رواية الدنيا دوارة الفصل الثاني عشر بقلم ناريمان
ماحسيت بشي غير زلقت وطحت وعقلي وقف نشوف في الدروج ينقصو لسن وصلت تحت تخذرت ومعش حسيت بشي
منى شافتني وقعدت ساكتة وبعدين عيطت عميمة ياعميمة تعالي غزل طاحت
جت عمتي ورحمة مصدووومة في اختها
عمتي.. ووووه علينا اتصلو بعماد ولا عامر بسرعة وووه عليك ياغزل
رحمة اتصلت بعامر وقالتله وعامر خبر عماد
عماد.. اه عامر.... شنن تقوووول... تي كيف صار كيف.... انا قريب
.
قاموني لحوش العيلة وركبت منى بتجيبلي عباية ومشت تجري مسحت الزيت نظفاته ونزلت العباية ولبستني ودخل عماد مفجوع
عماد.. غزل غزل خيرك غزل فيقي فيقي حبيبي فيقي وجاء بيقيميني لقاني نازفة شوي
عماد.. لا يغزل لا😢
عمتي.. وووووه الكراة بترمي اجري ياعماد خللي نمشي معاك
عماد.. لا مانقدرش نستنى
حطني في السيارة وكل واحد يدعي شكل
عماد.. يارب تكون بخير يارب مانخسروش البيبي يارب نوضهملي بخير
عمتي.. يارب استر يارب تنوض بخير وتجيب وليد يارب
منى.. يارب ينزل العيل ولاتموت معاه يارب
رحمة.. يارب ماتنفضحش منى يارب حوشي مايخربش
عامر.. يارب احفظها لراجلها ربي يكملها معاك ياوخيي
دخلت للإسعاف وعماد كان يرعش تكرر معاه الموقف اللي فات وقعد يبكي
عماد.. ربي لا أسألك رد القضاء ولكن أسألك اللطف فيه 😭
اتصل بيه يوسف
عماد.. يوسف تعالى للمستشفى غزل طايحة
يوسف سكر وناض زي المجنون يجري
.
عامر.. بوي
عمي.. نعم
عامر.. مرت عماد في المستشفى طايحة
عمي.. ياستير كيف صار
امنية😭
عامر.. ماشي انا وامي توا
.
طلع عامر وعمتي للمستشفى
رحمة ومنى
رحمة.. انت تبي تخربي حوشي كيف تحطيلها زيت في الدروج كيف مش سحرتيها انت وامك خلاص روح هاذي حرام عليكم
منى.. حرام علينا وهي مش حرام انها خذت حب حياتي
رحمة.. اي حب بالله عليك اي حب هو في حيلته ماعبرك ولاكلمك انت اللي عيشتي روحك في وهم
(منى كانت تشوف في عماد زمان لان صاحب ولد عمها وحباته من طرف واحد بس عماد في عمره ماشافها لين خطب غزل ومنى ماعرفتش وقتها انه خطيب غزل الا يوم العرس ومن يومها بدت رحلة الكره والحقد تجاه صاحبتها)
منى.. من الأخير تحلي فمك نضمن طلاقك مش كنت كارهتها لان عمك يحبها اكثر منك لان عامر مايحبش من يتكلم بسوء عليها ولان يشكر فيها في طبخها وطبعها وطيبتها توا طلعلك العز فيها
رحمة.. لان حرام تقتلي روح البيبي شن ذنبه حطيت نفسي في مكانها ووووه ماحرها ان شاء الله تجربي يامنى شعور الأمومة والحمل هذا اغلى شي عندها توا حرام عليك حرام
منى طلعت روحت
طلغت دكتورتي وعماد ويوسف 😲😲😲
الدكتورة.. الحمد لله على سلامتها وضعها تحسن وتجاوزت مرحلة الخطر
عماد.. الف حمد ليك يارب والبيبي شن وضعه
الدكتورة.. بخير الحمد لله تعبنا بش نقذناه ونثبتوه لان لو عطلتو شوي كانت خسراته
عماد😭😭😭
الدكتورة... المريضة محتاجة راحة تامة تبعد عالمجهود والضغوطات وكل شي
تذكر عماد وضعي
يوسف.. الحمد لله مبروك نسيبي
عامر.. الحمد لله على سلامتها
عمتي.. الحمد لله روح بيا وليدي معش قادرة نقف من الرعشة وووه
روحت عمتي
وعماد جمع قوته.. يوسف تعالى نحكوا ضروري
يوسف.. شن في
عماد.. غزل مسحورة
يوسف.. شن تقول
عماد.. زي ماقتلك وفاتت علينا ايام امر من المر وطلبت حتى الطلاق بلا سبب وكذا مرة نلقاها تبي تنتحر
يوسف.. لا حول ولا قوة الا بالله كيف هكي وسلكتين
عماد.. انا امس كيف عرفت وتأكدت والوضع في الحوش مش مضمون ليها
يوسف.. توا نروح بيها انا لأمي ونرفعها لشيخ
عماد.. بتمشي معاك بس توا خلي تنوض وتشد صحتها
فتحت عيوني وكنت في دوامة نشوف ونتنفس بس مانحس في شي غير جاء عماد ويوسف وامي وبوي وغالية اختي وقفوا عليا مانسمعش فيهم نشوف فيهم بس بعااااااااد وروحت لحوش اهلي حسيت براحة شوي
وفات شهر وانا هكي قعدت ماما وغالية معاي ماخلونيش ثانية بروحي وانا مانحس بشي
عماد. الو غالية
غالية.. اهلا عماد.
عماد.. غزل كيف حالها
غالية.. زي قبل مانطقتش حرف
عماد.. بنجي توا بترفعها انا ويوسف لشيخ
غالية.. به بنمشي معاكم
عماد.. تم
نشوف في امي لبستني عبايتي وخمار كنت نبي انحيه بس قوتي طاحت
يوسف.. هي غزل نوضي نمشو مشوار
وقفوني وشفت عماد في السيارة كنت نبي نرجع بس مسكني يوسف
يوسف.. خيرك غزل راجلك هذا عيب
ركبني بالغصب وانا نبكي بس مش قادرة نتكلم
عماد كان قلبه يتقطع عليها وعلى حياتي كيف كانت وكيف صارت قعدت نسوق وشاد دمعتي لين وصلنا للشيخ اول مانزلنا
تحولت غزل لإنسانة ثانية كأنها فرس هاجت وبدت تبي تهرب وانا يوسف نشدوا فيها ودخلناها بالغصب غالية نهارت وهي تبكي
عماد.. غالية شدي روحك جايبينك بش تساعدينا ودخلنا للشيخ ودردش معانا شوي بخصوص وضعها كنت نحكيله وفي قلبي غصة
انا.. شيخ فيه خطورة على وضعها هي حامل
الشيخ.. لا ابدا كيد الشيطان ضعيف مايقدر يدير شي بذكر الله
وبدا يقرا وانا ويوسف شادينها وهي كانت بتنفجر وتضرب فينا فاتت ساعة مسكرة وهي هكي لين اغمى عليها
روحنا بيها وقاللنا الشيخ نرجعوها بكرا وعطانا مية وزيت
روحت للحوش وكنت مسيب كل شي سيبت شغلي واهلي معش شفتهم المهم ننقذ زواجي ومر شريط زواجي كله كيف كنا سعداء وكانت مهنيتني وقريب درت كارثة وخنتها مع صاحبتها سترني الله اللي فقت على نفسي وبعدت الشيطان بينا حسبي الله ونعم الوكيل في اللي وصلنا لهالمرحلة
.
اليوم الثاني رجعنا للشيخ ونفس القصة واليوم الثالث اول مابدا يقرا وهي ساكتة ماتحركتش وفات وقت وماتحركتش
الشيخ.. ماجئتم به السحر ان الله سيبطله ان الله سيبطله ان الله سيبطله
وعيطت عيطة شقت السماء وشقت قلبي وروحي معاها ريته فيا ولا فيك ياقلبي ريته فيا ولا فيك ياغزل من خذيتك تمرمدتي معاي تحملتي طباع امي ونزواني وحطيتيني انا واماليا فوق راسك ااااااه ياقلبي
عيطت لين وقفت وهي تعيط في صوت واحد وبعدين داخت
حاول الشيخ يفيقها وهو مركز واول مافتحت عيونها ارتاح
الشيخ.. الحمد لله الحمد لله اللهم رب الناس اذهب الباس اشفي انت الشافي لا شفاء الا شفائك شفاء لا يغادر سقما
انا
. فتحت عيوني لقيت روحي في حظن عماد ويوسف شاد ايدي وغالية لابسة خمار وتبكي وشيخ يحمد في ربي كان راسي عبارة عن صداع
الشيخ.. شن اسمك
انا.. غغ غزل
الشيخ.. اذكري الله
انا.. لا اله الا الله محمد رسول الله
عماد الفرحة في عيونه وعيونه مدمعة ويوسف باس راسي غالية مستمرة تبكي
الشيخ.. اصحاب الشر هلبا حصني روحك وبيتك بالأذكار وحافظي على فروضك مايقدر يمسك شيطان وتحسبي في اللي كان السبب وحافظي على الغسل والزيت سبع ايام
استوعبت ان الشيخ كان يقرا عليا روحت وانا منهكة وتاعبة
وكلهم ساكتين روحت لأمي ودخلت الحوش كانت تصلي في الضحى جيتها نبي نبكي في حظنها نزلت عندها لين طلقت السلام وارتميت في حظنها ااااااااه ياحظن الام مادفاك
امي.. الحمد لله نجيتلي بنيتي
قعدت تحمد وتهلل وجاء بوي والجو تحول لضحك مشيت ونبي نصلي نبي ندعي نبي نربي بس في اللحظة هاذي توضيت وصليت واول ماسجدت خانتني دموعي بكيت بأعلى صوت بكيت وبكيت لين دهشت بكيت كل شي صارلي ودعيت بكل شي في قلبي وانا ساجدة تذكرت ان حامل معش عرفت حق او لا انا حامل حلم او واقع كملت صلاتي وجيت جنبهم قربت من عماد وهمست في وذنه
انا.. بنسألك ماتضحكش حلمت بروحي حامل🤭
عماد..😂همسلي مش حلم هذا واقع يام جاد
انا😱😢😭
فرحت الحمد لله قعدت هالكلمة على لساني طول اليوم وطبعا عماد روح واما قعدت عند اهلي سهرانة انا ويوسف في دار المعيشة والباقي رقدوا
هدرزنا وحكينا كل شي
انا.. انت مرتاح
يوسف.. مانقدرش نكذب عليك لا مش مرتاح
انا.. علاش
يوسف.. طلعت مانعرفش نحكم عالناس
انا.. كيف يعني
يوسف.. امل مش هي الانسانة اللي تناسبني تظاهرت قدامي بالبنت المحتشمةالخجولة وبعد تزوجتها طلعت العكس
انا تذكرت امنية.. لو صبرت كنت خطبتلك انا بس نصيبك
يوسف.. نروح ندورها نلقاها عالنت ياما في البلكونة او عالسطوح من غير لبس مستور تصرفت باللين بالقسوة مانفعش نرفعها لمكان نلقاها لامة شباب وضلربة عليهم الميعاد كشخت سايرت مافيش فايدة وفيسها كلع قروبات مختلطة ودردشات جماعية
انا.. وانت ساكت
يوسف.. لا بس نستناها لين تولد وبنتصرف تصرف ثاني هاذي ماتعرفش تربي يومها قالت لمؤيد ولد غالية اهنبلي من خالك يوسف فلوس كيف بنأمنها على صغاري تربيهم
انا.. مش عارفة شن نقولك
يوسف.. انا مش صغير ونعرف كيف نتصرف واللي حكيتهولك شوي بس المستور اكثر
انا.. ربي يريح بالك
يوسف.. وانت شن ناوية اديري
انا.. بعد مانطمن على وضعي بنرجع بس الحوش خايفة منه
.
اليوم اللي بعده
يوسف مشى للشيخ وحكاله على خوفي من الحوش قاله الشيخ فتشوه بالبلاطه وعطاه مية يحطو فيها شن يلقوا
جاء يوسف للحوش وتلاقى مع امنية في الباب
يوسف😍.. هلا هلا
امنية.. 😐 اهلين
يوسف.. كيف حالك💓
امنية.. بخير
يوسف.. عماد فوق مايردش عليا
امنية.. اي
يوسف.. ممكن ياسمحة تناديلي امك
امنية💔😔 تمام
دخلت امنية واضايقت لان يوسف جاء في الوقت الغلط قعدة تحاول تنسى وهو بعد ماتزوج جاي يتقرب
طلعت عمتي.. تفضل اوسيفة
يوسف.. ياعمتي نبيك فوق في شقة عماد
عمتي.. ان شاءالله
ركب يوسف وهو متفاهم مع عماد وركبت عمتي وتلاقت مع عامر وركب حتى هو
يوسف.. عامر وعمتي تفضلوا قعمزوا ومشى هو وعماد يقلبوا في الحوش ماخلوش تركينة مادوروش فيها ومالقوا شي
عمتي.. فهموني شن صاير
عماد بعد مافقد الامل تذكر المخدة ناض قض المخاد الاثنين عالسرير وطلع اللي يدور فيه قماش اسود ملفوف وجابه قدامهم
يوسف.. واخيرا
جاب المية ونقعوه فيها وفتحوه كان شعر شعري انا وفيه حاجات استغفرالله
عمتي😱
عامر😱😱😱
عماد.. غزل كانت مسحورة يام وهي عند اهلها ترتاح لهذا السبب مش دلع ودوة نسون
عمتي.. حسبي الله ونعم الوكيل حسبي الله ونعم الوكيل
.
عماد ارتاح شوي بس قاعد مش مطمنلان ماعرفش من عدوهم
.
حاول يرجعني بس انا رفضت نرجع لين نجيب مش مطمنة على روحي في العمارة وعماد وافق ورجعنا لأيام الخطوبة مكالمات وشوق وحب
وسامحته على كل شي لا الازمة اللي مريت بيها هو ماتخلاش عليا ووقف معاي وسيب كل شي بش يعالجني الانسان يبان في المواقف هاذي تعرفي من ليك ومن عليك
.
رحمة كانت مع عمتي وتسمع في العيلة كلها تتحسب عليهم لان هم سحروني هي وامها ومنى ونفسيتها صفر
.
بعد شهور كنت انا في الثامن وامل جابت بنوتة ويوسف فرحان وزعلان فرحان ببنته وزعلان لان امها اختيار خاطأ بس كان مقرر بيعطيها فرصة وسمى بنته سما
.
رحمة كان فيها الوجع واستمر 5 ايام وجع رهيب وماقدروش يولدوها وتعذبت زيادة على ضميرها حاولوا يدخلوها عمليات بس كان ضغطها مايسمحش عرفت ان ربي يعاقب فيها وقررت تحكي كل شي لان كل هالشهور وهي تسمع في حسبي الله ونعم الوكيل وعرفت ان عقاب ربي اكبر من كل شي خافت ربي ينتقم لغزل بعيلها خافت على صغيرها
رحمة.. ووووه ياعامر نادي امك وغزل ومنى وماما وعماد بالله عليك وامنية ناديهم بالله عليك بنمووووت
طار عماد يجري يحسابها تودع ونادا الكل جاب امه وامنية وانا خطم عليا عماد وجيت معاهم رغم اني مترددة بس ماحبتش نكسر خاطرها حامل
اول مادخلنا لقينا منى وامها قاعدين ورحمة تقول فيها الموت من الوجع ووصلت عمتي وامنية وعامر ووقفنا كلنا وعماد كان متحشم واقف ومرت خوه فيها الوجع جاء بيطلع
رحمة.. عمااد لا اقعد نبيك تسامحني
كلنا😲
رحمة.. غزل سامحيني بالله عليك والله ماليا علاقة وماني راضية عاللي صار بس منى وماما جبروني عامر والله مادخلي صح سكتت بس ماكنتش نبي
انا.. شن تقولي رحمة
منى وامها تبكشوا
رحمة.. منى وماما اللي سحروك يبوا يطلقوك من عماد لان منى تحبه انا سكتت وعندي علم بس ماكنتش راضية ومنى هي اللي دارت زيت في الدروج بش اطيحي وتخسري العيل لان ماتبي شي يربطك بعماد سامحيني غزل عمتي عامر سامحوني عماد سامحني مانبيش ولدي يصير فيه شي سامحوني معش تقولوا حسبي الله ونعم الوكيل خلاص انا معش نقدر نتزوج انا من الصدمة لين طحت شدني عماد وقعدني عالكرسي
عامر.. رحمة انت طاااال
انا.. لاااا لا ياعامر لا مش هكي
رحمة😭😭😭
منى.. كذابة كذابة علاش تتبلي علينا
وقفت وانا هادية... كلمة حسبي الله ونعم الوكيل حندعي بيها عليك لين نموت يامنى وشفتيها شن دارت في اختك وطلعت وعماد ولا كلمة
عمتي.. تطيكم مايرفعكم ياشهاب الفتنة يا&#&#&#&#&
طلعت عمتي وهي تولول وتدعي عليهم وعماد ساااااااكت
عامر واطا راسه وقعد يفكر ومصدوم في مرته
زاد الوجع على رحمة وجوها الممرضات رحمة قولولها تسامحني بالله عليكم
كنت نسمع فيها ووجعتني ورجعتلها
ربي يسامحك يارحمة
رحمة.. من قلبك
انا😐.. اي من قلبي
ضحكت في وسط المها
عادي نسامحوا وقت الشخص يعترف بغلطه بس مش كل غلط
وشوي نزل البيبي وجابت بنت
.
روحنا وكل واحد ساااكت يفكر في اللي صار
وروح بيا عماد لحوشي وماعرضتش لقيته مغيره كله
عماد.. نورتي حوشك
انا.. منور بينا
عماد.. تعبت ياحبيبتي تعبت مانبي شي غير نرتاحوا
