رواية مال الكنزي للنزهي الفصل الرابع بقلم محمد الخواجه
مراد: مفاجأة إيه
عبدالرحمن: وأنا بجيب أبو نوسه لقيت الستات والعيال دي عنده جبتهم معايا والمفاجأة هتعرفها من الورق
مراد: احجزهم وهاتلي أبو نوسه ونوسه بس استنى خرج أماني الأول من غير ما حد يشوفها
عبدالرحمن : تمام
مراد: تعالي يا سارة
سارة: البت دي صادقة يا فندم مش كدابة وأنا بقترح حاجة تاني لو حضرتك تسمحلي
مراد: تلبسي نقاب وتكوني معاها صح؟
سارة مبتسمة: مظبوط
مراد: جسمك هيفضحنا ومفيش دلوقتي واحدة بتزق واحد أو واحدة على كرسي خلينا على خطتنا نقاب وترقبي من بعيد
سارة: تمام يا فندم استأذن أنا
مراد: اتفضلي وخليكي معايا على الفون تكوني جاهزة في المعاد زي ما سمعتي
سارة : تمام
تخرج سارة ويأذن مراد بحضور أبو نوسه ونوسه معًا
تدخل سيدة متوسطة الطول سمينة الصدر والأرداف
لا نعرف لون بشرتها من كم دهانات الميكب المضروب التي تستعمله ومن خلفها رجل يبدو عليه أنه في السبعينات من عمره.. يقفان أمام مراد في رعشة وخوف يتلفت كل منهم للآخر ويقطع الصمت الملازم أول عبد الرحمن حينما دخل وجلس ووضع ورقتين أمام مراد وبدأ مراد الحديث مبتسمًا
مراد: ملكش سوابق يعني زي ما الناس بتقول وبعدين سنك 51 سنة متكهن ليه وعامل نفسك في السبعين
الاسم :عبد العظيم محمد عبدالعظيم
مواليد : 22/3/1969 ((51 سنة))
محل الإقامة: شارع أبوبكر الصديق /المطرية
متزوج
وريني ورقة نوسه
الاسم : نفيسة صابر عبدالله
مواليد:11/6/1985 ( 35 سنة)
محل الإقامة : 15ش مغلق الخشب /الشرابية
متزوجة من عبدالعظيم محمد عبدالعظيم
عبد الرحمن : المفاجأة ههههههههههه
مراد: يخرب بيت أبوكو يعني إنتو مفهمين الناس إنها بنتك وهي مراتك ليه يعني
يقف أبو نوسه يرتدي بنطلون قماش رمادي واسع جدًا قميص قماش مربعات واسع أيضًا يبدو أنه ليس ملابسه نظارة كعب كوباية دقنه كبيرة بيضاء بعض الشيء وهاشة يرتدي طاقية بيضاء على رأسه.... يدعي أنه غير قادر على الوقوف لما فيه من أمراض ويتكهن
الإعياء
مراد : اقف عدل وبطل ممحنها بدل ما أقوم أظبطك
ياااسعيد
يدخل شخص ضخم الجثة لا شارب له ولا شعر
سعيد: أمر سعتك
مراد: فتشهم وطلع كل الي في جيبهم قدامي على المكتب
أبو نوسه : يا باشا أنا ماشي بس مراتي لأ
مراد بتريقة : سيد الرجالة والنبي.. هي جت على سعيد يعني ما هي مسجلة آداب واتحبست مرتين مرة 6 شهور تلبس في مسكن
والمرة التانية سنة ونص بس كانت اترقت واشتغلت في شقة
أبو نوسه: يا بنت الكلب بتضحكي عليا
مراد : وحياة أمك اتلم يا ابن الو... لأقوم أعلقك إيه هو إنت دكتور وإحنا مش عارفين. ما أنت ابن كلب متسول
وحرامي غسيل بس للأسف ملكش سوابق
يخرج سعيد من ملابس أبو نوسه
علبة سجاير Lm أزرق + ولعة + قرش حشيش بداخل علبة السجاير عدد 800 جنيه فئات مختلفة. موبايل جي تايد زراير وموبايل سامسونج جلاكسي s20
مراد : فتشها يا سعيد
نفيسة : باشا ممكن أطلع أنا الي معايا معلش ملوش لازمة التفعيص
مراد : وماله استنى يا سعيد...
تفك نفيسة زرار العباءة السوداء ويظهر من تحتها بجامة خضراء تفتح سوستة جرار البيجامة ثم تضع يدها في حمالة صدرها وتخرج عدد 6 صوابع من الحشيش ثم
ثم من الجهة تذكرة واحدة هيروين
وتخرج من جيب بنطلون البيجامة حافظة نقود ( بوك)
بها عدد 3410 جنيه وسلاح قطر ملفوف بشريط لحام
وضعت كل شيء على المكتب ثم وضعت الهاتف المحمول الخاص بها..
نفيسة : ده كل الي معايا يا بيه
مراد: وأنا مصدقك ..
أبو نوسه : باشا مش قادر أقف أنا صاحب مرض
مراد: لأ أنت صاحب برج سكني في شارع سليم الزقلة
وصاحب محلين في شارع الكابلات مأجرهم واحد كوافير حريمي والتاني سوبر ماركت. مفيش فلوس باسمك في البنك بس غالبًا فلوسك هتبقى في البيت بتاع المنوفية الي في مركز تلا هنعرف لما نفتشه بس مش ده موضوعنا
خليك واقف زي ما أنت
قوليلي يا نفيسة الحشيش ده بتاعك ولا بتاع جوزك
أبو نوسه: وربنا ما أعرف عنه حاجة يا باشا
مراد : طيب خلينا متفقين إنك لو اتكلمت تاني من غير ما أكون بسألك هخليك تندم على اليوم الي اتعلمت فيه الكلام..
ردي يا نفيسة
نفيسة: بتاعه يا باشا بس أنا الي ببيع عند بحر مسطرد (ترعة الإسماعيلية) في نصبة شاي هناك بوقف عندها ربع ساعة أبيع الشغل وأتكل على الله لا من شاف ولا من دري
(يرن جرس هاتف مكتب مراد)
مراد: الوو أيووه تمام أنا جاي حالًا
مراد: عبد الرحمن بيه يفضلوا كده حرف ( أ )
لحد ما أخلص اجتماع وأجي
عبد الرحمن : تمام يا فندم
يخرج مراد من مكتبه يمشي قليلًا في الممر ثم يفتح الغرفة المطلة على جهة اليمين وهي إحدى غرف اجتماعات القطاع
غرفة كبيرة بها ترابيزة اجتماعات تتسع إلى 14 شخص لونها بني كراسي جلد أسود أمام كل كرسي ميكروفون بسيط يوجد أكثر من شاشة عرض في الغرفة الغرفة مغلقة بستائر تمنع خروج ودخول الضوء
يجلس على الكراسي 4 ضباط مجهولين الاسم والجهة لمراد أمام كل منهم فنجان قهوة يجلس مراد على كرسي بداية الترابيزة ثم اثنين يجلسون على اليمين واثنان على اليسار ويبدأ مراد كالعادة الكلام
مراد: مساء الخير يا بهوات مقدم مراد الخواجة
أحد الضباط : رائد يزن بليغ مديرية أمن القاهرة
أحد الضباط : رائد حمزة خلف مديرية أمن الجيزة
أحد الضباط : رائد ساجد حسني شرطة النقل والمواصلات
أحد الضباط : رائد چورج الخواجة مباحث القاهرة
مراد : يا أهلاً يا بهوات إحنا محتاجين نتعاون لأن الموضوع بجد صعب وحرفيًا بدور على خيط في وسط محل قماش حرفيًا أنا لحد دلوقتي مكعبل في كم قضية مخدرات وتسول ترقيتي عقيد مرتاح
( ضحك الضباط)
چورج مبتسمًا: خلاص يا باشا نقفل ونروح ومبروك الترقية
مراد: ههههههههه ياريت... المهم محتاج منك يا ساجد بيه مراجعة محاضر ضبط المتسولين الستات الي سنهم كبير على مدار الشهر الي فات بس أو الشهر الي قبله وخلينا في الخط الأول بتاع المترو وعشان أنجز لحضرتك المعلومة أنا عاوز أعرف هل في شخص واحد بيجي يضمنهم ولا كل واحدة عندها واحد
الرائد ساجد: قصدك سعتك لو في اسم اتكرر أكتر من مرة لأكتر من متسولة
مراد : لو اسم واحد اتكرر مرتين اثنين بس أرجوك تبلغني بيه بسرعة
ساجد : أكيد طبعًا
مراد : جورج بيه بالتعاون مع يزن بيه محتاج تحريات واسعة ومكثفة عن الأشخاص دي الملف ده فيه صور وفيه البيانات في معلومة أنا تحصلت عليها وحاسس إنها ممكن تكون خيط كويس جدًا الصورة رقم 3 الي قدامك دي.. أيوه هي دي الست دي ساكنة في الخصوص ست ملاعبة على سنها ده.. كل الي قدرته أتوصل له دلوقتي إنها أرملة وعايشة لوحدها وكل يومين معاها شاب شكل أنا محتاج أعرف آخر شاب كان معاها..
مين مطلوب من سيادتك تاخد إذن نيابة باقتحام المسكن وتفتيشه حضرتك ويزن بيه ده طبعًا بعد ما نستأذن مديرية أمن القليوبية عشان مش عايزين حد يزعل مننا....
چورج و يزن : تمام
مراد : حمزة بيه محتاج من حضرتك تقرير مراجعة محاضر النصب الي تم فيها النصب على السياح خصوصًا الستات الكبيرة ولو مفيش محاضر رسمية محتاج أعرف الوقائع نفسها ركز على الأهرامات والفنادق الي حواليها
حمزة: تمام يا فندم
مراد: أي أسئلة؟
الجميع : لا يا فندم
مراد: ده رقمي يا ريت تبعتولي واتساب دلوقتي عشان نتواصل مع بعض كان نفسي أطول معاكم بس للأسف محتاج أرجع أكمل تحقيق.. بالتوفيق يا بهوات
((الجميع : شكراً)))
يخرج مراد من غرفة الاجتماعات ثم يعود إلى مكتبه مرة أخرى منذ أن خرج مراد لحين ما أتى مكتبه كان أبو نوسه ونفيسة واقفين على قدميهما
دخل مراد وجلس على كرسي ويجلس عبد الرحمن على الكرسي الموجود أمامه وينظر إلى أبو نوسه
ويقول..
مراد: قولي بقى حكايتك إيه وإزاي من حرامي غسيل لصاحب بيوت ومدير إدارة التسول في المترو عاوز أفهم
أبو نوسه : ممكن أقعد طيب
مراد: لأ لما يجيلي مزاجي أنجز حكايتك إيه من يوم اتولدت ولو تعرف أبوك وأمك اتعرفوا على بعض إزاي يا ريت تحكيلي أصلي بحب الحواديت أوي
أبو نوسه : أنا مواليد المنوفية مركز تلا أمي مكنش لها غير أخ واحد وأبويا مكنش له غير أخت واحدة
وأنا وحيد مليش إخوات وأبويا كان رايح جاي على السعودية بيشتغل هناك وفي يوم جالنا خبر إنه وقع من فوق عمارة من الي كان بيشتغل بنا فيهم
أمي كانت بتحبه أوي كان حنين الله يرحمه ومكنش بخيل بالعكس هو الي اتكفل بجوازة خالي من عمتي
جهز عمتي أحسن جهاز وساعد خالي كمان وبقى الإخوات واخدين الإخوات أيامها كنت في الإعدادية أمي مستحملتش موت أبويا وبعدها بسنة ماتت وهي في عز شبابها ومكنش ليا حد غير خالي وعمتي قفلوا شقتهم وجم عاشوا معايا في البيت لحد ما خدت دبلوم التجارة وخالي جابلي وظيفة في القاهرة بقيت ساكن في سكن المصنع وكل خميس أروح البلد وأرجع السبت وفي يوم حد من قرايب أبويا قابلني وسألني عن أحوالي قولتله.. وقالي :
الرجل: يا دي العيبة يا ولاد بتبقى صاحب طين وبيت 3 أدوار وأمك الله يرحمها عندها ورثها 10 فدان قرب الطريق العمومي وتروح تشتغل عند الناس عشان آخر الشهر كام ملطوش تاخدهم هو جرى إيه في الدنيا يا ولاد
أبو نوسه: ما هو خالي هو الي بيرعى أرض أبويا وأمي وفتحلي حساب في البنك وبيحطلي إيراد الأرض أول بأول في اسمي يا أبا الحاج
الرجل : بنك إيه وحساب إيه خالك وعمتك باعوا نص الأرض بتاعت أبوك وأرض أمك خالك باعها كلها وراح اشترى أرض كبيرة في شبين بيبني عليها برجين دلوقتي
أبو نوسه : إيه أنا مش فاهم حاجة
الراجل: يا ابني افهم عمك معاها عقد تنازل رسمي ومسجل في الشهر العقاري منك له عن أرض أمك
وعمتك معاها عقد تنازل منك عن أرض أبوك كلها
فهمت؟
أبو نوسه: أنا لازم أروح أفهم
يدخل أبو نوسه البيت وهو في عمره 19 سنة يجلس أمام خاله وعمته
أبو نوسه : أنت صحيح بعت أرض أمي يا خالي؟
الخال: أرض أمك وهي أمك كان عندها أرض؟
أبو نوسه: ١٠ فدان الي سابهم جدي عبد الفتاح وسابلك أنت ٢٠
الخال: أنت إزاي تتكلم معايا كده يا قليل الأدب أنت ده أنا الي ربيتك وكبرتك آخرتها تكلمني كده
أبو نوسه : أنت مكبرتنيش من جيبك ورث أبويا و ورث أمي والبيت ده بتاع أبويا الي أنت قاعد فيه ومربع أنت وعمتي وعيالكم وأنا بجي ضيف في الأسبوع مرة
العمة : هو جرى يا واد أنت في إيه
الخال: استني أنتي.. قصر الكلام أنت عاوز إيه؟
أبو نوسه : عاوز عقود الأراضي آخدها عشان أروح المحكمة وأنقل ملكيتها ليا
الخال: محكمة إيه لا وفر على نفسك المشوار أنت زي ما أنت قولت من شوية أنت هنا ضيف فعلاً
أنت بتعرف تقرأ طبعًا يا بتاع الدبلوم خد اقرأ
دي عقود التنازل الي أنت مضيت عليها ليا ولعمتك
عن الأراضي وعن البيت
أبو نوسه : بس أنا ممضيتش على حاجة
الخال: لا مضيت بس أنت الي حمار ومخدتش بالك وأنت بتمضي على فتح حساب البنك كان الورق ده معاهم وتحتهم وأنت زي اللطخ مضيت أنا كنت مستنيك تكبر عشان يبقى كله قانوني ولما تميت 18 مضيتك.. ما هو أنا مش هسيب أرض أبويا تروح لعيل زيك يضيعهاااا
وأبو نوسه : وأرض أبويا كمان كانت ورث أبوك
الخال: لأ دي بقى مع عمتك مش معايا أنت حر أنت وهي
العمة: وهي جت عليا يعني ما هو أبوك كان أخويا مش أحسن ما تروح لحد غريب
أبو نوسه: انتوووو إيااا مفيش دم ولا دين عندكم تسرقوني عيني عينك كده وكمان بجحين يا ولاد الكلب يا ولاد الكلب..
(اتلموا عليه الخال والعمة وعيالهم وضربوه)
الخال: كفاية كده اسمع ياض أنت أعلى ما في خيلك اركبه وملكش عندي حاجة والبيت ده متخشهوش تاني
أبو نوسه : والله لأسجنكم والله لأوديكم في داهية يا حرامية يا ولاد الكلب يا أبااااا الحقني يا باااا شوف عملوا فيا إيه خالي نهش لحمي يا أميييي
((((((( موبايل مراد يرن)))
مراد : يزن بيه إيه الأخبار
يزن : إحنا جوا الشقة وفتشناها وفي حاجات يعني غريبة مراد : زي إيه
يزن : هقولك.........
