رواية زوجي يعشق اخري الفصل الثامن بقلم ساره الخفاجي
مر اسبوع واني انتظر خبر من عادل وبيوم خابر وگلي لگالي شغل بشركة محاماة.
فرحت هواية وتشكرت منة ،جنت كلش متحمسة وظليت اسال ،وين وشنو طبيعة الشغل ويامن.
طلب مني اروح يوم الاحد للشركة واقابل المديرة المسؤولة عن التوظيف .
رجعت فاتن من الشغل وسولفتلها كلشي فرحتلي هواية .
گعدت يوم الأحد من الصبح طلعت كل هدومي من الجنطة ونشرتهن عالجرباية عبالك بنية مراهقة تتحظر حتى تلاگي حبيبها .
ورة عدة محاولات لبس وتغير استقريت على فستان طويل بدون اكمام اصفر بي نقوش ورسوم على شكل ورود فوكاه بوليرة كابوي ازرگ وحذاء ابيض ورفعت شعري ذيل حصان اريد اترك انطباع حلو عني باليوم الاول اني جدية بالعمل خليت مكياج بشكل بسيط مااريد الفت الانظار الي لان صرت مطلقة بمجتمع ذكوري شرقي .
طلعت وية فاتن للعنوان الي انطانياه عادل ،دخلت للشركة بقت فاتن تنتظرني بمكان قريب سالت موظف الاستقبال عن مكان مدير التوظيف وانطيتة اسمي .
اتصل بالمكتب بعدها وجهني لمكتب المدير رحب بية وكالي أنه عادل مدح بية هواية ،وعادل يشتغل بنفس الشركة بس قسم ثاني ..
بصراحة كيفت من عرفت يشتغل هنا عالاقل اكو احد اعرفة واطمئنيت لان مووحدي هنا .
شرحت الي الشغل وكالتلي أنه حبدي كسكرتيرة مبتدئة وية محامي جبير ولأن اني تاركة دراستي من وقت طويل فلازم ادرب هالفترة .
وجهتني للمكتب الي حشتغل بي وعرفتني عزملائي بالعمل وعافتني وراحت وسط جو مشحون بالتوتر والخجل لاني جديدة ومواجتماعية بصعوبة اختلط وية الناس
گعدت على المكتب المخصص الي بجانب غرفة المدير ،ورة دقايق دگ جرس التلفون جاوبت تكلم رجل صوتة خشم رجولي ،طلب مني احظر دفتر الملاحظات واروح لغرفتة.
اخذت الدفتر الي موجود عالمكتب وقلم طرقت الباب ودخلت جان يگعد خلف المكتب رجل أربعيني ملامحة رجولية قوية ، جان مبين عليه تعب السنين اديه جبيرة ملامحة حادة نظرتة مخيفة ،جدية وغامضة ،سالني عن اسمي وجاوبته .
طلب مني اگعد على الكرسي المقابل للمكتب وأسجل كل شي يگولة بدة يحدد مواعيد الي لازم اتذكرهة ونبهني ان اترك ساعتين من كل اسبوع كوقت فراغ ميشتغل بي .
نبهني على وقت الطعام وشنو نوع الگهوة المفضلة عدة وشون يحب يشربها .
بعدين طلب أنه اكون گد الثقة الي منحها الي واكون كاتمه الاسرار العمل ومااحجيهة حتى لاقرب انسان الي والا حندم .
بعدين ابتسم واخيرا خفت شوية الجدية بكلامة وگال .
اسمي ليث التميمي اكيد عرفتي ويامن تشتغلين بس لازم انطيج معلومات اكثر حتى من تشتغلين تعرفين منو الشخص الي تشتغلين وياه .
مااحب الحجي الي بلافايدة ،اهم شي الشغل ،اذا تردين تلفتين انتباهي لشي معين اشتغلي هواي .
موصلت لمنصبي هذا بسهولة ،تعبت وتمرمرت هواية
لهالسبب احب تكون سكرتيرتي مجدى بشغلهة واتمنى متخيبين ظني .
ابتسمت ان شاء الله اكون گد المسؤولية وابيض وجهك استاذ واستأذنت منه وطلعت .
بديت ارتب الجدول حسب ملاحظاتة
وطبعتهة وارسلت الة نسخة عالبريد الالكتروني الخاص بيه .
شجعني ومدحني مما شجعني عالاستمرار بالشغل بديت اتعود وحبيت الشغل ناس محترمة وحياة ثانية ممجربتهة من قبل أنه اشتغل واختلط بالناس بديت ابحث بالقضايا الي مستلمهة استاذ ليث حتى اكون على علم بيه واعرف أي قضية يقصد من يطلب مني ملف
مر شهر على شغلي وية استاذ ليث جنت كلش فرحانة ونسيت احمد ومشاكلي وحبيت أنه محد سألني عن حياتي الخاصة جنت اسولف لفاتن على كلشي يصير وياية بالتفاصيل المملة إلى أن يوم زهكت وعاطت بصوت كافي اكلتي راسي عن الشغل هية وتضحك اعتذرت منهة لاني صدك فرحانه واحب اسولف بالشي الي احبة تفرجنه تلفاز ونمنه .
مرات افكر أنه الحمدلله الله مرزقني اطفال من احمد شكد حاولت وراجعت اطباء بس مصار عدنة مع أنه ماكو اي خلل بينة ...
لوجان عندي جان شصار بية هسة ،واحتمال جان مصار كل الي صار لو جان عدنة طفل لخاطرة ميتخلى عني ،ضحكت على روحي من تفكيري عالاساس الي عدهم جهال ميخونون ازواجهم .
