رواية سواد الاثمد الفصل التاسع 9 بقلم نورس

سجود :- مو كتلج راح ارجعها الج بمكان يوجع گلبج ضميتي نورجان مني ولبالج خلصت تباركي لبنتج اليوم عقد قرآنها على عبد الإله

فزت ماما من مكانها بسرعة صرت وراها 

ايدي لزمت ملابس ماما حيل وضاغطة على شفايفي اباوع لماما مصفرّة وجها باهت من السمعته

شدن :- شدتحجين انتِ يا عقد نورجان ماكو 

- نورجان خليج مأمنة عليها هسه هم يجي وكتها واشوف شغلي وياها خوش ضامتلها ضمة وانتِ حسابج بعدين على لعبج وياي الظاهر اخرفيتي ونسيتي منو سجودة 

- شتردين تسوييييين مو گلتي سدوا السالفة شتردييييين بعد 

- منو كلج ؟ الجماعة حامين على ميخاذون بنتج ودام نورجان ولت بديلها موجود ليش بعد نلغي الاتفاق اشو هن نفس الخلقة ونفس الدم

- بكُل عقلج دتحجين تردين تنطين بان بديلة عن اختها ؟

- شنو المانع هي بعمر نورجان وشاكر وربعه ما راح يعرفون مبدلين بينهن انطيهم بان عبالهم اختها 

- لج انتِ من يا ملة شنو هالعقلية المرييييضة العايشة بيها مصدگة أخليكم تنطوها لهذول الزبايل والله أشتكي عليكم وأخلي القانون يشوف شغله وياكم ويطلعلي حقي وحق بناتي 

- لا يابة خفت صايرة تهددين وتطالبين بحقوقج بلة سولفيلي يا حقوق هاي التحجين عنها 

- تردين تزوجيها بالأكراه بيا دين ويا شرع صايرة هاي 

ردتوا نورجان وحجتكم جانت معتدين عليها وتردون تلمون السالفة بس بان بيا عذر تردينها تاخذ مكان اختها  

- هيج رايدة أحرك گلبج عليها

- لج شنو هالحقد اللي شايلته بشنو أذيتكم هسه لتحسبوهن بناتي الي بس حارث ما وگف بعينكم ؟ 

نترت :- لتعيشين دور المظلومة انتِ جبرتيني أسوي هيج من البداية البنية موجودة وردنا نفض الموضوع ونستر عليها رحتي بليلة ظلمة شردتيها من البيت وخليتينا نفررر بوجوهنا عليها مندري بيا گاع لافية 

باوعتلي گالت :- لا ما خليتهم يعقدولها گبال عينج ويجرجروها ببدلة العرس وياخذوها .. بسيطة 

- حرام عليج سجودة صغيرة والله وينها وين الزواج وين بيت شاكر 

صاحت :- اي ابچي ابچي اللطامة خلصتي عمرج تنوحين وتتوسلين هنا وهناك بنت فگر ما متعلمة عالأحترام گتلج أخلي سالم يعقد عليج وبناتج يمج معززات مكرمات بس هو الفگر يضل فگر 

لزمتني ماما حيل جارتني لحضنها :- ما انطيها والله

لا وداعتج وراها وراها الگاها واسحلها وازوجها لواحد اخس من تجار المخدرات ذول الما راضية بيهم بس خلي هسه افض من عقد بان وزواج محمد بالاول

أسمع الكلام بس جنت منتهية عيوني أفتح وأغمض 

لازمة بماما حيل أريد بس أسيطر على رجفة جسمي 

ركزت بجملتها الأخيرة جابت طاري زواج محمد 

باوعت بوجه ماما أطرافي خدرانة ووجهي باهت 

-شوفيها سجودة وكلام الله مريضة مو بوعيها 

- مريضة مو مريضة مواتة طبها الف مرض ميخصني اليوم العقد وكلها كم يوم يدزون مهرها نجهزها وتولي لرجلها 

- أگلها مريييييضة من يا طينة انتِ تموت هاي متبقى عايشة اذا صارت عنده دشوفي حالها هاي مال زواج

- ما بيها شي اصحى مني ومنج اخذتي حارث وانتِ اصغر منها وهاي عين الله عليج تزوجتي وحبلتي وخلفتي لتبيعيهن عليَّ شدن انتِ مو ردتي تنطيها لمحمد لو هاي هم وحدة من ملاعيبج

- وانتوا بكل عقلكم اخلي المدمن هذا يعقد عليها 

- هو المدمن بعد ميريدها من الأساس ميتشرف بيها ولا بيج جبتله اغاتها لبالجن تكوشن عالورث انتِ وبنتج وتلعبن براس ابن اخوي

- مگشرين بيه ورثكم بنتي ليش تدخلوها بثاركم ويَّ بيت شاكر بان شنو ذنبها أمانة حارث هاي وصى بيهن 

- اهووووو خبصتينا حجاية والثانية وصاحت أمانة حارث هو حارث لو بيه خير مجان لفه زبالة من الملاهي مثلج لحياته وخلف منها زبايل انگس من امهن هاي عود اذا طلعن صدك بناته 

ماما تخبلت :- لججججج خافي ربج هيج عيني عينك تحجيها تشككين بـأصل بنات أخوج

- هو الياخذ من الملاهي شيترجى قابل 

- مداس رجلي أطهر منج ومن أكبر واحد بعشيرتكم وبنت الملاهي متهينيني بيها آخررررر واحد يحجي بالشرف هو انتوا بديتوها من كسرتكم لحارث 

لبيعتكم بناته هجولتونا لا خليتونا نتهنى بحياته وهسه لاحگينا ورى موته دتكملون اللي بديتوه شتردون من عندنا مو كافي ؟ 

- أطفي النار المشتعلة بينا وبين بيت شاكر وزواج نورجان جان الوسيلة الوحيدة حتى أخمد هالنار وأرجع علاقتي بيهم ورحتي انتِ طيرتيها من ايدي بس شوف ربج ما يكطع دزلي نسخة ثانية منها أكمل الزواج بيها 

أشرت عمتي على الوياها تقربن مني ماما صارت بوجهن

- ما أخليها تعقد متنطوها وخري گتلج

جانت منهارة تعيط وتصرخ ولازمتني بقوة وهذن واگفات يردن ياخذني من ايدها ما گدرن يسون شي

شفت سجودة مدت ايدها طلعت تليفونها وشالته تخابر گالت :- جيبلك اثنين واصعدولي

هاي الكلمة جانت كفيلة تخليني اموت خوف

لتسوي شي بـ ماما لزمت ايدها أحاول أهديها 

شهربان :- كافي ماما اهدأي مو هيج دتعبين اعصابج

صاحت :- لج يردون يزوجونج وين اروح بيج وييين اضمج من الميخافون الله ذوول اني صوجي گالتلي نورجان خلي ناخذها ويانا اني مسمعتها گتلها ميأذوها اني ام الصوووج اااااااخ مني 

حجتها وعضت اصبعها حيل وجها أحمر خفت عليها جانت متهسترة وضامتني وراها متخلي احد يتقربلي 

- ماما ابوس ايدج بس اهدأي اگوم اشوف شيردون وارجع لتخافين

- وللللج اكوووولها زووووواج بنت الصخخخخخخخلة زواج دتحضررررج حتى تعقدين 

- لعد خلي أعقد واسوي اليردونه وافض السالفة 

- ماما كافي الله يخليج اذا مو اني فراح يلگون نورجان وينطوها وهذيج متتحمل من الصارلها هي بس تسمع طاريهم تتخربط مو النوب تتزوج وتصير عندهم

- وانتِ شنو حتى دتاخذين مكان اختج بذنب لا انتِ ولا هي الجن ايد بيه

- حظنا هذا ماما يمكن ربج يريد يصحيني على زماني وديعاقبني بالسويته بيجن اني جرجرتجن لهنا واني اتحمل المسؤولية لا انتِ ولا نورجان الها دخل 

- اسكتي بان اسكتي لتفورييييين دمي 

بعدها دتحجي واندك الباب وصوت واحد من حراسهم

گلها :- طالبتني عمة 

صاحت :- فووت

فاتوا تلاثة من الحراس لابسين بدلات رسمية باوعوا للوجوه وردلها :- أمريني 

أشرتله على ماما بيدها

سجود :- هاي اخذها احبسها يمك ولتخليها تطلع لحد ما انطيك خبر واذا حاولت تفتح حلگها لو صرخت تشوف شغلك وياها وانتَ افهمها بعد 

باوع لماما من فوك ليجوة گلها :- صار 

تقرب عليها ابتعدت لزگت روحها بالحايط ولازمتني حيل ضامتني بديها أحس برجفتها جسمها يهتز 

مد ايده عليها سحبها هجمت عليه لزمته خرمشت رگبته وصفحة من وجهه وهو لازم ايدي يلاويني 

سطرني راشدي وگعت للگاع دنك عليَّ جرني من شعري گومني بأيد وأيد لازم رگبته ويباوع لأيده وللدم 

اجت ماما دفعته تريد توخره مني وتصرخ اجاها الثاني سحبها وجرها طلعوا من الغرفة وهي تصيح بأسمي

ضليت أتلاوى ويَّ هذا اللازمني ما أگدرله اني أهامش بيدي أريدع يفلتني وهو فنه لو تحرك من مكانه

سجود :- گومها نزلياها جوة ولتضربها وراها عقد مو مال أطلعها للجماعة مشوهة 

حجتها واندارت طالعة وأشرت للوياها ينزلن 

گام جرني وطلعني واني أصرخ خبصت البيت

عدينا من غرفته صرت أصيح بأسمه :- محمددددد 

.. ولك محمدددد الحگني .. محمددد وييييينك 

ماكو صوت ولا أحد اجاني نزلني جوة 

دخلني لغرفة أشرتله عليها عمتي 

وگف بالباب :- غيره عمة ؟

- شدن يمك بعد 

هزلها راسه وطلع ردت اگوم اريد اطلع دفعتني جوة ما خلتني لزمت حزام السلاح وتأشرلي على مسدسها

- عوفيها ليش حبستيها شتردييين منها 

- ما رايدة منها شي خلي العقد يعدي على خير واطلعها

- مارييييد ما اتزوج مو بكيفج 

- أمرجن انتن وامجن بيدي أگلجن عيشن تعيشن أگول موتن تموتن وازوج التعجبني من يجي براسي فبطلي عناد وخلي المرة تجهزج لو يعجبج أخلي الحرس يتونسون بأمج واحد واحد واخلي صوتها يوصلج 

انكتمت ووجهي دخن عيوني مغوشة من الحرگة

خفت من كلامها وگلبي خمشني على ماما 

أشرت الهن بعيونها بأتجاهي واجني استلمني

وحدة تسرح وحدة تسوي لازمة أظافري

جنت ساكنة بطريقة غريبة حتى اني مستغربة من هدوئي صرت بيدهن مثل اللعبة يحركني مثل ميريدن 

- زين عاد أحمر خدود وجهج تعبان مو مال عروس

- ليش انتِ مقتنعة اني عروس ؟

باوعت للمرة الوياها يتبادلن النظرات 

حجت :- ليش لعد مو اليوم عقد قرآنج 

- عقد قرآني على واحد مشايفة شكله ولا اعرف عمره ولا اعرف اسمه هذا زواج برأيج لو بيعة ؟ 

ضلت ساكتة المرة أشرتلها على حلگها بمعنى اسكتي لتحجين وتأشرلها عالباب خاف تجي سجودة

اجتني المرة بيدها فستان أسود قصير

گالت :- هذا العمة ام همام تگول خلي تلبسه 

تقربت تحجي بصوت ناصي :- المرة الجانت فوك وياج امج ؟ 

هزيت راسي 

- طالعة تشبهيها كُلش حلوة

سكتت شوي ورجعت حجت :- اگولج ليش يجبروج عالزواج اذا مرايدة خطية شفت امج فرفحت وراج ولهسه اسمع صوتها من اطلع برة وست سجود راحتلها

فزيت من مكاني :- شسوتلها 

- لا لا شبيج مسوت شي جانت دتحجي وياها خالتي سمعتهن امج جانت تتوسل بعمتج حتى تلغي الزواج بس ست سجود ما ردت وضالة تغلط وتفشر عليها

عضيت شفتي بقهر دمي محترگ احجي يأذون ماما اسكت اشعوط بالزايد ، ارفض هالزواج راح يرجعون يحطون نورجان براسهم ويجبروها تاخذ اخو اللي اغتصبها

كمية الأستحقار والرخص اللي ديحسسونا بيها وكأن احنا لعابات جامدة بلا مشاعر ما النا قرار هم يقررون عنا شلون نعيش حياتنا 

وكفت كبال المراية باوعت لأنعكاسي شفت وجه نورجان بوجهي ، مستحملت نزلت دموعي غصب عني

مسحتهن بسرعة فاتت كفاح شافتني 

الخلقة مگلوبة خشمها ميگصه السيف

كفاح :- ديلا فضيييييها عاد الناس منتظره 

گمت طلعت امشي وراها كل شوي تندار 

وتدير وجها أسمعها تحجي بس ما افهم

وگفت بـ باب الاستقبال دگته على كيف طلع همام 

شافني باوعلي من فوك ليجوة گصني گص بنظرته

فتحلي الباب وأشرلي براسه :- فوتي بس ولا نفس

دخلت امشي وراه شفت عمتي گاعدة بصفها عمي وستار زوج عمتي وياهم اثنين زلم كبار واحد من الزلم مگابلها وتدك سوالف وياه صوتها خشن من تحجي

همام وگف يم الباب ايده بجيب بنطرونه وعينه وياي

اول مدخلت توجهت الأنظار عليَّ سكتوا أشرتلي 

عمتي اگعد بصفها مشيت گعدت كارهة حتى روحي

الرجال الجان مگابلها يباوعلي سألها

شاكر :- شكد عمرها البنية ؟

سجود :- ١٦ سنة

- راح تصير جرجرة بالمحكمة يجوز نلغيه

- عقد المحكمة تعقدون لا بعد يمكم العندي تعقد قرآنها وتاخذها منا

- واني انطيتج كلمة كتلج بس يرجع عبد الإله من سفره اني بيدي اجيبه ونجي ناخذها ويانا

- والشغل المتفقين عليه ؟

رجع ظهره عالتخم :- هاي بعد يم عبد الإله يرجع وتتفاهمين وياه

- ماكو هيج حجي سلمني الطالبته منك بعدها تجي تاخذون مرة مني غير هيج ألغي العقد من اساسه وارجع افتح القضية واسويها محاكم وبدال حكم

الزواج ابو ٣ سنوات أجرجركم للسجون 

- شو صارت تهديد سجودة ؟ 

- احسبها مثل متريد العندي گلته 

- خوش حجي يجي نسيبكم واتفقوا وياه بعد 

باوعلي :- شسمج ؟

ما رديت عليه ندستني عمتي بخاصرتي :- يحاجيج 

درتلها عيوني غورگت أباوعلها بأستحقار وعناد مرديت

باوعلها مستغرب وهي خزرتني 

شاكر :- ليش تخزريها خليها تحجي

سالم :- اسمها شهربان واعذرها البنية شوي خايفة

- هو حارث مو عنده بعد بنية ؟ 

ضلوا عمو وعمتي يتبادلون النظرات گله :- اي صح

- منو منهن هي الصغيرة لو الجبيرة ؟

قبل لا واحد منهم يرد فات واحد من الحراس جايب

الشيخ شمرت عليَّ شال اخليه على راسي هذا كله عيوني متشكلة بذول الاثنين منو بيهم العريس 

بكل عقلي جنت مركزة بيهم كبار بالعمر يجون گد عمو اذا مو أكبر واحد منهم لحيته شطولها والله بيها موس

أشكالهم مريبة أكثر من حجيهم اللي ما فهمت منه شي وعمي ضارب ركن منطيها سكتة مخلي عمتي تتفاوض 

لحظة العقد تفاجأت من شالوا التليفون وفتحوا كام وياه طلع عريس الغفلة ما جاي لهنا اصلًا والعقد حيصير عن طريق الموبايل 

30 تعليق

مشفت شكله يا دوب عرفت اسمه عبد الإله صوته يوصلني لحظة ما ردد موافقته عالزواج ضحك وصاح

شاكر :- مبروك ابن اخوي منك المال ومنها العيال 

عبد الإله :- ايه من طـ*** 

فتحت عيوني مصدومة وهذا عمه ضحك بصوت عالي وسد التليفون ، ضلوا هم يحجون واني خليت وطلعت

حسيت بيه يمشي وراي 

انداريلته :- شبيك همام ؟

تنهد وايده على رگبته

همام :- جنت رايدج الي بس امي ما قبلت شنسوي بعد 

- امك استكثرت عليَّ ابن خالك المدمن مو عاد تاخذني لأبنها

- شسوي انتِ صايرة براسي 

- ادفرني لعد وخلي مكاني هنادي راح تموت على متباوعلها 

ضحك :- ها لگفتيها ؟

- متفوتني 

- بنت شدن بعد

- شعجب مو ام الملاهي امك ما معلمتك

- يابة روحي اذا ام ملاهي وتشبهج انتِ وامج اقبل بيها واني الممنون

- حتى سجودة تفرغ اللي بحزامها براسك 

- هم صدك 

باوعت ليفوك وسألته :- محمد هنا ؟

- بغرفته 

- يعني يدري بالعقد 

- يدري متشوفينه حابس روحه 

صعدت فوك لغرفته بقيت واگفة گبال الباب مترددة ادخل لو لا لحد مستجمعت نفسي وفتحت الباب 

جان متمدد على جربايته بيده موبايله اول مشافني فز من مكانه وشمر التليفون  يباوعلي من فوك ليجوة

مسح على وجهه وجر نفس يباوعلي

محمد :- عقدتي ؟

- عقدت

- مبروك 

عضيت شفتي بحرگة وهزيت راسي واني اضحك 

- مبروك محمد ؟ 

- ما جان بيدي شي اسويه و..

قاطعته بصياح :- شنو الما بييييييدك صار ساعة أصرخ بأسمك حتى تجي تخلصني منهم وانتَ طلعت گاعد بغرفتك وهم يجرجروني ليجوة 

- شسوي يعني فهميييييني شسوي كلها معارضة زواجنا كلها بوجهنا من أبوي لأمي لعمتي حتى امج مراضية 

- لعد وين اعقد عليج وننهزم وين اخذج واشرد بيج من الدنيا كلها وين كلامك من تگولي لو الدنيا كلها توگف بوجهج اني راح اضل واگف وياج وين كلامك ووعودك 

- هذا الحجي قبل لا تنتفح سالفة زواجج بدال نورجان شرطت عليَّ عمتي اعقد على بنت خليل وراها تخليني اعقد عليج واني قبلت جان ابالي أخذج ونسافر منا بس ورة السوته امج خربت كلشي جنت مخططله 

- لتتحجج گول اني مجنت رايدج من الأساس وجنت رايد استغلج ومن شفتني طرت من ايدك حاولت تعتدي عليَّ 

- ما جنت بوعيي

- لتكذب

- جنت تعبان بعدين يلا حسيت على نفسي

- لتكذذذذذذذب 

صحت :- أمنت بيك يالحرررررمة لك جنت أشوف بيك الأمان خنت ثقة ماما أكثر من مرة لخاطرك كسرتهن وصدكت بيك امشي وراك مثل العمية

17 تعليق

- كلشي صار خارج عن إرادتي انتِ تعرفين سجودة

- لك خليك مرررررررة رجال واحجي الصدك كوووول اني مو زلمة كول اني خنتج اني جنت مستغلج ومستغل إدمانج سنة سنتييييين تحوم وراي صار أربع سنين فتحت عيني عليك 

- والله هي جبرتني

ضحكت :- تدرررررررري ما ادري أشكرها لأن بينتلي انتَ شكد عديم رجولة وتمشي بكلام مرة لو ألومها عالشمرة الشمرتنياها بديلة عن أختي 

- حجيت وياها گالت تعقدين على عبد فترة بسيطة وراها تطلب الطلاك وترجعين نعقد اني وياج 

ضليت صافنة بوجهه بعدم استيعاب :- فترة بسيطة ؟

گال :- اي كلها سنة بالزايد ونرجع سوة وعد عمتي انطتني كلمة 

- انتَ مستوعب شنو دتگول ؟ 

رفع السبابة والأبهام يفرك بين عيونه حسيته غريب عبالك مو هو عيونه صايرة حمر أحسه گوة واگف 

گتله :- احجي الصدك محمد شملوا راسك وگلبوك 

جان كل شوي يفرك براسه وضعه مو طبيعي يحجي بطيء وكلامه يادوب اكدر اخذ منه جملة مفيدة 

مشيت عنده :- احجي محمد باوعلي واحجي لتفور دمي

باوعلي يفتح عيونه بصعوبة دار وجهه وحجى

- كالت بان راح تجيب سمعة لجهالك من تتزوجها بيبيتها ام امها رگاصة بالملاهي وامها مينعرف أصلها من فصلها وبان يجوز تطلع مو بنت عمك واختها عايبة مغتصبيها من هي وصغيرة محد راح يقبلها على نفسه يتزوجها ويناسب هيج عائلة 

13 تعليق

عضيت اصبعي حيل اطلع حرگة گلبي بيه 

- اني الزوج مصدگة اكو ذكر يعرف يحب ويوفي نسيت الدنيا بعيونك نسيت امي واختي ونسيت حتى روحي وياك الصوج مو منك مني اني الصدگت وثقيت 

- تدرين بيَّ أحبج وما فد يوم جذبت بحبـ.....

- لك كافي كااااافي مو حتى صرت اشوف هالكلمة رخيصة من كد مسمعتها منك ومأملني بيها وتالي هدمت هالأمل على راسي 

- والله أحبج

بجيت :- الله ليحبني إذا أحبك دمرت كُلشي الله ياخذك الله ياخذك محمد الله ياخذذذذك وياخذني ويخلصني

درت وجهي دا امشي لزم ايدي يمنعني

صحت بيه :- وخر 

لزم وجهي ويتوسل بيَّ تغيرت نبرته :- لا بان لتعوفيني اني أحبج هسه اكول لعمتي اخليها تجيب الشيخ ونعقد 

- شبيك بابا عقدت عقددددت صرت على ذمة رجال وانتَ من الأساس عاقد على غيري شو وخررررر

- اخذذذذذج مو بكيفج شنوووووو تعقدين على غير واحد انتِ بس الي ما انطيييييج الهم مالتيييييي

22 ت

تخبل كام يشيل ويكسر خفت منه صدك حسيته مو صاحي الكزاز ترس الكاع وهو يمشي عليه حافي رجله تجرحت وكامت تنزف

ويصيح :- أنعل ابوهم لابو منين ما طلعوا من أهلي لأهلج هسه اخرررررب كلشي والله مياخذوج مني أكتل روحي وأكتلج وما انطييييج  

اجه همام عالصوت شافنا اني ابجي

وهو متهستر يصيح راحله لزمه چتفه 

باوعلي صاح :- اطلعي برررة

طلعت اركض رحت لغرفتنا فتحت الباب فارغة 

تذكرت هي بـ بيت الحارس نزلت طلعت برة رحتلها

جانوا واگفين حراسهم بالباب ما خلوني گمت أصرخ 

دقايق وطلع هذا الخرمشته أشرلهم يعوفوني أدخل

دخلت مفرفحة عيوني تدورها بالمكان لگيتها بغرفة 

أول مشفتها شمرت روحي بحضنها أصرخ بجي لمتني بحضنها تبجي على بجيتي تحجي وياي تريدني ارد

صرت أشهك واني أشكيلها :- ماما گلبي يوجعني .. ولج ماما الحگيلي راح امووت .. گلبي راح يوگف والله

انتهيت النفس گوة أجره فحطانة بجي احتارت بيَّ

گامت جابت دولكة مال مَي وصارت تصب بيدها وتغسل وجهي وتسمي واني أشهك ..

صارت تفرك بصدري ودموعها تجري خليت راسي بحضنها  الشهگة تطلع مني أحسها تگطع صدري

گدرت أهدئ بحضنها ايدها تمررها على ظهري ، ايدي 

رخى جسمي على لمساتها وكل شوي تدنك تبوسني 

ما أدري وراها شصار فتحت عيوني اني بغرفتنا نايمة 

فزت اول مشافتني واجتني تسأل بخوف 

شدن :- شجاج يماما شسويتي بحالي بان 

گعدتني انتچيت على تاج الجرباية عيوني منفوخة

وهي أباوعلها الوجه أحمر عيونها مغورگة تنهدت 

شهربان :- لتباوعيلي هيج ماما فدوة أروحلج

گالت :- عقدتي مو ؟

حضنتها وصرنا نبجي اثنينا 

ما ادري بجيتي على زواجي 

لو خيبتي بيه من دون الكل 

ايدها على خدي تمسح بدموعي :- اخذج وننهزم والله ما اخليهم ياخذوج مني

- كافي ماما لتتأملين خاف جنتي قبل بس سجودة وسالم بوجهج هسه بيت شاكر كلهم يصيرون ضدج  وانتِ مو گدهم

- شلون تغمضلي عين واني ممأنة عليج شلون انطاني گلبي اعوفج واروح بذيج الليلة شنووو من ام اني

- لتگولين هيج اني الجبتكم لهنا واني اتحمل نتيجة غلطي لبالي ذاك الزبالة المرة صدك رجال وگد كلمته وراح ياخذني بكلمتين منهم بدفروا راسه وباعني 

سكتت شوي ورحعت باوعتلها :- روحي اطلعي منا اخذي نورجان وروحوا سافروا لترجعون بعد 

- وانتِ ؟

- اني أدبرها كلها كم شهر راح يمل مني ويطلگني مو هذا اتفاقهم ؟

- ٣ سنين بان 

- لأ ماكو هيج حجي الافتهمته هو هم مراضي بهالزواج وعمتي تگول فترة وتطلگون 

- شفتيه ؟

- لا ما اجه فاتحين وياه كام وعقدولنا يگولون مسافر

- عبد الإله اصغر من اخوه عبد الكريم عائلة كلهم الإجرام يمشي بدمهم شلون أأمن تبقين عندهم 

- ماكو فايدة ماما ماكو فايدة عقدنا وانتهى 

- العقد باطل اذا مغصوبة 

- لا باطل ولا شي اني رضيت باليردونه وين متريد توصل خلي توصل بعد اني مليت وانتِ تعبتي ونورجان تعبت مو كافي 

8 تعليق

توسلتها :- اذا تحبيني من صدك اخذي نورجان وروحوا اختفوا منهم عمتي بعدها تدور عليها لتخليهم يلزموها

- اي روحي ماما اني هسة متزوجة كافي بعد ارضي بالأمر الواقع 

ضلت ساكتة قويت روحي وحجيت :- اخذيها وروحوا لمكان بعيد لتضلون بـ بغداد لتكسرين بنورجان ابوس ايدج

- هم گالت نورجان ليش وانتِ ؟

- اني هنا راح أنتظرج روحي اشتغلي وشوفيلنا سكن زين وكوني روحج وارجعي بعد فترة اخذيني 

ساعة واني أحجي أقنع ماكو فايدة لليل قبل لا تنام رجعت فتحت وياها الموضوع وجانت حجتي نورجان

گتلها :- ماما سويتي زين وطلعتيها منا لتخلينا نرجع لنقطة الصفر ترى بس يلگوها يشمروها على واحد من جماعتهم وينتهي فلمها وانتِ يضغطون عليج بينا حتى يجبرونج تاخذين عمو سالم هيج أحسن برأيج توصل لهاي المواصيل ؟

تنهدت بحسرة :- ما اگدر بان ما اگدر شلون ينطيني گلبي واعوفج

لزمت ايدها بستها :- الله يخليج اسمعي كلامي والله جزعنا يا ماما نريد بس نرتاح ونلتم احنا التلاثة بدون منباوع لأحد ورانا ابوووس ايدج اسمعيني وروحي

مسحت دموعي اللي صارت تنزل بلا وعي مني 

اخذتني لحضنها مررت ايدها توخر شعري ورة اذني 

- كلها كم شهر ألم روحي وارجع اخذج منا حتى لو مقبل يطلگج نرفع دعوة خلع عليه 

- ميعقدون محكمة ماما دبري روحج هسه انتِ ونورجان ولتهمين بيَّ

- ليش دتحسسيني انتِ زايدة عليَّ لتزيدين نار گلبي بان والله الصار مو بيدي محمد جان بيومها كاعد وعرف بيَّ طالعة منا لو ماخذتج جان اعترضني وتالي لا انتِ ولا نورجان اخلصجن 

- مدا الومج والله انسي الصار تقبلت الـ اني بيه وراح أضل منتظرتكم لحد مترجعون تاخذوني

- مراح ارتاح ولا تغمضلي عين براحة الا بيوم ما اشوفج انتِ واختج گدام عيني 

- راح يجي هذا اليوم وعد مني راح أشيل عنج حملنا واعوضج عن كُلشي شفتي من أهل بابا ومني راح ألمجن بـ بيت واسجله بأسمج واعيشجن أحلى عيشة بعيد عن كل هالناس لا سجودة ولا سالم ولا عبد الإله ولا......

18 ت

قبل لا أكمل كالت :- ولا عقيد فدار وضباطه اعرف شتردين تكولين

ضحكت همست بصوت ناصي :- ضامتها عنده مو ؟

جرت حسرة :- لعد شنو ابالج اروح لفؤاد الأغبر حتى بنفس الساعة يخابر سالم يبلغه على مكان اختج

ملگيت روحي الا واني بـ بيته استنجد بيه وهو مقصر دگلي صدره بعد كل الصار هو الوحيد الأگدر أأمن عنده نورجان واني مرتاحة محد يگدر يوصللها منهم  ...

                     ... 《 نورجان 》 ...

صار كم يوم هنا محد مقصر وياي بشي

يعاملوني مثل ميعاملون بنتهم در بالبيت 

عمو تيم ماكو منه حاسبني مثل بنته

شبير قليل صايرة اشوفه عنده شغل 

لازمة كرسي در نفتر بالحديقة ونسولف 

الجو حلو بيه نسمة هوى باردة عالخفيف 

زرعهم ريحة الياس تارسة المكان والحديقة مفتوحة عليها المرشات اجتني ريحة تراب مبلل تتوسط الحديقة نافورة كبيرة ينزل منها المَي صوته مريح للأعصاب 

وگفنا يم النافورة گعدت عالطرف وايدي تلعب بالمَي 

نورجان :- اني كُلشي افتهمت بعائلتكم بس اكو شغلة ضلت ابالي 

درة :- وهي ؟

- شيخة تصير اخت جدج يعني عمة ابوج 

- اي

- لعد لويش عمو تيم يصيحلها يمة 

- عمة شيخة فاگدة ابنها الوحيد بأيام النظام السابق وراها ترملت وردت لبيت اخوها وابوي وكتها جان صغير وفاگد امو هي صارتلو ام وهو صار مكان إبراهيم

- إبراهيم ابن عمة شيخة ؟

هزت راسها :- جانت تشوف إبراهيم بأبوي من دون اخوتو وهو جان حنين عليها وابوي يحسبها حسبة امو ما يردلها حجاية لو تطلب عيونو يشيلهن وينطيهن الها 

- انتِ مو گلتي جدج جان متزوج اثنين 

- اي ابوي وعمتي ام يمان من الأولى وباقي عمامي وعماتي من الثانية 

- يعني شُبير اخو عمو تيم بس من الأب

- بالضبط 

- يااااااا هسه افتهمت خرب شگد حلو 

ابتسمت وكملت تحجيلي :- جدتي ام أبوي حرمة شيعية تصير اخت صاحبو لجدي عزام راد يناسبو واخذها بساعتها اخوة جدي ما رضولو لنها من غير مذهبنا بس جدي الله يرحمو ما جان يرد لاحد

عاد شرطو عليه ياخذ وحدة من بنات عمومتو وگام جدي تزوج الثانية وصار عندو من حرمتو الأولى ابوي وعمتي سهاد الچبيرة ومن الثانية عمامي سلام ووليد وشبير وخمس بنات  

- لعد وينهم شو مشفت واحد كبير ببيتكم

- ام أبوي تمرضت وانطتج عمرها لمن جان ابوي وعمتي صغار وجدي كتلوه بطلابة عشائرية قديمة بينّا وبين عشيرة لخ انغدر بيها 

شهگت :- عززززة وشصار 

- صارت ثارات بين العشيرتين عمامنا هم ما گاصرين كاتلين اثنين من زلامهم وصارت جرة وگعدات طويلة عريضة وعشاير تدخلت يلا فضت بين العشيرتين 

حرمة جدي الثانية ساعتها ترملت وردت لبيت اخوها (الخال فدار) وهناك الخال تكفل بيها وبعيالها وياهم ابوي وعمتي سهاد ما عافهم بس حرمتو فرحة الله يسلمها ما سرها الحال وبدت عتعمل مشاكل تايطلعهم

( 2 ) 

وصلت بينهم حتى للطلاك ومن تصل للحلك اخوتها يردوها لخالي وعلى هالحال لحد ما صبحوا بيوم لگوا حرمة جدي ميتة بفراشها لا تحرك ايد ولا رجل

وليومج ناس تگول متسممة وناس تگول جلطة وخالي من ذاك اليوم حرّم يصل حرمتو لانو شاك الها ايد بالسالفة من وكتها خالي تكفل بولد اختو كلهم وعمة شيخة جانت حاملة مسؤوليتهم وما تزوجت ورى وفاة زوجها وضلت تربيهم 

جنت مندمجة بكلامها لحد مگالت :- بابا جان عمرو ١٧ سنة جان متزوج عندو علي وكتها 

فتحت عيوني :- عززززززززة 

ضحكت :- حگج تستغربين احنا من زمان عمامنا يزوجون ولدهم من اول ميبلغون ما عندهم ولد يصل العشرين واهو عزابي ومالو ولد يشيل اسمو حتى الخال فدار دحگي تحسينو اخ جبير لولدو ما جنو ابوهم 

لحد ما كبروا وتغير التفكير وتبدلت العقلية هسع ما عندنا واحد متزوج گبل لا يكون نفسو ويسند روحو بشغل عيگدر يعيش بيه عائلتو مو عايش بخير ابوه واكبر مثال جدامج عمو شبير ومآب 

- أطباعكم جانت غريبة قبل

- الفضل لأبوي والخال فدار هم لموا روحهم بروحهم والتفوا على باقي عمامي ربوهم وعلموهم يعتمدون على نفسهم وهسع دحگيهم واحدهم ازلمة طول بعرض كلمن گاضبلو بيت وسيارة وملتهين بأشغالهم 

- ابوج أحس تفكيره يختلف عنكم شلون جان قابل يتزوج بعمر صغير 

- جدي جبرو ياخذ بنت عمو اللي هي امي وهو ما جان بيدو شي معيگدر يكسر كلمتو 

- و امج شگد جان عمرها وكتها

- امي جانت أكبر من ابوي بخمس سنين

8 تعليق

ضليت فاتحة حلگي :- انتوا شو الوضع عندكم مگلوبي

- عجل جدي وعمي هيج رادوا شيعمل يعني

- بس صغير حيل وهي الله يرحمها كبيرة عليه 

- منين متدحگين تشوفين زواجهم ما راهم بس اللي براس جدي محد يگدر يغيرو لو تنطبك السما عالگاع 

- وشعجب ابوج متزوج ورى امج بعده صغير 

- خاف من مرة الابو تظلمنا واحنا جنا صغار وكتها وعدت السنين وكبرنا وعمة شيخة وعماتي يتوسلن واهو قافل عالزواج

- شگد يحبكم لعد بحيث ضل كل هالسنين بدون زواج لخاطركم 

- ماكو بحنية گلبو اهو ابو النا وابن لعمة شيخة واخ جبير لأخوتو يدحگون نفسهم بيه شوفي هالخير والعز العايشين بيه كلو بزودو وبعرگ جبينو لم نفسو بنفسو والخال فدار جان على راسو يعلمو ويوجهو

- عمو فدار شگد حباب ما ادري بان ليش مجانت تحبه

- اختج مو ؟ 

- اي جانت تگول ما ارتاحله 

- من گد ما عمو شبير يسولف بيها وبمكينتها تمنيت اشوفها

- نسخة مني بالملامح بس فرق اللون

- شلون يعني 

- اني شگرة هي شعرها اسود جنه ليل اني عيوني شهل هي خضر غامقات

- عجل يصير عندنا لعابتين 

- لا ملامحها هي أحد وأحلى مني بس ضعفها مخرب عليها

- هذا حسنج كلو وعتگولين هي أحلى ؟ 

ابتسمت الها بعدنا دنحجي انفتح الباب الخارجي

وفات اخوها يمشي شافنا اجه بأتجاهنا 

علي خيبر :- ها السلام عليكم شو هين

ردينا عليه أشر لأخته :- حجابج يولي يمان واگف برة تايريد يدخل

شالت شالها من على كتفها لفته على راسها رجع اندارلي

عقد حاجبه :- وانتِ باقية هيج مهلعة بشعرج هاذ ؟

- ما محجبة اني

- الحجي يفيدج يول 

باوع داير مدايرة شال الكوشة شمرها عليَّ :- هاج غطي بيها روحج 

وخرتها :- يااااا شبيك

- ول دحگي عمي وصاني بيج گال لتخليها تطلع جدام أحد من زلامنا انتِ وشعرج الأصفر أدري بنية لو كاسترد 

در :- اي عفية نورجان راح يأذن الظهر اريد افوت 

اخذتها ادفع بكرسيها واباوع لعلي بطرف عيني وهو واگف متخصر ولا عبالك اكبر مني بسنة شايف روحه 

صاح وراي :- ما عاجبها الصفرة 

درتله وجهي طلعتله لساني هز ايده وغمني ..

دخلنا للبيت اخذت در لغرفتها ساعدتها تگوم للحمام وگفت يمها عالمغسلة أساعدها ووگفت هي تتوضى واني اباوعلها لحد مكملت واندارتلي ..

- متصلين ؟

هزيت راسي لا سكتت مني ورجعتها للكرسي تحركت للطبلة مالتها عليها مصلاية وتربة لبست إحرام الصلاة أذن وبدت تصلي وعيوني تراقب حركاتها 

هادئة منظرها يبعث السكينة وجها بيه قبول مو طبيعي مجرد ما اباوعلها أرتاح ، أحسها واعية تفهم شغلات أكبر من عمرها منعزلة بعالمها الخاص

كلما اباوعلها تقرة كتب تجود قرآن لو تصلي ما يوم شفتها مطلعة شعرها كدام واحد غير ابوها واخوها وعمامها 

انتبهت الها مكملة وگاعدة تسبّح 

ابتسمتلي وحجت من عندها 

در :- بابا الله يحفظو جان يومية يوگفنا اني وعلي ويشرف عالوضوء مالنا بالبداية جنت اضوج لان كبرت وبعد هذا هو تعلمت من اول ما بلغت اني اصلي ملتزمة الحمدلله بس هو يلح علينا يگلي ميخالف هو بس اباوع توضي ولو شوي خطأنا يجبرنا نعيدو كلو كلش متشدد علينا من ناحية العبادات

- متتضايقون ؟

- هالشي ميضايقنا بالعكس نفرح على حرصو علينا هو وعمة شيخة هي اللي علمتني عالصلاة ما عافونا ابد بابا فوك راس علي وعمة شيخة فوك راسي 

باوعت لأظافري :- تدرين در ؟ ولا مرة أحد گعد وعلمنا عالعبادات اللي تخص مذهبنا ماما دوم مشغولة و..

سكتت وگفت العبرة ببلعومي من تذكرت 

أيامنا بـ بيت خالي ومرته وشلون خلصناها 

كملت :-  اتذكر اول مبلغت واجتني الشهرية قبل بان لزمتني ماما تعلمني شلون لازم انظف جسمي دائمًا وما اخلي بيه شعر ومن وكتها عيوني تراقبها وتطبعت بيها 

6 تعليق

شتلبس ألبس مثلها شتسوي اسوي مثلها أقلدها أتجنب حركات معينة تخرب أنوثتي ملابسي مرتبات دائمًا شكلي شعري ميصير يبقى مخربط صوتي ما أعليه من احجي خاصة گدام الولد بس ما فد يوم شفتها تصلي 

- هالشي مو غلط هذا كلو نظافة شخصية ومن المستحبات

- أعرف بس مدا تفهمين أسلوبها بالحياة بعيدة كُلش عن العبادات انتوا تستغربون من تشوفوني ممحجبة واني بهذا العمر لعد لو تشوفون ماما شتگولون 

- زين انتِ ما جربتي تصلين تتعلمين من ذاتج

- لا وين جنا يم بيت خالو وهذول شوي ويلحدون من الانحلال العندهم وماما دوم بالشغل مو بالبيت منو الاسأله ويعلمني

- يعجبج أعلمج ؟ 

أشرتلي أروح يمها رحتلها گعدت گدامها

- أعلمج عالوضوء والصلاة جربي مرة وحدة تصلين وتتوجهين لرب العالمين بنية صافية وشوفي نفسيتج شلون عترتاح وكتها انتِ قرري اذا تستمرين بيها او لا

وگعدتلي بالساعة تفهمني على طريقة الصلاة وشنو أگول بيها وشلون انوي واتوجه واني صافنة من كم المعلومات اللي انحصرت براسي ..

كاعدة بالگاع متربعة ايدي على خدي واباوعلها مركزة بالكلام اللي تگوله سكتت شوي وضحكت تباوعلي

در الزهراء :- ها دختي ؟

- يعني شويونة بس كملي كُلش مستمتعة ودا استفاد اريد أتعلم عالصلاة واگوم اصلي مثلج اضوج من اشوفج تصلين واني واگفة اباوعلج 

ابتسمت تابعت حديثها علمتني عالصلاة النوب الوضوء 

در :- إضافة احنا نگول جمل بالوضوء بعضهن من دعاء الأمام علي "عليه السلام"...

من نغسل ايدنا اليمين نكول ( اللهم اجعل كتابي في يميني ) يعني عندعي ربنا اثناء الوضوء حتى بيوم القيامة ينطينا كتابنا بايدنا اليمين

- كتاب ؟

- اي كتاب صفائح أعمالنا اللي تكتبها الملائكة بالدنيا وهاي راح تكون بشارة من الله أما لدخول الجنة لان أعمالنا الصالحة غلبت السيئة او للنار لأن سيئاتنا تفوق حسناتنا

- عزة

- من نغسل ايدنا اليسرى نكول ( يسر ولا تعسر ) 

أما الوجه ( اللهم بيض وجهي في يوم الدين ) 

والشعر ( اللهم احفظ شعري وبشرتي من النار ) 

ومن نوصل لغسول الفم نكول ( اللهم اسقني من حوض الكوثر ) 

74 تع

- شنو هو الكوثر ؟

- الكوثر هو نهر موجود بالجنة وأصل هالكلمة يدل عالكثرة والزيادة اللي يشرب منو ما يظمأ بعدو وتوجبلو شفاعة النبي صلى عليه وآله وسلم 

3 تعليق

من نشم المي اثناء غسول الانف ( اللهم شممني رياح الجنة ) 

والقدمين ( اللهم ثبت قدماي وقدما والداي على صراط مستقيم ) يعني عندعي ربنا يسهل النا أمر عبورنا على صراط المستقيم 

- يعني شنو 

- خط رفيع يمشون عليه الناس قبل لا يصلون باب الجنة وكتلج اللي ينطوه كتابو بيمينو هاي معناها بشارة لدخول الجنة فبالتالي راح يصير اخف من الريشة وهو يمشي على هذا الخط اما اللي ينطوه كتابو بيسارو فمع الاسف ذنوبو راح تثقلو ويسقط من الصراط المستقيم للنار حتى يخلد بيها 

- اول مرة اسمع هيج 

ابتسمت :- للعلم كل هذا الكلام هو مستحب ومو لازم تكولينو بس بيه تذكرة اثناء النطق راح تتذكرين الحياة الابدية بعدين

- شلون حافظة كل هذا

- بابا علمني 

- بـ بالي هواي اسئلة وما اعرف منين ابدي 

- أي شي ما واضح اسأليني وان شاء الله افسرلج اياه اذا اعرفو او بابا موجود تكدرين تسألينو عندو طريقة عجيبة بالأقناع ومعلومات حلوة راح تستمتعين وانتِ تسمعيلو 

- يمة اخاف منه الاگرع

- هههههههه يولي حرام عليج منين سويتي اگرع عندو شعر ترى

- بس خفيف عيونه كبار تخلس من يخزر واحد

- عجل لو شايفتو گبل شعرو ولحيتو متعرفينو تحسين عندو وقار ووجهو يجيب الطمأنينة 

- لعد ليش صار أگرع

- ناذر نذر لو صار يرجع يربي لحيتو 

- شنو هو 

- من ارد اوگف على رجلي 

- من شوكت وانتِ عالكرسي

- صار ٣ سنين على هالحال 

- عزة بس هواي 

- حامدتو وشاكرتو دام اشتم الهوى وأهلي فوك راسي هاي لوحدها نعمة من الله

گمت توضيت مثل ما علمتني وكل شوي اركض اسألها شكول وارجع اعيده كملت هي واخذت منها إحرام الصلاة ووگفت حتى أصلي وهي توجهني وتذكرني شنو لازم احجي اثناء الصلاة ..

توجهت وبديت أصلي فصلت عن العالم وكأني أخاطب رب العالمين واني على يقين انه يسمعني ، بعد ما تشاهدت وسلمت علمتني درة أسبح تسبيح السيدة الزهراء بنت الرسول وأطلب حاجتي ..

دعيت من الله يرزقني بشوفة ماما

انگطعت اخبارها عني من يوم ما سلمتني بيد عمو فدار

دمعت عيوني مشتاقة لشوفتها واشتاقيت لبان اللي عفتها وراي جسد بلا روح شبه فاقدة ..

رفعت راسي لكيت عمة شيخة واكفة وعلى ثغرها مرسومة ابتسامة يمها بنية كبيرة تجي بالتلاثينات 

شيخة :- عين الله وابو الحسن شحلاتج بالإيزار وجهج يضوي تگول فلگة گمر .. تقبل الله يـيمة

در :- منا ومنكم صالح الأعمال شلونج عمة 

حجت جملتها الأخيرة للمرة اللي واگفة تباوعلي

مشالت عينها مني اندارت لشيخة بأستغراب

سهاد :- عجل هي هاي العقدتوها على شبير 

- وشبلاج تحجين من گفه خشمج اي هاي حرمتو دحگيها تلالي جنها گمرية 

- يا ومنين اجت حرمتو مو عيگولون أمانة مأمنيها هين

- اي حرمتو وبأسمو واليگربها ويكدرها بحجاية الو حساب وياي گبل الخال وابو علي 

- أعصابج عمة وهسع انا شحجيت بس ضل ابالي عمي ابو مظفر راح يغتاظ من يسمع ماخذيلو غير حرمة وانتوا معطينو جلمة تاخذون منو غادة لشبير

- لا يضل ابالج عمج الو علم بكلشي لا اغتاظ ولا زعل بس اطلعن انتن منها 

- يا يا شوف البخت يعني انا تاسوي فتنة ؟ 

- رحم الله امرأ عرف قدر نفسه

- انعم الله عليج عميمة بعتيني وانا بنت اخوج وصرتي تدافعين للغريبة الما صار يومين تعرفيها 

11 تعليق

- بعد عمة بعد دگي والطمي وگولي شيخة طردتني من البيت لخاطر الغريبة 

- وانا شحجيت عمي حگج عليَّ هاج أحب راسج

حجتها وباست راسها وعمة دايرة وجها منها 

گامت المرة تشاقيها لحد ما لانت تنهدت وردت

- سهاد لا تزتين حجي جدام اخوتج ترى ما يرضون ينجاب طاري حرمة اخوج بالشين ان جان من جريب او بعيد خالج ابو مؤتمن موصي

- وشدعوة هيج يوصون بيها شوراها

- عجل انا شحجيت يالصگعة

- غير نعرف من يا عمام وين أهلها هيج لفيتوها بسرعة بسرعة 

- لا تدخلين انتِ أبو علي محذر محد يسأل تردين روحيلو ذاك هو واسأليه 

- لا يمة وين اسألو ما رايدة روحي دام هو حاجي هيج هاي جدامج سديت حلگي ما احجي شي بعد 

- وهو المطلوب 

كمنا طلعنا للصالة جايات خوات شبير جبيرتهن سهاد ام يمان وكلهن يعتبن شلون سووها سكتة وما عازميهن على عقدنا وشيخة تگلهم أمانة ..

لحد ما فات عمو تيم للصالة وراه الولد علي ويمان 

تيم الله :- ول يابا ألتمن الحنينات

تطافرن عليه يسلمن عليه هاي اللي تبوسه من جتفه هاي اللي تبوس راسه وهو يحضن بيهن مبين حيل يحبهن وهن محترماته حتى ما طلع الهن صوت بعد

الا اخته الجبيرة وگفت تعاتبه

سهاد :- عش هيج يخوي عجل تعقدون لشبير واحنا خواتو مالنا علم ندري من الغريب 

- بسرعة صارت ام يمان ما لحگنا نعطي خبر لأحد 

صابرين :- وهيج يمر عقد شبير سكتاوي سودة عليَّ دومو مظلوم لا زفة مثل باقي الشباب لا عرس يبيض الوجه لا زواجة بيها حظ

- يول عقد شكلي بس تانسد بيه حلوك گرابتنا تاما يطلعون بيها ألف لولة ولولة بحجة غريبة بـ بيتكم

- يا عجل ما يتممون الزواج ؟

- شلج بهالحجي اطلعن منها انتن ويا ويل ادحك وحدة ترد تفتح هالسالفة متلوم الا نفسها وحسابها عندي 

هن ضاجن شلون نتر وسدها بوجهن شال بنت اخته 

من الگاع يرفعها بالهوى ويلاعبها وهي تضحك 

شيخة :- يوم المنى وادحك بزرك بيدك 

علي خيبر :- و هذا البعير الواكف شنو ؟

36 تعليق

حجاها ويأشر على روحه ردته :- انتَ عتگت بعد شنو متريدني افرح بأبوك وازوجو

- لا يابا حگو 

- عجل حاجيه وگعت وذرة من لساني وانا احجي واقنع وهو ميبس راسو 

- هذا هو عروستو يمي 

تيم :- لا يربك تغربلنا 

- عش يبا فوك ما ابر بيك عجل وين لاگيها ابن يدور حرمة لابوه تايتزوجها

- انكتم 

سكت بعد ما طلعله صوت انتبهت للولد اللي واكف وراه عرفته هذا ابن سهاد ، عينه جانت بـ درة اللي ملتهية ويَّ بنات عمتها تسولف لاهية عن نظراته

انتبهلي اباوعله دار وجهه خله وطلع 

لاحظت ولدهم ما شاء الله عليهم رغم أعمارهم صغيرة بس أصحاب بنية ضخمة ..

ضلن خواته تغدن يمنا وهو گعد وياهن على لمتهن ومحد جابت طاري عقد شبير مني بعد كدامه 

للعصر اجن نسوان عمومتهم وزوجات اخوة شبير اثنين وانترس البيت صارت هوسة واني ممتعودة على هيج اجواء ودرة ملتهية ويَّ البنات حسيتهن مراغبات وجودي عزلت روحي بغرفة درة ..

لليل شاورتني عمة شيخة ووصتني اصعد لغرفة شبير انام لأن بناتهم يباتن هنا اليوم وهو ماكو گالت اخذي راحتج بيها استغليتها صعدت فوك لغرفته 

كاعدة ايدي على خدي ضايجة انفتح الباب وفات

فتح عيونه :- ها يالفحلة انتِ هين ؟

گمزت من مكاني :- عزة شتسوي هنا 

فركت ايدي :- عمة شيخة گالتلي اصعدي نامي بغرفة شُبير 

- شگد شريفة بنت أشراف 

27 تعليق

سد الباب وفات ينزع بساعته واگف

يم ميز تواليت يباوعلي بالمراية 

ضليت ساكتة ومدنگة راسي شفته صار گدامي

لزم وجهي رفعه مقابيل وجهه عقد حاجبه 

- جنتي تبجين ؟ 

- لا

- عجل عش عيونج مغورگة

- اريد ماما 

حجيتها اختنگت وبجيت جر نفس طويل وهو يباوعلي

- خابرتني البارحة 

باوعتله بسرعة :- عليك الله ؟ شوكت ؟ شگالتلك ؟ شلونها ؟؟

- زينة وسألتني عليج كتلها عقدت عليها ترى طكتها هلهولة كالت انتَ خوش زلمة خليها يمك هذا خالك ما أأمن بيه

- مدتكذب شُبير 

- لا 

- احلف 

- وداعة هاي البنكة 

رفعتله حاجبي كال :- شبلاج ما مصدكة يابا وحگ هذا التيشيرت اللابسو 

- دتضحك عليَّ

- انا ؟ لا بالحرام حتى اسألي مآب جان واكف 

- اشتاقيتلها شُبير

حجيتها ورجعت نزلت دموعي گعد گبالي 

- يندارلج فدوة شبير هو والراء اللي بأسمو عيونج لتبجيهن يولي گلبي ما عيستحمل يشوف نثية تبجي ومحمد 

مسحت دموعي :- أنثى مو نثية كم مرة صرت دا أگولها

ضحك وكام وكف مدلي ايده

شبير :- گومي يول تانطلع 

- وين 

- افرج بالبستان

طرت لبست حذائي ووگفت ارتب بشعري گدام المراية

انداريتله :- يلا

- هيج طالعة ؟

باوعت لـ لبسي ما بيه شي لابسة بنطرون وتيشيرت ردانه تلث أرباع وياهن حذاء رياضي لبسي كل مرة

- شبيهن لعد ؟

- انستري ازلامنا تارسة المكان وكلها طايح حظها يدحكون للحريم 

- والله مستور 

- عجل ماكو طلعة 

- لا لا هسه ألبس من درة

- عش ما جابولج ملابس ؟

- لا 

مخلاني اطلع وگام للكنتور يدور لحد ما اندارلي

بيده ملابس شمرهن عليَّ وأشرلي بيده

- البسي هذن بساع

باوعت جايبلي ملابس رجالية :- عزة شُبير صدك تحجي وين يكفلي ذني 

- يرهمن يرهمن يلا يولي استعجلي 

- دطلع لعد دا ابدل 

وگف ضربله صفنة بوجهي :- شبيك هيج تباوع يلا 

- غرفتي يولي ما اطلع 

حجاها ومدد عالجرباية بيده موبايله 

- واني وين ابدل

- هين گدامي

شهگت :- عززززة 

- عزة العزاج غير حرمتي وعاقدين 

- عقد كذابي

- حبيتها هاي الكذابي بس هم ما أطلع 

- يااا 

- انا كلت العندي ما يعجبج ذاك الباب بس خلي ابالج بس تخطي رجلج برة هالغرفة ألغي الطلعة 

2 تعليق

- اروح للحمام

دا امشي طفر قبلي وگف بالباب مانعني باوعتله 

- عش تباعين هيج حمامي ما اقبل احد يدخلو غيري 

- ولويش عود ؟

- تلعب نفسي شعمل عجل 

- شُبيررررر حباب

- ماكو بدلي هين بالغرفة

- صارت عناد مو بعدك متعرفني ترى اني أعند منك 

اخذت الدشداشة لبستها فوك ملابسي ونزعت البنطرون وهو عض شفته يباوعلي مبستم باوعت لروحي بالمراية حصرتني البچية من شكلي ..

همست :- شُبيرررر

شبير :- لتدحكين هيج ومحمد حلوة 

- كبيرة عليَّ بيها تفصال فستانين ويزود منه تراك لبان

15 ت

- هم هنا لاحكتني بان 

اجاني يعدل بالدشداشة ويسوي بالياخة اخذ غتره ووكف يلفها على راسي وغطى وجهي تنقبت

شبير :- ويلي ربي سبني الشهل 

باوعت بالمراية بس عيوني طالعة انداريتله نزلتها من وجهي 

- عزة اختنگت

- رجعيها لج

- والله تخنك

- ماكو طلعة

رفعتها بسرعة راح هو للكنتور هم طلعله دشداشة وبحركة سريعة محسيته الا نزع تيشيرته باوعت للوشوم اللي بجسمه عضلاته بارزه بشكل مبالغ 

لبسها ووكف گبال المراية يلبس بالغترة ويدندن ويَّ روحه باوعلي سحبني وگفني بصفه يباوع بالمراية 

فرق الطول بينا يفشل هو جنا تيل واني جني شگدوتني

شبير :- عز الله جنج واحد من فروخي

- لا تضحك على جراحي شُبيررر

ضحك واخذ تليفونه واخذني من ايدي وطلعنا نمشي على كيف ليگول بايگيلنا بوگة طلعنا برة البيت من الباب الخلفي وابتعدنا اباوع صارت بيوتهم ورانا 

نمشي بين الزرع لحد موصلنا البستان اني طالعة روحي كل شوي أعثر وهو لازمني خلصها وثوووول وچبح

وياهن كفخة عالطاير 

وكفنا يم مي صحت :- الله عندكم بحر

17 تعليق

كفخني :- وين احنا بالمالديف هاي ساگية للزرع

- يا كبيرة خرب شگد حلو 

وگف على جهة يدخن ويباوعلي واني أفتر گدامه الدنيا نص الليل الجو يخبل القمر ضاوي وبس احنا بالمكان

رفعت الدشداشة ضايقتني صاح :- هيييييين هين يولي 

باوعتله :- ها

اجاني ينزل بيها 

- بعد طلعي زرورج يولي عش ضامتهن تاما يبقن بنفس واحد 

- محد هنا ترى 

- هساع متحسين الا واحد جافت علينا 

- مضايقتني والله كل ساعة اوگع حيل طويلة

- عجل اگعدي عش تگمزين 

- بس شوية ارفعها

- تاكسر رجليج 

- شُبيرررررر حباب

- اشتعلت روحو الخلفني شبلاني انا وجبتج شووووي يولي لتخلين رجلج تطلع

رفعتها وشديتها صفح رجع گعد بمكانه مدنك بتليفونه وكل شوي يرفع راسه يباوعلي  الهوى يخبل نزعت الغترة من راسي الهوى يخبل صار يلاعب شعري 

اباوع بالمكان شفت شجرة بيها برتقال ..

رحتله جان داير وجهه ديخابر وشكله منفعل ما لحكت بس على :- شبلاج بنت الخررررررررا 

اندار شافني سكت وملامحه مقتضبة نهى الأتصال

باوعلي :- ها يول

- اريد برتقالة

- منين اجيبلج 

- هذيج شجرة مال برتقال

اخذته الها باوع :- عالية هاي يولي ما الوح 

- لعد هذا طولك كله بشنو مستفادين منه 

- ما اگدر انتِ تسلقي وجيبي 

- شنو قرد

- حشى مآب القرد 

- يلا لعد

- شتعطيني بالمقابل 

- اهووو يلا يلا جيبلي برتقالة

- خلي اشيلج وانتِ جريلج وحدة 

- خاف اوگع

- انا اگضبج لتخافين

شالني جلبت برگبته حيل عطت :- لا لااااا عفية شُبير نزلني راح اوگع

- معليج گاضبج يلا يولي لتصيرين جبانة 

رفعني اكثر عطت صاح :- وسمممممم لهالصوت بلا عيارة لج ما انزلج الا تجيبين وحدة

گوة لزمت بوحدة جريتها حيل گوة انشلعت من الشجرة 

- جبتهاااااااااا

اختنك بجكارته صاح :- شنوووووو

- تكاتيك شبيك

- خاف عتقصدين كتاكيت ؟ 

- اي 

- لا اليوم ملعوب بإعداداتج انتِ شنو شعندج وي اسماء الحيوانات لازمة عليهن لزمة 

- هو تكتوك لعد شنو 

- هذا فرخ بط ذاك فرخ دجاج شجابو عليه 

- هن بنات عم متشوفهن يتشابهن 

- صدك والله ما عرفنا من يا عمام ؟ 

- لا بالله انتِ الناصبة عليَّ كومي يول كووومي وانعل شرفو اليطلعج بعد 

حجيتها وگمت امشي گدامه صاح وراي درتله

اجاني نزل الدشداشة ورجع لف الغترة على راسي 

صفن بعيوني تنهد واخذني من ايدي

راجعين بنفس الطريق همست 

نورجان :- شُبيرررررر

رد بنفس النبرة :- ها يووووولي

- راح اگولك شي بس لتگول نورجان گالتلي

- احجي يول شمفينه تاسمع 

- هذا علي يگول عليك اشتعلت روحك بليتني بالصفرة يقصدني

- لاه لاه وبعد 

- ومآب يسميك الحرمة 

- اويلي تاگضبو الا اطلع مصارينو وبعد شگالوا عليَّ احجي يولي لتضمين شي

- ماكو شي بعد بس عمو تيم يكول عليك سايب وعمة شيخة تكوله لتخلي يروح لبغداد بعد وهو متحلفلك مدري ليش 

- بس هيج ؟

- بس 

- عجل مو گتلج أهلي يحبوني 

- شبيهم وياك

- لان يتيم يولي وما عندي أهل

- لتزعل اني يمك

اندارلي :- لاه صدك ؟ 

- والله 

- عجل اسلگينا بوسة وريتي گلبي ور وانا يتيم معوز حنان 

دزيتله بوسة بالهوى رفع حاجبه :- لا والله ؟

- شنو

- اريد بوسة غميجة 

- شنو يعني 

باوع يمنى يسرى ماكو أحد لزمني من شعري وقربني اله نزل الغتره واخذ شفايفي بين سنونه ، أطرافي كلها خدرت مجنت مستوعبة الديصير ضعت بين اديه

148 تعليق

لحد موخر باوع لعيوني وضحك :- شبلاج يولي 

- هاي شسويت

- تافوخ گلبي عجل بس بالأسم حاسبينج عليَّ حرمة ضال بس ادحك واتحسر 

رجع مشى وسحبني وراه وصلنا للبيت واني احس روحي فاصلة كوة أجر بروحي

اندارلي عاقد حاجبه :- شبلاج نورجان

- اني وين 

- لا يربك هي من غير شي مثولة 

محسيت عليه الا شايلني وفات بيَّ للبيت ملحگت أعترض خزرني يسكتني صعدنا فوك لغرفته شمرني عالجرباية ..

مشى نزع غترته والدشداشة بقى بالداخليات 

واجه دفعني وتمدد انداريتله ..

نورجان :- شو هنا ؟

- عجل وين أولي غير جربايتي

- واني وين أنام

- هين غير

- عززززززة يعني ننام سوة 

- نامي نورجان تاما اطلع حرگة گلبي بيج اخليج تصيحين الغوث خليني گاضب شخصيتي السايبة عنج

ضليت صافنة عليه محتارة بأمري وهو مدد مغمض

هسة أروح انزل جوة لو أبقى صدك انام يمه يقبلون ؟

اي هي عمة شيخة گالت نامي بغرفته شعليَّ اني ..

رجعت لبست بنطروني ونزعت الدشداشة البنطرون تضايقت منه ممتعودة انام بيه گوة جبرت روحي ابقى لابسته ، نمت يمه عالطرف اللاخ ودايرة وجهي عنه

شوي وانداريت باوعتله ايده على عيونه نفسه ثگل

تقربت منه اباوع لوجهه جريت نفس عطره طيب 

وخر ايده رافع حاجبه جفلت ورجعت أبلعم

شبير :- شلون عتوازينا بهالليل بنت شدن المثقفة 

16 تعليق

رجعت لمكاني دايرة وجهي منه صاح 

- حركة لخ انزع أخلاقي عالجرباية وأطلع السايب البداخلي خليني ساتر على روحي 

19 تعليق

خنست هو نام گام يشخر واني هم جنت تعبانة

عيوني ثگلت مدريت شوكت نمت ..

گعدت الصبح امط بجسمي بكسل فتحت عيوني تذكرت اني بغرفة شبير باوعت ما هو بالغرفة طالع

دا اكوم من الجرباية وانتبهت بنطروني !!

52 تعليق

باوعت داير مدايري لكيته مشمور بالكاع ضليت صافنة اني شوكت نزعته ، كمت اكمز من تذكرت اني نايمة يمه البارحة بهذا وضعي بس والله اتذكر نمت بالبنطرون معقول نازعته بدون لا احس 

لبسته وگمت للحمام غسلت وجهي لميت شعري انتبهت لرگبتي بيها طگع حمر ، منين متحسسه ما اتذكر اكلت شي البارحة 

93 تع

نزلت صبحت عليهم ملتمات بالمطبخ يحضرن بالريوك 

عمة شيخة تباوعلي وعاقدة حاجبها وسهاد تهز بيدها 

شيخة :- معليج انتِ واگضبي لسانج لا بالله الكريم عتشوفين مني شي ما يعجبج

1 ت

- وانا شحجيت عمة جلمة والاخرى لصمتيني 

- جوزي من البت سهاد 

- والله غادة بنت عمي أحلى كسرتوا بخاطرها المسكينة جنتوا معشميها تاخذوها لشبير 

- محد حاجي بهالسالفة غيرج اسمج بـ بيتهم تملين براس البت تردين لومي روحج اذا هيج مكسور خاطرج عليها

- وانا سويت مو زين عجل الغريبة صارت احسن من بنت عمنا 

1 ت

- رادتو هاي مالنا دخل احنا

- وابو علي عجب مشى على هواه وخلاه يعقد على هاي مدري منين ما منين 

تيم :- انا شحجييييييييييت

13 ت

فزينا كلنا على صوته وهي وجها گام يذب ألوان ومتعرف شتحجي

- يا خوية فدوة لعينك يا حجاية ردي لمجانج هيج انا أهذري لوحدي

4

- وحگ عديلة مريم الأسمعها جايبه نورجان بالطاري ما تلوم الا روحها عندجن حجاية زتنها جدامي تاشوف عش معترضات بالله

صابرين :- يا خوية عش نعترض هاي رادتو بعد شعلينا

باوع لسهاد بخزرة عافهن وطلع وهي تضرب بخدها 

سهاد :- يا عمة زعل مني ززززعل ابو علي امداني شحجاني 

شيخة :- تستاهلين خاطر تگضبين لسانج هذا اليهتر اهو موصيجن عش تعاندينو

- بطلت عمي والله بطلت ها اها سديت حلگي 

- تانشوف لشوكت يبقى مسدود

اجت سحبتني وطلعتني وياها ودخلتني لغرفتها

وسدت الباب باوعت لرگبتي خفت منها حسيت روحي

مسوية شي غلط بس مدا أفتهم ليش ..

گالت :- شبير البارحة نام حدرج ؟

هزيت راسي واني أفرك بأيدي

وگفت قربتني عليها :- فضت سالفتكم ؟

13 

صفنت : - يا سالفة ؟ 

ضربتلها صفنة بوجهي وضلت ساكتة تباوعلي 

تنهدت :- يعينو لگلبك ييمة يشبير 

حطوا الريوك برة بالحديقة ملتمين كلهم على طاولة جبيرة وسهاد واگفة تبوس براس عمو تيم ويحجون بيناتهم گعدت يم درة صار شبير گبالي باوعلي وغمز 

العيون عليَّ مدري من شبير اللي احس وضعه مو طبيعي اليوم لو خواته اليتنادسن بينهن غصيت غصة 

كام عمو تيم اباوعله لابس قميص وبنطرون أسود بأسود كال :- انا طالع اليوم للنجف جائز اتعطل هاليومين 

3 تعليق

شيخة :- شعندك غاد

- يم سلطان النجف يمة عندي خدمة بالعتبة العلوية 

- فدوات اسمو ابو الحسن روح ييمة الله يسهل طريجك وينورلك دربك ومقبولة الخدمة ان شاء الله 

خواته وگفن يسلمن عليه قبل ليروح فاتت عمة جوة بسرعة جابت مبخرتها واجت تبخر بيه وتقرة بكلماتها ا

شيخة :- من عين امك وأباك ومن عين جار الحذاك عن عين ازرگ عن عين افرگ عن عين ما صلت على محمد وآل محمد 

باس راسها وگف يوصي بشبير :- شبير عينك عالبيت والاهل بغيابي ما اطول انا يومين والثالث وارد

انتفض معترض

شبير :- وين يخوي انا راد الليلة ويَّ خالي لبغداد 

3 تعليق

- متتحرك من مجانك عجل منو يبقى بالبيت نخليه سايب 

- الولد موجودين 

- لأ انا اريدك انتَ تلزم مجاني تايحتاجون شي مأمن انتَ موجود هين

- خالي معيقبل

- خالي اصلًا كال مالو لزوم يجي وياي انتَ وتكك الأخر مآب تضلون هين 

- هذا هو التريدو يجرالك 

أشرله يگوم وگفوا على جهة مشيت دا افوت للبيت صرت قريبة منهم سمعته يگله ..

تيم :- البت أمانة عندي وانا انطيتها جلمة ما تتقربلها ولا راح تمم زواجك منها خليك ازلمة وضل عند حجايتك لان بس اسمع جايسها أفلع راسك 

- لا وين مثل اختي 

- شبيرررررر ادري بدماراتك فواينك سابقتك وحگ هذا المتعنيلو ورايح بدربو الزمك احسب الله ما خلقك

- هذا هو يالطيب لتوصي عقلت ترى انا مو شبير القديم 

- نشوف دحك شلون أعامل بنتي درة بالبيت تعاملها 

- عجل اروح ابوسها دحكتك الصبح بست درة

حجاها ودا يمشي جره من ياخته :- لا انتَ الظاهر فلت بيك الزنجيل 

                    ... 《 شهربان 》 ...

كاعدة بالغرفة مدنگة راسي بين رجلي ايد ماما على شعري خايفة عليَّ

شدن :- شلون صرتي ؟

رفعت راسي باوعتلها عيوني گوة اشوف بيهن احس الرؤية مغوشة عندي صعب اركز بالكدامي جسمي احسه نار

2 تعليق

شهربان :- دا احترك ماما 

- منين اجيبلج شسوي بروحي يا الله

حجتها وبجت رجعت دنكت فاقدة الشعور بالداير مدايري كل فكري وخلايا جسمي تصيح اريد حباية تطفي النار المشتعلة جواي

نوم منايمة صار يومين طيف بابا يلاحگني بكل مكان صرت اخاف اباوع لأي مكان بالغرفة لا اشوفه 

من شافت حالتي گامت للباب تدگدك بيه وتصيح عليهم

انفتح وفاتت مرة عمو

كفاح :- شبيج تدگدگين شلون احنا منخلص 

- صيحيلي محمد

- شتردن من الولد عوفنه عاد بحاله تردين تستعطفينه حتى ياخذ بنتج الساقطة

- كفاح الله يخليج والله گلبي خلصان باوعيلها فاقدة راح تروح من ايدي 

- شتررررردين

- بس يجيبلها حباية من الحبوب الجان ينيطها الها

- ما عنده بطل منه 

بجت :- الله عليج كفاح مو انتِ ام دتحسين بلوعتي 

- انتظري لعد 

راحت وسدت الباب ماما مصدگت اجتني تمسح بدموعها :- هسه يماما حتجيبلج حباية وترتاحين

مرت الساعة والساعتين وكفاح ما هي عرفت ضربتنا بوري ماما مگابلتني الليل كله كل شوي ينعگد لساني واصير ارعش وتگعد تفرك بجسمي وتسمي عليَّ 

5 تعليق

صارت دنيا نص الليل ماما نامت على گعدتها واني بحضنها  فتحت عيوني گمت حركت نفسي بصعوبة جسمي كله منمل بدون ما أفززها ..

رحت للباب جريت اليدة انفتح !

طلعت رجلي اخذتني لغرفته فتحت الباب ودخلت ظلمة ما اشوف شي همست :- محمد

مشيت شوي انرگعت بالميز تواليت اجت الحافة بصفحتي شاغت روحي عطت بصوت متوجعة 

فز يضوي بالفلاش وگام شافني 

محمد :- بان

كام فتح الضوة يباوعلي :- شتسوين هنا

فركت صفحتي متأذية منها گتله :- اريد حباية

رفع حاجبه وضحك  

- وكت المصلحة عرفتي محمد ليش مو اني طلعت مو رجال شعندج جايتني هسه

بجيت :- بس وحدة 

- ما عندي كومي اطلعي 

كعدت بالگاع دموعي تنزل غصب عني

صرت اتوسله :- حرام عليك دا اموت والله 

- تستاهلين اليصير بيج

- ليش شسويتلك 

- خليتي غيري يعقد عليج كتلج اريدج بس الي 

- مو اني عمتي سجودة جبرتني 

دنك يباوع بوجهي :- تضحكين عليَّ لج 

1 تعليق

- والله هي جبرتني عالعقد 

- جنت مستعد ابيع الدنيا حتى اخذج بس انتِ كسرتيني بسوايتج الأخيرة

- حباية محمد راح اموووت من التفكير 

- شنو هو اسوي التريده بس انطيني

مد ايده يلعب بشعري :- اريد اگضي ليلة وياج

ضليت ساكتة أرمش بعيوني اردفتها بضحكة واني أهز راسي 

- ليش تضحكين

- دا اتشمت بروحي الجانت مأمنة بيك 

- اهوووو باعتهن براسي بسرعة بان اي لو لا

- وهسه تريدني اجاوبك ؟

ضل ساكت يباوعلي كتله :- هذا جوابي الك 

حجيتها وتفلت بوجهه وكمت دا اشرد انجريت من شعري حيل عطت لزمني ركع راسي صرنا اني والحايط 

سوة ، اختل توازني الكاع كلها صارت تفتر بيَّ 

طلعت امشي فزت ماما عالصوت طلعت من الغرفة شافتني 

شدن :- وين جنتي بان شبيه محمد يصيح 

ذبيت روحي بحضنها ومگلبة بأيدها بقوة

- ضميني راح يكتلني ضميييني 

- اسم الله ماما شجاج شو تعالي

طبينا للغرفة خلتني أمدد عالجرباية وهي گاعدة راسي بحضنها لازمة ايدها حيل وأرجف دموعي تنزل 

- ساومني بشرفي 

باوعتلي ممفتهمة :-  راد ينام وياي ليلة مقابل ينطيني حباية 

- لا يا چلب يا ابن الزمايل شوووووداج لغرفته انتِ

- شكد رخيصة لعد 

- لا يأمي لا لتحجين هيج انتِ انضحك عليج

فات همام للغرفة يباوعلي تنهد وتقرب مد ايده لجيبه وطلع علبة صغيرة مدلياها :- هاج الطالبته

كمت بسرعة تلاگفتها من ايده مثل المخبلة طلعت منها اثنين طبگتهن سوة وشربتهن بدون مي اريدهن ياخذن مفعولهن بسرعة دا ارتاح من التفكير اللي أكل راسي 

دا اطلع بعد من العلبة جرها مني حيل 

همام :- الشربتيهم كافيات وخلي ابالج منا وجاي ماكو بعد محمد يجيبلج حبوب 

ابتسمت :- يكولون زوجي تاجر مخدرات 

- لتتأملين زايد بان وتلاحگي لنفسج لج اني سنين اباوع لأمي وخالي وذاب روحي بنص شغلهم ولا مرة فكرت اسويها واخذ حتى لو جرعة صغيرة 

- غصبًا عني مو بيدي

- تگدرين والله 

- ما اگدر أنام بدونهن

- جسمج تشبع مهدئات حتى گام مياخذ مفعوله بحباية واثنين تحتاجين أكثر 

- برأيك عاجبني هالشي ؟

- لعد ليش ماشية بيه

- موووو بيدي يا بشررر مو بيدي بكل مرة اگول گطعت ارجع الگي روحي ادورهن مثل المخبلة بلا وعي مني

- وليمتى يعني 

- لما يفرجها ربك 

حجيتها ورجعت راسي بحضن ماما اللي تباوعلي وايدها على خدها دموعها تنزل بسكتة ما بيدها شي 

انطه العلبة لماما وطلع من الغرفة ونمت

ذيج الليلة احاول انسى كل الصار بالنوم 

مر كم يوم على هالوضع عايفيلنا الباب مفتوح بس ما اخطي برة الغرفة مخلصه وقتي بالنوم ماما تتوسل بيَّ حتى نشرد بس وين نروح واحنا حتى مستمسكاتنا عندهم منكدر نسافر سجودة مشددة الحراسة هالمرة وموكفة زلمها برة البيت خاف وحدة تطلع

انفتح الباب وفاتت هبة وياها بنية شابة 

أشرتلها عليَّ لوت شفايفها ..

تمارا :- هي هاي الجان كاتل روحه عليها 

هبة :- يمعودة شبيج جان يضحك عليها كاسرة خاطره محد مكلبها بساعة الزواج ما اخذ الا بنت الحسب والنسب مو وحدة ملفينها من الشوارع

ضحكت بصوت عالي وخلت ايدها على حلگها انتبهت بيدها حلقة عضيت شفايفي وابتسمت عرفتها خطيبته 

- ليش تضحكين 

- مبروك أخذتي فضالتي 

- ومصدكة هو جان يحبج ؟ لج بابا هو يسد تليفونه منج ويرجع يخابرني مثل الطاير الطاير مصدك يخلص منج

ضحكت تك خد :- تتهنين بيه 

- موووووتي غيرة اختارني اني وفضلني عليج والاسبوع هذا عرسنا 

- منج المال ومنه العيال 

- اييييع مخبلة 

- اي والله ديري بالج ترى مرات اهجم عالبشر بدون ما ادري بروحي ما احس الا خانكتهم لو مشلعة اظافرهم لو لاكطة عضة منهم 

- همجية مختلة عقليًا مو بعقلج

- ممصدكة ؟ هاي هبة يمج واسأليها مرة ملكيت احد يمي اجيت اكتل روحي 

اندارتلها وهاي اللخ تبلعم

هبة :- امشي تمارا خلي نسد الباب ترى صدك مخبلة مرتين حاولت تنتحر وتلاحكولها على آخر لحظات

- عزة شنو من بنية بس لو اعرف شنو شاف بيج وضل وياج كل هالمدة اكيد جنتي مشبعته مبينة رخيصة مثل امج 

- العايبة من تعاديج تحط سوالفها بيج 

ضلت صافنة :- شقصدج ؟

- روحي لمحمد يفسرها الج 

حجيتها ومددت عالجرباية دخت منهن دردمن غلطن لوحدهن شافني ممعبرتهن خلن وراحن ، نزلت دموعي

ما ابجي لأن ما اختارني بس متندمة عالأيام الخلصتها وياه واني معشمة بحبه ومضحوك عليَّ بكلامه ووعوده 

انفتح الباب وفاتت عمتي لازمة ماما من شعرها تسحل بيها وهي تحاول تقاومها شمرتها بنص الغرفة 

أمجاد :- يلا لججججج لمي ملابسج وتوكلي منا بيتنا ميلفي الساقطات

شدن :- ما اعووووووف بنتي لو تگطعوني 

- لج بربوك بنتج تزوووووجت كم يوم يجي رجلها ياخذها وتولي لبيته انتِ شعندددددج باقية هنا لو راسمة على سالم خاطر يلوحج من الورث

- مگشرين بنتي تردوني اطلع اخذها وياي

- مالج بنية عندنا سجودة شرطت يعقد سالم عليج يصيرلج مكان