رواية سواد الاثمد الفصل الخامس بقلم نورس
وصلت نهاية الشارع صعدت التكسي الرجال مستغرب
صحت :- بسررررررعة عمو امشي
من شاف حالتي خاف ما رضى يحرك خبصته خبص گتله اختي بالمستشفى خابروني حالتها حرجة حتى بجي بجيت عاد يلا قبل ومشت السيارة
رجعني للمستشفى حاسبته عالكروة وصار عندي باقي دخلت أسواق جبت نمنميات لنورجان ورحتلهم
لگيت ماما كاعدة على كرسي كبال الغرفة ومدنگة وجها بين اديها وگفت كدامها :- صباح الخير يوم
باوعتلي عيونها مغورگة وجها عبارة عن قطعة حمرة
شدن :- صدك تحجين بان ؟
عقدت حاجبي :- شكو
- من الفجر ولهسه وين جنتي
- اشتريتلكم
حجيتها ورفعت العلاگة اشوفها ضلت ساكتة
وعينها بعيني بسرعة درت وجهي عنها ومشيت
.. داخلة اشوف نورجان
- شلون صارت تويتي
اجت وراي :- مو دا احجي وياج وين جنتي
- جوة أفتر
- لتكذبين بان نزلت دورتج گلبت المستشفى ملگيتج احجي وين جنتي
- جنت برة
احجي وياها واني منطيتها ظهري ملتهية اگلب بالعلاكة ادري بيها ممصدگتني ، انتبهت لنورجان عيونها تباوعلي بشك غمزتلها وانطيتها حلوياتها خليتها بحضنها
جانت الممرضة دتفتر تجيك وضع المرضى وصلت
يمنا عفتهم وطلعت انتظرهم برة اجتني ماما
لزمتني من عكسي وتقربت تحاول متطلع صوت بس جانت منفعلة :- من الفجر ولهسه بالتلث ساعات شجنتي تصخمين احجي وين جنتي
لزمت ايدها وخرتها بهدوء
- على كيفج أعصابج
- أحر ما عندي أبرد ما عندج شنو تطلعين كل هالوقت ومتگوليلي ألف فكرة وفكرة اجت براسي لج شنو انتِ ميهمج أحد مفكرتي بينا اني واختج مضل أحد مسألته عليج أفتر مثل المخبلة
بست خدها وحجيت أهديها :- حقج وآسفة مجان المفروض اتأخر هيج بس اختنگت من جو المستشفى والمرضى والجو جان حلو ضليت أفتر بالحدايق البرة
جرت نفس :- يماما موتيني خوف وكلام الله بعد لتعيديها وتخلين گلبي معلك وراج
حضنتها واني مبتسمة :- اوي شدونة شدعواج كلها فرة
- ماريد أعيد الگلته بان
- حاضر
عافتني وراحت لنورجان
شوي ورجعت لازمة راسها
شدن :- بان عينج على اختج رايحة اجيب كوب چاي راسي حيطك من البارحة منايمة
راحت وبقيت واگفة صافنة بالناس رايحة جاية
الدكاترة والممرضين يفترون وكت دوام جايبين حادث وصايرة خبصة ناس تركض وناس تصيح
من بين الهوسة لمحت كامل واكف ديحجي وي واحد من الممرضين وكع گلبي رحت يم نورجان حتى ليشوفني
نورجان :- شبيج ؟
- مبية
- الصدك بان بيناتنا وين جنتي قبل شوي
- مخنووووكة وطلعت اشتم هوى ادري ابتليت خما ابتليت ليش مدا تصدكون
اجت ماما استعجلتها :- يلا ماما خلي نطلع بعد مو صارت زينة
- يلا اني هم لعبت نفسي من ريحة الديتول
سوينا خروج وطلعنا بسرعة اخذنا تكسي درتلها :- وين رايحين ؟
- للشقة
- مو تگولين فارغة
- اوصلجن وارجع لبيت ناهدة اجيب جنطنا منهم الفلوس بقت هناك خاطر اطلع اجهز كم شغلة للشقة مؤقت بين منستقر
- لترحين ماما
- فلوسي كلها هناك شلون ما اروح
- خليها باجر
- الشقة باردة مينگعد بيها اقلها فراشات ننام عليهن احسن ما يكتلنا البرد
ضليت احوص وبين عليَّ بسرعة باوعتلي :- شبيج بان ملحتج دتلعب الفار بعبي اذا اكو شي احجي
- مبية
سكتت مني الطريق كله على أعصابي وصلنا للمكان نزلنا گبال عمارة كبيرة صارت ماما كدامنا واحنا نمشي وراها وصلنا للشقة جانت بالطابق الثاني فتحتها ودخلنا
صدك جانت فارغة وأرضيتها مرمر كُلش باردة
الصالة مفتوحة عالمطبخ منطي مساحة واسعة للشقة وغرفتين وحدة منهم صغيرة وملحقاتهم ..
جانت اكو قنفة متوسطة الصالة گعدنا عليها
قبل لتروح وصتنا منطلع ومنفتح الباب لأحد
شهربان :- لويش منروح وياج
- ماريد تتصادمن ويه الناقص غيرة ذاك اجيب غراضنا واجي بسرعة حتى نطلع سوية نتغدة ونشتري أثاث
راحت ضليت لازمة گلبي مرت فترة واني ألوب بمكاني نورجان متمددة ومغمضة دايخة شافتني اروح واجي كامت گعدت لحيلها وتباوعلي مضيگة عيونها
- بان شبيج ولتگولين مبية شي احجي شضامة
فركت ايدي واهز برجلي مگاعد استقر ..
حجيت بسرعة :- رحت لبيت كامل كسرت سيارته وضربت مرته
ضلت صافنة بوجهي :- ها ؟
- والله شبيج
- شلون يعني ضربتيها مدا افتهم
حجيتلها بشكل مختصر وكفت امثل الها الصار :- شلت الطابوكة هيج وهفيتها عليه صارت مرته كباله اجت براسها
شهگت بفزع :- عليج الله ؟ وخليتي ماما تروحلهم هسه
- لعد شسوي مكدرت احجي خفت
- هذا كله السويتيه وخفتي ؟
- شفت كامل بالمستشفى اللي جنا بيها
- عزة بعينج
- اهووو دبريني نورجان شلون هسه خاف يلزمون ماما
- انتِ الكلفه مدبرتيها ترديني اني افكرلج بحل دبري روحج بروحج شمعرفني بهالسوالف اني
- واني المن سويت هيج غير علمودج
- فاشخة مرته يا بشرر دتگولين عفتيها دمها بطولها يجوز المرة ماتت وخليتي ماما تروح برجليها عليهم
گامت من مكانها منفعلة جرت قمصلتها تريد تلبسها لزمتها :- وين رايحة ؟
نترت ايدي :- معليج وخري
بعدنا نحجي انفتح باب الشقة ودخلت ماما بعيونها الحيرة وكفنا اثنينا مصكوكات منتظراتها تحجي
شدن :- ما هم بالبيت بابهم مقفول
كعدت عالتخم طلعت تليفونها وتگلب بيه
شهربان :- عليمن تتصلين
- على ناهدة دا اشوفها وين
- عوفيها ماما
- شنو العوفيها شبيج بان اگولها المؤخر كله باقي بالجنطة مال ملابس اجيت بحال الموبايل وهالـمية ألف بجنطتي ربج المستمسكات جايبتهم وياي
اتصلت اكثر من مرة يطلع رنين بس ماكو رد ضلت تاكل بروحها عالفلوس وكل شوي تتصل بناهدة ونفس الشي
گعدت يمها لزمت ايدها :- بس اليوم ندبرها شلون مجان والباجر روحيلهم
- ما گدر ماما العصر هم ارجع امرلهم بلكي راجعين ايدي مربطة بدون الفلوس كُلشي مدا اگدر اسوي
نورجان :- تمام هذا هو خليها للعصر اگعدي ارتاحي وجهج صاير أحمر
- من هبطة لهبطة نعلعلة روحه هالسز
باوعتلنا :- جوعانات يأمي ؟
- اي والله فطسنا
- اكو مطعم وجبات سريعة نهاية الشارع حنزل اشتري منه شنو تردن ؟
گنالها طلبنا وراحت باوعتلي :- شلون هسه بان مناوية تگوليلها
- ما ادري
سكتت صفنت شوي افكر باوعتلها :- رقم شبير عندج ؟
- عندي صفحته مال فيس
- انطيني موبايلج
اخذته منها طلعت صفحته واتصلت عليه ماكو هم ميرد
دزيتله رسالة طويلة حاولت اختصر بيها اللي صار رجعت ماما جايبة الأكل وگعدنا ناكل ..
اباوعلها مهمومة عين علينا وعين عالموبايل منتظرة اتصال من ناهدة شلون اصارحها بلة للعصر كالت راح اروح الهم چلبنا بيها اني ونورجان إلا نروح وياها
وصلنا التكسي لباب بيتهم جان عليه قفل
تخصرت وتباوع بالشارع بحيرة
شدن :- هسه شلون ذولي وين راحوا
شهربان :- ماما يمكن باكونا ؟
- اي هي عايزة حتى نديح رسمي
- تلگيهم شافوا فلوس هواي عدنا وطمعوا
- متسويها ناهدة صاحبتي صار سنين واعرفها
- و زوجها ؟
وگفت صافنة زادت حيرتها ونورجان تباوعلي بلوم راحت دگت باب الجيران طلع رجال سألته على ناهدة
كلها :- الصبح اجت بنية فلشت سيارتهم وكسرت بيتهم وفاشخة زوجة كامل براسها وشاردة
لزمت گلبها :- عزززززززة وبعدين
- وكعت المرة من طولها وشالوها نقلوها للمستشفى وبعد ما اعرف
كامت ماما تلوب واني عيني بالرجال بس لا يتعرف عليَّ مخلية الكبوس على راسي وسادة السحابة لفوك شفايفي حتى ليبين وجهي صرت ورى ماما ما أبين
يباوعلنا ويرجع يكمل لماما سألته على عنوان المستشفى انطاه الها تشكرت منه ومشينا للشارع العام گامت تلوب تريد تروحلها ..
شهربان :- ماما شعدنا رايحين خيولون فوك الصار
- صديقتي بان اريد اشوفها اطمأن عليها
- صديقتج الدتحجين عليها زوووووجها تحرش بنورجان رايحة دتواسيهم على يا أساس
غورگت عيونها :- گلبي يوجعني عليها والله معليَّ بزوجها هي مشفت منها شي مو زين
- لتخافين هي أخس منه
بعدنا نحجي وكعت نورجان بالكاع دنكنا عليها نشوفها لازمة راسها دايخة كوة مفتحة عيونها وماما تحجي وياها بخوف
- شجاج أمي
نورجان :- دخت
حجتها وبجت ماما من الغصة البيها بجت على بجيتها
- شبيج يا عيني ادري اني منين أتلگاها كومي اخذج للمستشفى
- لا لا اريد اتمدد جسمي دا احسه مكسر
لزمت جبهتها تقيس حرارتها :- حرارتج مرتفعة
- خلي نرجع للشقة
- كومي حبيبتي انعل ابو المستشفى انتظرني بس دا اوكف تكسي
راحت وكفت على جهة باوعتلي :- الله ياخذج بان خاف هن كم حسنة لامتهن بعلاكة على هالجذب تلكين العلاكة انشكت واتطشرن
- يعني مبيج شي ؟
- لا بس الله عليج شوفيلنا حل بسرعة ادري انتِ عقلج ميشتغل بس وكت المصيبة وراها يعطل
- راسلت شبير بس نرجع للشقة احاجيه
- وشبير شيسوي
- يروح يتفاهم وياهم بسكوت بدون لتدري ماما ويجيب فلوسنا منهم ويجي
- وشبير بصفته منو حتى دتطلبين منه ومنو يگول راح يوافق
- هو گال اي شي تحتاجوه خابروني
- واحنا منخابره بس بالمشاكل
- اهووووو اسكتي كافي اجت ماما ارجعي تخربطي
رجعنا للشقة صارت دنيا الليل وضلينا لا أثاث ولا الفلوس راحت للشقة المقابيلنا دگت عليهم الباب طلبت منهم فراشات المرة من درت بينا جدد رادت تخلينا نبات عندهم بس ماما مقبلت
فرشنا بالصالة وحدة بصف اللخ ماما جانت حيل مقهورة على ناهدة وهم من جهة نورجان مسوية روحها مواتة ضلت مكابلتها الليل كله
كل شوي تقيس حرارتها وهاي رايحة شابعة نوم
كعدت ثاني يوم ماما ما موجودة لگيت نورجان مگابلة تليفونها
- لعد وين ماما
- راحت للمستشفى تشوف ناهدة
وردت تباوع بالتليفون گمزت بسرعة من فراشي مفزوعة :- شنوو شوكت راحت غير تگعديني
- شتسوين مثلا اذا منعتيها بعد راح تشك وتكعدين مثل الحبابة تسولفيلها السويتي يعني بالحالتين حتعرف
- شبير ما رد ؟
- لا ممتصل من البارحة
- هذا على حظي اختفى
ضليت اكل بروحي لحد ما انفتح الباب ودخلت ماما اجت كعدت عالقنفة مرجعة راسها ليورة وايدها على عيونها ..
حجيت مترددة :- شلونها ناهدة ماما ؟
باوعتلي وتنهدت
- ما هي ناقليها لغير مستشفى سألت الأستعلامات ما عندهم علم
- يعني مميتة ؟
- اسم الله عليش دتفاولين عالمرة
- هيج دا اسأل
- لا عايشة بس كالوا متأذية وصاير عندها فطر بالجمجمة
- حييييييل قصدي خطية
- انتِ اليوم مو طبيعية
- تستاهل يوم لرجلها الدوني
- ليصير گلبج أسود ماما ناهدة شذنبها هم انحطت كدامنا بموقف مينحسد عليه من وره زوجها الناقص
- واذا هي طلعت ناقصة مثله وصدگت كلامه
- شلون يعني
- يصيح بنتج هي الصاحتلي
- مراح تصدكه
- وليش متأكدة ؟
- صديقتي واعرفها تدري بسوالف زوجها من زمان تشكيلي منه ومن عينه الزايغة وحتى لو تصدكه فهالشي بس حتى لتطلعه كذاب كدامنا يبقى زوجها
- عابت الها ولزوجها
- ادري شنو هالحقد صار كم يوم عندها سوالف وضحك شگلب أحوالج عليها زوجها واحد بلا غيرة هي شذنبها
- انسيهم يوم الله يخليج شوفي نورجان من البارحة لليوم بس تتصفن كل ما اتذكر الموقف يقشعر بدني شحالها هي
- واني شلي بيهم يا ماما الي فلوس عندهم دا اخذها وادير وجهي خليهم نارهم تاكل حطبهم الفلوس الجوة ايدي خلصوا كراوي يا رايحة جاية
سكتت بس احجي بعد انفجر ٣ ايام واحنا على هالحال ماما متخبلة من هالسالفة تطلع لبيتهم تشوفه مقفول تسأل الجوارين محد عنده خبر عنهم تخلي وترجع
احنا نبقى بـالشقة الگبال شقتنا عايشة بيها مرة كبيرة وياها بنتها موظفة ومنفصلة عندها اثنين بنات صغار
نخلص الوقت يمهم حتى الاكل خطية تعزمنا ناكل وياهم حيل حبابة المرة بنتها اغلب وكتها بالدوام
تگول اضوج ابقى لوحدي تصيحلنا اني ونورجان نروح نگعد وياها وماما هم مأمنة تعوفنا يمها من تطلع
بالليل گاعدين بشقتهم وأقري بالبنات الصغار نورجان ويَّ المرة بالمطبخ يسون كيك وبنتها طالعة ويه ماما بشغلة مفهمت شنو لحد ما اجن محملات علاليك
كامن البنات على امهن وعيني بماما اللي تباوعلي وتبتسم خلت العلاگة كدامي عالطاولة وكعدن
شهربان :- شنو هاي
ضحكت شذى وشالت بنتها كالت :- الج افتحيها
- الي ؟
فتحتها جان بيها موبايل حديث بعده بالباكيت
باوعت لماما :- شنو المناسبة
- متعرفين اليوم شكد بالشهر
صفنت شوي بعدين تذكرت تأريخ اليوم حجيت بسرعة
- عيد ميلادنا
ضحكت وكامت باستني :- كل عام وبُني الجميل بخير
شذى :- كل عام وانتِ بخير بان ام المشاكل
- ظلمتيني
- والضابط الفشختي راسه ؟
- لأن فقيرة ورقيقة هيج تحجون
جانت نورجان واگفة تتسمع النا كالت :- ترة مو بس بان اليوم عيد ميلادها اني توأمها ترة هاي يسموها تفرقة
عايدوها كامت شذى للمطبخ وهاي اجت يم ماما تشكي
نورجان :- ترة ما اقبل هيج هم اريد هدية
- منسيتك تويتي الأصفر ولو جانت على گد الحال اصبريلي بس يصير بيدي اجيبلج اللي بنفسج
حجتها وانطتها علاكة صغيرة بيها ميكب واكسسوارات وهاي طارت ليكول هي الجابولها موبايل تموت على هيج سوالف كعدت تفتح وتجرب على ايدها
كمت كعدت يمها :- ماما ..
ردت عليَّ وعينها على نورجان الابتسامة مفارقت وجها
- ها ماما
- الموبايل شلون جبتيه مو معدنا فلوس
- تداينت من شذى مؤقت بس لبين ما اجيب فلوسي من بيت ناهدة
- مجنتي متوازية عليهم جان عفتيها
- شلون يصير اني ولا سنة فوتت يوم ميلادجن حتى لو ما عندي شي انطيه الجن اشلعلجن عيوني
حضنتها حيل لمتني بحضنها وباستني حسيت بغصة ..
نسيت السويته والتهيت بيومها وياهن جايبات كيك جاهز غير السوتها ام شذى ونورجان وگعدنا كلنا نحتفل مشغلين اغاني والجهال تفتر وتصفك داير مدايرنا
نزلت ام شذى للأسواق تجيبلنا عصاير ونمنميات شوي واجت وجها مخطوف كالت :- لج عيني ام بان هذا شرطي واكف گبال شقتكم ديسأل عليكم
طفرت ماما بسرعة اتحجرت بمكاني وعيني اجت بنورجان اللي انخطف لونها بدت الأفكار والاحتمالات تتجمع براسي ، بس لا ناهدة ماتت وجايين ديسجنوني
تأخرت ماما طلعنا وراها جانت كاعدة كبال الشقة
لامة رجلها لصدرها ومدنگة راسها ..
ام شذى :- ها يوم شراد منج هذا الشرطي
رفعت راسها تتصفن وجها اصفر
ضلت ساكتة وعينها صارت عليَّ
- شجاج حبيبتي شصاير وجهج مخطوف
شدن :- ليش هيجي بان ؟
دنگت راسي مرديت كملت كلامها :- ليش تكيفين على شلاع گلبي قصرت وياجن بشي تردين ترجعيها بيَّ لان تزوجت العقيد لو شنو
- لا انتِ معليج هاي سالفة ثانية
- شنو بلة السالفة الثانية
غورگت عيوني همست :- تحرش بيَّ اني هم ماما
- وليش ما اجيتي كتيلي برأيج راح اسكتله
- شفتج من تحرش بنورجان مسويتي شي تصرفت من عندي
گامت عليَّ لزمتني من شعري تصيح وتضرب بيَّ
شذى وامها لازماتها يردنها تعوفني انهارت كامت
تبجي كعدت بالگاع تبجي بصوت عالي ..
ام شذى :- هسه غير نفتهم شكو خبال هو وكعتي للبنية ضرب
- فاتحين بينا محضر تحقيق يوم وين انطي وجهي تالي وكت افتر بيهن بالمراكز
- عزززة بعيني ماليش
- زوج ناهدة مولي للمركز ومقدم شكوى علينا اني والبنات عأساس هاجمين على بيتهم وضاربين مرته يردوني باجر الصبح اروح للمركز الشرطي هذا الصبح هم جاي بس محد جان بالشقة مخلي ورايح وهسه رجع ديبلغنا
- عزة بعينه هالبلا غيرة فوك صخام وجهه النوب ديتبلى عليكم
- ياريت لو يتبلى العينتين العندي صدك رايحة لبيتهم مكسرة سيارتهم وضاربة ناهدة وشاردة بس هو اني الثولة المفروض من يوم مكالي جيرانهم بنية هادة عليهم اعرفها انتِ
عدلت شعري مهلسته بيدها :- يستاهلون وممتندمة ولو يرجع بيَّ الوكت اعيد السويته
- هاج شوفي الصلافة وتلوميني من اضربها
شذى :- وهسه شراح تسوين
- ما ادري والله احس ايدي ورجلي مربطة ياربي وين جانتلي هاي
دخلتنا ام شذى لشقتها وگعدت تلومني عالسويته
ماما اخذت تليفونها وفاتت لشقتنا مدري تخابر منو
خلصت الليل كله هيج كل شوي يدك التليفون
وتركض للشقة ترد وتطول يلا تجي ..
ما انكر جنت خايفة من الراح يصير وخاصة بعد مشفت ماما منهارة اجت للشقة كعدت تبجي وتشكي للمرة
شدن :- خالة مديقبل يتنازل يريد تعويض مني لو يهددني يسويها محاكم ويروح يقدم تقارير مرته الطبية ويجرجرون بنتي لمحكمة الأحداث
- أيا چلب شنو من يا ملة هذا
- خسيس يدور ماديات براسي هو اني روحي ممدبرتها منين اجيبله
- وفلوسج البقت عندهم ؟
- يكولي مالج شي يمي راح احسبه من مبلغ التعويض وكمليلي الباقي
- شوف شوف الحيوان فوك شينه گوات عينه يدري بيجن بس نسوان لا حول ولا قوة يريد يستغلجن
- دخلي يطير هالغيرة سز خابرت طليقي گال اني جاي اشوف الموضوع واتصرف وياه لترحين ولا تتحركين لمكان لحد ما اجي
شهربان :- خابرتي فدار ؟
باوعتلي خزرتني ونترت
- انتِ بالذات متفتحين حلكج كلمة زايدة اكوم اطلع ضيم گلبي كله بيج
خليت وكمت للشقة ضايجة لحگتني نورجان مكيفة
نورجان :- راح يجي فدار وضباطه يحلوها
- وشدعوة هيج فرحانة
- راح نخلص مو صارلج كم يوم تهمين
- شنخلص فلوس المؤخر وانبلعت حتى لو خلصنا من سالفة كامل مراح نخلص من الفگر
- عزة يعني راح نطلع من طبقة المثقفين الأرستقراطية
- باع حظي
- لا عفية بان شلون نعيش لعد ماما لهسه ملاگية شغل
- شمدريني خلي فدار وضباطه يحلوها عود
- ابتلوا بينا ذول كل مشكلة تصير ويانا يصيرون بوجه المدفع
فرشنا بالگاع ومددنا عيني صارت بالسگف .. تحسرت
فتحت عيوني الصبح صوت ماما تخابر اسمعها تكله
شدن :- اي بهذا الشارع .. تمام هياني نازلتلك
سدت التليفون وكعدت تلبس بحذائها مستعجلة باوعتلها :- وين رايحة
- فدار جوة
حجتها ونزلت تركض گمت غسلت لميت شعري شلته كعكة لبست الحفاية وطلعت من الشقة صارت بوجهي شذى مبدلة رايحة لدوامها ابتسمت بوجهي
شذى : صباح الخير
- صباح النور
- بان فداوتج ميمي عندها املاء بس راجعيلها وامي حضرت الريوك منتظرجن جوة صيحي نورجان وتعالوا
- بعيوني روحي لتهمين
- فدواتج
دزتلي بوسة ونزلت اللخ هم مستعجلة على دوامها
الباب جان مفتوح دخلت صحت محد موجود فتت للصالة طلعت خالة ام شذى من المطبخ صبحت عليها
- يلا يوم وين صرتوا الريوك جاهز
- خالة العقيد اجه
- بلي امج جانت يمنا انطتني خبر حنستقبلهم هنا شقتكم فارغة زحمة وين يگعدون
رحت كعدت نورجان ورجعنا لأم شذى تريگنا بالمبطخ احنا والجهال الصغار ماما وام شذى بالصالة يم فدار والوياه صوت رجال غريب يحجون ما كدرت اميز لمنو
اجت ماما اخذت صينية الچاي رحت وراها وكفت على مسافة اباوعلهم ، جان فدار كاعد متوسط الصالة على يمينه شبير وياهم واحد معرفته منو
واگفة متخصرة رفع راسه شبير شافني ابتسم وهز راسه وكمل نقاشه وياهم بنهاية حديثهم كام وگف يوصي ماما ويطمأنها ..
فدار :- سالفتو يمي هذا لتهمين يبا
شدن :- بس بناتي طلعهم من السالفة فدار ماريد ينجاب طاريهم بالمراكز
-هذا هو التردينو يجرالج
- فدوة لگلبك
- شبير انتَ ابقى هين شوف الجماعة شمحتاجين سابگينك احنا
شبير :- تدلل انتَ والجماعة
باوعله :- ردلي بسرعة لتتعطل زايد
- أمرك يالچبير
ضل واكف شوي عينه على ماما وهي ملتهية تسولف ويه ام شذى لحد منتبهتله أشرلها بعيونه ليبرة طلعوا اثنينهم
صار بوجهي شبير صاح :- هلا بالكلفه والما ينطم تهفه
- هلو شرشبيل
- يلا تمونين
- كذاب
- مالة الله صدك جذاب اخاف اعترض عالتسمية وتهفيني بطابوكة براسي
- شعجب الچلب مآب مو وياكم
خله ايده وره ركبته يطكطك بيها كال :- الجلب الخميس الجاي عرسو
فتحت عيوني :- احلف ؟
- وحگ طابوگاتج ادري اشنو من ايد عليج تجيبيها سنتر بالراس
- عليك الله صدك حيخطب شو بسرعة ذاك اليوم تتراكضون عندكم مصيبة بالأنبار
- هو صار طرف من السالفة رادوا يصلحون بين العشيرتين ويسدون الخلاف انطوا بنية من عندهم ووكعت براسو ابن الخايبة
- وقبل ؟
- شحدو يفتح حلگو ويعترض امو من جهة تنك فوك راسو تاتزوجو وخالي يريد يخلص من ملحتها اجتهم للحلك كلو انتَ تعقد عالبنية
- مبينة امه تخوف
- لا وين مرة فقيييييييييرة بحيث خالي شارد محافظات ميتزوج كدامها تاما يجرح مشاعرها الرقيقة
- عيع
- والله حگج صدك عيع
- شهالنفسية العندكم انتو الزلم تاخذون على نسوانكم اثنين وتلاثة
- انا هم كلت شنو اخذلي مثنى وثلاث ورباع واحطهن بـ بيتي اكابلهن واكعد اذا ما اطبكهن سبعة هيج الكيف ما يتعدل
- شمعنى سبعة
- مقسمهن على ايام الاسبوع كل يوم مخصصو لوحدة وكل اسبوع تتبدل الوجبة
- صريح
- لا أعجبج
- من هيج مترد من نراسلك صاير ازدحام يمك
- لا يولي هذا الاسبوع لازم عدة مطلكات حتى التليفون ما عفتحو عيد الحب بعد كم يوم وتعال خلص الميزانية مال هالشهر عالدببة والهدايا
- ادري مجبور
- شلون عجل يستاهلن النثاية
- گلبك يوسع الجميع الله يسلمك
- شعمل هن ينزتن عليَّ خانها حبيبها اجت لشبير طلكها اجت لشبير ضاجت من اخوانها اجت لشبير خطية وين ينطن وجهن
- ملاحظ مشاكلنا بس منكم انتوا الذكور
- والله صحيح هم الزلم گو***
- انتَ منهم ترة
- لا رجاءً لتجاوزين انا فحل بس ما بيوم جرحت مشاعر نثية عجل متدحكين فاتح گلبي للكل
اجت نورجان كالت :- هلو شُبيررررر
- دحك الراء يربك هلو فحلة
- أنثى رجاءً
- نثية يولي عجل مثل اختج الكلفه كاضبة الزلم متوليتهم موس وطابوك ادري شعامليلج
شهربان :- لو خوش أوادم محد يتقربلكم
- تخوفين والله
... 《 نورجان 》 ...
راحت بان جوة تقربلي :- شلونج الصفرة
- اني شقراء رقيقة مثقفة
- آخ قياساتي اشتاقيت لعيونج الصفر
- شوكت لحكت تشتاق
- هم صدك اختج ما عطتنا مجال بسرعة فينتلها فاينة
- شنو فاينة ؟
- مال مثقفين بعدها ما واصلتج شعرج اصفر عيونج صفر ادري بنية لو زردة
شدن :- تويتي الصغير هاي
اندار عليها وهي تفوت :- صدك شتنسيتي بيها خلصت علينا اللون الاصفر
- هاي بان باكت ألوانها
- عجل الكلفه فواينها سابقتها من زمان
طلعت بان تلف باللفاف على رگبتها كالت :- ماما رايحة ويه شبير ديفررني
باوعلها وأشر على نفسه مصدوم غمزلته
- اكعدي ماما عنده شغل خاله يريده
شبير :- انا كتلها ما عندي شي خطية ضايجة
نورجان :- مُمكن اروح وياكم ؟
- دحك الأدب دحك الذوق خما ذولاك الناس
حجاها وعينه على بان ..
قبلت ماما طلعنا وياه اول مصعد اندارلها
گال :- وين مفينة الكلفه
شهربان :- نروح لبيت كامل
- شعندج
- دنجيب فلوسنا منه الحيوان يهدد ماما يگلها مالج شي يمي
- يعني بوگة
- لأ احنا رايحين دنطلعه بواك بالمنطقة بس جيب وياك اثنين من ضباط خالك حتى الناس تصدك عنده شي
- اي بنت التطلك ضباط كاعديلج هم ما عندهم شغل وعمل بس بان وفواينها
- شدعواك عزيتهم عليَّ شو ضباطكم مطشرين
- ادري يشتغلون عندي قابل بنت الأوادم
- يلا هم زايدين أصلا انتَ وحدك تكفي وهو مهتلف بسرعة تطبگه بيدك وتجيبه نحطه بالچكمچة
- خرب عقلج شگد يحب الفواين
طلع تليفونه خابر اثنين من جماعته گلهم فزعة وانطاهم عنوان كامل همستله :- خلي يجوون بالزي مالتهم شبير
- تتشرط الكلفه
خلصت الطريق صافنة بالجامة بان وشبير يحجون بالسالفة ولا يمهم مصدگت اتخطى اللي صارلي يرجع ينعاد عليَّ نفس الموقف ونفس القرف
اضحك واسولف واشاقي وابين ممهتمة بس بعدني عايشة بذاك اليوم ، نزلت دموعي مسحتهم بسرعة انتبهت لشبير يباوعلي من المراية وعاقد حاجبه
وصلنا هناك دارتلي :- تنزلين ويانا ؟
- لا
- الزمه الج وانتِ اكتليه بالنعال فوخي گلبج
- لابسة نعال ؟
- شو بلة ..
دنكت تشوف شلابسة كالت :- لا حرامات اجيت بشحاطة خالة ام شذى
شبير :- اخذن بسطالي
- اي عليك الله انتَ الزمه واحنا كل وحدة تاخذ فردة ونوگعله دك
- اويلي الله شهالخطط الجهنمية انهجعن اثنينجن هنا وانا نازل اجيب الفلوس واجي
صاحت وراه بان خله ونزل جانوا اصدقائه واصلين قبله بسيارتهم تسالموا وراحوا لبيتهم دگوا الباب طلعلهم كامل اول بداية جانوا ديحجون عادي بعدها شبير باوع للشارع يمنى يسرى وجره من ياخته وفاتوا جوة
شهربان :- امشي نورجان
- اگعدي مو كال هسه اجي
- مراح يندل الفلوس
- هن بالجنطة غير
- لا يا جنطة ضميتهم بالدوشك مال جرباية
- عزة بعينج شوكت
- نايمات انتن شمدريجن بالدنيا طشت لو رشت سمعت ناهدة تحجي ويه الأملط تكله محتاجين كذا مبلغ ورادت تسحب من العدنا بالبوكة
- عزة بعينها وماما تگول متسويها
- تسويها وتسوي الأكبر منها متشوفيني ممتحسفة بيها الطابوگة لوما وحدة بربوقة مجان صارت ويَّ زوجها علينا وهي تدري بيه كُلش زين واحد ناقص
- صدك تحرش بيج ؟
سكتت مردت شوي ودارتلي الغصة بصوتها :- نورجان فتح عليَّ باب الغرفة واني ابدل والله اتذكر جنت سادته والتهيت انزع بملابسي درت وجهي لكيته واكف بالباب ديباوعلي يدري بيَّ ما اسكت بسرعة طفر
- حقير انفاسه القذرة لهسه تلفح بوجهي
- اكتله اليوم بالنعال والله وشاربه الأملط ميبقى بوجهه
حجتها ونزلت بسرعة للبيت ركضت وراها اريدها توگف ملحگت بيها دخلنا جوة لكينا جماعة شبير مسحولينه بنص الصالة واحد منهم مخلي رجله على اجتاف كامل
شبير متشخص بالبيت ايده بجيوبه ويفتر يباوع
اول مشافنه صاح :- انا شهترت يمصيبتي
شهربان :- الفلوس شبير گله خليه يطلعهن
كامل :- ما ادري بيييييهن والله هن اخذنهن وجايات يتبلني
داس ذاك الضابط على راسه خلاه يدنك وصاح بيه سكته
شبير :- اذا هيج عش يكولن بايگنا
صاح بخوف :- تبلي والله
- عجل مو انتَ مهدد ام النثاية عتاخذ منها الفلوس
- عبالي عايفتهن هنا بالبيت دورتهن ملگيت بجنطهن بس الملابس
شهربان :- كذاب بايگهن وضامهن
- ما ادرررررري بيهن والله سيدي مماخذهن بشنو أحلفلك
كام شبير من مكانه كال :- عجل نفتش وندحك الصدك من الجذب بس وداعة الرتبة العلى اجتافي اذا طلعن هين بالبيت اووووويلي بس الله يخلصك من ايدي
گاموا يفتشون شبير وصاحبه بالغرف واللاخ لازمه ماطله بالگاع ميخليه يتحرك كل شوي وزمخ بيه وجهه مدمة عينه مورمة أثر الضرب الماكله منهم
خفت وكشيت من منظره مشوهينه ..
طلع شبير تقرب من بان حجة بصوت ناصي :- الفلوس وينهم بان
- بالغرفة اللخ
حجتها وأشرتله عليها سحبها وياه ضليت بمكاني باوعت لهذا الضابط شفته عينه عليَّ غمزلي خليت وركضت وراهم
شبير :- شطلعت هاي يولي ضامة فلوسج ابيتهم ومبوكتهم
- عندك سجينة ؟
- اشنو خالي الكدامج ضابط لو شقاوة
طلعت من جيبها مكينة حلاقة سحبت الموس منها وشگت بيها الملحف مال چرباية جان الدوشك اسفنج شالت منه قطعة مربعة مكصوصة صايرة مثل الحفرة مسطفة الفلوس بيهن گامت تطلعهن صفنتنا
شبير :- دحك العرامة دحك عجل مو اكلج كلفه
- للضرورة أحكام
نورجان :- اموت واعرف شوكت سويتي هيج
- حقج مطفية غرگانة بالنوم
كفخني شبير على راسي :- الصفرة تعلمي عجل كلنا بايكة ألوانج كيدج هم بايكتو
لزمت راسي عافسة وجهي
- شمدريني
جابت جنطتنا خلت بيها الفلوس وطلعنا تقربت مدري شنو شاورت شبير وهو وگف اخذله صفنة عليها
شهربان :- لتباوع هيج ضلت بنفسي والله
شبير :- زحمة يولي رفجاني واكفين
اندارت الهم واحد منهم حجة :- شصاير شبير لكيت الفلوس
شبير :- اي يول طلع بايگهن ويكول تبلي
- يلا لعد نروح اخذ المقسوم
- اگف يول تاتعلمك مكينة الشارب شلون تزين شواربك
- شنو ؟
- معليك بس دحك وتعلم
راحت لكامل لزمته من شعره رفعت راسه هو رايح منتهي كوة مفتح عيونه طلعت المكينة وخرطتهن اله بسرعة صدك شواربه مهتلفات بسرعة اخذهن الموس
قبل لتوخر شو هاي لمي ايدج وانطي بوكس طفي عينه شبير صاح :- اهبدددددددة
وذول الضباط صافنين عليها كلهم
شبير :- ماكو غريب شباب اقدملكم بان مكينة تگضب الزلمة تهينه
- شنو من بنية يعينه الله الياخذج
- ما أسمحلك لك دحك هاي الأنوثة والرقة كلها
- يا انوثة شبير طفت عين الرجال بالقرآن هاي لو عندي ما تغمضلي عين بالليل
شهربان :- حنى يتوب ويبطل يباوع نظرة لبنية مو يتحرش بيها
شبير :- شفت يولي ظلمتها تاتعلمو يغض بصرو
- على هالحالة حتى احنا ينراد النا فد بوكسين معدلات
- تجرب حظك ؟
رفع ايده :- خابروني عندي شغل مستعجل اودعناكم
خله وراح باوع للثاني بسرعة كله :- بركبتي عوائل والعباس مع السلامة
حجاها ولحك صاحبه اندار النا
شبير:- الكلفه مشردة الزلم
طلعنا برة صعدنا بالسيارة كال :- انطرن هين هسع اجي
حجاها وراح رجع فات لبيت كامل
نورجان :- يا هذا ليش رجع
بان مو يمي ملتهية تحسب بالفلوس
خاف ناقصات اندارتلي بيدها شدة
- شوفي رجعنا مثقفات
هزيت جتف :- هلا هلا مو دا اكلج طبقة ارستقراطية احنا
بالربع ساعة يمكن وطلع شبير يعدل بملابسه اجه فتح باب السيارة جر بطل ووكف يغسل ايده انتبهت بيها دم انرعبت من شكله ، همست
- عزززة بان يمكن موته
- لا لتخافين العار ميموت
صعد للسيارة يباوعلنا :- ها يولن شعدجن تتهامسن
- كتلت الرجال مو
- لا بس صبغت الدنيا عليه أحمر واجيت
- شنو يعني
- مال مثقفين هاي انتِ همج شمعرفج بهالسوالف
- لا ترة اني مثقفة شوفيه الفلوس بان
غم گصته :- طاح حظك گلبي وحظ ذوقك
رجعنا للعمارة نزلنا وهو سلم وراح
صعدنا فوك شقتنا مقفولة رحنا لشقة ام شذى
ماما مو هنا كالت المرة اجه طليقها اخذها وراحوا
بان من عرفت انكلبت ١٨٠ درجة متحجي وي احد ومكابلة شقتنا وكاعدة لحد ما اجت ماما شافتها
شدن :- خيرج شو هنا
نترت :- وين جنتي ماما
- شنو هالأسلوب بان احجي عدل لا أكسر سنونج بحگلج
- ليش جنتي ويَّ فدار رجعنا ماما رجعععععنا لهالمعمعة من جديد
- صوووتج بنت الصخلة العالم منا شهرتينا
حجتها ودفعتها جوة الشقة فتت وراهن اختنگت تريد تبجي :- تعبتتتت افتهمي تعبت ماريد نرجع يمه والله هالمرة اسويها صدك وانهزم وما اباوع وراي
- لج شبيج امي تخبلتي اهدأي افهمي السالفة اول
گعدت بالكاع دموعها تنزل
- كلت هذا هو حنستقر ونعتمد على نفسنا بدون ليجي واحد متسلط يگوم يتأمر علينا سون ولتسون رجعتي ودخلتي فدار بحياتنا ورة ما ذلنا وطردنا من بيته
- خلصتي ؟
كعدت يمها اثنينهن منتجيات عالحايط :- رحنا للمركز دنكمل الإجراءات وفدار دز على اخوان ناهدة اجوا تنازلوا عن الشكوى عنها لأن متسجلة بأسمها الجلب زوجها مقدم تقاريرها الطبية وراد يحولها محاكم حتى ياخذ تعويض وفدار حل الموضوع من عنده حتى فلوسنا كال اني اروحله للبيت واتصرف وياه
نورجان :- ميحتاج ماما شُبير وبان سبقوه
عقدت حاجبها وباوعت لبان اللي التزمت الصمت ورة مسمعت كلام ماما ، حجيتلها الصار تخبلت وكعت علينا دك رزايل وخابرت شبير تعاتبه لان سوة هيج وطاوعنا
سدت التليفون وباوعتلها :- الج يوم تجلطيني بيه بان
شهربان :- مسويت شي جبت حقنا
انطتها الجنطة مال فلوس وگامت طلعت من الشقة
مر كم يوم فدار وشبير يتناوبون علينا ساعدونا بتأثيث الشقة واستقرينا بيها رسمي ..
جان احساس بان بمكانه العقيد رجع يحاول ويَّ ماما حتى يرجعها على ذمته بس هي صادته وهو ضايج من يومها بعد مشفنا وجهه شبير گال رد للغربية
رجع وراه شبير هم اختفى عرفته رجع للأنبار جان بين فترة ولخ يراسلني يسأل علينا ومصار بيناتنا حديث جانبي
لحد ما بيوم بالليل لكيته دازلي مقاطع فتحتهم جان بيها زلم وشباب تركص جوبي واغاني عالية ، حديقة جبيرة والمكان متروس ناس وكلها شوارب وصلعان يصيحون للأعمى شوفنا احنا ضباط
دازلي صور هواي لفتتني صورة لمآب وابوه بالزي العربي واثنينهم يضحكون ، طالعين يشگون متميز الابو من ابنه ركضت لبان بالصالة صحت
نورجان :- لج بان شوفي عمو فدار ومآب
جانت ملتهية تراسل بمحمد عافت من ايدها لزگت روحي يمها اشوفها ونگلب بالصور شافتنا ماما اجت گعدت من الجهة الثانية تباوع ويانا بصورهم
شدن :- شعندهم
شهربان :- عرس مآب
شهگت :- عززة شوكت هاي
- شبير گلي عرسه الخميس
فتحت مقطع واكفين شباب يرگصون چوبي
من بيناتهم شبير ومآب والخال فدار لازم راس
الچوبي ويفر بالسبحة طالع يخبل بالزي العربي
ماما تباوعله وايدها على صدرها
شدن :- يمة گلبي ديسوي بم بم بم
صدك يصفنون متدري تباوع لمنو واحد يكول للثاني اني احلى عيني جانت على شبير جان اضخمهم طويل صاحب چتف عريض بسبب عضلاته الدشداشة جاية قالب عليه والغترة مطلعته شكل ثاني
بان ما اهتمت كامت للغرفة وماما رجعت تتصفح بتليفونها ، دخلت لصفحته بقيت اگلب بالصور ملاته
ما اعرف شنو اليجذبني بيه بالضبط شكله لو اسلوبه
احب شخصيته احب اسولف وياه ويضحكني نمت ذيج الليلة والتليفون بيدي مطلعه صوره ، ولو ادري هاي جانت بداية الشرارة بيني وبين شبير جان طفيتها بيدي ولا خليتها تكبر وتحركني بناره
... 《 شهربان 》 ...
مر شهر حياتنا ماشية شقتنا مرتاحين بيها وبيت خالة ام شذى ماكو منهم صاروا عائلتنا الثانية ميخلص اليوم اذا منروحلهم لو هم يجونا نخلص اليوم سوة بس وكت النومة نتفارك
ماما عافت سالفة الشغل وگامت تفتر عالشركات الأهلية وتدور عالنت دتريد تشتغل بشهادتها بس مريحة نفسها مو مثل قبل فلوس عدنا مدبريها ومكفية
مخلصيها طلعات ومطاعم شبير بين فترة واللخ يجينا يشوفنا وبديت ألاحظ نظرات نورجان اله وهالشي مخوفني هاي فاهية بسرعة تنجرف وتتعلق
وهذا فد واحد ملعب بايع ومخلص ممخلي وحدة تعتب عليه وماريد اختي تصير ضحية عنده تحبه ويعشمها بحبه وتالي من يمل يتركها وهي ينكسر گلبها
بيوم اجتنا ماما الضحكة مالية وجها والوجه مورد
فاتت تغني لزمت نورجان ترگص وياها سلو وتضحك
شهربان :- خيرج ماما
وگفت اخذت شهيق زفير
شدن :- اليوم الدنيا ضاحكتلي
- شكو
- لكيت شغل
نورجان :- عليج الله صدك ؟
- وعيونك تويتي الاصفر وظفوني بشركة معروفة وراتب عالي وبدوام جزئي دا احس اريد اطير اطيررر
- شلون هيج
كعدت عالقنفة نزعت الوشاح من رگبتها انتبهتلها مخرمشة :- عزة ماما هاي شبيها رگبتج
- لج اسكتي غير تعاركت ويَّ الموظفة مالتهم ردت اقابل المدير علمود الشغل ومخلتني وتحجي وياي من ورة خشمها عجوز البلة نرفزتني عليت صوتي عليها أشو هاي گومي واهجمي عليَّ شوهت رگبتي وصارت هوسة
الموظفين كلها التمت لزموها عني گمت ابجي طلع مديرهم شافني ومن عرف بالصار فورًا طردها اخذني لمكتبه كام يتعذرلي وشاف الفايل مالتي وقبلني بسرعة
نورجان :- همزين لعد تعاركتي لوما العركة مجان حصلتي الوظيفة
- طاح حظج دشوفي رگبتي اتملخت ملابسي تشگگت ربج لابسة الوشاح غطة صدري
- شوكت تباشرين بالدوام ؟
- من الأحد الجاي بس عيني شلون ذوق شلون أخلاق هذا مديرهم حتى شكله صغير
شهربان :- اهووو بدينا
خليت وكمت صاحت وراي :- وجع شبيج بنت الصخلة دنمدح بأخلاقه للرجال
كعدت على جربايتي توني فتحت التليفون دك
رديت :- نعم منو وياي
محمد :- ها هيج الحجي ثگيل
- معرفت منو
- لا والله حتى صوتي صرتي متميزينه
- توكل ابني ما احجي ويَّ غربة
- ليش هيج لج شمسوي
- خاطر تتأدب مرة اللخ ومتدوس زايد بالحجي
- آسف
- ممقبول
- آسف تربيع
- توكل ابني لتبيع ملاتي عليَّ
- اشتاقيتلج والله افتحي كام دا اشوفج
- ما
- يلا لج
- ما تربيع
- حبابة
ابتسمت من سمعته غير نبرته فتحت كاميرا شفته واگف بالمطبخ :- شدتسوي
- دا اطبخ غدة شفتي ضال حال الضيم حالي وانتِ عبالج مخلصها ويه البنات
- كُلش سودة عليَّ
- علميني بلة شلون اسوي تمن
- شمدريني
- حلو دحنا لعد من اخذج منو يطبخلنا
- انتَ
- اني هم ما اعرف هاي أول طبة الي للمطبخ اكتشفت عدنا شغلات بالحياة نگدر نستعملها للطبخ
- شلون يعني
حجاها وشال مصفي :- شوفي مثلا هذا دوش مال حمام شجابه لهنا
- باع حظي محمد اطلع من المطبخ روح اطلب من برة
- خاست بطني والقرآن من اكل المطاعم اريد اكل بيت
- مو خوش سالفة
- مشكلتج بعد تتعلمين اليوتيوب متروس مقاطع
- باع هذا مصدك اطبخله دروح ابني روح
- ميخالف عيونج الخضر تستاهل اتعلم اني الطبخ واطبخلج هسه فضيني شسوي اريد تمن
- اول شي طلع التمن حطه بگدر
- حلو وبعدين
- حط عليه مي وعالنار وفضت راحت
- حتى گبل للمستشفى
- ليش ؟
- غير المفروض ينغسل
- اي صح اغسله بزاهي
صدك سوة الگتله عليه وكام يجيب ويخلي بهار ميعرف مال شنو ملح ترسه ترس اني وصيته گتله ترة يطلع فاهي عاف الگدر عالنار وراح تمشى للصالة
كعد عالتخم لابس فانيلة داخلية سودة جسمه معضل وشعره مخربط نازل كم خصلة على وجهه
- بان اريد اسمع صوتج
- مو هياني دا احجي وياك
- لأ غنيلي
- ما
- صوتج دافي ينسيني هموم الدنيا والبيها غني شو
- ماريد
- غني لج
فاتت نورجان تغني :- حمودي مو ابنا يشتغل ميجبيلنا عايف امه وخواته يشتغل لحبيباته
- كافي بطلت ماريد
اجت يمي تباوعله :- ها ابو البنات
محمد :- هلا تويتي منو جذب عليج وكلج صوتج حلو
- شفت بان لابستك كلت اني اتبرع اسمعك صوتي الرقيق
- هذا منو ضاحك عليج غير مزنجر
- رجاءً الا مشاعر الأنثى خلي عندك ذوق
- دمشي لج فايتة علينا مداهمة وتحجيلي بالذوق
- ترة غرفتي هم
- قطعتي لحظاتنا الرومانسية
- كُلش صدكتك صار ساعة تتوسل بيها تغنيلك اني بالمطبخ وسمعت صوت بجيتك كلت اجبر بخاطرك
- على طاري المطبخ دا اشتم ريحة حرك
حجاها وطفر بسرعة باوعتلي نورجان :- شكو
- بس لا احترك المطبخ
شوي واجه لازم الگدر بيده ورفعه يشوفني صاير اسود من جوة ضحكت ضحك :- بحححح ماكو غدة
- حقيرة تضحكين عليَّ بسيطة اني الج
- شسويلك هسه تطلع معلي النار مو گتلك اختصرها واطلب من برة انتَ عندت ميسوى صار ساعة تغسل بيه خلصت بطل الزاهي
نورجان :- زاهي !!
بوعتلها :- اي مو يغسلونه بزاهي ؟
غمت گصتها كلتله :- احمد ربك لعد من احترك تگوله زاهي حظي
محمد :- ها بان تردين تموتيني
- شمعرفني گلت الاعرفه
ضلينا هواي نحجي وياه كال هالأسبوع
راجع للعراق .. طرت راح اشوفه اخيرًا
- راح تگوليله بعنوان شقتنا
- ولويش ما اكوله
- عوفي هالسالفة بان مصدكنا نعيش مرتاحين تتذكرين آخر مرة اجانا للبيت شصار
- ذاك بيت فدار هذا بيتنا احنا ندخل اللي نريده
- وقبلها من عمو سالم عرف مكاننا واجانا متفرعن يريد ياخذنا وياه
- معليه هو هبة الچلبة رايحة مفتنة لعمج
- لو مشايفه يجينا مجان عرف البيت ماريد هالسيناريو ينعاد بان خلينا مرتاحين تعبنا والله من المشاكل
- خلص هذا هو مراح اگله
- وعد ؟
- شبيج نورجان انطيتج كلمة
- نشوف
خلت وراحت
مر الاسبوع رجع محمد من تركيا حاولت اشوفه بدون ما اخلي ماما تحس لان نورجان مفتنة عليَّ يمها وحذرتني من شوفته
بس مكدرت اصبر اكثر تواعدت وياه بمكان بعيد عن عمارتنا لبست وطلعت شافتني ماما
شدن :- وين بان
- رايحة لخالة ام شذى
- لعد ليش لابسة حذائج
- دا اخذ بنات شذى وياي للأسواق صدك اريد فلوس دا اشتري
سويت الوضع طبيعي هي هم مشكت لان متعودة دوم اخذ الجهال وانزل جوة اخذت الفلوس ورحت لشقتهم اخذت بزات شذى ونزلت كايدتهن كل وحدة من جهة
ابتعدت عن العمارة وعبرت الأسواق
هذن كامن ينگن يردون يشترون
وصلت للمكان اللي اتفقنا عليه ماكو ما هو ، طلعت تليفوني دا اتصل عليه سمعت رنة وراي درت بسرعة لكيته واكف ايده بجيوب القمصلة ومبتسملي
فتحلي ايده ركضت حضنته شالني عن الكاع كمت اصرخ :- نزززززلني يمررررض الناس منا لينتبه احد
محمد :- بانو الحلوة المشتاق لخضار عيونها
- هممم مبين صارلك بالشهر غاط
- والله مكدرت ذاك الأسبوع خابرتني هبة كالت رجعت سجودة للخليج بسرعة حجزت واجيت
- هيج مخوفتكم ؟
- داهية بان داهية مو مرة
- دتبالغ
- يجي يوم وتشوفيها وعود كولي تبالغ ولو انتِ هم ماخذة من اطباعها
- شلون يعني
- تحبين المشاكل
- ظلمتوني اني أنثى رقيقة فقيرة بس انتوا متصدكون
- مشفت من الرقة بس اسمها شو بله تعاي
- شنو
- دتعاي عاد
حجاها وسحبني باسني من خدي دفعته موخر حجيت بصوت ناصي :- الجهال ابن الزفرة
دفعني عنه وباعلهم
- منين ذول
- جهال جيراننا
- خما يفتنون
- لا محذرتهم
تقرب مني يعدلي بالقمصلة وبحركة سريعة خله العلبة بجيبي همس :- حباية وحدة باليوم بان
- افتهمنا كل مرة نفس الاسطوانة
- وجهج يگول غير هالحجي
- مرات اطبك اثنين
- بدة الكلان خرا ليش تخليني احرمج منهن
- لا لا حباب من سافرت العندي بسرعة خلصوا وضليت اكل بروحي والله گوة انام لتگطعهم عليَّ
- لعد صيري حبابة واسمعي الكلام
- هذا هو والله بس وحدة اخذ
12 تعليق
تكررت شوفاتنا اكثر من مرة جان يتعمد يحطلي كم حباية بالعلبة ميجيبلي كاملة حتى انجبر اروح اشوفه واني مثل الثولة معمي على عيوني منها ماريد ازعله مني وهم حتى اخذ منه الحبوب
بيوم عزمتنا خالة ام شذى عندها مسوية دولمة جانت الساعة بالـأربعة توها ماما راجعة من الدوام بدلت مال بيت ورحنالهم نتغدة يمهم ...
كملنا الغدة وگامت ماما هي وشذى يغسلن المواعين نورجان ملتهية ويه المرة تحب سوالف العجايز الكبار واني يمي الجهال اقري بيهم ، روحي بالدراسة
سمعت تليفوني يرن گمت دا اشوفه طلع هو
اخذته وتعديت من المطبخ استوقفني كلام ماما وهي تسولف لشذى ..
شدن :- هو خوش رجال للأمانة صاحب شخصية وكاريزما وابو الشركة خيره ساد عين الشمس حتى معاملته الي تختلف عن باقي الموظفين وكلها ملاحظة هالشي يكولون جان ميجي للشركة بالشهر مرة يلا ينشاف وجهه هسه مكابلنا وكاعد ديقصدوني عود
شذى :- يجوز الرجال صدك حبج وطالبج بالحلال مبيها شي
- وبناتي ؟
- انتِ لا اول ولا آخر وحدة تتزوج وعندها بنات وهو مأمنج كايلج بناتج يمج ما عندي مانع يعيشن وياج
ورة الزواج
- ما ادري شذى كمت اخاف من سلك الضباط من زواجي الأخير لعبت نفسي منهم متروسين عقد
- هم ضابط ؟
- اي شبيج مو دا اكلج ميلحك يحك راسه يا دوامه بالمركز يا الشركة مسلمها بيد ابن عمه هو يتصرف بيها
- انتِ انطي مجال لنفسج وفكري لتسديها بوجه الرجال فد مرة
- خايفة اقبل واتندم واخاف ارفض ويطردني وين احصل هيج شغل وبمكان زين وراتبه قوي
- والله ما اعرف شكلج بقت يمج بس نصيحتي لتتسرعين واذا متخوفة من سالفة هو ضابط ترة مو
كل أصابعج سوة طليقج شي وهذا شي ثاني
عفتهم يحجون وطلعت رحت لشقتنا رديت عليه
محمد :- وينج لجج
- شتريد
- لتنترين لا اگص لسانج
- مو كتلك معزومين تريد ماما تلگفني واتخزه
- انزليلي
- شجابك محمد روح لتسويلي مشكلة
- انزلي لج ترة اصعدلج والقرآن
سديت الخط ضليت اهز برجلي اجتني نورجان
نورجان :- شبيج طلعتي تركضين
- طمطميلينورجان عليج الله
- هم محمد بان انتِ متوبين
صميت حلگها :- لتصيحين خرب وجهج
- عوفيه خلي يولي
- بسرعة ارجع والله ما اتأخر
- لتروحين
- اذا منزلتله يصعد هنا مبية حيل اتلاغه ويه ماما حبابة
باوعتلي بحيرة گالت :- بس بسرعة بان
- طلقة والله
لبست حذائي بسرعة ونزلت جوة
الدرج سويته بايتين بايتين ..
خبصني بالاتصالات رحتله لكيته واكف بنفس المكان
جتفت ايدي لصدري ادفي روحي نزلت بملابس البيت خفيفة حتى ملابسه شي يدفيني وجان بيها هوى عالي
- شرايد محمد
اندارلي :- ألف مررررررة كتلج ما احب العناد
- لتصيح بوجهي
- واطيييييح حظج هم
سكتت جريت نفس ألزم اعصابي مدري شبيه متفرعن عليَّ اليوم حتى شكله غريب عيونه حمر وكل شوي يفرك براسه
- شبيك ؟
- بيَّ وججججع
باوعت داير مدايرنا حجيت من بين سنوني :- صوتك
ابن الزفرة الناس منا
- امشي وياي
- وين محمد صدك تحجي هو اني جاية بالختلات
ما رد عليَّ لزم ايدي وجرني وراه اصيح اريد ماكو ولا جنه يسمع وصلنا لسيارته صعدني وسد الباب وراح لمقعد السايق صعد شغل السيارة وحرك
- وين ماخذني محمد نزلني مو دا احجي وياك
شفته ابتعد وطلعنا من شارعنا تخبلت لزمت ايده اتوسله :- عليك الله رجعني والله هسه ماما تحس عليَّ
خبلني ولا اندارلي ولا جني احجي عينه بالطريق ويسوق سريع گمت اهز بيه واصيح تخردل بالسياقة
الا شوي انگلبت بينا السيارة داس بريك انخضينا خض وكف بنص الشارع
باوعلي عيونه تجدح صاح بصوت فززني :- بنت النعال تررررردين تموتينا
- رجججججعني يلا
محسيت الا بحرورة چفه وهو يطبعه بوجهي وخرت شعري لازمة خدي واباوعله عيوني تحرگني مصدومة
لزم راسه يفرك بيه كام مد ايده للچكمچة طلع ابرة وشيشة صغيرة تخبلت :- شنوووووو هاي محمد
- انطيني ايدج بان
كمت ابجي :- عليك الله لتسوي هيج
جر ايدي رفع الردان وضربني حسيت بنغزة خفيفة كمل وفركها عالخفيف كال :- راح ترتاحين...
