رواية حب بين نارين الفصل السابع بقلم ايمان احمد
انتى! انتى ايه ال جابك هنا؟
ردت ندى بتوتر: انا عايزة ارجع الشغل
بصلها بنظرة سخرية بعدها قال ببرود: ده على اساس انى كنت طردتك انتى ال سبتى الشغل برغبتك
فركت ايدها بتوتر واضح وقالت: يعنى اظن انك عارف السبب كويس اول يوم اشتغلت فيه.. وال شوفته... اقصد البنت ال كانت
بعدها سكتت وهيا مش عارفة تقول ايه فقال ياسين
= وايه خلاكى تغيرى رأيك وترجعى مكان زى ده بالنسبالك
الدموع اتجمعت فى عينها وهيا بتفتكر ابن خالها ووضعه الصحى السئ فقالت
= ابن خالى عمل حادثة وانا محتاجة فلوس عشان علاجه
ياسين باستغراب: وابن خالك ده ملهوش أهل يسألوا عنه؟؟
ندى قالت على الفور: لا.. لا بس انا ال حابة اعمل كدة عشان أرد جزء من جمايل خالي عليا موافق انى ارجع الشغل؟!
ياسين فكر شوية بعدها قال: تمام ارجعى
ندى: بس انا عندى شرط
ضحك بصوت عالى وقال: انتى كمان ال هتتشرطى؟
ندى بضيق: ممكن نسميها طلب تمشى معاك؟
ياسين: اممم تمشى بس افتكرى ممكن اوافق وممكن ارفض
ندى بصتله بحذر وقالت: محتاجة سلفة... مقدما وتقدر تخصم كل شهر من مرتبى
ياسين رفع حاجبه وقال: ولو رفضت؟
ندى بحزن: ليك حرية الرفض اكيد مانت صاحب الشغل
ياسين: انتى ليه طلبتى منى ومتطلبتيش من عمار؟ رغم انى ضايقتك اول ماجيتى تشتغلى
السؤال فاجئها لكنها بالفعل مكنش عندها اجابة الطبيعى بالفعل انها تطلب من عمار الشخص المهذب ال ساعدها قبل كدة لكنها تطلب من ياسين!؟ فده ال هيا نفسها مكنتش عارفه اجابته هل لانها خايفة على صورتها قدام عمار لحظة ولكن من عمار بالنسبة لها؟ ام لانها حست فى ياسين شخص تانى غير ال مبينه
ياسين: للدرجادى السؤال صعب عليكي؟
ندى قالت على الفور: بصراحه خوفت منك
وقبل مايعلق جت بنت من بعيد صرخت باسم ياسين بعدها حضنته ولفت ايدها حوالين رقبته بص ياسين لندى ال أشاحت بصرها وحاول يبعد البنت لكن عمار كان جه وشاف منظرهم وهما حاضنين بعض
سقف بايده وقال بسخرية: واااو ياسين وحبيباته قد ايه المنظر روعه لازم بابا وماما يشوفوه هيفرحوا اوى من ابنهم البطل
بعد ياسين البنت عنه وقال : الزم أدبك ووطى صوتك
قرب عمار لكنه اتفاجئ اما شاف البنت التانية دى تبقى ندى اما ندى فحست باحراج
قال عمار بعدم تصديق: ندى انتى هيا حبيبة ياسين؟
ندى بارتباك: أنا.. أنا
قالت البنت الاخرى وال كانت لابسة تنورة قصية للغاية وتشيرت بحمالات بعدم رضا
= ياسو انت مرتبط ببنت غيرى؟؟
ياسين بحدة: اخرسي انت خالص
عمار بكره: اوعوا حد منكم يصدقوا ده واحد بيلعب بالبنات صحيح انه اخويا لكنه واحد واط-ى ميستاهلش ثقة اى حد حتى ابوه وأمه مش بيحبوه
حست ندى انها محتاجة تدافع عن نفسها وعن ياسين لكنها كانت متترددة وخايفه تدخل نفسها فى امور اكبر منها ففضلت السكوت
ياسين اتجاهل عمار وقال للبنت: روحى انتى ياجاسيكا وانا هكلمك اما تروحى
جاسيكا بمياعه: تؤ تؤ مش قبل ماتقولى البطة دى تبقى مين مصيبة تكون مرتبط بغيرى زى ماالاقمور ده بيقول
عمار: مكنتش اتوقع منك ياندى تكونى كدة وتوثقى فى واحد اهانك وذلك قدام الناس
ياسين بغضب: عمار امشى من هنا انت مش فاهم حاجة وبتلغبط فى الكلام مشكلتك معايا مش معاهم
عمار بوجع: وانت ياجنتل مش كانت مشكلتك معايا ايه كان لازمته توقع مابينى انا وحبيبتى انا خسرتها بسببك وكل ده عشان بتتحدى بابا
هو ايه ال بيحصل هنا ده؟؟
قالها مجدى والدهم بغضب واقفه معاه الهام ال كانت مش فاهمه سبب الخناق بين ولادها ايه المرادى وهيوصل لايه
رد عمار باستفزاز: ابنكم وعشيقاته
لكمه ياسين بغضب وردله عمار نفس اللكمه وكانوا هيتخانقوا لكن الهام ومجدى بسرعه فصلوا بينهم
قال مجدى بغضب شديد: انتم الاتنيييين مطروودين بررة بييتى يلااا برة
حست ندى بصدمه معقول ياسين ال هيرجعها الشغل انطرد
اما ياسين فقال بكل برود وبلا مبالاه: دى خطوة كنت بفكر فيها بس كنت متردد كويس انك اخدت القرار ده بنفسك يلااا باااى بااى هتوحشونى
قال كلامه ومشى لكن ندى وقفته وقالت: لحظة واحدة طب وانا؟
ياسين: متقلقيش هوفرلك الشغل ال انتى محتاجاه فى شركتى الخاصة
قالت جاسيكا وهيا بتتمايل وحاطة ايدها حوالين وسطها بسهوكة: وانا كمان شوفلى شغلانه بس اهم حاجة اكون بفهم فيها
تجاهلها ياسين وقال لندى: لو تحبى تقدرى تيجى معايا اوريكى مكان شغلك
لكن عمار مسك ايدها وقال بحزم: ندى مش هتروح معاك اى مكان
ياسين بسخرية: بصفتك مين بتقرر بالنياية عنها
بص عمار لعيلته ال كانت منتظرة اجابته بعدها لندى وقال
= بصفتى خطيبها لو وافقت طبعا انا قررت اجوز ندى... القرار فى ايدك ياندى تقبلى عرض الشغل بتاع ياسين ولا عرض جوازى وتبقى هانم ؟؟
شكرا لزيارتكم عالم روايات سكيرهوم
