رواية تلميذ الجن الفصل الثاني والستون بقلم جمال الحفني
إذن دخلت المقبرة الخطأ!
فضلت واقف مكاني وأنا مش فاهم الجملة اللي سمعتها ولا عارف مين اللي بيتكلم من ورا بصيت لجرموق ومرهوب وأنا مستني واحد فيهم يشرحلي, لكن الاتنين كانوا ساكتين ووشوشهم متغيرة بطريقة مخلتنيش أحب أسأل حد منهم, وبعد لحظات طويلة اتكلم جرموق وقال بصوت واطي "احنا لازم نمشي من هنا قبل ما الباب يقفل"
وقبل ما أقدر أسأله ليه ظهر صوت تاني من جوه المقبرة وقال بصوت عميق "انتوا وصلتوا متأخرين قوي"
اتجمدت مكاني وبصيت ناحية الباب وسألت بصوت عالي, إنت مين؟
لكن مفيش رد جه غير صوت ضحكة قصيرة خرجت من جوه الظلام ضحكة متشبهش لا صوت الإنس ولا صوت الجن اللي قابلتهم قبل كده, مرهوب مد إيده قدامي يمنعني من التقدم وقالي "متسألوش أسئلة ملهاش لازمة"
لكن الفضول كان أقوى مني فقلتله, هو عارف إننا جايين هنا إزاي؟ وكمان مستني عشان يقولنا اتأخرنا!
جرموق رد وهو لسه مركز في الباب "لأنه كان مستني حد ييجي من زمان"
فجأة ظهر شيء في آخر الممر وسط الظلام كان مجرد ظل في البداية طويل ومائل بشكل غريب, وكل ما قرّب بدأ شكله يتضح لكن ملامحه فضلت مختفية, وقف على بعد خطوات من الباب وبص ناحيتنا من غير ما أشوف عينه أو وشه وبعدها قال "سلهب مش هنا"
قلتله إحنا عارفين..
رد بهدوء غريب "لأ إنتوا مش عارفين حاجة"
مرهوب تقدم خطوة وقال "إحنا جايين نعرف مكانه"
الظل سكت شوية وبعدها قال "المكان اللي بتدوروا عليه مش تحت الجبل"
جرموق قرب من الباب وقال "أمال فين؟"
الظل رفع إيده وأشار ناحية الأرض تحت رجلينا وقال "تحت المكان اللي خرجتوا منه"
بصيت للأرض وأنا مش فاهم حاجة وقلتله, يعني إيه تحت المكان اللي خرجنا منه؟
لكن قبل ما يرد بدأت القاعة كلها تتهز, والباب الأسود اللي وراه اتفتح أكتر, وظهر من وراه ممر تاني مختلف عن الممر الأول, ممر جدرانه مغطاة بطبقة جليد لونها أسود, وفي نهايته كان فيه ضوء أبيض قوي لدرجة إني اضطريت أغمض عيني, وبعدها سمعت صوت الظل بيقول "لو عايزين توصلوا لسلهب لازم ترجعوا"
بصيت لمرهوب وأنا مش فاهم حاجه وسألته, نرجع فين؟
رد الظل "لأول مكان وطأت فيه أقدامكم الأرض"
في اللحظة دي فهمت إن الطريق اللي جابنا للجبل مكانش مجرد طريق, وإن المقبرة اللي كنا واقفين عند بابها كانت مجرد جزء من لغز أكبر, وإننا يمكن من أول لحظة وصلنا فيها لسفالبارد كنا واقفين فوق المكان الحقيقي من غير ما نعرف, لكن قبل ما أقدر أقول أي كلمة الباب بدأ يقفل والسلاسل الحجرية بدأت تتحرك من جديد, والظل رجع خطوة لورا وسط الظلام وهو بيقول بسرعة قبل ما الباب يتقفل بالكامل
لو عايزين تفتحوا قبر سلهب, لازم تعرفوا الأول مين اللي حبسه""
فضلت واقف قدام الباب وأنا بحاول أفهم معنى الجملة دي لكن الصوت اختفى بعدها كأنه قال اللي عايز يقوله ومبقاش عنده سبب يكمل معانا!
بصيت لجرموق ومرهوب الاتنين كانوا ساكتين لكن المرة دي السكوت مكنش خوف ولا حيرة, كان واضح إنهم عارفين الإجابة وبيحاولوا يقرروا إذا كانوا يقولوهالي ولا لأ, فبصيت لجرموق وسألته أنت عارف مين اللي حبسه صح؟
فضل ساكت فكررت السؤال بإلحاح وصوت أعلى, لكنه فضل باصص للباب ومردش عليا وفي الأخير مرهوب هو اللي اتكلم وقال "مش كل حاجة اتقالت عن سلهب كانت حقيقية"
قربت منه وسألته يعني إيه الكلام ده؟
قال وهو بيبص للباب إن القبائل لما حكمت على سلهب بالحبس مكنتش بتدور على الحقيقة, كانت بتدور على حد تحمل عليه الذنب..
سألته ذنب إيه؟
لكنه سكت لحظات طويلة وبعدين قال "سلهب كان موجود في مكان مينفعش أي حد يكون فيه, وشاف حاجة مينفعش أي حد يشوفها, ومن اللحظة دي بقت حياته كلها جريمة"
بصيتله وأنا مستغرب وقلتله يعني إيه الكلام ده؟ إنتوا عارفين هو شاف إيه؟
رد جرموق بهدوء "لأ منعرفش, لكنه كان موجود في مكان محدش كان المفروض يدخله, وخرج منه بحاجة خلت القبائل كلها تعتبره خطر"
سألته, طب إنتوا عارفين مين اللي حبسه؟
فقال مرهوب "احنا عارفين إن القبائل السبعة اشتركت في الحكم عليه, لكن مين اللي أصدر الحكم, ومين اللي نفذه, وليه حصل كل ده, دي حاجات محدش فينا يعرفها!"
فضلنا واقفين ثواني طويلة وأنا مش قادر أستوعب اللي حصل, وبعدين بصيت لمرهوب وسألته هو إحنا جينا كل المسافة دي وقطعنا نص العالم ونزلنا تحت جبل في آخر الدنيا علشان نوصل لباب يتقفل في وشنا وخلاص؟
مرهوب مردش عليا لكنه قرب من الباب وحط إيده على سطحه وفضل ساكت كأنه بيحاول يسمع حاجة من الناحية التانية, جرموق وقف جنبه وبعد لحظات قال "مفيش حد جوه"
بصيتله باستغراب وقلتله أمال الصوت اللي كلمنا ده كان إيه؟
فرد عليا بكلمة واحدة "معرفش"
ودي كانت أول مرة أسمع منه الكلمة دي من ساعة ما بدأت المغامرة!
مرهوب فضل يمرر إيده على سطح الباب ببطء لحد ما وقف عند جزء معين وقال "استنوا"
بصيت ناحية إيده لكن مكنتش شايف أي حاجة مختلفة عن باقي الحجر, فقلتله في إيه؟
قال "هنا بالظبط تحت إيدي فيه حاجة مرسومة تحت السطح!"
قربت منه وأنا بحاول أشوف اللي بيقوله وبعد ثواني بدأت خطوط رفيعة تظهر على الحجر كأنها محفورة تحته من زمان لكن طبقة سوداء كانت مخبياها!
الخطوط بدأت تتجمع قدام عينينا وتتحول لرموز غريبة وبعدها ظهر شكل مستطيل صغير في منتصف الباب مرهوب أول ما شافه قال "دي مش كتابة"
جرموق رد عليه "لأ دي علامة إخفاء"
سألتهم يعني إيه علامة إخفاء؟
مرهوب قال "يعني إن فيه حاجة متخبّية ورا الحجر"
بعدها رجع حط إيده على المكان اللي ظهرت فيه العلامة لكن الباب مظهرش أي رد فعل فبصلي وقال "حط إيدك أنت"
استغربت وقلتله أنا ليه؟
قال "معرفش بس العلامة ظهرت لما انت اللي قربت منه!؟
مديت إيدي ولمست الحجر وبمجرد ما صوابعي لمسته حسيت ببرودة شديدة دخلت في جسمي كأن إيدي اتحطت في تلج, لكن بعدها مباشرة سمعت صوت تكسير خفيف وظهر شق رفيع جدا في سطح الباب امتد من تحت إيدي لحد أسفل الحجر!
سحبت إيدي بسرعة لكن الشق فضل بيكبر لوحده, وقطعة صغيرة من الحجر وقعت على الأرض وظهر وراها تجويف ضيق مظلم مكانش فيه أي باب ولا طريق ولا مقبرة, لكن كان فيه شيء ملفوف في قماش أسود قديم!
مرهوب قرب منه وقالي "متلمسوش"
جرموق مد إيده بحذر وسحب القماش من التجويف وبمجرد ما فك أول طرف منه ظهرت مخطوطة قديمة ملفوفة بعناية, كانت أوراقها لونها أصفر غامق, وأطرافها متآكلة, لكن الغريب إن الخيط اللي رابطها كان لسه سليم كأنه مربوط من يوم واحد!
بصيت للمخطوطة وقلتله دي إيه؟
جرموق هز راسه وقال "مش عارف"
مرهوب قرب منها وبص للرموز اللي على أول صفحة وقال "دي مكتوبة بلغة جن قديمة"
قلتله تقدر تقراها؟
قال "أقدر أفهم بعض الكلمات بس اللغة دي مش كاملة بالنسبالي"
جرموق فتح أول صفحة وبدأ يقرا ببطء شديد كأنه طفل بيتعلم القراءة, وكانت أول جملة مكتوبة فيها مختلفة عن أي حاجة شفتها قبل كده لأن الحروف كانت متشابكة مع بعضها وكأن اللي كتبها كان بيحاول يخليها صعبة على أي حد يقرأها وبعد وقت طويل رفع عينه ناحيتي وقال "دي مش قصة!"
قلتله أمال إيه؟
قال "شهادة "
مرهوب أخد المخطوطة منه وبدأ يقرا بنفسه, وبعد ثواني طويلة وشه اتغير وبص لجرموق وقال الاسم موجود هنا!
سألته اسم مين؟
مردش..
خدت المخطوطة منه وقلتله اسم مين؟
جرموق قال "سلهب"
فضلت باصص للورقة اللي في إيده وأنا مش قادر أفهم الكتابة اللي مكتوبة بيها المخطوطة لأنها كانت غريبة ومتشابكة, لكن جرموق كان مركز في جزء صغير من المخطوطة كأنه لقى حاجة مش مجرد اسم مكتوب, قربت منه وقلتله فين؟ لكنه رفع إيده يمنعني وقال "استنى"
بصيت للمكان اللي كان بيشاور عليه فلاحظت إن فيه رمز صغير مرسوم وسط الكتابة, وكان مختلف عن كل الرموز اللي حواليه, جرموق مرر صباعه فوقه وقال "ده اسمه"
قلتله اسم سلهب!
هز راسه ببطء وقال "أيوه"
مرهوب قرب منه وبص للورقة وبعد لحظات قال "الاسم موجود هنا بس الكلام اللي حواليه اتمسح"
قربت أكتر ولاحظت إن جزء كبير من الكتابة كان باهت بشكل غريب كأن حد حاول يمسح الكلام من الورقة, لكن فضل جزء صغير واضح تحت الاسم, جرموق بدأ يمرر إيده فوق السطور بحذر وفجأة ظهر حبر أسود جديد على سطح الورقة كأنه بيطلع من جوه الجلد نفسه وبدأت العلامات تتجمع قدام عينينا لحد ما ظهرت جملة قصيرة
سلهب لم يكن أول من دخل))
فضلت باصص للجملة وأنا مش فاهم وقلت دخل فين؟
لكن قبل ما جرموق يرد بدأ الحبر يتحرك تاني وظهر سطر جديد تحت الجملة الأولى وأغرب منها
(وكان آخر من خرج)
في اللحظة دي اتسمع صوت خبط خفيف من ناحية الباب, وبعدها سكت كل شيء
جرموق قفل الورقة بسرعة وبصلي وقال "لازم نرجع"
سألته ليه؟
مرهوب كان باصص للباب وهو بيقول بصوت منخفض
"لأن تقريبا اللي كتب السطر الأخير لسه موجود هنا!"
ملحوظة: تلميذ الجن هيغيب شويه لحد ما يلاقي التفاعل اللي يستحقه..
