رواية سواد الاثمد الفصل السابع بقلم نورس
انخرست بعد مفتحت حلگها راح گعد عالتخم
وعينه متشكله علينا وجه كلامه لماما
سالم :- ليش جاية شدن
- جاية اخذ بناتي
- مالج بنات يمي
- مالك حق تحرمني منهن اني اولى بيهن
- عرضت عليج عرض وكتلج بناتج يمج وانتِ رفضتي
- بأحلامك أقبل
رفع حاجبه :- متأكدة ؟
گام من مكانه يمشي داير مدايرنا ايده ورى ظهره
سالم :- لعد اسمعي وأنطيج اياها من الأخير البنات أمانة عندي قبل ليموت حارث وصاني عليهن وبقيتهن يمج كل هالسنين گلت صغار وما راح يحملن فراگ امهن بس هسه بعد مالج حجة يبقن عندج مرجوعهن النا
بجت :- حرام عليك الدتسويه
- لعد مو حرام من ماخذتهن بليلة ظلمة ومنهزمة تتحامين برتبة ذاك عقيدج المـ**** شنو لبالج راح اعديها الج
- انفصلنا بعد مالي شي يمه عوف بناتي بحضني
- الحجي يفيدج ما دامج ميبسة راسج ومتطاوعيني
دك تليفونه باوع الأسم ابتسم وعينه علينا رد :- هلا بهالزين .. اي ذني گدامي هن والأماية .. لحظة
فتح سبيكر اجانا صوتها
سجود :- شلونج شدن وين هالغيبة
صفنت ماما تميز الصوت بعدها نترت :- شرايدة
- عاش من سمع صوتج اسأل عليج أمانة حارث شلونها
- محفوظة بزودي بس اطلعوا منها انتوا
- لا هيج الحجي ثگل وصار ينرادلها گعدة حتى نتفاهم
- شتردين سجودة من الأخير
سجود :- هسه انتِ عيني وبديتي تفتهمين اسمعي لج بربوك ماريد اطولها وهي گصيرة تردين بناتج يبقن بحضنج سالم يعقد عليج غير هالحجي تنسين الج بنات عدنا
كفاح شهگت بفزع وهي تلطم على صدرها
مشت لعمو سالم وگفت گدامه تحاجيه
كفاح :- تريييد تاخذ عليَّ شدن ؟ ولك سوتها سجودة ولعبت بعقلك وراح تزوجك ؟ وهم ياريييت لو زواجة تسوى شددددن ولك شددددددن تحطها شريچة الي
سالم :- اششش مو وكته هالحجي بعدين نسولف
- شتسولف سالم انتَ ناسي شدن منو لو تريدني أذكرك ولك هاي الـ أمها رگاصة بالملاهي ما ضالة بنفس واحد بنت الحررررام أبوها مينعرف منو هو ترييييد تاخذها عليَّ
عضت أصابيعها :- يبووووو عليج وعلى حظج كفاح هي هاي جزاتي لييييش شقصرت وياك شو كلمة والثانية تأمر وتدلل شعايزك بس گلي ولد تلد وتاخذها
نتر بيها بخزرة :- بلا اكلان تبن زايد گتلج بعدين نسولف سدي الموضوع هسه
ما سكتت ضلت ترادده وصارت تغلط وتفشر على ماما وتذكره بنسبها ، ذلة وإهاين وكلام جارح هذا كله وعيني على ماما اللي أحسها صارت مجمرة من الحرگة
أشر لبنته :- تعاي نسمة اخذي امج لغرفتها
- ما أصعدددد ترديني أروح حتى تطبخوها انتَ واختك
من وراية على جثتي أخليك تاخذها والله بشنو أحسن مني هالبلا أصل وتصيرلك زوجة ثانية وتشاركني بيك وبـ بيتي وبمكاني متاخذذذذها سمعت لو لا
صاح بعصبية :- نسسسسسسمة ويامن ألغي
اجت تركض تلزم بأمها :- وخررررري انتِ ما أروح هالسالفة منا وتنسد وخري گتلج
نسمة :- يوم فدوة بعدين تتفاهمون انتِ وابوي امشي للغرفة
- شنو تريدني أسد حلگي وأنچب وبيوم العقد أجي أتباركلكم متاخذها سسسسالم مو كافي بنتها فارة راس محمد وگالبته علينا النوب تجيبلي الأماية على جثتي والله
بناتها گوة أخذنها وهي مستمرة تصيح صوتها عالي
عمو سالم واگف فوك راسنا بيده التليفون
سجود :- انسالي كفاح اني أعرف شلون أدبرها وأقنعها
بس گلي هاي العلة وين ؟
باوع لماما وگلها :- هاي گاعدة تسمعج
- فضيني شدن تردين تبقين بـ بيت اخوي وبناتج بحضنج تخلينه يعقد عليج غير هيج مالج كعدة بالبيت تبقين مرة غريبة وسالم محرم عليج الناس شتكول علينا
- لا هواي تعرفون الحلال والحرام انتوا
سالم :- بلا لغوووووة زايدة انطينا جوابج لو تولين وبناتج يبقن هنا مالهن طلعة من البيت
- مالك حق تطالب بيهن اشتكي عليك والله
- انتِ مرة سويها وخلي رجلج تعتب باب المحاكم والقرآن طلقة براسج واشمرج بحاوية تنهش بيج الچلاب
سجود :- تهدد بنت ام الملاهي روحي ولي اشتكي نشوف يا زلمة يطلع بظهرج ولو انتِ الله يسلمج زلم الداخلية كلها صارت جوة ايدج صاير ينخاف منج
- اخوج لو يبقى آخر رجال بهالدنيا ما أقبل بيه وبناتي أخذهن أخذذذذهن اذا مو برضاتكم فغصبًا عليكم من جبيركم لصغيركم وشتردون تسوووون سووا
- كبران راسج بنت الرگاصة سهلة اني الج ..
حجت جملتها بتهديد وكملت :- سالم شوف شغلك وياها وبناتها احبسهن ذني درب امهن رجلهن والشردة اني هالأسبوع اصفي العندي هنا واجيكم
سد التليفون وشمره عالتخم اجه سحل ماما من شعرها
وهي مجلبة بينا دفعنا عنها وطلعها يجرجر بيها اجيت اركض عليه ايد حاوطتني ورفعتني من الكاع كمت اصيح وابجي
شهربان :- وخرررررررر حقييييررر ززززمال اخذها ديضررررب بيها عوووووفني وخررررر خلي الحكها دتصرررررخ
أظافري نبتت بأيدة صارت خريطة بس أريده يعوفني
صعدني فوك دخلني للغرفة يلا عافني صحت :- ما بيكككككم رجال كلكككم چلاب الله يقررررضكم الله ياخذك محمد
محمد :- شبيدي اسوي مشفتي شلون شاط من كلامها
- متعرف تلزمه توخره عنها هيج عادي عندك تشوفه يسحل بيها كدامنا وانتَ واكف تباوع
- ابوي وسجودة ميتعاند وياهم خيروها بناتج مقابل توافق على ابوي وهي ما قبلت
- لك انتَ من يا ملة دخيييييييل محمد لك امنا هاي امنا يا بشرررررر مهزتك شهكة نورجان هاي بدون ماما حالها حال الجاهل تحس روحها ضايعة رووووح حاجي محمد فدوة كله ميكدرن يعيشن من دون امهن حرام عليه يسوي هيج والله
تهسترت كمت ما اعرف شسوي وشأحجي الكلام يطلع مني بدون وعي اصيح عليه وارجع ابجي واتوسل بيه
اجه لزم ايدي يحاول يهدأني :- اني احجي وياه بس كافي راح تموتين نفسج
صرت گوة اجر النفس انكتم صوتي بس الشهگة تطلع من صدري وجسمي يهتز بقوة أثر الرعشة الصارتله
كعدني عالجرباية ويضرب بخدي على الخفيف
يحاجيني وما أرد احس فصلت ما أستوعب شيحجي
انفتح الباب ودخلت نورجان وراها نسمه شافتني اجت كعدت يمي واخذت ايدي تفرك بيها وجها أحمر من كد البجي ودموعها مستمرة بالنزول تباوعلي وتشهك
نسمه :- شبيها ليش هيج ترجف ؟
نورجان :- انعگد لسانها
راح للكنتور جابلي حباية انطانياها وشربني وراها مي واخذ بيده غسل وجهي ، خليت راسي بحضن نورجان ولازمة بأيدها شفايفي ترجف ما يطلع مني الكلام
هم يحجون فوك راسي بس صرت ما اميز غطاني وعينه مرتكزة عليَّ ذب حسرة طويلة وطلعوا هو واخته
صوت نورجان وهي تبجي بصوت خافت اسمعها وهي تجر النفس وتمتم بكلمات ممفهومة غمضت عيوني نمت وصوت بجيها وشهگاتها يرن بأذني ..
كعدت نايمة نورجان بصفي وجها مشخط حبيبتي مشوهاته الها بنات الزفرة عيونها مورمة من گد البجي وخرت شعرها من وجها غطيتها ورحت للحمام اغسل
طلعت صارت بوجهي هبة تريد تفوت للحمام
مشت تعدتني لزمتها من ايدها رجعتها گبالي
هبة :- شبيج وخري
- شو بلة أظافرج
زفرت بملل :- استغفر الله لج بابا شبيج انتِ متخبلة من الصبح شو دوخري
لزمت ايدها غصب عنها وجريتها أباوع بيها ..
أظافرها قصيرة دفعتها و عفتها تحجي وراي رحت لغرفة محمد صرت گبال ميز تواليت فتحت المجر اخذت المگص خليته جوة ملابسي
محمد :- شتسوين ؟
انداريت بسرعة لصوته توه طالع من الحمام شعره يذب مي توترت :- اريد ..
- شتردين
حجاها وهو يتقدم عليَّ صار گبالي وايده عالميز محاوطني يباوع بعيوني :- شبيك تباوع هيج وخر
حجيتها وحاولت ادفعه ضل ثابت بمكانه رفعتله حاجبي شال ايده يخلي خصلات شعري وره اذني
- البارحة ضل بالي يمج خفت ليصيرلج شي
- وخر محمد
- زعلانة مني ؟
- وانتَ منو ودا ازعل منك شو رايح زايد توكل ابني
- ها هيج صار الحجي
- اي وخر يلا
- لتجافيني بان كلشي استقبل منج الا اسلوب النتر هذا ما احبه ترى الزمج افصم ظهرج والقرآن
- أحلف متخوف چلبي
- ها والله
دفعت ايده عني ودا امشي رجع جرني لزگني بظهره حاضني من وره حيل گمت اصرخ سد حلگي كتم صوتي أحس بأنفاسه برگبتي يجر نفس منها
الهوى انگطع صرت ارفس برجلي اريده يهدني
عافني شهگت أجر نفس مخنوگة ولازمة رگبتي
باوعتله :- والحُر اطلعها من عيونك بسيطة
- يلا هذا اني گدامج
حجاها وغمزلي خليت وطلعت من الغرفة رگعت الباب وراي رجعت للغرفة جانت نورجان توها گاعدة تلم بشعرها شافتني
نورجان :- هاي وين رحتي
- يمج مرايحة لمكان
-اريد اغسل
- الحمام گبال الغرفة
ضلت ساكتة تباوعلي بعيونها افتهمتها من الحرگة البيَّ صحت بيها :- شبيج تباعيلي هيج ووولي لوحدج والتتقربلج الزميها فصخيها تفصخ دا اشوف يا زلمة يطلع وراها
- ما اگدرلهن بان عفية والله يكتلني
- لتصيرين جبانة نورجان التحاجيج صيحي واني اجيج أشگها
گامت طلعت يمكن ٥ دقايق بالهواي ورجعت تركض وجها مبلل سدت الباب :- ها ؟
نورجان :- ماكو احد بسرعة غسلت واجيت
هزيا راسي منها بيأس ماكو فايدة
اجت يمي تمسح بوجها كالت :- عندج موبايل
- ما عندي اخذ من محمد
- دگومي لعد جيبيه من عنده دنخابر ماما
- ما احجي وياه
- لا بان حبابة والله بالي يمها من البارحة گومي عفية جيبي الموبايل منه
گمت مجبورة من شفت نظرتها شوي وتبجي رحت لغرفته جان بعده واگف گبال المراية ديسشور بشعره
ما اهتميتله ومشيت للميز اخذت تليفونه
طفه السشوار صاح :- كم بوگة صار بان
- اريد اخابر ماما وارجعه مماكلته
أشرلي روحي اخذته وطلعت عأساس منتظره منه يرخصلي رجعت للغرفة فتحته وانطيته لنورجان
اتصلت على ماما مردت :- مدا ترد بان اخاف صاير وياها شي
- شبيج بسرعة فاولتي اصبري هي تشوف المكالمات وتتصل تدري بينا احنا
صدك شوي ودگت ماما ردت عليها بسرعة نزلت
دمعتها ضلت تحجي وياها ما اسمع ماما شتگلها
لحد ممدتلي الموبايل :- تريدج
اخذته منها اجاني صوتها مخنوگة مبينة جانت تبجي
شدن :- شلونج ماما بان
تنهدت :- زينة انتِ شلونج
- شلوني شتگولين
- وين رحتي
- رجعت للعمارة هسه اني بشقة خالة ام شذى
- وتالي ماما
بجت :- شسوي گوليلي شبيدي عليجن حتى لو اشتكي راح يلگولهم الف لوفة ولوفة ويسحبوجن مني حتى بالقانون وبعد ما اگدر اشوفجن
- انتِ شنو براسج
- ما اعرف والله يأمي عوفيني افكر اشوفلي صرفة دا اطلعجن مناك
- ماما إياج إيااااااااج تفكرين بالخيار الثاني وتوافقين على عمو سالم في سبيل تبقين ويانا وروحه لبابا هالمرة اسويها صدك واكتل روحي
- شبيج بان اني بيا حال سالم اشوف دم سنوني ولا اشوفه وحتى عرضه الي حتى يكسر خشمي ويسيطر علينا احنا التلاثة فد مرة
- خابري العقيد يطلعنا منها
- فدار ؟ بيا وجه آخر مرة شفته تعاركنا رجع عرض عليَّ الزواج واني دست وياه بالكلام وهو تخبل كال بعد تنسيني وتمسحين رقمي وحتى شبير منعني بعد أخابره
- شوكت هالحجي ؟
- من أخذج محمد وخابرته اجاني ثاني يوم للشركة وحجه وياي طلع يعرف المدير مدري شيعودلهم
- يعني شنو
- يعني ماكو لا فدار ولا ضباطه يطلعونا منها
- بس شبير دائمًا يجيكم
- من وره خاله ميدري بيه
- استغفر الله بيوم الأحتاجيته من صدك طار من ايدي
- هو انتِ نگيتي عليه لحد مجسحتي الرجال
- ها النوب اني لوما انتِ دتگولين عاركته
- روحي بان روووحي مالي خلك تعبانة الليل كله راسي خوة من البجي عينج على اختج أمانتي يمج نورجان
- واني عند منو مأمنتني ؟
- انتِ بأمان الله ونفسج ما اخاف عليج
- لتعوفينا ماما
- ما اعوفجن نظر عيني انتن وين اكو واحد يشوف بلاية عيونه اصبرلي والله تدبر لو اعرف اسويها كاتل ومكتول واهجم بيوتهم عليهم بس انتن اعقلن وديربالج من كفاح تلكيها حادة سنونها عليجن هي وبناتها من سمعت سالم يريد يعقد عليَّ
- اني الهن البربوقات
- ويامن دا احجي بان اتجنبيهن امي ترى انتِ لوحدج مو گدهن وهاي اختج فاهية يأذنها
- هذا هو ليضل بالج سلمي على خالة وشذى
- يوصل
سديته منها لگيت هاي بعدها تجر اقسام :- كافي يمعودة شنو السالفة جاهل انتِ
- أريد ماما
- گالت راح تطلعنا منا انطيها مجال شبيج بعدج اول يوم ترى وراج أكشن هواي
- اول مرة أنام بمكان وهي مو يمي
- بعد نورجان متردين ممة ؟
ضحكت ومسحت دموعها :- على طاري الممة جعت من البارحة مماكلين شي
- امشي ننزل نتريك
مشيت للكنتور طلعت المگص ضميته بين ملابسي
أخذت نورحان من ايدها ونزلنا للمطبخ شارمن تفتر تجهزلهم الريوك صبحت عليها
شهربان :- ماما كاعدة ؟
شارمن :- لا ينام هذا هواي
- نامت عليها طابوگة
باوعت لنورجان ورجعت تباوعلي نظراتها تتنقل بيناتنا
نورجان :- حقج صار عندج خبط ألوان
- انتَ ابيض ابييييض كوووولش وجهك جميل
شهربان :- لا يا بنت الذين لعد الگدامج صار شگد مگابلتج مسمعت منج هيج مدح
- انتَ حلو بس يسوي مشاكل ضرب
نورجان :- ليش هيج تحجي عليج
- خطية جنت كل يوم مصبحتهم على عركة اني وبنات كفاح وهي جانت تصير بوجهن تحميني منهن لحد ما حرموني اكل وياهم كامت تجيبلي الأكل للغرفة وتنقلي أخبار البيت
- الله حبيتها
گعدنا يمها بالمطبخ وتسولف ويانا تغير علينا جو ونورجان تتحرك وياها تساعدها صبت النا ريوك
دنتريك ونزل محمد هم شافنا گعد ويانا ياكل
ولحگته نسمه مبدلة تريد تروح لـ كُليتها
نزلت كفاح شايخة شافتنا لو تخبلت :- خوش جمعة جامعاتكم من الصبح هيج بسرعة گلبنكم عليَّ الگحاب
شهربان :- صرنا گحاب بيوم الدخلنا بيتكم وعاشرناكم
خزرني وصاح :- باااااااااان
- شكو مدا تسمع امك
- على أساس انتِ قاصرة الزممممي لسانج لا ينبتر
- اوي شكد تخوف انتَ
فرك راسه يتمالك أعصابه ومن جهة امه تدردم فوك راسه باوعلها :- احنا شحجينا ؟
كفاح :- ولك امهن تريد تبوگ ابوك وهاي تحوم عليك ادررررري شمسويات الكم وفارات راسكم هيج
- شوصاج ابوي البارحة كافي عوفيهن مأذياتج هسه هن
ضلت تدردم شرب چاي وكام جر سويجه كال :- يلا نسوم هم يلا الحك اوصلج تأخرنا
اخذت جنطتها وگامت قبل ليطلع دنك يشاورني
- بان الحلوة تجنبي المشاكل بس هالكم ساعة بين ما ارجع الطاقة المفرطة الجواج اكبتيها زين حبيبي
- دتظلمني اني انثى رقيقة ترى
- مو اعرف وهو لأن رقيقة وصيتج حتى لتخرب انوثتج بداعتي بان امي انطيها الأذن الطرشة هي بس لسان يحجي اعرفج انتِ متعدين الكلمة على خير
- روح لتوصي
- عفية بالشطورة
گرص خدي وراح شوي ونزلت هبة بملابس المدرسة تنهدت بحسرة واني اباوع لملابسها شافتني
هبة :- ها شبيج تباعين هيج مضيعة شي بوجهي
- بيت خالو جان عندهم چلب شفتج وتذكرته
- لا حبيبتي لتشبهيني بيج
- اوي عود كبرت وگامت تعرف تحجي توكلي بنتي
اجت امها شافتها :- لعد ذيج المسعدة وين
- نايمة تگول ما اداوم
ابتسمت ودنگت أشرب چاي شفت نورجان تباوعلي رفعتلها حاجبي بمعنى شكو تنهدت ودارت وجها
اجه خط هبة وراحت لدوامها وكفاح فوك راسنا تتأمر على شارمن سوي هيج وحطي هيج وكله بصياح ولزمتنا شركتنا وياها بشغل البيت غصب
نزلت هنادي توها گاعدة من النوم صاحت على شارمن تسويلها ريوك هي وامها وگفت يمها اخذت من ايدها
- عوفي من ايدج اني اسوي الريوك
شارمن :- لا مدام روح انتَ
- خرب روحج صوتج
نورجان :- شتردين منها ؟
درتلها :- ماكو شي
حضرت شارمن الريوك و وكفت منتظرة الچاي يخدر دايرة وجها ملتهية تنظف بالطباخ استغليت الفرصة ماكو احد طلعت حباية من جيبي خليتها بالكلاص اختلطت ويَّ الشكر متبين
اجاني صوتها تحجي بصوت ناصي
نورجان :- شدتسوين
درتلها أشرتلها بالسبابة على حلگي حتى تسكت
اخذتها من ايدها وجريتها طلعنا من المطبخ
- شنو براسج بان
- الخريطة اللي بوجهج حلوة
- هاي هنادي خرمشتني بالعركة البارحة أظافرها شطولها
- ومدام طويلة ينرادلها گص
- لتعيلين بيها عوفيها ختولي
3 تعليق
- يمها اني شبيكم وياي اليوم
- دتخوفيني والنبي
... 《 نورجان 》 ...
صعدت بان للغرفة رحت وراها لگيتها تحوص
تروح وتجي بالغرفة بأعصاب تاكل بروحها
نورجان :- انتِ وضعج مو طبيعي اليوم شبيج
- لبالي الچلبة بنتها شربت الحباية
- يا حباية ؟
- خرب روحج نورجان بيا عالم انتِ
اجتني صارت گبالي :- متردين تاخذين حيفج من هنادي
- لا
- مو بكيفج تجين وياي نلزمها نطيح حظها على كتلتها الج واني هم متحلفتلها من زمان هاليابسة
- اهو بان اگعدي ماما شوصتنا مو گالت اتجنبوهن
- والله ما اسكتلها تجين لو اشوف شغلي وياها
- ومرة عمو ؟
- شربت الحباية ونامت
صفنت بوجهي :- يا حباية ؟
عضيت شفايفي بقهر :- نورجان لتجلطيني مو شفتيني دا أحطلهم الحباية بالچاي
- حباية مال شنو ؟
- منوم مصخم بس فضيني شلعتي گلبي
باوعتلي مترددة :- يعني شراح تسوين
- بس الزميها الي والباقي عليَّ
راحت للكنتور طلعت مگص ونزلنا جوة البيت محد بيه كلهم بدواماتهم ، هنادي جانت لوحدها بالصالة تتفرج تلفزيون رحنالها وأشرتلي بان أسد الباب
شافتنا فزت گامت من مكانها :- خيييير ليش سديتي الباب
منطتها مجال تحجي هدت عليها لزمتها من شعرها سحلت بيها الگاع وهاي تصرخ خبصت البيت خبص
باوعتلي وصاحت
شهربان :- الثولة واگفة تباوعلي تعاي الزميها
رحتلها بتردد لزمت ايدها خليتها ورى ظهرها
وهاي تصرخ گوة لازمتها لحد مشدت بان ايدها
طلعت المگص وسحبت ايدها :- أظافرج حلوة
هنادي :- والقرآن بان ألزمج اگطعج وصل واخليهم يموتونج بس تسسسوين شي
- هذا حالج وتهددين ؟ اني منج اطم روحي صرخي بلة دا اشوف منو اليفزعلج
- امووتج واللة
- يُمة خفت
قربت المگص من أيدها شلعت واحد من أظافرها
وهاي گامت تگمز شلعت الثاني صرختها زرفت اذني
رجعت ليورة ولازمة ايدي ضامتها لصدري خايفة
رادت تكمل على باقي أظافرها صارت تبجي
وتتوسل بيها متوجعة أظافيرها كلها دم
- ها شو خنستي ومطلعلج صوت بعد
عافتها :- هاي اعتبريها جرة أذن مرة اللخ أگص چف أيدج واخليه بحضنج داشوف شلون تتقربيلنا بعد
جرتني ومشت ضلت عيني على هنادي گاعدة بالگاع عينها بأظافرها والدم اللي بيها صعدنا للغرفة باوعتلها
نورجان :- بان ليش هيج
- حيل بيها
- حرام عليج
- انتِ شايفة وجهج بالمراية لو لا مگالت حرام من شوهتج وانتِ ممسويتلها شي
- واذا راحت فتنت علينا
- خليها واطلعي منها انتِ گليلهم بان سوت هيج واني اتفقت ويَّ شارمن تگلهم جانت تشتغل وياي متدري
- أگول اللخ ما اجت من سمعتها تصرخ طلعتوا متفقات
- لا وين المسكينة متدري ماريد أشركها وياي لتنطرد
- دا أخاف منج والله
- خافي من الكل إلا مني آخر شخص أفكر أأذي بهاي الدنيا هي انتِ أسوي كُلشي ولا أخلي أحد يتقربلج
لليل التموا كلهم وصار مثل متوقعت راحت گلتلهم علينا وبان وگعت بيها اني حبست روحي بالغرفة
قفلت الباب واسمع صوت هوسة جوة
وصوت محمد يتلاغى وياهم بصياح
نزلت دموعي وحشگت روحي بالزاوية مال غرفة
اندك الباب أكثر من مرة صوت هبة وهنادي يصيحن يردن افتحلهن لحد ما ملن وراحن لوحدهن
شوي واندك الباب محمد صاح :- افتحي نورجان
ركضت فتحتله لازم بان من متنها دفعها للغرفة وطب سد الباب تخصر ووگف يباوعلها خدها مورم شعرها مهلس ملابسها مشگگة گعدت عالجرباية متچتفة
محمد :- وتالي وياج بان
باوعتله :- شنو شمسوية
- عود هاي اني وصيتج
- شوكت ما اتذكر
- تثوليها عليَّ شنو
- اختك حقيرة تستاهل الصار الها وابوك مقصر انطاني المقسوم شتريد بعد
- مشرحة أظافرها شكلهن يكشش شتردينه ياخذج بالأحضان طبعًا يكتلج
- هذا هو تصافينا لعد
صفن عليها شوي وهز راسه بيأس :- عرمة بالقرآن
مر كم يوم واحنا على نفس الوضع عركات بان ومشاحناتها ويَّ مرة عمو وبناتها متخلص متعبرلهن حجاية وهن يتعمدن يستفزنها بالحجي يدرن بيها مراح تسكت وراح تتخبل عليهن وياخذنها حجة يشتكن لعمو
اني متجنبة المشاكل يردون مني شغل اسوي اليردوه بدون صوت لا اذن التسمع ولا عين الشافت أخاف منهم
لا تليفون عندي أگدر اخابر بيه يا دوب بالبوگات ناخذه من محمد نخابر بيه ماما عمو مانعنا من التواصل وياها ومحذر كل اللي بالبيت محد ينطينا تليفونه ..
مطفين الضوة فاتت بان للغرفة واجت مددت بصفي
نورجان :- وين رحتي
- يم محمد
- ريحة جگاير جنتي تدخنين ؟
- وحدة بس
- هالسم هذا متجوزين منه ماما مو حذرتج وگتيلها گطعته
- وينها ماما ماكو
دمعت عيوني :- بان مليت اشتاقيتلها ماريد ابقى هنا
- أطير بيج قابل متشوفيني حالي من حالج گاعدة ومنچبة منتظره دا اشوف شدن شتسوي
- مراح تگدر تسوي شي سمعت عمو سالم البارحة يخابر بسجودة گلها بيت شاكر مستعجلين راح يزوجوني بان
حجيتها وشهكت حضنتني حيل ضاع الكلام وضعنا وياه ما ادري شلون وشوصلنا لهالحال جنا مرتاحين ماما فوك راسنا شقتنا نظيفة وبيت خالة ام شذى يمنا جانت أحلى فترة عشتها بحياتي
نايمين بالليل وفزيت على صوت الباب وهو ينفتح
فاتوا اثنين ما اشوف شي ظلمة واحد منهم لازم فلاش
مخليه بوجهنا صاروا گبالنا ركزت شوي ..
جانت مرة ضخمة بس مگدرت أميز ملامحها
لزمتني من فكي رفعت وجهي لوجها
سجود :- منو من التوم انتِ ؟
بلعت ريگي ورديت بصعوبة :- نورجان
هذا الوياها صاح :- كفر بالكريييييم هالجمال ننطيه لبيت شاكر احنا موجودين أولى بيهن
- أكل خرا ابن الـگ*** لا أفلش سنونك بحلگك گعدلي هاي اللخ
عافتني ودارت لبان هاي غاطة بالنوم ماخذة الحباية
أشرت للوياها اجه صب فوك راسها مي شهگت وگعدت مفزوعة تجر النفس گوة لزمتها من فكها عدلت وجها
شهربان :- وخري لججج منو انتِ
- بربوك باع صوتها يلعلع
همام :- آخ الله تچوي هاي
- غير يسكت ابن الگ*** جرلي نورجان نزلها للصالة
شهربان :- ويييين ماخذتها شتردين عوفييييها
- لتصيحين بنت الكلب
اجه هذا الوياها أشرلي اگوم من شافني ساكنة مكاني جرني من ايدي گومني غصب عني گمزت بان تريد تلزم ايده لزمتها المرة من شعرها رجعتها لمكانها
سجود :- كملي نومتج انتِ وبلا صوت شغلتي مو يمج
ضلت تتلاغة وياهم طلعوني وقفلوا عليها الباب گامت ترگع عليه تريدهم يفتحون نزلنا للصالة گاعد عمو سالم ومرته ومحمد گاعد على جهة ومدنك راسه
گعدت هي وأشرتلي اگعد بصفها خفت منها سويت الگالت عليه رفعت ايدها تلعب بشعري وتوخر بخصلاته
باوعتلها وركزت بمعانيها .. صاحبة عيون كبار واسعة حواجبها ثخان تاتو أسود مسويتلهن رسمة شيطانية
وهي منا بيضة حيل فـ بارز .. ضخمة ملامحها حادة
انتبهت لابسة حزام بخصرها بيه مسدس ضليت فاتحة حلكي ..
باوعت لعمو :- جبتها لو لا ؟
سالم :- وصيت ستار جايين بالطريق
- اي ليش لا ننتظر الخاتون شورانا قابل
اندارتلي :- شلونج نورجان
هزيت راسي بدون صوت صوتها خشن يخوف مثل شكلها تضايقت من الگعدة العيون كلها عليَّ ومحمد يباوعلي بنظرات معرفت افسرها متوتر حيل
نص ساعة وانفتح الباب ودخلوا ستار وياه واحد
ركزت شفت ماما داخلة تمشي وراهم دا اگوم الها
لزمتني رجعتني لمكاني نزلت دموعي ..
نورجان :- بس اشوفها حبابة
3 تعليق
سجود :- اشششششش ولا نفس
اخرسيت بس صوت شهگتي يطلع عيني بماما اللي مغورگة عيونها وتباوعلي بقهر ما بيدها شي تسويه
صوت الدك عالباب واصل ليجوة من ورة بان ..
صاحت بيهم :- هاي البربوك الفووووك تسكتوها لا اكوم اصعدلها افرغ المسدس براسها
شدن :- ليش هيج تايهات الج ولبالج ماكو أحد يطلع وراهن
- طلعلج صوت بنت الرگاصة
- تشرفج وتشرف أمثالج
- شيطلع قابل من ام الزلم اشوف العينتين كاتل روحه جنت ألومه عاد شفتج و عذرته مكبرانة على شكلج قبل
- شرايدة سجودة
- اتفقنا ويَّ بيت شاكر هذا الخميس عقد ابنهم على نورجان
- على جثتي والله اخليكم تنطوها
- مو بكيفج اني ما جاي اخذ رأيج بس انطيج خبر تبقين ام العروس
نزلت دموعها :- حرام عليج سجودة البنية صغيرة
- انتِ هم من أخذتي حارث جنتي أصغر منها خليها تعيد أمجاد امها
- متعيييش وياهم يموووتوها بنتي تمووووت يا عالم ماكو واحد بيكم عنده غيرررررة لك سالم بنت اخوووك هاي شلون هيج تنطيها للي نهشوا لحمها وضيعووووها وضيعوا حارث وراها مو المفروووض تاخذون ثاركم منهم
سالم :- ثارنا يطفى بزواج ابنهم من نورجان هيج القانون يكول
- لك يا قانوووووون طفلة دتزوج طفلة لواحد مغتصب
- مو عبد الكريم هذا انسجن ومحكوم خمس سنين اخوه راح يعقد عليها بداله
- لكممممممم شنو من ملة انتووووووا الله اكبرررررر عليكم تتسابقون على بيعة بنتي تمووووتتتت والله
سجود :- بنتج عايبة والعابها راد يصلح غلطته وياخذها شنو المانع
- تسدون الغلط بغلط اكبر وين صايرررررة هاي
سالم :- حتى القانون يكول تسقط التهمة بحال زواج المعتدي على المعتدي عليها واحنا ناس عشاير النا عادات تحكمنا منقبل تضل بنتج هيج وضعها الناس شتكول علينا باجر عكبة تعم حتى على بناتنا ومحد يجي يدك بابهن شكلك بنتهم عايبة
- انتووووووا وعقولكم العايبة أعرافكم الهمجية وعاداتكم الكم متطبقوهن براسي وبراس بناتي
- مو بكيفج انطينا كلمة للناس الخميس جايين يعقدوها
- انحرررررها واكتل روووووحي وراها ولا اخليكم تنطوها لذولة تجار المخدرات
سجود :- انتِ مرة خليج گد حجايتج وسويها عاد نخلص منجن ومن خيستجن فرد مرة
اجت يمها تتوسل بيها :- لتسوووين هيج لتنطيهم نورجان هاي أمانة حارث ما يأذيج گلبج من ينجاب طاري اسمه راح وهو يوصي بيهن
- الله يرحمه ما عرف يضبجن خوش لعبتي براسه وگلبتيه على أهله خليتيه ميشوف أحد گدامه بعدين شدعواج سويتينا مجرمين فوك منسترلج عليها اني جاي اكمل الما سواه حارث بحياته حتى اريحه بگبره
- والله اسوي التردونه اذا تردون اقبل بسالم بس عوفوني گاعدة على بناتي
سكتت ويتبادلون النظرات هي وعمو سالم
انتبهت الها غمزتله وهو يباوعلها ويبتسم
- لأ متسويها تحجين هيج حتى لنزوج نورجان
مسحت دموعها بسرعة :- لا لا والله اقبل بس خلوا البنات عندي
گام من مكانه گال :- هيج الحچي معدل لعد الخميس اجيب المومن ونعقد
شدن :- هيج بسرعة ؟
- اي بسرعة ليش التأخير ولتخافين مهر وحاضر وغايب تاخذين كل حقوقج وعلى حسب الأصول
- ونورجان ؟
- مو ردتيها تضل بحضنج هذا هو
- شمو اليضمنلي راح تلغون الأتفاق اللي بينكم وبين بيت شاكر
سجود :- خابرهم سالم خلي يلغون الزواج كلهم متنازلين عالقضية وخلي يسدون السالفة من يمهم
- تأمرين يابة
خلوا وطلعوا هو وستار ضل محمد گاعد وامه وضعها جان غريب ساكتة وذاك اللي اجه ويَّ عمتي سجودة ضارب ركن واگف يباوعلي من فوك ليجوة
أشرتلي ماما بيدها لحضنها رحتلها ابجي
دافنة راسي بصدرها وهي تبجي على بجيتي
باوعتلنا :- حطي براسج طلعة منا بعد ماكو منا للعقد
شدن :- غراضي والمستمسكات كلهن بالشقة
- اني اخلي الولد يجيبوهن الج اگعدي وديري بالج تفكرين تلعبين عليَّ لأن وكتها ترجع تفتر عليج وأدگها الج بمكان يوجع گلبج وحطي هالحجاية ترچية بأذنج
- شنو الضمان راح تسدون موضوع نورجان يجوز تردوني اعقد وتزوجوها
- انطيتج كلمة شدن وتعرفيني كلمتي ما أثنيها
- اريد اشوف بان
كعدت مترأسة ومادة ايدها عالتخم :- ذيج هي فوك روحيلها البيت بيتج بعد متحتاجين إذن من احد
حجتها وصارت عينها بكفاح اللي شالت خشمها ضايجة وراحت لغرفتها اخذت ماما وصعدنا فوك للغرفة بان خانسة مالها صوت
فتحته ودخلنا جانت گاعدة حاشگة روحها بالزاوية وصافنة بالسگف اول مشافتنا گمزت متفاجأة من وجود ماما اخذتها لحضنها بقوة تبوسها وتشم بيها
شهربان :- ليش هنا ماما شبيج تبجين حبيبتي
كعدت بالگاع وانتجت عالحايط لامة رجليها لصدرها عيونها علينا وگفت گبالها :- مو دا احجي وياج ليش هنا جاية تردين تاخذينا ونروح مو
مردت عليها ودموعها مستمرة بالنزول
تباوعلنا اثنينا ساكتات وحالتنا حالة تخبلت
صاحت :- شبييييييكم متحجون
باوعتلها وحجيت مترددة
نورجان :- ماما قبلت تتزوج عمو سالم
ضلت جامدة للحظات تبعها ضحكات هستيرية
مثل اللي ممصدگة عينها صارت بماما
- تتشاقين ؟
شدن :- غصبًا عليَّ والله
راحت كرفصت كبالها همست :- اخووووووه ماما اخووه
- لو مسويت هيج راح ينطون اختج .. اختج تضيع بان
- لا لاااااا انتِ انطيتيني كلممممة كلتي راح اطلعجن مناه راح اخذجن ونروووح لمكان محد يلكانا بيه لتسوووين هيج ماما لتكسررررين ثقتي بيج لتكسرين بابا وهو بگبره
- لتلوميني ما بيدي شي والله
تهسترت كامت تصرخ وتبجي وصوتها صار عالي
- لج اخووووووووه شلووون الكم نفس تسوووووها حرررررام عليكم دمرتوا بحياته حالفين متخلونه يرتاح
بموته والله اشننننننق نفسي امووووووت الموتة اللي اخذته مني ما اعيييييش بيوم عقدكم احسبيني ميتة
على صريخها فات محمد جرها گوة يسكت بيها
وطلعها وياه من الغرفة وهي تشمر بروحها انتهت
صارت عيني على ماما راسها بحضنها جسمها يهتز من الشهگة صوت بچيها مسموع أعرف كلام بان أذاها
... 《 شهربان 》 ...
دخلني لغرفته الشهگة احسها تطلع من گلبي
گعدني عالجرباية ويحجي وياي يريد يسكتني
شهربان :- راح تتزوج اخوه الخاينة وحدة كذابة بعمرها محبته مقصرررر وياها والله
شهگت :- لتخليهم يتزوجون امووووت محمد
خلى راسي على صدره واني أوخر وأدفع بيه
ضل يحاول يهدأني بس شيطفي نار گلبي
- گلبي يوجعني راح اموت والله
محمد :- اسم الله على گلبج خليهم نارهم تاكل حطبهم لتأذين نفسج على أحد
- كسرتني محمد كسرتني
- اني موجود يمج انسيهم كلهم تذكريني دائمًا راح ابقى واگف وياج لو الدنيا كلها صارت عليج
- اخوه تريد تاخذ اخوه
- اشششش كافي تعبت نفسيتج
وخرت منه لازمة راسي كتله :- انطيني أبرة
- أبرررة ؟
- راسي راسسسسي حينفجر أريد انسى كُلشي صار
- اصبري هسه انطيج حباية وتنامين
- مدا تاخذ مفعولها انطيني الأبرة محمد
ضل يباوعلي متردد كال :- مراح انطيج جرعة أنطيج بس مهدأ حتى تنامين
مهتميت جنت رايدة اي شي ينسيني اللي صار كام للكنتور اخذ ابرة وجرعة صغيرة واجاني يفتح بيها رفعت الردان ومديت ايدي ضربني الأبرة وضل كاعد يمي ايده يمررها على شعري
شهربان :- شوف هذاك بابا ديباوعلي مقهور
حجيتها وأشرتله بأيدي باتجاه الباب همس :- شفته شفته يروحي بس ريحي أعصابج
- مصدگني مو ؟
- أكيد مصدگج
- لتكسرني مثلهم محمد
ضل ساكت رفعت راسي اباوعله :- مبقالي أحد أثق بيه غيرك لتكسر ثقتي بيك
- ما اسويها وعيونج
رجعت راسي على صدره ايده تلعب بشعري بدت عيوني تغفي وأردد بخفوت :- محمد لتأذيني
فتحت عيوني نايمة عالجرباية ومغطيني بچرچف خفيف باوعت ما هو بالغرفة ، تذكرت اللي صار مت غسلت وضليت بغرفته مردت اشوف اي احد
انفتح الباب وفات داير وجهه يحجي ويَّ واحد
شافني گاعدة أشر لواحد من برة فاتت وراه ماما
شهربان :- شجابج اطلعي برة
صارت گدامي كعدت لازمة ايدي عيونها غورگت
شدن :- لويش هيج وياي بان لتصيرين انتِ والدنيا عليَّ اني المن أباوع غير لله والجن محد الي غيرجن
- والسويتيه لمصلحتنا وجنتي مجبورة ومبيدج شي كافي ماما مليت من هالكلام
- والله مجبورة هيانه محمد واگف اسألي جانوا يردون يزوجون اختج لو ممطاوعتهم
- ومنو كلج سجودة حتسد السالفة ترى السوته لعبة منها رادتج توافقين بعمو سالم وراها يدستورها ويَّ بيت شاكر وينطون نورجان اذا مو برضاتج فغصب عنج
- لأ هي انطتني كلمة كالت اقبلي واخليهن يمج وحتى كالت حتطلعنا بالمشتمل نكعد لوحدنا
- ورجلج الجديد ويانا مو ؟
نزلت دموعها :- لتسوين هيج بان
- روحي ماما انسي عندج بنية اسمها بان
- علمود اختتتتتتج لج افتهمي يرررررربي شلون بيها
- ضحيتي بيَّ أكثر من مرة مو بعيد تسويها بنورجان
جان عندي أهون لو عايفتنا ودايرة وجهج من السويتي لج لو غررررريب أبلعها وانجب بس عمووووو يوم عموو اخو ابوي تصيرين على ذمته ما أعرف من يا طينة انتِ شنو من أم لججج متستاهلين هالكلمة والله
محمد :- كافي بان مو هيج
كامت مني مسحت دموعها :- لا عوفها دتطلع اللي بگلبها بعد بان بعد طلعيهن خلي يلچمن گلبي زايد
درت وجهي عنها بنفور قبل لتطلع كالت
- ميخالف اكرهيني هسه بعدين راح تعذريني عالسويته
طلعت اجاني دار وجهي عليه :- أذيتيها بكلامج بان
- تستاهل هي جابت هالشي لروحها كتلها توافقين بيه اسوي شي بروحي وهي مسمعت بسيطة اني الها
نتر :- شنو براسج لج
- مو شغلك
لزمني من فكي ويحجي يحذرني :- والقرآن يا بان لو فكرتي مجرد تفكيييير بس تسويها وكتها تشووفين خبالي من صدك
نزلت دموعي :- امووووووت ولا اشوفه يعقد عليها
اخذني لحضنه :- اطلعي منها انتِ كافي مو كتلج انسيهم ليش تتعبين أعصابج
- مخنوگة والله ما أتحمل افهمني الموت عندي أهون ولا أشوفها ويَّ رجال غير بابا لا ومو أي رجال أخوه هذا اخووووه شلون يگدرون يسووها شلون يغدرون بيه وهو جوة التراب
- سواء قبلتي او لا اللي تگوله سجودة راح يصير محد اله كلمة عليها
- شوكت اجت ؟
تنهد تنهيدة طويلة :- البارحة
- احجي الصدك محمد سجودة شجابها شنو من ملعوب براسها تريد تلعبه بينا هالمرة
- ما ادري بان ما ادري شتريد تسوي خلي تسوي اني اللي يهمني من كل هذا هو انتِ اعقد عليج وأحجز ونروح مندور وجهنا لأحد خليهم هم يحترگون بيناتهم
- مراح تعوفني ؟
- اعوف روحي وما اعوفج بيوم اللي انتحرتي حسيت الدنيا وكفت مصدگت شلون وصلت للمستشفى وشفتج بيج نفس يلا گدرت اتنفس
- مالي غيرك محمد
3 تعليق
- واني مالي غير عيونج اموت واعيش بشوفتهن عوفي كل اللي ديصير بالبيت ولتحتكين بأحد كم يوم وافتح الموضوع وياهم نعقد ونروح نعيش بدنيا ثانية ما بيها لا أهلي ولا أهلج بس اني وياج
لزم وجهي باسني بخدي وباوعلي :- أحبج
... 《 نورجان 》 ...
مر كم يوم مضل للخميس غير يومين
ماما تلوب اشوفها تمشي وتخابر بالختلات ترجع تخلص الليل بجي صوتها صار ملازمني بالليل ميخليني أنام
صرت أخاف من الوضع اللي احنا بيه ، بان مندري بيها أصلًا احسها فاصلة ومتحجي لا وياي ولا ويَّ ماما
سجودة هادئة وهدوئها يخوف تصعدلنا للغرفة
تباوع وتنزل بلا صوت مرات تدز على ماما تريد تجهزها للعقد وماما رافضة تطلع نفسيتها متأذية
مگابلتها وكاعدة بيدي موبايلها ألعب لعبة
انتبهتلها عينها بيَّ گمت كعدت يمها
نورجان :- شبيج حبيبتي ليش مقهورة
- مبية شي أمي خايفة عليج
- مو هياني يمج محد راح يأذيني وانتِ موجودة راح نضل سوة دائمًا
- أختج كرهتني
- مو من گلبها ماما انتِ تعرفين بخبالها لبان تحجي بدون وعي وكلامها صح يجرح بس والله ما عندها گلب بسرعة تنسى متشوفيها الا راكضة لحضنج
- خايفة لتسوي شي بروحها هددتني وهاي خبلة تسويها
- محمد يمها لتخافين
- محمد يخوفني أكثر منهم مو بوعيه نورجان مخبل وحيخبلها وياه بالزايد منين أحميها منه لو من عمتج لو من كفاح الحادة سنونها علينا اااااخ يا ربي
حجتها ودنگت تبجي حضنتها :- لتبجين كافي والله
دا اخاف عليكم صرت ما أنام الليل من جهة انتِ ومن جهة اخاف تدخل عمتي تخليهم ياخذوني منج
- اتخسي هي والوياها يجيسون شعره من راسج واني موجودة ثقي مدامني أشتم الهوى مراح أخليهم ينطونج لا لبيت شاكر ولا لغيرهم
خليت راسي بحضنها صارت تلعب بشعري :- راح تكبرين وتكملين دراستج وتشتغلين وتستقلين بنفسج ويصير عندج كيان بالمجتمع وراح يدك بابج ناس من مستواج وانتِ الراح تگعدين وتتخيرين بكيفج ليضل براسج كلامهم المريض انتِ مبيج عيب العيب بيهم هم وبعقولهم
مسحت دموعي وغفيت بيومها ما ادري بنفسي كعدت على صوتها وهي تخابر وتبجي تحجي بصوت ناصي حتى لحد يسمع
شدن :- ووووين سافر شوكت .. مالي غيره والله خابره راح انتهي .. الله عليك كله موافقة عالزواج والله .. شنو يتزوج قبل كم يوم جان فاتح الموضوع وياي
سدت التليفون وشمرته كعدت بالگاع تبجي بقلة حيلة
- شصاير ماما ويامن جنتي دتحجين
- جان أملي بيه وين انطي وجهي وين اروح بيجن
المن أفزّع
- هذا المدير
- راح سافر تعافيت عليه اني طيرته من ايدي رجال رتبة واله مكانته جان يگدر يخلصني ويخلصجن من سالم وقذارته صوجي اني صووجي
- كافي ماما الله يخليج لتسوين هيج بروحج
- ااااااخ يا الله منين أطلع فدار شلون اوصله
انتهت بليلتها لوجه الصبح وهي منايمة ميفصلنا عن يوم العقد غير يوم واحد ، انفتح الباب وفاتت سجودة للغرفة وراها بنية
ماما جانت معتكفة على نفسها شافتها وأشرتلها
سجود :- گومي لج وجه الأرملة صار كم يوم تنوحين بالله هذا وجه عروس
- وانتِ مقتنعة اني عروس لسالم
- ليش لعد شبيج اخوي روحه خضرة وانتِ صايرة بنفسه خلي يتونس عاد حلال اخوه ميصير لغريب وهم بناتج يبقن يم عمهن .. كوووومي عاد فضيني البنية منتظرة خلي تجهزج
- الله ياخذج انتِ واخوج كرفة وحدة
گامت ماما من مكانها وسجودة تضحك خلت كرسي وضلت ملازمة الغرفة وتوصي بالكوافيرة على ماما جانت مثل اللعبة بأيدها تجيبها منا وتوديها منا
سجودة :- شو بلة اصبغيلها شعرها وحواجبها خففيهن الها بالخيط
شدن :- لتتقربين لشعري ومعليج اطلعي منها اني اعرف شسوي
- مو بكيفج سوي الگتلج عليه
اندارتلها الكوافيرة :- ميحتاجلها شغل هواي جسمها نظيف وحتى حواجبها شمرتهن حلوة شعرها مبين مصبوغ جديد بس حنظفلها وجها والباجر بالعقد عود اشتغلها ميكب وتسريحة
سكتت منها خلت ونزلت واستلمت الكوافيرة ماما مطولت وياها هواي حفتلها سوتلها أظافرها وراحت
گعدت ماما تباوع لروحها بالمراية عيونها بيهن قهر تباوع لنفسها متحسرة ادري بيها تتذكر بابا
- ماما
اندارتلي مغورگة عيونها :- اجاني بالحلم يعاتبني عيونه تلومني نورجان مدا اگدر اطلع صورته من راسي نظراته احسها تزرف صدري جان يردد بان گلبه حاس بيها تريد تسوي شي بروحها
- مراح تگدر اني مراقبتها ومحمد وراها حتى ممخلي شي بغرفته مطلع شكو غرض حاد خاف دتأذي نفسها
- وهي تنلزم ؟
- مراح تسوي شي والله ليضل بالج
بعدنا نحجي اندفر الباب وفاتت بان مشعوطة
شهربان :- دتتحضريله شددددددن
- شبيج يمرضي يقهرري فوك هم الدنيا انتِ
نورجان :- عوفيها بان تعبانة
- لبالج الكلته الج كلام وبس ؟ زين الباجر انتظري هدية عقدج مني
- لتتخبلين امي ليش هيج تسوين بروحج
لزمت شعرها بهستيريا :- اي مخببببببلة اني مخبلة ما عندي عقل
فاتت سجودة دفعتها
سجود :- لج بربوك شجاج تلعلعين من البارحة لليوم
- اكتتتتتتل روحي والله
- عنج عاد تخففين العدد وتسهلين علينا شغل
محسينا عليها الا راكضة برة الغرفة نزلت تركض وكبت عيطة من جوة نزلنا نتراكض شفناها بالمطبخ لازمة سجينة ومقربتها لركبتها
شدن :- لج بان لتتخبلين امووت وراج والله
- كتلتيني واني عايشة ماما بيوم الوافقتي على عمو
- شبيدي يا أمي گوليلي شأجه بيدي ومسويته وخلصتجن وخلصت روحي
بجت :- بابا جان يشوف الدنيا بعيونج
- ليش اني يهون عليَّ حبه عشرته ذكراه لهسه صورته گبالي وين ما ادير وجهي الگي ذكرى تجمعني بيه لتسسوين هيج بنفسج يماما ابوج يحبج راح تأذينه
- ماريد ما اگدر اشوف اخوه يعقد عليج ويلزم ايدج
سجود :- بلا عيارة لج ذبي السچين من ايدج تريد تبلينا بنت حارث عايزين احنا .. همام الزمها
صاحت :- لتتقررررررب لحد يتقرب والحُرررررر انحر روحي
ما سمعلها ميعرف خبالها تقدم عليها نبتت طرف السجينة بركبتها لكفها من ايدها ولزمها ركبتها تصب دم ماما تخبلت كامت تعيط واني واكفة بالباب من هول الموقف
شفتها ترفس بيده الدم يصب من رگبتها
جرحها عميق صاحت عمتي بماما تسكتها
- دكافي عاد اخذها همام اشمرها بالمخزن واقفل الباب خليها منا لباجر يخلص العقد ونطلعها لتروح تبلينا بلوة
شالها وطلع بيها وهي متخبلة تبجي وتصرخ رادت تروح ماما وراها صاحت بيها :- وييييين اگعدي لترحين
شدن :- بس اشوفها رگبتها مدماية تأذت
- حيل بيها وابو زايد من ايدها
- حرام عليج سجودة طفلة هاي متتحمل نزفت هواي
- مبيها شي گتلج ارجعي لغرفتج هسه اخلي الخدامة تفوت تضمدها الها
گوة اخذتنا صعدنا فوك خفت لتگلب عليها عمتي وتأذيها لليل اجه محمد ومن عرف بيها حابسيها گلب البيت عليهم بالصياح ووگف يتلاغه ويَّ سجودة
محمد :- ليييييش حابستها
- انچلبت علينا تريد تكتل روحها
- كتلج الا باااااااااان سويت التردونه عوفولياها ولحد يتقرب منها
- منو گرباها ابن الخرا هي متخبلة فوك ما الزمها تريد تموت روحها مثل ابوها الثولة
- انطيني المفتاح
- متطلعها محمد
- ما اطلعها بس اشوفها
طلعت المفتاح من جيبها وقبل لتنطيه اله گالت :- بس اسمع بيك مطلعها تشوف مني شي ميعجبك خليني راضية عليك
- بس انطيها حباية تهدأها
- لحگت تعلمها على دربك ؟
3 تعليق
- متنام بدونها عمة تتأذى
- اشوفها متفرعنة أثاري مأخرها عليها اليوم
جر المفتاح وراحلها رحت وراه فتح الباب لگيناها حاشرة روحها بالزاوية رگبتها ملفوفة بشاش ابيض
تباوعلنا ملامحها جامدة تقرب گعد يمها ..
محمد :- ليش سويتي هيج اني شوصيتج
- راح يعقدون باجر
- شعليج بيييييهم مو گتلج أخذج ونولي منا ليش متسمعين كلامي بان
- اريد اموت
- حتى اموت وراج
- محد يموت ورى احد
- والله اكتل روحي بس تسوين بنفسج شي
- اريد انام
طلع علبة من جيبه وأشرلي مي ركضت جبتلها گلاص ورجعت انطاها حبايتين شربتهن وغفت بحضنه
رفع راسه باوعلي :- شجاج انتِ اللخ
- رادت تكتل روحها گوة تلاگفوها
- مو جديدة عليها صارت خبرة بهالسوالف
- ديربالك عليها محمد متأمن بأحد غيرك
- توصيني بروحي ؟ ليضل بالج مراح اعوفها
بيومها ضل يمها مطلع من المخزن
نمت ذيج الليلة بصعوبة من اتذكر دمها وهو يصب من رگبتها تشيغ روحي بلوزها صار أحمر من گد الدم
فزيت بالليل على صوت ماما وهي تهز بيَّ
كمت گوة اشوف مخلية الفلاش بعيوني
نورجان :- شكو
أشرتلي بسرعة وتهمس :- اشششششش صوتج ليسمع احد كومي بسرعة دنروح
كمت من مكاني خايفة واشوفها بيدها جنطة صغيرة
1تعليق
- وين نروح ماما
- أهج بيج لو أعرف يذبحوني ما اخليهم يزوجوج
- مو گالتلج عمتي سدوا السالفة
- كذابة طلع كلام بان صحيح رادتني أقبل بسالم ونعقد ومن اصير جوة ايدهم ياخذونج يزوجونج بس هو اني الثولة الصدكت وحدة حية مثل عمتج
اخذت الجنطة طلعنا شايلين أحذيتنا البيت أظلم كلها نايمة بغرفها نزلنا جوة على كيف طلعنا للحديقة
صار بوجهنا محمد درتلها بخوف :- لتخافين يدري
- وبان ؟
- بان ما عليها شي
فتحت عيوني :- وشلون تعوفيها
- ما اكدرررر نورجان ما اكدر اخذها
-وصتج ماما
محمد :- يلا ترى همام كاعد
- عينك عليها محمد
سوالنا طريق وطلعنا من البيت موگفلنا تكسي
صعدنا بسرعة دفعله الكروة ووصاه بينا حركت
السيارة مبتعدين عن البيت نباوع ورانا محمد واگف
گلبي يدك يدك رجفة خفيفة بجسمي اباوع لماما
مو اقل مني وجها أصفر واحسها محتارة كل شوي
تدور وجها تنزل دموعها وترجع تمسحهن
ممنتبهة للطريق لحد مدخلت السيارة بشارع عرفت المنطقة درتلها فاتحة عيوني :- لعمو فدار ماما ؟؟؟
- مالي غيره أحتمي بيه
- واذا مقبل
- اخذج واشرد
وكفنا گبال بيته جانت سيارتهم بالباب وسيارة لخ أعرفها هاي مال شبير نزلنا جان الباب مفتوح اخذت ايدي ودخلنا بوجهنا عالصالة
الأضوية جانت مشتغلة وأصوات زلم جاي منها أول مدخلنا صاروا بوجهنا فدار وابنه وشبير وياهم ناس
العيون صارت علينا الوجوه غريبة ما ميزت أحد
فز من مكانه عاگد حاجبه أشر لمآب تقرب شاوره وأشرله علينا بيده بأعصاب فايرة عروگه بارزة
صرت بظهر ماما اجانا مآب وأشرلنا عالغرفة رحنا وراه اول مدخلنا سد الباب وباوعلنا يحاول ميعلي صوته
مآب :- شجابجن انتن بهالليل شلون تدخلن هيج
شدن :- مجبورة
- اي أدري غير تخابرن تنطينا خبر شهالموقف الخليتنو بيه جدام خلك الله
ضلت ساكتة لاحظ رجفتنا ودموعي يباوع مستغرب
بس ما حاول يحجي أي شي گلنا منطلع من الغرفة
دار وجهه عافنا وراح سد الباب وراه
ضليت راسي وراس ماما بالغرفة
لزمت ايدها ترجف وصافنة بالگاع على خدها آثار دموع
مديت ايدي لخدها أمسحهم وهي فاصلة بغير عالم
نص ساعة مرت خفت الأصوات
انفتح الباب فات بهمة صاير عصبي
فدار :- شعتعملن هين يولي
وكعت ماما على رجله وتبجي :- دخيلتك فدار مالي غير الله وغيرك يردون يزوجون بنتي لواحد بكد ابوها...
