رواية الريفية وابن بغداد الفصل التاسع 9 بقلم مجهول

وردة: مرت الايام والسنين ولارا تكبر كبال عيني واني هم كبرت وجلال كبر بس ظل حلو جدي توفه الله يرحمه اخذ روحي وياه احسه ابوي وحياتي كلها فاتت 6 سنوات من عمري واحلا ايام حياتي جلال ظل نفسه ما تغير عليه بالعكس يزيد حبه الي يوم عن يوم مرات تصير خلافات بس عادي ملح الحياة بس هو يحترمني هواي 

وهو هم انشغل بشغله واني منشغله بتربيه لارا وامجد تزوج بس شنو زوجته وحده خبيثه ومرمرته خطيه امجد ما يستاهل يوميه يوديها بيت اهلها بس هي ما تخاف ولا تستحي واني مالي شغل بيها اشتغل واروح اصعد فوك حتى ما تصير مشاكل عمتي وجلال يلحون عليه حتى ارجع احبل من جديد ويمكن لو هذا الشهر لو الشهر اليجي يصير حمل لارا دخلت مدرسه اني ما اعرف للدراسه كلش جلال هو الي يدرسها وهم اكعد يمها اتعلم شوي 

ويوميه جلال يوصلها ع المدرسه بس يوم من الايام اجت لارا من المدرسه وضايجه هي ام اللسان كلشي تفتهم وتعرف يعني نبها 

لارا:ماما تعالي اكولج هاي معلمه ست احلام تريد رقم ابوي وتكلي لا تكولين الامج وانطيج 10 بالاملاء 

وردة: ياا عزززه شتسوي برقم ابوج 

لارا: ماما دائما تكلي ابوج حلو وتسألني عليج حلوه لو لا 

وردة: عرفت المعلمه حاطه عينها ع جلال بس ظل الدم يغلي بعروكي شيجيب باجر واروح للمدرسه واراويها قيمتها الهاي احلام 

سولفت الجلال بليل وظل يضحك ويكول والله ما عندي غيرج

جلال: لج خبله انتي شايفه احلام تخوف اني احلى منها معقوله اعوف الكمر اعوف وردايتي واروح الاحلام باجر راح ترحين وتشوفين بعينج راح تشوفين كابوس مو احلام

ورده: هههههه وشنو هاي عيني مركز بيها حيل حتى عرفتها مو حلوه 

جلال: وردايتي عفيه تعبان عوفيني اريد انام يلا تعالي بحضيني تره اصيح الاحلام ههههه

وردة: لك لا تكول هيج هذا مكاني ما اخلي وحده تاخذك مني 

نمت و كعدت وجلال وصلني اني ولارا  واخذتني الاحرام هي شافتني طبعا شكلها قصه خربتني من الضحك ذكرتني بماضيي المرير الي بالريف هههه

جانت لابسه تنوره سوده عريضه وبدي برتقالي وشال سمائي وجنطه سمائي وحذاء سمائي وحاطه حمره حمره كلش وعدها شامه ماخذه نص خدها وجاره كحله شوي وتوصل الاذنها كلشي بيها جبير ومو متناسق وفوك هذا كله تطك بعلجها 

احلام: هلو انتي ام لارا 

وردة: اي اني ام لارا اجيت انطيج رقم جلال بنفسي خفت بنتي تنقله غلط

احلام: هاا شسوي برقمه ومنو كالج هذا الكلام 

ورده: لا تلفين وتدورين اعرف هذن السوالف مو جديده  عليه 

احلام: ما اسمحلج احترمي نفسج افتهمتي 

ورده: عفتها تسولف وحدها ورحت للمديره اخذت قرار نقل لارا واخذت لارا ورجعنه للبيت بس شنو منظر ست احلام بالي ظليت اسبوع كل ما اتذكر اضحك

.

.

.

طبعا هاي السنين كلها جلال جان يشتغل بقطعه ارضنا ونبنيها شلون ما نريد ومشغول ويه العمال والمقاولين بعد تعب البنيان وكمل البيت الحمد لله مو بعيد عن بيت عيالي قريب فرق شارع بينا هم احسن من اضوج اسير ع عمتي وبديت بهوسه النقل والترتيب كملت نقل غرفتني بيتنا الجديد اربع غرف كبار يصيرن فوك كل حمام وياه الصحيات والطابق الارضي عباره عن استقبال جبير للخطار واستقبال داخلي النا ومطبخ جبير ومأثث من مجاميع

وحديقه وياها كراج للسياره وهم اكو صحيات جوه يعني بالنسبه الي بيت العمر حابته كلش لان صار مثل ما احنى نريد وكملت نقل وشبعت بجي لان عيالي احبهم كلش وراح افتقدهم بس هذا الشي لازم يصير لان ايمن راد يتزوج لان تأخر حيل ومجان يقبل يتزوج زوجنه امجد قبله وهسه راح ياخذ غرفتنه يتزوج بيها واني ار الي بيت مملكه خاصه الي جلال يحب الاكلات الجديده بيتزا فطائر وهاي السوالف ما يحب التقليديه واني ظليت اطبخ شلون ما احب ويوميه اسوي حلويات ومرات عمتي تجي يمنه تظل يوم وتروح لو عصريه وتشكي شكد من زوجه امجد وكالت يمكن امجد يطلكاه لان تعبته وصدك اسبوع وامجد طلك مرته وعمتي كلتله هاي المره ما تتزوج غير بنت خالتك هي صدك افنان بنت خالته حبابه وحلوه وصغيره ونادره وفقيره بس هو اجل الموضوع شوي حتى ترتاح نفسيته وعمتي كالت نزوج امجد وايمن بيوم واحد واني حللت وطلعت حامل وفاتت اشهر واخذت سونار وطلع ولد وقررنا نسمي امير وهاي المره اني اختاريت الاسم بس كلش تعبانه بدايه حملي تعبتني النساوه كلش وشغل البيت ولارا يعني صار صعب حيل والاصعب من اجيب تكثر المسؤوليات بس عمتي خطيه ما عايفتني 

الفصل العاشر من هنا