رواية زوجي يعشق اخري الفصل السادس بقلم ساره الخفاجي
تفاجأت من شفت المحامي ،جان عادل طالب وياية بالجامعة ،وزوجت وبعد مشفتة .
سلم علية بس بالبداية ماعرفني أو اتظاهر ميعرفني حتى ميخليني بموقف محرج واني هم سويت روحي مااعرفة، اتفقت وياه على كل الامور وطلب مني بعض الادلة حتى بسرعة اطلگ ماجان بالي اخذ دليل صورة اوشي يثبت كلامي أنه خايني ،مجنت املك بس ذاكرتي والي حسيتة بهذيج اللحظات.
طلع عادل ورة مخلص كل الإجراءات المطلوبة مني وظليت افكر ..
ليش يبادلني بالخيانه والخذلان بينما اني انطيتة كل الحب والأمان .
گعدت فاتن يمي وظلت تسولف وقطعت سلسلة افكاري ذكرنة ايام قبل وشون جانت الحياه بسيطة وجان كلشي حلو بعيونه رغم ممتوفر اي شي من الي توفر هسة.
ظلينة نذكر ومرات نضحك ومرات نسرح بأيام قبل مر الوكت بسرعة .
ياترى الي داسوي صح لوخطأ القرار الي اتخذته حيوديني وين .
خايفة ،خايفة من الندم ،من المجتمع ،من اقرب الناس الي ،ليتغيرون علية ، لويعتذر ويوعدني يبطل خيانتة الي ،اذا هو اصلا لحد هسة مديعترف بخيانتة الي لهالدرجة شايفني غبية ومغفلة ،هيج جان يشوفني طول حياتنه سوة ،انه يكدر يخوني واني مااحس ولاراح ادري ،عبالة طفلة يكدر يضحك عليه بكلمات يقشمر مشاعري بيهة.
احس راسي حيطك من التفكير والدموع تحاربني تريد تنزل حتى ارتاح شوية ومااكدر اسمح الهة تنزل حتى تعلن انكساري ...
بس بأءت محاولاتي بالفشل ونزلت دموعي واستسلمت لالامي ومشاعري .
كعدت الصبح وتحظرت لان اتفقنه وية عادل نلتقي اليوم صحت فاتن لاني عايشة يمهة بعدني ساعدتني بلبسي لان ايد ورجل مكسورة ومجبرة بعدهة.
اجة عادل ورة ساعتين تقريبا وشوفني الأوراق الي لازم اوقعهة وطمني أنه كلشي حيكون تمام وراح نكسب الدعوة من اول جلسة .
شكرت منة واخذتنا السوالف عن أمور المحكمة انتبه عالوقت واستأذن وراح.
.....
جان عادل ولد خلوق مؤدب طويل بشرتة سمرة مرتب دائما ومهتم بأناقتة عندة وسامة تخلي اي امراءة شرقية تحب رجولتة وشخصيتة قبل بتحب شكلة.
....
جانت فاتن تحجي على عادل وكأنه تعرفة من زمان وعلاقتهم قوية .
طلعت فاتن للشغل وعافتني بالبيت ظليت فكرة تجيبني وفكرة توديني ،ساعة اخاف وتتردد وساعة أقوي نفسي ولازم مااتحمل هالاهانة هاي.
خليت راسي عالمخدة بلكي انام وارتاح من التفكير شوية .
جان الوقت يمر على كيفة ،مشاعري كل يوم تكبر بين حزن وخوف والم وقلق وندم وحب يقاتل حتى يعيش ويقنعني استمر رغم كل الي صار.
....
كل الرجال يخونون اذا مواليوم باجر اذا معرفتي اليوم حتعرفين باجر لكن اول وتالي حيخون مهما بلغ مقدار حبة الج محتكتمل رجوليتة الا بعشيقة تقدسة وتبعدة عن امراءتة.
.....
جنت دائما اسمع هالحجي ودائما ارددة بعقلي ورة مكتشفت خيانة احمد الي ...
بس مستحيل ،،مستحيل اكون ضحية للرجل الشرقي لازم احارب واتعلم احارب علمود كرامتي الي كسرهة وبعثره بحب مرة ثانية متتميز عني بأي شي ،شون اكدر اعيش هذا العذاب ظليت أردد هالحجي بيني وبين نفسي لازم اتغلب على مخاوفي قراري صح ،،،صحيح تطبيقة صعب على گلبي بس راح اطبقة محيكون الوجع اكبر من وجع الخيانة.
مرات گلبي يحاول يقنعني ،،هذا حبيبج حبج الاول هذا زوجج هذيج نزوة ،لتخليها ادمر حياتج صيري اقوة رجعي حقج لاتخليها تنتصر عليج متكدرين تعيشين من دونة.
اصعب شي من تصير ضحية اخذ قرار بين عقلك وگلبك لاگلبك ينطيك تبتعد ولاعقلك يخليك تتراجع عن الي حسيتة تحس روحك ماعندك قوة تستمر محطم بين كل هالمشاعر .
رجعت فاتن وبرجعتها نقذتني من الي افكر بي گعدنة نتفرج تلفزيون وناكل ،اندك جرس الباب راحت فاتن تشوف منو ...
دخل احمد وبيدة ورد .
-مصار الوقت حتى ترجعين ياسمر ،ماهدئتي شوية تركتج كل عالوقت حتى ترتاحين .
-ليش شفتني تخبلت ،گلي كلشي مااعرفة وبعدهة اكلك ارجع لولا ،گلي شكد ندمان ،كلي شكد تحبني .
-بعدج تفكرين هيج ،منو خلة هالفكرة براسج جنة عايشين بسلام وماكو احلى من حياتنة منو كلج اني خنتج.
-محد گلي بس جنت عمية وهسة گمت اشوف شفت حقيقتك شفتك بعيني احمد،لتتهم احد أنه خرب بينة اني شفتك بعيني انت خربت حياتنه ،شفتك شون تباوع الهة شون تبتسم من تحجي وياهة.
شفت كلشي .
-لا انتي صدك تخبلتي اني صاحب شركة ولازم هيج اتعامل وية زبائني لازم ابتسم واحترم الزبائن يعني شتردين اتعارك وياهم لواعبس بوجهم شون يمشي الشغل هيج.
-گمت اعيط بدون وعي واعصابي احسهة تريد تنفجر كافي ،كافي جنت اتمنى ولو شوية تكول الصدك حتى ارجع وياك بس بعدك تستغفلني وتستغبيني لهالدرجة شايفني غبية تضحك علية بكلمتين وتقنعني أنه الي شفته مجرد شغل ،لك شفت قميصك بيوم الي تحظرت الك شفت الحمرة بي هم كول تخيلات هاي وجذب .
مكدر يجاوبني صفن بوجهي راد يحجي مخليته رأسن عطت .
روح مااريد اشوفك بعد .
طلع احمد وكعدت ابجي بحرگة وقهر عبالك شي ثقل زال من على صدري گعدت فاتن بصفي وهية تجدني وتشجعني اصير اقوة واتماسك ..
بس يافاتن مااكدر اتحمل بعد مااكدر تظاهر بالقوة واني محطمة وضعيفة لدرجة كبيرة ومن اقرب الناس الي .
الرجل الي اعطيته كل حياتي فضلته على كل الناس حبيته اكثر من اي انسان دخل حياتي دمرني، خاني تخلى عني، باعني.
مشت الايام واني مثل مااني حزينة ابجي اذا اضحك على شي دموعي تنزل حتى من تحاول فاتن اضحكني وتنسيني اضحك واظل ابجي من الوجع الي بداخلي مااعرف على شنو ابجي على حبيبي لو على كرامتي لوعلى عمري الي خلصتة واني اعشق انسان مقدرني .
كل شي جان باهت الحياة أحسهة فارغة الدنيا كلهة مااريدها اريد اروح لمكان ارتاح بي جانت فاتن تحاول اطلعني من الي اني بي وتقنعني نطلع برة البيت بس اني مااقبل بس مرة طلعت خلال هالمدة لطبيب على مود الكسور .
مر شهر طويل ،واجة اليوم الي اوراق الطلاك ادزهة المحكمة لأحمد جنت انتظر على احر من الجمر شراح يسوي اكيد محيقبل حيجي يتعارك وياية ،مراح يقبل يعوفني .
صح اني خطيت هالخطوة ،بس حتى ارجع كرامتي ،ونفسي الي ضاعت بين كل هالمشاعر الي بداخلي ،بس گلبي بعدة يريدة .
مرت ساعات وكلشي متغير لااحمد اجة ولاصار شي ،خابرت عادل حتى اتاكد راحت الاوراق لو اني متوهمة بين الايام ،اكدلي عادل أنه استلمهة احمد.
ليش لعد مخابر ليش ماكو اي رد فعل ،خاف صار بي شي ياربي خاف مريض ومكدر يجي ،ياربي احمي يالله مااريدة يتأذة .
كل دقيقة تمر قلقي يزيد عليه زهوة لااتصل ولااجة.
نسيت كل الي صار خيانته ودموعي وگلبي الي ديتگطع وگعدت ادعي يكون بخير ..
....
كمية السذاجةعند المرة الشرقية كبيرة لدرجة تعرضت لاصعب موقف تتعرضلة المرة وبعدة گلبهة هوة الي يحب ويتحكم بيها..
بعدهة تحلم بذلك الفارس الي على حصانه الابيض ولاكانه هذا الفارس هوة الي حطمهة وبعثرهة تبجي لسنوات حتى تنسة جرح سببة الهة وبدقيقة قلق وخوف تنسة كلشي واظل قلقة عليه وكأنه ابنهة.
.......
جنت قارية كتاب بهذه الفترة عن النسيان بلكي آنسة واخلص من هالعذاب بس نسيت كلشي وهوة منسيتة.
مكدرت اتحمل اكثر خابرتة .
ماجاوبني خفت اكثر وظل بالي ،خابرت مرة ثانية جاوبني لكن جان صوت بنية ،تفاجأت سالتهة عن أحمد ،كالت أنه باجتماع مهم وميكدر يحجي وياية ،ارتاحيت لأنه مابي شي بس بنفس الوقت زاد حزني وغضبي.
مااعرف شنو الي اريدة معقولة جنت اتمنى بداخلي يكون بي شي ،مثل ميكون اجاني بسرعة واندعم أو تمرض من سمع بالخبر ونقلوا مستشفى ،متوقعت حيكون بالشغل ،ولهالدرجة الشغل أهم مني .
وبعدني افكر بي خرب بية وبگلبي.
......
شكد انت جاحد ياگلبي تعوفني واني الي حاملتك بصدري من الولادة وتركض ورة شخص يأذيك دوم .
متنقهر عليه ولو شوية لوبيدي انتزعك من صدري واشمرك .
خلص النهار وبدة الليل باول ساعاتة اندك الجرس فتحت فاتن الباب.
اجة احمد من شفتة گلبي گام يدك ،اكيد حيرفض الطلاگ اكيد حيعيط عليه وياخذني وياه نظراته الي بعصبية .
گعد على الكرسي الي يقابلني باوع لعيوني ثواني جنت اكدر اشوف كمية الغضب الي بعيونة بس ملمحت شي من الحزن والألم ولاحتى شوية.
-شوفي سمر تعرفين اني شكد حبيتج بس انتي بديتي تبعديني عنج بشكج وبتصرفاتج الطفولية ،تردين الطلاگ راح اوقع عالاوراق اذا جان هذا الشي الي يريحج لازم نفكر بلي راح يصير ...
اي حبيت بعدج مراح أنكر بعد اني اعتذر لان مگلتج بس خفت ليصير بيج شي .
جان يحجي واني بس ابجي بدون مااحس ،معقولة يريد يطلگ ،يعني صدك يحب غيري ولا عادي يحجيهة گبالي ،يريد يفكر حتى يخلص مني ورة مخسرت سنين من عمري وياه صرت ماانفع هسة هيج يشوفني صار.
مفتهمت شيكول بأخر لحظات قبل مااكوع بالگاع مغشي علية گعدت ورة دقائق واني اسمع فاتن أصبح وتضربني على وجهي وترش مي بأيدهة حتى اگعد وتطرد بأحمد من البيت.
شكد انتي جبيرة يافاتن لوجانت عندي اخت ماسوت الي سويتي وياية ،اشكر الله الي عرفني عليج وكسبتج كاخت وصديقة غالية .
من گعدت طلع احمد واني انهاريت بالبجي والعياط ،جان اكو امل بداخلي ولو قليل بس حتى هذا الأمل ضاع .
انتهت إجراءات الطلاگ بسرعة جبيرة لانه الطرفين موافقين عالطلاگ.
حبست نفسي بالغرفة الي انطتنياهة فاتن صح غرفة صغيرة بس حلوة ومرتبة ،ومع هذا جانت بعيني سجن اعاقب نفسي بي .
اني الصوج بية اني السبب بلي صار اني السبب بتعاستي هاي اني السبب بخذلان نفسي .
وبديت اعاقب بنفسي حتى انسى من نساني .
مرت الايام والأشهر وعبالك سنين ،رحنا للمستشفى حتى يرفع التجبير من ايدي ورجلي واخيرا خلصت وراح اكدر اتحرك براحتي رجعت للبيت وية فاتن وبديت ادور على شغل مااكدر ابقة يم فاتن الى الابد .
وين اروح امي الي تخلت عني من صغري بسبب زوجهة .
ابوية واخوية متوفين وين انطي وجهي واروح واني مالي احد بهالحياه غير رب العالمين .
اسبوع اني ادور على شغل بالمحلات وبمواقع التواصل وماكو اي فائدة شجعت روحي وخابرت عادل بلكي يشوفلي شغل اكيد عندة معارف .
فرح عادل بأتصالي وشجعني على هالخطوة وطلب مني انطي وقت لحد ميلگالي شغل مناسب ،تشكرت منة واتصلت بفاتن وگتلهة على الي صار عصبت مني لان راح اروح بس بعدين فرحتلي .
انت اختي يافاتن بس لازم ابدي حياتي من جديد وبشكل صحيح
لجميع الفصول من هنا
