتىٰ ما أنتبه لوجودي مشىٰ بدون مايلتفت وفات لغرفتة وسد الباب سمعت صوت بالمطبخ شمرت الكوشة من أيدي ورحت ..

فتت لگيتة گاعد علىٰ طاولة الطعام مثبت نفسة علىٰ أيديه ومنزل راسة خفت حسيت بيه شيء وصاير شيء اتقدمت جريت كرسي وگعدت گبالة همست بصوت خفيف ..

-جُمان: عوف ؟

بقىٰ شوية ورفع راسة عيونه حمر رجف گـلبي من شفت شكله ..

-جُمان: شبيك عوف شصاير 

-عوف: ما صاير شيء ليش گاعدة لهلوكت سحير الليل انتِ ؟

-جُمان: لا تغير الموضوع 

-عوف: يا موضوع عيناي انتِ 

            

              

                    

-جُمان: واضح صاير شيء شوف شكلك شلون صاير مو مال ماكو شيء 

-عوف: انتِ ليش گاعدة لهسة ماگلتيلي

-جُمان: شلون أنام ماگدرت روحي يمك

أبتسم بوجهي بتعب ذب نفس وحط أيده جوة حنچة صافن بيه هزيت راسي متسائلة ...

-جُمان: شنو 

-عوف: شگد حلو وجهج نظرة منج كفيلة تريح روحي المتعوبة 

-جُمان: تدري جاي تخوفني احساسي يگلي بيك شيء جاي تكابر بالاعتراف بيه وساكت عنه بس اني وگـلبي نحس بيك 

-عوف: ماريدج تحسين بيه

-جُمان: ليش !

-عوف: ماريد روحج تتعب انا 

نهضمت نزلت دمعتي ماعرف شنو الشيء القوي الي مخلي واصل لهلمرحلة هذا الهدوء والكتمان وراهم براكين وراهم جمر يچوي بيه بهلحظة تمنيت احضنة واتقاسم وياه حزنة علىٰ الأقل حتىٰ لو مايحچيلي بس ردت روحي تختلط ويه روحة ..

-جُمان: أحبك تدري 

-عوف: عايش ألج ولهاي الحچاية انا ..

-جُمان: خلي نتزوج

مادري شلون حچيتها بس كافي بكل مرة أشوفه هيج أتمنىٰ اقاسمة حزنه وماگدر ألزم ايده لو أحضنة ماگدر اگابلة الليل كله حتىٰ أتعبه واخلي يمل ويشكيلي عن اليوجعنة ..

باوع بتعجب وضحك ..

-عوف: والله ؟

-جُمان: والله لعد اني مو انطيتك موافقتي واحنة بكربلاء ؟

-عوف: صحيح بس ردت انطيج بعد وقت گلت مو مستعدة وبسبب الظروف المريتي بيها حچيتيها يمكن

هزيت راسي بالرفض وحچيت ..

-جُمان: صدگني كل شيء بيه مستعد وماحچيتها بسبب الظروف حچيتها بسبب گـلبي وشعوري تجاهك 

أبتسم ابتسامة واسعة ابتسمت وياه علىٰ أثرها..

-عوف: نعلعله روحي وين أودي روحي بهليل بعد هلحچي ولچ وين

-جُمان: بـآچـر خلي نعقد

-عوف: وداحي الباب ماصبر هيچ إذا ماترحين من يمي راح أسوي بيج سواية ماتسولف 

ضحكت علىٰ ضحكتة باوع ألي وگال بتنهيدة ..

-عوف: ‏"أحبّك لأن أحزاني

بجانبك تتلاشى

و كل شيء معك

يهون ..

            

              

                    

ابتسَمت وبقيتة نسولف شوية مر الوقت وحسيتة شوية أهون صار بس هذا كله وماعرفت السبب شنو كتوم لدرجة ماشاركني الشيء الي بسببه أول مرة عيونة دامعة ..

صار وقت الصلاة توصيت وصليت ومثل عادتي بعد كل صلاة أسبح تسبيح الزهراء واهديها لصاحب العصر والزمان وأقرأ دُعاء الفرج وكذلك أهديه حتىٰ ما أكون ناسية مولاي ... 

ثاني يوم انجمعنا كلنا بالصالة وهو يباوعلي ويأشر بحواجبة والحجية تباوعلي وتضحك حسيت هنا صارت لحظة أدراك وانحصرت من حمحمت الحجية وهي تباوع لماما وگالت ..

-جميلة: الله بالخير عليكم 

-قاسم: الله بالخير 

-عوف: الخير كله هو واهله 

باوعت اله حچاها وباوعلي بلعت ريگ رجعت گالت 

-جميلة: ان شاء الله جمعة خير هاي 

-قاسم: وعلي ولا يلوگلج يمه شني من سالفة عندج فوتي بيها گبل 

-جميلة: شمالك يمصخم يملطم 

-قاسم: عليمن هاي المقدمات المستهلكة

-جميلة: وعلي صدگ باوعولي كلكم

كلهم رفعوا روسهم يباوعون إلها وگالت بضحكة ..

-جميلة: خية ام جُمان انا اليوم أطلب منج جمينة بنيتي عزيزتي لوليدي عويف علىٰ سنة الله ورسولة 

هي گالتها وماسمعت غير صفارة قاسم الي علىٰ أثرها رفعت راسي اباوع الهم كلهم نظراتهم متمركزة عليه عزا العزاني تمنيت بهلحظة عندي الدهان السحري اليستخدمونة توم وجيري ويخفيني من الوجود ..

نفضت تفكيري وگالت امي بصوت راهي ..

-أمل: بنتي بنتكم وين أحصل اني أحسن من عوف عليها حتىٰ أرفضة 

-جميلة: يبوو وليدي يدللها دلال وعلي يشيلها فوگ راسة 

-قاسم: مو هي طاقيتة 

-أمل: هاي گدامكم شنو قرارها اني وياها القرار الأول والأخير إلها 

تصنمت بمُكاني من حچت هيج عزا يمه شهلأحراج يعني بنصهم كلهم واكول موافقة !! 

-قاسم: اي جُمان شنو ردج ؟

نزلت راسي يمه يمه منين طلعتي بهاي الحچاية وگدامهم هو وقاسم صخاام ..

-جميلة: ياااع شو نبلع لسانها الفرخة 

صرت ارجف من الخجل موقفي ماينحسد وبنصهم كلهم هسة لو اني وياه والحجية بيها مجال بس بنصهم عزززا عيييييبب ..

-قاسم: ولج منيرة گومي هزيها گرصيها شوفيها شبيها فصل يمها النت 

-جميلة: يگلك السكوت علامة الرضا 

-عوف: الفاتحة 

گالها بدون ما أرد وكلهم صاروا يقرون بيها انحصرت ضحكة وخجلانة بنفس الوقت صرت اقره بيها بداخلي بعدني ما مخلصة قراءتها فزينا كلنا وطفرنا طفرة وحدة وصرخة وحدة علىٰ صوت أنفجار هز البيت هززز انذهلنا وانرعبنا من قوتة طلعوا يركضون نريد نطلع محد تخبلوا عافونا وطلعوا سريع ماسمعت غير العوف وهو يصيح بصوووت عالي رجف گـلبي  وأهتزت روحي منه ...